رواية دخيله الشيخ زين العابدين الفصل الواحد والاربعون بقلم أوتار حزينه
صفنت علي من حجه هيج سالت بتردد مالك بيك شي جان منزل راسه رفعه عيونه افترت عليه
من فوك ليجوه الاعجاب شفته
بيهن ذب حسره ودار وجهه
مني رد لا مابي شي مااعرف ليش ماسكتت گلبي كلي هو
بي شي لان شفته جان فرحان ويضحك وهسه
غير شكل عبالك احد غاثه لو سامع
شي ضوجه سالت بخوف
وايهم اجه بالي
احد غاثك صار شي
غمض عيونه هم ذب حسره هز راسه
بلااا وكال
اروح اسبح لان احتريت كلش
صفنت علي من طلع من يمي وعافني باوعت
لروحي والمكان الي اني بي كلت
شصاير وليش هيج
كام يتصرف
كعدت لان تعبت من هاليوم ومن
الشفته منه دموعي نزلت رجع وسال
وو
سكت من شافني ابجي درت وجهي منه
وكمت امسح بيهن
يولي لاتبجين والله مااقرب منج ولا اگضبج
الا وانتي راضيه
فكيت عيوني من سمعت كلامه درت وجهي
علي صفنت بذهول قرب وكعد
اگبالي كمل بصوت مخنوك
شفتج من بجيتي يم باب بيتنا وعرفت
انتي خايفه ومتوتره من هالشي
ااني ماجنت ابجي من وره هالشي
رفع حواجبه وصفن عليه
رددت بخجل وبدون مااباوع علي
شفت بابا واكف باب بيتنا وكمت ابجي
شنووو
سالني بذهول ردد
يعني انتي جنتي تبجين من وره عمي
اي
مالك
ردت بصوت مخنوك وهي تجنب ادحك
عليه ماعرفت شاسوي مزاجي كلو تخربط من
شفتها تبجي وكلت ماتريد اخذها
من وره الصار بيها
مديت ايدي ولزمت ايدها وكلت
جنت مفكر بغير شي
ليان
باوعت علي صافن عليه بنظرات خلت
گلبي يدك بجنون ارتبكت كلش ومنظره خلاني
اخجل بعد اكثر فاتح دكم قميصه
وصدره مبين
درت وجهي لغير جهه لزم ايدي
الاثنين وباسهن بشمه نفس طويل كال
بصوت متغير
عبالي مااتريدين اقرب منج
كام وكمت ويا حظني من خصري
وجابني علي تردد للحظه بعدين دنك وباسني من خدي ولمني بقوه بحظنه
وخر مني بصعوبه واحس جسمه صار حار
ونفسه سريع لزم خدي رفعت
عيوني كال بصوت مخنوك
انتي مااتعرفين شسوين بيه من ادحكين
عليه بهل العيون
نزلت راسي وخليت ايدي
على صدره باسني من گصتي كال
احبج يولي احبج واموت عليج
رديت بهمس واني ضايعه بهل المشاعر
الي سيطرت عليه وخلتني اهدأ بحظنه
واني هم احبك مالك
هلكلمه خلته يشيليني بسرعه وياخذيني لغرفتنا
هناك سلمت روحي اله ومثل ماكال
من اخذني لحظنه
صرنا جسدين والروح وحده
ايهم
التمو عليه كلهم اهلي وعمامي والتهديد اجاني
من الكل مو بس من مالك كاعد
بالاستقبال واسمع عمي
الجبير يهدد بيه
يتبرون مني اذا بعد وصلت لبيت ليان
او اعترضت طريقها
رديت بس كلمتين
بعد مااروح
كمت من يمهم ورحت للدرج وكفت يمه
باوعت لغرفه لارا كاعد تهز
بانس وتبجي
عيوني صارت بعيونها نزلت راسي وصعدت
لفوك الهم كاتلني والقهر مخنوك واريد
ابجي
طبيت غرفتي امي اجتي ورايه دمعتها بعينها
اجتي ليمي وكالت
لاتقهر روحك يمه وارضى بقسمتك
ااخ غير لو هي قسمتي غير لو هي الردتها
والله مو هي الجنت اريد اعيش حياتي وياها
موو هي يارب مو هي يمه غلطت وغلطتي دمرت حياااتي وخلتني اموت بالدقيقه الف مره من
اتذكر شلون دنت نفسي عليها
وصخمتها وصخمت روحي
وياها
اعرف ايهم بس يايمه تظل هيج تلوم بروحك
وبيها صار عندك اثنين منها واحد
مريض واللخ بالطريق
يمه اني جااي اموت ليان راحت من ايدي
راح تزوج غيري
ولك انت شبيك ماتفكر هي راحت من اخذت
اختها شتريد يمه تجمع بين اختين
وين صايره هاي ومنو يقبل
لا شرع ولا قانون يقبلون بهل الشي
وحتى هي ليان مستحيل ترضى بيك بعد
السويته بيها
ونيت بصوت ولزمت راسي كعدت يمي
لزمتني من جتفي وكملت بتوسل
يمه لخاطري بعد لاتروح عليها جوز منها صارت
مره رجال غيرك وانت سمعت ابوك وعمامك
من كالو الي اخذها هددك بالقتل وهذا طلع مو شويه وراه عشيره تسد عين الشمس من كبرها
يااريت اموت يمه حتى ارتاح
لطمت صدرها بقهر وردت بدموع
واني يمه ماافكرت بيه مااقهرك هذا گلبك
مايوجعك عليه اني وابوك من
تحجي هالحجي
سكتت مارديت كملت
استهدي بالرحمن بعد امك وانساها بطل
تروح وتشوفها وانت تنسى
ابتسمت بالم باوعت الها رديت
المن انسى يمه ليان هنا مطبوعه
اشرت على راسي وكملت
وهنا بگلبي انختم اسمها
دموعي نزلت ودرت وجهي منها بجت عليه
ورددت بصوت مخنوك
الله يهدي بالك يمه ويبرد نار گلبك
وناري مابردت من عرفت هالاسبوع هي
راح تزوج اهلي دخلو انذار من ورايه واخوتي
ظلو وياي ماعافوني خايفين لا اسوي
شي مو زين
الخميس اليوم كله روحي لايبه ومخنوك
اريد اطلع ماخلوني خايفين من رده فعلي
لارا حبست روحها بالغرفه ،،،،،طلعت
قهرها بانس تدعي علي على روحها بالموت امي
راحت الها اخذت السويج وطلعت
ابويه صاحني مادرت بال
اياد لحكني وصاح بيه
وين رايح
ضايج ومخنوك اريد اشم هوه
اخذني وياك
مااحجيت شي اشر على سيارته رحت صعدت
بيها وهو ورايه صافن ومخنوك
ومقهور كلش
وين تريد تروح
اريد اشوف ليان
يعني شلون مانبطل من هالسالفه
اياد اخذني الها خلي اشوفها بالبدله بلكي
ينگطع نفسي منها
رديت بتوسل كال
استغفر الله يارب كافي ايهم لاتسوي بروحك
هيج عوف البنيه وخليها تروح لقسمتها
والله مااسوي شي بس اشوفها
وولك اا
فتحت الباب نزلت ورحت لسيارتي لحكني
ولزمني من ايدي جريتها بقوه
وصحت بي
عووفني
اامشي ااخذك مااتروح وحدك
وكفت واخذت نفس طويل كمل بتوسل
ايهم والله اخذك الها بس لاتسوي شي
ولاتتهور
شااسوي اياد كلشي ضاع وراحت من ايدي
رديت علي بقهر لزمني واخذني للسياره
طلعنا لبيت ليان روحي ممرودة وعيوني
مغوركه صافن واحس بروحي ضايع ومتيه روحي
اياد يحجي مااسمع ولا افهم اي كلمه
هي مصيطره على تفكيري وصورتها
بين عيوني
مااعرف شوكت وصلنا جانت ساعه بالتسعه ونص
بليل وكفنا مسافه بعيده عن بيتهم ماكو شي
الشارع هادئ كال
خلي نرجع ايهم خاف احد يشوفنا
وتصير سالفه
لزمت ايده من راد يحرك وكلت
اانتظر شويه الله يخليك هسه تجي
رااح تموت من وراها شوف وجهك
شلون صار
ماابيه شي بس خليني اشوفها اريد ينگطع
نفسي منها بس اشوف زفتها لغيري
ااستغفر الله يارب تالي وياك
فهمني ولك الكاعد تسوي بروحك حرام
هاي اذيه للنفس والله مايقبل
بيها
مارديت ظليت اباوع للبيتهم واريد اشوفها
اخويه ظل يحجي وياي ويريد
ياخذني من يمهم
وماقبل
ساعه عشره ونص كال
اكيد راحو لغير مكان مو جايين
لهنا
حجه هيج حرك مااعترضت لزمت الستيرن
بقوه من سمعت صوت زفه جسمي
كله كام يرجف من
شفتهم جايين من
بدايه الشارع
هااي هيه
حجيت بغصه اخويه لزمني بقوه وكال
لاتنزل ولا تشوف روحك
سمعت صوت قفل السياره بعيوني
شفت زفتها للي حبيتها ومتت عليها زفه
فرح واني احس بروحي راح اموت
دموعي نزلت من شفتها من بعيد نزلت
وهو وياها فرحان بيها وايده لازمه خصرها
رديت ليوره وكمت ابجي بصوت
اخويه حرك بسرعه وطلع من يمهم يردد
هاي شفتها مثل ماردت اكطع النفس
عاد وعيش حياتك
مارديت اختنكت والهوه كمت مااحسه
يدخل لصدري اشرت اله وكف بسرعه من شاف
حالتي صاح
شبيك اايهم
ماكدرت ارد نزل بسرعه واجه فتح الباب
نزلت رجلي اخذ الهوه بنفس طويل مااحسه
يترس صدري فرك اليه خايف
ومرعوب
ولك شبيك كلي شيوجعك
هاي شبي الولد
رجال طلع من يم بيت اخويه كله
حجي مي رحمه لاهلك
رجع لبيته جاب بطل مي اخويه غسل اليه
وشربني شويه روحي ردت اليه
بعد ماحسيتها رادت تطلع
ظل يفرك بصدري ويردد
كتله ماانجي ليش مااتسمع الكلمه
راسي ثگل وخشمي طك دم
خررب بيك ضغطك صعد
حجه هيج واجه صعد حرك بسرعه وطلع
بيه للمستشفى
🌿🌿🌿🌿🌿
زين العابدين
كلت راح اضوج من كعده البيت ويضيك خلگي بس وجود هيله يمي هي وسوالفها الحلوه خلوني مااحس بهالشي
كاعده يمي ااندحك لفلم ومندمجه وياه جان رعب ويخوف لجن هي ولا بين عليها خايفه منو
شوف زين هذا راح يجتل البنت
اي وراح تفطس وتلحك صاحبها
اخذت منها البرتقاله اكلت شلف البنت صرخت هيله فگت عيونها ولزمت گلبها
ماتت خرب حظها والله بعدها صغيره
ههه تره هذا تمثيل
اي اعرف لجن عبالك صدك
اكلج اليوم زواج مالك
هيله
درت وجهي علي مبتسم عرفت وش يقصد ماارديت لهيت روحي اكل رگي كمل
صاحبي راح ينام بالعسل واني بح
هااك ركي
خليت شلف بحلكه خرب ضحك ورد
ااوي هاي شبيج صايره عنيفه
ضحكت ودحكت لها بذهول من تنعوص بالكلام كلت
عش تحجي بنزاكه ماايلوك لك
ههه ليش لان جلفي وابن عرب موو
صفنت علي الشعر اشكر طوخ هو واللحيه والشوارب والعيون صفر ابدا مايبين ابن عرب جن واحد من ذوله الاجانب الي نشوفهم بالافلام رديت مبتسمه
تصدك انا اشوفك مو عربي شكلك يشبه الاجانب
دحك لي بوكاحه ورد من گرب وجهو مني
عربي ولا اجنبي تحبيني ياهيله وتموتين عليه
ابتسمت وملت علي ورديت
بختك جبير يم ربك وخلاني احبك
ههههه
خرب ضحك عدلت حالي ومديت رجلي دحك عليها رفع حواجبو وسال
عش لابسه جواريب
بارده رجلي ثلج صايره
وج شنو سالفتج لابسه جواريب والروب خير يابه شماخذ انا بطريق لو دب
قطبي حاار وانتي مجودره روحج بهل الهدوم
ههه مدري يجوز انا اشتغل عكس الناس
يجوز
رد وكمل
جيبي رجلج تاشوفها
وخرت الصينيه مديتها لها نزعني الجواريب گضبها عكد حواجبو وكال
صدك هاي ثلج
هههه اي اليكول خالتها بالثلاجه
وايدج هم
شوف
انطيتو اايدي
وج خاف بيج شي مو معقوله بهل الحر انتي هيج بارده وصايره ثلج
مابي شي انا صارلي فتره هيج
وج خاف بيج شي
هههه مابي شي يجوز ما يلوك لي جو اربيل
كمت شلت الصينيه وطلعت بها رحت للمطبخ جلفت المواعين وكم شغله شفتهن على السنك والميز مسحتو غسلت ايدي
وعگبت بالصاله شفت عمه
دحكت لي بضوجه وكالت
صوتج عالي عش هالضحك المالو داعي
مارديت كملت
عمج منا عيب حسج يطلع شيكول عليج
صار عمه بعد مااضحك
تسوين فضل والله
ردت عليه بنتره وكدرت حالي سريت منزله راسي دشيت زين انتبه لي حاولت ابتسم ماكدرت سأل
خير هيله بج شي
لاا
رديت گوه ورحت للكنتور لهيت روحي بالهدوم اريد اكتم دموعي خاف يشوفها اطلع بيهن واصفط بنفس
المكان
يولي شعندج خاتله بالكنتور
مابي شي اريد شغله ونسيت وين خالتها
شنهي شمضيعه
هاا هيج ورقه
وشنو بيها الورقه
يازين تحقيق خما تحقيق
سكت ذبيت حسره سديت الباب دحكت له صافن عليه بتركيز ابتسمت وكلت
مااقصدي ارد هالرد
شبيج هيله احد مكدرج
لاا منو مكدرني كلها نايمه
تعالي يمي
سريت ورحت كعدت يمو مددت رجلي يم رجلو
طخيتها ومال عليها ابتسمت من تحارش
طخيتها مره اللخ ودحكت له مبتسم وهم مال عليها كال زعطوطه
ضحكت وسديت حلكي مال بجسمو عليه صفن بعيوني وكمل
ماجنت اعرف عندج تصرفات مال جهال
يمك انا اصير طفله
اوف وانا احبج هيج يمي
طفله بتصرفاتج بالغرفه وبره شيخه
ابتسمت وگربت وجهي
منو وكلت
راح ادلل عليك جثير يازين اذا تريديني اصيرلك طفله
ادللي يابه شعندي غيرج
وراح اصير مغروره لان اعرفك تحبني جثير وتهواني
يلوك لج الغرور شيخه گلبي بعد وشيخه النسوان من بعد امي وجدتي
من ذكر امه نزلت راسي ودرت وجهي گضب ايدي دحكت له مركز بعيونو. عليه سأل
امي معج
لاا عش تسأل هالسؤال
لاتجذبين يبنت المله
يازين ماكو شي خلنا نكمل الفلم يبوو راح يجتل اللخ مال الثول داانهزم عش واكف
زين العابدين
اعرف امي كاعد تغث بهيله وهي ماتحجي شي ساكته وضامه السوالف عليه حتى ماتصير مشاكل
ادحك لها ملتهيه بالفلم ومندمجه به گضبت ايدها وكمت افرك بها بهداوه سألت
اكلك حرمه مالك وش اسمها
ههه مدري الكواد مايقبل يكول اسمها
هاا صدك سمعت خاله ادكول اسمها ليان
ابتسمت دحكت لي واشرت
خير عش هالابتسامه. الكلها شر
هههه تعرفيها موو
مايغيب عني اي تصرف يخصك اعرفك اكثر من روحي واعرف بيش تفكر
اي بله بشنو افكر
ههه كلت مايقبل يكول اسمها
ههه وج اي الترس قفل وماقبل ابد يكول اسمها لي وكعد يهدد بأسمج وانا اريد بس اكوم اهطره
بله صدك
ههه اي
تغار اذا كال اسمي
سألت بضحك صفنت عليها ورديت
اغار اذا طخ الهوه خدج
عضت شفتها والخدود اشتعلت وشعلت هلي تنهدت وتحسرت وكلت
شلون بهالحال ياهيله
افتهمت سحبت ايدها گضبتها بقوه وجبتها
لصدري صفنت على الشفه
ورددت بحسره
هساع انا شاسوي لروحي المكسره
تنام وترتاح
وخرت بسرعه وخلتنيو صافن عليها بذهول ضحكت بصوت من كامت وهي ادحك لي بشماته
اعلمج يولي قابل اظل مكسر اطيب واخذ حگي منج دبل
ابتسمت وراحت للميز ذبت بتوت جابهن لها ابويه هديه زواجنا سألت
عش ذبيتهن
باردات على ايدي
ابدا مو طبيعيه انتي
طفت الضوه وكامت تثاوب ذبت الروب وفلت شعرها كلت بحسره
هيج تعب زايد لي وماراح اطيب ابد
انام هينه
اشرت على القنفه صحت بغضب
يولي جفي شري تره مصختيها
هههه شمسويه لك
تعالي يمي وانتي تعرفين
زين اكعد راحه مكسر وفاين حظك لايصير بك شي
يولي تعالي انخمدي يمي مااسوي شي ماجاي تشوفيني اسحل بروحي سحل
ابتسمت واجتي ليمي كعدت جريتها من شعرها بقوه من حرگه گلبي
صاحت
ااي شعري
زقنبوت عش فالتو وتعرفيني اضعف من اشوفو
راح المو بس عوفو
لمي وطفي النار
ضحكت دحكت لها بخزره لمت شفايفها وبدت تجذلو تمددت وكلت مبتسم
ناس ماتجي الا بالعين الحمره
صفره مو حمره
ضحكت من صنفت كملت بضحك
عيونك صفر مو حمر
يولي نامي تره گبن
ااي اوي صاير مااتتحمل الجلمه
جريتها من دشداشتها نزلت ليمي وجهها صار بوجهي كالت بضحك
بلا عنف زين
رفعت ايدي ضربت خدها بهداوه اكثر من مرة ورددت
كاعده تلعبين على اعصابي يبنت المله
ههه والله بعد مااسويها
ابتسمت سكتت واحد صافن بعيون اللخ قربت حبيتها من خشمها تنهدت
وكلت
خايف لا اكرب من الشفه واعطب
تنهدت بصوت خلت ايدها على خدي وكالت وهي تثاوب
نام وارتاح نعست وبردت
تعالي لحظني
لاا خاف اذيك هساع الف روحي باللحاف
ههه راح تطلعين مثل الدولمه
ههه اي بس الحشوه هيله
ضحكت ظلت تثاوب نعست وانا وياها غفينا سوه
🌿🌿🌿🌿🌿🌿
مالك
نمت بالعسل هذا احلى وصف لليله الي عشتها وي ليان مااعرف شلون اوصفها
بس الجنت راسمه بخيالي عشتو بكل تفاصيلو وطلع بعد احلى
متت بنزاكتها وجمالها وكلامها الي دوخنيظ وخلاني احس اني ابدا ما جنت متزوج من قبل
كعدت الصبح هي بين ايدي وبحظني نايمه وغافيه ابتسمت مرتاح وفرحان بيها كلش
كلمه احبك الطلعت من شفايفها خلتني احس هاهيه ليان صارت الي جسد وروح
بستها من گصتها وجبتها لصدري حجت
توته نامي
رفعت حواجبي حلمانه ببنتي كلت
اني ابوهاا
امم هسه تجي
منو
توته اوف عوفي كيتي
خربت ضحك هاي حلمانه وتحجي بدون وعي
بستها مره اللخ عقجت وجهها كعدت دحكت لي جن ماتذكر شي صفنت عليه كلت
صباح الخير يبعد گلبي
ليان
تذكرت الصار وخجلت من مالك كلش خليت وجهي يم صدره لزم خدي وكال بضحك
خجلان حبيبي
مارديت ختلت بحظنه لمني بي بقوه وباسني من شعري وردد ريحتج تخبل
خلي نكوم
ابدا خليج بحظني
اهلي راح يجون
ساعه بال8بعد وكت هساع تلكيهم نايمين من التعب
مارديت نزل وخله وجهه قريب من وجهي خجلت من نظراته وانهزمت منها
لزم حنجي ورفعه غمضت باسني بهداوه وبعدين بقوه تنهدت بين ايده وهم
نسينا نفسنا وعشت ويا احلى لحظات حياتنا
مالك كسر البروده والجليد الي جنت عايشه بيهن كسر الطوق الي خليته حوالي
وخلاني احب كل لحظه عشتها ويا
جنت عبالي راح ارفض العلاقه من بعد الصار بي بس اكتشفت اني اريده مثل مايريدني
🌿🌿🌿🌿🌿
شهم
اشتريت البسطيه من الولد وبديت اشتغل بيها ووي الايام الله فتحها عليه
ورزقني منها الي يسد حاجه البيت
كملت شغل المغرب وعگبت لبيتنا شايل مسواك
وجم حاجه رادتها ريتاج للعشه
وصلت دشيت سمعت صوت الباب طلعت من يم المطبخ مبتسمه كالت
هلا حبي
ابتسمت بوجهها ورديت
هلا وغلا يبعد روحي
ضحكت واجتي ليمي حبتني من خدي واخذت جم علاكه من ايدي سرينا سوه
ودشينا خليت المسواك
على الارض كلت
حاره اليوم
اي حاره كلش اسبح وارتاح بين مااسوي العشه
الحجيه وين
كاعده تباوع للاخبار
ردت وكملت مبتسمه والعيون تلمع
ثائر عندي لك خبر كلش حلو
يالله وش هو سمعيني الاخبار الحلوه
گربت مني وخلت ايدها على بطنها رفعت حواجبي تكلمت بسرعه
حاامل موو
هزت راسها بأي من فرحتي حظنتها لصدري بقوه وخرت منها فرحان كلش بهالخبر الحلو دحكت لها سألت
فرحان
وتسألين عگب هالحظن
ضحكت ولزمت قميصي سألتها
شلون عرفتي
سويت تحليل بالمستوصف الي براس الشارع وطلعت حامل
يالله بشاره خير
راح يجينا بيبي صغير
ضحكت ورديت
حلو مال بيبي
ههههه يعني طفل صغير
اعرف تره سامعه جثير
فرحانه ثائر كلش وفرحت اكثر من شفت رده فعلك
والله هالخبر فرحني كلش بلكي يجيني ولد حتى اسمي احمد
الحزن ترس ملامحها لزمت خدها وكلت
مااجنت اريد اكدرج
ذبت حسره وردت بحزن
اني هم كلت لامي اذا ولد اسمي على اسم اخويه
ابتسمت وغيرت الموضوع
وين عشاج حبيبه تره ميت جوع
اسم الله عليك هسه اسوي الك احلى عشه
عشتي يله اروح اسبح واكعد يم الحجيه
اي
رحت سلمت على امها وراها سبحت طلعت للغرفه انشف بشعري وكفت جدام المرايه مشطت شعري ذبيت الفرشه طلعت صوت
سمعت باذني جن خيل تركض
وصوت ضحك بنيه غمضت وسندت روحي على الميز هزيت راسي اريد الاصوات
تروح من عقلي ماكو جلبت
صوت صهيل واكف بكاع خضره ادحك لبنت راكبه مهره
فكيت عيوني ورددت
مهره اعرف هالاسم لجن وش هو من هالبنيه
صفنت بجمود على المرايه كمت اشوف بيها مثل الفلم انا واكف ادحك لبنت راكبه فرس تضحك لي
لجن معانيها مو واضحه رددت
ياربي منو هااي وليش كل ساع اشوفها بين عيوني
رحت كعدت صافن واريد اتذكر اي شي حتى اعرف انا من ومنين اجيت اريد اعرف شنو سالفه هالبنت الي ظل خيالها يروح ويجي بين عيوني
🌿🌿🌿🌿🌿🌿
هيله
ابويه من سمع بزين تصوب عگب من يم عمي عايد واجه ليمو بالغرفه وتحمد له بالسلامه واكفه يمو وعمي يمنا
مدري شصار بيه من سمعت بيك تصوبت ياولدي الگاع ماالمتني وعگبت
بسرعه اريد بس اشوفك
حتى يطمن گلبي
قدر ولطف عم
اي الحمدلله لطف بحال اخويه واهلو وهيله
ابويه رد وكمل وي عم شعلان
ماتشوف شر به ياخويه
تسلم يابو هيله شلون اخوك بكركوك
عايش والحمد لله
محتاج شي كول ياخويه عيوني لك انت واخوك
لا شيخ مو محتاج شي كاعد يشتغل هو وولدو بالعماله
استغفر الله يارب بهذولو العالم من الله لاينطيهم
اي والله كركوك متروسه نازحين من صلاح الدين والموصل
اي اعرف بس ان شاء الله هانت ديارنا گربت تتحرر من ذوله الانجاس
ياالله بشاره خير بأذن الله
اي يبو هيله ماظل شي ونعكب بس نأمن الگاع والدرب وولدنا والحشد ينتشرون بيها نعكب مانظل هينه
يارب عن گريب نعكب
ان شاء الله
اسمع الحوار مال ابويه وعمي واحس الارض تميد بيه عيوني راحت لزين دحك لي عكد حواجبو وسألني بعيونو اشرت مابي شي
ابويه كام وترخص طلع هو وعمي طلعت وراهم
بردانه وصايره ثلج راحو للمجلس عمه صاحتني
هيييله
ها عمه
تعالي نظفي الثلاجه
جنا منظفيها اول البارحه رديت نظفنها قبل يومين ياعمه
اي اعرف بس جبنا مسواك وتوصخت امشي نظيفها وطلعي لحم خلي نثرمو تانسوي كباب شوي
اي هساع اسوي الكلتي علي
سريت للمطبخ مالي خلك وبردانه كلش نظفت الثلاجه وكل دقيقه تمر عليه تزيد
البروده وكفت اثرم اللحم
دخت ولزمت الكاونتر
هاجر دشت من بره هي والهنوف جانن بالسوك سلمت
هلو هيله
هلاا
رديت وملت ليوره
شمرت الغراض من ايدها بسرعه واجتي عليه گضبتني الهنوف اجتي عليه وحجت بخوف
شبيج هيله
داايخه مدري شبي
كعدوني هاجر جابت لي شربت شربت شويه نفسي كامت تلعب امهن دشت
شافت الوضع سألت بنترة
خير شكو شبيجن ملتمات عليها
هيله مدري شبيها تخربطت قبل شويه
وش بلاها قبل شويه جانت مابها شي
كمت لزمت الميز من دخت الهنوف گضبتني وكالت
امشي معي لجوه
والشغل يمه منوو يسوي
اانا اسوي
هاجر ردت بضوجه كلت
مابي شي يالهنوف
ااش واسري معي
دحكت لامها بضوجه لجن ماحجت شي سريت معها دايخه وصايره فد مرة دشيت للغرفه زين شافني حجه بسرعه
خيير شبيها هيله
مدري عبالك دايخه
رحت كعدت يمه ماكدرت تمددت ارجف سأل بقلق
هيله شبيج شيوجعج
بردانه غطوني
الهنوف اجتي بسرعه غطتني وكالت
بس لا فلاونزه
مدري هي صارلها فتره تبرد وتلزمها البارده
عجل عش ماحجيتو حتى الواحد ياخذها لدكتوره ويشوف وش بها
وديها هساع ياخيه راح ااخابر حمد ويجي ياخذكم
فزيت من فراشي وصحت
مااريد اروح معه
صفن عليه هو واختو ارتبكت راسي افتر وردت اذب من راسي كمت
بسرعه ورحت للحمام
ذبيت ،،،،،الما طلعت روحي
الهنوف اجتي ورايه ادحك عليه بقلق سألت
يولي شبيج فلاونزه مصخنه
لزمت گصتي كالت بارده ثلج
گضبتني من ملت زين صاح
يولي شبيها اجي عليجن
طلعت وياها اريد اسند طولي ماكو دايخه ومااعرف وش بلاني
زين كال
خيه اخذيها وشوفي وش بلاها
مااريد اروح انا اصير زينه
رديت ورجعت تمددت غطيت روحي بالغطه ارجف ونفسي تلعب سمعت صوت هاجر حجت
عبد العزيز اجه
اي همزين حتى ياخذنا للدكتوره
هيله كومي
سمعت صوت زين وخر الغطه وكمل بأصرار
كومي يولي خلي تشوفج الدكتوره وش بج
ماا
يوولي كومي واسمعي الچلمه
تنهدت وكمت من الفراش دحكت له مبين بوجهو القلق والخوف
كومي بالعجل ومااريد اسمع جلمه لاا
الهنوف طلعت من يمنا هاجر اجتي ليمي كمت وهي يمي گضبت ايدها
من دخت كالت
البسي عبايتج مو هينه هي
اي
راحت جابتها لي لبستها هي والشال وعيون زين عليه سأل
امي وين
بالمطبخ
عكد حواجبو لجن ماحجه
شي صاحني
هيله تعالي يمي
رحت له وهاجر طلعت
اخذي فلوس من الجراره
عندي خير من الله
ماايخالف اخذي احتياط
تمام
رديت ورحت للكنتور سندت روحي علي من دخت تكلم بخوف
يولي تعالي اكعدي لايفين حظج
مابي شي راحت
طلعت مبلغ وخليتو بجزداني خليتو بجنطه
الهنوف دشت وكالت
يله ياهيله خلي نسري
خيه خابريني وطمنيني عليها بس تفحصها الدكتوره
ادلل زين
سريت وياها فتنا من المطبخ امه كاعده تشيش كباب ولا جن انا متخربطه طلعت ماسألت وين رايحين صعدت بسياره عبد العزيز كال
سلامتج خيه ماتشوفين شر
الله يسلمك خويه
يله خلي نسري مادام بعد وكت بلكي نلحك الدكتوره
ودينا على الي رحنا عليها اول مااجينا وتصوبت هيله ووديناها عليها
وين هي
كالت له العنوان وودنا لها
طول الطريق دايخه ونفسي
تلعب ومدري شبيه وصلنا ورة مشوار
عبد العزيز حجز لي كعدت انتظر الهنوف حدي مالت عليه سألت
يولي الشهريه اجتج بهل الشهر
هاا
رديت وصفنت بوجهها
اجتج هالشهر
لاا مااذكر بس يعني يمكن تأخرت والله
مدري من وره التفكير بزين والخوف علي ضيعت
الايام وكمت مااعرف احسب
انا اكول انتي حامل
ردت بضحك بداخلي صارت فرحه بس خفت لا كلامها يطلع بس تخمين رددت
هساع نسوي تحليل ونشوف اذا كلامي صح لو لاا
سرايه اجه وره نص ساعه وطبينا للدكتوره عرفتنا
وهلت بينا فحصتني وسالتني عن الشهريه
وطلبت مني تحليل حمل والتهاب مجاري وفقر دم
طلعنا التحليل بصفها سويت مال دم وكعدنا ننتضر وره مشوار الهنوف
طلعت يم عبد العزيز بنفس الوقت صاحو اسمي دشيت
سألت
انتي هيله صباح
لا هيله حميد
دحكت لاوراق قلبت بيهن رددت
انتي مسويه مال مجاري وفقر دم وحمل مو
اي
هو هذا بس متوهمين بالاسم
اخذت التحليل منها طلعت الهنوف اجتي من بره سألت
ها طلع التحليل
اي
امشي خلي نروح للدكتوره
اي
دشينا شافت التحليلات گلبي يدك بقوه واريد اسمع منها جلمه انا حامل
عندج التهاب بسيط بالمجاري البوليه وهم عندج ياحلوه فقر دم كلش قوي ولازم ابر
والحمل دكتوره
ماكو حمل بس هي متاخره عدها الشهريه ومن فحصتها بين اكو حمل
يعني شنو دكتوره
ااهنوف سألت
شوفي هو فحص الدم يبين اذا اكو حمل لو لاا حتى لو جان ضعيف كلش وهي مابين عدها اني اكول ماكو حمل وهاي دوره راح تنزل بعد كم يوم
بداخلي انقهرت كلش الهنوف دحكت لي وكالت
طلع ظني خطأ
مارديت الدكتور كملت
شوفي عيني هسه عدنا اهم شي نرفع نسبه الدم
بجسمها لان نازل كلش وهذا الشي تره يأثر على الحمل باالمستقبل
اي دكتوره نعالجو اكتبي الدوه واي شي يفيدها حتى ناخذو لها
تمام هاي دوره ابر ومقويات لازم تاخذهن وره ماتخلص الابر
تمام دكتوره
ضحكت لي وكملت مبتسمه
اهم شي لاتزعل الحلوه تره مابيج شي وانتي اصلا ما صارلج هوايه من تزوجتي
يعني بعد وكت لتعب الحمل ودوخه الاطفال
ابتسمت بوجهها ورديت
انا احب الجهال
ههه منو مايحبهم اني التشوفيني عندي اربعه
الله يخليهم الج دكتوره ويحفظهم من كل شر
امين حبي وان شاء الله شهر اللخ تجيني حامل
امين يسمع منج ربنا
الهنوف ردت طلعنا منها اخذنا الدوه ودتو للدكتورة شافتو وكالت خل تضرب ابره يم السكرتيره ضربتها
عگبنا للبيت والفرحه الي ردتها اليه.ولزين ماصارت وصلنا نزلت اشم ريحه حطب مشتعل كلت ديشون وره البيت
دشيت للمطبخ مابه احد الهنوف ذبت البشت وكالت
روحي ارتاحي لاتسوين شي انا بياته يمكم وراح اظل منا الما يعگب عبد العزيز من
بغداد
هلا بيج تنورين بيتج
ابتسمت وردت
تسلمين حب يله روحي طمني زين دك عليه بس جنت احجي مع عبدالله
تمام
سريت لغرفتي دشيت شايله علاكه الدوه دحك لي وسأل بسرعه
هاا وش طلع بيج
فقر دم والتهاب مجاري
ذبيت عبايتي والشال تعبانه ومالي خلك رحت كعدت يمو تكلم بلوم
بين بيج قله الاكل ووكعتي ياهيله
مااشتهي يازين مو غصب اكل
يولي اغصبي روحج راح يفين حظج وانا بعدني مو شبعان منج
دحكت له مبتسم ويتحارش رديت
هذا الهامك يبن الشيخ
ههه هذا هامني وانتي تهميني بعد اكثر لو صار بج شي انا وين اولي وين اروح
تره هو فقر دم والتهاب مجاري عش هالدراما الكاعد تسويها
موو صوجج يولي صوجي انا الخايف عليج
خايف عليه لو على ال
سكتت وخجلت من الجلمه ضحك بصوت مال بجتفو عليه ورد
العسل والشهد والدبس
والراشي وياك
هههه
خرب ضحك ابتسمت جرني من خصري بقوه
صحت
يازين لاا بعنف تره گضبه ايدك توجع
مااخابرج نعناعه ياهيله
ههه لا عاگوله انا
هههههه راضي بيج عاگوله وشوكج ياذيني
رفعت حواجبي عيونه حدرت للشفه وكمل بهمس
ولو انا من اضوك هالشفه اموت بترافتها واموع
ابتسمت گربني علي حدر وحبني منها بهداوه تحولت لقوه وجابني لصدرو عرفتو فقد دفعتو ووخرت گوه منو كلت وانا ضايعه بي
يازين لاتتاذه
اوف ووج عطبت واحتركت واشتعلو هلي هم والكرايب
ظليت گريبه منو ادحك لصدرو يتنفس بقوه وجسمو غده نار رفعت عيوني الو صافن عليه وخر شعري من خدي وحبني
منو ردد
احبج جثير الجثير يولي
ابتسمت ورديت
وانا بعد احبك بكد الدنيا واهلها
🌿🌿🌿🌿🌿🌿
ليان
اهلي اجوي وحسيت بالخجل منهم باركو النا وماظلو رغم الحاح مالك عليهم يتريكون ويانا
طلعو ووكفت بالمطبخ اجهز بالريوك هو يمي كاعد وصافن عليه ومبتسم كلت
مالك شفت توته خطيه ادور عليه
عوفج منها والتهي بابوها
خجلت وخدودي اشتعلت نار خليت الصمون بسله ووديته على الميز
يله تريك
اهلج ماقصرو جايبين اشكال والوان يريدون نسيبهم يشد حيله وي بنتهم
ماالك
ههههه هاي شبيج تره داشقه
بطل هالسوالف
ههه مااكدر من اشوفج انحرف وبعد الشفته منج
انحرافي زاد
اوي كافي والله كاعد
اخجل منك
كاعد اشوف الخدود
حمرت ويازين هالخدود وجمال الشفه والعيون
عضيت شفتي كام وتقرب مني حظني من خصري وجابني علي كمل
دوخيتني يولي وعيوني ما جاي تگع منج سحرتني ليونه وصرت اسيرج وانتي السجان
كلامه دوخني كلش باسني من خدي وهمس
الشفه تريد حگها
باسني منها حظنته من دخت وخر مني بصعوبه صفن بعيوني غمضت باسني من عدهن وكال
هذني يخصني انتي وياهن ويول اليبجيهن ااحركو هو واهلو واحسب الله ماخلقو
همست
احبك مالك واموت عليك
هالكلمه خلته يبتسم وكال
هاي الجلمه تلعب بيه لعب وتخليني افقد بس مو هسه خلي اشحن وبعدين اتفاهم وياج
اوي اامشي تريك
دفعته وراح يضحك كعد اشرلي اكعدي
اي بس اجيب الجاي
تريكنا نضحك ونحجي بكلشي يخصنا ومحور حديثنا توته
مالك
ليونه ماقبلت توته تظل يم اهلها جابتها ثاني يوم يمنا ادحك لها تحجي وياها وتلعب فرحان بيهن اثنينهن وعبالك صار عندي طفلتين
الايام الجتي جان ايام كلها حب وعسل عرفت معنى واحد يحب وحده عرفت
هذا الشعور ويه ليان الي خلتني ادمنها واحب اظل وياها
بيوم السبعه طلعت تجنن
لبست بدله بصلي وهي بيضه والشعر احمر ادحك الها باعجاب وهي تفتر يمي شايله توته لابسه نفس بدلتها وخال حمره حمرة
طوخ
سألت
هاي شنو ست توته من هساع حمره وانتي بعدج بكد فرده القندرة
ليان دحكت لي بضوجه
خير حب شبيج ادحكين عليه بضوجه
الفاظك مالك مو حلوه
هههه لا بله
اي تره ااني ماقبل تحجي وي توته هيج
اوي عيني عبالك جرحت مشاعرج انتي وبنتي
بنتنا مالك
سكتت من ردت بزعل نوار طبت وكالت
جيبي توته خلي اروح ابدل الها
تسوين فضل والله حتى اخذ رااحتي وي عروسي
ماالك
ليان صاحت بخجل اختي طلعت تركض من خجلها
هاي شسويت
هههه ماسويت شي
ااخ منك لسانك ابدا مو الك
هههه تره هيانو وكاعد احجي به
قربت منها ادحك لها من فوك ليجوه خجلت من نظراتي جريتها لحظني وكلت
البدله ضيقه كلش وقصيره
عجبتني
وهم عجبتني بس عبالك زاد وزنج بهل جم يوم
صدددك لا عفيه مالك لا تحجي هيج
هههه
خربت ضحك دحكت لي بزعل وكالت
عاابت لاتشاقه ابدااا وي انثى بالوزن ولا العمر
لميتها بحظني ورديت
بس تره السمن لايك لج وحلويتي بعد اكثر على الزواج
وخرت شعرها من عيونها ردت بخجل
اي كلها كالت هالكلام
شفتي اني تره كلي عافيه ودلالي خلاج تحلوين بعد اكثر يعني هساع الي اريدو اسوي
ماالك موو
ماكو رد فقدت عليها جان اكثر شي يفرحني بيها هي جلمه احبك تطلع من حلكها بهمس حلو وجن طالعه من من جوة گلبها
🌿🌿🌿🌿🌿
هيله
جنت اعد الايام بخوف ومااريد زين يعكب ردتو يظل يمي وحدي وگريب مني حتى ماايصير به شي
لجن هو ظل بنفس الموال اشوفو يخابر ربعو هناك اسمعو يحجي معهم ويتبع اخبار الكاعد يصير هناك
وضعي على الدوه شويه تحسن لجن ظليت ابرد ويوميا الصبح الا اذب من راسي يله ارتاح
طلعت من الحمام كاعد شافني سأل بقلق
شبيج يولي اشو يوميا تذبين من راسج
مابيه شي يجوز من الدوه لان قوي كلش هو والابره
عكبي للدكتوره خلي تشوفلج شي مااياذي معدتج
لا هو ما ظل بعد جم حبه واخلصو
تمام بس هم لازم ترجعين الها
عش ارجع تره وضعي احسن من قبل حتى كمت اكل ووزني زاد
جنت يمو گريبه كام لحيلو لان رجلي طابت بس ظلت ايدو مجبره وراح يفگها
بعد جم يوم
انا مااريدج تضعفين ابدا السمن يلوك لج
ابتسمت ورديت
اي حتى هم مااضيع حدك من توكف لو تاخذني لحظنك
لمني بحظنو بقوه وكال
ااي حتى من المج هيج تترسين حظني
خليت راسي يم گلبو دكيت علي باصبعي ضحك وكال
منو
ضحكت وكلت
هيله
هاا ياحبه الهيل شدورين بغرفتج
دحكت له كمل مبتسم
گلبي غرفه لج تفترين بي شلون ماتريدين
تنهدت ومارديت لان ما عندي كلام اردو به كال بضحك
هههه وين لسانج يبنت العرب
ضاع من وره كلامك الحلو
سكت وانا هم وخرت وكلت
اروح احضرلك الريوك
وره جم يوم فك الجبس مال ايدو وبده علاج طبيعي بهالفتره هم تعبت وبديت ادوخ بعد اكثر والشهريه مااجتني تاخرت جثير وما نزلت عليه مثل ماكالت الدكتوره احس وجعها عندي بس مابينت كلت
لامي وكالت يجوز فتي بفالج
وصار عندج حمل خلي ننتظر شويه وبعدين نسوي تحليل اللخ
عكبت من يمهم والتهيت
اسوي العشه انا وهاجر دايخه ونفسي تگلب مابينت لاحد عمه كاعده ماردت اسمع منها جلمه تغث كابرت ودست على روحي
خلينا العشه كعدنا كلنا هو يمي جده تعشت وراحت لغرفتها بعدنا كاعدين جهازو دك فتح الخط سمع الكلام فز وكال
يالله
خير يازين
خير يابه ديارنا تحررت
يالله بشاااره خير
عمي صاح بفرح دحكت له وبطني لوتني من كال
جااي باجر باذن الله
سد الخط يضحك وفرحان ابوه سالو
راح تسري باجر وو
عمه قاطعتواا
لاتخلي ،،،،يروح ياشيخ خله هينه يمنا حنا ماعدنا غيرو لو صار بي شي لا سامح الله حنا شراح يصير بحالنا
اااستغفر الله يارب شوكت اخلص من هالسالفه
زين ردد بضوجه ماسكتت اندارت عليه وتكلمت بعصبيه
مااتحجين يولي ليش سااكته مو زلمتج ماتخافين عليه يصير به شي
حجت يمممه وناحت يمي وتوسلت بيه مااعكب
لهناك لجن ماراح لا اسمع جلمتج ولا جلمتها
كمت تكلمت وانا خايفه علي
يازين امك خايفه عليك تصووبت وتاذيت عوفها ل
انهد بيه وقاطعني
ماااريد احد يخاف عليه انا مووو جاهل ولا اريد اسمع هالكلام اليغث موو بس انا تصوبت كلها تصوبت وعگبت شنو فرقي عنهم انا روح وهم لااا
ولك مااعندي غيرك انت وحيدي ان سلمت هالمره ماراح تسلم مره اللخ
يممه رحمه لاهلج سدي هالموضوع
عم ااحجي معه
هييييله
صاح بيه بغضب رديتو بعصبيه
مااريدك تروح اافهم اانا مااتحمل يصير بك شي اموت زين اذا تاذيت
دموعي نزلت صاح
كاافي طلعتو روحي بهل السالفه
عمي حجه
بهيده يول لاتصيح وانتن اسكتن وخلوه يسري بدون عرضه
يااعم والله ماا
هيييله بسج عااااد
صاح بيه وانهديت بي بصياح وغضب
فكررر بامك فكرر بيه عش تفكر بس بألي تريدوو
عش تصييحين وولج
انهد بيه ورديت بصياح وبجي
حسس بينا حس بيه ليش ماااعندك احساااس لخااطر الله
خزرني بغضب ورفع ايدو عليه فزيت ورجعت ليوره عمي صااح
زززين
مااضربني لم ايدو باعصاب ودفر الكرسي بقوه عكبت ليوره ابجي وادحك له بقهر
سريت من يمهم دشيت غرفتي اكهد بالبجي سمعت صياح امو وصياحو هرج البيت دخت سندت روحي على الباب نزلت لجوه ابجي بشهكه
#البارت__42
هيله
كمت اسند روحي
ونفسي تگلب واريد اذب من راسي رحت للحمام
اتمايل ودايخه كلش
دشيت سديت الباب ورايه سندت روحي عليه
الكاع تميد بيه واريد اكع سريت للمغسله ذبيت الصفره ودخت بعد اكثر
گضبت بطني من لوتني
بقوه سمعت الباب اندك وصوت هاجر
هيله بيج شي
تمالكت نفسي گوة ورحت للباب فتحته اول ماشفتها حجيت بخوف
هاااجر مدرر
ماكملت وكعت يم الباب عاطت
هيله وش بلاج
ونيت بصوت مخنوك من وره بطني وكمت اتلوى من الوجع راحت تركض لبره عكبت امها معها هي وجده اجني ليمي
ووج شبيج شجرالج
بطني ااخ يمه
عطت والبارده لزمتني
جده صاحت
اامشي صيحي اخوج خل يجي البنت مدري وش بلاها
مااهو هج من الدار
هاجر ردت وهي تبجي گضبتني هي وامها وكومني عمي اجه وكف يم باب الغرفه عمه راحت له
حجت بسرعه
ياابو زين البنت مدري وش بلاها خابرو خلي يعكب تانوديها للمستشفى
ااستغفر الله يارب اانتي مااتسكتين ابدا تكلمتي ووزيتي البنت على الولد وهااج شوفي وكعت بها هي
انهد بها بغضب وسرى
من يمنا
وولكم خاايفه علي هذا وحيدي عش الكل كامت تلوم وتاكل بگلبي
ااسكتي يااامال الجتله وخل نشوف هالبنيه وش صار بها
جده انهدت بها
اسمع كلامهم وانا الوب من الوجع وكل ساع اريد اذب من راسي كمت اشرت للسله
هاجر جابتها لي بسرعه ذبيت وهو ماكو شي بمعدتي فرغت وحسيت تريد تنشلع من مكانها من التقيء
رديت ليوره وصرت فد مره سمعت عمي صاح
جيبوها بسرعه
كومي هيله
مااكدر
رديت صوتي طلع يرجف
جده طلعت من يمنا وره مشوار امي اجتي مخطوف لونها تكلمت بسرعه
شبيها بنتي شجاها
ماكدرت ارد احس بروحي راح افقد الوعي اغمض وافتح والدنيا تفتر بيه
خاله ساعديني البسها البشت
كومني وانا صايره خركه مااعرف شلون مشيت
وياهن وشه صارت باذني بس خطيت على الكاع وراسي ثكل فد مرة
كعدت بالسياره وملت
ايد گضبتني ومسحت على وجهي سمعت امي كالت وهي تبجي
ااسم الله عليج يمه شجاج
سندت روحي عليها نفسي تگلب ودايخه كلش وبطني تلويني كل مشوار
حارس من ولدنا طلع بينا للمستشفى وحالي حال
🌿🌿🌿🌿🌿
زين العابدين
هجيت من يم اهلي وانا غادي نار واعصابي مورثه افتر بشوارع اربيل الغضب تارس صدري من وره الصار فقدت اعصابي وردت اخبزها بالارض لجن ما كدرت امد ايدي عليها رغم صياحها عليه جدام اهلي تعرفني اتخبل من هالشي
وسوتو جدامهم تعرف انا
اموت واتخبل من الحرمه الي ماتحترم وتعلي صوتها وتوكف بوجهي وهي سوت
هالشي وكدرتني
صحت بغضب
عش سويتي هيج ولج
عش عليتي حسج عليه
وانتي تعرفين انا اتخبل
من هالطبع ويطك عرج بالراس من اشوف قله احترام من احد
ضربت الستيرن بقوه ورددت بصياح
خرب بيج وزيتني على شي ماااردت اسوي رفعت ايدي عليج ياهيله وخليتني احترك من وره الصار
طكت عندي وكلت
والله مااعگب لدارنا والا اطلع هساع لديرتنا واخليجن بنارجن تحتركن
وهذا الي سويتو طلعت بهالليل لربيعه بنص الدرب فكدت جهازي عرفت من هجيت ماشلتو معي
ضجت بعد اكثر وكلت هساع الدنيا احتركت عليه لان ماعگبت لدارنا كلت اوصل واخابر ابويه على الثريا وهذا الصار بس وصلت خابرتو اول ماسمع صوتي انهد بيه سريت بعيد
اسمعو يصيح
وولك اانت شنو عقل ماا عندك ماتفكر باالوراك ما اادكول اكو ناس اهل راح
يظل بالهم عليك
حكك يابه بس ماكدرت اعكب لدارنا ضجت من الصار كلما اريد اسري لهينه اسمع نفس الموال والعرضه محد يكول الله وياك ويدعي لي بالخير
وماافكرت بااالدرب ماا فكرت خاف ذوله يطلعون
لك ويجتلوك وانت وحدك بهالجوله
مااصار شي ياشيخ وصلت بامان والحمد لله
سكت ردد
ااستغفر الله ياربي ولك شااحجي منا امك ونوحهها عليك ومنا انت هجيت وخليتني ادور وراك طول الليل ومنا حرمتك
سكت ماكمل گلبي
نغزني سألت
شبيها هيله
ماابها شي ديربالك على روحك وخابرها البنت مقهوره كلش وماسكتت
جهازي مو يمي نسيتو يمكم دزه بايد عمير من ينزل وهم شبكه مااكو اخابر
من الثريا بس يصيرلي مجال
يازين
صاحوني كلت
اروح يابه
روح الله وياك
هيله
وصلت المستشفى فحصو ضغطي وطلع نازل كلش امي كالت للدكتوره على وجع بطني سألتني على الشهريه كتلها مانزلت
كالت
ودوها لدكتورتها احسن
خلصت بطلين مغذي وطلعت ساعه 3 ام زين
معي هي وامي وكفت وصفنت من شفت حمد واكف يم سيارتو ويدخن
من دار روحو علينا نزلت راسي وضجت اكثر مو انا ضايجه
ها خاله نسري
اي يمه
يله هيله اصعدي
امي تكلمت معي تجنبت ادحك له صعدت وهي
يمي عمه كعدت يمو غمضت دايخه تعبانه ودمعتي بعيوني جنت اريد زين يجي عليه ردتو يمي جنت محتاجته الو حتى هلي ماردتهم بكثر ماردته هو بس مااجه وهالشي
قهرني بعد اكثر ومرد روحي دمعتي نزلت فتحت عيوني صارت بعيون حمد يدحك لي والوجه مطعون
درت وجهي منو
امي سألت
شجاج يايمه وهيج تخربطتي
ماايسمع الجلمه موتني هالولد ماايفكر بيه ولا باي احد الي براسو يسوي وطز
بالكل
امو تكلمت بقهر سمعتها ضربت على رجلها وكملت
كلو من ابوه ومن جدتو هم السبب واذا صار شي بزين خطيتو وخطيتي بركبتهم ليوم الدين
شصاير ياخاله
سألها وردت بغضب
وولك اخوك راح يموتني انا راح اموت ناقصه عمر من وراه توه طااب سمع ديارنا تحررت وهب ذيج الهبه وكال الا اعكب لهناك
مو تحررت بعد شكو
كلو الو لعمك الشيخ فهمو عش يريد يروح وراكض وره الموت ماايفكر بيه ماايفكر بالوراه طاير على وجهو هالولد من يومو وخلص گلبي ويا
يايمه سمعتي بي يريد يروح لهناك وتخربطتي
مارديت على امي ولا ردت عمه تحجي شي جدام حمد بس هي ماسكتت كملت
بعصبيه
والله لو نموت كلنا جدامو مااايهمو ولا يرف له رمش يسوي الي براسو وطز بينا
دمعتي حدرت كملت
حجيت وتعاركت معه وهي هم ومافاد داسنا كلنا وراح تشوفون باجر الا يسري
لهناك وعود كولو فضه كالت وصدگت
زين مايفيد به الكلام الي يريدو يسوي ومايهمو اي احد
درت وجهي علي يدحك لي بالمرايه جن يذكرني بكلامو القديم جان ماعندي خلك
اردو ردت بي اوصل للبيت
لان حسيت بروحي مو
تمام واريد بس اتمدد
وصلنا نزلت وي امي ملت ردت اكع هو اجه بسرعه وصاح بخوف
الله يابه
تجاهلتو من صار گريب مني
گضبت امي بقوه سريت للمطبخ عمه فتحت الباب دشينا هاجر اجتي من الصاله سألت
ها شلونها هيله هساع
مدري احسها بعدها ماتكدر
امي ردت
زين وينو مااعكب
لاا
وين راح الولد وعش كاعد يسوي هيج
عمه انهدت سمعت صوت عمي صاح من الصاله
جيبي البنت خلها ترتاح
دشينا ،،،،، وكف من شافني
بأيد امي وهاجر
جده كالت
اخذنها جوه خلها ترتاح
سريت اسمع عمي يردد بضوجه
ااستغفر الله ياربي هساع هذا وين ادورو
وين زين ياشعلان
مدري وين راح حتى جهازو هيانو ناسيه من هج من وره سوالفجن
دمعتي حدرت امي ذبت البشت مني والشال
تمددت دايخه ولويه تروح وتجي بطني
امي سألت بقلق
وش صاير ياهيله عمج ليش هيج يتكلم صاير شي منج
بجيت ومارديت هاجر تكلمت
خاله عوفيها هساع خل ترتاح وتهدأ شويه
وين زين ياهاجر
سألت بدموع وهاجر ردت
مدري طلع عگب ما صار الصار وبعد مارد
كعدت الوب من القهر والوجع كملت بسرعه
لاتخافين ياهيله هو هيج من يضوج يهج من الدار ويعكب الفجر
انا السبب عليت صوتي علي غثيتو بكلامي بس والله مو قصدي من خوفي علي سويت هيج
امي لطمت خدها وصاحت بي بصوت مكتوم
شسويتي ولج عليتي صوتج على زلمتج تخبلتي ياهيله شلون تسوين هيج
يمه خفت عليه من الكاعد يصير هناك ماشفتي اجه متصوب وصاير فد مره شلون تريديني اخلي يعكب
لهناك وانا اعرف الموت يحور علي هو والويا
ماايصير يمه اتكلم بهدوء معه مو اعلي صوتي علي انتي تعرفي زلمه دمو حار ومايتحمل احد يغثو بجلمه
سكتت دمعتي تحدر ما امسحها هاجر تكلمت
تمددي ياهيله وجهج اصفر وكاعد اشوفج ترجفين
انام من يعكب زين
ماابي شي اعرف اخويه من يتكدر يظل يفتر بالشوارع الما يهدا يله يعكب
نزلت راسي امي خلت مخده ورايه وكالت
سندي روحج عليها وارتاحي ومره ثانيه مااريدج تردين علي شيكول الج كولي اي ولاتجادلي بشي افتهمتي
هزيت راسي بأي
كامت وكملت
اروح لابوج ولخواتج ظل بالهم عليج اطمنهم واعكب لج الصبح
روحي يمه
ديربالج عليها بعد عيني
بعيوني اخليها خاله لايظل بالج عليها
الله يرضى عليج دنيا واخره ويرزقج بالزلمه الصالح الي يسعد بختج
تسلمين خاله
امي طلعت من يمي وهاجر وياها صفنت على الغرفه شفت تراكه مشمور على الجربايه غمضت وشهكت بصوت
جده دشت زدت بالبجي كالت
بسج عاد تبجين وتنوحين وش بلاج انعديتي من فضه وصرتي مثلها
ياجده زين ماهو هج من ورايه
حيل بيج وابو زايد مخبله انتي تعرفيه نار وشرار عش تصيحين بوجهو عش صرتي
عربانه لفضه وزتج علي وخلتج تحجين كلام خبلو للزين وخلاه يرفع ايدو عليج
نزلت راسي اشهك بالبجي كعدت حدي كملت بغضب
يولي زين گوي وسبع ومن خذاج كلت اي اخذ الي تلوك له هم سبعه وگويه
مثلو لجن انتي طلعتي خيخه
بزر مايع مو مثل ماجنت
اظن
خايفه علي ياجده
وانا هم بعد خايفه علي لجن اكوي گلبي بالله خالتو بين عيوني وكل مره ادعي له وامنو بأيد الله ويرد سالم مابه شي
شلون مابه شي وهو اجانا مكسر والله لاطف به
هاي انتي كلتيها الله لاطف به يعني الشي صار بس ربج هونو علي وعلينا
سكتت كملت بحده
خابرتج تقرين قران وحافظتو ياهيله
مارديت هي كملت
الله سبحانو وتعالى وش يكول بكتابو الكريم ماايكول بسم الله الرحمن الرحيم
(اينما تكونوا يدرككم الموت ولو كنتم في بروج
مشيده )
دحكت لها كالت
زين لو جان هينه او هناك قدر الله اذا يريد يصير به ماانكدر نردو عنو ولو ساعه
غمضت عيوني ابجي بصوت مخنوك ردت كملت
اعقلي يايمه وبعد مااريدج تعرضين بوجهو مثل امو خلج گويه مثل ماخابرتج
واعرفج خليج سند له
وحزام ظهر
گضبت ايدي دحكت لها ابتسمت وكملت
انتي الشيخه من بعدي انا موو فضه وانا اريدج مثلي بكلشي تعلمي مني انا يااهيله وعوفج من خرابيط هالمجتوله تره انتي تعرفين
وخابره هي بعيده كل البعد عن الشيخه وتصرفاتها الصح
ذبيت حسره هزيت راسي بأي ضربت على يدي بهداوه وكالت
رضي الزين من يعگب ولا تخلين بعد احد يتدخل بينكم او يوزج علي
اي ياجده
عفيه بنت العرب هاي حگوتي بيج عاقله وتفهمين الچلمه
كامت من يمي سرت للباب وكفت يمو وكالت
ارتاحي وباجر اخلي الهنوف توديج للدكتوره تشوف وش بلاج ولو انا اعرف وش بج
صفنت عليها مبتسمه بس ماكملت ولا وضحت اي شي طلعت من يمي وسدت
الباب رجعت ليوره ادحك له اريد زين بس يجي ويدش عليه لجن هو مااجه وهالغياب زيد حالتي سوء بعد اكثر
هم رجعت اذب من راسي الصبح وهو ماكو شي بمعدتي هاجر دشت شافتني گاضبه بطني وطالعه من الحمام اجتي بسرعه عليه وسألت
هاا هيله هم ذبيتي من راسج
وين زين ياهاجر عش مااعگب
زين راح لديارنا خابر قبل شويه وكال لابويه هو هناك
شنوو
سألت بذهول ردت
امشي اتمددي هساع تطمنا علي بعد شكو هالخوف
ردت وهي ضايجه ومقهورة كعدت على الجربايه دمعتي حدرت اجتي حدي وكالت
لاتبجين ياهيله انتي تعرفين زين وطبعو اكيد اخذ على خاطرو منج انتي وامي وسرى لهناك
قهرتو ياهاجر من عليت صوتي علي
سكتت وتمددت درت روحي عنها وشهكت بالبجي
كافي هيله مااجاي تشوفين وضعج مو تمام ومن البارحه انتي مو زينه وكل ساع تتخربطين
الهنوف دشت علينا وكالت
خير وش صاير بهيله
عدلت حالي مادحكت لها زعلانه من روحي ومن السويتو هاجر ذبت حسره
وحجت لها الصار
امج ماتسكت لا والله
ردت بغضب جاوبت
حكها ياالهنوف هاي ام وماعدها غيرو لاخوج گلبها نار علي عش محد كاعد يفهم هي وش تحس به
امو دشت سمعت كلامي دحكت لي بس ماتكلمت شي الهنوف انهدت
يمه عش تهاوشتي معه هيج احسن هد كلشي
وراح لو صاير شي به بهل الدرب الموزين حنا وش نسوي
ماخصها هي انا عليت صوتي علي وسرى من عدنا مقهور
رديت وبجيت بشهكه بطني لوتني لميت رجلي لصدري وونيت بصوت مكتوم
ااخ يمه
وج شبلاج شيوجعج
بطني ومدري شبيه
كمت الوب كالت
كومي بدلي بسرعه خل اخذج للدكتوره
كمت گوه حانيه ظهري من الوجع امها تكلمت
راح اروح معج
اي بسرعه روحي بدلي
اخذوني الوب من الوجع واريد اذب من راسي كل ساع الحارس اخذنا للدكتورة نفسها دشيت بسرعه من وره حالتي اول
ماشافت وضعي صعدتني للسديه وسوت لي سونار
عكدت حواجبها وسألت
انتي مو سويتي تحليل مال حمل قبل شهر وشويه
اي دكتوره سوت بس طلع ماعدها حمل
وين سوته
باالمختبر الي بصفج
رجعت للحاسبه دورت ملفي قرت به سألت
انتي هيله صباح لو حميد
هيله حميد خير دكتورة صاير شي
والله ماادري بس عبالك غلطانين بالاسم ومنطيج تحليل غير بنيه بذيج المره
الهنوف دحكت لي امها سألت
دكتورة كلشي ماجاي افتهم
لحظه عيني
رجعت لي فحصت بطني اكثر من مرة وكالت
مبتسمه
يعني هو خير حتى لو اجه متأخر بشهرين
هااا
الهنوف سالت بذهول الدكتورة ردت
بنتكم حامل شهرين وراح اطب بالثالث
ام زين فزت وصاحت بفرح
صدك تحجين دكتوره
ههه اي والله حامل وراح اطب بالشهر الثالث
ادحك لها بذهول ومااعرف شصار بيه الهنوف تكلمت بضحك معي
وج طلع التحليل غلط وانتي حامل من زمان
ههههه من شهرين مو قرن
الدكتورة مزحت معها عمه اجتي عليه تكلمت فرحانه ووجهها يضحك
وج كومي ياخايبه يبنت الخايبه حامل وماتعرفين بروحج
هي شمدريها يمه سوينا تحليل وطلعو الربع متيهين بالاسم
الهنوف ردت بضحك الدكتورة تكلمت
تصير هيج شغلات واتمنى تعذروهم لان تعرفون بال البشر مرات مو صافي
اي دكتورة بس يعني ليش عدها وجع بطن
هذا الوجع تقلصات وهذا الشي مبكر جدا عليها وهي بدايه الحمل احنا نخاف من هالشي لان يأثر على الحمل الي اريده منكم هو راحه تامه الها ورجال ماكو ياحلوه يعني اطردي من يمج وخلي يروح ينام يم امه
عيوني غوركت مارديت
امه تكلمت بحزن
هوو وينو يادكتوره راح والتحق بالحشد العشائري
دحكت لي وهزت راسها وكالت
الله يحفظه الكم من كل شر
امين يارب
كملت
راح اكتب ادويه كلها مال تقلصات ومقويات اريدج تاخذيهن بانتظام واكو دوه من راح تاخذي باليل راح يخليج تنامين بسرعه يعني لاتخافون عليها اذا شفتوها
غفت وثكلت بالنومه
تمام دكتوره
الهنوف ردت اخذنا الوصفه طلعت وياهن عمه خايفه عليه وفرحانه جثير بحملي
الهنوف نفس الحاله راحت
اخذت الدوه وعكبته للدكتوره صعدت للسياره فرحانه كلش واريد زين يسمع بهالخبر حتى يفرح معي عيوني غوركت من وره غيابو عني وكلت هساع بس يسمع بيه حامل يعگب
بسرعه
🌿🌿🌿🌿🌿
مالك
كملت حجي وي بشير بخصوص الشغل رحت للغرفه اريد انام وكفت من
شفت توته بحظن ليان ونايمات اثنيهن ابتسمت
وفريت ايدي وكلت
بله هااي وضعيه بنت الجلب ماخذه عروسي
مني ونايمه بمچاني لااا والعروس مغلسه عليه وطايب الها الوضع
كيتي طبت وراحت تمددت يمهن
هاك اقبض جنت عايزج اني اكلج خلي نتفق انتي تاخذين توته واني اخذ ليونه هيج متفقين موو قسمه عادله
بينا
ليان فتحت ومطت روحها دحكت عليه ابتسمت واشرت للعصابه الملتمه يمها وكلت
هاي مو وضعيه تره
كعدت اشرت ااش سحبت روحها من توته وغطتها خلت مخاديد حواليها واجتي ليمي
دفعتني من صدري لبره دحكت بذهول عليها من سوت هالحركه ردت احجي اشرت بوجهي ااش
سدت الباب وكفت يمو ادحك لي مبتسمه گربت منها وحجيت
بيج بسطه من هاي الزينه
هههه ليش
ملتهيه بتوته وعافيتني
هههه تغار من بنتك
اي اغار اذا احد غيري
اخذج مني
جريتها لحظني لميتها بقوه وكملت مبتسم
راح اشمر بنتي لنوار لان ماجاي اشبع منج
صفنت بعيوني مبتسمه وااخدود احمرت بستها منهن وبعدين ضگت الشفه
وخرت گوة صافن عليهن
ودايخ بيها
گضبت خدي دحكت عليها رفعت روحها وباستني منه غمضت وحظنتها بعد اكثر ورفعت لصدري كالت بهمس
اموت بيك مالك
ضعت بيها وبكلامها الحلو وهم عشت وياها احلى ايام حياتنا... ليان خلتني احبها واموت بيها لان شفت بيها حنيه مو طبيعيه على بنتي وحب جبير الها واليه ومن غيرتي عليها وحبي الها ماردت احد يشوفها ردتها بس اليه وماردتها تروح بعد للمشتل
الصبح كاعدين نتريك كلت
ليونه راح اروح للشغل اذا احتاجتي شي خابريني
تمام مالك اني هم راح اروح للمشتل
عكدت حواجبي ورديت
عش رايحه للمشتل عوفي
دحكت لي وسألت
شنو اعوفه مالك هذا شغلي وتعبت بي يله وصلته لهيج شي
ليان اني مو محتاج ولا انتي محتاجه هيج تعب اكعدي بالبيت وارتاحي وصفي الي عندج لو اعرضيه للبيع
دحكت لي بضوجه وردت
مالك هذا شغلي واني احبه كلش شلون تريدني اعوفه
يولي اعرفو شغلج واعرفج تحبي لجن
اني مااريدج بعد توكفين بي والرايح والجاي يحجي وياج ويصفن بخلقتج
هذا شيسموه مالك غيره لو تملك
لا هاي غيره ليان وحرص على عرضي
ضاجت وكامت وردت بعصبيه
ليش شنو شايف عليه حتى تحجي هيج
كمت لحيلي ورديت بهدوء
اني لو شايفه شي عليج جان مااخذتج ولا خليتج بيتي وبعدين اني وين احجي وانتي وين رحتي
اكلج غيره وحرص وانتي تردين هالرد
مالك اني ماراح اعوف المشتل
تعوفيه ليان لان ااني موو مكرن ولا ماعندي غيره حتى اخلي حرمتي فرجه لامة محمد
هذااا ماجان كلامك من خطبتني
هساع هذا كلامي اني مااريدج تشتغلين بي ولا باي مجان الحمد لله مو محتاج لاي فلس يجيني منو اكعدي بيتج واني انطيج الدبل
مااريد شي
نترت بيه ومشت من يمي مشيت وراها طبت للغرفه كعدت هناك توته لحكتنا بالحجله
يولي افهمي ااني اغار عليج مااكدر ولا اتحمل عيون اابشر ادحك لج اريدج بس
اليه وماتشوفج غير بس عيوني
مالك خلي الثقه بينا تعرف كلش زين اني مايهمني اي احد غيرك
يااااالله
صحت بنفاذ صبر وكملت
شبيج اانتي اني جااي احجي هندي دااكلج اغار اغاار ياااسلام الله اغار ومااريد احد يشوفج او يلمح طيفج
كاافي تصيح
انهدت بي وكامت شالت توته من الحجله
من بجت دحكت لها بغضب واشرت بايدي
ليااان مشتل ماكو هذا اخر ااكلام
ماردت علي دارت روحها مني وهي تسكت بتوته طلعت من يمهن صاير نار
صعدت سيارتي وطلعت بيها اردد بغضب
اني وين احجي وهي وين تطفر اليكول كاعد احجي بغير لغه اكول متصخم اغار وهي تحجيلي بالثقه والتملك سوالف هالوكت مال البنات مااتمشي عليه مو كواد اني وعندي كرون حتى اخلي حرمتي فرجه للرايح والجاي
🌿🌿🌿🌿🌿
ليان
مالك فاجأني من رفض اروح للمشتل مااجان بالي هو راح يعترض على شغلي وره الزواج
انقهرت كلش من عصب عليه وصيح عيوني غوركت بس مابجيت لان التهيت اسكت بتوته الكامت تبجي من وره صياحه سكتت وره دقائق وخليتها بالحجله
خرب واهسي بلكشي وكعدت بالصاله اباوع عليها تفتر وره كيتي وتريد بس تلزمها جرس الباب اندك وانفتح عرفتها نوار لان متعلمه هيج وكت تجي
طبت علينا تضحك وادكول
ووينهن الحلوات
تنهدت وكمت عليها اجتي بوستني وصفنت عليه سألت
خير ليونه شبيج
مابيه شي
رديت بصوت مخنوك كعدنا سوه توته اجتي ليمها شافتها سألت خير شبيها توته باجيه
ماكو شي
ليان صاير شي بينج وبين مالك
دمعتي نزلت درت وجهي منها كملت بخوف
خوفتيني احجي صاير شي بينكم
اخوج فاجئني قبل شويه من كلي بعد ماتروحين
للمشتل يريدني اعوف شغلي التعبت علي واكعد بالبيت
مسحت دمعتي كملت
ترضين بهالشي نوار
يعني ماارضى بس شنو سبب رفضه لشغلج
يكول ااغار وما اقبل احد يباوع عليج
رديت بعصبيه شالت توته وخلتها بحظنها ردت بهدوء
ليونه انتي تعرفين اني خريجه لغه انكليزيه وعندي شهاده واكدر بالواسطه اتوظف وهالشي اني اريده بس اخوج ماقبل وكلي من خطبني اني اريدج بس اليه مااريد تخلين ببالج الوظيفه
لان اني مااحبج تشتغلين ووافقت وكعدت وسكتت
يعني مالك هم مثل وسيم والشي هذا المفروض يخليج تفرحين مو
تضوجين
اخوج يريد يفرض سيطرته عليه طلع من يمي يكلي مشتل مااكو هذا اخر
الكلام
ابتسمت وردت
وانتي شراح تسوين بعد ماسمعتي هالكلام
صفنت عليها ورديت
من يجي احجي ويا افهمه هذا شغلي وتعبت علي هسه هو يقبل اكله عوف شغلك وتعال اكعد وكابلني
ههه ياا شلون يصير هالكلام غير تفلسون بشهر ويضيع كلشي وبعدين هو تعب بشغله هوايه شلون تريدي يعوفه
ااي شفتي كلتي تعب بي هوايه واني هم تعبت بي للمشتل شلون يريدني اعوفه وهو روحي بي
ليان انتي يجوز ماتعرفين مالك زين مثل مااني اعرفه اخويه يحبج ويغار عليج كلش ماشفتي بالعرس وقبله شلون يريد بس
يضمج عن عيون الناس
كلها انتبهت علي وكالو شنو هالحب وشكثر يحبها لمرته
سكتت كملت بضحك
وج هو ظل رجال مثل اخويه ووسيم الله وكيلج صارو عمله نادره بهالوكت قليل الي صار براسه غيره ويغار على مرته
نوار انتي تعرفين روحي بالمشتل
ااسمعي لاتبيعيه شغلي واحد لو خلي عمو يكعد بي مو كعد من الشركه وكال بعد مالي خلك لدوخه الارقام وعيوني تعبت من وراهن خلي هو لان هم يحب الزرع مثلج واله واهس بي
ماادري مالك فاجأني كلش بهذا الشي ودوخني وقهرني من كام يصيح عليه
هههه تعلمي عيني ولدنا كلهم طكه ونص ودمهم
حامي وهاا ديربالج توكفين بوجهه تره يعصب ويكوم يحجي مشفر
ابتسمت من اجه بالي حجيه بلهجته كملت
مبتسمه
ليونه مالك يحبج كلش لا تخلين امور بسيطه تخرب هالحب الجبير صدكي اذا عفتي المشتل وكلتي اي راح تكبرين بعيونه كلش لان اختاريتيه اله
ذبيت حسره وكلت
اكول لبابا واشوفه شيكول لاتنسين هو شريك بفلوسه بي
اي كولي اله وكل فتره مري يم عمي ووشوفي المشتل
تمام
🌿🌿🌿🌿🌿
زين العابدين
ديارنا تحررت صح لجن ظلو جم واحد لابدين هينه وهناك ولازم ننمشط المنطقه وننظفهم منهم اول ماوصلت بدينا بهالشي
عمير اجه وره يومين وجاب لي الجهاز وغراض جثيره
من الاهل فتحتو شفت مكالمات جثيره من اهلي وهيله باليوم الي هجيت بي من عدهم
رسايل على الواتس اب جايتني منها كاتبه
اسفه يازين لان عليت صوتي عليك
غمضت عيوني بضوجه وذبيت حسره كملت المكتوب
انا اعرف غلطت بحقك بس والله نسيت روحي وفقدت العقل من وره خوفي عليك انا مااتحمل اي شي يصير بك اتاذه يازين اذا صارلك شي واموت
ااخ منج يولي كدرتي حالي وحالج خليتيني اسري من يمج بهالدلهيمه واجي
بهالدرب الخطر من وره كدر الصار
ياشيخ
خير ياانسر
اجانا امر بالتحرك فورا لديرتنا يكولون الدرب نظف
من الالغام وماكو شي بعد يعيق تقدمنا
يالله خل نتوكل
سريت معه وركبت سياره همر انا ويا طلعنا لديرتنا ادحك للارض واتذكر
خضارها اليزهي وشلون
جانت المرشات ترش الزرع وترويه هساع تراب وحطب صاير ورماد من وره العمليات العسكريه الدارت بارضنا وذوله هم ماقصروا
الجلاب يطلعون مهزومين ويفخخون البيوت حتى تگع علينا بس اندش لها
شوفو ذاك الوادي
اشرت والخيال اخذني لهيله من جانت تجي بمهره وتفتر به ذبيت حسره والزعل الصار بينا كدر حالي
نسر تكلم
هذي ارض اخ عم حميد موو
اي اظن هي
رديت وسرينا على طول الشاخه صار رمي من بعيد وكفنا نادونا بالجهاز
لاحد يتقدم اكو قناص كدامنا
وينو هذا الچلب
لجدام يم الشجر العالي
هذي كاع الشيخ صگبان
هزيت راسي بأي فشگه ضربت جام الهمر لجن الله سلمنا لان جان ضد الرصاص
نسر صاح
منعول الشيبه جان جتل واحد منا لو ما هالجامه
لاحد ينزل اركدو هينه
تكلمت واشرت لعمير يطلع ويجودر يم دار الولد تمركزو بها وحنا وياهم كل ساع نسمع وزة الفشكه بالجو رددت
خلصهن يبعد ابوك كاعدين وننتظر شعدنا غير الانتظار
ههه تريد جاي مهيل
بهالكعده
علي تكلم معي بضحك اجتي هيله ببالي ابتسمت ورديت
لاا مو هساع خل نفض هالمجتول وراها نكعد ونشرب الجاي وناكل الكليجه مال الاهل
الله حيو مادازين منسف وي الكليجه
دازين خير من الله بس مو منسف لاا دجاج ولحم مشوي
ااضرب اليوم اسند افادي وره مااصيد هالغراب
شد حيلك وشوفنا القناص ابو حسين شراح يسوي بي
ههههه اابشر بس اريد واحد يتحارش بي يطلع راسه شويه
هههه غير يطيرو الو
سمعنا وزة اللخ نسر حدر من فوك الدار شايل منظار وكال
هذا الكواد لابد بالشجره مثل الشاذي گوة شفتو
مغطي روحو زين بالاوراق
العب وجان يلكفه النسر ووخر هسه اجه دوري
علي صعد بالقناص لفوك وره مشوار سمعنا رمى
وصاح
صاادوك وانت عبالك مااتنصاد
المقدم صاح
عفيه بيك ياذيب
حدر من فوك مبتسم ويسوي اشاره النصر بايدو
تقدمنا اسمع رمي بعيد المقدم معنا كال
ياولد انتبهو من المفخخات عيونكم على الجهات كلها
زين العابدين وين بيتكم ومضيف ابوك الشيخ
مو هينه حنا عدنا مزرعه شوفها ذيج
اشرت لعلي عليها وبعدين كملت
عبر ذاك الشارع شوفو نطلع منو گبل مسافه مو بعيده ونصل له دار جبير كلش وبنص بستان ومضيف ابويه به
وولك اانتو غير طااكين
ابتسمت ورديت
شيوخ بعد شلون ماتريدنا نطك وهذا من فضل الله والحمد لله
الله يزيدكم من فضله
ويزيد امة محمد
رديت علي نادونا بالجهاز
يااولد مفخخ جااي من الشارع العام
الكل دخل انذار شفنا من بعيد جاي مزرعد علينا وويا الموت الرمي صار بفلس علي لجن السياره مصفحه جعفر حدر بسرعه شايل قاذفه رمى علي طك مسافه عنا
والترابه گبت واجتي علينا صحت
الله حيو البطل
حي الله من كال ياازين
رد واجه يضحك وشايل القاذفه على جتفو صعد ويانا وتحركنا جنت بس اريد اصل لدارنا ومضيف ابويه
كلت بس اصلوا الا اخابر
ابويه بالثريا وابشرو
🌿🌿🌿🌿🌿
ريمه
سمعنا بهيله حامل وفرحنا لها جثير ورحنا لدارها كعدنا وياها بالصاله شفت اختي صفره وتعبانه وشلت همها عرفت تلاغت مع
زين وطلع من يمهم زعلان
عليها هي وامه الي شفتها فرحانه بحمل اختي ارتاحيت لان جنت اشوفها تتعامل معه بشده وتكبر وكلت بلكي الي ببطن اختي يغير شويه من طبعها معها
عگبنا وره مشوار امي سألتني
خواتج وين راحن
دورت بعيوني ماهنه بالحديقه كملت بضوجه
شوفيهن وين راحن الدنيا صارت مغرب خلي يعكبن بسرعه اذا ديلعبن بالمرجوحه
تمام يمه
سريت للحديقه صايره وره بيت الشيخ ماهن ولا اكو احد بالمرجوحه
رحت للممر كلت خاف به يدحكن للدجاج دحكت للقفص ماهنه كلت خلي
اعكب يجوز رجعن للدار
سريت مسافه وكفت من شفت واحد منطيني ظهرو ويحجي بعصبيه بالجهاز
اي يول شكثر لغيت شبيك شبالع لسان ببغاء ااسكت وخليني اافهمك وش تسوي
عرفتو فزاع جان يروح ويجي بالحديقه ماانتبه عليه صعدت للممر العالي حتى اروح لدارنا سريت بخجل ادحك له بطرف عيوني انتبه
لي من گرب يم الممر
دحك لي وسكت من ثولي وخجلي ماانتبهت انا اسري على الحافه ذبيت رجلي
ومااحس غير واكعه
تلاكاني بسرعه ووكعت عليه وهبدتو بگصتو ذيج الهبده القويه براسي خليت ايدي على جتفو اريد انهض صااح بألم
مااال الثول ياامال االعمى مممر شكبروو شلون وكعتي منو ووين عيونج بجعب رااسج
انا بطبعي هادئه واحترم بس من جسر عليه ضجت كلش وانقهرت لان الصار بدون قصد مني رديتو بغضب
عش تغلط ااحترم روحك
ووولي من جدااامي لاااجي اگبرج
فزيت من صااح بيه بغضب وجههو انطعن من الالم ولزم جتفو كمل بصياح
عمى شكبر عيونج وما شفتي الدرب
ماراح اردك لان انت بلاااا اخلاق
عض شفتو بغضب وخزرني تقدم عليه وكف تفرس بملامحي عكد حواجبو سأل
انتي منووو وشجابج هينه
ماااخصك
صحت به وسريت من يمو دمعتي بعيوني لان جسر عليه وانا ابد محد جاسر
عليه ماعرفني لان من اخذنا
من ديرتنا جنت متلثمه
🌿🌿🌿🌿🌿
فزاع
كعدت لازم جتفي يوجعني لان التهب عندي جثير وما طاب بسهوله احجي على
هاي الثوله الي مدري منين طلعت لي ووكعت عليه واذتني رددت بعصبيه
مال الثول مممر شكبرو عافتو كلو واجت على الحافه ووكعت عليه صوجي
انا عش تلگيتها مااخليها تكع ويفين حظها لاا وام لسان تنهد بيه وهي ام الراهي
فركت جتفي صفنت وكلت
هاي منوو مو شايفها ابد شنو گراييب لاا اعرفهن كلهن لبنواتنا وهي مو من عدنا
فكيت عيوني كمت وسريت بسرعه للحديقه الجانبيه وكفت من شفتها دشت
لدار مله حميد كلت
خرب بالحظ هاي بنتو لعم حميد شلون فشله رزلتها وحجيت عليها وهي بنتو بس لادكول وافشل معه
ذبيت حسره وكملت
صوجها هي محد كال لها تمشي اعوج وتكع على العالم
سريت افرك بجتفي وراسي كلت مال الجتله مو صماغ هبدتني بي عبالك يده هاون وضربتني به
دحكت لدارهم بضوجه وسريت للمجلس
🌿🌿🌿🌿🌿
هيله
ام زين من سمعت بيه حامل تغيرت كلش وفرحت فرحه جبيره تمشي وتوصي بيه على روحي والي بطني وتردد
وينو الزين خلي يجي ويسمع راح يصير اب ويجينا الغالي ابن الغالي
رادت تبشرو كالت لعمي خابرو على الثريا دك علي مارد كال
هو يشوفنا داكين علي ويتصل
يوم مر وثاني يوم وهو ما اتصل حالي تكدر بعد اكثر وانقهرت جثير وكمت اهوجس بالشر بديت الوم روحي لان عليت صوتي علي وقهرتو
ثالث يوم امه راحت
