رواية دخيله الشيخ زين العابدين الفصل الرابع والاربعون بقلم أوتار حزينه
زين العابدين
فكيت عيوني بذهول من سمعت كلام عوض دحكت لفزاع صافن عليه رجع ليوره سند روحو على الكرسي وعكد حواجبو
سألت
تحجي صدك ياعوض يعني ماهجست بك تودها لبنت عم حميد ولا سمعتك تكلمت بها
ماتكلمت من وره الوضع الحنا به يازين ومن ورة اخويه الي فقدت اثرو وجابو لي مستشهد ماجنت بخير حتى احجي واكول انا عاشكها لبنت عم حميد
سكتت وفزاع هم ساكت وماتكلم بشي كلت ورة لحظه
وهساع شراح تسوي منا امك تريدك تاخذ حرمه
اخوك ومنا انت تريد بنت عم حميد
ذب حسره نزل راسو ورد
مدري ياخوي مدري جن راسي مضروب بحديده قويه وكمت مااعرف افكر
السالفه دوختني اليه مو عاد انت ماتعرف ترضي امك ولا روحك
شور عليه يازين انت هم يافزاع شدكولون اخذ بنت عم حميد بالاول وبعدين
اخذ حرمه اخويه وراها
فزاع
سمعت وش كال
ورديت بغضب
لاتظلم البنت معك يااعوض
انتبهت لحالي من دحكو عليه رددت بهدوء
راح تظلمها معك ياخويه مايجوز تضم هالشي
عنها وعن اهلها لازم يعرفون بالاول وتشوف
وش يكولون
اي زين راح يتكلم مع عم حميد هو وعمي الشيخ
يكولون له اخذها وهي الاولى وعزيزه وغاليه عندي وحرمه اخويه استر عليها لخاطر ولدها مايتبهذولن يم اهلها
زين العابدين
عيوني راحت لفزاع ساكت وعاكد الحواجب هوجست به ضايج من الكاعد يسمعو
عوض كمل
ها وش كلت يازين
انت كلت مالك نفس بحرمه اخوك شلون تريد تاخذها وره ماتاخذ بنت عم حميد
يازين كتلك شور عليه وش اسوي انا وصلت نقطه قفل عندي كلشي اريد بنت عم حميد وبنفس الوكت امي تريد لي حرمه اخويه كلت لها انا رايد وحده غيرها كالت تزوجها ماعندي اعتراض لجن لازم تعقد على حرمه نجم وراها
سكتت وفزاع هم
عوض رد ليوره ولزم
راسو وردد
راح اتخبل اريد حل تعبت من الجاي احس به موتة نجم خلتني مكسور الظهر
راح وسكن الگبور وخله حمل جبير على ظهري
هدي يبعد اخوك هدي وش بلاك نلكي حل الها بأذن الله
ماكو غير هالحل يازين انت تتكلم مع عم حميد وادكلو على وضعي وتشوفو وش يكول
هزيت راسي بأي ورديت
ادلل اكلو واشوف ردو
🌿🌿🌿🌿🌿🌿
هيله
مثل كل مرة من يريد يلتحق زين احزن وانقهر واظل اهوجس به واكفه اصفط هدومو واحضر له شي ثخين لان االشتا گرب
والدنيا صارت بارده شلت بلوز اسود ركبه دحكت له
مسحت علي بهداوه رفعتو وشميتو بنفس طويل
عيوني غوركت حظنتو ورددت
مااانا كادره على الفركه يازين والله مو كادره اتحمل غيابك عني بس شااسوي
لازم اكوي گلبي واتحمل ما اريد انوح بوجهك واحجي كلام يكدرك اعرف تضوج لو شفت دمعه عيني او سمعت نفس كلام امك مني
تنهدت دمعتي نزلت ومسحتها كعدت بلوزه
بحظني وصافنه على الجنط باب انفتح دش دحك لي كمت ابتسمت بوجهه گوة رفع حواجبه سد الباب ذب البشت من جتفو وخلاه
على القنفه گرب عليه
زين العابدين
اعرف وش تفكر بي هيله هي بالنسبه لي كتاب مفتوح اقرها بسهوله واعرف وش بها وبشنو تحس وتفكر
من شفتها كاعده وحاظنه بلوزي وابتسمت لي حسيت بها غصب رحت
لها كلت
جن هالابتسامه طلعت غصب
لا ليش غصب مو دائما اضحك بوجهك بس عيوني تشوفك
جريتها لحظني بهداوه اخذت البلوز منها وزتيتو على الجربايه
دحكت لي عيوني بعيونها لمعت بالدموع ابتسمت وكلت
تره راح الجثير وظل القليل يعني الوضع هناك مو مثل الاول وانا من راح اعكب لديرتنا ماراح اطلع واجبات مثل الاول اگضب كاعنا واعمر الديره حتى تردين لها انتي وهلي وناسنا
تنهدت بحظني نزلت راسها جابتو يم صدري سندتو على گلبي كملت
يولي لاتقهرين روحج
انتي حامل لايصير بج شي
مابيه شي لايظل بالك
ااي ومن يوميا سهرانه بالحمام انا لو انتي
ردت بصوت مخنوك
ابنك وكح شاسوي له تكلم معه كلو خل يركد ويصير عاقل
ههه ادللي هساع اتكلم معه بس انام واخذج
لحظني
وخرت مني دحكت لي مقهوره والوجه غادي دم كالت
بس توصل طمني عليك ولاتگطع امانه يازين خابرني وخليني اسمع صوتك يوميا
ادللي والله يوميا اخابرج ونسهر سوه بعد شتريدين
الوجه ابتسم وتغيرت الملامح حظنتني لميتها بقوه ورفعتها لفوك ورحت كعدتها على الجربايه كعدت اگبالها گضبت ايدها وحبيت اصابعها وحده وحده
گضبت شعري وردتو ليوره حبتني منو غمضت كربت وحبتني من رگبتي تنهدت سحبتها لحظني الشوك خلاني اضيع بكل تفاصيلها
دخت بيها ومااعرف شلون راح اسري وابعد عنها
كعدنا وره مشوار ادحك لها ومبتسم الشعر منثور على الجتف تكشر لي تفاح وتشلف اخذت وحده وكلت
اريد اتكلم معج بسالفه
كول اسمع
اليوم عوض تكلم معي وراد يخطب ريمه
فكت عيونها ضحكت وكلت
يولي راح اصيب عيونج بالحسد هنا كبار والنوب تفكيهن هيج افهه عليهن واظل بس صافن عليهن من حلاتهن
ههه ماتصيبني انت مستحيل يجيني اذه منك
من انا اذيج ؟ وج تخبلت عجل اذا سويت هيج انت روحي هيله شايفه واحد ياذي روحو
ابتسمت وردت
عبالك نسينا موضوع ريمه
ههه اي نسينا والتهينا بحبنا
هزت راسها اخذت منها شلف تفاح اكلتو كملت
شوفي يولي هو سالفتو جايده
خير يازين وش به
اسمعيني الولد طلع يحب اختج من بعيد لجن ماكدر يحجي شي من وره وضعو تعرفين نزحنا والتهى يدور على اخوه ولكاه بعد فتره مجتول من ذوله الجلاب وظل فتره بكدر نجم وصارت له سالفه مع امه
واجاني يريد شوري بها
اي وش هي السالفه
امو تريدو ياخذ حرمه نجم اخوه
عكدت حواجبها ونزلت شلف البرتقال من حلگها ردت
عجل شلون يريد اختي وهو راح ياخذ حرمه اخوه
هو مايريدها ياهيله لجن امو دكت عليه وفرضتها علي كال اخذ ريمه بالاول هي حرمتي الاولى تصير يله اعقد على حرمة اخويه
يازين ابويه ماراح يرضى ولا اختي مو حنا الي نرضى نصير فوك حرمه ولا جوانا
حرمه
سكتت ورديت وره مشوار
اسال عمي واشوفو وش يكول
اسالو بس انا اكلك ماراح يرضى وحتى اذا رضى اختي ريمه مستحيل تقبل
بهالشي
اوف شلون سالفه هاي والله الولد مابه شي سبع ونشمي وزلمه اخو خيته
فزاع وعوض ونسر وعمير خوش ولد وحزام ظهر لك وينشد الظهر بهم
نسيتي صعب وحمد ومالك
هيله
من جاب سيره حمد عكدت حواجبي سكتت
انتبه لي سأل
خير ياهيله اشوفج تكدرتي من جبت طاريهم
لاتزعل يازين لجن ذوله صحبه شر مو خير
ابتسم وسأل
مالك جاز من الشرب وتعدل حالو ياهيله وصعب هم اصلا هو ماجان يشرب مثلنا يدوخ منو وتلعب نفسو
والنسوان يازين ؟
سألتني بنغزه ابتسمت ورديت وانا ناوي اضوجها واستفزها
صعب خجول ياهيله مو مثلي انا وحمد ومالك
دارت وجهها مني والملامح تغيرت للغضب ضحكت بصوت وخرت الصينيه گربت منها تكلمت بعصبيه
ووخر مني يازين
والله امزح معج نغزتيني بالكلام وردت استفزج
دحكت لي بعتب كملت بضحك
مو جزت من كلشي لخاطر عيونج الحلوه عش تگلبين بالماضي
ماجنت اتكلم بك احجي بربعك ربع الشر
هههه يولي ماهم ربع شر جازو كلهم بس ظل ذاك الاثول ماجاي يجوز من الشرب ولا السهر
عرفتو حمد سكتت ما تكلمت بشي هو كمل
ادعي له ياهيله انتي دعائج مقبول يم ربنا
مااعرف شلون كلت
الله يجفينا شرو
صفن عليه عاكد حواجبو كملت بسرعه
الله يجفي شر نفسو ويهدي للطريق الصح
يولي احسج ماتودين حمد
كمت من يمه شلت الصينيه رديت
ماارتاح لهم الثلاثه اخاف عليكم منهم لان اعرف هم شنو جانو وانت تعرف يازين الصاحب ساحب
لاتخافين تبت لله ومستحيل بعد ارجع لذاك
الدرب
ابتسمت خليت الصينيه على الميز كعدت يمو ورديت
شحدك ترجع له يبن الشيخ
عضيت شفتي وگربت وجهي من وجهها وكلت مبتسم
كاعده تهددين ولج
ههه اي اهددك لان احبك وماارضى ترجع لذاك الدرب
ماارجع يولي الشي الي يبعدني عنج مااسوي لا والله لو اعرف بي عافيتي
ابتسمت وصفنت بعيوني وهمست
عافيتك يمي مثل ماعافيتي يمك انت غلاي والغلا كلو انت نظر عيني والغالي الي سكن الگلب وتولعت به الروح
يولي مو هيج بهيده وي گلبي شوفي اگضبي كام يدك بجنون وسوالي عرس هساع بله انتي يمي واكدر اطفي شوكي بيج لجن اذا سريت وتذكرت هالكلام
هناك وش اسوي بحالي
وشلون اطفي شوگي
اروح وياك والله انت مو كلت امنتو الديره وذوله
طلعو من عدها مهزومين
هههه يعني تجين وياي حتى الشوگ يطفى
بسك يااازين
هههههه
اااوي مو هذا قصدي عش رحت صفح
انتي كلتي انا شعليه كلت اريد اطفي شوگي وانتي كلتي اجي وياك يعني شنو
اهووو راح يجلب بهالسالفه
هههه عش ضجتي مو صدك هالحجي
ناام يازين
ههه انام ليش لااا بس بعد مااطفي شوگي
وطفيت شوگي وعشت وياها ليله تنكتب بعمري حسيت بها مانامت لان كل ساع تتحرك كاضبه ايدي وتحبها كل مشوار مسوي نفسي غافي ومتابع حركتها
حبتني من رگبتي وشمتها بنفس طويل تردد بهمس
احبك يازين واموت عليك
وادعي من الله ياخذ من
عمري ويخلي لعمرك ولا اشوف بك شر بيوم
🌿🌿🌿🌿🌿🌿
ايهم
نقلت روحي لبغداد لان
بعد مالي خلك اظل رايح وجاي تعبت وانطيت فلوس
هوايه يله سووها اليه
بالدوام لارا اتصلت تبجي فزيت وصحت عبالي اهلي لو ولدي بيهم شي
خير شبيج تبجين
ماادري ايهم بطني توجعني فد مره وكاعده انزف
رديت بضوجه ورجعت كعدت
امي وين خلي تاخذج للدكتوره
امك اخذت افنان وراحت لبيت خالتك اايهم الحك عليه راح اتخربط والولد وحدهم
جاايج هسه حضري روحج
طلعت من الدائره ورحت لبيت اهلي خابرت مرة اخويه اياد الي كعدو بيتي اني وليان وكتلها تروح لبيت اهلي
وصلت وره مشوار نزلت طبيت للبيت سمعتها تحجي وياها
لاتخافين لارا اجه ايهم
طبيت للغرفه مالتها شفتها فد مره صايره ووجهها اصفر كلت
اامشي يله خلي اوديج واشوف شبيج
عفيه ديري بالج عليهم هسه ارجع
روحي لارا ولاتشيلين همهم
طلعت وياي ركبت يمي وكالت وهي تتوجع
ايهم بطني موتتني ماادري شبيه من جبت يوسف وهي توجعني وزاد الوجع بهذا اليوم
هسه اوديج ونشوف شبيج
رديت مختصر اخذتها لدكتورتها حجزت احنا بالطريق وصلنا طبت للعياده رجعت كالت
سراي بعد اربعه
راح انتضرج هنا كملي وتعالي
تمام
ظليت كاعد بالسياره وصافن على الشارع جهازي دك طلعته من جيبي مينا متصله فتحت الخط كالت
هلو حبي
هلا مينا
اشتاقيت الك وكلت خلي اتصل عليك
واني هم اشتاقيت الج
اي واضح من عفتني يومين بلا اتصال
جنت ملتهي بدوامي مو تعرفين انقلت لبغداد والتهيت بدوخة النقل
اي حقك كلت الي بس اني مو متعوده وتعلمت عليك ايهم وكمت اضوج اذا ما اشوفك او اسمع صوتك
ليان صارت بين عيوني من جنت اكول الها
مااكدر اذا مايمر عليه يوم مااسمع بي صوتج او اشوفج
ايهم تسمعني
اي مينا اسمعج
اريد اشوفك
اي بليل بنفس المكان نلتقي
تمام سي يو حب اروح باي
باي مينا
سديت الخط سندت راسي على الكشن الوره غمضت بتعب افكر بحالي الي انگلب وره ماخسرت ليان كلشي تغير بيه كمت اشرب وادخل بعلاقات هوايه اريد بس اقضي وكت وابتعد عن افكاري الي تخليني اعيش بعذاب وتعب انهزمت من واقعي الي فرضته على روحي والجاي اشوفه بولدي ردت حياه بعيده عنهم وعن لارا حياه حتى لو مزيفه ومال كم يوم تنسيني الهم والعذاب الي عايش بي
ذبيت حسره باوعت للعياده نزلت ورحت اشتريت جگاير طلعت وحده ورثتها ووكفت ادخن وره مشوار طلعت لارا وجهها مايتفسر
مشيت الها صعدت واني وراها كالت وهي تبجي
ايهم الدكتوره ادكول عندج عقده جبيره بالرحم ولازم تسوين الها عمليه ونشيل الج
عكدت حواجبي رديت
زين شنو هاي العقده ما كالت شنو هي
ماادري ايهم خوفتني كلش ادكول اسبوع الجاي لازم تسوين العمليه ونزرعها دنشوف شنو هي
ااي سويها وشيلي الرحم
شلون اشيل رحمي واني بعدني صغيره وماجبت غير اثنين
هسه انتي شتريدين ما افتهمت تريدين صحتج لو اطفال
لييش احسك مو مهتم اليه دااكلك تريد تشيل رحمي وتزرع العقده يعني اذا صار هالشي اني انتهي وبعد مااكدر اجيب طفل زين حتى يشيل اخوته واذا اخلي
يجوز يصير بيه ذاك المرض
وينتشر بجسمي
بجت وكامت تشهك
بصوت قوي
ماحجيت شي ظلت تردد
اعرفك مو مهتم لو اموت كدامك ماراح تحزن عليه ولا تنزل دمعه من عينك بس اهتم بيه لخاطر ولدك اذا صار بيه شي هم شراح
يصير بيهم
باوعت الها وحوبة ليان اجتي براسي هي حجتها وكالت بشهكه
هاي حوبه ليان طلعت بيه وبولدي اذيتها كلش اذيتها والكاعد يصير بيه دين الله رده اليه
ااي وبعد وبعد لارااا
رديت بخنگه وكملت
بعد راح نشوف ايام سوده لان اذيناها ودسنا عليها هوايه
دارت وجهها مني تبجي بصوت مخنوك
🌿🌿🌿🌿🌿🌿
مالك
ليان رادت تروح للمشتل وكالت من ترجع من المكتب مالتك ارجع وياك جانت ضايجه ومااعترضت اخذتها وعفنا توته يم نوار
نزلتها العصر يمو عمي بره يرش بالزرع شافنا ابتسم وسلم اشرت اله بالسلام
وكفت يم الشباج وحجت
مبتسمه
حباب من تجي جيب عشه وياك
ادللي اجيبو ووياي عيوني
ضحكت وردت
تسلم عيونك الحلوه حب
يولي ابوج كاعد يدحك علينا ومبتسم جن الحجي منقص حنان واهتمام كولي لامج خل شويه اداريه
بليل
مااالك روح
هههه اوي هاي شبيج زعلتي
ههه روح وكح حتى بابا ماسلم منك
رايح ولج لاتدفعين
شغلت اشرت الها وكلت
روحي لاتظلين واكفه والعيون عليج
ههه يقااار ابن ذيبه
ضحكت وعضيت شفتي الها مشت كل ساع ادحك عليه وهي مبتسمه اشرت باي سويت الها بدون وعي كلت
خرب بالحظ شوف شكاعد اسوي هالبنيه ماخلت لا عقل براسي ولا ثگل
حركت مبتسم ،،،رحت للشركه مالتنا الي فتحناها وره زواجي كملت جم شغله وطلعت لعماره كاعدين نبنيها لواحد تابعت الشغل ومافضيتو الا لليل ليان اتصلت كتلها جاي بعد
شويه
كملت كلشي واخذت دجاج شوي ورحت عليها وصلت بعد عناء طويل من وره الازدحام وكفت يم المشتل نزلت ورحت الو طبيت شفتها واكفه وي واحد وتحجي ويا
اي هذا سماد تخلي كل شهر لكل نبته خاشوكه اكل بس لازم بالاول تعطشها يله
تخلي اله وبعدين اسقيها والافضل وي المغرب
تمام وتسلمين ست
اهلا وسهلا بيك
طلع من يمنا ابتسمت اليه اشرت بايدها
هلو
عكدت حواجبي وسألت
وين عمي
راح بشغله
هاا
ليان
شفت مالك ضاج من شافني وحدي بالمشتل مشيت اله گطعت ورده جوري حمره
وكفت قريب منه ضربته بهداوه على خده بيها ابتسم وكال
يولي شكاعد تسوين
اضربك بالورد ياورد
حتى مااضوج موو
ليش انت ضايج
شتشوفين ليونه
ههه ضايج بس لاتضوج
ههه هاي شلون
ماادري بس لاتضوج لان الشغله صارت فجأه واضطر يروح الها
مااحب تتعاملين وي زلم اغار يولي
قربت مني كلش وهمست وعيونها بعيوني
بس اني مااشوف رجال غيرك انت وبس الي مالي عيوني ومخليني احس ماكو احد مثلك ولا راح اشوف
ابدا احد يشبهك بهالصفات الحلوة
گلبي لعبت بي لعب وخلتني اصفن بهيام عليها گضبتها من خصرها اريد ابوس الشفه
يالله
فزيت ووخرت منها بسرعه من طب عمي لهيت روحي اعدل بشعري منزل راسي
كال
ها اجيت مالك
اي ويوم السعد من اجيت
ها يابه
لا عم ماكو شي
ليان فحطت من الضحك انهزمت لجوه تحلفت بيها وكلت الا اطلعها بيج بس اوصل البيت
ها مالك نروح
ها اي اامشي يابه
بابا لاتتاخر وتنسى روحك بالمشتل تره ماما تاكل گلبي
ههه امج ذابه الصوج براسج وادكول ساعه البيضه من اخذت المشتل من ليونه نسيتني والتهيت بي
هههه اي كالتها اليه
رايحين عم
الله وياكم
طلعت وي مالك نضحك كال
طلعت الحجيه معوزه حنان وابوج لابس الوضعيه
ههه شفت شلون طب علينا
اي خلاني اكمز لذاك الصوب
ههه
صوتج ولج منا الشارع
انت كاعد تضحكني هاا تذكرت جبت عشه
اي جبت دجاج شوي وحلويات جثيره راح يصعد السكر اليوم واحلي بيج
سكتت الخدود احمرت دحكت لها باعجاب وعيوني افترت عليها كالت بخجل
لاتباوع عليه هيج اخجل منك
ااوي عيني منو هساع الي ضرب خدي بورده
ههه اني
صوت ضحكتها جن يرن بروحي گضبت ايدها بهداوه كالت
احبك حب
واني هم احبج يبعد الحب واهلو
🌿🌿🌿🌿🌿🌿
زين العابدين
طول وجودي بديرتنا ما فگدت الامل وكلت بلكي احد من الي ظلو بها شاف
هايل او مهرة وخلاهم
يمو
تعمقنا بالمنطقه وتحررت جثير قرى على ايدينا وايد الحشد الشعبي وكع من عدنا شهداء ومنهم هم وكلما يكع واحد منهم يترك اثر جبير بيه ويخليني ازيد اصرار اخذ بثارهم واخلص
ارضنا من ذوله الانجاس الي تفننو بقتلنا
راكب سياره همر طالعين لمنطقه انقصفت من القوه الجويه تبعنا ولازم نمشطها زين
فزاع معي ونسر وعمير وصلنا الديره مهجومه ونسمع صوت رمي هينه وهناك هالخراب ذبحني وين جانت ارضنا وهساع
شلون صارت
سرينا بين البيوت وخالين بالنا القناص تبعهم سمعتو رمى اشرت لعمير ولنسر
يوكفون ،،، علي اجه دش بيت مهجور اشر لفوك هزيت راسي تمركز فوك انتظرنا مارمى دحكت لعلي
اشر خل خوذه بسلاحك
افتهمنا
ماجنت لابس خوذه اضوج منها لاف راسي بغتره
عمير سوه الي رادو رمى عليه وبنفس الوقت علي رمى صاح
ضربتوو
عمير طلع من مجانو يضحك صحت به
عگب لااا
ماكملت كلامي الا وهو مضروب جيله براسو جمدت بمجاني من شفتو تمدد والدم يفلت منو نسر صاح لاااا ياخويه
راد يروح له گضبتو بقوه فزاع كعد يكهد بالبجي علي نزل بسرعه واجه علينا
يصيح
ولكم ماامنا ،،،،،،،، ليش طلع،،، خرررب بالحظ ولكم ااخ ليش خليتو يطلع
انهارو يمي يبجي ساند روحي على الحايط دمعتي جامده بعيوني ماتنزل وصافن علي بجمود
ماردت اغمض اعرف اذا سويت هالشي راح تحدر وانهار كلت بصوت مخنوك
ااااالثار ياولد الثار يولد ذيبه
تخبلت وفقدت طلعت من مچاني ارمي عليهم فزاع ونسر صاحو
عگب ياازين
گضبوني الجيلات توز من يمنا خلوني يم حايط اصرخ
ااخ ياابه ااخ وولكم ااخ
ضربت الحايط بوكس صار رمي عنيف الولد صاحو
يااشيخ اشتباكات بذاك الدار لكفو القناص الضرب عمير
رگضت وهم ورايه،،،،،،
دشينا دار جبيره كلش نسمع رمي وصياح ولدنا
ارمي ولك سلم روحك
نعرفهم مفخخيين اروحهم ومايسلمون االا وهم جاتلين روحهم القذره وماخذين وياهم جم واحد منا
لجن حنا جنا فاقدين الادراك من وره عمير
وحاقدين جثير عليهم دشينا اشتباك مع جم واحد صار بالسلاح الابيض
ذبحت واحد شايل حربه وانا اصيح هذااا ثارك ياعمير
اسمع رمي لجن ماوكعت وزت اكثر من جيله من يم اذني مادرت بال فقدت وتخبلت الولد هم وياي يركضون ويجاتلون ويجتلون
يصيحون الثااار يولد ذيبه
علي صار بصفي ينهد ووجهو كلو دم دحكت
صايره مجزرة يمنا اكثر من واحد مجتول وكلهم من ذوله الانجاس
واكف ارجف من وره اعصابي نسر كعد الحربه
بأيدو كلها دم فزاع راح سند روحو على الحايط
حمزه دش ينهد كال
گتلووو للقناص
غمضت عيوني حسيت بطعم الدم بحلكي مسحت وجهي بالغتره كلها دم
سريت بسرعه
وعگبت لعمير الولد ورايه رحت له مسجي على التراب كعدت يمو گضبتو جسمو حار دمعتي حدرت وصحت
ااخ ياخويه عش طلعت من مجانك ولك عش شوفت روحك له
نسر جلس يمي هو وفزاع علي وكف يم راسو وكال
راح شهيد يازين يم الحسين
دخيلك يارب وش راح يصير بامو وابوه شراح اكول لهم جبت لكم ابنكم بتابوت
ايد گضبت جتفي دحكت المقدم تبعنا كال
المنطقه مو امنه شيلو صاحبكم بسرعه واخلوه للمقر
كمت گوه نسر وفزاع وعلي شالو واخذو للهمر المقدم تكلم
شد حيلك يازين كلنا نعرف احنا داخلين بهالمعركه ونعرف الموت ورانا
مارديت گاضب روحي گوه سريت من يمو ورحت للهمر الي هو بها
شيخ شعلان
كاعد بمجلسي واجاني خبر استشهاد عمير نزلت راسي وروحي اختنگت سمعت زين يتكلم معي مخنوك ومقهور جثير وماقبل ينزل به كال لي
مااكدر اجيبو يابه مااكدر اشوف اهلو وش راح يصير بهم خلني هينه احسن
وجابو عمير ثاني يوم والدنيا انگلبت علينا سريت مع ابوه واخوتو يبجون ومفجوعين به دفناه وخليناه بدار الحق ادحك للمقبره جم واحد من ولدنا راحو وسكنوها
ياااشيخ راح ولدي
ابوه ناح يمي وكع على جتفي حظنتو وعيوني غوركت وصبرتو
الله يجعله لك ذخر بالجنه
شاب راح ياشيخ ولكم ابني عريس راح مافرحت بي ولا شفت ضناه
صاح وهو ينوح اخوته الاثنين كعدو يم كبرو
يكهدون بالبجي شأريد احجي وشلون اصبرهم
اخوه الجبير كام وانهد بي
هاي الردتها ياشيخ هذا اخوي مات وسكن الگبور شوفو شاب راح ماشبع من الدنيا ولا فرحنا به
عش تتتكلم مع الشيخ هيج يااااا عبدالله
بحر ولد عمي انهد به وولدنا كلهم وكفو يمي يدحكون له بخزره خليت ايدي جدامهم ورديت
انا ماجبرت اخوك يروح ويتطوع بالحشد وانت تعرف هالشي ،،،،كلت الي يريد يجي ويحرر ارضنا خل يجي
مااهو هيج الحجي ياشيخ
عجل وش احجي تكلم عش كاعد تشمر بالكلام على شيخك وشيخنا
نسر الجاب عمير انهد به وكمل
نسيت ابنو معنا ولك زين العابدين ويانا جتف بجتف يقاتل ومن شاف اخوك استشهد صاح الثار ياولد ذيبه هب يرگض والرمي علي ولوما ستر الله جان انجتل وحنا ويا
نسر اندار للواكفين وتكلم بحرگه گلب
حنااا جنازه ونمشي على الارض مانعرف بأي وكت راح نموت وهاي الموته اشرف من ان نموت بدارنا لاااحد يلوم عمي الشيخ
ماضرب احد على ايدو وكلو
اسري وقاتل كل الي سرى ويانا اجه من ذاتو اخذتو غيرتو على ارضه وعرضه واولهم زين العابدين
الكل كال
اي والله صدك
عبد الله راح كعد يم گبر اخوه يكهد بالبجي دحكت له بقهر كلت
بهيده وياه ياولد مفجوع باخوه خلوه يطلع الي بگلبو حتى يرتاح
ابني رفع راااسي ياشيخ ولكم عمير رفع راس ابوه
شهيد راح يدافع عن ارضه وعرضه
ابوه صرخ فاقد ويفتر علينا
ويصيح بعالي الصوت
راسي مرفوع بك ياعمير لجن فراكك غالي ياولدي
انهار يمو يكهد بالبجي زين اجه بين عيوني وگلبي وجعني عليه دعيت
يااارب افرجها علينا واحمي ولدنا من الشر يارب لاتفجع بعد اب بولدو
الكل كال امين
رحت لابو عمير گضبتو وكلت
ياخويه گوي گلبك واذكر الله والله ولدك ولدي
ووجعني الصار به
ياشيخ الضنا غالي
عز الله غالي لجن الارض والعرض اغلى وهذا ولدي معهم وجاي تشوفو يقاتل وياهم وراخص دمو
سكتت وكملت وي الواكفين
وش اسوي يالربع اترك ارضنا اعوف كلشي ونظل لاجين هينه كولو انتو شورو عليه انا الكاعد اسوي صح
لو غلط
محشوم من الغلط ياشيخ السويتو صح حنا وولدنا فده ارضنا والي اناخذ غصب يرجع غصب عنهم وبزود ولدنا والواكفين ويانا
بحر رد
ابو هيله كمل بهدوء
الدنيا مادوم لحد مادامت للنبي تدوم النا الموت حق علينا يالربع ولازم مانعترض عليه وهذوله الشباب
اشر على گبور ولدنا وكمل
(ولاتحسبن الذين قتلوا في سبيل الله امواتا بل احياء عند ربهم يرزقون ) صدق الله العظيم والرسول عليه افضل الصلاه والسلام يگول ( مامن عبدا يصاب بمصيبه فيقول انا لله وانا اليه راجعون اللهم اجرني في مصيبتي واخلفني خيرا منها الا اجره الله في مصيبته واخلف له خيرا منها ) صدق رسول الله
ابو عمير كام يردد وياه ويبجي هونت عليه وولدنا كومو اخوتو من يمو سرينا بهم من المقبره
اسري والهم جاتلني والقهر من وره ولدنا الكامو يكعوون واحد وره اللخ
وكفت بعزه عمير وماعكبت لليل دشيت تعبان ومقهور فضه تلكتني وجهها مطعون وغادي دم لجن ماحجت شي بحلگها كلام بس شافت وضعي والتزمت الصمت
سريت للصاله امي كاعده تسبح بالسبحه عاكده حواجبها ومبين عليها القهر
كلت
الله يساعدج حجيه
يساعدك الك يمه
جلست حدها سندت روحي ليوره وكلت
يالله رحمتك وغفرانك افرجهن عنا واستر على الباقين من ولدنا
امين يااولدي يسمع منك الله
شلونه ولدي ياشيخ ما سمعت صوتو صارلي يومين
دحكت لفضه من تكلمت بخوف رديت
بخير لايظل بالج
شلون ماايظل بالي يابو زين وعمير اجه بتابوت وهساع انت اجيت من جنازتو كلي شلون اصير بخير وولدي
بنص الموت عايش
بجت وكعدت اگبالي
هيله طلعت من الغرفه
شافتها تبجي فزت واجت بسرعه
خير عش تبجين ياعمه
ماكو شي لاتخافين زين بخير عمتج تبجي على عمير
الوجه هم مطعون من القهر والخوف تارس ملامحها كعدت يم فضه ولمت ايدها بحظنها كالت بصوت مخنوك
الله يرحمو ويصبر اهلو على فراكو
امين يارب
ياربي دحك لحالنا انا ما عندي غير هالولد لا تفجعنا به خله النا والله مااطيب ولا بعد اشم الهوه بس يصير به شي
دمعه هيله حدرت وظلت ادحك لفضه وساكته
ااستغفر الله يارب ياحرمه عيلي خير لاتفاولين بالشر عليه ادعي له هو والويا يحفظهم الرحمن من شر ذوله الانجاس
كاعد ادعي والله صبح ومسيه ادعي لجن گلبي ما عاد يتحمل الكاعد اشوفو عمير استشهد وولد صالحه هم وقبلهم ابن ولد عمك
وبعد ياشيخ بعد مانعرف من يروح منهم
ويجوز وو.......
سكتت ماكملت ظلت
تبجي وتنوح
امي ردتها
اسم الله عليه للزين لا تفاولين عليه يافضه اذكري الله وهلهل الله بهالبنت حامل وكاعده ادحك لج والقهر تارس گلبها من وره زلمتها
شايله همو ياعمه وهم الي بطنها لهيله اذاا.....
ااش كافي بسج عاد ارجع واكلج الكاتبو الله نشوفو هينه ولا هناك
هيله
عمي انهد بها وكام لحيله راح لغرفتو جده كملت
يافضه انتي حگج هذا ولدج الوحيد يوجعج ويوجعنا كلنا اذا لفه عليه شي لاسامح
الله ووولدي لاتشوفي هيج گوي وكاضب روحو لا يبنت ابوج اعرفو شايل هم زين وكل الويا هاي ارواح بشر
وتعلكت بركبتو وعز الله من تعلكت به ولحد هساع هو ما مرتاح
اعرف ياعمه والله اعرفو مو مرتاح خابرتو تعبانو ويهوجس جثير ويفكر بزين والويا وسكتت والله ماعاد اتكلم معه مثل الاول كلت اصبر روحي بالدعاء له
لجن نار من جوة تحرك بي من خوفي عليه للزين
سمعتها شحجت وهالشعور هو نفسو بيه
دمعتي حدرت مسحتها جده ردت
الله يحفظو من كل شر هو والويا ماعدنا لهم غير بس الدعاء
سكتن اثنيهن كمت من يمهن وعگبت للغرفه
جلست هناك وحدي ادحك لهدومو المعلكه بالزوايه
وبگلبي قهر وخوف من وراه كلت خلي الجأ للصلاه والقرآن كمت رحت توضيت اردد ( الذين امنوا وتطمئن قلوبهم بذكر الله الا بذكر الله تطمئن القلوب )
وكفت اصلي كملت اربع ركع وكعدت اسبح بأيدي واذكر الله وادعيله يحفظه
لنا من كل شر
مثل كل ليله مااجاني النوم ظليت افكر بيه واريدو يتصل ماسمعت صوتو
بهاليومين وهالشي تعب حالي عطشت وكلت خل اروح اجيب مي
جانت ساعه 3 سريت للمطبخ اخذت بطل مي
عگبت وكفت بالصاله من سمعت صوت عمي يتكلم
مو هيج ياازين
رحت بسرعه للباب من ذكر اسمو وكفت من كمل
يول نسر گال انت من استشهد عمير جدامك
تخبلت وطلعت تركض والرمي عليك ولو ما هما
يجروك جان هساع انا دافنك معه
گضبت گلبي بقوه دمعتي حدرت من سمعت به شمسوي عمي كمل
يازين ياولدي لاتزت روحك للموت شتريد تفجعني بك ماتفكر بيه انا وامك ماتفكر بهيله بولدك اذا انت صار لك شي شراح يصير بيهم
وبينا
سريت من يم الباب دمعتي تحدر بقهر دشيت لغرفتي اعتب عليه بگلبي وزعلانه عليه لان زت روحو للموت ومافكر بيه انا وولده
انا جالسه بغرفتي سمعت عمي كال
يالله
جهازي دك جان زين
زين العابدين
من استشهد عمير وانا مو بخير مخنوك ومقهور قهره قويه وجن ايد عصرت گلبي بگوه وماهدتو ابد جالس وحدي بدار السكنت بها هيله اول مااجتي خابرت ابويه اسال عن اهلو وش صار بهم عرف من نسر انا وش مسوي من استشهد خويه ورفيجي وبده يلوم بيه
ويعتب عفتو يتكلم ماكدرت ارد غير بس
ما جنت بعقلي يابه تخبلت وفكدت الادراك شفتو جدام عيوني استشهد وانجتل وجعني حيل ياشيخ وقهرني جثير
هون عليه وصبرني ووصاني على روحي من سديت الاتصال منو خابرت هيله
ردت عليه بصوت مخنوك
وجن باجيه
هلا يازين
شلونج يولي
ماانا بخير عكب السمعتو
بجت غمضت عيوني رديت
خويه راح ياهيله جتلو جدامي الظلام النفس
هيله
سمعتو تكلم بصوت مخنوك كلت
هو مات يازين وانتهى يومه انت عش ترمي روحك للموت مافكرت بأهلك مافكرت بيه انا وولدك
يااهيله ماااريد لوم انا من خابرتج اريد اسمع منج جلمه تريح گلبي وتواسيني بها مو تعتبين وتاكلين گلبي بالملامه
يازين خاايفه عليك
قاطعني بغضب
لاااتخافين بطلو خوف اذا اااريد اموت اموت بيومي لا انتي ولااا اكبر واحد بهالارض راح يگع الموت مني
شهكت بصوت وسكتت كمل باعصاب
ياااهو الي اخابره يعتب ويلوم بطلوها عاااد اكلكم خويه مااات جدام عيوني ووج جتلو وخلو مسجي جدامي والدم يفلت منو
ياااعقل هذا الي تريدو يظل بالراس وانا شفتو وش صار بي وشلون راح من ايدنا بلحظه
لوو ميت انااا شاحصل
انهديت بي وصاح بيه
اجعلي بالموووت حتى اخلص من هالموال الي كلما اتصل عليج لو على هلي اسمعو
لاا
سد الخط بوجهي شمرت الجهاز من ايدي وكمت ابجي بشهكه بذيج الليله زاد قهري بعد اكثر وظليت ابجي من قهره والكاعد
يسوي بروحو وبيه
گلبي ماانطاني يزعل عليه اتصلت عليه مارد واخر شي قفل جهازه مانمت ولا غفيت من وره الصار
ظليت للفجر كاعده ودمعتي بعيوني كمت صليت انا على سجاده الصلاه جهازي دك
كمت رحت له اتعثر بالازار عرفتو هو فتحت الخط كال بصوت مخنوك
زين العابدين
گلبي ماانطاني ازعل على هيله اعرفها خايفه عليه
وميته خوف اعرف وش كاعد تهوجس به وهالشي سمعتو منها ومن اهلي الف مرة
جنت مخنوك ومقهور من ورة عمير وعبالي هي تهون عليه الكاعد احس به
رجعت حجت بنفس السوالف وهالشي خلاني اضوج بعد اكثر تصايحت وياها وسديت الخط شمرت جهازي بعيد عني
ورثت جكاره اخذت نفس طويل وزتيتو بغصب كمت اريد اطلع لبره اخذتو من الارض وسريت للحديقه كعدت هناك افكر بهيله كلت اكيد هساع زعلت لان صحت بها وسديت الخط ومارديت عليها من دكت اكثر من مرة غمضت عيوني واذب حسره رددت
هيله تحبك جثير يازين وخايفه عليك عش طلعت حرگه گلبك بهالبنت حامل ومو زين القهر عليها
اخذت نفس اللخ زتيتو سمعت صوت اذان من بعيد اجاني رددت وياه وكمت لحيلي سريت للبستان وكفت به ادحك
للمچان الي كالت لي به انا موافقه عليك جن اشوفها جدام عيوني واكفه تضحك
طلعت جهازي فتحتو دكيت عليها فتحت خط كلت
دعيتي لي يولي
ردت بصوت مخنوك
اي
ذبيت حسره وكلت
اسف بجيت عيونج بس والله مخنوك ومقهور وغادي نار ياهيله قهرني عمير وحرگ افادي
هيله
سمعت صوتو يحجي بخنكه تنهدت ورديت
راح شهيد يازين والشهيد حي يرزق يم ربك
ااعرف يولي والله اعرف هالكلام لجن هذا خويه
رفيجي وجتلو جدام عيوني وخلوه مسجي بدموه
سكت وكمل بغصه
ياهيله خيالو بين عيوني مسجي وغارك بدمو ماجاي يروح من بالي لا هو ولا
الي راحو
اذكر الله يازين اقره قران الا بذكر الله تطمئن القلوب
يارب رحمتك يارب افرجها علينا وخلصنا من ذوله الجلاب ماظل صبر يارب يوميا واحد مجتول جدامي وقاهرني
سمعتو بجى عرفتو انهار كمت احور بالغرفه وروحي مفرفحه عليه تكلمت وانا
خايفه علي
يازين لاتسوي بروحك هيج اذكر الله كول يالله ولاحول ولا قوه الا بالله
ياااالله
صاح بصوت عالي
گضبت جهازي بقوه وكملت
گلبي انت لاتسوي بروحك هيج جاي تأذيه والله بالبجي والنوح يازين انت گوي وسبع خابرتك هيج لاتنگسر وتقهرني
يااهيله والله جاا
اختنك بالكلام رديت
كول يازين اسمعك طلع الي بگلبك لاتخلي به احجي يگلبي وذب همومك عليه
ااخ وج اني ماجاي اتحمل همي شلون اذبو عليج
سكت وكمل بغصه
الجاي نشوفو يهد جبال ياهيله مو جبل والله صعبه تعشين وي واحد ويصير خويج ورفيج درب وسلاح
وبلحظه مثل رمشه العين يموت جدامج وتشوفين روحو تطلع
حقك يازين والله حقك والله يصبرك انت والوياك
على الجاي تشوفو بس انت شبيدك تكدر تكع الموت منهم
لااا ماااكدر هذا امر علينا امر الله ياهيله بس الفركه صعبه عقلي ماجاي يتحمل ولا جاي اكدر اتقبل
بعد مااشوفو كل س
