رواية سداد وبنت العرب الفصل الرابع والأربعون بقلم الزهيريه
لا أحد يبوح بكل ما يؤلمه
فبعض الكتمان كرامه
ألق/ كل أنسان وارد في حياته المفاجأت ومرات تكون مفاجأت سعيده ومرات تكون مفاجأت حزينه اما بحياتي ما بيوم صارت بحياتي مفاجأت سعيدة ابد كل مفاجأة أصير أتعس من الثانيه وآني بصراحة من تركت بيت مومه ما خطر في بالي بعد في يوم أشوف سداد أبد وخصوصًا من عرفته راح لاربيل وآخذ بناته وراح بعد شنو إلي يجيبه لبغداد وحتى شغله نقله لأربيل
وما يخطر في بالي في يوم اشوفه حتى لو صدفه لهذا من فتحت الباب وصار گدامي سداد چانت اكبر مفاجأة إلي وتفاجأت بي لكون ما چان يخطر على بالي أبد
وهو ظل واگف يباوع عليه وچان مثل كل مره يبهرني بجماله وأناقته وعطره وچان لابس كله أسود سداد من شفته آول مره الى هذا يومي كله يلبس أسود نزع منظاره والسويچ السياره بيده وموبايله وهو من چنت يمه چان يعرفني بسم ورده وچان تعامله ويايه راقي بس من عرف إسمي ألق انگلب عليه طنطل وكل كلامه ويايه استهزاء وهو من شافني گال بستهزاء
سداد/ حمد لله ما رحتي بعيد رجعتي لاصلچ
الق/ حمد لله إني ما ناكره أصلي حتى ارجعله وأصور اني گايله الك على وضعي وما خجلانه منه
وبوقتها طلع أخويه واجى وگف يمي وهو من شاف أخويه ضحك باستهزاء ويأشر على بطني وعلى أخويه
سداد/ الظاهر منغولي واحد ما مكفيچ تردين منغولي ثاني وزين دى اشوف لبسچ زين وموبايل الظاهر هذا الطرن سردار خوش يصرف
الق/ هنا وتوگف عند حدك طالما بديت بالتجريح بكلامك اني راح اردك بالمثل مال تستهزء بأخويه لكونه منغولي ما اسمحلك حمدلله هاي خلقة الله وحتى اذا الله رزقني بطفل منغولي او معوق ما اعترض على آمر الله لإن إيماني بربي قوي بس اكو ناس معوقه ومنغوليه بأخلاقها اما مال سردار يصرف عليه شبيه حتى أخلي الزلم تصرف عليه بعدني بصحتي وأشتغل بشرف واعيش نفسي واصرف على اخويه ما محتاجه امد أيدي لأحد لا سردار ولا غيره
سداد/ والله عايشه بشرف ومنو چانت مصلخه بملاهي أربيل بابا انتي تشاقين ولو تلعبين على نفسچ هسه ما تعجبت من شفت حالچ متغير ملابس وموبايل وهذا دور ألي لعبتي عليه مال تحبيني الظاهر من شفتي ماكو نتيجه حولتي على سردار
الق/ انت ما يوم سألتني انت شنو چنت اسوي بالملهى ولا يوم سمعت مني وشنو ظروفي دائمآ استهزائك بيه وتهمك إلي بس اما موضوع حبيتك فهذا ربي يشهد عليه بي بس كرهتك من شمرتني من الدرج واذا على سردار ترى اكثر من مره عرض عليه الزواج وآني رفضته ما اگول غير حسبي الله ونعم الوكيل بيك
سداد/ شوفي شگد لغيتي ما سمعت منچ ولا كلمه ولا يهمني منچ شي آني أعرف النماذج امثالچ وأعرف شلون أتعامل وياها اني بلغني سردار إنه أنتي سقطتي الطفل وشلون هسه أنتي حامل شلون ما أعرف
الق/ وأني ما اعرف ليش سردار گلك هيچ بس آني حامل ومنك وما سقطت الطفل وعفته على اذا يريده يجي للدنيا وما الله كاتبله يموت ما يجي للدنيا بعد هاي قسمة الله
سداد/ هاااا ما تعرفين ليش گال سردار انتي سقطتي لو هذا فلم حتى يجي الطفل وبعدين شوف شنو الخطه مالتكم وإلا اكو عقل يصدگ يگولون الطفل مشوه وتظلين متمسكه بي اعتيادي مثل عمچ نزار عينچ على فلوسي وبعدين هم ياخذ ورث مو واحتمال عمچ نزار يرجع يدز جماعة يقتلوني حتى تضمنين حصة ابنچ بالورث
الق/ إني متعجبه عليك انت مصور الناس كلها طامعه بفلوسك اني ما اقتل طفل كل ذنبه ما أله اما ما اعرف هو الله ما ياخذ ناس بذنب ناس انت هسه جاي تاخذني بذنب عمي نزار أما بالنسبه عن فلوسك الله الغني عنهن كل شي ما أريد منك اني أربي ابني بس مجرد يحمل أسمك لا أكثر وثق واعتقد بالله لو أعرف اگدي بالشارع ما يوم آجي وادگ بابك واگلك هذا أبنك تعال أصرف عليه دينار
سداد/ وليش ما نختصر الموضوع من هسه نزلي الطفل وآني آي مبلغ طلبي انطي الچ ونسد هذا الموضوع نهائيًا فكري ورجعيلي خبر وأنتي أصور تعرفين المن تگولين ويوصلني الخبر
الق/ ظليت صافنه بوجهه معقوله هذا سداد إلي چان يتعامل ويايه بكل طيبه وحنيه صار هسه كل رحمه بگلبه ماكو واني بعد كل شي ما حچيت ويا دخلت وسديت الباب بوجهه وبس دخلت لغرفة بيبي بعد كل قوه ما عندي نهاريت ودموعي ظلت صب ليش هيچ صار بيه معقوله هم يجي يوم وحضي ينصفني لو ابقى هيچ متعذبه
وبعدها تقريبًا بيومين أجى سردار وأني چنت بس أريد أشوف خلقته وهو چان گاعد يم جدو أريد حجه حتى جدو يگوم من سردار ومن دخلت دى انطي الچاي گلت لجدو على واحد من خوالي آنه يمكن يريد يتقيأ وهو گام
وأني گبل سديت الباب وگتله/ شوف بعد ما أريد اشوفك تجي هنا وبلغ ابن خالتك إنه لو يموت ما أنزل طفل وفلوسه خلي يجمعهن من يموت خلوهن على گبره
وسردار گبل گام ولزمني من زندي ويضغط بقوه على زندي
سردار/ تعالي إنتي وين شفتي سداد وحچيتي ويا شنو حضرتچ ظليتي تنبشين على رقمه لما حصلتي عليه واتصلتي بي
الق/ بعد ما تحملت لا ضغطه على زندي ولا كلامه دفعت أيده قوي وجاوبته/ انت ما عندك عقل وين الگى رقمه هو أجى هنا عليه للبيت وانت ليش تگله اني سقطت الطفل
سردار/ ومنين عرف العنوان المفروض يبقى ما يعرف بالطفل حتى لا يصير الطفل بسمار جحا كل شويه ينط الچ بحجة الطفل وإني بعد ما أريد شوفين سداد او هو يشوفچ
الق/ اگلك أنت بصفتك شنو تقرر بمكاني بعد ما أريد أشوفك هنا بعد لا تجي
وعفته وطلعت من الصاله بس شنو ارجف ما اعرف من الصادگ ومنو الكاذب وأريد شخص احچي ويا يرشدني يفهمني وقررت أستشير رغد هاي هي صيدلانيه وفاهمه اكثر مني وللعصر من اجتي وطلعت دى اخذ البنيه منها
گتلها/ اگلچ رغد عندي موضوع أريد احچي وياچ بس متردده شلون أبدي وياچ
رغد/ حبيبتي هسه ما ظل وكت من أرجع باليل آخذ البنيه منچ احچيلي
الق/ وراحت رغد واني ظليت لليل الوب أريدها بس تجي وهي لساعه 10 يله اجتي وحچيت إلها الموضوع من آول لأخره وهي ظلت بس تباوع بوجهي بعدها كالت
رغد/ شوفي ألق أني ما دارسه قانون ولا أفهم بهيچ حالتچ شنو سوين بس عندي صديقه باحثه اجتماعية بمحكمه نگدر نسألها وخلي
الق/ انطيني رقمها احچي وياها
رغد/ ما ترد خلي هسه إتصل بيها ونسألها بس عسى ما تكون نايمه لإن هي تنام من وكت
الق/ أتصلت بيها گدامي وحچت وياها وبلغتها انه أكو بنيه بحاجه إلى مساعده وانه راح تنطيني رقمها
وأخذت رقمها من رغد وهي أخذت بنتها وراحت وأني إتصلت بيها وبعد السلام ورجعت عدت قصتي مره ثانيه على الباحثه الاجتماعية
الزهيريه/ شوفي انتي بوضعچ اول شي عمليه نصب صايره عليكم وتزوير لان العقد إلي تم ويه عمچ بناءً على توكيل مزور بهاي حالتچ هاي عملية أغتصاب بحقچ ونتج عنها طفل لهذا الشكوى ما تكون ضد الشخص المغتصب وحده راح تكون ضد المزور كذلك
الق/ ولو أسوي زحمه عليچ يصير اشتكي على إلي اغتصبني والمزور ما أشتكي عليه
الزهيريه/ لا حبيبتي ما يصير لان هذا وضعچ مال مغتصبه لازم أكو مكان حادثه وأنتي دى تگولين الحادثه وقعت في بيته يعني شنو صلتچ بالمغتصب وانتي باقيه وياه في بيت واحد واذا اشتكيتي عليه فقط وعفتي المزور يگدر المغتصب يگول هي حشاچ بنت ليل واني جبتها لبيتي بفلوس وساعتها راح تسقط عنه قضية الاغتصاب واما طفلچ بس ينسب الى المغتصب وشرعًا طبيعي راح يكون أبن زنا وشرعًا وقانونًا ابن الزنا ينسب لأبو صح ويكون ملزم ينطي نفقه حسب القانون بس ما يرث أبو واكو ضباط أذكياء يطلعون الحيه من الزاغور اكيد ضابط التحقيق راح يركز على مكان الحادثه لهذا الشكوى لازم تكون ضد المزور والمغتصب
الق/ يعني هسه لو قررت أشتكي أروح هسه أشتكي لو لما أولد الطفل ووين تنصحيني أروح أشتكي بمركز الشرطة لو بمحكمه
الزهيريه/ لا حبيبتي ليش لما تولدين الطفل تگدرين من باچر تشتكين اما الشكوى تقدم بالمحكمه مركز الشرطه معليه وهسه انطيچ رقم محاميه اتصلي بيها وآني راح اوصيها عليچ وان شاء الله ما تقصر وياچ
الق / اخذت رقم المحاميه وأتصلت بيها وبلغتها إنه أني من طرف الباحثه الاجتماعية ورجعت عدت قصتي للمره الثالثه على المحاميه واخير القصه ذكرت اسم سداد وهي تفاجأت كلش وسألتني على أسم آبو سداد بس أني گتلها ما أعرفه والمحاميه رجعت طلبت مني أوصف سداد ومن وصفته إلها
گالت / سداد عنده بنيه اسمها يبرق صحيح
سداد/ مرات اكو شخص يحاول بكل جهده انه يخفي عنك موضوع بس هو شنو غايته الله اليعلم وماكو شي يبقى مضموم طول العمر الا ما صير صدفه وينكشف المضموم عنك واني من چنت صغير لما كبرت اعتبر مومه أمي الثانيه لآن رغم خالتي مومه مظهرها يبين انه هي قاسيه بس هي گلبها أبيض ومن آخر مره طردتني من بيتها واني گلبي يرف عليها وأريد أشوفها وما أريدها تبقى زعلانه مني ومن رحت لبيت خالتي واعتذرت منها
هي هم قبلت اعتذاري وظليت اسولف وياها وهي مقهوره كلش من سردار ومن إجى وصارت مشاده كلاميه بيني وبينه گال ألق نزلت الطفل بصراحه فرحتي لا توصف يعني خلاص خلصت من حمل ألق
وعفتهم وطلعت من بيتهم وهو يتوسل بخالتي تقبل يزوج ألق
تعجبت على سردار شلون نفس عنده يزوج وحده آبن خالته نام وياها شنو من نفسيه عنده وبقى عندي الضابط فرقد لازم أعتذر منه قبل لا اطلع من بغداد بعد خلاص ما عندي شي بيها وشگد اتصلت بي بس هو ما يجاوب وهو خاطره عزيز عندي وگفلي بأشد ازمات حياتي لهذا ما گدرت اجاوزه ورحت عليه للمركز وآني من حسن حظي الچان واگف على الباب شرطي جديد ما يعرفني لهذا من طلبت مقابلة الضابط فرقد وگتله بلغ الضابط أنه اني أريد أشوفه بموضوع ضروري
ودخل لمكتب الضابط ورجع طلع گالي تفضل ومن دخلت هو چانت گدامه أوراق يراجع بيهن ويختم بختمه
وگلت السلام عليكم
رفع راسه وشافني ورجع نزل راسه على الأوراق وما اهتم وصلت يمه واعتذرت منه
سداد/ سيدي والله ما چان قصدي بس بعد الصار صار
فرقد/ شوف لومو معصب لو عندك جنازه وأجب الاحترام لغيرك وآني أموت من آلي يقلل احترامه إلي ساعتها ما يهمني هو منو وما أرحمه كائن من يكون
سداد/ وبعد الاعتذار وبالفعل آني أحبه واريد خاطره ومن گتله/ اجيت اسلم عليك لان بعد ما نلتقي أبد لان بغداد بعد ما أدخلها بس وعد مني الك نبقى على إتصال
فرقد/ لا تتفائل هواي أحتمال كلها كم شهر وترجع لبغداد بس بغير تهمه
سداد/ ليش سيدي ما عندي آي مشكله هنا كلها صفيتها وهسه راجع لأربيل
فرقد/ لا بقت مشكلة هاي البنيه الي تهمتك واعتقد أسمها ألق وقضيتها بقت مفتوحة الى ما ترجع هي تشتكي
سداد/ وليش تشتكي ما عدها شي ضدي ولا تگولون اغتصبتها ترى آني مطلعها من ملهى من إربيل وبأوراق رسمية مثبته بحكومة كردستان وبحكومة بغداد
فرقد/ من گلك هي تحتاج تثبت هي اغتصبت وين هي حامل يعني بسهوله الطب الشرعي يگدر يعرف أبو الطفل من عن طريق تحليل DNA
سداد/ سيدي بس هي منزله الطفل بعد شلون حامل
فرقد/ منو گلك كذب البنيه حامل وبطنها چبيره وجابها سردار وجدها من دى تطلع بدل ضائع للجنسيه وهاي الجنسيه من طلعتها المن غير حتى تشتكي على سداد وتثبت طفلها
سداد/ هنا تخبلت يعني سردار كذاب المشكله بس لا يطلع مسكنها في بيت وحدها وهي يمه واتفقوا عليه
بس من سألت الضابط فرقد على عنوان سكنها اكد فرقد إنه هي تسكن في بيت جدها وبعد الحاح مني يله قبل ينطيني عنوانها ورحت عليها وحمد لله طلع سردار ماخذ شهادة الدكتورا ة بالكذب وهاي الضربه ما چانت متوقعه ولا في البال وقررت أروح عليها وأشوفها بعيني أريد أشوف من الصادگ
اخذت العنوان ورحت عليها وبعد كلامي ووياها ما عجبني بيها بس تمسكها بالطفل واقارن بينها وبين آريا الي هجولة أطفالها على مود لذتها
ورجعت من يمها واني چنت مصور مستحيل تشتكي عليه بس لكل حادث حديث وما حاچيت خالتي مومه أبد ورجعت لأربيل ومارست حياتي طبيعي بس تقرقعت على نفسي وموضوع ألق طبعًا ماكو أحد يعرف بي غير أمي وبيت خالتي مومه بس حمدلله ما چنت متوقع ألي الصار وظلوا أهلي يلحون عليه أزوج وأولهم أختي جيهان وشگد جابتلي بنات بس أني رفضت بعد زواج ما أزوج
وبنتي روجيدا نوعًا ما صارت أفضل بهوايه ومر على رجعتي من بغداد تقريبا 3 اسابيع من بلغني كوجر انه سبب إلي صار بينه في بغداد وليله كامله احنه مثل المتخدرين آنه اثناء قطع الكهرباء دخل شخص لبيت صديقنه الي چانت الگعدة الصلح بيني وبين اوزجان الله يرحمه في بيته لهذا ما مصوره الكامره دخوله بسبب قطع الكهرباء اما خروجه ما طالع من البيت لا طافر على بيت جيران صديقنه وطالع من يمهم وظهر هذا التسجيل السبب انه هذا الجار بيته متعرض لسرقة والشرطه ساحبه تسجيل الكاميرا مال 3 أشهر حتى يشوفون اكو شي مريب صار قبل السرقة
والعجيب انه من طالع من بيت الجيران چان ملثم بس ساحبين تسجيل الكاميرا مال الاسواق الي بنهاية الشارع وچان ما ملثم وهذا نهائيًا ماكو ضده اي شي عند الدوله حتى جنسيه ماكو ما عنده لهذا راح يتم أستدعاء البنات ألي تم إلقاء القبض عليهن في ملهى أربيل ويشوفنه هذا الشخص نفسه غزوان
