رواية سداد وبنت العرب الفصل الخامس والأربعون بقلم الزهيريه
لا تعطي اكثر ولا اقل
بادل كل شخص بمقدار ما يبادلك
ألق/ مرات الصدف تجمعك بعدوك بمكان واحد او ويه شخص يعرفك ويعرفه بنفس الوقت وهذا صار ويايه من حچيت قصتي للمحاميه وهي استأذنت مني وگالت نص ساعة وأرجع اجاوبچ
تعجبت هاي شبيها بعدين شلون عرفت يبرق بنت سداد وهنا اجتي فكره على بالي وهي أنه هاي المحاميه تعرف سداد وهسه هي راح تبلغه إنه راح أشتكي عليه وراح ياخذ حذره واحتمال هم يجي يشمرني من الدرج بس ما معقوله هنا اني في بيت جدي وما طلعت غلطانه رجعت إتصلت بيه
سحر/شوفي حبيبتي والله يعز عليه ما أستلم قضيتچ بس الشي إلي ما تعرفي وهو انه سداد اني محاميته لهذا ما يصير اكون الدفاع لمدعي ولمدعيه بنفس الوقت وهسه راح انطيچ رقم صديقتي محاميه وهي تكون محاميتچ
الق/ وبعد انتهاء الاتصال بيني وبينها ب5 دقايق رسلتلي رقم محاميه وأتصلت بالمحاميه الثانيه واتفقت وياها إنه يجي ويايه الوصي عليه حتى ننطيها وكاله خاصه حتى نرفع قضيه على سداد وسردار بس أتفقت ويايه على المبلغ وبصراحة اني ما عندي هيچ مبلغ واتفقت وياها انه على راس الشهر تجيني فلوس وانطيها نص المبلغ والنص المتبقي على الشهر الثاني وهي وافقت
وقررت خلاص حتى على سردار ارفع قضيه في سبيل اثبت حق ابني في أنه يحمل أسم ابو وما يكون من يكبر يحمل أسم نغل وقررت احچي لجدو الموضوع واتفق ويا الصبح حتى نروح للمحكمه على راس الشهر
وما مر على اتفاقي ويه المحاميه غير ساعات من ندگت الباب قوي عبالك إلي دى يدگ ألباب ما يريد ينتظر لما نفتحها يريد يقلع الباب ويدخل واني ما گمت من مكاني گلت ويه نفسي هسه جدو يفتح الباب بس رجع الدگ زاد على الباب
وبيبي صيح من فوگ /ولچ ألق گومي افتحي الباب لجدچ راح يكسر الباب علينه شبيچ ما تحسين على الباب نايمه نومة آهل الكهف
من سمعت جدچ گمت أركض لإن كله ولا جدي بس تعجبت هو من يطلع يقفلها من بره بالمفتاح وطبعًا احنه بالحالتين الباب مقفول اذا جدو موجود واذا ما موجود لان جدو يخاف على خوالي بس مرات ينسها مفتوحه
ومن وصلت للباب صحت منو وفتحت الباب بنفس الوقت وأبد ما چنت متوقعه هذا التصرف أبد وهو سردار خله أيده على رگبتي ويخنگ بيه ودفعني للبيت جوه وهو يگلي
سردار/ تردين تشتكين عليه ولچ ما غزر بعينچ إلي سويته وياچ ولچ حبيتچ وفضلتچ على أقرب ناسي إلي هو سداد بس صدگ لو گالوا الشط يروب والگح… ما توب
الق/ دفعت أيده قوي من على رگبتي وجاوبته / لعد شنو تريدني أبقي أبني من غير جنسيه وما يحمل اسم ابو
سردار/ وأنتي شبيچ مفلفله على سداد لو لكون حاگرچ وتفل بي وعافچ تركضين ورا مثل الچلبه لو تموتين سداد ما يباوع بخلقتچ وگتلچ آلف مره يا بنت الناس تعالي نزوج وإذا على أسم لابنچ أني انطي أسمي واعيشچ في بيت وأصرف عليچ بس إنتي تحبين الدياحه ومن هسه اگلچ إي دليل ضدي ماكو يثبت كلامچ وروحي أعلى ما بخيلچ اركبي
الق/ طبعًا إذا أوصف مفاجأتي بسردار ما تنوصف والظاهر الأنسان ما نعرفه اذا ما نحتك بي وهاي اني احتكيت بسردار يله شفته على حقيقته بس رغم هذا أبد ما شعرت بخوف منهم أبد وچنت متوقعه راح أشوف سداد بس هو خيب ظني وما أجى أبد ومر ما يقارب 3اسابيع وسردار نگطع بعد ما أجى وأقترب موعد أستلم أجور الطفله الي تخليها يمي أمها حتى أروح أشتكي على سداد وابن خالته وأني صار على حملي 6 أشهر ونص
بس لكل حادث حديث لازم يصير شي يخربطلك حساباتك وهذا الحدث وهو انه چنت بيوم نحوك مكانيس إني وبيبي من ندگت الباب وطلع جدو لان هو گاعد بالصاله وبعدها دخل يگلب بورقة وهو يگول
جدو/ يولي ربيعه هاي شرطي جابلي هاي الورقة ويگول يردون ألق بالمركز
الق/ اكذب إذا اگول ما خايفه إني عامةً أخاف من الشرطه ومن الجيش
وانطاني جدو الورقه صحيح اخذتها بس طالبين حضوري للمركز وحتى ما كاتبين على شنو طالبيني
هسه الله يحاسبهم اذا يگولون على شنو يريدون حضوري للمركز
جدو / ليش ما نخابر على هذا الزلمه اليجي علينه ولو هو گطع رجله من عدنه وما يجي علينه
الق/ جدو ما عندي رقمه نروح باچر ونشوف
وظل جدو يحچي يگول اي يا جولان هاي إلي ما عدها ولي ظل تلعب لعب البط
وآني بس طلع من يمي جدو اتصلت بالباحثه وما ردت أبد وأتصلت برغد وحچيتلها الموضوع گالت اوگفي خلي أسأل الباحثه ورجعلچ خبر گتلها ما جاوب بس رغد طمنتني وگالت هسه اني احچي وياها
وبعدها رجعت اتصلت بيه
رغد / تگول خلي تصورلي الورقه الي اجتها من المركز خلي أشوفها وآني أتصل بيها
شكرت رغد ورجعت صورت الورقه ورسلتها للباحثه وگعدت أنتظر فرج الله اريد بس كلمه طمني منها على شنو هذا الاستدعاء وبالفعل بعدها ساعه وحرگان الأعصاب إتصلت بيه الباحثه
الزهيريه/ حبيبتي شوفي هذا استدعاء انه انتي شاهده على شي يعني مو متهمه لان لو متهمه يصير عليچ القاء قبض لهذا روحي وشوفي شنو الموضوع ولا تخافين
الق/ رجعت شكرت منها لأن طمنتني بس مع هذا ظليت قلقه ونومي چان متقطع لما طلع الصبح وبعد ما جدو وبيبي كلموا تغسيل خوالي واني هم كملت تغسيل أخويه ويه كل طاسة مي أغسل بيها أخويه ادعي من الله يرحمني وأرجع سلامات واگله ربي لخاطر أخويه كون ماكو شي وارجعله
ولبست أخويه ملابسه وريگته أما اني من خوفي أحس نفسي راح أتقياء ونزل جدو من فوگ وبدلت وطلعنه
وجدو يگلي / ماكو كوستر نركبها ونوصل للمركز
الق/ جدو المركز ألي رايحين عليه بعيد لازم تكسي يله نوصله
جدو / بويه جولان يركب تكسي يا گاع نشگي وبلعيني
الق/ جدو التكسي عليه آني إدفع فلوسه بس خلي نوصل ونشوف
وآني أشرت لتكسي وصعدنه ولما وصلنه للمركز اني اشاهدت على نفسي آلف مره ومن دخلنه للمركز انطينه ورقة الاستدعاء لشرطي شافها وگال هاي جوه يم الضابط فرقد
دخلنه ونسأل لما وصلنه لمكتبه بس اذكرت هاي المره السابقه هم جابنه سردار هنا على هذا الضابط وانطينه التبليغ لشرطي الواگف بباب مكتب الضابط واخذه ودخل جوه وطلع بعد شويه گال تفضلي
ومن راد جدو يدخل ويايه ما قبل الشرطي گال بس البنيه تدخل وجدو گلي دخلي اني واگف هنا
دخلت وأني اقدم رجل وآخر رجل وألي مخوفني إنه لكون وحدي ومن نسد الباب ورايه ألتفتت وآني اباوع گدامي شفت الضابط فرقد الي المره السابقه شفته واكو واحد ثاني گاعد على مكتب وعلى چتفه نجمتين
فرقد/ تفضلي گعدي هنا
الق/ اتقربت وگعدت مقابيله على الكرسي وهو چان گدامه فايل ومخلي أيده على الفايل وأيده بيضه وعبالك أيده ما مستعملها أبد تلصف وتلمع ولابس حلقه ذهب بيده ركزت على تلاميحه ابيض وعيونه بني وشواربه سود ثخان وگالب شعره ليفوگ وما اعرف شنو يستخدم لشعره لان يلمع وفززني من تدقيقي بي من گال
فرقد/ اسمچ ألق رياض إنتي قبل فتره تم القاء القبض عليچ في ملهى ليلي في اربيل وحكومة كردستان سلمت كل بنيه للمحافظة آلي اهل البنيه بيها وهسه أريد منچ تحچيلي شلون وصلتي ملهى بأربيل وأنتي كل مستمسكات ما عندچ
الق/ ورجعت حچيت كل الصار ويايه من انهزمت ويه سداد الى ما رجعوني حكومة كردستان لبغداد
يعني أني بكلامي رجعت أكدت التهمة على سداد مره ثانيه وهذا چان اكبر غباء من عندي وصحيح العب ويه غباء
فرقد/ عفيه بيچ انتي هسه وضحتي هواي أشياء خلال كلامچ أنتي شفتي غزوان كم مره
الق/ هواي شفته وهو أصلًا دخلني لاربيل أني وورده بسيارته وبعدها أختفت ورده
فرقد/ ورده راحت گصابه هاي راحت نباعت تجارة أعضاء وانه اليوم جايبيچ نسالچ هسه اذا شوفين غزوان مره ثانية تعرفي
الق/ إي اعرفه حافظه تلاميح وجهه
وفرقد طلب من الضابط انه يشكل الرام على الشاشة ويشغل الشاشه وينطي الريمونت والضابط الثاني سوا مثل ما گال فرقد وبالبداية فرقد طلعلي صورة واحد ملثم
گتله/ سيدي هذا غزوان
فرقد/ وشلون عرفتي
الق/ من عيونه أعرفه لان اني من دخلني اربيل گظيت اليوم كله هو يباوع بالمرايه واني چنت گاعده ورا لهذا هواي شفت عيونه بالمرايه
وبعدها طلع صورة ومن شفت الظاهر على الشاشة
گتله/ سيدي هو هذا غزوان اني شفته هواي لهذا أعرفه
فرقد/ عفيه بيچ على تعاونچ ويايه انت كشفتي شخصية غزوان
الق/ شكرت الضابط وطلعت من يمه ورجعت للبيت وحمدت الله آلف مره طلع الموضوع على هذا الشي وخلاص
وچان خلاص ما بقى غير أيام قليلة وارفع قضيه على سداد و سردار
سداد/ مرات نتمنى هواي أشياء لو ما مسويها بحياتنه
بس يكون وقت الندم واللوم النفس خلاص بعد راح واكبر شي ندمت عليه هو زواجي من آريا كل ما أذكر عمايلها وأذكر أبني أيليا اتمنى لو الله ما خذني ولا ماخذ ابني وتزعزت ثقتي حتى بنفسي وبعد حواري ويه كوجر على الشخص إلي خدرنه في بغداد
راح بالي على ألق يا ترى اذا ظهرت الحقيقه ونعرف إنه إني ما إلي علاقه وهي تهمتني تهمه باطله شنو موقفها وهذا خوش كارت رابح بيدي ضدها حتى تنزل الطفل وظليت إني وكوجر متابعين القضيه واكو بنات من غير محافظات اجتي افاداتهن إنه هذا غزوان نفسه
وبقت إفادة الق تجي من بغداد وطلبت منهم شوكت ما تجي إفادة الق من بغداد يبلغوني
وبعد أنتظار دام 5 ايام وصلت الافاده ومن گواة عينها بإفادتها راجعة تاهمتني بگلبي گتلها بعيني حفرتي گبرچ بيدج أريد اشوف شلون راح ظلين على هذا كذبچ وتهمچ إلي
وبوقتها عممنه صور غزوان بكل انحاء كردستان ورصدنه جوائز إلي يساعد في القاء القبض عليه
وبعز ما اني منشغل بموضوع غزوان چانت تتصل بيه المحاميه سحر هواي بس آني ما أرد عليها وبعد ما مر وقت هواي بيوم لگيت رسالة من سحر كاتبه شوكت ما تشوف رسالتي أتصل بيه موضوع كلش مهم
واني بصراحة لعب الفار بعبي شتريد وشنو الموضوع المهم واتصلت بيها
سحر/ اخ سداد بلا زحمه صار شگد من أتصل بيك وحضرتك ما تجاوب يعني گول هاي ليش هيچ دى تلح افهم مني
سداد/ ظليت اتعذر منها وبعدها طلبت منها تدخل بالموضوع
سحر/ شوف اخ سداد قبل فتره الباحثه حولت عليه بنيه متعرضه لنصب وبعد ما سمعت قصتها تهمت حضرتك آنه حامل منك وطلبت مني ارفع الها قضية أغتصاب ونصب ضد سردار واني في وقتها نظرناً لكون صعوبة وما أوصلك وصلت خبر لسردار وما اعرف الخبر وصلك
سداد/ صدگ خلتني افر بإذني يعني تريد تشتكي عليه إني أعلمها اذا ما خليتها تبوس قنادر
واني نهيت الإتصال ويه سحر وقررت إشتغل على الساكت لما اجيب اجلها
وبقينه نبحوش وره غزوان ما اله اي أوليات بحاسبات كردستان كلها وهذا ألي خبلني حتى دخوله لأربيل وخروجه منها ويكون تهريب
يعني لا عنده أهل معروفين ولا عنده زوجه واطفال نلزمه بيهم حتى نقطة ضعف ما عنده ولليوم لغز معرفة انه راح نجتمع في بيت صديقنه في بغداد بقى مجهول عدنه وهاي الاجابات كلها يجاوب عليها غزوان نفسه
إما اني ظليت قلق شلون لو ألق رفعت قضية عليه أكيد راح انفضح لهذا إسلم حل ألي آنه أبلغ أبويه وجيهان أختي وبيوم الخميس على العشه چانت يمنه جيهان وأطفالها ووالدي موجود وأمي چانوا يتعشون من دخلت وظليت واگف على روسهم متردد اگول إلهم لو لا وامي كل شويه تگلي تعال تعشه
وقريب ما دى يخلصون عشه فاتحتهم بالموضوع طبعًا أبويه تخبل لكون نذكر اسمي بعصابة غزوان لإن ألق تهمتني وأبويه سياسي معروف ودائماً يترشح بكردستان بالانتخابات
وظل يغلط عليه وهو يگلي انت جبتها كله الغلط راكبك من رجلك لراسك ما يوم فكرت بعقلك أبد ما گلت أستشير احد اني حتى آريا چنت معترض عليها وما أريدها بس انت دگيت رجل ألا اريا لو ماخذ هلات ما چان صارت كل هاي المصايب بس شلون منو يسمعنه
وعلى هذا المنوال اما جيهان خلت أبويه يگوم وگالت / اذا تريد الصدگ حقه ابويه بكلامه يعني انتي دگيت رجل الا اريا اما موضوع هاي البنيه إني ما أعرفه لازم نلم الموضوع بكل الطرق أفضل من الفضايح تريد أروح لبغداد واحچي وياها
سداد/ لا لچ آني بس الگف غزوان كل شي يصير سهل وربچ اذا ما شوفتها الله حق اني مو سداد
جيهان/ اني عندي حچي وياك اسمعه مني اذا عجبك سوي ما عجبك لا سوي
سداد/ وهو
جيهان/ انتوا العلاقه بينكم وأصله للفراش وطفل ليش ما جيبها هنا تولد وتربي أبنها وعسى الله بعثلك هذا الطفل بدل أيليا
سداد/ بابا انتي عندچ عقل يگلچ الطفل مشوه شسوي بي
جيهان/ يجوز ربك بعثه آلك رحمه من عنده ويدخلك الجنه بسببه
سداد/ لو اموت هم ما اسويها
وقفلت هذا الكلام ويه جيهان ومر على البحث المكثف على غزوان 5 أيام حتى آيست إنه بيوم نقبض على غزوان وكوجر باقي ويه فرق التفتيش الي واگفه على منافذ إربيل عسى يگدر يقبض عليه وصحيح الحرامي والمجرم اذا هيچ يلعب شاطي باطي معناها مسنود من واحد من حكومة كردستان
وآني چنت نايم في بيتنه من التعب لإنه چنت افتر على الدوريات والسيطرات وما حسيت غير على كوجر وهو يهز بيه
ويگلي كوجر / اگعد حاميها حراميها ولك گوم قبل ساعه القوا القبض على مديرنه وطلعوا من مزرعته غزوان
