رواية سداد وبنت العرب الفصل التاسع والأربعون بقلم الزهيريه
لا توجد ظروف تجعل الشخص يخلف في وعده
الا في حالة واحده فقط ان الوعد كان من البدايه كذب
ألق/ الأنسان يسعى ورب العالمين يسعى معاه اما رب العالمين يجازي الآنسان على نيته شنو ينوي يسوي يجازي عليه اذا چان خير يجازي خير واذا چان شر يجازي شر وآني يمكن اكثر الي عرفوا قصتي هاجموني واعتبروني إنسانه صلفه وبلا اخلاق
بس أني مو هيچ اني تربيت في بيئه يعتبر مستنقع بس الله اليعلم بيها ومن قررت أخلص من هذا المستقنع دخلت بمستنقع هيثم بس ربي هو علام الغيوب ويشهد اني من النوع إلي مو ملعبه اني غلطي انه اتهمت سداد وحبيته بنفس الوقت شلون ما أعرف بس اني بداخلي ابد ما بنيتي أذية سداد
وسبحان الله كل الناس عرفت معدني شنو الا سداد وبالايام ألي چنت بيها عندي وجع مال ولادة بيبي يمي وهي خطيه عايشه بالقديم وهي انه تنطيني زيت الخروع خروع ولو بيض ني وعليه شكر بحيث چنت من اشربهن أتقيأ وهي تگلي تشاليع ولاده وإني اگللها والله هاي التشاليع مالتچ كتلتني شوكت تخلص
وبقيت حدود 5 ايام والوجع واني گوه متحمله ولازم أعتني بالاطفال الي يمي وبيت وأخويه وبيوم السادس العصر اجتي رغد تجيب بنتها يمي وشافتني اتلوى من الوجع واني گتلها شويه والوجع يروح وهي ظلت تحچي عليه وظلت مصره انه هاي ولاده ولازم شوفني دكتوره وتگلي امشي اوديچ مستشفى أهلي وأني أدفع تكاليف المستشفى بس أمشي
وآني من الوجع چنت في حاله يرثى لها بحيث حتى ما أذكر شلون لبست الجبه والشال وشلون خليت الموبايل بالجنطه وصعدتني رغد لسياره وبالبداية مرينه على بيت عيالها خلت بنتها يمهم وبعدين طلعت بينه على مستشفى أهلي وأول ما دخلنه يم الدكتوره وأخذت سونار وگبل صاحت على فراشه وگالت إلها على السريع تحال الى صالة العمليات الطفل صاعد ليفوگ وراح يقتلها خلاص
والفراشه جابت كرسي متحرك وخلتني بي وركضت ورايه رغد والدكتوره وبنهاية الممر صارت صالة العمليات گدامي رغد چان حدها ويايه باب صالة العمليات وبعد ما تگدر تدخل اما الفراشة والدكتوره دخلوا ويايه واكو بعد دكتورات بصاله وحچت وياهن إنه يسوولي عمليه واجتي ممرضة تنزع بيه بملابسي
هنا بچيت ومن كل گلبي لان وحدي ودى أدخل عملية ولا أني مزوجه وزوجي ويايه حالي حال إي وحده مزوجه ولا اني عندي أم وتجي ويايه بس رغد ويايه وهواي صعبت عليه نفسي باحساس الغربه وبرودة صالة العمليات إضافةً إلى الخوف إلي اكل روحي
ومن شافتني الممرضة ابچي وهي تگلي گولي يا الله يمعوده هسه تنامين وتگعدين والطفل بحضنچ وبدلولي واخذتني الممرضه نيمتني على السديه ونوب على حظي إجى واحد ضخم وصاحب عضلات يخوف يمكن ساكن بصالات الرياضه على العضلات إلي عنده وطلع هو هذا دكتور التخدير ومن شفته فوگ راسي صدگ أحس جسمي كله مات وهو حس بهذا الشي
وبعدني عيني عليه حسيت ايد لزمت أيدي أنتبهت شفت وحده تريد تخلي كانونه بيدي أنوب احس روحي مثل متخدره أريد أسحب أيدي منها ما اگدر وحسيت بوجع بس ما سحبت ايدي وكملت الكانونه وهذا الضخم سحب ايدي وبيده سرنجه وبيها محلول ابيض ضربها بالكانونه وبعدها سحب مال تنفس وگلي گولي ياالله
وما اذكر غير گلت يالله وبعد ما حسيت بشي وما حسيت غير اسمع واحد يگول هسه هاي شسمها شو حتى طبله ما عدها ووحده ثانيه جاوبه هاي دخلت حالتها خطره وهسه أختها بره دى سوي طبله الها وأسمها ألق
والمشكله اسمع بس ما اگدر اجاوب وعيوني ما اگدر افتحها وأسمع صوت رجال يگول/ ألق دى سمعين اذا دى تسمعين حركي اصابعچ
وحركت اصابعي وهو يگول يله فتحي عيونچ يله حمدلله على سلامتچ جبتي يله فتحي عيونچ واني تدريجيًا فتحت عيوني وهو گال ها هيه فاقت حولها على غرفتها وبعدها حسيت وآني على السديه ويدفعون بيه وبعدني مو واعيه كلش أسمع رغد تگلي ولچ گومي ألق ابنچ يجنن وأريد بس أسيطر على عيوني وافتحهن بس مرات أفتح وبعدها أرجع أغمض
وما اعرف شگد مر وقت وسمعت صوت مألوف بالنسبه آلي بس هاي المره فتحت عيوني وآني واعيه وچان صوت جيهان وسردار سردار متصل بيها كاميرا وهو يمي بالغرفه
وسمعت سردار يگللها /آني ما أدري جيهان المفروض تگلولي مو تخلوني مثل الأطرش بالزفه بحيث من اتصلت بيه صديقتها ظليت مثل المطي ما اعرف شنو اگول إلها انوب صديقتها ما تگلي جابت طفل بالمستشفى خبلتني تگلي ألق بالمستشفى وانطتني عنوان المستشفى ظليت إضرب أخماس بأسداس شبيها وشنو صار بيها وجلال الله انتوا مخابيل لما وصلت للمستشفى اني گلبي يبس عليها الله لا ينطيكم على هاي الدگه
الق/ شبيك سردار
ومن حچيت ويه سردار أنتبه عليه ووجه الكاميرا عليه وشافتني وظلت تتحمد إليه بالسلامه وهي تگلي ولچ ألق وين ابنچ
جاوبها سردار/ بالخدچ دى ينعشون اله الرئه وبعد ساعتين يطلعوا ومن يطلعوا أتصل بيچ كاميرا وشوفي يله روحي مع السلامه
ألق/ وغلق الخط بوجهه جيهان ورجع عليه
سردار/ آول شي لو يهوديه هم اگلچ حمدلله على سلامتچ هذا شي والشي الثاني ليش دائمآ ما الچ آي ثقه بيه گليلي ولا تگليلي أوثق بيك لآن مسبقًا ما اصدگ بيچ
الق/ الله يسلمك اما ليش ما گتلك الصراحة خفت لا تبلغ سداد بالموضوع لا أكثر ولا أقل آما موضوع الثقة إذا اني ما أوثق بيك صدگني أساساً ما احچي وياك وانت أخذتني حاصل فاصل واني اليوم مسويه عمليه وأبني لسه ما شايفته
سردار/ الطفل يمه رغد وما بي شي وان شاء الله بعد شويه ويجيبوا
الق/ اما سردار ما يسكت ظل يعتب ويحچي عليه ويلوم بيه لما صارت هوسه يم باب الغرفه إلي احنه بيها وأسمع وحده تگول حبيبتي نريد نكمل الطبله شلون شو لا جنسيه البنيه الجابت الطفل جنسية ابو الطفل عقد الزواج وينه حتى يطلع بيان شنو نطلعه على الحچي والبنيه لما چانت حاله خطره ترى ما يسوولها عمليه الا يوقع زوجها لو خاف هي ما مزوجه ومن هسه اگلچ ترى اذا ما جبتوا المستمسكات وعقد الزواج البنيه تطلع عادي بس الطفل ما ننطي
وبعدها سكت الصوت ودخلت
رغد تگول / الطفل حالته زينه ومستقره ومبقي بالخدچ يردون عقد زواج ومستمسكات شلون بله وياهم
الق/ شنو ما ينطوني أبني غير أموت أريد أشوفه
أريد اگوم ما اگدر بس تحركت عطت من وجع بطني
واجى سردار قريب عليه ويگلي / أبقي بمكانچ شسوين تروحين وأنتي ما تگدرين تتحركين من مكانچ
اذا الوضع هيچ اذا تردين إني اعقد عليچ وننطيهم جنسيتي وجنسيتچ والعقد مالتنه نجيب هنا سيد ونعقد وننطيهم العقد
الق/ لا ما أريد يسجل لا بأسمك ولا بسم سداد خلوا هيچ أفضل الي إذا سجل بسمك هو آول وتالي مو ابنك واذا أسجل بسم سداد راح بعدين يصير عنده عزيز ويطالب بي اما اذا ما ينطوني أبني هسه اگلب المستشفى على رووسهم
رغد/ اگلچ ليش إنتي العقد مالتچ ويه سداد وين
الق/ العقد إلي تم چان بتوكيل كاذب وهذا العقد بقى يم عمي نزار وحمد لله والشكر عمي نزار مسجون
رغد/ حتى لو مزور قدموا للمستشفى وهو جنسيته حتى لو استنساخ ونگللهم ابو مسافر وجنسيتچ ونخلص الموضوع وهو بكل الاحوال ما يدري بوجود الطفل يعني راح يسجل باسمه وهو ما يدري بي وفضت راحت لا طولوها ولا تعرضوها وعمچ بالسجن مو بالگبر اي واحد يروح يسأله ويدليكم على العقد وفضوها ترى صرنه هسه الساعه 9 بالليل وآني من العصر وياچ هسه بنتي داحت آني حايره بيچ شلون لازم بعد ساعه أروح منو يبقى الليل كله يمچ
سردار/ عفيه عليچ خوش حل آني هسه أتصل بناس يگدرون يتصلون بنزار ويجاوبنه وين العقد وناخذه اما اذا على ألق آني ابقى يمها لما الصبح ترجعيلها ورحمة الله والديچ على كل إلي سويتي والله يجازيچ آلف خير وياريت تبقين يمها لما اروح واجي
رغد / روح عيني اني موجوده والله لما عيالي ما يتحملون بنتي أظل وياها
الق/ وطلع سردار وبقينه آني ورغد وهي سألتني
رغد/ اگلچ مبين عليه يحبچ ليش ما تقبلين بي يولي مصيرچ آول وتالي راح تزوجين اخذي الي يحبچ ولا تأخذين ألي تحبي وهو راح يگدر يوگف بوجهه سداد في يوم اذا عرف سداد انه ابنچ أبنه
الق/ لا رغد ما أريد كل احد بعد خلاص حددت شنو أريد من هسه وما عليچ بالبدايات مال كل واحد يگلچ اني يمچ وشنو تردين أسوي هاي بس بالبدايه لكن بمرور الوقت صدگيني كل شي يتغير وراح يظل طول عمره سردار يشوف سداد بوجهي بأبني كل شي بينه راح يذكره بسداد وصدگي بمرور الوقت راح يكرهنه بدون ما يحس خلينه بعيدين أحسن
وگومتني رغد مشتني لان الدكتوره أكدت إنه لازم أتمشى ومشتني للخدچ ورغد نطت للممرضه فلوس ودخلتني للخدچ وشفته چان صغير كلش بسته وحمدت الله وشكرته انه اتمم خلقته وطلعنه من الخدچ ورجعت على الغرفه وبعدها إجى سردار وجايب ويا آكل وطلب من رغد توكلني وتاكل هي بس هي ما بقى عدها وقت سلمت علينه وطلعت وبقى يمي سردار وشگد لح عليه حتى آكل بس ما ألي نفس أحس البنج بعده بمعدتي
وهو آكل شويه وباقي انطى للممرضه وبقى گاعد على قنفه جلد موجوده بالغرفه ويگلب بموبايله أما اني چنت نايمه وعيني على السگف واجتي ممرضه خلتلي مغذي وضربت الابره بالكانونه موجوده بيدي وانطاها فلوس سردار گطعت حبل الصمت من
گلت لسردار / أعذرني اليوم خليتك تبات بعيد عن بيتك وأهلك
سردار/ عادي أبات خارج البيت يوم او شهر عادي عندي
الق/ تعجبت عليه شلون وزوجته هلات شلون تقبل زوجها بعيد عنها ما تغار عليه وشفت هواي أشياء عجيبه على هلات وقررت أسأله وهو كأنه قرا افكاري
سردار/ أسالي ليش تظلين حايره اسألي وأني اجاوبچ
الق/ بصراحة سردار اني متعجبه عليك مره من عرضت عليه الزواج تگلي هلات موافقه وتبصم بالعشره على زواجي منچ شلون اكو وحده توافق زوجها يزوج عليها
سردار/ شوفي الق راح احچيلچ كل شي بداخلي لان إني ارتاح وياچ ومتأكد ما راح تحچين اي شي لأي أحد
آني عمري حاليًا 33 سنه من چنت بالجامعه چنت احب بنت خالتي
الق/ الي هي هلات
سردار/ لا مو هلات أختها الاكبر منها ميار وچانت تحبني تموت عليه الحب چان من الطرفين مني ومنها وآني سنه اخيره جامعه توفى والدي وبعدها مرينه بظروف بس رب العالمين يعلم بيها وما أريد أخوض بيها بس بعد ما تخرجت بسنه قررت أخطب ميار وهي چانت تعرف ظروفي وموافقه وقابله بأدنى الأشياء بس في سبيل نزوج
ومن رحت خطبتها اهلها الي همه بيت خالتي ما قبلوا بس ميار مثل أمي تحدت أهلها وجبرتهم في سبيل ننجمع سوه وبالفعل من زوجنه آني وميار زواجنه كله تلزگ بس حمدلله ازوجنه وسبحان الله لكون ميار نفسها طيبه بعد زواجنه بسنتين الله فتحها عليه وآني وأمي بدينه نجمع ونسحب سلف على رواتبنه والله وفقنه وميار تحب أمي تموت عليها وأمي هم تحبها وتگول على ميار بنتي إلي ما جابتها بطني چانت حياتنه سعيده بحق وبنينه بيتنه وبعد زواج 3 سنوات وبعد مراجعات للدكتورات الله لطف بحال ميار وصارت حامل
وجابت إلي بنيه وخلتني أسعد انسان على وجه الكره الارضية ورب العالمين لكون ميار تحب الأطفال على الأربعين صار عدها حمل وبعد 9 أشهر جابت أبني وقررنه بعد ما نسوي أطفال الى ما يكبرون اطفالنه وأمي وياها ساعدها وصار عمر بنتي سنتين ونص وأبني سنه ونص وميار حبلت وجابت طفلين وهي ابد ما رايحه على أهلها لان حمل وولاده سنه على سنه بس قبل ما تحبل چنت اوديها وميار بيت أهلها في اربيل
وهاي مدة زواجنه آني وميار أختها هلات تموت على سداد بس المشكلة سداد من هو بالجامعه يحب آريا وبعدين تزوجها بس قبلها خالتي دلفين هواي حاولت تقنع سداد انه ياخذ هلات بس هو يگول اعتبرها مثل أختي شلون أزوجها وبيوم زواج سداد واريا هلات صار عند هلات إنهيار عصبي وظلت تحب سداد حب من طرف واحد وليومچ هذا سداد ما يعرف انه هلات تعشقه
الق/ زين ميار وينها وانت شلون قبلتها على نفسك تزوج هلات
سردار/ وگتلچ كبروا أطفالي وميار ابد ما رايحه على أهلها وچان فصل الشتاء أخذتها هي والاطفال على أهلها وآني رجعت لبغداد وچنت أتواصل ويه ميار كل ساعتين أتصل بيها واتفقت ويه ميار انه بعد يومين اجي عليها لان ما أتحمل بعدهم عني
بس ثاني يوم إتصلوا بيه بيت خالتي وگالولي ميار بالمستشفى آني تخبلت گوه لگيت حجز على رحله من بغداد لأربيل وچان موعد الرحلة ساعه 10 ونص بالليل گولي وصلت لأربيل ومن رحت للمستشفى چانت ميار بالانفاس الاخيرة چانت محروگه من فوگ ليجوه وتسمم واصل عدها آخر مرحله وينتظرون تطلع الروح حتى ترتاح من عذابها ورب العالمين
لكونها إنسانه طيبه وعلى نيتها ما خلاها تتعذب آخر كلامها ويانه آني وأبوها توصي بينه على أطفالها وطلعت روحها الطاهره وبعد وفاتها عرفت انه چانت حامل عليها 3 اشهر راحت ميار واخذت طير من الجنه في بطنها
وآني چنت في حالة هستريا بحيث ما سألت هي شلون احترگت أبد بس من دفنها ورجعنه نريد نسوي إلها عزاء ابو ميار لزم هلات موتها كتل بحث خله براسها 4 خياطات وگلي سردار انت راح تزوج هلات وهي تكون خدامه للاطفال واذا فكت حلگها بكلمه أيدك الك واذا تريد تزوج عليها آني ما عندي مانع
وآني بالبدايه رفضت ما أريدها بس أبوها اصر عليه إنه ازوجها بحيث خالتي إلي هي أمها وگعت دخيل دم بس في سبيل ازوجها لهلات
