رواية المغتصبة الفصل الرابع 4 بقلم ورود الخالدي

كريم انت.. 

بس ما اريد نقاش حتى النقاش وياي مو من حقج!! 

ضجت من كلامة وتعبت من السكته وتحمل ظلمة واهاناته الي فكتله بصوت حاد

لا.. من حقي احجي، ومن حقي تسمعني 

حسيت صوتي، جان اعلى من اللازم من شفته فتح عيونه على وسعهن عبالك راح ياكلني.. بس، اني مخليته يرد بسرعة كتله 

قبل لتحاول تسد حلكي، لازم اكولك اشياء مهمه 

اي، مدام احجي اني راح اعوف العندي، والماعندي واكعد اسمعج! 

اي لازم تسمعني، مادام قبلت تتحمل وجودي، ولو مؤقتا لازم تسمعني 

تفضلي اخرطي

ادنيت يمه وبديت احجي

كريم.. انت معتقد اني، محاسة بالشي الي دتمر بيه.. اذا معتقد هالشكل فأنت غلطان لان اني حاسة بيك واعرف جرحك مني شكد عظيم واعرف حرمتك من الفرحة وكسرت كلبك واعرف قضيت على كل احلامك بزواج سعيد وعائلة ومستقبل واحلام وردية حلوة باختصار اعرف حرمتك من معني السعادة من يوم زفتنا لحد الان.. بس لو تقارن بيني، وبينك راح تهون عليك مصيبتك كريم زواجنا صارله عشر ايام.. بس عشر ايام وانت حاس الدنيه سودة وحياتك جحيم وكل لحظاتك تعاسه بس 10ايام لعد اني شلون الي من طغولتي لحد هاللحظة انحرمت من شي اسمه فرحة وامان.. انحرمت من.. طفولتي ومن احلام المراهقة ومن احساسي كبنيه مثل باقي البنات تريد تعيش لحظات حياتها براحة كريم اني صار سنين منتظرة الموت صار سنين مثل المحكوم اعدام ومنتظر التنفيذ.. 

متحملت اكمل اختنكت بدموعي ولان هو ساكت بس يسمعني اضظريت اكمل كلامي وصوتي مكسر بعبرتي

اي بالضبط هذا هو الوصف المناسب محكوم اعدام بجريمه ماله اي يد بيها ولا مرتكبها جريمه هو الضحية بيها.. ومن تزوجتك جانت ليلة عرسنه هي وقت التنفيذ بس، يمكن ربي يحبني ويعرف اني مظلومه خلاك انت الي بمثابة منفذ الحكم.. تتلطف بيه ومتنفذ الحكم بغض النظر عن اسبابك الي وضحتها الي والي بينتلي بيها انه انت ممتعاطف وياي بس مخلي بحساباتك سمعة اهلك.. اي بغض النظر عن اسبابك الحكم عليه توقف.. 

اهوووو.. رزان كلتي اسمعني.. هسه انتي من دتحجين وتبجين شنو الي،  راح يتغير من واقعنا!!؟؟ 

مراح يتغير شي.. بس انت قبلت تتحملني، هالكم شهر ورجائي منك انه تعتبرني مموجودة.. لان اني والله والله من يوم زواجنا ممخلية ابالي انه اني زوجتك الطبيعية اعرف وجودي، مؤقت اومرهون بوقت واعرف انت مشمئز مني، وممخليه.. هاي، مشاعر الغيرة والتملك والحقوق الزوجية الي تشغل بال اي زوجة ابالي.. ابد والله ولا فديوم راح احسسك بهيج شي او احاسبك على علاقاتك وتصرفاتك مهما كانت

رزان.. 

بس خلي اكمل مادام هسه عندي، شويه شجاعة اوكف كبالك واحجي

ماشي كملي 

اما عن احساسي الحالي اتجاهك.. ف

قبل.. ما اكمل قاطعني

اي بله شنو احساسج مدام. احب اسمع لان عندج قدرة عجيبه ع الشرح والتفسير

طبعا انت معتقد انه اني.. بداخلي دا الومك ع اسلوبك الخشن وياي بالكلام واهاناتك اليه كلما نفتح موضوع لا والله ما الومك.. لان اعرف السبب الي مخليك هيج تعاملني بس بالوقت الي انت تريد تفرغ كل غضبك ومعاناتك وحرمانك من سعادتك.. الي اني سببهن كلهن بيه اني بالمقابل حاسه بالظلم اي انت تحس اني استاهل معاملتك هاي، بس اني احساسي بالظلم اعظم وشخص مثلك ابد ميليق بيه يظلم احد.. واذا حاب تعرف احساسي من ناحيتك وتريدله شرح وتفسير فاكلك كل الي حاسته تجاهك هو انه انت رجل عظيم.. واهنيك على قدرتك ع التحمل لان صعب نلكة بهالزمن والمجتمع الذكوري  رجال يصبر ويتحمل ويقبل.. ويقتطع من عمرة اشهر، يعيشهن بتعاسه حتى يستر على بنيه.. وحتى يحافظ ع السمعة والاصول ومثل مكتلي بليلة عرسي لو واحد غيرك  جان رجعني ويه امي وجان فضحني،.. وما الومك لان ممصدكني اصلا قصتي غريبه وعجيبة وصعب تصدكها وتثق بكلامي بوسط هالفساد والبنات الي ما الهن امان.. ولو كعدت كل عمري اكولك شكرا مراح اوفيك حتى لو جنت ، مظلومة بالاول وبالتالي بس المهم هو تصرفك النبيل وياي.. ومادام.. انت محملني هالجميل.. فاترجاك كمل جميلك للنهاية.. ولتحاول تفرغ غضبك وحركة كلبك بيه حتى من ننفصل يكون جميلك كامل وتذكرني بخير واذكرك بخير 

من كملت كلامي ومسحت دموعي  توقعت راح يعلق على كلامي لو راح يرد باستهزاء، مثل كل مرة بس هالمرو ابد مرد عليه سكت.. 

من يومها وهو ساكت ومسمعت منه اي، اهانه بعد يعاملني معامله عادية وكانما مموجودة صح نكعد كلنا بالصاله وناكل سوة على سفره وحده بس، حتى اهله يعرفون طبعة سكوتي وميحب يحجي هوايه يجي، من الشغل يتغدة ويفوت لغرفتنا هو ينام الظهر واني لو انظف ويه خاله ومن اخلص اسبح وابدل ملابسي والبس، حرام الصلاة اصلي لنفسي واصلي لبابا.. واقرة قرآن هواية الي ان احس، رجليه خدرت من الكعدة اكوم افرش، فراشي، وانام اكعد العصر الكاه طالع اطلع من غرفتي، الهي، نفسي اشتغل ويه خاله حتى لو ماكو شغل اخلق شغل  وانظف حتى لو البيت نظيف اريد اشغل فراغي، ما اريد ابقى كاعدة بالغرفة اعرف نفسي اذا رجعت اكعد وحدي، راح ارجع اتذكر الي صار بيه قبل واضل اتخيل كل التفاصيل.. ومن اتذكر تجيني، حاله ما اعرف افسرها اختنك حيل ويضيع عليه النفس.. واخذلي ايام عايشه بطور، كآبه وانعزال ولان اني، عند عيال ملازم اسمح لهذا الشي يصير، مثل مجان يصير عندي من جنت عند اهلي، ممتزوجة

طبعا ماما كل يومين تلاثة تجي يمي لبيت خالو.. ولاحظت تغيير تصرفاتها.. هي، مو مثل قبل تحب بيت خالو عدنان وتمدح بيهم صارت تضوج منهم ومن نكعد بالغرفة مالتي، تحجي عليه: 

ولج شنو اني، زوجتج الهم حتى تنسعدين وترتاحين لو حتى تشتغلين خدامه عد ام كريم كلما افوت الكاج تكربين.. وتنظفين ومعممه بالحجاب اليخنك والدشاديش الطوال مافد يوم اجيت ولكيتج مبدلة ومكيجة وشارة حلكج بضحكة شبيج بنيتي تره بعدج عروس، لاحكة ع الكراب بدلي عدلي كلي لرجلج يطلعج على سوك مطعم سفرة طلعة زيارة.. وج يمه من عرسج لليوم احسج.. مكدرة وروح  مملوخة شبيح بعد امج

لا ماما والله.. همه كولش، زينين وياي.. وخاله ام كريم حبابه مو هيه الي تكولي اشتغلي اصلا متقبل بس اني من كيفي اشتغل خطية طيبه تدرس ومرت علاء عدها طفل زغير، وحامل وخاله ام كريم خطية هم مفاصل ومتكدر وحدها لهذا اني اشتغل.. وانتي، تعرفين اذا ابقى منعزله تصير بيه خنگة واتكأب لهذا اشغل وقتي

ورجلج.. ميشوفج معممه لاضحكة ولا سالفة  ولا تبديله ولا تعديله 

يوم هو خطية ملتهي بالشغل المحلات تلاثتهن براسه ويجي، ميت من التعب.. بس اني بالليل اسبح وابدل بغرفتي، جوه

والله لو تحجين منا لباجر ما اصدك مبينه مكدرة ومكسورة خاطر عدهم.. وما شايفه كل خير لان الخير يخير ويبين والشر يغير وهم يبين عليمن تسولفين انتي اني، صابره لان ما صارلج شهرين عدهم بس اذا يستمر، وضعج هالشكل هم ما اسكت شنو ماعندي لكمه خبز وزوجتج شعندي، غيرجن انتي، واختج شو اخوجن هج وعافنا ومضل عندي، غيرجن انتي وجيهان وسعادتجن عندي اهم شي، بهالدنيا.. احس روحي من زوجتج كريم طيحت حظج بادية.. على هذا حالج 

وطبعا ماما كلماتجي تضوج عليه يمكن لان حاسه اني، مو سعيدة بزواجي ويمكن لان تندمت من جبرتني اتزوج.. 

بالنسبه الكريم من يوم الي تناقشنا وهو حيل تغير صح ساكت ميحجي ولا يبين اي اهتمام  من ناحيتي بس بداخلي احساس، انه هو مهتم بس ميبين اي مرات تصير عيوني بعيونه واقره هالاهتمام.. وبمرور الايام بدت تصدر منه تصرفات يجوز غصبا عنه مثلا اني، زواجي، جان بالصيف.. وكتلكم اني لابسه حجاب ولان حارة من اشتغل اعرك  وركبتي، تحصف وحتى اثر الدنبوس يبقى على ركبتي مره خلصت شغل وغسلت مواعين الغدة دخلت للغرفة لكيته يخابر بالعامل مالته ع مود غراض، بايعهن اني نزعت الحجاب اشرلي.. بيده نصي السبلت اني اخذت الريمونت نصيته من خلص مكالمة كتله: 

الجو موت حر ليش، كلما افوت للغرفة تكولي نصي وانت من تكون موجود الغرفة تخليها ثلج

مو انتي غبيه انتي تجين من المطبخ عركانه ومطبوخة طبخ وادخلين ع الغرفة وهي، ثلج.. مابيه حيل تتمرضين

لا عادي الصاله مال بيت خالو هم بيها سبلت مو كولش، حارة بس المطبخ شويه حار

ادنه يمي، . جرني، من ايدي، وكفني، كبال المراية وكلي

شويه حار مو؟؟ دشوفي ركبتج شلون مطبوخة من الحر شوفي الدنبوس، الخانكة روحج بيه شلون مخلي اثر كاص بلعومج كص

اي لازم اخلي دنبوس، لان شعري ناعم والحجاب يزلك مني ويطلع شعري وميصير 

مجاي افهم شكو تشتغلين من الصبح لليل تره بيت اهلي متروس، نسوان وين تردين توصلين من تكربين  هالكد تردين تكسبين العيال تكسبين امي مثلا اي واذا كسبيتها شنو راح تستفيدين وانت اول وتالي مضاله عدنا!!!؟؟ 

حيل قهرني كلامه فكتله: 

لا ما اريد اكسب احد بس اني اضوج ابقه وحدي بالغرفة فاشغل نفسي بالشغل لا اكثر، ولا اقل

وليش تضوجين عادي تفرجي، تلفزيون  تصفحي موبايل .. التهي بسوالف النسوان.. 

ماشي منا وجاي احاول اوازن بين هالامور.. اكولك اريد اروح يم ماما صار شهرين من تزوجنا مرحت لاهلي

اي العصر اخذج الها 

شكرا

العصر اخذني لبيت اهلي وتوقعت يخليني، يم اهلي، كم يوم بحكم هو يريد الوقت يمر حتى يخلصن هالكم شهر وننفصل.. جنت فرحانه بروحتي، يم ماما شكد سولفنا وضحكنا وماما حيل مشتاقتلي.. صح هي، تجيني، دائما بس مو مثل جيتي، االها.. اكيد تختلف.. تعشينا وهم كعدنا نسولف وبتت يم ماماومجنت متوقعة ثاني يوم  وره العشه راح يجي، عليه حتى ماما كالتله: 

ياااا تريد تاخذها غير تبات بعد يوم يمي! 

هاي شنو عمه ترة بعدنا عرسان لاحكة بتج تزورج كل شهر وتبات يمج!  ايام.. بعدين هي من البارحة يمج

ورحت وياه وبس دخلنه لغرفتنا كتله: 

توقعت تخليني اكثر يم ماما ليش رجعتني؟؟ 

رزان.. مامضطر اشرحلج تصرفاتي كلتي اروح لاهلي اخذتج وبقيتي يم امج ليلة ويوم.. وهي، رايحة راجعه عليح شنو الداعي تضلين اكثر

ماشي بكيفك

ومرت الايام عادية الى ان كملت اربع شهور ونص على زواجنا يعني تقريبا احنا بداية شهر ١٢حاليا.. لان تزوجنا جان نص تموز وبيوم خاله سهيلة عزمتنا على حنة بتها الزغيرة.. 

طيبه ومرت علاء جني، الضهر يمي للغرفة.. طبعا هو نايم ونحجي بصوت ناصي

رزان ترحين ويانه نشتري فساتين للحنه

فساتين!! 

وفتحتلي موبايلها شوفي، هذا المحل مسوي، بيح ع الفيس شوفي، الفساتين تجنن اني، ومرت علاء، راح نروح نشتري ع مود الحنه

باوعت عالفساتين  عزااا شنو ذني شوكلهن خلع وقصيرات: 

ياااا وج طيبه شنو هاي الفساتين فضيحة ذني.. 

غير مال حنه واحنا كولنا بنات.. 

بس اني محجبة شلون البس، هالشكل.. خصوصا الدنيا باردة

اي كلنا محجبات من نطلع ومن نوصل بيت خاله سهيله ننزع العباية الاسلامية ونضل بالفساتين غير حفله يارزان

لالا.. على بختج طيبه بله صورونا فديو لو صور شلون هيج جسمنا يطلع.. 

واذا صورونا قابل راح ينشروهن

افرضي احد شاف الصورلو الفديو

ياااا.. هيه حنه بيها كومة بنات منو يعرفنا ويخصصنا وتعرفين خاله سهيله عازمة الدنيا كولها

وحتى اذا ميعرفوما مو حرام يشوفونا شبيج انتي صدوك هيج تفكرين روحن انتن اشترن اني البس، فستان طويل من فساتيني وحجاب مستحيل البس، هالشكل

شكد معقدة لخاطر الله

من طلعن من يمي حسيته جان كاعد واحتمال يكون سمعنه 

المهم.. العصر بدلت لبست فستان طويل وحجاب وقبل ميطلع كتله حنروح اني وخاله والبنات لحنة بت خاله سهيلة مجان عنده اي، اعتراض عادي ورحت ولكيت ماما عدهم لان هي، خابرتني كالت اروح من وكت لخالتج المهم خلصت الحنه ورجعت ويه البنات وخاله للبيت وقت العشه.. وتعشينا وفتنا لغرفتي  بعدني، بنفس الفستان ممبدلته لان من رجعنا خاله حمت العشه وصبتلنا... هو مشفته اثناء العشه بس من فتت لغرفتي دخل وراية مباشرة وبدون مقدمات كلي

يله رزان لمي ملابسج راح اخذج لاهلج

تاخذني لاهلي

اي هاي هيه صار فوك الاربع شهور ونص.. فترة كلش كافية واني هم بعد ما اتحمل يستمر زاجنا اكثر وحتى وجودج بحياتي هم انتهى وقته وما اله داعي

هااا.. يعني قصدك صار الوقت حتى نتطلك

اي بالضبط

تمام.. بس، من اروح هسه لاهلي شأكول لماما يعني ليش راح اطلكني هم راح تسألني، هي وخالاتي، والناس واهلك

اكيد مفكر بهالشي هسه اني راح اخذج.. امج راح تستغرب من جيتج بهالليل كوليلها تعاركنا لان رحت للحنه ومكتله وضربني حجاية منه وحجاية مني، كتله اخذني، لهلي، واني هنا من يمي، اكول لاهلي ما اريدها بعد المرة الي تطلع بدون علمي وتتجادل وياي، ما اريدها.. واكيد راح يصير جر وعر وراح حاولون يصالحونا بس نبقى ثابتين على موقفنا انت ع اساس زعلانه عند اهلج شهر زمان وبعدها نتطلك وتخلص

تمام هسه الم ملابسي

انتظرج بره بالسيارة

صح اني متفقه وياه واعرف هاليوم راح يجي، بس من كلي شهر زمان ونطلك وتخلص السالفه ومن عرفت هاي هيه راح الم هدومي، وطالعة من بيت خالو ومن حياته وبعد ما ارجع بجيت ليش بجيت وعلى شنو بجيت ما ادري.. لحد يسألني، لحد يلومني ليش بجيتي، اني، نفسي ما اعرف ليش الم بملابسي ودموعي، يجرن المهم سديت الجنطه من خلصت وردت اطلع من الغرفة تذكرت عيوني بيها دموع رجعت يم المراية مسحت دموعي مخليت اثر وكأنما احجي ويه نفسي.. وج غبرة ثوله. ديري بالج يشوف دموع بعيونج انتي، متفقه وياه هسه بس، بشوفج تبجين.. يفكر الف تفكير اسود اثبتي وتصرفي عادي 

وطلعت من الغرفة رحت يمه وحرك بينا هو ساكت واني ساكته الى ان وصلنا لبيت اهلي.. وجهه جامد مبيه اي، تعبير او اي، شي يوحيلي بأي معنى.. انطاني الجنطه ونزلت شافني، دكيت باب اهلي وشاف ماما فتحت الباب بسرعة راح من يم بابنا.. 

عاد اني اول مفتت ماما استغربت

عزززااا شبيج ولج ليش جايه وحدج بهالليل

ودموعي، الضميتهن.. بسرعة نزلن يمها 

شبيج ولج جنطتج بيدج وجاية بهالليل ورجلج ليش راح حتى ماسلم عليه

وتذكرت كلامة الي، كاله الي فكتلها

يوم تعاركنا اني وكريم

عليمن؟ 

لان رحت لحنة بت خاله سهيلة ونسيت اكوله.. يوم مفكرت راح يتعصب من اروح كلت رايحة ويه خاله والبنات واكيد ماكو داعي، اكوله بس من رجعت تعارك وياي، وضربني،.. 

ضربج؟؟  عليمن يضربج.. ميضرب اخته ومرت اخو المصلخات ويتمركصن ويطكن صور

ما ادري يوم هو صار نار🔥 عليه ضربتي وغلط وشتايم وكلي، بعد ما اريدج لو تنزل بيج ايه لمي، هدومي وخلي اخذج لاهلج

لميت هدومي، وجابني، لهنا

تعالي، فوتي شربي مي وارتاحي بعد امج والله اليوم اخابر عدنان واكلب الدنيا عليهم شنو يضربج ويشحوتج بهالليل على سبب تافه شنو تايهه اله ماعندج اهل لو شافج يتيمه واخوج مسافر كلك ابيع واشتري بيها

يوم.. خلي ارتاح اخذيني نيميني بحضنج ما اريد اسمع عنهم شي عود باجر خابري او سوي الي ترديه

سوده بوجهي،.. كوله مني، زوجتك هذا الخبل شمدريني، اليشوفه يحوفه يكول معدل متطلع منه الزله من يوم الزوجتج اله واني اشوفج تذبلين يوم وره يوم ماشفت فرحة عروس بعيونج بس تكريين عند اهله وتفترين مثل الناعور... سوده بوجهي.. سوده بوجهي

ودخلتني جوة نمت يمها على جربايتها كعدت على صوتها تسولف ويه خالو مخلت حجاية بكلبها انوب خابرت مرت خالو ام كريم.. وهالكد مصيحت.. عليهم اجرجر بيها 

يوم كافي، عيب هالحجي همه شعليهم ابنهم ميريدني

واسمعها تحجي، ويه مرت خالو: 

واذا طلك.. بعد احسن متخليه يطلك... انطيته بنيه تسواه وتسوة راسه طفله عمرها توه بالعشرين وهو شايب عمره٣٣ سنه ماقدر النعمه البيده.. خلي يطلك خليها تخلص من عيشته السوده

سدت التليفون.. بس سدته رجع خالو اتصل هي فتحت سبيكر: 

شبيج انتي متكليلي هسه انتي اخذتي كلامة راس مال ساعة عصبيه ويكول اريد اطلك شنو كل الكال اطلك.. نمشي، وراه.. بعدهم ماصارلهم سنه.. اكيد تصير مشاكل.. ببداية كل زواج شنو انتي، وياي عليه شو.. بايعة ومخلصة ويانه بمكان متهدين بتج ترديها تطلك وتهجمين بيتها

بتي، شبعت ضيم عدكم لا رجل زين وياها والعيال مشغليها خدامة ماترجع بعد الكم وهمزين طلعت من يمكم وبعدها على اولها لافاح ولاتبده  والف الحمد لله ماحبلت منه جان هسه حايرة بحملها ربها يحبها وخلاها خاليه مختليه

الفصل الخامس من هنا