رواية سداد وبنت العرب الفصل الخمسون 50 بقلم الزهيريه

الذي فهمك خطأ 

يستطيع ان يفهمك صح المسألة إختياريه 

لا تبحث عن أعذار له 

ألق/ طبعًا كل أنسان يشوف اعظم مصيبه هي مصيبته بس من يشوف مصايب الناس تهون عليه مصيبته وأني طول عمري أشوف حياتي مأساة ما بعدها مأساة بس الآنسان بيده انه يغير من نفسه اما الظروف هاي حجه لإنسان ما يريد يطلع من بيئته وعاجبه الغلط إما أني كل يوم يعبر من حياتي عقلي يكبر ويا وكل شي صار ويا اعتبرته درس إلي واخذت منه تجربه بس بالنهاية 

تكونت عندي فكره هي انه اليكرهني العام ما يحبني السنه ابد 

لهذا من ولدت طفلي اخذت قراري انه سداد ما يعرف بوجوده حتى لو الناس اصيحله نغل هم ولا يعرف سداد بوجوده أخاف يسوي بي شي واني بيوم ولادتي چنت حايره بهواي اشياء منها شنو أسمي وچنت أريد أسأل سردار شنو أسمي بس من حچالي قصته ظليت صافنه شي لا يصدق بحيث من گد ما اندمجت ويه سردار بطل المغذي خلص وآني ما منتبه الا هو گام سحب الصونده مال مغذي وغلق الكانونه 

الق/ الله يخليك گومني تعبت من نومه احس ظهري خشب 

وهو ما گال شي بس گومني وخله المخده وره ظهري ورجع گعد بمكانه بس الفضول يقرا عندي آلف وسألته/ سردار ما كملت شلون احترگت زوجتك 

سردار/ بالعزه مال ميار وبس رجعنه من الدفن آبو ميار الله يرحمها لزم هلات موتها كتل وبوقتها گلي تزوج هلات وتاخذها خدامه لأطفالك وحتى اذا تريد تزوج عليها عادي أزوج وبوقتها خالتي ألي هي ام ميار اجتي وگعت دخيل دم تريد أزوج هلات اني بالبداية والله خطر على بالي آنه خايفين على اطفال ميار يخافون ازوج بعد موت ميار واجيب زوجتي تعذبهم هذا إلي خطر في بالي ساعتها واتصورت آنه يضربون هلات حتى تقبل بيه لهذا

 چان جوابي الهم انه ماكو داعي تجبرون هلات وأنه اني ما راح أزوج بعد ميار الله يرحمها

 بس أبوها اصر أنه ازوجها وحلف يمين اعظم اذا ما ازوجت هلات يذبحها وگدامي شگد ترجيته 

وگتله/ عمي احنه هسه بحلوگنه دم ميار ما صار ساعتين من دفنتها مو وكت زواج 

بس اصر أبوها انه ما يعبر يوم كامل على وفاة ميار إلا أني مزوج هلات وبالفعل للعصر جاب شيخ وعقدنه وصارت هلات زوجتي بحيث الناس كلها تعجبت عليه وكلها گالت ابو ميار تخبل بعد وفاة ميار إما اني ما اهتميت لا الزواج ولا لهلات أصلًا لان راحت مني تسوه الدنيا كلها وبعد العزاء بأربيل اخذت أطفالي ورجعت لبغداد 

والعجيب من وصلت لبيتي لگيت هلات موجوده تعجبت هاي منو جابها وشلون عافت العزاء مال أختها واجتي لبغداد وبذاك اليوم لليل وصلت أمي وخالتي دلفين ومن صدمتي بوفاة ميار راح من بالي شلون احترگت وماتت ومر على رجعتي من أربيل يومين واجى سداد يمي وظل يواسي بيه اخيرها سألني سداد سؤال رجعني لواقعي وخله شي گدامي ما چان خطر على بالي 

وسؤال سداد / انه شلون احترگت ميار 

بحيث من سألني ظليت صافن صدگ إني ابد ما سألت هي شلون احترگت لهذا اتصلت على أبوها وسألته شلون احترگت ميار وچان جوابه انه دى تخلي نفط للصوبه وانفجرت عليها الصوبه وحرگتها وهذا چان جوابه ومن غلقت ويا الخط جاوبت سداد نفس الجواب 

وبعدها اني من النوع ما أحب أدخل بسوالف النسوان لان من چانت ميار موجوده اني ما إلي علاقه بالبيت وشنو يدور بين امي وميار الله يرحمها 

بس ويه هلات صرت انتبه على امي كلش قاسيه وجافه حتى بكلامها ووياها ومن سالت أمي ليش تعاملچ ويه هلات عكس تعاملها ويه ميار وفاجئتني وگالت / ليش تريدني شنو اخلي على راسها ريشه بعد ما موتت ميار 

بصراحه تفاجأت شنو موتت ميار وهي شعليها ومن سألت أمي شنو دخل هلات بموت ميار 

أكدت أمي/ وهذا الكلام طلع من داخل بيتهم وعليه شاهده وهي خالتي دلفين امه لسداد وهي ألي حچت الحادثه بما أنزلت لأمي وهي انه جايين خطابه من طرف خالتي دلفين لهلات والعريس مناسب لهلات وهي رافضه وتگول ما أريد أزوج 

وبوقتها رايحه للمطبخ وباقيه تحچي على خالتي دلفين وابوها وأمها وميار مجاوبتها انه هي معيشه نفسها بوهم وسداد عمره ما راح يفكر بيها وهو ما يحبها ويحب زوجته آريا وهلات متخبله شلون تگول هيچ وگابه العيطه بين ميار وهلات بالمطبخ وعلى صوت عياط ميار راكضين خالتي دلفين وأمها وابوها وهلات لازمه ميار موتتها كتل وخالاتي اثنينهن ساحبات ميار منها وأبوها موت هلات كتل 

وخالتي الي هي أمها ساحبه هلات ودافعتها بالغرفه وقافله عليها الباب حتى تخلصها من أبوها بس هلات من النوع اللئيمه وباقيه تنتظر فرصه من دى يصلون خالاتي وأبوها ميار چانت بالمطبخ وهلات جايبه جلاكان بانزين من مال سيارة أبوها الي مخليهن بالگراج ومفرغه البانزين على ميار وهي چانت قريبه على لهذا لهبت النار بيها ومن عياط ميار وبين ما أجوي وشافوها ورايح ابوها جايب بطانيه دى يخمد النار الشابه بيها هذا كله وقت لهذا بس خمدوا النار وأخذوها للمستشفى چانت خلاص بعد سممت 

وآني قبل ما أوصل هي موصيه ابوها ومحلفته انه ما يسلمون هلات للشرطه ومن اجوي الشرطه ياخذون إفادتها عن الحادث گالت انه هي حرگت روحها لان تريد تنتحر وبعدها ومن اجيت آني وصتني على اطفالنه بس وتوفت ميار الله يرحمها چانت انسانه على نياتها وطيبة بس هاي رب العالمين كاتب إلها هيچ أما اني احترمت وصيتها لميار وما سلمتها للشرطة بس هي خليتها خدامه لأطفالي ومذلوله في بيتي ومخليها لا هي مزوجه على وجه ولا هي بنيه على وجهه وأني اكرهها أموت منها وليومچ هذا هي أهلها متبرين منها وهاي صار 3 سنوات ونص مرت على هاي الحادثه 

وبعد وفاة ميار وربي يشهد إنه أبد ما رف گلبي لبنيه غيرچ لهذا لاتخلين في بالچ وجود هلات لإن وجودها مثل عدمه وأنتي بعد بكيفچ اذا بيوم توافقين عليه راح أكون أسعد انسان لوجودچ بحياتي واذا لا ما وافقتي راح تبقى مشاعري اتجاهچ مدفونه بگلبي وما تحسين بيها أبد 

وبعدها استاذن مني وراح جاب بطانية واجى نام على القنفه الجلد الموجوده وهو يوصي بيه إنه إذا أحتاج شي اگعده والظاهر چان هو تعبان لآنه غط بنوم عميق إما اني بقيت أفكر بي وبوضعه الله يكون بعونه شنو من مآسي مر بيها سردار طبعًا إلي يشوف سردار ومومه إلي هي امه يگول ما على گلبهم هموم عايشين حياتهم ومتونسين بس إلي يطلع على مآسي حياتهم يگول الله يكون بعونهم 

ومر ذاك الليل بين اغفى وأرجع اگعد وبين انه الممرضة تجي تنطيني علاج وتضربني إبره لما سمعت شخص دى يصلي رفعت راسي چان سردار وبس خلص صلاة 

الق/ صباح الخير وتقبل الله منك 

سردار/ صباح الأنوار والله يتقبل منكم ومنا صالح الاعمال اتصلت البارحه بالضابط فرقد وترجيته يتواصل ويه الضابط صفاء إنه يسأل الضابط صفاء نزار وين عقد الزواج مالتچ والضابط فرقد ما قصر اتصل بصفاء ومن سأله على نزار 

الضابط صفاء مبلغ فرقد أنه نزار الدعوه إلي ضد نزار إنه قتل اوزجان في أربيل لهذا سفروا لأربيل لإن محاكمته بأربيل مو ببغداد وراح وأتصلت بناس أعرفهم بأربيل وان شاء الله بعد ساعتين يجاوبونه وأتصلت بجيهان وطلبت منها تصور جنسيه سداد وترسلها النه وان شاء الله خير 

الق/ طبعًا شگد ما أشكرك لساني يعجز عن شكرك والله انت أنسان راقي والله يحفظك 

وحدود الساعه 8 الصبح سردار چان يگلب بموبايله من دخلت رغد وجايبه ريوگ واجتي بوستني 

رغد / قبل ما اجي عليچ مريت على الطفل وشفته يجنن وبصحة جيدة يا رب يجعله من مواليد السلامه ويخلي بار بأمه 

الق/ شفتي ما بي شي رغد 

رغد/ ولچ ما بي شي وتعالي تريگي وسندي گلبچ حتى يصير عندچ حيل ترضعي ويله تعال سردار جبت چاي مهيل هسه اكيد راسك يوجعك 

الق/ وچانت رغد ما مقصره ما مخليه شي ما جايبته اكلنه احنه الثلاثه وعلى الاكل سألت 

رغد / اگللكم اشو الى هسه ما انطينه اسم لطفل 

سردار/ اسم الولد عدنه من حق ابو يسمي والبنيه من حق أمها سميها بس طالما الاب تعرفون قصته خلي عمته جيهان سمي 

الق/اي والله صدگ خلي هي سمي لإنه وجوده بالحياة بفضل جيهان 

وبعد الريوگ اجتي اشعارات هواي على موبايل سردار وفتحهن آول إشعار من جيهان رسلت صورة جنسية سداد والإشعارات الباقية من صديق سردار بأربيل وهو بلغ سردار إنه جميع المستمسكات عند العجوز إلي باع إلها الخرابه إلي سابقًا رحنه إلها اني وسردار من سألت على عمي

سردار/ عيني رغد ولو بيها زحمه عليچ راح أروح أجيب المستمسكات واجي يا ريت تبقين يمها 

الق/ وراح سردار وبقينه آني ورغد وهي خطيه أخذتني للحمام وغسلتلي وبدلتلي وأخذتني تمشي بيه وهي تگلي حمدلله اليوم أحسن والبارحه رحت على بيت جدچ وطمنتهم عليچ ورجعت طلبت منها توديني للخدچ ومن رحنه الممرضة عاندت ما قبلت دخلني وتگول أكو أطفال جوه وكلهم حديثي الولاده لا تلوثون الجو وخطيه ذوله ما يتحملون بس من انطتها رغد فلوس صارت ما تخاف على الأطفال والجو عفيه بلد كله تمشي بالرشوه 

دخلت يم طفلي واجتي الممرضه جابت كرسي گعدتني عليه وانطتني أبني وهي تگلي خطيه رضعي من صدرچ 

ألق/ وآني ما اعرف وهي اجتني طلعت صدري وتخلي بحلگ أبني وچان شعور ما يوصف بين حبي وحنيتي عليه وبين فرحي بي وبين صار يمص بصدري وعبالك دى يدغدغني والظاهر خطيه جوعان صار شويه يرضع وشويه يبچي 

والممرضة تگلي بعده حلگه فاهي وبمرور الوقت وبالرضاعة يقوى فكه ويصير يرضع طبيعي وشويه وعاف صدري واخذته مني طلعت لگيت رغد واگفه تنتظرني وأخذتني ورجعتني للغرفه وبقينه ننتظر سردار والى ما آذن الظهر يله إجى وهو حتى جنسية سداد ساحبها استنساخ وراح كمل كل شي ورجع 

سردار/ كملت الإجراءات كلها بس المصيبه مو هنأ المصيبه هسه گوه قبلوا جنسية سداد استنساخ وبعد 3 أيام يطلع نسخه من البيان ويريدون جنسية سداد الاصليه هذا شي اما المفاجأة الثانيه يگول هذا ألي ينظم بيانات إنه نسخة البيان الأصلية راح يرسلوها لنفوس الاب وراجعوا بعد شهر نفوس الاب وأبشركم نفوس سداد بأربيل 

رغد / عزه شلون ومنو يوديها لأربيل هذا شي اما الشي الثاني إنه العقد اذا الزوجين عاقدين خارج المحكمه لازم يصدقون العقد شلون بهاي الحالة 

سردار/ الله كريم منو يعرف باچر شيصير والموعد منا لبعد شهر 

الق/ اگلك سردار أنت تگول كملت كل شي صحيح 

سردار/ اي كل شي كملت البيان مال الطفل وحاسبت المستشفى وكتبولچ على خروج من المستشفى هسه تگدرين تطلعين ووياچ ابنچ 

الق/ بس ما عرفت أنت شنو سميته لأبني 

سردار/ مو آني سميته إلي سمته هي جيهان وهي انطته اسم أيليا على آسم ابن سداد المات الله يرحمه 

سداد/ مرات قرارتنه تكون خاطئه بس نظل متمسكين بيها حتى نثبت لغيرنه انه احنه على صواب وشگد يكلفنه الخطأ عادي ندفع بس في سبيل ما نطلع غلطانين 

گدام احد وأني من إتصلت على جيهان وطلبت منها إنه تجي لبغداد ومن وصلت لبغداد وعرفت اني شنو اريد منها تخبلت وبلشت بالقوانه المشخوطه وهي حرام عليك هاي روح وشلون ينطيك گلبك تقتل طفل كل ذنب ما اله وأنت خلاص عقل ما بقى براسك 

وآني لكون چنت بالفندق هي راحت على خالتي مومه وبقت يمها وعلى ثاني يوم رحنه اخذنه ألق للمستشفى واني چنت انتظر قريب على غرفة الدكتوره من طلعت جيهان 

وسألتني اذا الطفل ما بي شي وسليم يبقى ما تنزله ألق حرام هاي روح 

سداد/ أبد حتى لو كل شي ما بي خلي تنزله وحتى اذا اعضائه كامله يطلع منغولي مثل ابوها واخوها 

وشگد حاولت جيهان ويايه بس آني ردي چان قاطع ما بي مجال للنقاش وبوقتها أخذتها لصاله مال الولاده وبعد فتره طلعت گالت نزلته وبصراحه أني ارتاحيت خلاص بعد حمل ونزل عن ظهري وبعدها رجعت لأربيل وبوقتها عرفت من كوجر إنه آهل اوزجان ما قابلين انه دعوة قتل اوزجان تتحول ألى بغداد ومصرين تبقى الدعوه في اربيل وانه راح ينقلون نزار من بغداد إلى اربيل 

وبعدها جابوا نزار يمنه في اربيل بعد ما اجيت من بغداد بشهرين واجتني من المديريه استدعاء إلي ومن رحت ضابط التحقيق سألني عدة أساله ومن ضمنها انه شنو علاقتي بنزار 

سداد/ ما ألي كل علاقه بي 

الضابط / بس نزار ذكر انه هو نسيبك  

سداد/ والله خوش نسابه چان استحى قبل يحچي يعني نسيبه 

سداد/ سيدي هذا يحچي 10 بالشهر لان التوكيل الي تم عليه العقد مزور لهذا لا نسيبي ولا هم يحزنون عسى بنار جهنم 

والضابط فهم الموضوع ورجع گال / بس هو يريد يشوفك 

سداد/ عادي خلي يجي 

وبعدها بعشر دقايق چان يمي وشلون گعد يحچي ويايه وكانه يآمرني آنه أساعده ويذكرني انه هو عم زوجتي 

جاوبته/ اگلك انت تحچي صدگ ليش انت متعرف شنو سويت يعني إني نسيبك تريد تقتلني حتى تورث انت وبنت أخوك هاي بأحلامك وأنت وبنت اخوك الدايحه شمرتها شمرت القندره تريد تورث براسي 

نزار/ أبني غلطت وسبحان ما يغلط والشيطان شاطر 

سداد/ يا شيطان يمعود انت الشيطان يدخل يمك دوره ويطلع من يمك تخليله رتبة ملازم 

نزار/ أبني هسه عفى الله عما سلف 

سداد/ اگلك انت تحچي كل عقلك شنو عفى انت قتلت بشر قتلت المسكين اوزجان راح بيها بالرجلين بيها بعد سلف وعلف 

نزار/ أبني انت تگدر تحچي وياهم إنه أني غلطت وچنت تحت تأثير الخمر وسويت إلي سويته ومن يمك محامي زين وآني جد ابنك اعتبر 

سداد/ اني ما عندي ابن وتخسى تكون انت جد أبني اطم روحي غير 

نزار/ شوف انت تنكر المعروف انت من اجى واحد من جماعتك وچان يريد العقد مالتكم انت والق حتى سجلون أبنكم أني قصرت وياكم 

سداد/ هاي شوكت طلبت العقد 

نزار/ قبل يومين من جابت ألق وآني دليتك على مكان العقد والمستمسكات