رواية سداد وبنت العرب الفصل الثاني والخمسون 52 بقلم الزهيريه

الق/ يگولون غلطة الشاطر بألف وصح هذا القول أصور ألي گال هذا القول ما غلط مثل غلطي لإن موبس غلطته تكون بألف لا تكون تكلفه حياته وهذا الشي صار ويايه اني شگد تحملت وربي يشهد عليه في سبيل احتفظ بالطفل بس ما أعرف ليش الدنيا تمشي ويايه عكس ما أعرف كل ما اگول خلاص حياتي استقرت وبعد ما أريد من الدنيا شي لازم يطلع شي ينغص عليه حياتي 

وآني چنت دائماً أصور مراحل نمو أبني ومن دخل بشهر الرابع گام يسوي حركات جنن وهو دمه خفيف بس يضحك بحيث من اخذه لتلقيح إي شخص يشوفه بس يلاشي يضحك ويدخل الگلب بسرعه وطبعًا جدو من النوع القاسي بس ويه أبني گلبه كلش رقيق يعني آني من يجيبون الأطفال يمي احير وين اخلي لان بيبي تعوفلي الغرفه ألي وتروح للمطبخ لو سوي غده لو تحوك مكانيس وأخويه تگعده يمها وجدو ماخذ الصاله طابو بس اله ينام ويصلي وياكل ويگعد بيها وآني حمدلله من شويه صاروا يجون يمي أطفال صرت أعدل بالبيت وبيبي ما بيها حيل تنظف لهذا كله إني أنظف أجيبها من السطح للباب الرئيسي كله 

واني أخاف على أبني لهذا كله أخلي بالصالة يم جدو وهو يظل حاير بي وحتى من يبچي بس يصيح عليه ويگلي رضعي ورجعي إلي 

وآني من عرفت ابويه وين فاتحت جدو بالموضوع وهو چان جوابه 

جدو / أدري اكو احد گايلچ بيت جولان صار مختص بالمعاقين آني عندي 2 سگط وأنتي اخوچ سگط وشغلچ كل الجهال سگوطه وانوب جيبين ابوچ هم سگط أدري وين تروح يا جولان كلها معوقين يمك 

الق/ گمت حضنت جدو وابوس بي واگله حتى لو تاخذ ايجار گعدته بالبيت أدفعها والله حتى لو معوق يبقى ابويه شسوي اعوفه وآني قادره على رعايته گلي اما انت يا جدو والله بالآخره مثواك الجنه لان گلبك حنين 

جدو / بكيفچ هو اني بعد اگدر اگول لا هو شبقى بعمري 

الق/ وبست راسه وهو هم  حضني ويگلي هذا بيتچ وشنو تردين سوي 

وبس طلعت من الصاله إتصلت بسردار واتفقت ويا على ثاني يجي عليه حتى ياخذني على أبويه لشماعيه 

وعلى ثاني يوم گمت من الصبح رضعت أبني وكملت تبديل أخويه وكملت تنظيف البيت وحتى الأقفاص مال خوالي بين ما كملوهم بيبي وجدو تنظيف اني غسلتهن ونظفتهن ونزلت جوه بدلت لان سردار إتصل بيه وگال ما بقى شي كلها شويه واوصلچ 

واخذت جنسيتي حتى أطلعه من الشماعيه ومن إجى سردار وصيت بيبي على أيليا وطلعت وأخذني سردار على الشماعية ومن دخلنه وفهمنه هذا الولد الواگف بالباب شنو نريد وگال عيني اني هنا حارس روحوا بوجهكم على المدير 

ودخلنه واكو ممر دخلنه بي وبالوجه صار گدامنه مكتوب على باب المدير والباب چان مسدود دگه أكثر من مره ماكو جواب 

سردار/ أدري هي مستشفى مال مخابيل عايفيها هيچ سفردحي شو من دخلنه إلى هسه ما شفنه احد غير بس هذا الحارس اليتيم شلون هيچ لا إدارة لامدير لا دكاتره احنه في بلد عجيب غريب 

ألق/وبعده دى يحچي سردار أجى واحد والله فزيت فزه بس الله اليعلم بيها من گال شسوون هنا 

سردار/ اجينه سياحة هنآ ابويه اجينه نريد مدير دكتور نحچي ويا 

الق/ طلع الولد مضمد وجاوبه انه المدير دى ياخذ فره على المرضى وهسه يجي وطلب من عدنه ننتظر لما يجي 

وبس راح علق سردار/ عمى بعينه هو المضمد نفسه مخبل ولازم يحجزوا الله يساعد المرضى عليهم 

الق/ وآني متت ضحك وسردار يباوع عليه ويگلي شگد فطيره أنتي يا ربي بس تدرين انه ضحكتچ جنن يا ربي دوم هاي الضحكه 

واجى دكتور ودخل للغرفه المكتوب عليها المدير وفهمنه انه هذا المدير نفسه وهو المدير بقى الباب مفتوح ومن گعد على مكتبه گال / تفضلوا 

الق / احنه دخلنه وسلمنه عليه وگعدنه 

وبده سردار الكلام/ دكتور احنه عدنه مريض يمكم وقبل فتره دخلوا يمكم وهو منغولي واحنه نريد نطلعه 

المدير/  إي عادي اذا تردون تطلعوا بس مجرد تقدمون طلب وترفقون ويا مستمسكاتكم  وانه إنتوا طلعتوا على مسؤوليتكم 

سردار/ من وين نجيب الطلب ويا مستمسكات تريد المطلوبه من عدنه 

المدير/ الطلب من الاستعلامات اجيبه اما المستمسكات هي الجنسيه وبطاقة السكن  انت شنو صلتك بالمريض 

سردار/ اني ما عندي أي صله بي  بس هاي بنته واني اجيت وياها اني أقربائها من بعيد 

المدير/ ومنو يگول هاي بنته وإذا انت ما آلك صله بي شلون أسلمه ألكم بصفتكم شنو 

الق/ لا دكتور آني بنته وألي دخله يمكم هو عمي 

وطلعت جنسيتي من الجنطه وانطيتها اله 

وهو شافها وچان يگول ليش هو شنو إسمه المريض 

وانطيته أسم أبويه كامل وبعدها گلي حتى لو إنتي بنته ما تگدرين تطلعي لإن بعدچ قاصر يعني انتي اكو وصي عليچ شلون راح تكونين وصيه على غيرچ 

الق/ آني حاليًا جدو وصي عليه يصير جدو هو يجي يطلعه بحكم هو وصي عليه لكوني بعدني ما بالغه 

المدير/ جدچ أبو للمريض تقصدين 

الق/ لا جدو ابو أمي لان جدو آبو أبويه متوفي 

المدير/ نفس الوضع ما يصير لان الوصي على المريض لازم يكون قريب من الدرجه الاولى ابو او اخو او ابنه وأنتي عادي تگدرين صيرين وصيه عليه بس لازم تكونين بالغه سن الرشد 

الق/ آني ما چنت اعرف هذا الشي تفاجأت بي يعني ما اگدر اطلع أبويه لهذا طلبت من المدير إنه أشوفه 

وهو وافق وما اعرف إتصل بمنو بالموبايل وبعد شويه اجى واحد ورحنه ويا وظلينه نمشي بممرات وعلى الجوانب غرف ولما وصلنه لغرفه وبيها اربع أسره 

وابويه گاعد على سرير ومن شفته يا ريت لو عميه عيوني ولا شايفته چان لابس دشداشه وسخ وحتى مشگگه ولحيته طويله وحالته والله لليهودي ما أتمناها 

رحت ركض عليه حضنته وهو بالبداية ما شاف وجهي بس من بعدت عنه وخليت ايدي على خدوده وهو شاف وجهي 

ضحك وچانت ابتسامته بريئه وظل يباوع بوجهي بس انتبهت عليه كلش ضعفان ووجهه أصفر وطبعا السرير 

الي نايم عليه والله يمكن حتى لو انطي أجلكم الله لچلب ما ينام عليه من الوسخ والريحه الكريهه وهذا الواگف يمنه الي ما عرفنه شنو هذا ممرض حارس ما نعرف وجه الكلام اله 

سردار/ بلا زحمه ليش هيچ الوضع المستشفى يعني الوسخ اعلى من رووسهم 

وجاوب / أخويه هنا الدوله مخصصه ميزانيه كلش قليله الها يعني احنه هنا لو الأهالي يجيبون مصرف وآكل ملابس للمريض الي يخصهم لو ماكو يعني اذا يبقون على تخصيصات ينطوهم وجبتين باليوم لا تسمن ولا تغني من جوع وهو من اجيتوا ذبيتوا بالمستشفى ماكو أحد أجى عليه 

سردار/ صحيح كلامك لأن احنه دوله فقيره وما عدنه وهي الدوله صارفه على العاقلين أنوب تصرف على المخابيل حقكم يابه 

ورجع سردار حجى ويايه/ ألق أبقي هنا هسه اروح أجيب اله كم حاجه واجي 

ألق/ وبقيت آني وأبويه گاعده يمه وتقريباً غاب سردار ساعة ورجع ويا شامبو وليفه وتراكات إثنين وملابس داخلية وحتى فراش وغطى ومخده جاب وأكل وفواكه 

واني وسردار اخذنا للحمام ونزعنا ملابس وبدينه نجلف بي وانتبهت اكو آثر بخاصرت ابويه وسألت سردار على هذا الجرح 

سردار/ هذا مو جرح هذا أثر مال عملية ليش ابوچ مسوي عمليه قبل او يشكي من الكله مالته 

الق/ لا ما بي شي آني متأكده لآنه أبويه اني چنت اسبحه لهذا متأكده إنه ما بي شي 

وكملنه ابويه ولبسنا ملابسه وطلعنا واني خليت الفراش الجديد بدل الفراش القديم ورتبته وگعدت يمه على فراشه الجديد وظليت أوكل بي بس سردار ما سكت ظل يصيح بعلو صوته واجنا هذا ألي جابنه يم ابويه وبقت حسره بگلبي اريد اعرف هذا شنو شغله ما فهمت بس شكله مو راحه أبد وسحبه سردار من أيده وجابه يم أبويه ورفع ملابسه من ناحية خاصرته وسأله 

سردار/ هذا شنو الجرح أو بالمعنى الأصح شنو هاي العمليه مسويها اله مال شنو 

وجاوبه/ آني هنا جديد ما اعرف هسه أبلغ المدير واجي 

الق/ واختفى من گدامنه وأني اسأل سردار هذا شنو شغله 

سردار/ هذا سامعه آلي يگول طير طايور هو هذا هيچ هذا لا هو دكتور ولا هو مضمد هذا جاسوس شنو يصير يبلغ المدير يعني بين قوسين البلبل الفتان 

ألق/ وما مرت 5 دقايق حتى اجانه المدير هروله ومن رجع سردار سأله نفس السؤال عن هذا الجرح 

المدير/ هااا هذا الجرح قبل فتره دخل يمنه شخص مخبل + عنده هسيريا وبيومها چان اكو طباخ دى يوزع الآكل للمرضى وهذا المخبل سحب السچين من الطباخ واتعدى على أكثر من مريض عندي وبيومها نفتح تحقيق بالحادثه اما المخبل اخذوا الشرطة وحابسي بزنزانة منفرده وحده أمًا المرضى آلي يمي تم علاجهم الى ما تم شفائهم كلهم 

وبعد كلام ويه المدير ما منه فايده طلعنه من المستشفى وآني قررت كل خميس آجي على أبويه وبطريق الرجعه سردار گلي موضوع سطر دماغي بي 

سردار/ شوفي ألق اني ما أريد اقلقچ بس عندي يقين انه مدير المستشفى كاذب وهذا الجرح مو مال اعتداء هذا الجرح مكان عمليه مال كله اما شنو نوعها ما أعرف هل يا ترى زرع او استئصال العلم عند ربچ 

أنوب خله جسمي كله يرجف معقوله هذا الي دى يصير وصحيح ألي يگول المصايب من تجي ما تجي مصيبه وحده وره الثانيه لا المصايب كلها تجي سوه لان من وصلت للبيت شفت سداد واگف ودى يحچي ويه جدو 

وبنفس الوقت أبني أيليا على كتف جدو 

سداد/ ألي تخفي اللياليي تظهره الايام طبعًا مرات ضوه صادر من ثقب باب يطلعلك مصايب يا بو مصايب وإني  من شفت مقطع الطفل أيليا ونسخه طبق الاصل اتصورت اكو من ماخذ صورة أبني وهو متوفي ويسوي بيها فوتوشوب تخبلت يعني ما يراعون طفل متوفي وراح بالي بصراحه على آريا 

واقسمت ويه نفسي اذا هي مسويه هيچ فوتوشوب الا صدگ اسجنها بس سبحان الله إني أبد ما إجى على بالي المفاجآت الي راح صير أبد ومن دخلت يم البنيه الصيدلانية چانت بنيه نهاية العشرينات وهي مبينه بنيه مرتبه لهذا من سألتها على مقاطع الفديو چان جوابها كلش وقح وطردتني 

بس آني فكرت آنه هاي اكيد تخاف على سمعتها لهذا التهديد أحسن حل وياها اطلع الحچي منها ومن گتلها أبني مخطوف وراح اشتكي عليها گبل بدلت وتحولت لهجتها ألى توسل 

رغد / أخويه والله الطفل أبن صديقتي ومن جابته اني چنت وياها بالمستشفى يعني شلون ابنك وخطفته 

سداد/ شوفي هذا كلامچ كله ما اصدگه هسه اني بإتصال واحد خلي ياخذوچ لشرطه وهناك عود نتفاهم وبعدين انتي تگولين الطفل أبن صديقتي شمه الطفل بالكامل 

والله من ذكرت اسم أيليا بالكامل تخبلت هاي نطت اسم ابو الطفل نفس أسمي وأسم أبويه صدگ ويه نفسي گلت اذا ما انطتني عنوان اهل الطفل وين ساكنين والله صدگ اشتكي عليها 

رجعت سألتها/ أنتي كذابه وين آهل الطفل  

وهنا المفاجاة يمكن چانت راح جيب إلي جلطه وشلل لان العنوان والوصف مال البيت چان بيت ألق تخبلت بحيث طلعت أركض مثل المخبل والله حتى ما أذكر شلون ركبت السياره وشلون وصلت لبيتهم بس من وصلت لبابهم بدون وعي ظليت ادگ بالباب مثل المخبل وسمعت واحد يصيح هذا يا هو شنو باب حوش الخلفك وهيچ تربد بي 

ومن أنفتح الباب طلعلي جدها لالق هذا أعرفه لإن من قبل شايفه بس إلي ما شايفه هو هذا الملاك چان على ايده طفل ألي شفته بالمقطع 

وسألته/ حجي بلا زحمه ألق وين 

جولان / ألق راحت على ابوها 

سداد/ وهذا أبنها 

جولان / إي أبنها ابن منو غير أبنها 

سداد/ يعني بيني وبين نفسي اذا اريد أحسبها ويه نزلت الطفل من أخذتها للمستشفى نگول ازوجت بس ما معقوله ب 7 اشهر ازوجت وحبلت وخلفت طفل عمره اربعة اشهر يعني هاي كذابه الطفل ما نزل ولا هو مشوه مثل ما گالت لا والمصيبه الاكبر والأعظم عدها شركاء ومن ضمن ذوله الشركاء جيهان اختي الي مني وبيه هذا كله مر گدامي كانه شريط وبعده جدها يسألني شتريد 

ووگفت سيارة سردار ونزلوا منها سردار والق وأول ما شفتهم گتلهم/ هله بالعصابه هله بالنصابه هااا يعني ما نزلتي لطفل 

وهي تخبلت اجتي تركض اخذته من جدها وظلت حاضنته وهي تگلي / هذا ابني 

سداد/ هذا مو ابنچ وحدچ هذا أبني ولچ أني تستغفلوني وتلعبون عليه وتگولون الطفل نزل وأنتي ما منزلته وربچ اذا ما خليت شوفته حسره بگلبچ 

آني مو سداد