رواية سداد وبنت العرب الفصل الثالث والخمسون 53 بقلم الزهيريه

قد لا يزعجنا القول 

ولكن يؤلمنا القائل 

وقد لا يؤثر فينا الفعل 

ولكن يصدمنا الفاعل

الق/ اني جبت كل حياتي تعب وكل طريق چنت امشي بي اگول خلاص هذا الطريق الصح بس بمرور الزمن يطلع الطريق الي مشيت فيما بعد يصير نقمه بحياتي وهذا چان حالي يعني آني چنت بعدني مسطوره من موضوع الجرح ألي في خاصرة أبويه اجيت لگيت مصيبه ثانيه گدامي 

اني وسردار من وصلنه وقريب ما دى نوصل لبيت جدو چانت واگفه سيارة 

سردار/ اگلچ الق هاي سيارة سداد شجابه لبيتكم 

الق/ ومو عبالك گلي سداد عبالك گال عزرائيل راح ياخذ روحچ بحيث بس وگف السياره سردار نزلت أركض وگلبي عبالك حس انه جاي يريد ياخذ ابني مني ومن حچى احساسي ما يخيبني طلع صح جاي على أبني وآني اخذت أيليا من جدو وحضنته وأبني هم كذلك حضني 

سداد / شوفي اذا ما خليته حسره بگلبچ شوفته 

الق/ لو أموت ما انطي آلك هذا أبني وحدي انت سويت كل شي في سبيل يگطعوه ويذبوه هسه صار ابنك وجاي تريد تاخذه وربك اقتلك وما تاخذه 

سداد/ شوفي أني هسه واگف ببابچ واگلچ انطيني الطفل خلي اخذه وأروح بدل ما أشوفكم وجهه سداد الثاني وساعتها لو مو بس تبوسين قندرتي لو تجين تبوسين قنادر عائلتي كلها ما ارحمچ 

سردار/ سداد مو هيچ الحچي خلي الله بين عيونك هي تحملت كل شي منك حتى بس تولد الطفل وانت چنت مصر ألا ينزل هسه ما غدى في ما بدى 

سداد/ انت أخر واحد يحچي ويفك حلگه فهمت الصار كله من جوه راسك لا تجي هسه صير براسي مصلح 

وشوفوا اذا هسه ما اخذت الطفل ويايه ورحت قسمًا بالله 

ما تعرفون شنو أسوي احرگ إليابس والاخضر 

الق/ والله لمن يشيلون جنازتك هسه گدامي ما انطي 

جولان / أبني گول يا الله وادخل جوه يمنه نضيفك ونتفاهم واذا الك حگ تاخذه وإذا النه حگ ناخذه 

سداد/ لا حجي ماكو داعي أدخل ونحچي أكثر من هيچ انتوا حچيتوا الي عدكم وآني حچيت إلي عندي وخلاص من رخصتك حجي 

الق/ وچان يريد يروح بس جدو لازمه من أيده وباسه من چتفه 

وهو يگله جولان / ابني إني أريدك تدخل واضيفك ترفض ضيافتي 

ألق/ وهو ما حچى شي ودخل ويه جدو وسردار هم دخل وآني چنت اريد أروح أدخل جوه يم بيبي بس فاجئني جدو من گال 

جولان / تعالي ألق انطي زعيرگون لأبو خلي بحضنه 

الق/ وجدو أبد ما يصيح لابني لا ايليا ولا الدلع مالته ليو كله يصيحله زعيرگون اني تخبلت من طلب جدو شنو انطي ابني لسداد غير اموت وردت ارفض بس جدو فتح عيونه عليه وأشرلي براسه بمعنى انطي لأبو 

واني چنت بعد ما عندي حل أبد تقربت على سداد بس شنو ارجف لإنه من شمرني من فوگ الدرج گمت أموت خوف من سداد خله رهبه بگلبي من عنده 

ومن انطيته أيليا اخذه بحضنه وحضنه قوي وظل يبوس بي من وجهه وعيونه وخدوده تحسه راح ياكله مو يبوسه 

والعجيب إنه أبني من ياخذه احد ما شايفه يگوم يبچي ويصرخ بس من آخذه سداد أبد ما بچى في حين سداد من چان يبوسه يعصر بي وبعدها اخذ ايد أيليا وگام يبوس بيها واني واگفه على راسهم اخيرها جولان ما يگعد راحه إني أحس نفسي گاعده على طباخ وجولان اعصابه بارده والمصيبة يگلي 

جولان / روحي ألق سوي چاي جيبي بارد شكو واگفه على روسنه مثل فحل التوث بالبستان كل شي ما يسوي لا يطرح ثمره ولا يتلقح منه 

طلعت من يمهم وآني ادردم بگلبي على جدو بس شنو خليت قوري الچاي على النار وكل شويه أروح لصاله أخاف لا ياخذه سداد ويطلع وآني ما أدري وجدو كل شويه يگلي وين صار الچاي واني گد ما دماغي مشوش الچاي دى يفور گدام عيني وما انتبه وره وين يله أنتبهت عليه وصبيت الچاي وحمدلله طلعت ما مخليه شكر ورجع جدو رجعني أجيب شكر وخليت الشكر يمهم ورجعت وگفت قريب على سداد لكوني اخاف على أبني 

آخرها جدو بده الحچي 

جولان / الله بالخير عليك ابني هسه گلنه شنو طلبك وان شاء الله ما تطلع منا من عدنه الا وخاطرك طيب 

سداد/ شوف حجي الله بالخير عليك والعافيه انت ما اعرف تعرف بقصتنه آني والق او لا 

جولان/ اي عندي علم بيها 

سداد/ حجي اني والق أصلًا ما مزوجين والبنيه چانت مهزومه من بيت عمها وبايگه فلوسه ومهزومه ويه صاحبها وصاحبها بايعها بملهى واني إلي دى احچي وياك وروح أبني مطلعها من ملهى وهي استغفر الله ما أريد احچي وبعدها تهمتني وسجنتني هي وعمها وأخذوا فلوس وبعقد مزور ويه ابن خالتي يله طلعت 

اما ما اعرف هي گالتلك شلون حبلت مني لو لا وركضت بيدي ورجلي في سبيل إنزل الحمل مالتها ولعبوا عليه ومن ضمن ألي لعبوا عليه چانت اختي هسه انت رجل چبير بالعمر وصاحب حظ وبخت بعد هذا كله لو بمكاني شسوي احچي ضميرك 

جولان / وربك لو آني الا اقتلها وأخلص منها 

سداد/ شوف هاي انت گلت وآني ما قتلتها لأن اني مو ولي أمرها هي چانت يم عمها واستغفر الله الظاهر عمها چان يستخدمها تجاره ويربح من وراها لا أكثر وهسه اني ما دى أعيب على خلقة الله بس أخوها منغولي وخوالها انت تعرف حالتهم انت احچي ضميرك شوف هذا بيت مناسب انه يعيش بي طفل وشوف مناسب انه طفل يعيش ويه هيچ ام 

جولان / كل شي گلته حقك وما ألومك بس عندي سؤال ما بيها مجال للمسامحه انه تسامحها والبشر يغلط وخير الخطائين التوابين 

سداد/ حجي هنه وحده أثنين حتى اسامح عليها آني بصراحه نفسي ما تتقبلها أكون صريح وياك واي رجال حليبه طاهر ما يقبل بهيچ بنيه لهذا أعذرني اني بس أبني آخذه لان شرطي وياها إنه أتنازل عن القضيه في سبيل تنزل الطفل بس هي ما نزلت يعني نقضت الإتفاق اذن أخذ ابني وكان الله يحب المحسنين 

الق/ هذا ألي ذكره سداد اكثره جدي ما يعرف بي يعني بين قوسين أكو تفاصيل آني خفيتها عن جدو وهسه عرفها احس نفسي گاعده بمحكمه وجدو القاضي وما أعرف شنو حكمه بس بذيچ اللحظة عرفت شگد ماكر سداد ولعب على الوتر الحساس عند جدو وسداد لعبها صح وقلب الطاوله عليه وجدو تفاجأ بحچي سداد عليه لان نظرته ويايه تغيرت 

جولان / هسه وليدي سداد شنو طلبك 

سداد/ حجي طلبي أنه تنطوني أبني وأخذه واروح ويا دار ما دخلچ شر تگولون لا القانون موجود وأفتح القضيه القديمة والقضيه الجديده وعليه وعلى أعدائي 

جولان / لا وليدي ماكو داعي إبنك آلك وأنت أحق بي من عدنه آخذه والله ومحمد وعلي وياك 

الق/ هنا صدگ تخبلت شنو سداد ياخذ ابني گمت اعيط بعلو صوتي وأتوسل بجدو وگتله/ ليش جدو ياخذ ابني ليش ياخذه واني ما گلت دى اخذ روح ألق من يروح أبنها منها 

وزاد خبالي من شفت سداد گام وگف وأبني بحضنه ويريد يطلع من الصاله گبل صرت گدامه واريد أسحب منه أيليا واحاچي سداد واگله عوفه لا تاخذه والله يرضع من صدري والله ما اگدر بدونه والله أموت اخذ روحي ولا تاخذه مني 

وسداد مخلي أيده بظهر أيليا ويبعد بي عني وآني لازمه ايد ابني وابوس بيها بس سداد ما اهتم لكل توسلاتي وأخذ ابني وطلع بحيث روحي فرفحت صرت ما اعرف شنو أسوي وطلع سداد بأبني وهو مفرفح بچي ويهادد يريد يجي عليه 

 وشفته ومن فتح باب السياره وصعد سداد ومخلي أبني بحضنه وحرك السياره وآني ركضت وره السياره تمشي السياره وآني اركض وراها بحيث طلعت الفرع واني وراها واكو سياره اجتي صارت عرض گدام سيارة سداد 

ونزل منها ولد شاب وهذا الولد عباله سداد خطف ابني ودگ الجامه على سداد وهو نزل الجامه وحچى ويا الولد انه يرجع الطفل إلي 

سداد/ هذا ابني واخذته ما خاطفه من أمه حتى ارجعه ويا ريت تبعد سيارتك أريد أروح أريد اطلع لأربيل والطريق طويل 

ألق/ وجدو صاح بالولد إلي دى يحچي ويه سداد وگله/ ابويه أبعد سيارتك عن الدرب الرجال اخذ ابنه ما خاطفه روح بويه درب السلامة 

ورجع عليه ويگلي يله بوجهچ للبيت وصوت ما أسمع الچ 

وآني رجعت للبيت بس شنو ادگ على وجهي والناس كلها تباوع عليه ودخلت للبيت وگعدت يم بيبي وادگ على وجهي واگول لبيبي / ولچ بيبي الحگي عليه جدو انطى ابني لسداد ولچ بيبي نار وشابه بصدري اخذوا أبني مني 

وبعدني اعيط وابچي واولول دخل جدو عاط بيه 

جولان / بس والج عين على المصايب إلي مسويتها تحچين ولچ أنتي لو أكو رجال حوگ يذبحچ إنتي متعوده على عمچ الگواد يگود عليچ وجيبين فلوس اله 

ورب العزه اذا فكيتي حلگچ الا الخمچ على حلگچ وأكسر سنونچ بحلگچ 

وعافنه وطلع جدو وأني أحس روحي تنازع وصلنه لساعة 10 بالليل وآني چنت مدده على الكاشي ودموعي أبد ما وگفن وبيبي تتوسل بيه وتگلي / ولچ بعد حبوبتچ گومي وگولي يا الله وخلي عينچ بعينه وهو يدبر امرچ  

بس منو اله نفس وما حسيت غير آيد صارت عليه وصوت اعرفه گلي / ألق الله يكون بعونچ بس والله ما چان قصدي 

گمت على گعدت وچانت رغد وسألتها/ ليش انتي شنو دخلچ بالموضوع 

وحچتلي الموضوع كله ظليت صافنه معقوله إلي صار وسألتها / بس گليلي إنتي عندچ رب ودين شلون تنشرين فديوات لأبني على مواقع التواصل بدون علمي بس گليلي منو سمحلچ غير بالبدايه تساليني شوفيني أوافق لا ما اگول غير حسبي الله ونعم الوكيل بيچ ان شاء هاي نار گلبي صير بيچ ليش هيچ سويتي بيه 

وشگد ظلت رغد تتعذر مني بس آني خلاص طردتها وبقيت ذاك الليل الوب أنوب صخنت وصدري تنگ حتى گام يدر حليب وصلت للفجر بعد خلاص چان هذا حدي غفيت وبين النايمه وبين الگاعده أسمع بيبي تگول لجدو خطيه الليل كله تلوب عبالك جاي تطلگ يا رجال شلون تنطي أبنها لأبو 

جولان/ ربيعه آني سويت الصح هسه هي بعدها محروگ گلبها وما فاهمة شي بس بعدين راح تفهم إنه ألي سويته لمصلحتها وأبنها ما راح عند أحد غريب حتى هيچ خايفه عليه هو عند أبو  

ألق/ گمت على حيلي وگتله جدو شنو مصلحتي تأخذ ابني مني وتنطي لسداد وتحرمني منه 

جولان / أنتي غبيه وكل شي ما فاهمه تردين تاخذين الأمور بعنتكه بنيتي كل ممنوع مرغوب وسداد اذا تحرمي من ابنه هو راح يعاند وين راح يروح اكيد يلجأ للمحاكم وساعتها راح يگدر ياخذه منچ لان يگدر يسجنچ وياخذه ساعتها إجباري بعد لا شوفين ابنچ ولا يشوفچ وهو ساكن في اربيل بعد كل شي ما تحصلين 

بس من ننطي أبنه وبرضاتنه نگدر نمون عليه ونگله جيبه خلي أمه أشوفه وماكو واحد يعرف شنو يصير باچر أحتمال يرجعه عليچ او ما عنده أحد يعتني بي كل شي متوقع ودائمًا اذكري انه الكلمه الحلوه طلع الحيه من الزاغور اما الصياح والعناد ما يجيب نتيجه 

الق/ وما أعرف نوعًا ما شويه هدأت نفسيتي بيني وبين نفسي مره اگول كلام جدو صحيح ومره اگول غلط من انطى أبني وعلى هذا المنوال ظليت واني عندي الاطفال الي يجيبوهم عندي بدوا يجون وچان لازم أدوس على نفسي واگوم اشوف شغلي واني الاطفال إلي يمي من الاحتياجات الخاصة يعني أغسل وأبدل واوكل لما يجون أهلهم عليهم وبعدين اذكرت موبايلي گمت طلعته لگيته طافي 

خليته على الشحن وبس فتح دگ عليه سردار ومن رديت عليه سألني أني وين وليش الموبايل چان مغلق 

وأني ما بيه حيل أشرح اله وهو حس عليه انه نفسيتي زفت لهذا استأذنت منه وغلقت الخط ويا وبسرعه خطر على بالي جيهان شلون چانت غايبه عن ذهني وأتصلت بيها ومن سألتها على سداد وصل لو لا 

جيهان/ بس گليلي ولچ منين عرف 

ألق/ وحچيت كل شي الصار الرغد وعن طريقها عرف تخبلت وتگلي من صخم وجهه وگال إلها نشري 

وترجيتها بس يجي سداد آنه تفتح كاميرا حتى أشوف أبني وهي ظلت تسولف على سداد شلون متصل بيها من عارف إنه مساعدتيني وانتهى الإتصال بينه 

وبوقتها إني فكرت أريد حل شلون أبني بعيد عني وبوقتها دگ الموبايل شفته چان 

سردار / شوفي ألق آني أعرف الوقت مو ملائم بس لازم نفكر بهدوء وحياتنه ما تتوقف على احد ويجي يوم وابنچ يرجع لحضنچ بس أني أريد احچي وياچ بخصوص ابوچ اني الفلم مالت المدير ما صدگته 

شنو رأيچ نحچي الموضوع كله لضابط فرقد وهو بعد راح يحقق بالموضوع لأن احنه شخصيًا ما نگدر نشتكي لأن خاف تطلع تهمه باطله وساعتها مدير المستشفى يصير شريف براسنه 

الق/ صحيح هذا أحسن حل يعني تكون الشكوى ما متوجه إله رسميًا هو الضابط راح يتحرك من يمه عادي بلغ الضابط بس سردار عني طلب يمك 

سردار/ تفضلي عيوني الچ 

الق/ عفيه سردار أريد رقم سداد 

بوقتها من حچى سردار حسيته ضاج كلش 

سردار/ ماكو داعي شسوين برقمه أبقي بعيده عن سداد 

الق/ بس اني هواي ضجت من رد سردار وگبل غلقت الخط بوجهه سردار وأخيرها اتصلت على جيهان واخذت رقم سداد منها وقررت اتوسل بي عسى يرجعلي أبني ودخلت الرقم وسجلته وكل شويه متردده إتصل بي لو لا أدخل على الرقم وأرجع اطلع وما أتصل بعدها من لوبت گلبي إتصلت ودگ هواي وقرب ينفصل من رد عليه سداد 

الق/ مرحبًا 

سداد/ آهلًا وسهلا تفضلي منو حضرتچ 

الق/ سداد آني ألق احلفك بالله تسمعني 

الفصل الرابع والثلاثون من هنا