رواية دخيله الشيخ زين العابدين الفصل الخامس والخمسون بقلم أوتار حزينه
هيله
عكبت ليوره بسرعه من طخيت زلمه
كلت بخجل وانا منزله راسي
ااسفه ماشفتك
مااصار شي يابه
الصوت جن سامعته رفعت عيوني صارت بعيون تتفرس بملامحي نزلت راسي من عرفتو شيخ معتز الي سأل
انتي هيله بنت العرب موو
مارديت عم توفيق رد
اي اسمها هيله تعرفها شيخ
ااي اعرفها
من رخصتك ياشيخ
سريت اختي ورايه
صاح
اكفي يبنت العرب
وكفت درت روحي علي گرب سأل وهو متفاجأ بشوفتي
شنو انتي تشتغلين هينه
مارديت عم توفيق رد
اي شيخ هي واختها يشتغلون هنا
صفن عليه ورد
شلون وانتي حرمة الزين
تطلگت منو وتزوجت
ترخصت وسريت انا واختي وكفنا بره ننتظر حازم ريمه كالت بخوف
هيله شيخ معتز شافنا وعرفنا شلون اذا راح وگالو للزين حنا نشتغل هينه
واذا گلو شريد يصير يعني
سكتت من اجه حازم كال
يله خلي نروح
صعدنا ويا بسيارته شافنا ساكتات سأل
خير بيجن شي
ريمه كالت
شافنا شيخ معتز
دحك لنا بالمرايه وعكد حواجبو سأل
منو هذا
الي جان وي عم توفيق
قصدج الشيخ الي اشتره المعمل
ريمه دحكت لي بخوف
كلت
هو اشتراه
اي هو اشتراه للمعمل واجه يشوفه شنو عرف يعرفكم
اي يعرفنا ويعرف الزين
ريمه ردت
سكت وبعدين كال
هاي مو خوش سالفه خاف يروح يگوله انتن تشتغلن هنا
واذا گاله ياخويه هو طلگ وبالمعمل كلها تعرفني
متزوجه
سكت كملت بقهر وانا ادحگ للجامه
حنا هجينا من الديره وانت شفت حالنا ياخويه شلون جان وهو لو يريد يدور ورايه جان اجه ودور جان گال هذني نسوان ماعدهن احد شلون طلعن ووين راحن
ريمه گالت بخنكه
اي والله محد دور ورانا
جن صرنا عار والكل
تنگس منا
عيوني غوركت وكلت
الزين حتى لو سمع بيه وگالو شيخ معتز ماراح يهتم لان انتقم مني وبرد گلبو لجن ظل انتقامو من شهم الي اعرفو لحد
هاللحظه هو يدور عليه ويريد بس يگضبو
ااي ولج همزين عنده هويه بغير اسم جان لزمه من زمان وسكنه الگبور
هو السبب بالصار بينا هو سبب خراب بيت اختي وموتة ابويه وعم شعلان
لو موو معگب وظال ما يذكر جان هذا كلو ماصار
سكتت من تكلمت
ريمه بقهر
حازم كمل
اي خربها وانهزم بروحه هو واهله ومحد وگع بيها غير خالي الله يرحمه وانتو
غمضت عيوني دمعتي حدرت رددت
حسبي الله على كل واحد ظلمني حسبي الله ونعم الوكيل على كل واحد
حجه بشرفي وطعن بينا
امين تطلع ام يمان حوبتج وبأذن الله عن قريب
اريدها تطلع ياخويه ويبرد گلبي بكل واحد ظلمني وتهمني ظلم
ربج يمهل ولايهمل وداعتج هسه يجي يوم وينكشف كل الصار
بيت عمتي عرفو بكلشي صار بينا وماصدكو تطلع العيبه مني گالو نعرف ترباة خالي ونعرف انتن منو
حازم التهى يتكلم مع زينه بجهازو درت وجهي ادحك من الجامه على الشوارع صافنه على هالصدفه گلت
صدگ من گال
جبل مع جبل مايلتقي
لجن بشر مع بشر يلتقون
ظليت اهوجس بالشر من الصار وافكر به وصلنا لشارعنا عصر ومغيمه جن تريد تمطر نزلنا وهو راح لدارهم
ريمه گالت
هيله گلتي ذكريني بالحليب والحفاظات
اي امشي خلي ناخذهن ووياهن ريوگ باجر جمعه شدگولين ناخذ كاهي لأمي وللبنوات
اي صارلهن جثير مو ما ماكلاته
سرينا بالسوگ
وي الايام الاوادم الي تشتغل بي عرفتنا بنات المله من جوارينه وجانو يسمونه المستورات من وره لبسنا لان نلبس زي اسلامي شفتو يم محل
وعجبني جثير اخذت لي ولريمه ولهاله كلت من تكبر ساريه وريهام اخذ لهن
وكفنا يم فرن بس شافنا عم عزيز هلا بينا
هلا يابه هلا بنات المله
الله يساعدك عم
هلا بنتي كل الهلا شتريدن صمون
لا عم اريد كاهي بألفين
ادللي يابه
شكلو جان يشبه ابويه
وجلمه يابه تخليني احن له جثير
هاج بنتي ماتريدين گيمر
دحگت لريمه هزت راسها بأي گال
انطيني بخمسه
تأمرين امر
مايأمر عليك ظالم عم
والله يرزقك من حلاله الطيب
الله من تدعين اليه كل الخير اشوفه
لمحت عامل يدحگ لي
نزلت راسي اخذت الحاجات وسريت للاسواق اخذنا بيض ودبس وحاجات
يمان وطلعنا
عگبنا لدارنا سمعنا هوسه بيت خاله ام مروان
اسمعي خطيه اكيد هذا مروان گاعد يجتل مرتو
مثل كل يوم
الله يهدي ويصلح من حالو
امين
فتحت الباب بمفتاح ودشيت انا واختي امي مثل كل يوم تلگتنا سلمت
الله يساعدج يمه
هلا يمه كل الهلا
كعدت صافنه وريمه حدي امي انتبهت لنا وسألت
شبيجن يمه صاير شي
اختي دحگت لي وگالت
اليوم شفنا شيخ معتز
امي فزت وصاحت
عززه وين شفتو هذا
بالمعمل الي نشتغل بي يريد يشتريه واجه تايشوفو سأل هيله من شافها انتي شجابج هينه مو تزوجتي الزين
اي وشگلتي له
كلت تطلگت وتزوجت غيرو
امي صفنت علينا والخوف بوجهها طمنتها
يمه اطمني انا هناك بالمعمل متزوجه وعندي
ولد وهو تره مبين مايعرف الصار بالديره جن جان مسافر وعگب
مدري يمه گلبي نغزني خايفه يگلو للزين ويجي يدور وراج
هيله خل نترك الشغل عندو ونشوف بغير مجان شدگولين
صفنت للبعيد وين نروح تعلمنا على المچان وارتاحينا بي وامنا على روحنا لان ابن عمتي معنا يشتغل ويودينا ويجيبنا معه
هيله بعد لاتروحن اگعدن واسكتن
امي تكلمت بخوف
رديت
يمه ماعلينا شي هو لو راد يدور ورايه جان من زمان اجه لدار عمتي وسأل عني لجن هو ماسواها باع برخص وصدك حمد الردي
ياهيله خايفه منو انتي تعرفين هو شصار وشيگدر يسوي لنا
امي رددت بخوف وگامت تبجي
صفنت عليها بقهر
كملت
خايفه لايعرف بج انتي مو متزوجه ويمان ابنو ويجي ياخذو منج بالقوه مثل مااخذ شعلان
گلبي نغزني وعيوني غوركت
دحگت لابني يلعب مع ساريه ذبيت حسره گلت
شلون نبطل وايجار الدار شلون ندفعو
جثير مصاريف يمه ولازم ندفعها كل شهر اذا كعدنا
شراح يصير بينا نتبهذل والله
الله يدبرها منا راتب الرعايه ومنا اخيط واجمع ايجار الدار
اي يمه والعيشه شلون شناكل وشنشرب
سكتت ادحك لخواتي بقهر
كملت
اسمعيني يمه راح اظل بالمعمل واذا الشيخ معتز اجه بعد وظل يتسأل بيه ادير وجهي واعوف الشغل
مدري يمه مدري هذا منين طلع النه وشجابو لهالمعمل حظج وحظنا معج خلاه يجي ويشوفج
ماكو شي حجيه لاتخافين ارجع اكلج لو يريد يدور ورايه جان دور
زين باعني برخص يمه واخذ انتقامه مني وبرد گلبو
كامت تبجي تذكرت
اي ماانساها ابدا شلون راد يذبحج من وره حمد الردي
ولا انا انسى شلون فرعني جدام ربعو وگص گصيبتي
رديت بغصه
دحكت لساريه دمعتها بعيونها تذكرت من جابتها لي وهي حاظنتها وتبجي بشهكه
🌿🌿🌿🌿🌿
صعب
تأخرت بخطوبتي لهاجر من وره رفض زين لي گلت خاف هم اتقدم ويرفضني وذيج الساع من صدك اموت من قهري وهم جان
عمي الشيخ متوفي وما يرهم اتكلم بهالشي
استقريت باربيل وگضبت شغل المكتب تبعي انا وعبدالعزيز وابتعدت عنها
وعن الديره وحمد النذل
لجن ظليت احس بالذنب من وره الصار والي عرفتو عن حمد ،،،،،
اريد اتكلم وافضحو جدام عبدالعزيز واعگب خفت لاتصير جبيره وتندار عليه واخسر هاجر للابد
بيوم انا هناك عبدالعزيز خابرني وكال انا بره تعال اخذ صوغة خيتك الهنوف
طلعت له ثكلت بالمشي من لمحت هاجر ادحك لي وصافنه گلبي كام يدك بجنون
الهنوف معها سلمت من بعيد
رفعت ايدي بالسلام
هو نزل وكال الله حيو
حي الله اصلك يبو زين
ههه مفاجأه موو
اي بس والله حلوه
هااك اختك تنغصت لك بااكلها الطيب
تعيش وتسوي
عيوني صارت بعيونها نزلت راسها انتبهت عبدالعزيز دحك لها وبعدين عليه
كلت بسرعه
تعگب لهينه موو
اي
رد مبتسم
عندي كلام معك رايدك تگف وياي يبو زين
اعرف وش تريد وتدلل وتبشر تاخذها من هالشارب
گلبي فز بفرح كمل
اروح هساع اوصلهم لدارنا وبعدين اعگب تانسولف بهالشي
تمام تمام انتظرك
ابتسم وراح
عبد العزيز اجه وخبرتو انا بعد ماعندي صبر واريد هاجر بلكي يتكلم مع الزين
لان انا اخاف يرفضني مره ثانيه
عوفها عليه ماعليك انت هاجر لك
السالفه صارت يم ام زين
وهي تبتلش باخوها وتعرف شلون تخليه يوافق
ياارب يوافق
عش ماايوافق انت مو ناقصك شي والجنت به بطلتو من زمان
اي عز الله تركت كلشي وحالي تبدل عن الاول
اي كلكم جريتو عدل الا حمد ظل نفس حالو
عكدت حواجبي ومارديت
زمال حشى السامع صاير مدمن ويگربع بدون وعي بس لايصير به شي
ماايصير بي شي عار مايموت
دحك لي وگال
عبالك خربانه بينكم
خربت من وره افعالو الرديه
خير يول شصاير
ماكو شي
ماردت اتكلم هساع ردت اخذ هاجر وافضحو لهالردي
وهذا الصار خطبت هاجر والزين قبل لجن ماراد
اسوي اي عرس بالديره كال اخذها لاربيل وهناك شتريد
تسوي سوي
انا بالمكتب باربيل اريد افض جم شغله قبل زواجي سمعت صوت
گوه الله عزمك ياصعب
رفعت راسي وعكدت حواجبي من شفت حمد دحكت لولد وياي وكلت
له
تكدر تروح انا اقفل
تمام
الولد راح سريت له من كعد وورث جگاره كلت
خير شرايد
ههه مبروك ولك
سكتت كمل
والله وسويتها واخذت بنت العمه
شتريد حمد
ااريدك سالم يول وبخير
ما اانا بخير عگب ما شفتك وسمعت صوتك
ههههه يابه شكثر حاقد عليه
مو بكثر حقدك على زين
كام لحيلو وگرب مني اخذ نفس من الجگاره وزتها بوجهي درتو منو گال
ااسمع يول مادام ذكرتو خلي اگولك شي خاف عبالك من اخذت حبيبه الگلب وصارت لك امنت وگلت اي هساع اتكلم وافضح المضموم لاااا
اصحى صعب
زين من راح يعرف اول واحد راح يتأذه انت
ضحكت باستهزاء ورديت
عش اتأذه انا جايبلو الشي الي يبري حرمتو من التهمه الي ذبيتها براسها
ههه بعديش ياخويه بعد سنتين ونص
عكدت حواجبي كمل باستهزاء
راح يكلك عش سكتت سنتين ونص وراح ادگوله هددتك وخوفتك مووو
سكتت كمل بضحك
الخراب مو بس راح يجيني اني انت هم ولك بس يعرف الزين بألي مضموم بصدرك
راح ينتقم مو بس مني
لاااا يول انت هم راح يلوحك هالخراب وياي هاجر ياخذها منك وبعد ماتشوف خلقتها للابد
گضبت قميصو وعتيتو بقوه صرخت به باعصاب
اانت شنووو ولك عش كاااعد تسوي هيج هووو بيش اذاك
انا شنو سويت لك حتى
تعمل بيه هالعمايل
دفعني ادحگ له بغضب عدل هدومه ورد بروده
اي چلمه تطلع منك له عقابها چبير ومو بس انا الي راح اتأذه لاااا
صعب انت هم
فكر بروحك وعوفك منو حياتو مشت عش ننبش الماضي ونظل واحد خسران اللخ
صفنت عليه غادي نار
رديت بصوت مكتوم
ليييش انت بعد السويتو تريدني اظل صاحب لك
ههه واذا ماظليت مايهمني ياصعب اذا رحت او ظليت انا رفيجي كاسي ومزاجي من انت اصلا جنت اجامل الزين بيك واكول يتيم وما عندو احد خله معنا نضحك علي ونتوس بسوالفو
ااانجب طااايح الحظ
صحت به وهديت
تلازم معي واحد ضرب اللخ
عبدالعزيز دش شافنا اجه بسرعه دفعنا وصاح وهو صاير حاجوز بينا
وش بلااكم متهاوشين
ردت اصرخ وافضحو ما كدرت خفت اخسر هاجر واخسر الزين بس اتكلم واگول الي اعرفو رد علي وهو يمسح الدم من حلگو
ماكو شي
شنوو ولك دشيت عليكم واحد ذابح اللخ
گولو وش بلاكم صاير شي تكلمو
مااكو شييي
صرخت به
حمد دحك لي ابتسم
صحت به
ااااطلع ولي من هينه
طاالع لاتصيح
رد بروده وطلع من يمنا
جلست انهد من غضبي
عبدالعزيز سأل
ياصعب وش بلاك معه صاير شي
ماكو شي
جلس حدي سأل
ولك شنو مااكو شي وانا
دشيت عليكم ولگيتكم واحد ذابح اللخ
مارديت وتمالكت نفسي گوه ماردت اگوم اكسر المكتب من وره قهري
وغضبي
يول تكلم صاير شي بينكم انا احس اكو شي جايد وانت ضامو بگلبك
دحكت له يتفرس بملامحي بتركيز ردت اتكلم اطلع الي اعرفو لجن لساني انكضب
خفت اكع من عيونو لو يسوي شي يخليني اخسر
هاجر للابد
بلعت سالفتو الرديه وگتلو
لح عليه اجي معه لسهره وانا رفضت
سمعني كلام مو حلو وسكتت له
لجن من سب ابويه وداس بطني تعاركت معه
اكيد يول هذا الصار
اي يبو زين واظن به جايني شارب
هذا شبي تخبل شنو غصب يريدك تعگب لدربو الاسود
كام جاب كلينس وانطاه لي كمل بضوجه
تميم گال
حمد صاير فد مره والمشروب مايگع من حلگو لا ليل ولا نهار
سكتت امسح الدم من خشمي كمل
ااستغفر الله الله يهدي ويصلح من شأنه والله اهله متخبلين من وراه وابوه
حالو حال
بگلبي دعيت عليه بالفجعه مثل مافجع زين وهجم بيتو دعيت ربي يفضحو بين العربان مثل مافضح بنت العرب المستوره
وره جم يوم تزوجت هاجر والجنت اريد اسوي كعدت وسكتت عنه لان ماجان عندي استعداد اخسرها
خذيتها بعد تعب وصبر طويل وفرحتي ماجنت اريدها تروح من ايدي لجن ظليت اشعر بالذنب كلما
اشوف شعلان ولد الزين شلون انحرم من امه وظل على ايد جدته وويا ابوه
رفيجي وصاحبي الي هد الديره وسكن الجوله راخص روحو جن يريد الموت حتى يخلص من
الصار به
🌿🌿🌿🌿🌿
زين العابدين
بعد زواج هاجر البيت فرغ على امي وظلت وحدها هي وجدتي وشعلان الي ظل يدور وره اختي وتنحس فد مره من غيابها
جالس يم الحجيه بليل ادحك لأبني شلع گلبها يله غفى ونام على رجلها گالت
شوفه مايقبل ينام بغرفه هاجر من تزوجت ولحد هساع هو هذا حالو لازك
بيه وبس يبجي
متعلق بها يمه
اي اعرف بس يايمه الى متى تظل انت ويا على ايدي وايد الهنوف وهاجر
سكتت كملت بتوسل
تزوج يمه خذ حرمه تلمك انت وولدك
ورثت جگاره اخذت نفس
زتيتو كالت
يمه انسى خلها تولي والله طلعت فد وحده غداره وماغزر بها الزين مالتنا
رديت جاز على سنوني
يمه رحمه لاهلج لاتجبين سيرتها جدامي
صفنت عليه بقهر كملت وره لحظه
الله يرضى عليك اذا تحبني وتعزني ازوج خذ مروة بنت خالك خطيه ترملت وهي
بعدها صغيره خذها يازين تراها من زمان تحبك
وتودك وانا هم يايمه اريد وحده معي شوف حالي جاي اتعب مع ولدك ومنا الحجيه هم لازم وي المره التجي اشيل واحط
بنت خالي زلمتها استشهد بمعركه قبل سنه عگبت لدار اهلها ماعدها شي منو
جانت تجي مع رهيفه من
تسمع بيه اجي اشوف منها نظرات واهتمام لجن انا
جنت بغير وادي بالي كلو يم شهم الي عجزت الگاه
تسمعني يمه
دحكت لها كلت
حجيه شتريدين
اخطبها لك گول اي يمه وفرح گلبي
طفيت الجكاره وگلت بدون اهتمام
براحتج يمه اخطبيها لجن مو هساع الزواج الما افض الي بيه
ردت بسرعه وهي فرحانه
براحتك يمه شوكت ماردت تعرس عرس
گمت شلت ابني واخذتوو للغرفه الجوه خليتو على الجربايه تمددت يمو وتغطينا ادحك له وصافن يشبه ابويه جثير جن حبايه ومفشوگه نصين الشعر الملامح السمار كلو طالع له غمضت عيوني من اجت بالي تضحك وادگول
يارب يمان يطلع يشبهك
ونيت لان عرفت ابني راح من وره الصار كعدت مخنوك سندت روحي على المكتبه صافن والقهر بگلبي مايعرفو غير ربي
كل فتره اصفن مع روحي وافكر بالصار اسأل نفسي ابويه وش وداه لهناك مع حمد عش راح بدون حمايه وهو يعرف الوضع وشصار بذاك اليوم
الف مره سألتو لحمد يگولي مدري اجه عليه وگالو اسري معي تاشوف هيله واتكلم معها راحو وساريه گالت له من سأل
عليها هي مع شهم بالبستان
وجه ابويه انطعن حسب كلام حمد راح لها وهو معه ووكفو من سمعوه يتكلم ويبوح بحبه وهي تسمع وماتردو اخر شي گالت له
انا تندمت قبلت بالزين لان طلع واحد خاين وغدار لو اعرفك تعگب جان ظليت انتظرك ومااخذه لهذا ابو العرك والنسوان
حمد حلف گالت هالكلام وابويه من سمع تخبل وهد عليهم تعارك معها ومع شهم
هي دفعتو منو وماايشوف غير ذاك يغدر ابويه ويجتلو
گضبت راسي اهزو برفض اردد
اعرف ترباتج يولي ولج ااعرف من انتي لجن شفتج من فرحتي به وبجيتي
جدامي من فرحتج به
شفتج وسمعتج ادكولين هزمتو حتى ماتجتلو اذا هو بريء عش هزمتيه وعش رحتي له بليل لو ما بينكم
شي
كمت افتر مثل الطير المذبوح يمر بذهني هي اخلاقها ترباتها ثگلها ويمر
بذهني السوتو روحتها له
وجتلة ابويه وشهم الي هزمتو كلها تمر وخلتني اكعد مهدود الحيل
حمد يكول شي وهي ادگول شي اخر والي شفتو منها اكد عليها هالتهمه جانت معه بالبستان وماخلتني اخذ ثار ابويه منو
تحلف مو هو
وحمد يحلف ،،،
ابن خالتي عش يجذب شنو مصلحتو بهالشي هذا خويه ومن الصغر معي اعرفو كلش زين مستحيل يجذب
عليه بهالشي والي انجتل شيخه وزلمة خالته وابويه
يعني من سابع المستحيلات يضيع دمو ويجذب بهالشي الجبير
روحي اختنگت اخذت السويج وطلعت من الدار
فزاع والحرس لحكوني صعدت ورحت للمقبره
هم معي وره مشوار وصلت لگبر ابويه نزلت
وگلت
خلوني وحدي معه
انتشرو حواليه بمسافه جلست يمه وگلت بصوت مخنوك
شلونك يابه وشلون حالك جوه التراب
حبيت اسمو وسندت راسي على الحجر ونيت بقهر وعيوني مغوركه
ياگبر طمني على الغالي عسى ضيفك
بخير امانه گلو يجيني
زاير بمنامي
سكتت اكهد بصوت مخنوك
كملت بغصه
اشتاگيت لك يابه،،،،
اريد اشوفك واشم ريحتك
شلت تراب الگبر حبيتو وگلت
انيالك ياتراب الگاع
حاظنو للغالي
رددت بدموع
ياابه تعبان وحالي حال گطعت بيه يالعز يالسند ياعضيدي ورفعة راسي كسرت ظهري يابه وخليتني يتيم من عگبك
وخرت منو ورحت لعم حميد حبيت ترابه وخليت خدي عليه وگلت
ياعم غدرتني بنتك هي
وابن اخوك ودعيت عليها لجن مااجنت اريدك انت تموت وحگ الله ماجنت اريدك انت تروح لجن رحت
ولحكت الغالي وخليتو
بگلبي ناار مشتعله
يااشيخ اذكر الله
فزاع گضب جتفي
گلت
ااخ يااخويه مذبوح والذباح
حرمه
🌿🌿🌿🌿🌿
هيله
ايام مرت وعرفت الشيخ معتز اشتره المعمل وصار له بعد ماشفنا سلمو لعم توفيق وهو استلم الشغل بيه مثل الاول
واكفين ريمه حدي نشتغل استبرق اجت وگفت يمنا سألت
اكلج صدك هذا الي اشتره المعمل يعرفج
عكدت حواجبي دحكت لها سألت
منو كلج
سمعت عم توفيق يحجي
وي حازم ويسأله منين تعرفه هيله
سكتت دغتني وكالت بنغزه
يعني صدك طلع يعرفج
رديت بغضب
وانتي شخصج بيه ان جان يعرفني او لاا
هااي شبيج تحجين بعصبيه هو سؤال شدعواج گولي اي او لا
مارديت ريمه كالت لها
سوي درب تانفوت
تفوتي عيني محد لازمج
وخرت ريمه دفعت العربانه وودتها يم التعبئه
استبرق گربت مني وسألت
يگولون حلو وشيخ صدك بله
ااستبرق روحي لشغلج
اگولج تره انتي موالمسؤوله عليه فلا تظلين كل ساعه روحي وما روحي
ذبيت الي بايدي وكلت بهدوء
انتي شتريدين
منج شااريد ياحظي ليش انتي شعندج حتى تنطيني
عندي اخلاقي وستري وشرفي تريدين شويه منهن
شتقصدين وولج يعني ااني بلا شرف وماعندي ااخلاق
والله ماادري اذا تحسين هيج انطيج شويه منهن
اانجبي ااادبسز سااقطه ااني ااشرف منج ومن الجاوبوج
تكلمت هالكلام ومااشوفها غير تعتني من الحجاب
ريمه اجت بسرعه وگضبتها من عطوبها تصرخ
عووفي ااختي ولج
عتتها من عندي وذيج العرمه كفختها براجدي
اختي تخبلت تلازمت هي وياها
صارت هوسه يمنا والتمو علينا العمال والبنات وگوه جروها من عدنا ،،،
وخرت تعد وتفشر علينا فشار مو صاير
حازم اجه هو وعم توفيق سمعوها تجسر وتفشر صرخ بها
اانجبي ولج عليمن كاعد تفشرين على بنات خالي وهن اشرف من الشرف
ردت على حازم بصياح
اانجب انت ولك ابووو النسوان لاتخليني ااطلع المضموم وافضحك بنص المعمل
اذاا اني ابو نسوان انتي شنو لعد ام الزلم
تخبلت وجسرت على حازم الي رد
شاريد اسوي الج امد ايدي ويگولون مدها على وحده مره
ااطلعي بره ولج انتي مفصوله وبعد لاتجين لهنا مااعرف شلون خليتج طول هاي الفتره واني اعرفج انتي شنو
عم توفيق انهد بيها وجسرت عليه
ماا بقى عليه غير انت يالشايب تطعن بشرفي بس والله راح اطلع وشوفو شراح اسوي بيكم كلكم وخصوصا انتن امهات الشرف
دوولي شتريدين تسوين سووي على اساس هزيتي شعره من راسنا
حازم رد عليها
راحت للاستراحه اخذت
الجنطه وطلعت تجسر علينا وعلى جم وحده وواحد وكفو ويانا ضدها
ولج هاااي شنو غير طلعت فد وحده ماتستحي
تكلمت حنان تشتغل بالخط مالتنا
عم توفيق انهد
قرااج ومو متربيه ابد خلي تولي انعل ابو اليرجعها بعد
كل هاي الهوسه وانا گاضبه ريمه الي تهد عليها واخزر بيها لا تروح تفرعها بنص
الزلم وانا وياها
يله كل واحد على شغله
عم توفيق صاح
ووج اخ لو بس عايفتني عليها الا اكلها بسنوني
اسكتي وكملي الشغل شتريدين اعوفج ترحين تعاركيها وتفرعج بنص الزلم
مااشفتيها شسوت وج جسرت وفشرت علينا
خليت الكلينس بالكيس وهي خلت المجموعه مالتها گلت
حنا نعرف نفسنا ونعرفها هي شنو والي نعرفو عنها هي الي خلاها تصرف هالتصرف
ماافتهمت
ابتسمت لريمه وكملت
يعني شجاب الثرى للثريا حنا بنات المله شريفات ومستورات والكل يحمد بينا وباخلاقنا وهي كاعده تشوف وتسمع هالكلام
خلينا الاكياس بالعربانه وكملت
يعني ياريمه حنا قاهريها ودايسات بطنها والسوتو هو تفريغ حقد بس
اي والله بس اندار عليها حقدها وانطردت من الشغل
اي شرها اندار عليها واكلت جزاتها
اي وحيل بها
ابتسمت اختي مزنبره وغاديه دم گلت
يولي وين گوايتج هاي من گضبج الداعشي
سكتت وصفنت علي
وجهها انطعن بعد اكثر نزلت راسها صفنت عليها رحت ليمها گلت بقلق
بيج شي يولي
لااا مابي شي يله خلي نفض الشغل تانرجع من وكت
كملنا شغل وعگبنا لدارنا دشيت للمطبخ سريت للهول وگفت يم بابه من
سمعت امي تتكلم
يعني الزين هساع خطب وگطع مهر
جمدت بمچاني من سمعت هالكلام وجن خنجر حار زرف گلبي
ريمه شهگت وخلت ايدها على حلگها امي اندارت شافتنا انهذلت گالت بسرعه
اروح خيه مدري منو جاني
سدت الخط اجت ادحگ
لي بقهر
وريمه معها تمالكت روحي گوة ودست على نفسي وخنگت صرخه رادت تطلع
روحي معها
امي ماتعرف وش ادگول ريمه سألت بخنگه
صدك السمعنا
ماردت عليها ادحگ لي بخوف وقلق گالت
يمه لاتقهرين روحج
غمضت وفتحت گلت بغصه
عگب الراح ماظل احد يقهرني يمه
سكتت سريت لحگتني هي وريمه ذبيت جنطتي على الميز ابني نايم على جربايتي
رحت له وگفت يمو
صفنت عليه
عمه هنيه گالت لج ،،
من اخذ يمه
سمعت ريمه تسأل
گالت لها
ااسكتي هساع
امي ظلت بس مع عمه هنيه تتصل لان المره ماگطعت بها لجن ماجانت تتكلم عن اي شي يخصني ولا تعرف اي شي عني غير بخير وعايشه
غطيت ابني وسألت
وين البنوات مالهن حس
اخذتهن هاله يجيبن فلافل حتى نسويها للعشه
يمه عش ادزيهن وحدهن مو تعرفين انا مااقبل يطلعن الا وياي انا لو انتي
جانن ضايجات وگتلهن روحن
ااستغفر الله ياربي دنيا صارت ليل يمه وهنه بعدهن بره
تكلمت هالكلام وطلعت من يمها سريت لبره مخنوگه والدمعه بعيوني اسري بسرعه ورجفه بجسمي صارت من وره القهر شفتهن جايات من
بعيد وحده گايده اللخ
وگفت وظليت انتظرهن يگربن
شافن ملامحي خافن وحده ظلت ادحگ للخ گلت
اامشن طبن واريد بعد من الله تطلعن وحدجن الا تشوفن مني شي ماايسرجن
بسرعه راحن للدار ودشن سريت اجر برجلي دخت گضبت الحايط عيوني غوشت وراسي ثگل گلت ضغطي صعد لان صارت
عندي اكثر من مرة
امي طلعت تمالكت نفسي سريت ادحگ لي بقهر دشيت سألت وهي صافنه بوجهي
يمه بيج شي وجهج غده نوميه
مابيه شي
رديت بغصه سريت للغرفه بدلت يمان گعد شافني صاحني وهو ياشر بايدو
ماما
رحت له شلتو دخت وراسي ثگل بعد اكثر گعدت به حسيت شي نزل من خشمي گضبتو دم شافو گال
اوه ماما
مابيه شي لاتخاف
اخذت كلينس ومسحتو ساريه دشت شافت وضعي اجت بسرعه اخذتو مني وگالت
راح اروح اصيح امي
لااا لادگولين لها مابي شي انگطع الدم
ظلت يمي ويمان يريد يجي عليه
گمت غسلت وعگبت اخذت ابني منها كعدت
يمه بالگاع يلعب هو وساريه
هوسه صارت بعقلي من وره السمعتو والذكريات
اخذتني غصب لذيج الايام الي جمعتنا سوه
بيوم هاجر رادت نطلع بسفره حنا باربيل گتلو واخذنا لبريه تخبل خضار
ومي يجري بنص سهل
وره الغده گال لي
تعالي اشوفج مجان يخبل
وين
امشي وانتي تعرفين
رحت معه للسياره سرينا مسافه عن الاهل ادحگ مچان يجنن ويخبل كلو
خضار وورد جان مابي احد صاير بنزله وادي نزلت مبهوره بي كلت
الله يخبل هالمجان يازين
موو
اي سريت بنص الزرع وگلت
يذكرني بديرتنا هم هيج ربيع وخضار يزهي
گضب ايدي درت روحي عليه مبتسم وصافن عليه ابتسمت له وگلت
خير يابرق الخير وش نوحك
نوحي انتي يبعد حي وميتي
گربني عليه گلت بسرعه والتفت منا ومنا
لايجي احد ويشوفنا
محد يجي لهينه مجان صاير ختله ومال عشاگ
ابتسمت له صفن بعيوني وگال
وحنا عشاگ والعاشگ طالب حگو
گرب وحبني من شفتي
غمضت عيوني مقهوره ومخنوكه اتذكر شگال لي
احبج يولي واحب شعرج من يتسلسل على جتفي ااحبج يبعد عيني ورمشاي وحبي لج ماينوصف
ااي يازين وطلع كلو جذب بجذب والشعر هان عليك تكشف سترو جدام الزلم وتگصو
🌿🌿🌿🌿🌿
زين العابدين
خطبت مروة وعقدت عليها لجن ماقبلت اخذها الا اخذ بثار ابويه
بيت خالي ماتكلمو بشي ولا اعترضو
شيخ معتز
من صارت الاحداث مال داعش اخذ اهلو وسافرو
لهناك سمع بأبويه انجتل وخابرني مناك اخذ من خاطري عگب من هدأت الاوضاع واستقر بغداد
اجه بزياره للديره سمع بيه عقدت واجه يبارك لي جالس حدي نتعلل ويمنا فزاع وعوض بارك لي وسألت عن احوالو رد
بخير ياشيخ كعدنا واستقرينا بغداد
الحمدلله والشكر الوضع ماهو مثل الاول
اي بفضل الله والحشد الشعبي وانتو ماقصرتو ربي يحفظكم ويرحم الراح منكم
امين يارب
سكت للحظه بعدين سأل
أسألك يبو شعلان وامون عليك بهالسؤال
اسأل شيخ
انت عش طلگت بنت العرب
عگدت حواجبي من سأل هالسؤال گلت ماعرف وش صار ولا وصلو خبرها گلت
قسمه ونصيب
سكت تكلم وره لحظه
اي قسمه ونصيب هي تزوجت وانت هم راح تزوج
رفعت راسي دحگت له سألت بصوت مخنوگ
من تزوجت...بنت العرب؟
وانت وش عرفك بهالعلوم
سكت وهو صافن عليه رد
البنت شفتها تشتغل بمعمل اشتريتو گبل فتره عرفتها وسألتها گالت تطلگت منك وتزوجت وعرفت هالشي صح وصاير عدها ولد
عيوني جمدت عليه وجسمي كلو گام يرجف
من الغضب تمالكت روحي گوة لهيت روحي بالسبحه
سأل
اظن كدرتك يبو شعلان
لا عش اتكدر ماخصني بها هي راحت لسبيل حالها وتزوجت وانا هم راح اتزوح بس اخذ ثار ابويه
من جتلو ماعرفتو
شهم ولد اخو مله حميد
سمع الاسم وتفاجأ صفن عليه مذهول جهازو دك دحگ له وگال
اترخص ياشيخ لازم امشي
كمت معه لباب المجلس سرى وراح ظليت واگف بمچاني عوض حدي گال
اظن جان ماايعرف وو
دحگت له بخزره سكت سريت من يمه سمعت فزاع گالو
يول عش تجفص مااتعرفه البله الي هو بي
رحت للبستان ردت اسري وحدي مااردت حد يشوف ملامح وجهي ولا يقره
البيه وكفت بنص البستان بنفس المچان الي گالت بي
قابله بيك
نزلت بالارض على رگبي صحت
من جريح گلبي
نداامه ولج ندااامه
ركضت وراج
وخليت گلبي يحبج
ندداامه هيله كل چلمه حب گلتها لج
اختنگت فتحت دكم الدشداشه اريد الهوه ماكو صحت
ياارب رحمتك يارب طفي ناري تراه راااح اموت
انهد حيلي سندت ايدي على الارض جسمي كلو يرجف وگلبي يوجعني وجن
خنجر حار ضربني بيه على غفله
اااخ يااابه ااااخ اااخ من الجاي احس به ولكم ااخ من الزتيت روحي به انا السبب لو عايفها جان مااصار الصار
سكتت انهد من الغضب گضبت الارض بقوه اضرب بها واصرخ
تزوجتي ولج تزوجتي وجن مو ذابحه ابويه ولا ابوج ولج بدلتي ثوب الحزن بفرح ولا جن ذابحتهم اثنينهم
بعملتج الرديه
🌿🌿🌿🌿🌿🌿
مالك
اني بالشركه الظهر جهازي دگ جان زين فتحت الخط وگلت
هلا بسباح گلبي وعرج العين
هلا ابو كيان
عگدت حواجبي من سمعت رد بصوت مخنوك سألت
خير يول بيك شي
انت وين
بالشركه
الك خلك اجيك ونطلع
اي تعال بس انت شنو بغداد
اي جايك هساع
تمام
سد الخط كملت الشغل الي بأيدي خابرت ليونه وگتلها ماراح اجي على الغده طالع وي زين وره مشوار خابرني وگال انزل اني جوة
نزلت جوه للشارع عگدت حواجبي من شفتو وحدو بالسياره ومحد معه من الحرس مشيت اله نزل واجه عليه وجهو مطعون ومدري شبي
اخذتو بالحظن وگتلو
خير يول وش بك
اصعد خل اروح معك لمچان
رد ومشى من يمي رحت صعدت ادحگ اله صافن مايتكلم سألت
شصاير بيك شي
تزوجت يامالك
عگدت حواجبي كمل
ولا جن ذبحت ابويه وابوها
عرفتها بنت العرب سألت
من گالك
الشيخ معتز
وهو شمدري هي تزوجت
شافها بالمعمل الي اشتراه
وهي شسوي بهالمعمل
تشتغل به
سكتت ادحگ له مقهور جثير والعيون غاديه دم كمل
اريد اروح اشوفها اسألها عش سوت هيج ليش باعتني برخص عگب السويتو لها
وين راايح اكعد واسكت انت گاعد ادگول تزوجت وانت هم راح تتزوج هاي بعد قسمتك ونصيبك
ااخ ولك مالك جان كلو جذب بجذب لا انا الاول ولا الاخر ولا بعدي احد ولا قبلي احد
كاافي يول لايصير بك
شي
صار ياخويه صار شوفني اتنفس وانا جثه ميت من جوه وحگ الله ميت
سكتت شلون اريد اواسيه شلون واني اعرف البي مو شويه
انتبهت رايحين لطريق مااعرفه گلت
وين رايح يول
مارد گضبت ايدو كملت
يازين عوفها لاتجيب المشاكل لك ولها
مارد ولا دار بال لكلامي وصلنا وره مشوار لمعمل مال گلينس وگفنا بره ادحگ له عيونو جامده
علي ولا يرمش
ليش هيج صاار انا بشنو قصرت ياخويه حلفت لها انا مظلوم وانلعب عليه وهي ماصدكت ردتها لي بخيانه كسرت ظهري
يول انا ماجاي اصدك بنت العرب سوت الي ادگولون علي انت تعرف اخلاقها وتعرف تربيتها بنت مله بعد شلون يطلع منها هالشي
انا هممم ماصدكت
صرخ بيه بغضب وكمل باعصاب ترجف
ولك والله الف مره گلت لروحي هي مستحيل يطلع منها هالشي لجن حمد ولك
حلف هي جانت معه وابويه انجتل من وراها
سكتت كمل بصوت مخنوك
فهمني انت عش هزمتو ولك گولي برد گلبي بشي يخليني ارتاح هي وش عدها معه عش راحت له لو ما عدها شي معه وابويه وش
شاف حتى يغدرو ويجتلو
سند راسه على الستيرن ون
ااخ ااخ جاي اموت انا ومحد ديحس بيه
اذكر الله ياخويه
يالله رحمتك يارب تت...
سكت وصفن بجمود على الشارع دحكت له شفت بنت العرب وياها اختها مثل مااعرفهن مستورات وراسها بالارض عبرن مسافه عنا وراحن لسياره واگفه بالصفحه اللخ صعدن تحرك وزين حرك وراهم
وين رايح يول
مارد
ااستغفر الله يارب زين انت مو جاي ادگول تزوجت عش بعد ادور وراها
زين العابدين
صفنت عليها من طلعت گلبي وجعني كلش جن گضبتو بأيدها ومردتو سرت
وهي منزله راسها معها
ريمه راحت لواحد بسياره صعدت معه عرفتو حازم ولد عمتها طلعو وانا وراهم
مالك يسأل بيه ولا عندي جواب له ردت اروح وراها اشوف بعيوني هي صدك
تزوجت وصار عدها ولد وصلنا لمنطقه شعبيه نزلن يم دربونه ضيگه ولد عمتها
راح وهن دشن بها
نزلت مالك ورايه گضبني من ردت اروح وراهن گال
وين رايح ااگف يمعود
وگفت ادحگ لها ريمه دشت لدار خرابه وهي وراها
سريت اجر برجلي گربت مالك گضبني تكلم
امشي ياخويه وجفي الشر لايطلع زلمتها وتصير سالفه لنا
وكفت گريب من بابهم جرني منو بهداوه درت
روحي له گال
انساها ياخويه وامشي
ماتحركت رحت لبابهم وكفت يمو
مالك يتكلم وهو يدحك للدربونه مااسمعو وش
گال ردت ادگ الباب سمعت صوت دف
هيله
دشيت لدارنا سمعت صوت دف امي اجت وجهها مطعون وجن مقهوره سلمت وسألت
خير يمه شبيج
تنهدت وردت بغصه
ساريه حنت لابوج وطلعت الدف تدف بيه لجن ماتعرف شلون
سريت للهول وكفت يم الباب كاعده ويمان يمها يريد بس يگضب الدف شافتني گامت وگالت وهي مقهوره ودمعتها بعيونها
اريد اتعلم ادف بي مثل ابويه واقصد على النبي
ذبيت حسره رحت لها اخذتو من ايدها صفنت له بقهر جن اشوف ابويه گاعد وحنا حوالي يقصد على النبي ونردد وراه
كعدت هو بأيدي يمان يمي وهي وريهام گالت
اقصدي لنا ياهيله انتي حافظه الجان يقصد به ابويه
دحگت لهن يتوسلن بي بنظراتهن تنهدت هزيت راسي بأي فرحن كعدن
گبالي ويمان بحظن ريهام
دفيت بهدوء وغمضت
عيوني جن اشوف ابويه معي گلت
الروح خضره
والعشگ ماليها
حب ابو الزهره
الي تغلل بيها
الروح خضره وبالعشگ
مليانه وبحب رسول الله غدت فرحانه
هيمانه بعشگ النبي هيمانه
تزهي وغرام المصطفى
محليها
روحي هامت وشفت روحي مع ابويه يقصد وانا معه سمعت صوتو يتكلم بأذني
دموعي سرت واختنگت فتحت عيوني امي تگهد بالبجي ريمه يمها دموعها
تنزل هي وهاله وخواتي
الصغار
خليت الدف على صفحه وگلت
اذكرو بالرحمه عاش طيب ومات طيب ومايجوز النوح علي
فراگو صعب ياهيله
هاله ردت بشهگه جاوبت
الرسول فارگ احبابو وصبر وحنا لنا في الرسول
قدوه حسنه
الف الصلاه والسلام على رسول الله محمد
اي صلاوات الله عليه هو وال بيته الاطهار
رديت على امي
ساريه اخذت الدف باستو
وگالت بدموع
برد گلبي من سمعتج ادفين بي وتقصدين
جن شفت ابويه بيج
روحي انمردت عليها جانت متعلقه حيل بأبويه وفراگو اذاها واذانا معها
اروح اضمو بمجانو
اي
سرت هي وريهام يمان لحگهن هاله وراه خايفه علي عگبن وهو معهن
شفتهن مقهورات گلت
امشن اشتري لجن حلويات للتعلوله
ساريه فرحت وگالت
صدك هيله
اي يله البسن حجابجن واسرن معي
هاله لبسي يمان الستره مالتو والكبوس
اي لبسن الحجاب واجني شلت يمان طلعت اتكلم مع ابني وانزل بالكبوس على وجهو خايفه علي من البرد
يله خلي نروو.....
سكتت وجمدت بمچاني من شفت زين جدامي
