رواية دخيله الشيخ زين العابدين الفصل السابع والخمسون بقلم أوتار حزينه
هيلة
دشيت وره حازم وكفت يم الباب عيوني راحت للزين
كاعد ومنزل راسو ماسلمت
عم مهنا گال
هلا يابنت العرب
رفع راسه ،،،، دحك لي عيوني بعيونو غمضها
ونزل راسو
امي كامت واجت ليمي گالت
تعالي اكعدي يمه
كعدت انا وياها هو گبالي حدو عبدالعزيز زلمه الهنوف وعم نواف والكبار من قبيلتهم عم مهنا تكلم
شلونج يابه ان شاء الله بخير
الحمدلله بخير
محد تكلم بعد ادحك لهم متوترين والخجل بوجوهم عم مهنا رجع تكلم
يابه وحك الله خجلانين من الصار ومانعرف شلون نتعذر منج انتي وامج وخواتج
امي ردت
جم وحده هن ياعم وحده اثنين تراهن جثيرات
والصار بينا مايرضي حتى الكافر
عبد العزيز تكلم
حكج ياام هيله والله انظلمتن جثير والظالم
مننا وبينا
ااي منكم يابو زين لان منكم صدكتم بي وجذبتو بنتي
امي ردتو وسكت
عم مهنا رد وره لحظه
ياام هيله حمد بله الزين وصورو وهو مخدر يعني الشافتو بنتج جان كلو مؤامره حتى يفرگهم عن بعض
سمعت الكلام وماهمني
عم نواف گال
بنتي انتي تعرفين كلام الله مو يكول بسم الله الرحمن الرحيم (يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ فَتُصْبِحُوا عَلَى مَا فَعَلْتُمْ نَادِمِينَ ) صدق الله العظيم
هذا الكلام كولو للزين ياعم
عش تكولوا لي
لو جايه وكايله لي عن السواه حمد بيج جان هذا كلو ماصار ياهيله
رد عليه بصوت مخنوك
دحكت له وكلت
جان صدكت يازين اذا اجيت وتكلمت هالكلام
سكتت كملت وعيوني بعيونه
مو اجيت وكتلك هو كاعد يجذب عليك وبلاني انا وابن عمي بشي ما صاير ولا راح يصير بيوم وانت ماصدگت
سكت ودحك لي الوجه مطعون وغادي دم رد بغضب
انتي تعرفين كلش زين اانا جنت ماارضى ترحين له ولا تتكلمين معه شلون رحتي له بليل شلون وانا مانعج منو ومن شوفتو
بهاي انا اكلك اي غلطت وغلطي هذا دفعت ثمنو غالي يبن الشيخ
سكتت للحظه وكملت
وانا اتذكر كلشي سواه بيه جن اشوفو بعيوني بكل تفاصيلو
تذكر يازين وش سويت بي وشلون جان انتقامك
دار وجهو مني انتبهت له محروگه ايده
هم كملت
تذكر بيوم الفجعه من راح عمي وانجتل شسويت
جتلتني وجتلت امي وخواتي وكشفت ستري جدام ربعك وكصيت كصيبتي وردت تذبحني ولوما يجروك مني جان انا ميته وساكنه
الكبور ،،،، وماكفاك هالظلم كلو اجيت وااخذت مني ابني وحرگت گلبي علي
ماجنت بوعيي ياهيله مفجوع بابويه وشهم
هددنا سمعتي بأذنج هددنا انا وابويه وشفتج بالبستان وگلتي هزمتو حتى مااجتلو
رد بصوت مخنوك
كلت بهدؤ لجن نار
مشتعله جوه وتحرك بي
ااي صادك هزمتو لجن مو لان عاشگته مثل ماتهمني حمد وانت معه لاااا حتى مااتشيل ذنبو طول عمرك وتعيش بالندم
سكت عم نواف تكلم
السواه حمد مو بس
عمى عيون الزين
يبنت العرب كلنا عمت عيوننا وصدگنا به عگب
ماحلف كلام الله
دحكت له ورديت
ياعم مع احترامي لكم انا ماهمني حد بكثر ماهمني الجان زلمتي
درت وجهي للزين كملت
ماگلت لك انت الاول وانت الاخر لا قبلك احد ولا بعدك احد ماگلت لك هالكلام يبن الشيخ
مارد صفن عليه وهو عاگد حواجبو جن حس انا حذبت بسالفه زواجي كملت بقهر
انت يازين الي كسرت ظهري ماغيرك
ااسف ولج اسف والسموحه منج ياهيله
من انا يازين
انا بنت مله حميد بنت العرب الشرف كلو والستر ثوبي
وحنا نشهد يابه والكل شهد لج وطلعت حوبتج بالي ظلمج
ابتسمت بألم من رد عم مهنا گلت
بعديش ياعم بعد ماانكشف ستري وبأيد منو
بأيد زلمتي
دحكت للزين وكملت
الجرح الي بصدرك ما
گلك انا من
ماعرفتني يابن الشيوخ
انا حره واصيله ومااخون راعي
ووج ضحك عليه حلف بكلام الله
ااي هي هاي صحبه الشر الي جنت احذرك منها كتلك يازين اتركهم راح ياذوك
الشر راح يجيك من وراهم لجن انت ماسمعت وهاي حمد تحزمت به خنجر وذبحك وانت غافل
ام شعلان كل كلامج صح وحگج علينا كلنا غلطنا بحكج وعز الله مقهورين من الصار وكلنا شلنا ذنبج مو بس االزين
عبد العزيز تكلم
حازم گالو
انت شفتها شلون اجت هي وامها وخواتها
سكت حازم كمل
اسألكم بالله ترضوها لبناتكم يصير بيهن الصار ببنات خالي
لا والله مانرضاها والصار چبير بحگهن وحنا جايين اليوم حتى نتعذر منهن ونطلب السماح
عم مهنا رد وكمل
يبنت العرب انتي صاحبه دين وتعرفين الله سبحانه وتعالى يكول
( ۖ فَمَنْ عَفَا وَأَصْلَحَ فَأَجْرُهُ عَلَى اللَّهِ ۚ إِنَّهُ لَا يُحِبُّ الظَّالِمِينَ )
والعفو عند المقدرة من شيم الكرام
رديت بروده
گلبي ماطاب حتى اعفو
سكت كملت مع زين
اابني شعلان اريدو يابن الشيخ
شعلان ولدي شلون تريدين تاخذيه وانتي صرتي حرمه شخص ثاني
درت وجهي للكبار وكلت
ياشيوخ الديره اطلب منكم طلب
سمي حنا عند عيناج
ابشري به وحنا لها
كلت لهم
عهد ووعد وماتخلفون به
عم مهنا ونواف ردو
عز الله مانخلف وجلمتنا دواس رسن
معناه ( قرار ومرسوم مايرجعون بي ابدا )
دحكت لأمي وكلت
جيبي ابني يمه
دحكت لي بخوف وگالت
هيله
جيبيه يمه
كامت ادحگ لي متردده گلت
روحي يمه وجيبيه
سرت من يمي وعگبت وره لحظه شايلتو خلتو بحظني
زين العابدين
صفنت على ولد هيله گاعد بحظنها يدحك لنا گلبي رف عليه اشگر والعيون صفر
جن اشوف روحي بي خلت عيونها بعيوني وگالت
هذا يمان زين العابدين
جسمي كلو كزبر ،،،،
كمت لحيلي ادحك لها
بذهول گلت بصوت مخنوك
منووو وش گاعده ادگولين انتي
مثل ماسمعت هذا ولدك سلم من جتلتني والله كتب له عمر
يووولي شگاعد ادگولين اانتي
ابني بجه من صحت
گالت لامها
يمه اخذيه يم البنات
ووين وج فهميني هذا ابني صدك
امها راحت شايلته عيوني عليه يشبهني جن انا
يبو زين
دحكت لها من تكلمت
انا ماتزوجت
شنوو
سألت مفجوع بالي شفتو وال سمعتو
دارت وجهها لي وكملت
بروده
ماتزوجت يبن الشيخ ولا داس فراشي زلمه غيرك گتلك قبل شويه واعيدها انت الاول وانت الاخر وصدك طلعت الاخر لان گطعت نفسي بكل الزلم
يبنت العرب صدك هذا
ولد الزين
عم مهنا سأل
حازم رد
اي هذا ابنكم
يشبه الزين ياعم
عبدالعزيز رد مخنوك
زين صاح
شلووون ضميتي عليه ولج شلون ماگلتي ولدي طيب مامات
عش اگول حتى تاخذو مني مثل مااخذت شعلان وتحرك گلبي علي
وولدي هذاا
وولدي يازين
صرخت به وگمت لحيلي وكملت
حملت به وهن على وهن ربيتو وسهرت علي الليل ولدي هذااا وانت حرمتني
منوو
حازم وكف حدي وامي هم كملت بغضب مع الكبار
العهد يااصحاب اللحى والشوارب اريد ولدي منكم
صفنو علي وبعدين للزين عم مهنا رد
وحنا عند عهدنا ولدج يعگبون لحظنج
ياعم هذوله ولدي شلون اخليهم هينه
رد دحك لي وكمل بتوسل
عگبي ياهيله وحگ الله اسوي الي تريديه
المن اعگب يازين تحلم هالشي يصير وانت طلگت بعد جن نسيت هالشي
ووج انتي حرمتي حاامل من طلگت يعني مايجوز الطلاگ
ياعم علمو الشرع گلو له انا وضعت حملي وهو ما
عگبني لعصمته
بااطل ولج طلاگنا باطل گلتو بساعه غضب
مارديت له تجاهلتو گرب تكلم بصوت مخنوك
ياهيله انا انظلمت وياج وحگ الله مدري شصار بيه من شفتج مع شهم وابويه
مجتول
يابن الشيوخ لاتعب روحك انا انكسر بي شي من يمك مايجبرو شي غير بس الله
سكتت وكلت لابو زين
العهد اريدو منكم ولدي يرجع لحظني والزين ماا ياخذهم مني ابدا
ووج شلووون تاخذين ولدي مني انااا ابوهم
هيله
زين تخبل وگام يدك على صدرو بقوه
عبدالعزيز وكفو حدو
فزاع دش هو عوض
وكفو بوجهو كمل بجنون
عگبي وولدج بحظنج وحگ الله مااگرب يمج ولا اشوفج وجهي عگبي يولي ولاتحركين گلبي عليهم
وعليج
سريت من يمهم اسمعو يصرخ
هيله عگبي ولج اثنينا انظلمنا يوولي ااسمعيني حمد لعب علينا اثنينا ووج والله ندمت وحگ الله ندمان
مادرت بال رحت للغرفه خواتي بها كاعدت وخايفات يمان بحظن هاله
اسمع الزين يعتذر ويتوسل بيه اسامحه
گلبي مارف علي صوتو يرن باذني وانا اتذكر فشاره عليه وعلى امي وخواتي
سريت لهن كلت بهدوء
لا تخافن حنا على حگ
ياهيله راح ياخذ يمان
هاله تكلمت بخوف وكامت تبجي گلت
لاا ماراح ياخذو وراح يجيب شعلان غصبا عنو
🌿🌿🌿🌿🌿
زين العابدين
تخبلت ،،،، عگب السمعتو ماظل عقل براسي اردد شبه مجنون هيله مو مزوجه وابني طلع طيب ولكم طلع ولدي عايش ولكم يمان طيب وشفتو بعيوني
ظليت اروح واجي يم دارها وادحك لها روحي لابت واختنگت اردد مذهول
ولكم ولدي طلع عايش يمان مامات طيب شفتو بعيوني وهي طلعت مو مزوجه شگاعد يصير بيه
ياعم مهنا فهموني انا شسويت لحمد حتى يطعني هالطعنه
ااذكر الله ياشيخ واحمدو لان طلع ابنك طيب ومو ميت
خل نسري يازين
وين اروح يا،،،عبدالعزيز وشلون تريدوني اتحرك واعوفها واعوفو هذه حرمتي طلاگي منها باطل وولدي شفتو مو يشبهني
جن انا
استغفر الله ياربي شسويت ياحمد هجمت بيوت من حسبي الله عليك
عم نواف تكلم بقهر
رحت له
ياعم انت جبيرنا تكلم گول وش اسوي هااي حرمتي وانا والله ماجنت بوعي لگيت ابويه مجتول وسايح بدمو وحمد
سكتت وضربت الحايط بوكس صحت من جريح گلبي
اااخ ولك شسويتلك حتى تفرگني عنها
يازين خل نسري هساع وبعدين نفكر وش نسوي
عبدالعزيز تكلم معي گضبني ارجف من غضبي وصافن بالوجوه
اسري ياخويه وخل الحديده تبرد
مااعرف شلون رحت معه ولا شلون صعدت للسياره طلعنا هو بين عيوني وهي
معه ونيت بصوت مخنوك
ااخ يااابه
گضبت راسي
عم مهنا گال
بهيده على روحك ياولدي
راح اموت ياعم ولدي طيب مامات وانا مدري وهي
هي طلعت مو مزوجه
عز الله من شفتو جن اشوفك الك به
عبد العزيز تكلم صورتو بين عيوني اشگر والعيون نفس اللون
گلت بقهر
يااربي شسويت بحالي وشسويت بها
حمد الله يغفر له
قاطعت عبد العزيز وصحت
الله لااايرحمو هوو اساس البله كلو هو هجم بيتي من الله لاينطي
سكت مارد رددت
حسبي الله علي هو وصعب هجمو بيتي وخلوني افارگ وانا مااريد الفراگ
🌿🌿🌿🌿🌿
الهنوف
گاعده بالصاله متوتره وخايفه من روحه الزين لهيله بگلبي جنت اگول
ماراح تعگب اعرفها واعرف طبعها والظلم الصار عليها مو شويه ومستحيل وحده مثلها تنسى وتسامح
خابرت عبدالعزير انطاني رفض اجتني رساله كاتب
اجي وافهمج وش صار
تمام
عفت جهازي على صفحه امي سألت بلهفه
ها يولي شگال لج
ماگال شي يمه يجي ويفهمنا
لو اكو خبر يفرح جان گالو
امي ردت بقهر
هاجر گاعده تبجي ودمعتها مانشفت انهدت بها
زلمتج وذاك الي انگبر هم اساس البله كلو
ماااخصه صعب خاف من زين لا ماينطيني له
ااي وهساع انتي وين خذاج اخوج وذاك مدري وين لفه
زادت بالبجي وسرت من يمنا
جده ادحگ لي رحت لها وگلت بقهر
ااظن ماراح تعگب ياجده
هزت راسها بأي
امي رددت تبجي
لا راح تعگب من وره شعلان
دحكت لابن اخويه كاعد يلعب يمنا ولا يدري بالدنيا شصاير بها
ساعه ووصلو الزين دش وراه عبدالعزيز وعم مهنا سلمو
هو ماتكلم بشي اجه كعد
يم امي وصفن لشعلان
گلت
ماردت موو
لااا
عبدالعزيز رد گعد هو
وعم مهنا
امي
گالت لهم
گلت راح تعگب من ورة شعلان
لااا بنت العرب ماعگبت وراح تاخذ ولدها يمها
صفنت عليهم من گالو هالكلام دحگت لامي سألت مذهوله
شنو ولدها
سكتو سألت عبدالعزيز
شنو ولدها
الزين تكلم بغصه
هيله ماسقطت الولد طلع عايش وولدتو بغداد وسمتو يمان
شهگت بصوت وخليت ايدي على حلگي امي فزت وگالت
شنوو ولدك طلع طيب مامات
لااا مامات ياعمه وشفتو بعيوني يشبه الزين هم اشگر وعيونو صفر
امي راحت لاخويه گضبتو مذهوله تبجي وتردد
شفتوو بعيونك يمه ولك شفتو هو ابنك
ااي يمه ولدي
سكت ووصاح
اااخ يابه راح اموت من قهري
گام رحت له من هد يريد يطلع گضبتو وگلت
وين رايح
عووفيني ياخيه
عووفي يالهنوف
عبدالعزيز تكلم طلعت وراه ادحك له يسري جن ظهرو مكسور صعد سيارته فزاع لحگه هو وجم حارس
زين العابدين
طلعت للمقبره مخنوگ وعيوني مغورگه ابني بين عيوني وهي مذهول
واردد
طلعت مو مزوجه وابني طيب مامات شفتو بعيوني يشبهني الشعر العيون
الملامح انا
روحي اختنكت فتحت دگم الدشداشه
اريد الهوه ماكو رددت بندم راح يجتلني
وولك هنتها جثير يازين واذيتها ودست بها وسويت شي كسرها وجرحها جرح جبير وعمرها ماراح تكدر تسامحني على السويتو بها
ضربت الستيرن بقوه وصحت
اااخ ياااحمد ذبحتني ووصخمتني ولك طلعت
عاشگ حرمتي وكل هذا سويتو حتى بس تفرگنا
ضربت راسي متخبل وماجاي اصدگ هو اساس البله كلو اسوق واشوفها تتكلم وتحگ بيه جدام الكبار وانا ولا اكدر ارد
ابني بحظنها وهي موو مزوجه صحت بجنون
ووولك شسويت يازين ضيعت بنت العرب من ايدك وراح تاخذ ولدك منك
وصلت للمقبره نزلت فزاع اجاني گلت له
ووين گبر حمد
دحك لي وصفن صحت به
ووينو
وش تريد به
ماخصك وديني علي
ياشيخ عوفك منه الزلمه مات وراح يم الله هو ياخذ حگك منو
🌿🌿🌿🌿🌿🌿
فزاع
رد عليه وهو جاز على سنونه ويخزر بيه
ووديني علي لاا اطلع قهر گلبي بيك
سريت وهو حدي وصلنا وگفت تاحجي معه شفتو
يدحك له وهو يرجف
من اعصابه
ياشيخ
عساااك ما نمت متهني ياحمد
صرخ وراح ضرب الحجر برجلي گضبتو ووخرتو هد وصاح بجنون
عسااك بنار جهنم يالردي عساك ماارتاحيت ولا شفت
الراحه
يازين موو هيج الميت له حرمتو
مالووو حرمه هالعااار ولكم ماالو حرمه لهل الردي الغدار
نفض روحو مني وصرخ بنص المگبره
اااشهد عليه ياارب انا موووو باري ذمتو لهذااا النايم بالگبر مو محلل ولا موهب ياحمد حسبي الله
عليك ونعم الوكيل عليك
گضبتو اريد اهدي نفض روحو مني سرى بسرعه من يمي لحگتو والحرس ورانا شفتو راح لگبر عمي الشيخ هوى يمو على ركبتو ماتكلم
سند راسو على الحجر يون
اااخ يابه ااخ تعال شوف وش صار بيه
درت روحي للحرس اشرت لهم يعگبون اعرف به من يجي هينه مايقبل احد ويا
عگبت عنه مسافه
سمعت يگهد بالبجي روحي انمردت علي لان الصار بي مو قليل حنا كلنا انفجعنا
بألي سمعنا من حمد وشلون غدر الزين وطلع هو اساس البله
كلشي صار مفاجأه النه والي فاجأنا بعد اكثر هو ولد الزين يمان طلع طيب ومو ميت وبنت العرب مو مزوجه
اعرف هالشي كسر ظهرو للزين والي راح يكسرو بعد اكثر هو هيله ماراح تسامحه ابدا غمضت عيوني
وذبيت حسره
لمحت ريمه كبرانه
بهالسنتين وزايده حلاه بعد ماهجو من الديره وصار الصار
التهيت مع الزين بالفليق اروح واجي معه واكثر وقتنا صار لهالشي
هي ظلت تروح وتجي بالي ولا كدرت انساها ولا كدرت اصدك اختها يطلع منها العيب هوجست بحمد لجن هو حلف اكثر من مره
وخلانا كلنا نشك بها
زين توسد گبر ابوه رحت له سمعتو يگوله
اانكسر ظهري يابه الغدر اجاني من اخويه طلع خال عيونو عليها وعاشگها وسوه
السواه حتى ينتقم مني. ومنها
اخ يابه ااخ شفت ولدي طلع طيب مو ميت وينك يابه اگعد وافرح به وفرح
گلبي بشوفتك
اذكر الله ياخويه
گلت له وگضبتو من جتفو ردد بغصه
ظلمني حمد يافزاع وظلم بنت العرب وياي هجم بيتي من الله لاينطيه
🌿🌿🌿🌿🌿
هيله
يوم وره يوم يمر عليه جن عبالك سنه اريد اشوف ولدي اريد الكبار يبرون
بالعهد الي انطوه اليه
ثلاث ايام مرت وشعلان مااجاني ادحك ليمان
ودمعتي بعيوني محد اتصل منهم ولا سمعنا شي يفرح
گلبنا
الجمعه الصبح گاعده على الريوك يمان بحظني الكل ياكل وانا صافنه للاكل
امي تكلمت
تريكي يمه وفگي ريگج
مارديت ساريه سألت
يمه شوكت يجيبون شعلان
ردت عليها بقهر
مااظن راح يجيبو،،،،،
وخايفه لا يجي وياخذ يمان من عدنا بالگوة
اسمعهن يتكلمن وافكر
اعرف الزين واعرف هو شسوه حتى ياخذني ذبح روحو حتى ارضى به وتنازل جثير حتى يفوز بحبي له گلت عرف نفسو غلط بحگي والصار راح يخلي هم يتنازل ويجيب شعلان ويخلي يمي حتى ارضى عنه وهذا الشي ماراح يصير ابدا
جهاز امي دگ ريهام فزت وراحت جابتو من الشحن گالت بصياح
يمه هذا عم عبدالعزيز زلمة الهنوف
يالله يارب
امي اخذتو منها گلبي كام يدگ بسرعه خايفه من الي راح اسمعو
وعليكم السلام والرحمه هلا ابو زين
ريمه اشرت افتحي سماعه
فتحتها سمعنا يتكلم
حنا برينا بالعهد ياام هيله وشعلان جايكم بالطريق
اااي
خواتي صرخن بفرح
لميت يمان بحظني وكمت ابجي من الفرح
اي الله يبارك بيكم ويحفظلك ولدك يبو زين
ابشري ياخيه بالخير عز الله الصار بيكم جبير وحنا شما راح نسوي لكم ماراح نرد ربع من الظلم الي وگع
عليجن
امي سكتت وگامت تبجي خواتي التمن يمها وعيونهن غورگت كمل
لاتبجين ياخيه دموعج انت وبنواتج نار علينا لاتزيدها بروح الغالي ابو هيله
امي مسحت دموعها وكالت
بارك الله بيك ماقصرت
مااسويت غير الي يرضي الله والسموحه منج ياام هيله على السوينا
مسامح يبو زين
ردت بخنكه كمل
اروح ياخيه ساعه ونصلكم باذن الله
توصلون بالسلامه
تسلمين مع السلامه
الله وياك
سدت الخط دحكت لي دموعها حدرت وانا معها كالت
جااج شعلان يولي
شهگت بالبجي يمان گام يبجي معي هاله اخذتو لحظنها تسكت بي غطيت
وجهي بايدي وطلعت نهده
گلبي بذيج الساعه
امي گربت حظنتني ختلت بحظنها مثل الجاهله كالت
ربي لك الحمد جبرت خاطرنا بعد الكسر
خواتي التمن يمي يرددن
ياهيله لاتبجين راح يجيج شعلان افرحي به
مااسكتت ظليت ابجي
امي كالت
عوفنها خلها اطلع الي بگلبها
🌿🌿🌿🌿🌿
زين العابدين
جان لازم نوفي بالعهد جلمه انطوها الكبار وهذه دستور عدنا ومايصير يرجعون به
امي تحور فوگ راسي وتردد
وهي تبجي
شلون تاخذو وتحرمني منو انا مااكدر بدونه
مارديت گدت ابني وكفت بطريقي توسلت
ولك هاي بدل ماتروح تجيب يمان وهيله شلون
يازين تاخذ شعلان لها وتحرمني منهم اثنيهم
يمممه
صحت بغضب وكملت
ظلمتها جثير ومااريد اظلمها بعد
خذني لها انا اتكلم معها ولك خل انا والهنوف
نقنعها ونتكلم هي راح تسمعنا لان تعزنا وتحبنا جثير
محد يروح اكعدن واسكتن هساع الحديده حاميه وبنت العرب ماجاي تتقبل
اي جلمه من عدنا
عبدالعزيز رد وكمل
حنا زلم وتكلمت معنا كلام دگ بالعظم وانتن راح تسمعن نفس الكلام ويجوز يصير شي مانريدو يصير
والله مااتكلم شي وعش اتكلم وبأي عين بعد الصار بها ماعدنا كلام بس الاعتذار
الهنوف ردت وكملت بتوسل
خذني لها اريد اشوفها واشوف يمان
اي يبو زين خذنا اريد اشوفو ولد ابني
عبدالعزيز دحك لي هزيت راسي بأي
اخذت امي والهنوف وشعلان ورحنا لبغداد
عبدالعزيز خابر امها گال لها
جايين ومعنا ولدي
سمعت صراخ البنات غمضت عيوني تذكرت ذيج الايام الي جنت اگعد بها وياهم گعده بسيطه هن داير مداير السفره وعم حميد يتكلم ويضحك معي هو وامها
روحي اختنكت درت وجهي على الجامه شفت روحي من طلعت من الشاخه ولمحتها تغسل وجهها صفنت على خلقتها باعجاب
وتذكرتها من شفت الشامه حدر الشفه
گلت رابعه العدويه
ونيت وغمضت عيوني رددت وي روحي
جنت تسميها رابعه يازين من دينها واخلاقها شلون شكيت بها شلون يول
كدرت تظن بها هي هالظن
سكتت حمد اجه بين عيوني يحلف الف يمين هي جانت مع شهم وصار الصار
والله ماصدكت وظليت اسأل بالردي ويحلف باطل شلون صدكتك يول وجذبت
بنت العرب شلون عمت
عيوني وگلبي معه وسويت هالافعال الرديه معها
ااخ يابه اااخ
الهنوف جالسه حدي سمعت ونيني وگالت
اذكر الله ياخويه وذب حملك علي هو قادر يفرج همك ويشيل من همومك
تعبان ياخيه من الصار والسويتو بهيله
كلنا مثلك ومااعرف شلون راح اخلي عيوني بعيونها لجن اگول هي طيبه وعدها
دين وراح تسامح
وداعة الله راح تسامحكم كلكم الا انا
هيله تحبك جثير يازين وعز عليها تسوي بها الشي الي سويتو وحگها ياخويه انت دست بها جثير واگول ما جنت بوعيك فقدت
الادراك من شفت ابويه مجتول
غصت بالكلام من ذكرت ابويه رددت بصوت مخنوك
الله يرحمك يابه لو ظال طيب ماصار الصار
مااخذت منو غير بس الشيخه
گلتها بحسره وانا اتذكر كلام هيله
ردت
ياخويه انت خذيت الشجاعه والكرم والطيب لجن ما اخذت منو الحكمه والصبر وعدم التسرع ابويه الله يرحمو ماجان يخلي غضبو يتحكم به جان يگول اوجع عدوك بالكلام وسكتو
بالحجه
هزيت راسي ساكت كملت
الي صار بك خل لك عبره صير مظلوم ياخويه ولا تصير ظالم لان الظلم ظلمات والحوبه شفتها تبطي لجن ماتخطي
ااي شفتها وطلعت بحمد وبيه وكسرت ظهري
الله يغفر له ماجنت متوقعه يطلع منو كل هالبله
درت وجهي وكلت بحقد
الله لايغفر له وحسبي الله ونعم الوكيل علي الى يوم الدين
🌿🌿🌿🌿🌿🌿
هيله
اروح واجي بالممر ادحك للباب اريد بس اسمع صوتهم من يجون ساريه كل ساع تمد راسها هي وريهام ويگولن
مااجوي بعدهم
كلنا متوترين ونريد بس نشوف شعلان وانا گلبي نار ارجف ومااعرف من شنو خوف شوگ لهفه لابني لان راح اشوفو
ساريه صرخت وره لحظه
ااجوي
فزيت دحكت لامي كالت لي
هدي يمه وجهج غده نوميه
شعلان اجه يمه
ااي
ردت عليه وراحت للباب من اندك عيوني عليها فتحتو شفت ام زين ووالهنوف سلمن
شلونج ام هيله
امي ردت بثكل
هلا ام زين هلا بالشيخه
حبنها ودحگن لي ماگربت لهن عيوني راحت للزين وگف بالباب شايل شعلان
اخر نقطه قوه انهارت
دموعي حدرت سريت اجر برجلي له اريد صوتي يطلع ماكو صافنه بلهفه لابني
يدحگ لي ولابوه دش به وگرب ليمي مديت ايدي
له واخذتو لحظني حظنتو بقوه
هويت بي على رگبي اشهگ وابجي مارادني بجه بحظني وظل يصيح بابا وخرت
منو دحكت له ابجي واشهگ احب بي واگلو
اني امك شعلان دحگ لي انا ماما شوفني تذكرني شوف اني مااعفتك ااخذوك
مني ااخذوك وحرموني منك
زين العابدين
روحي اختنگت وگلبي انمرد من شفت هيله شسوت فقدت وهي تحظن بشعلان وتحب بي ابني يبجي
بحظنها ويريد بس يجي لي
امي گامت تبجي هي والهنوف وامها خواتها
هم وياهن يبجن دحكت ابني يمان بحضن هاله
سريت له يدحك لي وصافن گلت بصوت مخنوك
اريد اخذو لحظني
هاله انطتو اليه ماخاف مني صفنت علي بعيون مغورگه اسمع هيله تبجي وتردد
اخذوك مني والله ماردت اعوفك
دموعي حدرت درت روحي عن الكل وحظنت ابني لصدري ماردت يشوفون
دموعي وكسرة روحي
ابني بجه بحظني وخرتو
هيله اجت شايله شعلان وگربت لي تتكلم بشهگه
شوف هذااا اخوك هذا يمان
شعلان ذب روحو عليه ويمان يريد هيله عيوني صارت بعيونها هي تبجي
مدت ايدها واخذت يمان وراحت دشت للديوانيه
ااخ
ونيت وطلعت من يمهم فد مره صاير
هيله كعدت شعلان بحظني يبجي ويمان هم حظنتهم اثنينهم مو مصدكه رد لحظني احب بي وبيمان واردد
يمان هذا اخوك شعلان شوفو اجه وراح يظل يمنا ماراح يعوفنا ابدا
شعلان ظل يبجي مايريد يظل بحظني
شاف الهنوف دشت ومد ايدو لها اجت ليمي وگالت
وهي تبجي
شلونج يبنت العرب
ماانا بخير
شهگت بالبجي وكملت
ابني مايعرفني شلون تريديني اصير
راح لها حظنتو واجت حبتني من راسي گالت بدموع
السموحه منج ظلمناج جثير
مارديت عمه گربت مني غاديه فد مرة حبتني وگالت
ماعندي كلام اگولو غير احسبي الصار بيه وامسحي الاذيه بهالشيله
مارديت بجيت بصوت وعيوني على شعلان خاتل بحضن الهنوف وخايف من
عدنا
هذا يمان
عمه سألت بلهفه
امي ردت
اي ياام زين
تعال يمه تعال يالغالي يبن الغالي
اخذتو مني وحبته بلهفه يبجي مايريدها الهنوف حبتو اكثر من مره گالت
لشعلان
اش شوف منو هذا يمان اخوك
گمت رحت لها مديت ايدي له وكلت بتوسل ودموع
تعال انا امك عش ماتذكرني
يدحگ لي بخوف وبعدين ليمان اخذتو من عمه وگلت
شوف هذا اخوك وانا امك انا امك ياشيخي الصغير
صفن عليه من كلت له هالاسم كملت وانا اشهگ
انت ابو الشوش شيخ شوشو
جن تذكر لان سكت وظل صافن عليه ابتسمت له بنص دموعي وكملت
تعال لحظني بعد امك وشم ريحتي بلكي تذكرني وتذكر الدلوله الجنت اگولها لك حتى تنام
يااويل گلبي يايمه
عمه جلست تبجي الهنوف كالت له
هاي امك شوفها جنت تنام بحظنها وتغني لك
امي اخذت يمان مني عمه گالت
جيبي بحظني خلي اشوفو واملي عيوني به
مديت ايدي لشعلان دحگ للهنوف كالت له
روح هاي امك ماراح تلكي احن منها عليك
دار وجهو عليه ابتسمت له اخذتو
ماعگب له ظل صافن عليه ويتفرس بملامحي
حظنتو بهداوه وحبيتو من خدو شميتو بنفس طويل وگلت بشهگه
هساع ارتاح گلبي من رديت لي
كعدت به هو بحظني ساكت نزل وره مشوار وراح لجدته وگف يم يمان يدحك له
گضب ايد اخوه دحگ لي كمت اضحك وابجي سوه
هذا اخوك الجبير العب معه
عمه حبته اكثر من مره نزل من حظنها وگضب ايد اخوه واحد يدحك للخ كادو
وسرى به گمت وراهم من طلعوا وراحو للغرفه
وكفت بالباب يمان يتكلم بلغته وشعلان يهز راسه گعدو يلعبون بالمگعبات
خواتي يمهم يحبن به
ودموعهن تحدر
امي اجت ورايه وگالت
هيله تعالي ام زين والهنوف يريدن يتكلمن معج
هزيت راسي وانا صافنه
لهم رحت غسلت وجهي وعگبت للديوانيه دشيت گعدت امي حدي عمه
گالت بصوت مخنوك
مالنا وجهه نجابلج به بعد الصار يبنت العرب
سكتت الهنوف كملت
السموحه منج ياهيله ولو هالجلمه ماتوفي ولا تعبر عن الي حنا نحس به
ذبيت حسره ادحك لها هي بالذات ماشفت منها غير كل الخير وعمه هم اخر
وكت تبدلت معي وصارت
زينه
امي ردت بعتب
شلون صدكتو بنتي تخون ياشيخه شلون وانتو تعرفون من هي وبنت من
عمى عيونه هالردي ولد اخويه
ردت بهالكلام وكامت تبجي الهنوف كملت بقهر ووجهها مطعون
ياام هيله حنا انخدعنا به لان حلف كلام الله اكثر من مره والصار تره اكد هالشي
على هيله
سكتت ادحك لي وعيونها مغوركه
ابويه انجتل وانتي يمو وابن عمج معج وكلتي هزمتو حتى ماينجتل انا گلبت الصار براسي وسألت روحي الف مره ابويه شجابو لج بهالليل وليش جاب حمد معه
اظن عمي عرف بسالفتو الرديه وجابو حتى اتواجه معه
الهنوف فكت عيونها وكالت
وش ادگولين
جده تعرف يالهنوف واكيد كالت له
عمتي تعرف بعملته الرديه معج
عمه سألت بذهول
هزيت راسي بأي وكملت
ماكو غير هالسبب حتى عمي الله يرحمو يجيبو معه للمزرعه
سكتن وحده ادحك للخ امي گالت
ياام زين بنتي مااسوت السوتو الا وهي خايفه على زين لايشيل ذنب شهم طول عمرو ويعيش بالندم
ياخيه اعرف وحك الله عرفت من الظالم ومن المظلوم وظليت بصخام الوجه من وره عمله ولد اخويه الرديه
سكتت تنوح وتبجي وتردد
هجم بيت ولدي من حسبي الله عليه ونعم الوكيل
الهنوف كالت
ياهيله الزين هم انظلم تعرفين وش سوه حمد وشدز الج حتى تعوفيه
وتهدين دارج
ياام زين انا عرفت وش صار ومااريد اتكلم به لان الكلام ماراح يغير شي من الي انا به
سكتت كملت بهدوء
انا ماعاد اكدر اشوف اخوج مثل الاول گلبي انكسر وكسرتو بس الله يجبرها
حگج والله حگج لجن فكري بولدج شلون يعني يظلون بينج وبين الزين
گلت للكبار وطلبت العهد هم يظلون يمي وانطوني الحگ ولدي الكم لجن من
يكبرون مو هساع
يايمه شلون ينطيج گلبج تحرميني منهم
عمه تكلمت بتوسل
رديت بروده
مو انحرمت من شعلان سنتين ونص ياعمه وانا ام
سكتت دحكت للهنوف كالت
حگج ياهيله كلشي تتكلمين به حگج
شلون هساع ياام هيله انا والله مااكدر بلا شعلان روحي معلگه بي هو الي منور بيتي ومخليني اتنفس الهوه
امي ردت
حگج ياشيخه لجن ذوله هم ولدها والها حگ بيهم وشوفة عينج شصار بها من شافت شعلان
كملت وراها
ولدي راح يظلون يمي وماراح امنع احد منكم يجي ويشوفهم هلا بيكم شوكت مااجيتو اهل لهم وعزوه
وحنا اهلج بعد ياهيله
ابتسمت بألم ورديت على الهنوف
اهلي راحو وسكنو الكبور ياام زين
سكتت كملت بقهر
وين ابويه ووين ابوج لووو طيبين جان هذا مو حالي
بجت بخنگه وگالت
عزايه بالغالي مووو ايام ياهيله لاا ،،،، عز الله
عمري كلو راح اظن ناصب
الجادر بروحي واعزي گلبي المقهور من فراگو
سكتت وره لحظه وگالت وهي تمسح دموعها
ياهيله راح نوفي بالعهد لجن هلهل الله بالزين اخويه غلط والمسامح كريم
سكتت امها كملت بخنكه
يعني ماراح تسرين معنا انتي وولدج
لاا ااا
رديت مختصر الهنوف گامت وگالت
براحتج هيله وادعي لج انتي واخويه الله يبرد ناركم وويجمعكم سوه انتو وولدكم
امين ياارب
عمه ردت بشهگه
الهنوف گربت
حبتني والدموع تسف
امها هم حبتني وگالت
لخاطري يمه انا
مارديت نزلت راسها
وگالت بغصه
ديربالج على الولد ذوله نظر
عيني والغالين ولد الغالي
هزيت راسي
الهنوف گالت
يله يمه
سرن وطلعن من يمنا رحت بسرعه لولدي كاعدين يلعبون خطيت لشعلان
كعدت يمو مبتسمه يدحگ لي گلت
هلا بشيخ گلبي الصغير
هلا بشيخ شوشو
سأل
وين بابا
زين العابدين
وكفت بره ساكت وصافن اسمع عبدالعزيز يتكلم معي وفزاع لجن مااسمع شي
الصار جوه هدم كل حيلي
وخلاني اكره روحي والسويتو
سندت روحي على الحايط فزاع كال
ياشيخ اكعد بالسياره وارتاح
ماكو راحه عكب السويتو والي شفتو
مارد عبدالعزيز گضبني تكلم
هونها يابو شعلان الايام هي راح تدواي الصار بيكم ويجي يوم وبنت العرب
تعگب لحظنك
ابتسمت بألم ورديت
يبو زين انا ذبحت بنت العرب وساح الدم لو انطيها روحي فصل ماراح ترضى به
سكت مارد ظلينا بره واكفين بره سريت وكعدت بالسياره صافن ومضروب
براسي شلون راح اكدر على فراگ شعلان مدري والنوب عرفت لي ولد اللخ يمان واثنينهم راح يفارگوني ويظلون هينه نار شبت بصدري ومحد يكدر يطفيها غير الله
سندت راسي ليوره مااشوف شي جن الدنيا صارت سوده بعد اكثر بوجهي تعبان ومهدود حيلي والنفس
ثكيل بصدري
اهوجس الايام الي الجايه راح تصير صعبه عليه جثير ومااعرف شلون راح اگضيها
ظليت افكر بحالي ودايخ بالصار والي راح يصير شفت بالمرايه امي طلعت
هي والهنوف نزلت من السياره رحت لهن وجهن غادي دم ومبين عليهن
باجيات گالت بغصه
امشي يمه ماترهم بعد هلهوله وجنازه
غمضت عيوني بقوه دحگت للدار گلت بصوت مخنوگ
انا عفت شي ماهو بينعاف يايمه
ااي وهذا عهدكم حرمني منهم اثنيهم
ردت علي وصعدت تگهد بالبجي
الهنوف صعدت وگالت لي
حگها والله مالومها بشي لان كسرتك وكسرتنا لها مالها جبر ياخويه
سكتت عبدالعزيز گال
خلي نسري ونروح لداركم
ظليت واكف ادحگ للدار گلبي يوجعني كلش گلت بخنكه
فزاع ظل هينه انت وجم حارس بس مااريدها تشوفكم او تحس بيكم
تم شيخ
🌿🌿🌿🌿🌿🌿
مالك
سمعت وشفت حمد شسوه للزين وحرمته
وانصدمت صدمه جبيره رحنا للجنازه اني وابويه
واخوتي وامي ويانا نسمع كلام يدور ويحجون بالسواه الدنيا انگلبت عليه وعلى اهله لان تهم بنت العرب
تهمه باطله وحلف جذب
الزين انهار من عرف وتحول لشخص ثاني انكسر بلحظه من وره عملتو الرديه
وصار فد مره بس يردد
ولك ليش شسويت لك انا مو انت بحسبه اخ لي
محد گدر يهون علي ولا هو گدر يسكت عرفت راحو لبنت العرب مع الكباريه
ومارضت ترجع وياه وطلبت ولدها وگال راح اودي لها
گاعد مقهور وصاير فد مره جگاره ماتگع من حلگي ليان گالت
شلون وياك مالك راح تظل هيج مقهور وماتاكل شي
ماجاي اصدك الصار عقلي هذا وگف... ليان شلون حمد سوه هيج شلون وهو اقرب واحد للزين
گعدت يمي وخرت النفاضه من جدامي وردت بقهر
اي والله اني هم عقلي مااستوعب السواه
ووج طلع عاشگها وسوه السواه لان ردتو وطيحت حظو انتقم منها ومن زين
شلون سوه هيج مدري شبي نسى الاخوه وصله
الرحم نساها فد مره وهجم بيت الزين
الله يرحمه اذاهم هوايه وفرقهم والصدمه طلعت مو مزوجه وابنه عايش
خطيه
ااي ووج اي ليان والزين جاي يموت من وره
هالسالفه گاعد ويا بدارهم هينه وبس صافن اتكلم معه يگلي
انا الخسرت كلشي ياخويه
طفيت الجگاره باعصاب وكمل
ااخ ياحمد كسرت ظهرو للزين وحنا معه من وره عمتلك الرديه
اهدأ حبي لايصعد ضغطك
وج ليان راح اتخبل عقلي ماجاي يستوعب هو سوه هيج حمد اخونا واقرب واحد للزين ربو سوه واحد متعلق باللخ شجاه وهجم
بيت الزين
الغيره مالك والحقد خلته هيج يسوي
اخذت جگاره گضبت ايدي وگالت
ابدا والله ماتشربها كافي صدرك راح يتاذه من وراهن
اخ ليان مقهور كلش على الزين وذاك الي سكن الگبور راح شايل اثم جبير برگبته ومستحيل الله يغفر اله عگب السواه
ليان
مالك انقهر كلش من وره الصار بزين والسواه حمد اذاه وهم انقهر علي هوايه لان مات موته شنيعه وراح للگبر بفضيحه
ايام ظل يحجي بهاي السالفه واحاول اطلعه من حالة الحزن الصارت بي من وراهم ظل كم يوم مايروح للشغل من وره وضعه
راح لزين بيتهم بغداد ورجع مقهور بعد اكثر عليه
گال راح يلتحق وگلبه نار من وره الصار خايف عليه لايذب روحه للموت من وره القهر
ظلينا نفكر بي خصوصا معركه الموصل راح
تبدي وهم گالو راح يشارك بالفيلق تبعهم
العصر جنت وحدي مالك بالشغل طلع من الصبح ومااجه على الغده گال مااشتهي تغدو انتو
وحدي بالمطبخ داسوي
كيك كيان وتوته يم نوار
يلعبون وي تيم
سمعت عياط طلعت بسرعه جان جاي من بيت اهلي فزيت من الخوف
ورحت بسرعه عليهم
طبيت اركض عبالي الجهال بيهم شي سمعت صياح وسيم وفشاره رحت للصاله
وكفت جامده من شفت لارا بين ايده ولازم سجين يريد يذبحها
