رواية في ذمة الغريب الفصل الخامس 5 بقلم كنوز

مصخت والضماير غبراها الغيض

وامتد العمر وام الفرح مثجل

طالت والعمر كلما تلف بي طول ،

غم ذاگ العمر من ينگضي تعلعل !

━━━━━━━━━ ⚖ ━━━━━━━━━

:: عمار ذبح ترفة.... عمار ذبح ترفة 

صوت مره تصيح البنات طلعن يركضن وحدة ورا الثانية واني هم وياهن ركضت بيت مقابل بيتهم بنفس البستان 

دفع هو الباب نفتحت طلاگتين دخل والبنات ورا شهگت من شفت بنية امدده بالطين و ولد لازمها من شعرها ويريد يذبحها صدك 

عروه اجه ورانه هم قبل لا يدخل وكف هو بوجه مانعه لان البنية بلا حجاب 

واني من هول الموقف تحددت بمكاني بعد لا أكدر اطلع من البيت حتى اباوع ولا أكدر اتقدم أكثر 

الولد من شاف هذا اللي اسمه غفار نهض عنها بساع رافع اديه بستسلام 

عمار :: عفتها والله عفتها حتى إذا تريد تأخذها يمكم أخذها و روح 

ركضت الها براءة بلهفة و عنبر تروح هيج و ترد هيج مشدوه تدور ع شي تخلي ع راس البنية جر هو الغترة من اكتافة شمرها عليهن حطنها ع راسها

نعصر گلبي ع بنية و نقهرت عليها شو هذة وياه ما كامت من الطين مسحت الطين من خدها و رفعت ايدها تهدد 

ترفة :: انا اعلمك تهدالي بس خل يطلع فطرس و شوف شراح اخلي يسوي بيك 

دمغتها براءة بيدها 

براءة :: اسكتي ولج انتِ بيا حال و تحجين 

هنوب ترجف كلها جسمها كله يتراجف من البرد و ملابسها كله ماي تنگط جابن قمصلة لبسنها خطية 

الولد يريد يشرد بس هو وكف بوجه 

غفار :: انا شكتلك ذاك اليوم عمار... من شنهي حذرتك موش گتلك اذا تجيسها اكسر لـ ايدك 

عمار :: هاي كدامك مثل الحصان كلشي ما سويت الها 

قبل لا يرد طفرت البنية و شلهت ردانتها اديناتها كلها آثار زرك و سحجات تاشر عليهن و ع عينها مزورگة 

ترفة :: يا ما جستني جا ياهو سوى هيج بيه مسودنة و مخلت نفسي 

تصيح و تكشف عن جروحها ندارت ع ثاني تعاتبه بصوت متشحرج

ترفة :: عاين شوف ششووا بيه جي ردت اروحن للمدرسة و شكك كتبي جا هي هاي الأمانة هيج تصونها هاي عود فطرس وصاك بيه 

تعاتبه وتبجي و اخوها استغل الفرصة راد يشرد وهو بساع لزمه تلاوه وياه ولزم ايده من الزند و الكف وخلاها ع ركبته عوجها بالعكس طگ العظم صرخ الولد 

غفار :: تعرف انا شكثر ملتزم و استحرم وما يصير احلف ع شي وما اسوي 

نهض عنه و الولد كام يتقئ من الوجع و يتمرغل بالطين ويصيح بوية الحكني راح اموت 

غفار :: هاي جدام الكل هل مرة راح اعديها بس هيج مرة الآخرة موش اني لا والله اخلي النسوان تدمغك 

ندار عليها 

:: وانتِ الآخرة امشي جدامي يله 

مو بس هي حتى اني من الخوف مشيت كدامه اركض طلعنه وهو حجه يسئلها 

غفار :: شسوتيله وهيج شاط عليج 

ترفة :: كلشي ما سويت شكك كتبي وانا حركت فلوسي 

هز راسه الها 

:: عفية عاشت ايدج اذا رايدة هيج رايدة الموت گليلي واحطن جيلة براسج لويش متعبة نفسج 

عبست هي وهو دفعها حتى تمشي كدامه وانا عفتهم ورحت لعروه واكف ع صفحة ينتظر 

عروه :: شبيج وجهج صار اصفر 

رحمة :: ذاك راد يذبح اخته وهذا صاحبك كسر ايده ولك شرانين عروه انت وين جبتني 

ضحك ما داير بال بالعكس فرحان 

عروه :: من الزينات هاي ولج حتى اجاج نزار يخلون دمه بطوله 

رجعنه للبيت عروه جرني من ايدي يحجي بهمس وهو لاف ايده ع كتفي بحنان 

عروه :: رحمة حتبقين يمهم بس اني ما گتله ع الصار و السالفة بيها قانون و قضية 

مديت ايدي اطبگ الباب أكثر حتى لا يسمعون كلامنه و سئلته بقلق 

:: لعد شگتله 

:: گتله ابن عمي رايدها وهي ما تريده و صايره طلابة چبيره بين ابويه و عمي و أصلة لشرطة وحتى لا يضغطون عليها بحجة ابويه و يجبروها ع اازواج اريد أأمنها يمك جم يوم 

:: واذا عرف شلون 

:: ما يعرف هنه حساب يوم يومين واجي اخذج لان بأجر ابوية و عمي أحمد ياخذون الهم مشية و نشوف شلون تصفه 

هزيت رأسي بـ اي اجت العلوية وهو هم دخل بس نظره ع گاع طلع عروه سيم كرت من جيبه خلا بالموبايل واتصل ع ابويه حجه وياه و مد الموبايل للولد

أخذه منه اسمع صوت ابويه يحجي بنبرة قهر بعد السلام گاله 

ابراهيم :: عمي غفار اني هاي مو بنتي يمك أمانة هاي روحي يمك اريدك تدير بالك عليها 

غفار :: ابشر عمي ما يتعدى عليها بس الهوى 

شوية و طلعوا بره يسولفون عيوني عليهم من راد يطلع عروه طلعت ورا بساع فتح اديه حضني و اني 

ابجي اناشغ عبالك طفلة وأهلها عافوها 

:: بس لا تبجين اروحلج فدوه كافي مو عيونج صار شحالهن 

: حباب مو تعوفني هنانه وبعد ما تجيني 

ابتعد عني مبتسم خلى كف ايده ورا راسي قربني اله باس جبيني و مسح دموعي بـ ابهامة و رسم ابتسامة ع ثغرة يطمن لوعة گلبي رغم ادري بيّه خايف أكثر مني بس خوفة عليَّ مو ع نفسه 

:: اكو واحد يعوف اخته شبيج رحمة خل ارجع اشوف ابوية گلبي يمه و باجر اذا صحتلي فرصة اجيج و جايب اخبارة حلوة وياي 

شبگته حيل وهو حاوطني بثنين اديَّه يكافح حتى ما يظهر قلقة كدامي دگدك ع كتفي 

:: يله اني رأيح ديربالج ع نفسج مو تبقين تبجين لو تظلين بلا اكل 

طلع واني وكفت بالباب اباوع اله وهو يبتعد وهاي أول مرة ابتعد بيها عن اهلي رجفت شفتي مستهضمة عبالك طفل و ضيع أمه وصل نص الطريق التفتت اللي عبالك يعرفني 

بعدني واكفة رفع ايده بسلام واني رفعت أيدي اله وادعي الله يحفظة 

شعور الخوف من المجهول يحاوطني من حدب و صوي إحساس ما ينشاف...مثل باب اجهل شنو وراها بس لازم افتحها 

عقلي يركض أسرع من رجليَّ ، يجمّع أسوأ الاحتمالات واحد ورا الثاني، بدون ذرة رحمة 

وكلما احاول أهدي نفسي، يجي صوت داخلي ضعيف يسأل شراح يصير اللي بعد هذا.... خوف.. غربة... حاضر نار و مستقبل مجهول 

راح واني بقيت واكفة بمكاني احس ليلة الوحشة هاي الليلة عليَّ وحدي بنص بيت ناس ماعرفهم صاح الولد ع اخته أشر الها بعيونه عليَّ اجت خلت ايدها ع أيدي حتى ادخل وهي مبتسمة 

براءة :: تعاي فوتي جوه عيوني الهوى بارد لا تتمرضين 

طبيت جوه گاعدات كلهن و يمكن عرفن من اخوهن قصتي المزعومة اللي رواها عروه اله... الجو برد فجأة هوى عالي و برد يكص كص 

براءة :: تعاي انطيج جواريب بردت الدنيا هينوب 

مشيت وياها طلعت زوج جواريب حلوات ثخان لبستهن دفيت گعدت جسمي يمي و روحي يم اهلي افكر بيهم خاف بسببي تلوحهم الاذية بين الخوف و تأنيب الضمير لا أكون سبب بموت طيبة هم عقلي احسه انشل من كثر هالتفكير 

انتبهت ع عنبر اسمها غريب بساع حفظته كاعدة كبالي عيونها مغوركة تفرك اديها بتوتر وكل شوية تباوع ع براءة 

ويا ما طلعت براءة من الغرفة كمزت من مكانها جانت مخلية رجليها بطرف بالدشداشة عثرت بيها وكعت وجهه 

ك

امت تفرك بكصتها بوجع 

عنبر :: صارلي گرن مو ؟

رحمة :: قصدج عنجورة لا ماكو بس شوية حمار صار 

مشت للباب مدت راسها تباوع منا ومنا و سدته واجت تفرك بأديها تقربت گمبصت كدامي تحجي بنبرة هامسة فوك قلقي قلقتني 

:: اكلج بس لاتكولين 

واني هم گمت احجي مثلها بصوت خافت وكل ظني حتحجي سر جبير خطير فد معلومة محد يعرف بيها 

:: كولي والله ما احجي ابد 

لزمت كفوفي بين كفوفها مثل واحد رايد شغلة من شخص و يتوسل بيه 

:: انا مو جحف والله بس هنه عزيزات عليّ احبنهن كلش كلش كلش 

:: ياهنّه ؟؟

:: جواريبي 

ضل راسي يفر اريد اربط كلامها اريد افتهم باوعت وين عيونها تنظر شفت ع جواريب الي لابستهن اني أشرت عليهن 

:: ذني قصدج 

هزت راسها بـ اي و طلعت جواريب جدد من جيب الترواكة ملتها مدتهن الي نزعتهن انطيتهن الها 

:; هاج ذني جبتلج زوج جديد من المحل خو ما زعلتي عليج اله 

:: لا والله ليش ازعل 

:: عفيى لاتكولين الـ براءة تملص اذاناتي اذا عرفت والله و يسموني البخيلة

:: لا ابد والله

حضنتني عبالك انطيتها شي ثمين اخذتهن فرحانة ضمتهن لصدرها سفطتهن بحرص مبالغ بيه و راحت ضمتهن بالبوفية و قفلت عليهن و المفتاح مشدود بقيطان و خلته بركبتها گلادة 

البنية غريبة لو اني بس اشوف تصرفاتها غريبة ماعرف بس هي حبابة كُلش صار أذان المغرب كامن يصلن واني هم حايرة وين اصلي ولا اعرف اتجاة القبلة و مستحية بقيت واكفة بمكاني و عيوني تدور بالمكان العلوية تصلي ع كرسي اجت توبة لابسة جادرها تريد تصلي سئلتني 

:: تردين تصلين مو ؟

:: اي 

طبت للغرفة طلعت بيدها سجادة و جادر صلاة 

اخذتهن منها وگفت اصلي اسمع صوت براءة وهي تگول لاختها اخذي التربة للبنية اجت عنبر تركض زلكت بالزولية و كامت عادي دنكت تريد تخلي التربة من شافتني مكتفة شالتها مبتسمة فرحانة 

:: انتِ ما ذيج الصفحة... 

كملت صلاتي و البنات هم طشن بالمطبخ مدوا السفرة

بس .. براءة واكفة تصلي بخشوع تام صاحت عنبر مزعوجة 

عنبر :: غير يفضها الشيرازي 

دقايق و كملت مسحت وجهة بالتربة و تسبح باصابعها جابت حافظة الخبز واجت وعنبر تفتر وراها جنها مهدي من يفتر ورا رانيا 

عنبر :: خاشوكتي ام السعفة وين گلبت المطبخ عليها و ما لگيتها 

براءة :: ما ادري شوفي سجدة هي غسلت المواعين اليوم 

وكفت عنبر بنص الهول شلهت ردناتها عبالك راح تدخل معركة و تحزمت بالشال هم وصاحت 

عنبر :: سجدة... ساجدة طلعي من الجحر عيني وين خاشوكتي ام السعفة اليوم اثبركم ثبر اذا مضيعينها والله 

طلعت بنية طويلة وكفت اباب الغرفة اخذت نظرة ع كل چنها ضابط تحقيق باوعت الي 

سجدة :: انتِ ياهي 

النوب ارتبكت منها ظليت امتمت عبالك صدك واگفة كدام ضابط 

براءة :: اخت صاحب غفار تبقى يمنه منا و غاد 

سجدة :: أهلا و سهلا 

هزيت راسها الها بشكر و صاحت عنبر مرة ثانية 

عنبر :: مو احجي وياج سجودة خاشوكتي ام السعفة وين 

سجدة :: گطفتها بالزبل 

عنبر :: تجذبين 

سجدة :: والله و شرف مرت عمي كزار 

چنت اكول عنبر غريبة لا هاي الثانية هم غريبة حتى حلفها غريب... حجتها بكل برود و عنبر نخطف لونها عبالك شامرين ابنها طلعت تركض شايطة و براءة عاتبت براءة اختها تلومها 

براءة :: ليش هيج تسوين مو تدرين بيها ما تاكل اله بيها هسه تزعل و تمشي لبيتهم ولا عمي و لا جراح هنا 

سجدة :: حتى اتوب ما تنقل علوم 

رجعت عنبر مشرعة اديها اللي يشوفها يكول ميت الها شخص عزيز حتى نبرة صوتها ترجف 

عنبر :: وينها الزبالة براءة بس لا ذبتوها 

براءة :: اي ذباها علي من الظهر 

لطمت بثنين اديها ع وجهه أكثر من مرة خدودها السمر صارن حمر حيل و دموعها خرن بساع خلت حجاب ع راسها واخذت موبايلها وقبل لا تطلع هددت 

عنبر :: شوفيلج نية سودة مني إذا ما لگيتها و الزهرة الزجية اخلي ليلكم نهار 

براءة تريد اسكتها ماكو ترجف و تحجي اجه الرجال نفسه ابو المحابس 

غفار :: شكو شمالجن عليش هالصوت و البجي 

براءة :: سجدة ذابه خاشوكتها التراثية من عهد نبوخذنصر بالزبل وهاي كامت ترجف علينه 

هز راسه بعدم رضا اخذ موبايل و طلع وراها دقايق و رجعوا ثنينهم عنبر عبايتها كلها طين غسلت رجليها و غسلت الخاشوكة و تذب عليها مي حار مغلي و تعقيم و تشم بيها رجعت غسلتها مرة ثانية و ثالثة جابتها تشممها لبراءة و الي طمناها مابيها شي كعدت تريد تاكل 

سجدة :: راح تاكلين بيها ؟

عنبر ::اي ولا تحجين وياي بعد 

سجدة :خفتا وراحة 

رجع عم السلام و الأمان بعد ما لكت خاشوكتها التراثية ع كولت براءة توها بدأت تاكل 

سجدة :: عن الحلال و الحرام شفت الجلب يلگ بيها 

غمضت عيوني عاصرتهن اتخيل كلامها صورة و صوت وقبل لا تبدي المعارة مرة ثانية صاحت بيهن براءة 

براءة :: سجدة..عنبر صدك تحجن مو البنية كاعدة و مخلين الزاد كافي

سكتن وعنبر ما اهتمت رجعت تاكل بيها ابتسمت الي وكالت 

عنبر :: اعرفنج علينا ما طول كلنا كاعدين.... تقريباً 

أشرت ع العلوية 

عنبر :: نبدي بالگليطة مالتنه حبوبتي دلة محبوبة و عزيزة هاشم 

النوب أشرت ترفة متلفلفة ونايمة ما تقبل تأكل 

:: وهاي ام لسان بنت عمي كزار وهاي براءة بنت عمي الآخر 

تلاشت ابتسامتها من وصلت سجدة تباوع الها بغيض 

عمبر :: وهذه سجدة.. ساجدة... سجودة... سجاد جنتنه خطيبة اخوي بس هي ما محسوبة ع بنات عايني طولها طول زلمة صوتها خشن صوت زلمة حتى مشاعرها معوقة مثل الزلم و تصلح السيارة و يا غفار 

صدك انتبهت عليها حتى صوتها خشن بي بحة حلوة ما اهتمت سجدة لكلامها بالعكس غاظتها أكثر من كالت 

سجدة :: شفت العگروگ كاض ايد ابو بريص و مربعين بخاشوگتج بنص الزبل 

طلع المي من خشمي مصرة اله تخليها تذب خاشوكتها العزيزة غورگت عيونها بجزن دكدكت براءة ع فخذها 

براءة :: ماعليج بيها تريد تلعب نفسج لا ديرلها اكلي 

دا ناكل و نركع باب البيت دفرة طفرت من مكاني عبالي الشرطة اجتني و براءة كامت تهدي بيه اسم الله اسم الله 

دخل شاب يضحك و مبين من حركاته مختل عقلي بس نظيف و مرتب شعره طويل لرگبته واصل وشاد عصبة سودة وحدة من اديه مبتور كفها... صاحتله براءة مبتسمة 

:: تعال أمين تعال تعشه ويانه 

اجه كعد يباوعلي شو هذا اصفگ اديك وحدة بالثانية و غمني 

براءة :: يا ولك عيب لا تسويها بعد لا اگل لغفار عليك 

حسيت براءة تفشلت من تصرفة رغم هو ماعليه حرج كلت اقلل حرجها 

رحمة :: لاعادي خلي ع راحته 

ضحك هو ما مهتم بس يخاف من سجدة من خزرته گام يمد اديه من ورا عنبر و يغمني..... صبتله براءة وعنبر تقسم بالخبز تساعده ياكل اكل شوية و اختفت ابتسامته و كال 

أمين :: ذبح ذبحهم حز رگابهم حز فصل روسهم عن الجثث 

اقشعر جسمي من كلامة وهو ردد الكلام مرة و ثنين و تلاثة ياكل لكمة و يعيد الكلام گالت سجدة تجذب انتباه و سئلته 

سجدة :: أمين شو عاينلي... أمين موش احجي وياك ....ياهو ذبح ؟والمن ذبح ؟ 

رفع راسه الها و ضحك يصفك باديه 

أمين : انا احبنج سجدة اختي انتِ والله بس لا طكيني 

نرسمت ملامح القهر ع وجوهن تنهدت براءة تمسح الشوربة اللي وكعت ع ملابسة وهو ياكل و يرجع يعيد الكلام يضحك و يغمني 

براءة :: هذا ابن عمتي انعام شـ زينة چان الناس كلها تحلف بـ اخلاقة طالب كلية بين يوم وليلة اختفى مخلينه مجان ما دورنه عليه بيه تالي رد وحده بهل حالة مامش عگل براسه 

نقهرت عليه كلش صدك اذا تسمع مصيبة غيرك تهون عليك مصيبتك 

رحمة :: زين ليش ما أخذوا دكتور نفسي بلكي و يتحسن وضعه 

براءة :: و الله غفار و الولد خذوا ما قصروا ما خلوا أطباء و سادة كلشي ما فاد بيه 

عمبر :: يا صدك جا عمتي أصالة وين شو مالها حس ليش ما طلعت تتعشه ويانا

براءة :: عمتي انعام مريضة هل راحت يمها تداريها جي لوحدها 

فات ابو المحابس من يم الباب من لمح هذا الولد آمين صاح بيه واشرله بمعنى تعال والولد بساع ذب الخبزة وراحله برعب بس وصل يمه ضربة ع ظهره حيل و نتر بيه 

غفار :: انا موش گتلك بعد لا تطب لهنا واذا رجلك خطت هاي العتبة اكسرها 

البنات خنسن ما حجن واني بقيت الوب اريد افزعلة و استحي راد يضربه بعد شبگه الولد يضحك 

امين :: غفار غفار غفار غفار احبنك انا والله احبنك 

يعيد الكلام أكثر من مرة متت قهر عليه بس هو گلبه عبالك حجر لزمة من اذنه لواها حيل 

غفار :: اذا شفتك بعد كاعد يمهن حظك اطيح اجنزك وعلي 

كمزت عنبر تركض تجر بيه تريد تفكه من بين اديه وتصيح بعصبية بس صوتها صار عبالك وصواصة 

عنبر :: كافي عوفه ما تخاف من الله تره اله حوبة والله يعاقبك اذا تاذي والله 

فتح عيونه عليها و براءة جرتها تريدها تسكت 

غفار :: فوتي جوه ما اسمعلج حس يللللله 

طببتها براءة وهو اخذ الولد طلعه البيت وهو يدمغ بيه و الولد يضحك خطية ويصيح احبنك غفار فد كرهته و حقدت عليه 

كملنا عشه گمت ويا البنات ردت اغسل مواعين ما قبلن

فرشن كلهن بغرفة و فرشن الي هم وياهن و نزلن بطانيات جدد و مخاد 

براءة :: اخافن متعودة ع جرباية 

رحمة :: لا عادي انام وين ما جان 

براءة :: لا تستحين عليج الله اذا متعودة ويا ما يطر الفجر ادزن غفار يجيب الج وحدة

رحمة :: لا والله شطلعت اصلاً احب نومته الگاع ارتاح بيها أكثر 

عنبر :: عفتي دراستي وعفت كلشي حتى اعرف شني سالفة هل البنية رحمة اريدن افتهم كلشي احبن العلوم ما عولت العشه يكضي و نكعد 

جبت كرزات و شامية و فواكهة و ربعت جدامها 

عنبر :: اي رحمة احچيلنه شنهي طلابتج شمالة ابن عمج وياج 

شو هاي البت تخربطت أحوالها من سؤالي 

رحمة :: هاا .. خطبني أكثر من مرة بس اني ما اريدة اخر شي نهه عليَّه وصارت مشاكل وصلت لشرطة 

عنبر :: ياااع صخام صخمه بت ما تريدك شنهي هي گوه خو موش گوه 

براءة :: جا شني هي غصب حتى الزواج يصير باطل هيج 

عنبر :: والله انا منج انيم الطابوگة براسه اخلي الدكاترة تحير منين تخيطه انا ينهي عليّه واسكت يا بوية يا يابه 

براءة :: وياهو ينهي عليج انتِ بس الما رايد عمره 

عاينت سجددة ع رحمة بنظرات غريبة من اهد ما گعدنه وهي ساكتة 

سجدة :: شنهي ماعدكم سلاح بليلة هندس و احطن چيلة براسه واخلي جثته تاكل بيها الجلاب لا من شاف ولا من دره 

البت كامت تطي الوان مدري شصابها مدري خافت من عدنه ضحكت براءة تغير الموضوع تحاول ترگعه 

براءة :: كافي هسه شتگول علينه البت عائلة سفاحين كله حجيهم بالگتل والمگتول 

عنبر :: لا أخذيها من الزينات بناتنه هيج زلمنه شلون يعني ابن عمج ما يكدر يدنه صوبج ابد 

براءة :: خطية البت بين خوفها و قلقلها هدأت ردت انامن تذكرت الهدوم ع حبل طلعت المهن لا تمطر الدنيا بليل طلعت للحوش و اشوفن غفار گاعد ع دجة مال عتبة 

وكاضلة صوندة تذكرت علي ابن اخوي المرحوم لسه ما رد البيت و اسمعه يخابر مدري ياهو ركضت اكعد سجدة بس هي تكدر توكف بوجه غفار 

براءة :: ولج سجدة لحكي علي لسه ما اجه و غفار كاض الصوندة و كاعدلة بالحوش 

فتحت عيونها وكامت بساع تطلع وهي تحجي وياي كلش تخاف عليه جي هي ربته تحسبه ابنها 

سجدة :: كال رايح اقرا يم صاحبي وين راح قابل 

براءة :: مدري ياهو خابر ع غفار و گاله ابن اخوك كاعد بالمهلى ويا الشباب وهو حلف بس يجي يكسره وهو بس شاف سجدة صاح بيها جي عرفها طلعت حتى تحامي ع علي 

غفار : فوتي جوه سجدة عبالج تكدرين تفكينه مني اليوم لا والله اليوم يطلعونه جنازة من جوه أيدي 

گبل لا تحجي صوت اشعار رسالة ع قالها أخذه منها بساع فتحه يقرا وانا مديت راسي اعاين رسالة من علي كاتب الها گاتب عمه فتحيلي الباب بدون محد يدري عليج الله 

كتبله هو صار تدلل رادت تحجي رفع اصبعه ع حلگه بمعنى اش 

صار ورا الباب و اشرلها تفتح الباب طب علي كاتلة البرد يفنخ ع اديه يدفيهن ااشر اله ورا الباب النوب فضحني يگلي شكو شمالج تأشرين 

مسده بالصوندة ع رجليه و ضهرة خلاه يكمز صاح علي وكض سجدة يختل وراها 

علي :: عمي والله عيب من الناس صرت بگد الزمال وبعدك كاضلي الصوندة 

غفار :: اي ما دامك صرت زلمة لويش خايف وخاتل مثل الحرمة تعال اگف جدامي و احجيلي وين جنت 

علي :: موش سالفة زلمة عمي بس انا احترمك جي انت عمي شلون تريدني اوكف بوجهك 

غفار :: هسه تجي لو اجيك انا و تعرف لو اجيت شسوي بيك 

:: لا ما اريدن اتعبك انت ابقى بمجانك انا راح اباتن ويا الهواش بالصريفة 

:: عللللي 

سجدة صايرة بينهم و رافعه اديها ما تخلي يطكه 

علي :: عمي شبيك غير جنت ادرس للامتحان يم صاحبي 

:: عفية ابني السبع خوش دراسة بس ما كتلي شني نوع المعسل جان 

:: علج و نعنا... يا معسل عمي جنت ادرس 

بتر كلامه من گرصته سجدة من خاصرته غير انتبه وغير كلامه وسجدة كاضة طرف الصوندة تحاول تأخذها منه بس هو كاضها بكل قوته 

سجدة :: بس هالمرة لخاطري غفار 

هز راسه بـ اي الها وهي صدكت مشت وعلي وراها ... يشمرون بالمشي بعيد عنه وهو وجه يدور وياهم من تقربوا ركض وراهم وهمه ركضوا بعد ما اشوف بس ركض وكلها تصارخ 

وكفنه انا و سجدة ثنينه مثل الدرع بوجه غفار وعلي يتوسل بيه 

:: عمي بس اهدا خل افهمك عليك العباس اسمعني 

شمر الصوندة بعيد و راح كعد ع قنفة رجله تهتز بعصبية واحنه اكفين ناس تاشر الناس بالسكوت حتى لا يسمعنه ويرجع يتعصب طلع باكيت الجكاير راد يدخن رجعها ونهض واحنه گمزنه وياه 

راد يفوت اطشرنه بعيد عن دربه راح للمغسلة توضى وضوء الصلاة اسمعه يتمتم بصوت ناصي استغفر الله هو طبعه كلما يغتاظ يتوضى حتى يهدا 

وعلي ندم شال الصوندة وراح وكف يمه 

علي :: هاك طكني اذا تريد بس لا تغتاظ مني هيج عليك الله 

:: امشي من جدام وجهي علي تالي عمري من وراك الناس تحجي عليَّه ماعرفت اصون أمانة اخوي و مسربته بالملهى 

:: يا ملهى عمي و العباس بالكوفي 

:: ابو محمد مايعرف كوفي اجه جدام الزلم بالديوان يكلي هي هاي أمانة اخوك عايفة بالملهى 

:: جا انت ماتعرف ابو محمد يسمي السفن عرك ابيض 

لطمت ع وجهي و سجدة تاشر تريده يسكت قلص عيونه غفار يتقرب عليه و علي يتراجع وكف ورانه وهو سئله يحجي من بين أسنانه بصوت حاد 

غفار :: ومنين تعرف هذا السم الأبيض انت

علي :: شمالك عمي والله ماعرفه ولا شايفة بس بالاسم احجي ورا اليحجون 

مسح ع وجه أشرت سجدة براسها حتى يروح عليه وهو هم نفذ كلامها راح شبگه و باس راسه هم 

علي :: ابوي انت شعندي غيرك والله ماعرف انامن لون انت مغتاظ مني 

ما حجه وياه و علي ظل يتحكرص يروح منا ويجي منا محتار شلون يراضي اخر شي كال بصوت مبين عليه القهر و الغصة 

:: لو امي و ابوي عايشين ما يظلون مغتاظين مني هلكد 

سجدة :: غفاااار

عاتبته سجدة بنبرة صوتها بنطق اسمه بس بدون كلام هو يفهم عليها 

غفار :: جم مرة كتلك ساعة تسعة انت بالبيت هاا لو كلامي عندك ما يمشي 

علي ::هاي هي اللي تريده يرجالك من باجر من السبعة تلگاني بفراش مثل الدجاج بس المهم ترضى عليه 

هز راسه اي و علي ضحك يشبك بيه و يبوس خده و راسه 

علي :: كول رضيت كول احجي وياي 

غفار :: هاي هي بس اذا تعتاد و... 

:: ما تنعاد والله و روح ابوي 

رحمة :: نامن كلهن بقت اخر وحدة سجدة عدها أوراق تشتغل عليهن و تباوع الي من جوه النظارة مثل اللي لازم عليك لزمة 

سجدة :: اكو شغلة مدوحتني 

:: شنو 

:: من شوكت ذيج الصفحة عدهم نهوة انا اعرف هاي سوالفنة بالجنوب

صفنت بوجها فاتحة حلكي لا اني ولا عروه فكر بهل شي التوتر و الخوف عمناه 

:: لا تخافين بعد صرتي أمانة يمنه شما جانت سالفتج نحميج بدمنه و برواحنه 

غطيت حتى راسي نمت شويه و فزيت احس جسمي نار تطلع منه البنات نايمات خطية اكعدهن انتبهت ع مكان سجدة فارغ طلعت اشوفها وين حتى اطلب منها براسيتول مالكيتها باي مكان 

طلعت بره بالحديقة الهوى بارد كلش قشعر جسمي منه ضليت كاعدة بلكي تنزل حرارتي التفتت ع صوت باب المطبخ انفتح طلعت سجدة لابسه قمصلة فوك الدشداشة باوعتلي مستغربة 

:: تردين شي ليش كاعدة بالبرد 

:: مريضة شوية 

تقربت يمي حنت جذعها و دنكت راسها تباوع بوجهي وهي عاكدة جبينها رفعت ايدها خلتها ع جبيني واني رجفت من برودة ايدها 

:: مصخنة ولج كومي فوتي جوه لا تتمرضين بالزايد 

كومتني خطية و البنات كلهن كعدن اللي تسوي كمادات واللي تدور شراب بالثلاجة اجت عنبر بيدها شيشة شراب 

عنبر :: هذا الشراب مال ازل من تمرضت و بقى بالثلاجة بس انتِ جبيرة بدل الخاشوكة ننطيج خاشوكتين

صفنت عليها تحجي من كل عقلها هاي لو تشاقة براءة و سجدة ما اهتمن يمكن متعودات ع أفكارها... هالبنية ما تنعاف وحدها تخرب معادلة الكون كله النوب صدمتني من فتحتة الشيشة قربتها يم عينها تباوع بيها وكالت 

عنبر :: مابيها باقي بجعبها بس... ادير فوكاها ماي و اغضها الج ؟

براءة فتحت حلگها من الصدمة و سجدة ضربت ع جبينها بيأس 

سجدة :: امشي نامي ولج انتِ من مصحصحة هاله هاله النوب من نعسانة شلون 

عمبر :: اي والله صدك خل انام 

مشت لفراشها خلت الشيشة يم راسها مددت شوية و رفعت راسها فتحت الشيشة شربت الشراب و نامت فزت براءة الها 

:: ولج شسويتي يمدهورة الشراب دار حولة بالثلاجة منتهية صلاحيته 

أشرت الها سجدة بيدها بحركة بمعنى عوفيها 

:: عوفيها ما عليها شي هي المعدة تصفي 

اجت براءة كعدت يم راسي تسوي كمادات باردة ضحكت خجلانة 

براءة :: لا تستغربين موش بوعيها بعدها نعسانة حتى تمشي هي نايمة و مرات نلكاها نايمة يم الحلال بره 

ضحكت سجدة بساع 

سجدة :: تذكرين مرة بالصيف كلنا نايمين بالحوش و مانحس اله الباب نفتح و طلعت لنهر تريد تسبح 

براءة :: النوب من تكعد الصبح فاقدة الذاكرة من نگلها تكول تتبلون عليَّه 

خطية يسولفن عود يلهني من مرضي اجه ابو المحابس بيده علاكة أدوية انطاها الهن شربت و لصبح كاعدة و البنات وياي ساعة تنخفض ساعة تنزل 

ترفة هم كعدت راحت لبيت أهلها شوية و رجعت من شافتني مريضة دارت بعيونها مدري عليمن تدور وكالت 

ترفة :: وين جدة خل تجي تشربج ماي من طاسة الخلاص هسه تكومين بساع 

:: طاسة الخلاص !! 

:: اي شنهي ما تعرفيها هو احنه عدنه طقوس اول هيلة نغسل للمريض ونرش الماي برا حتى يطلع المرض النوب نرشبه من طاشة الخلاص 

:: واذا ما طاب 

:: نحجزله بالفتحة الخامسة اسم الله عليج طبعًا 

بقيت فاتحة حلگي ماكو احد صاحي والله 

عنبر :: كعدت عاينت ع ساعة بـ تسعة دفرت البطانية وكمت اركض عثرت الف عثرة جبت قميصي و صدريتي و الملم بالكتب و الأقلام رحت لصورة الامام علي ع ادعي منه 

و سجدة تعاين الي من لبست حذئي 

:: دوامج ظهري تره 

:: جا ليش ما حجيتي الا خليتيني ابدل 

رجعت نمت بملابسي حتى بس اكعد اروحن للمدرسة نايمة واسمع صوت جيلات ما افرزن بين الحلم و الواقع صوت ركض ما اريدن انهض من مجاني الدافي شوية 

بس من سمعت صوت صريخ طلعت اركض هوسة و صياح و الرمي من كل صوب نشدت براءة شكو 

براءة :: ابن حجية سلوى طلع مؤيد ابن عمي كزار اللي خاطفة و گاتلة و الحجية هدت ع بيت عمي بالسلاح بس عمي كزار ما يقبل يسلمه 

ما نحس اله بابنه ندك حيل فتحت الباب صارت حجية سلوى ذيج البيضة الحلوة وجهه مطعون أسود من قهر فگد ابنها العيون دم غادية نشدتني صوتها متشحرج 

:: وين السيد 

بعدني ما رديت اجه غفار هو عمه أصالة يمشون صار وراها عاينت عليه زاحت عبايتها ع امتونها و نزعت شيلتها ذبتها للكاع وهي رافعة ايدها 

:: يا هربز يا التجف يل ترهب العدوان يبو لسان القوي يل ما يسكته لسان يا عنبر يالتجف يل ماكو بيك دنان يل كاسر فج العيالة اريدن گتال ابني منك اليوم 

شال شيلتها نفضها من التراب خلاها ع راسها و عدلها حباها من راسها ودك صدره الها 

:: للعصر مجتوف ابابج تلگينه 

:: هاي جدم اهلك انطيتني كلمة و موش زلمة اللي يرد بكلمته غفار 

:: هاي شيلتج البسها واكعد بين خواتي اذا خلفت وياج 

طلعت راحت اجانه عمي كزار يرعد عكالة راح صفح و عوجيته ترود 

كزار :: سمعت منطي كلمة للحجية تسلمها ابني... تريد تسلمها ابن عمك غفار 

غفار :: انا ويا الحك عمي و ابنك گاتل ابنها 

:: ويا الغريبة ع ابنك عمك غفار 

:: گتلك ويا الحك انا عمي لو جان ابني من ظهري گتال ابنها هم اسلمنه الها 

كام يرعد عمي وايده ترعش وهو يهدد ويتوعد 

:: بيناتنا العباس ان سلمت ابني و صار عليه شي انسى انت ابن اخوي و ما اخلي صبح يطلع عليك 

:: أعلى ما بخليك اركبه 

ندار ع عمه أصالة رفع ايده و طكاها ع وجهه أخذها غفل شما يصير يرد عليها راد يطكها مرة ثامبة كضاه غفار بساع حط ايده بصدره و دفعه عنها 

غفار ::ايااااااك كزار إياك.. كلشي ولا عمتي هل مرة رفعت ايدك عليها نوبة الآخرة انا هم انسى انت عمي واكسرها الك 

كزار ::هاي تربيتج مو ليل ونهار تنحشين بيه علينا خليتنا خنازير بعيونه 

اعاين ع عمتي واكفة مثل الشاهينة ابد ما اهتزت عدلت طرف شيلتها 

إصالة ::الحمد لله تعرف نفسك شني.. غبينه انت من صلب ابوي وسفه و هضيمة النار خلفت رماد و سايگة عليك النسوان 

عض إصبعه حيل يتوعدها 

كزار :: انا اعلمنج أصالة اذا ما زوجتج لـ حميد و كسرته لهذا خشمج العالي انا موش كزار 

إصالة :: نفس ما كالك غفار أعلى ما بهيلك اركبه 

طلع يرعد وعمه ووغفار واحد عاين لثاني و ابتسموا بشماته عليه 

اعاين ع رحمة واكفة معزولة بزوية عيونها جاحظة تنتقل بين غفار و و عمي انتبهت ع ايدها ترتجف الها و لوحدها 

وطبت للحجرة تركض طبيت وراها تلم ملابسها و تخليهن بجنطتها 

عنبر :: رحمة شمالج وين تردين 

رحمة : ارجع لبيتنا 

:: وين ترجعين موش ابن عمج ناهي عليج

ما ردت عليه مخبوصة بس تريد تطلع من البيت 

رحمة :: واكفة مثل الصنم كلامة ويا المره وهو يوعدها يسلمها قاتل ابنها

و كلامه وياه عمه ان هو ويا الحق خوفني.. خاف اذا عرف قصتي و اجاه نزار اكيد هم راح يسلمني اله بدون مايرف اله جفن 

عنبر تركض وراي تريد تعرف شبيه واني بس اريد اشرد لبست صايتي  طلعت صار.....