رواية الرجل الاخر الفصل الخامس بقلم جوهرة
رمتني العيون السمر دون جنايه
وتركتني دون الانام طريح...
لمن اشكو الهوى لمن اتظلم
اذا كان قاضي الحب مثلي جريح
ــــــــــــــــــــ
ديمه /
حرك سيارته واني عقلي طار ظليت اغلط عليه وهو ساكت يسمعلي بس واضح عليه بظا الغضب بملامح وجهه ، وكف السيارة بفرع بس بيوت والتفت علية وعيونه تخزرني
فارس / ساكتلج عالغلط هذا ولاتشوفيني ماردلج ترا كوة لازم روحي لأن كاعد افور فوران عليج
نترت بعصبية / لا بله شراح تسوي يعني فوك ما خاطفني كوة .
حاول يهديها ومسيطر على غضبه يجاريها ميريد تروح من ايده / يااا مرة اني رايدج بالحلال وشتردين يجرالج هدي اعصابج خل نتفاهم.
سكتت اسمع شيريد يكول ، كمل ويحاول يحجي بهدوء وعيونه تفتر علية / اليوم العصر نعقد سيد وباجر اخذج للسوك اشتريلج الذهب والملابس خوما تبقين لابسه اسود.
نترت بي لأن بكيفه كاعد يخطط / منو كال اني موافقة انت بكيفك تحجي ؟!!!!!
فارس اخذ نفس ومقرر يضرب عالوتر الحساس / ديما فكري زين عمتج مادايمتلج وشفتيها اسوت بيج كدامي وهاي اني رجال غريب عليكم لاتكولين جاي اشمت بس هذا واقع انتي وحدانية وعندج ولد حسبما سمعت من سعد بعده صغير الله يحفظه ويخلي الج وهاي الدنيا قاسية والناس اقسى وماترحم .
ديمه /
صافنه بكلامه افكر ، كلامه صحيح الحياه قاسيه واني تبهذلت هواي وماشفت راحه حتى من تزوجت اهل زوجي جانو شادين وياية ، نسوان حمويني وعمتي مارحمني وعمر الله يرحمه جان ميفك حلكه ويه امه ومن احجي وياه واشكيله يكول تحملي لخاطري
...ااخ ، وابني يرادله اب يدير باله عليه ويحمي ويكون اله سند بعد رب العالمين ، جنت متغزره بسعد عبالي بي خير طلع خركه بيد امه ، والله العظيم لو عندي إمكانية ومال ولا افكر بالزواج لأن جربت حظي اول قسمة كولشي ماحصلت هذه اني ترملت وطلعت بس بابني الله يحفظه الي
،،
فارس سكت وبقى ينتظر رأيها راد يكللها مستعد يربي ابنها ويكون السند الها بس بداخله يخاف ينكث بوعده يعرف روحه باجر عكبه يطلكها بس اطخ براسه رغم هالمره ذابح روحه عليها وبس يريدها توافق لان يحس گلبه يميل الها ، ما ينكر تفكيره بيها شيطاني بس مخلي حاجز بينهم الا يلمسها بالحلال
وانوب كاعده بصفه وحدهم بالسيارة خاف يتهور وتروح تكلب عليه خل شوي تلين وبعدها يعرف شلون يتصرف
ديمه باوعت عليه بهدوء خلته سبل عيونه بيها / ابني ماعوفه وتوعدني تربي
مثل ابنك .
فتح عينه متفاجىء بموافقتها وبلا تردد رغم ممخلي على باله هيج شي كال / يجرالج شتطلبين اني موافق
ديمه سألته / انت متزوج ؟!!
ابتسم ورد وعيونه تريد تاكلها اكل / وحداني وعايش بيت بعقوبة الجديدة هسة اشوفينه ويعجبج ، بس اريد اسألج شكد صارلج ارمله ؟!!!
تنهدت ديمه / سنتين
فارس مسح على لحيته براحة ايده وضيك عينه يفكر / ابنج صغير شكد عمره.
ديمه بهدوء / سنه ونص.
رفعت تك حاجب متفاجىء وحسبتها بعقلي وسالت متفاجىء / شنو السالفه جنتي حامل من توفى رجلج.
اشوفها دنكت راسها ونظرة حزن غيمت على وجها اسمعها تحجي بصوت ناصي / لله يرحمه زواجنا استمر ٣ اشهر وتوفى .
حيل تعاطفت وياها البنت بعدها صغيرة شنو شافت بحياتها وانوب اني اريد ازوجها فترة يربي شلون وكعت وكعه !!!
تنهدت وطرحت نفسي بقوة / شكد عمرج
رفعت راسها وعيونها بيها لمعة دمع / ٢٢
ضغطت شفتي الجوة بسنوني وبقوة لأن حسيت راح اظلمها إذا تزوجتها وبعدين عفتها !!
شغلت السيارة وحجيت وياها / راح اوصلج لشغلج اكيد تأخرتي بس اريد بعد مانزوج ماكو شغل انطي خبر لام الصالون اني سالت كالو تشتغلين بصالون.
اعترضت ديمه / هذا باب رزقي اني كوة يلا لكيت شغل وتريدني اعوفه
التفتت عليها ورجعت انتبه عالشارع / ماكو داعي تشتغلين اني راح اتكفل بعيشتج وبعد الزواج اريدج تتفرغيلي وبس.
ديمه سكتت ماحجت وبداخلها تفكر مبين ميتقبل كلام يريد كلمته التمشي .
دلته بمكان شغلها طبك السيارة يم باب الصالون وقبل متنزل وصاها /؛ انطيني رقمج خل ادك عليج احفظي من تخلصين لاطلعين وحدج دكي عليه اني اوصلج مفهوم ، والعصر اتحضري اجيب الشيخ يعقدلنا.
ديمه /
فكت حلكي مستغربه تصرفه هذا شبي بعد ماتزوجني وكاعد يتأمر والله يا ربي
فارس بود وحنية واضحة بصوته / شلون شفايف منفوخه سديها يمعودة ترا ما اتحمل وداعتج
------------------------♡♡-------------
انتبهت على روحها وخدودها صارن جمر نزلت راسها واني ضحكت
. . . . . . . . . . . .
ديمه بداخلها تحجي عليه يبووو شكد جريء وميستحي .
طبكت شفايفها بقوة وطلعت جهازها نوكيا عادي
فارس ماحب يحرجها يشوف البنات شايلات احدث الموبايلات وهذه باقيه عالقديم يدري بيها شغلها بالصالون زين حب يعرف عنها أكثر / يش باقية على هذا الجهاز.
ديمه /
عباله انحرج من كلامه رديتله الرقم ونترت / مو كل الناس عايشين بترف مثلك
رفع تك حاجب / على كيفج يابه اني اشوفج تشتغلين بصالون مرتب كلت اكيد يحسبولج خوش راتب.
تنهدت وذبت حسرة / عمتي تاخذه كله يادوب اطلع ربع منه لسلفه
ضيك عيونه وحس بضوجه ميعرف سببها يمكن لان ديما راح تصير على ذمته او لأن يشوفها ماكول حقها وهي ساكته متعترض
على عمتها العرفها من اول كعده وياها طماعه ومصلحجيه ،، حب يطمنها ويتقربلها اكثر حتى تأمن بي / ميخالف اني اجيبلج احدث جهاز .
ديمه سكتت محجت وهو سجل رقمها ودك عليها وحفظته نزلت من السيارة ماحرك الا شافها دخلت للصالون يلا طلع
وبداخله يسترجع كلامهم وتصرفها ويا حسها بدت تلين لان معترضت على كلامه .
ـــــــــــــــــــــــ
ملاذ /
ملاذ صرخت بعصام / اذا عندك ذرة رجوله طلكني
عصام وجهه احمر مطعون ومرتبك ايام مرت وهو يحاول يماشيها بس طفح الكيل وياها راسها يابس وعنوديه وانوب تلمح وتعيره برجولته وبحركه حجاها / طالك ياملاذ طلكها بالثلاث هلكد ما عصبته بورجع نتر بيها / والله لخليج تندمين .
منير شافها وجهها اصفر ولمعت حزن بعينها جان يتمنى يسوي شي يساعدها ليمحي هاي النظرة بس ميريد يزعل عصام ولا يعصبه بقى ساكت ليش يتدخل ، رجال ومرته هو شنو موقعه !! اصلا شي محرج الي صار كدامه يتعاركون وصار بينهم غلط ومناوشات كلامه جارحة
،،،،
بيت طلال اخو ملاذ /
كعدت ثريا زوجة طلال بصفها تواسيها لان صار ايام من اطلكت ورجعت ابيت اخوها / طلال حيل ضايج تدرين طيح حظه لعصام
رفعت ديمه راسها تسالها / ليش ؟ اني اصلا بعد ماريده تعذبت بهذا الزواج
ثريا حجت بحنيه واضحه / عيوني انتي لاتفكرين وتعذبين روحج والله انتي غاليه علينا وصدكيني طلال يريد سعادتج.
حجت ملاذ بصوت مليان حزن / لعد ليش ذبني لعصام رغم جنت مموافقه
تنهدت ثريا شايله هم ملاذ / هذه ثاني مرة تتطلكين واكيد راح يرجعج مثل القبلها.
طككت عيونها مصدومة / عزززا شلون ارجعله طلكني بالثلاث .
طمنتها ثريا ..هاي هي ماكو رجعه خل يولي هو الخسر هيج جوهرة مثلج
ثريا سكتت متريد تكللها طلال شلون معصب لان عصام صديقه ويعزه ميريدها تطلك منه واللي صار كولش مضوجه منا أخته حبيبته ومنا صديقه وباقي محتار
نشوان مشغول بملف جدامه عالمكتب ورن جهازه من شاف المتصل ابتسم بفرحه / ياهلا والله اوووف شكد مشتاقلج يعيوني وروحي انتي شلونج يبعد گلبي.
أمه / بخير يعمري طمني عنك ميته على شوفتك والله الليل مانايمه افكر بيك مرتاح مزعوج اكلت لا كلهن يمرن ابالي .
نشوان بحب كبير / اني بخير بس انتي شلونج همام كلكم زينين والله مشتاقلج.
أمه / جذااااب لو مشتاقلي تجي مو بالشهر اشوفك يومين ثلاث وترجع تركض لبغداد .
نشوان / يمممه الله عليج يومين بس !!!! مو ابقى اسبوع يمج هي اجازتي هيج شسوي اني.
أمه / والله انت حيال اريد اني اتقارش وياك .
نشوان / يمه حبيبتي روحي انتي ، تدرين بيه احجي الصدك بس انتي ترديني مكابلج وكاعد.
ام نشوان / هسة معليه ، السالفه الكلتلك عليها فكرت بيها صار فوك الشهر واكثر وانت ساكت .
باوع نشوان بساعته / يمممه فدوه لعيونج الحلوة هذا الحجي مو مال تلفون
بضوجه ردتله لأن تعرف ينهزم منها / باجر تعال نتفاهم .
رفع راسه للسكف وتنهد / اشوف اذا كدرت اخذ اجازة يعني مو اكيد احتمال ما أنزل
ام نشوان/ ايييه لوفها عليه والله انتظرك ادري بيك تكدر ادبر الاجازة بس انت متريد .
ابتسم بحب / الله كريم عيوني انتي .
أمه / دير بالك على روحك يبعد كل اهلي الله يحفظك يعيون امك.
ودعها وگلبه يرف عليها شكد يحب دعائها من تدعيله يرتاح ويأمن.
سند ظهره عالكرسي وبقى يفكر بكلامها ابد متتنازل البراسها تسوي لازم ينزل لبعقوبه وينهي الموضوع حتى يخلص من الملحه مال امه.
وفعلا ثاني يوم نزل ...
الطريق صار ممل ازدحامات وخنكه كلما ينزل إجازة هيج يواجه ، استغفر ربه صح الجو حلو والهوا شوي منعش شهر ال١١ زين الجو بديالى حلو ، جان ازدحام بمدخل المحافظه يم السيطرة يحسه مراح ينتهي شنو السالفه طلع راسه من شباك السيارة وسال واحد يمشي بين السيارات / اخي شنو السالفه ندري ازدحام بس هاي الهوسه شكو ؟!!
ردله الرجال / عيني هذا موكب واحد من المسؤلين وكاطعين الشارع.
نشوان شتمه بصوت ناصي / والله لانعل ا.....
بقى ينقر على الستيرن بأصابيعه بضوجه وين يلا انفتح السير وطلع بسيارته وصل للبيت بنفس مركز المدينه بيتهم
صفط السيارة برا ونزل الغراض جان متسوك للبيت متعود كلما ينزل هيج يتسوك رغم همام ممقصر هم يصرف بس هو متعود ويحب يشوف الفرحه بعيون امه من يدخللها بالمسواك لان دومها تكللهم الله مكطع بيه
عوضني عن فراك ابوكم بيكم.
ومن دخل للكراج استقبلته امه تهلي وترحب فاتحه ايديها اله حظنها بلهفه وفرها وهو يضحك ، امه طولها وسط وناعمه ممبين عليها عمرها فوك الخمسين
ام نشوان / ههههه لك ماما دوختني متبطل سوالفك .
وكف وبقى حاظنها باس راسها وايديها / ياالله شكد مشتاقلج .
دخلوا للبيت كعد عالقنفة الديوان بالهول / وين همام ؟
ام نشوان / راح يجيب نورة من اهلها.
راحت جابتله مي وعصير برتقال تدري بي يحبه فدائما تسويله وتضمه بالمجمده .
كعدت بصفه وباوعت بوجهه بقلق الام ولهفتها / شبيك ماما اشوف وجهك تعبان
حط الكلاص عالطبله / لا موتعبان بس من وصلت دخلت بأزدحام وكوة يلا طلعت حسيت بخنكة
ماجده مقتنعت بكلامه لان خطوط التعب مرسومه على وجهه وجوة عيونه ، وتحسه هاي المرة شويه ضعفان.
نشوان صح تعبان من شغله والمهمات الفوك راسه ميريد يخوفها ويشغل بالها يدري بيها تبقى توهس.
كامت للمطبخ وهي تحجي ويا / دكوم عيني طب اسبح ، ملابسك عالجرباية حظرتها هسه همام ومرته على وصول حتى اصب الغدا شلون مسويتلك اكلات طيبه من هاي اليحبها گلبك.
صاح من الهول / فديتج امي الغالية ميت على طبخج
إم نشوان / اسم الله عليك يگلبي بعيد الشر دفوت اسبح بينما احضر السفرة.
.....
ماجده ام نشوان فرحانه كاعده بين ولدها وجنتها يتغدون وسوالفهم وضحكهم تحب لمتهم حواليها بس المنغص عليها نشوان ميقبل يتزوج بنت خالته تريده
يستقر يرتاح بس هو يدك عناد ، لازم تسوي شي خل تتصل بفاطمه اختها حتى تزورهم هي ورحاب بنتها
وهذا السوته ورا الغدا من شافته كاعد يسولف ويه همام سوت اتصال بأختها .
،،،
دخلت للمطبخ العصر جانت نورة تسوي كيكه .
ام نشوان / ميخالف حبيبتي راح تصير لمه حلوة.
نورة / نشوان درى بيهم يجون.
ام نشوان / لاااا وليش حتى يدري زيارة عاديه اختي وجايه تشوفني
نورة مقتنعت تعرفها تريد تزوح نشوان من بنت اختها ، يربي شلون تقبلها تزوجه من طفله جمالة مدللة وتتموع شمعرفها بالزواج لا وانوب تزوج نشوان الرجال المليان بطولات وثقافة وكشخة وشلون شخصيه معقولة يسمع كلام امه رفعت تك حاجب متفاجئة بعمتها ام زوجها شلون عدها قابلية.
دخلت غرفتها صافنه فززها همام طكطك اصابعه حتى تنتبه / شبي الحلو صافن.
ابتسمتله برقه / ماكو شي حبيبي .
حظنها بحب واضح / تعاي بحظني مشتاقلج.
.......
اتصل نشوان بصديقه صار فترة مشايفه سلم عليه وعرف اخباره ومن خبره عقد
سيد باركله وضحك شوي ويا يدري بصاحبه فارس يخرب عالزواج يوميه متزوج ومطلك عكسه سبحان الله شلون انجمعوا .
سده من صاحبه وكعد يكلب بالريمونت رن الجرس صاحت امه / نشوان ماما افتح الباب يعمري .
شمر الريمونت وطلع يفتح الباب تفاجىء بخالته وزوجها وبنتهم وياهم رحب بيهم
خالته بوسته من خدوده / فدوه حبيبي مشتاقيلك.
ابتعد سوالهم مجال يدخلون /اشكرج خاله نورتو كل الهلا تفضلوا
التفت لرحاب الجانت واكفه ورا امها /شلونج رحاب ،المدرسة شلونها .
ردت بصوت ناصي /زينة.
خالته حجت بسرعه / رحاب الحمدلله شاطرة
سأل بكل برود متقصد / هي اعداديه مو .
جاوبته رحاب / رابع اعدادي.
مشى كدامهن وهو يحجي / يووو وراج طريق طويل للدراسة.
ردت خالته وهي تدخل ورا للاستقبال / ههه عيني السنين ركض متحسها الا تخرجت.
كعد على جها هو وأبو رحاب كعدوا يسولفون ، بعدها شغل شاشه البلازما واخذ الريمونت يكلب بالقنوات .دخلت امه ونورة سلمن وكعدن يسولفن وياهم، نشوان
ساكت بس اذنه يمهن متعجب على امه وطريقة تفكيرها ولا عبالك معلمه ومثقفة يعني مجاي تشوف الفرق رحاب دلوعه وطفله والله يكون مخبل اذا تزوجها ولازم يحط حد لهذه السالفة ، اذا يريد يتزوج يفكر يرتبط بزوجة ومرة مثقفة واعيه شخصيتها قويةهذا اليحبه بالمرة مو طفله ياهو الجاي يوجها .
امه تحاول تستدرجه يحجي وياهن يربي شلون ذكيه وحياله هههه واعي لهاي السوالف بس حب يسلي روحه شوي بعدين يصدمهن.
ورا العشا كعدوا يسولفون ابو رحاب سوالفه حلوة ، رجال هادىء وحباب ميحب يدخل نفسه بشي يشتغل مهندس ابلديه بعقوبة جانوا داخلين بحديث ، همام يحجيلهم عن قضيه شاغلته ، انتهت الزيارة
ومن ودعوهم وطلعوا خالته وصته يجيهم للبيت عالغدا ، ردلها / ان شاء الله اذا كدرت وما اتصلوا بي من الدوام.
دخل غرفته سمع امه الدخلت وسدت الباب وحجت بلهفة / هااا نشوان شنو رايك برحاب شفتها شلون حلوة.
ردلها بهدوء / كولش حلوة .
وجها نور بفرحه وهي تحجي / ها لعد اخطبها الك.
تقدم وجر ايدها وباس راحتها / يووم ما اتزوج رحاب الا اذا تخبلت.
جرت ايدها ونترت / شنووو ؟!!؛ مو هسة كلت حلوة.
على نفس هدوئه وبنبرة واثقة / صحيح ليش انكر ، بس متوالمني الله عليج ماشفتيها حجايتين متعرف تكولهن اصلا متعرف تناقش بشي ، طفلة يا امي
إم نشوان / اسكت ولك شلونها جنها العافية وشلون شايله جمال تخبل.
حاول يقنعها / لخاطر الله عوفي سالفه الزواج هسة.
ركزت بعيونه / كلمة اخيرة ريح امك يعيوني
استعملت هالاسلوب ويا بلكن يقبل.
نشوان / يممه خبري خالتي ما اتزوج رحاب وخل ادير بالها على بنتها وتكمل دراستها مو تزوجها شنو هالخبال هذا والله العظيم مليت من هاي السالفة .
بقت امه تباوع عليه ونظرتها بيها حزن جان ياخذها بحظنه ويبوس خدها / يعمري انتي افهميني ولو شوي.
ضربته على ظهره / افهمك افهمك يعيون امك والله شوكي ولهفتي عليك اريدك تستقر مثل اخوك هي التخليني هيج اتصرف.
استعدل بوكفته وابتسملها / راح يجي اليوم التشوفيني بي متزوح صدكيني.
تنهدت بأمل / يوم عيد وهيج افرح بيك .
ردلها مبتسم / ان شاء الله.
ـــــــــــــــــــ
وافقت على فارس مضطرة بسبب عمتي الهددتني من جهة وفارس ومحاولته
حتى يقنعني من جهة ثانية ما اعرف عنه شي مجرد هو الرجال اليشتغل سعد عنده ومدح بي صعده للقمر مبينه هاي سوالف عمتي تحشي براس سعد حتى يقنعني حجى ويايه ، اني همين مدري شبية وافقت بحجة اضمن نستقبل ابني ، بعد ماعقدنا جان جايب شيخ وشهود اثنين على اساس المقدم والمؤخر عشرة بعشرة بس ماقبل واصر على خمسه بخمسه
اني مجنت مركزة وياهم وماميزت الحجي ولاسمعت شكالوا عقلي جان يودي ويجيب حسيت تورطت وعمتي هي الاخذت تهتم بكل شي وجانت فرحانه ليش متفرح وهي لفطت كم مليون من فارس وبعد ماعرفت شكد المقدم ومؤخر الزواج انقهرت على حظي شاكول بعد هو مشتري وعمتها باعتني
بدم بارد بعد شيفيد الحجي تنهدت بقهر وكلتله من طلب يشوفني حتى نتفق باجر ياخذني للسوك
ديمه / مبروك عليك البيعة
رفع تك حاجب / شنو قصدج وضحي ؟!!
ديمه / على اساس متعرف مسوي روحك بريء وانت متفق ويه عمتي عالمقدم والمؤخر، اني طلبت غير شي وانت سويت البراسك.
رفعت اصبعي بوجهه / تدري بعد مايهمني شي الدنيا لعبت بيه لعب وماعاد اتوقع شي زين منها من يوم يومي والدنيا تفر بيه
فارس حس بنغزة بوسط گلبه من سمع حجيها جانت تحجي بقهر هو جان متعمد يقلل المهر لقناعة بداخله وميريد احد يأثر على قناعته بس من سمع حجيها ضاج وبرر موقفه الها وفعلا جان ناوي يرضيها من يجهزها.
ــــــــــــــ
ثاني يوم بيت عمتها ام سعد /
ام سعد بصوت / ولج ديماااا وين صرتي الرجال بالباب ينتظرج
طلعت ديمه شايله عبدالله شوي مصخن انطته علاج خافض للحرارة وكعدته بالمطبخ يم عمتها.
ديمه بقلق / مجاي تشوفين ابني مريض وين اولي ، اطلعي كوليله متروح وياك
هزت عمتها ايدها ما عجبها كلام ديمه / هي بهي مو هو بكيفج ، رجال هيبه ومال وحال مركضته وراج امشي اطلعيله فوك مراضي بيج جمالة تتبطر.
جاوبتها بحيرة وخوف على ابنها / عمه والله عبودي تعبان وين اعوفه.
ام سعد / ماعليه شي مثل الورد بيش مفاولته شو جيبي تعال بيبي يمي.
انطتها الولد بحظنها وبدت تهز بي حتى ينام.
طلعت ديما لابسه جبه سودا ولافه شالها بترتيب / عمه فدوه خل بالج عليه .
ام سعد وايدها تمسد راس عبودي بحنية لأن مريض / توكلي مابي غير العافية وانتي مو تبقين عوبه شكو بنفسج اشتري .
ديمه بسخرية / هه على اساس خايفه علية.
ام سعد / ولج عوبه غير اريد مصلحتج لو تبقى عليج تبقين مكابلتني لما اموت ، بنية حلوة وصغيرة حرام تدفنين نفسج ، بالله شأحجي وياج ماتقتنعين ديلااا اطلعي للرجال
فارس /
صعدت ديمه بسيارتي بعدما سلمت بصوت ناصي رديتلها بلهفة واني اشوفها تضوي اووف شكد حلوة هذه ممرتبه روحها وهيج يلا اصبر عليها شسوي لما اطخيلي .
اخذتها لسوك الذهب لولد صاحبي واشتريتلها اسوارات وحلقة ومحبس وضاف وياهن مداليه كولش حلوة ، هي ابد منطت رايها بشي
هو بكيفه يختار اني احس روحي مخنوكه بس اريد ارجع للبيت لأن بالي مشغول بابني ،، طلعنا من محل الصايغ واخذني يشتريلي ملابس ومن اعترضت نتر بية / شنو تردين
تكضينها بالاسود ؟!!!
سكتت محجيت اشترى جبب ومن اعترضت سالني / لعد انتي مولابسه جبه ؟!!
ديمه بصوت ناصي / لان حزينه اني ما البس جبب.
فارس رفع حاجبه / لا والله خاتون شجنتي تلبسين.
خزرته بعينها الوسيعه / جاي تصنف حظرتك.
جنت البس بناطير وفساتين .
رفع تك حاجب وعض شفته الجوة / انتي على ذمتي هسة وما اقبل مرتي تصير فرجه للعالم
اعترضت ديمه / شكو بيها اذا لبس مستور
رفع ايده ينهي النقاش / خلاص ماريد اعتراض هو انتي بالجبة واني كوة قابل لاتخليني البسج عباة راس.
ديمه /
هذا من اولها هيج الله يستر من القادم
اشو جان زوجي الله يرحمه شنو البس ميحجي يكول مدام مستور قابل.ااووووف يحظي ، مبين راح يشلع گلبي هذا
ورا مكملوا صعد العلاليك بالسيارة اشترالها هواي اشياء حتى العطور والمكياج .
بالها وگلبها على عبودي خابرت عمتها وطمنتها عليه.
من صعدوا بالسيارة طلع كبل لبعقوبة الجديدة فتحت عينها مستغربه / وين ماخذني.
ماالتفت عليها ردلها / لبيتي.
عاطت برعب / شنووو.
فز جان ينتر بيها / وجع اي والله طرشتي اذني.
مااهتمت عاندت وبقت تحجي / رجعني للبيت منو كال اريد اجي وياك يلا رجعني ابني مريض
مااهتم وبقى مركز بسياقته..
ديمه بغضب / شبيك جاي احجي وياك رجعني.
تنهد وحجى / ديما اهدي اريدج تشوفين البيت الراح تعيشين بي اني اعيش وحدي ومتفق ويه مرة جبيرة عمر تجي مره بالاسبوع تنظفه وتغسل الملابس وتروح لا تبقين معصبه على كلشي هسه تشوفينه ونرجع
سكتت ديما عرفته اعند منها متدري شلون راح يتوالمون. وكفت سيارته يم بيت مو جبير بس طابقين بنائه حديث كولش حلو دخلت متردده فوتها من باب المطبخ شافته نظيف ومرتب حجى بهدوء / البارحه اجت المرة نظفت تعالي شوفي الغرف الباقية
متردده وتحس بارتباك على خوف لان وحدنا
بالبيت حسيت روحي تورطت صح زوجي ثار بعقد سيد س مااحب اكون بهيج موقف البيت كولشي بي حلو واثاثه جديد مبين ،، فزيت من سحب ذراعي وقربني عليه نصيت راسي استحيت لان حيل قريب مني جسمي طبك بجسمه سمعته تنهد بقوة ورفع راسي بين ايديها
بلعت ريك خايفه من قربه حاولت ابتعد بس حاوطني بأيدينه وانقض على شفايفي لثمها بقوة
دوخني ورعبني ضربته على صدره ولا اثرت بي صرت بحظنه مفرفحه بس اريده يعوفني
عبالك جان ينتظر هاي اللحظه الياخذ اللي يتقربلي بيها
فارس /
جنت انتظر هيج فرصة لثمت شفتها بقوة وبودي ما اعوفها والله مثل ميت واحتييت جسمي احتر ماهديتها فتحت شالها
ودنكت على ركبتها اشم بيها وابووس فاقد عليها
ديمه /
تخبلت كمت ارافس برجليه وادفع بي بدون فايده انوب يزيد حسيت راح افقد لان بدا يأثر بية قربه
دفعني على قنفه التخم الي بالصاله ومد ايده يرفعةطرف جبتي من تاكدت شيريد كمت ابجي واضرب بي واتوسله بعدت راسي بقوة / دخيلك فارس عوفني
متحملت بجيت بحركه عبالك روحي راح تطلع بس ماعافني لان احس بي فقد علية
فارس /
فقدت واني تشوف بياضها وجمالها
المخبيته بلبسها سمعت موبايلها يرن باستمرار بجنطتها الوكعت عاطت تريد تنبهني لان جنت فاقد وتتنفس بقوة
ديمه / موبااايلي خااااااف ابني بي شي.
جاااي اكلك موبااايلي .
تحجي وتضرب بي جان يجتف ايديها فوك راسها وزمخ بيها / شبيج تخبلتي ترا انتي مرتي شنو هالدراماا السويتيها.
الجهاز يرن ورنته عالية ، عافها وارتمى عالقنفة يلهث من كثر العاطفة الغزته واثرت بي مجان متوقع هيج تأثير ديما عليه شكد تختلف لخاطر الله قربها يخلي ميت عليها يريدها بالزايد.
سمع شهكتها وكامت تبجي سدت الموبايل وبدت تلف بشالها الوكع على متونها باوعت عليه وبتوسل تقربت منه / عفيه فارس عبودي تخربط وعمتي محتارة بي وسعد مموجود ادك عليه مغلق.
كام عالسريع مسح وجهه وشعره بايدينه انقهر عليها احوالها تخربطت من صدك خوفها قبل شوي من جانت بحظنه بلحظتها لوما دك جهازها جان اخذها وصارت مرته بالفعل وهسة جاي يشوف رجفتها على ابنها امقهر عليها
سوا الطريق من بعقوبه الجديده للقديمه دقايق ومن وكفت السيارة بالباب نزلت تركض ثواني وطلعت بيدها ابنها الوجهه احمر ويون ونفسه ضعيف خلته بحظنها وتبجي ،، فارس من شافه دنك عليه باس راسه وحس بحرارته تجوي طمنها / لاتخافين مابي غير العافية
حاظنه ابنها وتبجي وكل شوي تبوسه وهو بس يون ،، سيارته وكفها بالشارع يم مستشفى الشفاء الاهلي لأن قريب
لميكدر يرجع للصوب الثاني البي المستشفى العام ، سجل دخوليه بأسم المريض تقرب وسألها على كيفه لأن ميريد الموظف يسمعه ممعقوله جاي وياها وميعرف اسم وهوية الولد
جانت ممنتبهة ملتهية بأبنها ، سألها فارس / شسم ابنج الثلاثي
جاوبته ودموعها تجري على خدها / عبدالله عمر عبد الرحمن.
كتب الموظف الاسم ودفع فارس الرسوم الفلوس وجان جامد وعيونه مطككهن بدون ميرمش مشى وياها ودخلوا عالطبيب فحصه وقاس حرارته الجانت ٣٩ طمنهم وحوله غرفه لان راح يخلي تحت الملاحظه لتستقر حالته بعدها يكتبله خروج.
بعد ماحجز فارس غرفه ونيموا عبودي الحرارته نزلت بفضل العلاج جان عنده احتقان بالبلاعيم .والدكتور خاف عليه تتأثر حالته طلب يبقى تحت الملاحظه.
ديما كاعده عالكرسي ولازمه ايده وتبوس بيها فارس يفتر بالغرفه وعقله يودي ويجيب يريد يتاكد لان جاي يشك من سمع الاسم وين وهو يلكفها هي وطايرة التفت على ديما الصافنه بوجه عبودي النايم.
فارس بتساؤل وجدا مهتم / ديما جنتي متزوجه عمر عبد الرحمن عبدالله ال....
رفعت ديما راسها مستغربه هذا شعرفه برجلها الله يرحمه يجوز سعد كاله
هزت راسها بتعب بمعنى اي
تقرب عليها وبعصبيه ويكزكز بسنونه / ولج لا تهزين براسج احجي
ديمه مستغربة / شتريد فارس ترى والله مالي خلك لاي حجي.
فارس تخبل ممتوقع الكاعد يصير وياه / كلتلج احجي.
ديمه / اي زوجي عمر عبد الرحمن عبدالله شنو الجديد يعني.
ضرب على كصته بقوة وبحرقه / اااخ ربي ليش هيج جاي يصير بيه !!!!؟؟
وجهه احمر من القهر والعصبية مصدوم وحدات
فارس / ولج انتي ممستوعبه ااني ....وكمل بغصة واضحة بصوته / اني اصير عمه لابنج عم عبوددي
