رواية الندم مابعد الخطيئة الفصل الخامس بقلم رونق
جان يكول مريم دخلناها عمليه
ليش يابه شبيها
تعال ونسولف مو مالت موبايل
رحت ع السريع للمستشفى
رادوا ينزلون ويايه ماقبلت عيب منهم وجاين تعبانين
وفوكاها زوجتي كاعد تولد
رحت اركض
لكيت الدنيه مكلوبه كلاب
ياربي شكو
رجليه ماتن مااكدر اوصل
كوه وصلت حسيت المسافه شكبرها
وصلت ولكيت الكل مخبوص
ها خير شكو
يابه البنيه متخربطه وماخذيها للدكتوره
جان تكول الحبل السري ملفوف ع ركبة الطفل وخانكه للطفل
لو نلحك علي لو لا
لازم عمليه فوريه
وليش محد خبرني
كمت اصيح
اسكت يابه فضحتنه
هسه وينها
بالعمليه
بقينه ننتظر بس طولت
كلبي نار ومشتعله احس بخوف وقلق مو طبيعي
الي اعرفه العمليه مطول ساعتين
صارلها ساعتين ونص وهي جوه
الكل بقلق
شويه وطلعوا الطفل كالو بعده عايش بس تعبان اخذوا للخدج المعقم
بسرعه وديناه ع ما كملت الاجراءات
رجعت وحبيت اطمان ع مريم
طلعت الدكتوره
كالت حالتها تعبانه وكاعد تنزف
نحتاج دم ع السريع
حتى نديره الها
باللحضه اتبرعت الها
داروا وبعد هم احتاجوا
خابرت جماعتي اضطريت ومن ضمنهم احمد
اجوي 2 اتبرعوا
3 ابطاله داروا الها وهي بعدها
كالت الدكتوره وين زوجها
اجيت اركض
كلتلي تعال ويايه
رحت وياها
كالت يابه تعال تلهج بيك
حاجيها بس شويه متتحمل التعب
تبجي وتسالني ع ابني
بستها براسها
الحمد لله ع السلامه حبيبتي
الله يسلمك
كالت حمودي شلونه
والله زين وحالته مستقره
الله عليك متجذب عليه
لا والله مااجذب
بس كومي بالسلامه بسرعه حتى تكومين اله
بس تبجي
امانه ابني يمك فدوه دير بالك عليه
لج تحجين صدك اخليكم بعيوني انت وياه
كالت صيح الدكتوره كاعد انزف حيل
شفتها صارت صفره
ووجها مخطوف
صحت الدكتوره وطلعتني بره
لحضات وصارت الركضه ع فلس
يدخل دكتور ويطلع دكتور
تقريبا 3 دكاتره ودكتورتين
وره تقريبا ساعه
اجت كالت تعالوا ودعوا المريضه
سوينه العلينه وبقت يم الله
اتخبلنه دخلت امها وامي وابوها وابويه
واني هم دخلت وياهم رجليه ماتن كوه وصلت الها
شفتها بمنظر ماانساه مدى العمر
الوجه اصفر مااعرف ابيض بدون دم
كانو صفرت الدم
امها كامت تبوس بيها وتبجي
عيونها عليه
اتقربت يمها واني ابجي
لج مريم مو اتواعدنا نبقى للموت سويه
كلنه نموت سويه
شلون هيج تسوين بيه
بعد متكدر تحجي
بس عيونها علينه
فدوه دكتور لتخليها تموت
دكتوره الله يخليج ساعديها
لحضات وطلعونه
اتخبلنه
اقل الربع ساعه وطلعوا
جان يكول الدكتور البقيه بحياتكم فقدنه المريضه
اني تخبلت
لا ربي لتعاقبني هيج عقاب
خليني اني اموت مو هي
كمت ابجي مثل النسوان
حيل احبها وهي همين
ماشفت المو زين منها ابد
اكيد حوبت البنيه صديقة شهد
بس كلشي ولا مريم
والله مااريد الطفل اريدها هي بس ياربي عاقبني اني بس لتعاقب غيري باخطائي ولو اني هم عاقبت غير الشخص المخطئ
كلبنه المستشفى
الدكتوره تكول متاذيه
الجاره متقدمه والحبل السري ملتف ع الطفل
وهي عدها فقر دم اصلا
هامله نفسها ممراجعه دكتوره
واثناء العمليه كامت تنزف وابد مسيطرنه عليها ابد
كلبت المستشفى
اني اشتكي عليكم كلكم
جرني ابويه
لك ابني همه شعليهم
البنيه حد يومها
الكل انخبص وانتشر الخبر
كملنه الاجراءات
وطلعنه
جبنه التابوت
اني فاقد مااكدر اوصف شعوري ابد
اخذناها للنجف تقريبا وره صلاة الصبح
غسلنه وكفنه ودفناها
هليت التراب بيدي عليها
اصعب شعور
الكل راحوا وبقيت اني
ابجي
لج مريم شلون انطاج كلبج تعوفينه اني وحمودي بوحدنا
منو النه بعدج
والله لو ادري جان مرحت للزياره ابد
جان شبعت منج
كوه كوموني ورجعنه
بدت مراسيم الفاتحه
وحمودي يوميه بالليل اله اروح اطمأن عليه
همزين بالخدج المعقم
لان ميحتاجون واحد ويا
شهد كالت اني اربي لابنك
خطيه تخاف عليه
خلصت الفاتحه
واني شبه ميت
الطفل بقه اسبوع
بعدها تحول للخدج الثاني
صعدناه فوك
بس ع المغذي عايش
حيل صغير لان بعده بالثامن
بقت شهد وياه
واتعلقت بي
بقه تقريبا اسبوعين داخلين بي
اليوم رجعت من وكت
جنت حيل تعبان ونعسان
كلت لشهد ارتاح واجيج
هستوني نمت
دك جهازي
شهد
الووو
جان تبجي شهد
مرتضى مات حمودي تعالي بسرعه
لا ياربي عقابك كلش قوي مااعتقد راح اتحمله
جان هذا الطفل منطيني امل
رحت للمستشفى
جان تكول مات
حضنتها وكمنه نبجي اثنينه
لج الله مقاسملي اكون اب
ليش كل هذا صار ويايه
مرتضى هاي حوبة روان الله عاقبنه اني وياك
كملت الاجراءات وطلعنه
اجه مهند ورايه
اخذنه الطفل ودفناه
حتى مكدرت اشوفه واشبع منه
بس الله عاباني ع سوايتي
كسرت بخت بنيه وظلمتها
شكد دعت علينه اني وشهد
ادمرت نفسيتي بعد وفاة مريم
كل اسبوع نروح للنجف
خطيه امها متنوصف حالتها
تكول دفنت اثنين بيدي
متنوصف حالتها ابد
احس بذنب مريم ورسول ماتوا بسببي بسبب خطأي
اجه الاربعين
وسوينه عشه وثاني يوم رحنه للنجف
حيل مشتاقلها حبيبتي
ممصدك بهالسهوله تفاركني
جنت متخيلها تبقى ويايه
والله لو ادري هيج جان مفكرت بطفل ابد
شهد حالتها متنوصف ابد
حاولنه وياها ترجع للمدرسه بس مقبلت ابد
خطيه هاي البنيه بيدي دمرت حياتها كلها
حياتي صارت باهته بشكل
كمت الهي نفسي بس بالمحل
وحتى بالليل ابقى لوقت متاخر يله اسده المحل
روان : داومت بالمدرسه والتهيت
ومواجهتني اي مشاكل
بس الصراحه حيل اتعب
دوامي للمغرب يله يخلص وحتى مرات نتعطل
عمار ياخذني يوميه وبابا يرجعني
عمار اشتره سياره اله
بده دوام الجامعات
اسيل طلعت حامل
خاف جانت عايزه التمت
العود متشيله من الكاع
ترجع من الجامعه تنام لليل يله تكعد
تتعشه وترجع لغرفتها
ماما ساكته تكول خطيه تتعب هم دوام وهم حمل
كل شويه مشتهيه ومشتهيه وتعال وديني لاهلي وتعال طلعني
كل خميس وجمعه يم اهلها
والسبت لازم عشاها بالمطعم
مشاكلهم يوم عن يوم تزود
يشكي لماما
يكلها ورطتيني بيها
وسخه ومبهذله
اطيها مكياج ولبس وطلعه
ملابسه خطيه لو اني اغسلهن لو ماما
البيت اني انظفه وماما تطبخ
كل شويه وكل لماما من وراج قشمرتيني
لك ماما اني شمدريني بيها هيج تطلع
اليوم راحت ماما لخاله ومشن لاهلها
وحجن وي امها
ميصير هيج شالعه كلبه للولد
جان تكول قابل شتردون تخدمكم وهي طالبه
مو زين منها تدرس وحامل
لاعبه لعب بيهن
مخليات وطالعات
اكو رقم غريب لاحضته صار فتره يدك عليه
ابد مااجاوب
كام يدز رسائل ع الفايبر
ممكن نتعرف
اني معجب بيج
اني اعرفج ومتعرفيني
انطيته حضر بدون مجاوبته
كلبي لزمني اتوقعت اخو شهد
الافضل ماانطق ولا حرف
لان اخاف مو هو واعم ع نفسي
ثاني يوم اجاني اشعار من رقم ثاني
ليش تنطيني حضر
انطيته حضر مره ثانيه
ثاني يوم هم دز رساله من رقم غريب
احتاريت اكل لعمار لو لا
اخاف اكله ويطلع اخوها لشهد
ويسولفله
لا ممعقوله يسويها معناها نهايته ع ايد عمار
كاتب بالرساله
اني وراج وراج وراج
دخلتج بعقلي وانتهت السالفه
الافضل الج لتنطيني حضر
لان مستعد يوميه اشتري خط ع حسابج
مجاوبته وهم انطيت حضر
بقيت تقريبا اسبوع كامل يوميه خط
بعدها انقطع
فرحت
مااعرف منو هذا وليش هيج يسوي
اجتي عطلة نصف السنه وكضيتها كلها اقره والمدرسين يقرونه
احتاجيت شكم شغله من المكتبه وردت اشتري هديه لصديقتي واغلفها
طلبت من ماما تروح ويايه ماردت للسوك ردت اروح لمنطقه عدنه معروفه هنا بيها محلات ومجمعات ومكاتبً
بابا اخذنه وكناله نرجع مشي لان قريبه علينه مو بعيده
رحت للمكتبه واشتريت الاشياء الاحتاجهن
بعدين حرت بالهديه الاخذها
عيد ميلادها هي
ماكو شي معين ابالي
بقينه نفتر بالمحلات
صار مقابيلي محل موبايلات
كلت لماما خل نمر بي ناخذ هيتفون وردت كفر لجهازي
وماما هم كالت اريد رصيد
دخلنه للمحل وجنت مندمجه بالكفرات اباوع
جان محل جبير وكلشي عدهم
مركزت بالوجوه
اخر شي اختاريت كفر والهيتفون والرصيد
كالو هناك الحساب
وجانت المفاجئه كبالي
وجان اشوف النذل كبالي
جسمي كله كام يرجف
مااعرف شاتصرف
سحبت ماما
خل نطلع مااريد اي شي
خل نتحاسب ماما خلصنه
لا ماما فدوه رجعيهن كلشي مااريد
بس خل نرجع
خل اتحاسب ونرجع
هذا النذل صافن بوجهي
ماما اطلعي راسي وجعني حيل
كال خاله هاكد الفلوس
اني عفتها وردت اطلع
كامت تصيح ماما شبيج اصبري
سمعته يكللها شبيها بنتج خاله
شنو شافت جني وهيج خايفه
لاخاله بس راسها يوجعها
طلعت وجسمي يرجف حيل
اخاف يلحكني
اخاف يتابعني
زين معقوله معرفني
اجتي ماما وتحجي عليه
شبيج اتخبلتي فشلتيني كدام الولد
امشي ماما كلشي مااريد اريد بس ارجع راسي موتني
اتلفت ورايه
شفته طلع بالباب وكف ويباوع عليه
لو احس راح اموت من الخوف
صاح خاله هذا الباقي نسيتي
ماما عوفي الباقي حبابه
هاي شبيج ماما والله شدهتيني
نسيت اخذ الباقي
اجه ورانه انطه لماما الفلوس وعينه عليه
اجرت سياره بسرعه
اجت ماما تمشي سريع
رجعنه واموري كلها متخربطه
لعبت بيه طوبه ماما
حتى نسيت الهديه والله
ماما والله اتخربطت راسي حيموتني فجأه
لعد لوين طلعتيني حتى هديه مااخذتي للبنيه
مو مهم الهديه اوصي عمار يجيبلي
الليل كله افكر مااعرف عرفني لا
ثاني يوم صدك صبحت مريضه يمكن من القلق والخوف
رادوا ياخذوني للدكتور ورفضت
كتلهم مابيه شي
بقيت يومين مريضه
بعدها صرت زينه
كلت لعمار اريد هديه لصديقتي عيد ميلادها
كلي روحي كلي لاسيل خل تنطيج البوكس الي عندي وتعاي
رحت عليها وكتلها
كالت كليله انطيته لاختي
رجعت وكتله
اشو هذا اتخبل
راح للغرفه وكام يحجي ويسبها
نزل
كتله خل يولي مو مشكله
كال لج والله عجيبه هاي بلوه مو مره
مدري منين جابتها امي و ورطتني بيها
جبت البوكس وضميته
سالتني شكم مره عليه
وكتلها مو الي
ع اي اساس تنطي لاختها
ماما كامت تحجي خل يولي قحط متسوى هيج اتعب اعصابك ع شي ميسوه
يوم انت ابقي دافعي واسكتي
مو مليت منها وحتى ملابسي ادري بيج انت تغسليهن
بس احب اكلج شي واحد
الي يوم وانفجر من صدك
عافنه وطلع
وماما رجعت عليه
هسه ارتاحيتي من سويتي مشكله بين اخوج ومرته
مو طلعتج وكتلج اي شي اشتري
هسه ذبيتها بيه متكولين مرته لابنج هي فد وحده متستحي
اشو اروح اداوم واجي الكيها مطلعه ملابس مني وتلبس بكيفها بدون علمي
سدت حلكي
اش ولج فضحتينه
هنه منين الملابس غير من رجلها
هيج صار الحجي ماما
اني بعد مااخذ من عمارابد
لحضات ونزلت وبيدها جنطة ملابس وتبجي
اني بعد مااتحمل اريد لاهلي اروح
شنو يضربني ع مود بوكس قحط هو
اني انطيته لاختي لان محتاجته
اني حجيت
مو قحط حبيبتي بس الاصول تكول اخذي رايي زوجج يله تنطين شي يخصه
اسكتي روان ادري بيج دومج توزينه عليه
من تحجين ويا مدري شتكليله ينكلب عليه ويضربني
بهالاثناء دخل عمار
اتخبل من سمعها
لج شتوز بيه
شنو اني ماافتهم
مو ذبحتيني بس شالعه كلبي
اجي بالليل اريد ارتاح بغرفتي
تكلبيها جحيم عليه
يااريد هيج ويا طلعني ويامطعم
مو خبلتيني
حجت ماما صلوا ع النبي ع كيفكم يمه
اتفاهمو مو هيج
شفت بوكس بيده يخبل
كلي تعالي ورايه روان
تعال دزني لاهلي
مااريد ابقى هنا
روحي اصعدي وخل الليله اتعدي ع سلامه
لا والله اله تاخذني
اسيل اصعدي ولتعاندين لان مو من صالحج
ماما اخذتها وتهدئ بيها
بطنها واصله لخشمها
يمكن شهر الثامن عليها
اخذني للمحل
كمت احجي عليه
والله ماكو داعي وصارت مشكله من ورايه
لو ادري محاجيه شي
اسكتي لج هاي وحده حقيره
من ورا امي هيج كاعد تسوي ورافعه خشمها
شنو مخليه امي خدامه
وشكم مره اني ضاربها
لو ما ابني الي ابطنها جان عرفت شاتصرف
لج ادخلي للغرفه وشوفي القذاره
كال تعاي معليج بيها
جاب البوكس
وجايب ويا ورد مجفف و ورد صناعي
كلي تعالي
انطاني عطر ومكياج شكم وحده
خلطناهن وي الورد المجفف
بعدها رتبنا الورد الصناعي فوكاني
طلعت تجنن من صدك عجبتني
اخر شي رش عطر للبوكس كله
جايب ويا كيس هدايه
كلي هاي الباقي عليج شوفي شريط ورتبيها
جنت حيل فرحانه
حضنته وبوسته
الله يخليك الي عمار
شكرا
باس راسي
ويخليج الي يالغاليه
رحت للغرفه وجنت حيل فرحانه
مالكيت شريط عندي ابد
طلعت فيونكه عندي ورتبتها
حيل متلهفه باجر اشوف ردة فعلها
نسيت حتى سالفة اخو شهد
ثاني يوم اخذني عمار بيده
وكلي من تخلصين خابريني
فعلا احنه جنه خمس بنات
واخواتها
كلش حلوه جانت الحفله وغيرت جو وياهن
بيومها حيل اتونست
طلعت الهديه وجانت مفاجئه للكل
حيل عجبت الكل
بدت ادور بالبوكس
مره طلع العطر
ومره قلم الحمره
ومره صبغ اضافير
هواي اشياء ناعمه بس حيل حلوه
كالن الفكره تخبل
شلون اجت ابالج
والله مو فكرتي فكرت حبيبي اخويه
هنيالج ع اخوج
لج لو هذا الاخو لو لا
وحده كالت متردون جنه ثانيه
لا يمعوده دخيلج هي وحد وشالعه كلبنه
كمنه نضحك شويه وخابرت عمار
اجه اخذني
انطيتهن الكارت مالت عمار
هواي بنات ويايه ياخذن منه
الكل تسالني ع لبسي واني اسويله دعايه خطيه
حيل نجح محله ومجنه متوقعين هيج راح ينجح
اني حتى احذيتي والجنط هو يجيبهن الي
كامن يوصني البنات ينطني القياس والموديل
كام يجيب احذيه وجنط بس للي توصي
بعدين اقترح ع بابا وماما يفتح محل للاحذيه والجنط
بغير مكان ويشغل بي واحد
كلوله بكيفك بس اهم شي كون تحصل ولد امين
كال ان شاء الله
بعد فتره اجه كال لكيت محل وموقعه كلش زين ونظيف ميتعبني
بس عندي مشكله
كناله شنو المشكله
كال يم محل هذا النذل اخو شهد
الكل صاح عوفه خل يولي
اني كلبي نغزني من جاب طاريه
كال يابه صلوا ع النبي
اني مخايف منه ولا عليه بي
بس اخاف تصير حساسيه ابيناتنه لان بيني وبينه محل واحد
بابا ميحب المشاكل كله عوفه ابني واستر علينه
اخاف يستفزك بكلمه وانت اعصاب
لا يابه والله ابد ماعليه بي لو مو يستفزني
اني لغيتهم من قاموس حياتي
وثانيه وبعد راح اخلي ولد بي المحل
يعني صدفه اني اروح للمحل
لان هذا محلي مااستغني عنه
والله ابني لو اتركه للمحل افضل
ابقى هنا بمحلك هذا احسن
يابه لازم واحد يطور نفسه شويه شويه
واني يلزمني محل بهيج موقع تجاري مهم
راح اتوكل ع الله
ولاتنسى احنه مسوين تعهد اثنينه
ماما رفضت رفض نهائي
بس هو كدر يقنعهم
كمله المحل واتسوك قسم من الشورجه
وقسم كال اسافر لتركيا
كال اسوك مناك افضل
بس مو هسه للموسم مالت المدارس
بشهر السابع يعني
احنه هسه بشهر الرابع
زوجته جابت ولد اسمه امير
من البدايه انطته ممه كالت مااكدر ارضعه طبيعي
بقت 10 ايام يم اهلها
رحنه اني وماما وبابا وعمار الهم
دخل اخوها سلم
حسيت عيونه عليه ابد منزلهن
معجبني تصرفه رغم ما بابا وعمار موجودين مهتم الهم
كصني كص حسسني كانو ملابسه شي وديتفرج عليه
توترت حيل
طلبت من ماما نروح
ومقبلوا ابد اله نتعشه
اني كاعده ع اعصابي
كملنه العشا ورجعنه
لليل اجتي رساله
هلووو
قبل لتنطيني حضر احب اكولج
انت حلوه وعاجبتني اتمنى نتواصل اني وياج
اعرف كلشي عنج وبادق التفاصيل
حتى اذا تردين اكلك منو اني
راح اتصل بيج جاوبيني وانياخبرج
بقيت افكر شلون اجاوب لا
زين منو هذا
معقوله اخو شهد
واذا مو اخو شهد منو
اخر شي اجه عمار يمي طلب مني اغسل ملابسه
ترددت اكوله لو لا
اخر شي سولفتله
وكتله يوميه انطي حضر
بهالاثناء دك
عمار جاوب
لك عار وماعندك عرض لوعندك ماازعجت بنات الناس
منطق ولا بحرف باللحضه طبكه
انطه حضر هالمره هو
كلي معرفتي منو
والله ياعمار دائما تجيني رساله وحده وانطي حضر باللحضه
ابد مااجاوب
بس هالمره حسيته شخص يعرفني
قره الرساله وركز
كال هذا شخص مو غريب
يعرف تفاصيل عنج
ماادري والله
ليش مخبرتيني من شوكت انت تضمين عليه
محبيت ازعجك
لج ثوله ياازعاج هذا
بس يتصل من غير رقم خبريني اني راح اتصرف
رحت رتبت غرفته لعمار وغسلت ملابسه
رتبت كنتوره حيل مبهذل
عطلنه حتى نراجع
حبست نفسي بغرفه حتى اقره واركز
جهازي قفلته
مرتضى : مخليت طريقه تعتب عليه لحتى احصل معلومه عن البنيه ماكو
الي عرفت اسمها روان
الصراحه حتى شكلها مااتذكره
الي اعرفه جانت دبدوبه وقزمه ماركزت بشكله
بقيت الهي بنفسي بالشغل
ابويه حاول ويايه اخطب اختها لمريم يعني بنت عمي
اني رفضت هم اعتبرهن اخواتي
وهم مااكدر بعد ارتبط
بلكي يجي يوم واعرف شي عن صديقة شهد
واحاول اصحح غلطي واخطبها واتزوجها
مرت الايام عادي
تقريبا صار سنتين ونص ع الحادثه
جنت كاعد بالمحل
دخلت بنيه هي وامها للمحل
الولد بدوا يراوونها بالحافضات
اني صار تركيزي ع البنيه
مشبه عليها احس بنفسي شايفها بس وين ماادري
البنيه رشيقه وجسمها حلو
وحتى شكلها ياخذ العقل حيل حلوه اكوشي بيها جذبني الها بس مااعرف شنو
اني مركز بيها اريد اتذكر وين شايفها بس ماكو
اجت تقدمت عليه ع مود الحساب
اشو من شافتني عبالك تكهربت
ذبت الغراض بالمحل وكالت بطلت مااريد
بقيت دايخ اكثر
شنو معقوله هم تعرفني
ليش ارتبكت
لعبت طوبه بامها
عافت امها وطلعت من المحل
عجيب امرها قبل لتشوفني جانت طبيعيه
لان جنت مراقبها
بس من شافتني اتخبلت
امها خطيه انطتني 25 وعافت الباقي وركضت وراها
طلعت وراهن وشفتها البنيه حيل متوتره وخايفه مني
دخت اكثر
انطيت الباقي
هنه اخذن تكسي
بعدين اتندمت لو لاحكهن وشايفهن شنو السالفه
بقيت افكر حسبه تاخذني وحسبه تجيبني
معقوله نفسها صديقة شهد
لا مستحيل هي
صحيح مااتذكر شكلها ابد
بس الي اعرفه سمينه بس تنطي شبه
منه بس كلت شبيه كمت اتخيله
هاي عبالك لعابه شجايبها الها
والبنيه حيل حلوه ونازكه بشكل
بقيت 3 ايام ماخذه عقلي هاي السالفه
رابع يوم قررت اراقب بيتهم لان من زمان عفتهم
كلت بلكي بيها امل
رحت الصبح بقيت انتظر ل10 وماكو
بقيت يومين وماكو
بقيت افكر معقوله ماتطلع الصبح ابد
كلت خلي اغير الوقت
رحت وره الغده من مكان بعيد واراقب
فعلا طلعت وجانت الصدمه نفسها البنيه حيل انصدمت
هي واخوها طلعوا
هاي شصاير بيها
اكيد هي
لان من شافتني اتكهربت البنيه وارتبكت حيل
رحت وراهم مااكدر اتقرب
بس شويه وتيهتهم
رجعت للمحل
يعني شلون متغيره وصايره تخبل
صورتها انطبعت بذهني
لازم تخلص العطله واراقبها يوم كامل من الصبح لليل
فعلا راقبتها وطلعت اداوم مسائي
بس مستحيل احصل فرصه احجي وياها لو اخذ رقمها
اخوها بيده ياخذها ويجيبها
هسه لو سايق بيها باب وجواب
بس اخوها لا مستحيل افكر ولو تفكير اتقرب يمها
بقيت بين فتره وفتره وقت الرجعه احاول اراقبها
بلكي يوم يتاخر عليها او مايجي
حتى تصيرلي فرصه
بس ولا يوم اتاخر عليها
منتظم بمواعيده
يمكن انزك وحده هي
كمت اركز بشكلها لحد منطبعت صورتها بعقلي
معقوله كل هالادب والاخلاق اني دنسته بيدي
اني شكد غبي ومفكرت واستعجلت
رحت دمرتها دمار
بس معقوله هي هيج حلوه من زمان
لو لان ضعفانه ماادري
شهد خطيه حابسه نفسها بالغرفه 24 ساعه
امي كالت راح اخذها واسافر لايران
فرحنه وشجعناها اني وابويه
هي هم كالت محتاجه اطلع
سافرن هنه ومرة عمي وبنات عمي اخوات مريم
بقت يمنه ايات اختي
تعتني بلبسنا وباكلنه
حسيت شهد اتغيرت نفسيتها
من اخابرها تسولف وتضحك
مو مثل قبل مكتئبه
كامت تفتح كاميرا ع الواتساب تخابر
تاخذ راينه اني وايات وحتى ابويه
شاجيبلكم وانتوا اختاروا
حسيت الكل نفسيته متغيره
من نخابرهم سوالف وضحك
بقوا 12 يوم لان جانو حمله
رجعوا ورجعت شهد القديمه تقريبا
حيل فرحنه لتغيرها
بدت تحجي ع السفره وشلون جانت حلوه
بدت تسويلي واهس حتى اروح اني
ضحكت كالت والله نفسيتنه تغيرت هناك
هم ينرادلك روحه لهناك وشوف شلون راح ترتاح
الله كريم
جايبين وياهم ملابس النه وحلويات
وره يومين اجتي يمي شهد للغرفه
كالت عفيه تروح لو لا
وين اروح ؟؟؟
لايران غير
ليش شعندج هناك
حباب اكو اشياء بقن بنفسي ماجبتهن واتندمت
كولي هيج هذا الحجي
عبالي صدك ميته عليه وترديني اغير جو
اي والنبي صدك هذا الي ابالي
وكلت بطريقك تجيبلي شكم شغله
الله كريم خل اشوف جماعتي يروحون ويايه لو لا
وره فتره فتح محل يمي احذيه نسائيه وجنط
المحل درجه اولى
عادي مو ابالي المحل ابد
بس الولد الويايه يسولفون عليه
وره تقريبا 10 ايام جنت واكف اباب المحل اني والعامل
وجان اتفاجئ بعمار دخل للمحل
جان يكول الولد العامل هذا صاحب المحل
مااعرف صدفه اجه لو متعمد
يمكن فرحت بهذا الشي
ادري من المستحيل اني ويا نكون اصدقاء بيوم
بس يمكن راح احاول ع مود اخته
الشي الوحيد الي متاكد منه مستحيل يفكرون ينطونياها اذا خطبتها
لان اذيتهم هواي
هو حب اختي حب طاهر ونظيف
واني قضيت عليه بايدي
الولد الويايه عرفوا كالوا هذا نفسه الي اتعاركت ويا
كتلهم ادري بي
كالوا معقوله متعمد يصير هنا
والله مااعرف بس مااعتقد لان وقعنه بالمحكمه
والي يخالف عليه غرامه جبيره فرضتها العشائر
كمت بين فتره وفتره اتردد ع الولد الصانع
حبيت اخذ منه معلومات
كتله الك المحل
كال لا اني اشتغل بيوميتي
المحل لواحد عنده محل ثاني
اخذت صفحته للولد
واتعرفت عليه
دخلت ع صفحته لكيت عمار صديقه
هو هذا المطلوب
دخلت ع صفحته لعمار
كلبت لكيت صورة ولد صغير
الكل يبارك اله
يعني متزوج
لكيت منشور اله مالت الزواج صارله تقريبا اقل السنه من متزوج
اكول شلون الله وفقه عكسي
رغم ماخسر هواي وباع محله والسياره
فتح محل احسن منه واشتره سياره افضل من القديمه
فتح محل ثاني اتزوج وصار عنده ولد
بينما اني واختي خسرنه كلشي
كلت احاول اسلم عليه بلكي نتراضه
لازم احاول ومااايس ابد
كمت اعرف وقت الامتحانات بالضبط
كلت مااخليها تشوفني خاف ترتبك
تركتها بس اخر يوم قررت لازم اخليها تشوفني
وفعلا طلعت هي وبنيه ومنتظره اخوها
مريت يمها بس حسيتها لونها نخطف
اكو خوف مو طبيعي بعيونها من تشوفني
اكيد حقها الي شافته مو هين ابد
لحضات واختفت شفت اخوها اجه
اني هم اختفيت
عبالي احجي وياها
بس مااكدر ابد
اجتي العطله
شفت جماعتي كتلهم خل نسافر
الكل كال لتركيا
اني كتلهم اريد لايران وللشمال يكولون حلوه ونروح لبحر قزوين
كالوا اكو حمله 16 يوم وخدماتهم تخبل هاي الحمله معروفه
والعيد هناك يقضونه بالشمال
كتلهم ياريت خل نغير جو
اتفقنه احنه 4 رحنه سجلنه واخذوا الجوازات
وانطونا موعد
ايام العيد كلهن هناك وره العيد بيومين نرجع
خبرت اهلي
وشهد فرحانه سجلت قائما شكبرها
كتلها ميخالف اتصل بيج وافتح كام وانت كليلي
رتبت اموري بالمحل
وهو اصلا كلشي وصولات مو مالت واحد يتلاعب بيهن
واكو كاميرات
يعني امنت ووصيت مهند يمر للولد ويشوفهم
اجه الموعد وجان موعدنه ب9 بالليل نطلع
ع مود الاجراءات مالت الحدود كالوا بالليل افضل
لان الجو بالليل ابرد
صادف شهر الثامن
المنشأه كامله ناس
صارت هوسه لان الناس يودعون اهلهم
انطلقنه تقريبا ب10 بالليل
وصلنه للحدود واشرولنه
مركزنه ع الناس الويانه لان هواي
دخلنه للحدود الايرانيه وقت اذان الفجر كملنه تاشيره
كالوا صلوا ع مايجهزون السياره
فعلا صلينه وكملنه وصعدنه كلمن بمكانه همه الي صعدونه
انطلقنه طبعا اول مره اروح لايران
والصراحه كلش حلوه منظر الجبال والاشجار الي بالجبال
الانفاق تجنن
وصلنه لاستراحه كالوا اتريكوا
نزلنه نتريك
كاعدين ننتظر الاكل
فجأه جان اشوف كبالي
وجانت صدمة عمري ............
