رواية علي الهامش الفصل السابع بقلم جمانه السعيدي
اسامه...نزلت نمت بغرفة امي اذا متندم على شي بهاي اللحظه متندم لان زوجت احسان
واحد بلا اخلاق ومايصير بعينه كلشي
ليش انطي تعبي حتى يزوج والنوب زوجته نفس أخلاقه ياسبحان الله
بقى احسان نفس طبعه مايطلع للشغل يخلص النهار نايم
وهيه نايمه ويااا ما تنزل للبيت
لا شغل ولا عمل بس ساده باب الغرفه ونايمه
وووين من رحنا نخطبها
كالت اني اشتغل وشايله البيت شيل ووين هسه
تنزل تصعد الاكل فوك طبعا امي الي تطبخ
من يكملون اكل تنزل الصينيه وترجع تصعد بدون ما تغسل ألمواعين
ماتشتغل اي شي بلبيت بس تغسل ملابسها وملابس رجلها
وهاي هيه البيت إذا يحترك مالها شغل بي
اما اني انام بغرفة امي حتى اشرد من هوستهم لان عندي دوام وعندي شغل بلنهار هذا الوقت هما نايمين بي
بليل ارجع حتى ارتاح هما ستوهم كاعدين من النوم
مايبطلون هوسه وطربكه
واني تعبان انام جوه حتى غرفتي مااصعد الها بس لمن ابدل ملابسي
شهرين وكبت العيطه بينهم اسمعه يكول وووين فلوسي
حراميه بت الحراميه هسه اطلعين فلوسي
عبالكم هيه خافت لو ضاجت لا ترد علي الكلمه بعشره
يغلط عليها تغلط اكثر يضربها تضربه
يفشر عليها تفشر علي اكثر وتعد وتصف علي عبالك بت ليل
مو بت ناس
شسوت بي بلحجي صوتها واصل الراس الشارع خلته ينهزم من البيت من كد ما عدت وصفت علي طبعا هو يدري كلش زين الفلوس عدها
بس مايكدر عليها
هو طلع وهيه سدت الباب ونامت وبليل كعدت عادي تتعشى ولا كأنما صاير بينها وبينه شي
اني توقعت تزعل تروح بيت اهلها
رجع احسان يسهر ويشرب مثل قبل
يرجع متأخر بس يدخل تلعب بي لعب حتى بالنعال تضربه اني الصراحه ماضايج على كرامته الي انسحكت
بلعكس فرحان هيه هاي ثوب ومفصل علي
بلكت اطلعله كلب بلكت يخاف منها وينصلح حاله
اذا رجع متأخر ما تخلي يدخل للغرفه
ينام بلمرر فوك بدون فراش بدون غطا
تخلي برا وتدخل تقفل الباب عليها
من اصعد الصبح اغير ملابسي علمود الدوام اشوفه نايم على الكاع
حيل حيل بي يستاهل ذبح نفسه عليها
خاف اني وامي قبل مانكدر علي الله دزله الي تكدر علي
جمانه السعيدي
اتلث اشهر وطلعت حامل
ماتغير شي بس اني صارت المسؤليه عليه اكثر
امي ما تكدر تحمل احسان مسؤليه هذا الطفل لان هو ابو
لا هاي المسؤليه انضافت اليه
بما اني اني الجبير الصبور الي يتحمل الي يكدر على كلشي
لازم اشيل الشيله كلها حدي وهو يرتاح
بدا كلشي ويا الوحم
امي كل يوم متصله عليه
يمه نريد فراوله يمه كيلو زنود الست يمه جيب وياك
دجاج مشوي على الفحم يمه كرزات من هاي الزينه زوجة اخوك تتنسى
اسامه...اني شنو علاقتي كافي اجيب مسواك ياكلون ثنيينهم
بدون مايدفعون فلس ليش اجيبلها الاشياء الي تتوحم عليها
امي...خطيه اخوك ما يجيللها
اسامه...واني شكووو ليش اشيل هاي المسؤليه عنه
امي...انت الجبير انت ابو البيت
مرات امي تطلب اشياء وتكول اليه اني اريد فلان شي بس اني اعرف
مو الها علمود عبير
كلشي اتغير وصار المصرف اكثر المسواك اكثر مواد التنظيف اكثر الدهن والشكر والجاي اكثر
اني اريد اجمعلي كم فلس علمود ازوج اني مو زغير
بس امي ماتقبل تخليني بحساباتها
وتفرض على احسان يتحمل مسؤلية زوجته
اني الي لازم ابقى مثل الزمال اركض واجيب واخلي ومحد
يفكر بيه
بهاي الفتره جنت عصبي حيل ماطايق نفسي
لى متى ابقى شايل هاي المسؤليه كافي اريد ارتاح
اكثر شي قهرني امي ما تفكر بيه وبمستقبلي
اكثر تفكريها بااحسان لازم احسان يكون مرتاح على حسابي
بهاي الفتره صعدت صرت معاون مدير
احنا مدرستنا مختلطه مو الطلاب الاستاذه
عدنا مدرسات اتلاثه بس كبار بلعمر ازغر وحده بيهن ٤٥سنه
الهن غرفة وحدهن والأستاذة الهم غرفه وحدهم
اجتنا مدرسه نقل بنيه شابه عمرها ٢٧ سنه اسمها وجدان
هاي كانت ازغر مدرسه بلمدرسه ازغر من المدرسين والمدرسات
طبعا اني الي دونت المعلومات عنها
اسمها وجدان عمرها ٢٧ سنه منفصله جانت بغير مدرسه
ونقلت المدرستنا
البنيه كانت تبين جديه وشكلها حزين
رغم شكلها حلو ملامحها حلوه وشكلها حيل مرتب
ملابسها محتشمه ولابسه حجاب
بس شكلها حيل حزين الاه اعلم بضروفها
بدت الدوام ويانا بلمدرسه الشي الي ملفت للانتباه
عازله نفسها ما تختلط باي احد
تخلص الدرس وترجع للاداره
طبعا احنا المدرسات متعودين عليهن سوالف وضحك
ونتبادل الحصص بينا
وواحد يسد مكان واحد مرات المدرسات يجيبن اكل وياهن
وينطنا منه
اله هاي مالها شغل باي احد ولا تشاركنا باي شي
ولا تاخذ وتنطي بلكلام ويا اي احد
حتى إذا المدرسات جابن اكل ما تاكل وياهن
المدرسين يسموها المعقده شايله خشمها
بس واحد بيهم استاذ مازن من سمع هيه منفصله
فرح بهذا الخبر مادام منفصله يعني سهله
يعني ممكن يدخل وياها بعلاقه بكل سهوله
هو هذا يموت على النسوان يتحرش بلريحه والجايه
جمانه السعيدي
شكد حاول وياها بس ما انطته مجال ابد
حاول ياخذ حصتها ماقبلت حاول ياخذ رقم تليفونه
بحجة الزماله والصداقه ما قبلت
حاول يعزمها على جاي ماقبلت
حاول يفتح وياها مواضيع ماترد علي ابد
مازن.....اسامه ماتكلي هاي شنو دربها
اسامه...منو
مازن....وجدان لك خبلتني مابقه شي ماحاولت وياها
قافله فد مره
شلون عاجبتني اريدها
اسامه...ليش متعب نفسك يجوز فعلا هيه محترمه وماتريد تحجي ويا اي واحد
مازن....شلون انفصلت اذا هيه هيج زينه ليش عافت زوجها
اسامه...ايجوز مو ادمي
مازن....هو مو ادمي هيه آدميه
اسامه...يعني لازم تدفن نفسها ويا واحد بلا اخلاق حتى تكون ادميه
مازن... اسكت اني اجيت عليك انت شمعرفك بلنسوان
لو عندك معرفه ماوصل عمرك ٣٦ ومامزوج
ولك اني بعمرك ازوجت مرتين وعندي علاقات بكد شعر راسي
اسامه...وتفتخر بهذا الشي عوف البنيه بحالها وروح شوفلك وحده من ثوبك
مازن....بشرفي مااعوفها لازم اعرف قصتها شنو
شنو اعوفها بهلسهوله لا اني ما استسلم بهاي السهوله
ابد
ابق انت هيج لا زواج ولا علاقات شلون مخلص وقتك ماادري
اسامه...اني اذا قررت ارتبط كبل زواج لا ادخل بعلاقه
ولا اصاحب بنات
مازن...اي غشيم راح اطيح بوحده تلعبك تلعب
وواحد غشيم ماعنده اي تجارب
انت صيده سهله
اسامه...بلعكس رب العالمين راح يوفقني لان مااضحك على بنات الناس
ولا أخوض بااعراض العالم راح اخد وحده على كد نيتي
وراح اذكرك
اسامه...وجدان كانت مثل اللغز النا كلنا مو بس المازن
ليش هيج مبتعده وليش ما تخالط
من شنو خايفه
الله اعلم بضروفها شنو شنو الي شافته مخوفها من الناس
بعد زواج احسان بخمس اشهر رجعت للبيت
لاكتني امي بلباب الله يساعدك
اسامه...هله يمه شكووو
امي....اليوم عبير تعبانه واريد اخذها للدكتوره النسائيه نتأكد من الحمل وهم تسوي كم تحليل
اسامه....اي
امي...اريد فلوس اخذها
اسامه...وووين زوجها احسان وين
امي...نايم
اسامه....اي زوجها ياخذها لو بس يعرف ينام وياها
امي...مايقبل يكعد وماعنده فلوس
اسامه...واني شكوووو اني من البدايه كتلكم اني مالي علاقه بهذا الزواج
امي...يمه خاف يصير عليها شي نريد نتأكد من الطفل
اسامه...واني شكوووو فلس ماادفع هو زوجها يحير بيها
بعدين انت ليش هلكد قاسيه
بمكان ما تساعديني اجمع كم فلس حتى ازوج واستقر
مخليتني اشتغل مثل المطي اصرف على احسان
يمه فدوه حسي بيه عمري صار ٣٦ سنه
كافي اني هم اريد ازوج واستقر
عبير زوجها مسؤل عنها خلي مره وحده يشيل المسؤليه
خلي يعرف شنو يعني راح يصير عنده طفل
خلي يحس ويطلع للشغل
عاجبج وضعي هذا الصبح دوام
والعصر شغل ومحد بيكم يقبل يرحمني
جمانه السعيدي
امي...بس هلمره الخاطري اعتبرهن قرضه قرضني
واني ارجعهن الك
اسامه...منيين ترجعيهن بله
اذا الراتب عد استاذ احسان اسف ماعندي
ومراح ادفع فلس واحد
مادام محد يفكر بيه اني مراح افكر باي احد
اريد اجمعلي كم فلس حتى ازوج واستقر
امي...يااا صدك عود
اسامه...اي صدك لعد جذب هاي السالفه بدت ومراح تخلص اول شي وحم وجيب هذا وجيب ذاك
وتالي دكتوره وبعدين الولاده
ترا مو ابني ابن احسان
اني مراح ادفع الف دينار كعدي خل يدبر نفسه
حتى غده مااريد راح اطلع للشغل كبل
يمكن انتي مو امي لا كيتني بلشارع
مرات اشك اكول ذوله مو اهلي مستحيل اكو ام هيج
تفضل واحد على واحد
عفت البيت وطلعت حتى غده ما تغديت
ولله حيل يحز بكلبي تصرف امي هذا
يعني مو كافي زوجته بفلوس زواجي
النوب اتحمل حمل زوجته وولادتها ليش امي تفكر بس بي
ليش شايلتني من حساباتها
الي متى ابقى اشتغل مثل الخادم الراحة احسان
زوجته على حسابي كافي خل يشتغل ويشيل
المسؤليه إلى متى هذا الوضع راح يبقى هيج
اسامه...امي من شأفتني قافل هيج
بدت تسحب مني فلوس بغير طريقه
مثلا يمه اريد ٢٥ عندي واجب
يمه اريد ٥٠ اريد اشتري عبايه عبايتي تعبت
يمه...اريد ١٠٠ دخلت سلفه بلكت تطلع حتى اروح للعمره
كنت انطيها لان امي واني مسؤل عنها
بس ماكنت اعرف هاي الفلوس تروح الإحسان وزوجته من غير طريق
الحد ما سمعتها تكول الزوجت احسان
من يجي اسامه اخذ منه خمسين وانطيج
سويت نفسي ماسمعت
بس دخلت تغديت كعدت كبالي
امي...يمه اريد ٥٠ اريد اروح اسوي سنوني يوجعني
اسامه...ماعندي
امي...صدك
اسامه.. اي صدك ماعندي منيبن اجيبلج
امي.. اول مره تكلي هيج
اسامه.. لان كشفتج تاخذين تعبي وتنطي الإحسان وزوجته
مخليتني مضحك الهم
حرام عليج كافي كافي خافي ربج بيه
إلى متى اشتغل واتعب وهو نايم
امي....ازعل عليك اذا ما تنطيني
اسامه...ازعلي براحتج اذا انتي ما تهتمين التعبي ومستقبلي اني مراح اهتم الزعلج
صار فتره تسحبين مني فلوس وتنطيهم
فكري بيه مثل ما تفكرين بيهم
عفت الاكل وطلعت للشغل تعبت من امي حيل تعبت
إلى متى راح يستمر هذا الوضع
