رواية هل للقدر رأي اخر الفصل السابع بقلم دارين أسامة
_!!!مريم
=يونس؟
كان معاه عساكر ويوسف
كانت ايده متجبسه من اثر الحادثه والايد التانيه ماسكه ورقه
_انت مطلوب القبض عليك
_نعم؟وده بتهمه ايه بقي
_حضرتك صادر بحقك أمر ضبط وإحضار في قضية اختلاس أموال الشركه ، وكمان متهم بتهديد وابتزاز باستخدام صور مفبركة
=الكلام ده مش حقيقي و.....
_الكلام ده تقوله في النيابه مش هنا
=لقيت يا يونس بصلي وغمزلي وانا مقصرتش الصراحه جريت اقف جمبه وانا حاسه ان في معجزه حصلت بجد
=ادهم فعلا اتقبض عليه والمحاميه كاميليا رفعت قضيه وكسبتها فعلا !!!!!
_مبروك عليكي الخلع
=مسكت الورقه وانا مش مصدقه نفسي ،خدت نفس طويل وانا حاسه اني حُره اخيرا
=شكرا بجد انا مش عارفه اقولك ايه
_متشكرنيش هو انا مش قولتلك هطلقك واجوزك سيد سيده ؟
بصت علي يونس اللي كان واقف بعيد بيتكلم في التليفون وانا كمان بصيت عليه
_مبروك مقدماً
وضحكت
=اءءء...لا انتِ فاهمه غلط انا ويونس مجرد اخوات
_معتقدش ان هو كمان بيفكر كده
=بصيت ليها وكنت لسه هتكلم لقيت يونس قرب ف سكت
_ها يلا بينا ولا ايه
=هزيت راسي ب اه ورجعت بصيت للمحاميه
=شكرا تاني انا النهارده اسعد يوم في عمري
_ مبروك عليكي عقبال فرحك تاني
ضحكت وسلمت علي يونس واتحركت
"كنا في العربيه ساكتين كنت لسه هتكلم لقيته هو كمان اتكلم
=قول انت الاول
_لا قولي انتِ الأول عايز اسمعك
= الحقيقه انا مش عارفه ابدأ منين ومش عارفه اشكرك ازاي يا يونس انا من غيرك كان زماني محبوسه جوا قفص من تراب بس انت جيت طلعتني منه ولأول مره !!!احس ان الربيع مش شبه التراب اللي بيجي معاه
"بصلي وكان مبتسم ف اتوترت من نظراته
=انا عارفه انك اتبهدلت معايا ،يعني مره بتلف معايا ومره تقعد تطمني ده غير الحادثه اللي انت اتعرضتلها بسببي
_فداكي اي حاجه يامريم، انا كمان عايز اشكرك انك بقيتي كويسه،كل مره كنت بشوفك بتتوجعي كان بيبقي هاين عليا اروح افطس ادهم ده
"ضحكت عليه"
كان بيبصلي ويرجع يبص للطريق ،لحد ما وقفنا قدام الكافيه بتاعه ،قعدنا علي التربيزه
_ايه رايك في الكافيه؟
=لطيف اوي وهادي ومريح
_مبسوط انه عجبك
= ابتسمت،مش هتقول كنت عايز تقول ايه بقي؟
_في الحقيقه ..
الويتر جه ونزل الكيك والايس كوفي بتاعي والقهوه بتاعت يونس
_بصي بقي الكيك ده لسه نازل جربيه وده الايس كوفي انا عارف انك بتحبيه
= طعمه حلو اوي بجد
_كنت واثق انه هيعجبك
=طب يلا كمل بقي
_مريم .....تتجوزيني؟
فضلت اكُح جامد والأكل وقف في زوري
قام فضل يخبط علي ضهري
_امسكي اشربي انتِ كويسه ..اهدي طيب هو انا كل ما اكلمك تشرقي
=انا كويسه متقلقش، بس يعني محدش بيخض حد كده
_طب ها قولتي ايه؟
=فضلت بصاله وساكته
_لا ارجوكي اتكلمي متفضليش ساكته
=انا آسفه يا يونس بس...
_بس ايه؟
=انت شاب كويس وناجح وشخص ناضج وطيب وجدع
_انا مش بقولك اوصفيني انا بقولك عايز اتجوزك!!
=يونس انا بعتبرك اخويا الكبير وبس
_اخوكي؟؟؟مش معقول كل السنين اللي كنا مع بعض فيها محستيش ب أي مشاعر نحيتي؟
=يونس
_مسمعتيش ضربات قلبي وانا قاعد جمبك؟
مشوفتيش اني ممكن اضحي ب اي حاجه عشانك حتي لو حياتي
=يونس بس
_انا لو مكنتش متأكد ان في مشاعر في قلبك ناحيتي
مكنتش اتكلمت واعترفتلك بحبي
=....
_انا عارف اني كنت جبان وسكت وسيبتك تضيعي مني زمان بس المره دي مش هسيبك،انا متأكد انك بتحبيني زي ما بحبك
=يونس
_مريم بصي في عيني وقوليلي انك مش بتحبيني وانا ساعتها هحترم رغبتك
=سكت وعيني هربت من نظراته اصل هبص في عينه ازاي واقوله اني مش بحبه وانا قلبي مبيطمنش غير في وجوده
_تمام يا مريم
"فضلنا طول الطريق ساكتين بس صمت عن صمت يفرق ،في الأول كان ساكت عشان عايز يعترفلي،ودلوقتي؟ ساكت لان قلبه واجعه
=وصلنا تحت بيتي
_المفروض بكره يبقي معانا إذن نروح البيت اللي كنتي قاعده فيه تاخدي حاجاتك وهدومك هعدي عليكي بكره الصبح
=ملهوش داعي انا ممكن اروح انا وعمر
_مريم ياريت نتعامل عادي زي الاخوات وزي ما قولتي انا المفروض اخوكِ الكبير نامي بدري عشان ننزل بدري بكره
=بس.....
_تصبحي على خير
=نزلت من العربيه وانا قلبي واجعني اوي ،بس ده الصح واللي لازم يحصل
"طلعت البيت حضنت ماما وعمر ومايا واخيرا نمت علي سريري بعد خمس سنين بعيد عن اوضتي ،بس الحقيقيه معرفتش انام من تفكيري في يونس ،قومت صليت وقعدت ادعي ربنا يقدم الخير ودعيتله كتير اوي اوي وقومت كلمت ريم الوحيده اللي بتفهمني
~~~~~~~~~~~~~~~~~~~~~~~~~~~~
كنت قاعد في البلكونه سرحان ،بفكر فيها ،مبتروحش عن بالي ،هو ليه الحب مش بإيدينا وليه مبنعرفش نتحكم في قلبنا؟
_قاعد بتعمل ايه يا حزين
كانت جمله يوسف
=هو ليه مبنعرفش نتحكم في قلوبنا يا يوسف ؟
قولتها وانا بعيط ده عياط مش يوم ولا اتنين ده عياط متراكم بقالوا سنين
_اهدي بس يا يونس حصل ايه
_هو انا متحبش طيب؟ده انا عملت كل حاجه عشانها
_اتنهدت بحزن عليه انا كنت عارف ان ده ممكن يحصل
_اهدي بس يا يونس بكره تلاقي شريكه حياتك اللي بجد
_بس انا عايزها هي
_فضلت ساكت بسمعه
_ده انا لما كنت بروح اتقدم لاي بنت كل مره كنت برفض بسبب انا معرفهوش كنت بفسره اني مش مرتاح
_بس اكتشفت اني بدور عليها هي في كل دول وملقتهاش
_فضل يعيط زي العيال الصغيره
_لو هي نصيبك يا يونس هتتجوزها اهدي كده وخلينا نشوف ايه اللي مكتوب وساعتها هتعرف الخير فين بجد
~~~~~~~~~~~~~~~~~~~~~~~~~~~~
=صحيت تاني يوم الصبح
=صباح الخير يا ماما
_صباح الخير يا حبيبتي
_صباح الخير يا مريومه
=حضنت مايا اختي ،انا كان وحشني الجو وسطكوا اوي
_طب وانا ايه؟ ده انا مسكت في رقبه سي ادهم ده
ضحكنا لما افتكرنا اللي حصل
_بقي رايح تتخانق معاه وماسكله طبق الفاكهة البلاستيك
_اعمل ايه ما اللي لقيته جمبي انا مش فاهم ليه مفيش سكينه جمبي يعني
=اه فعلا ازاي يا ماما منحطش سكاكين في كل حتي
_طب اسكتوا بقي،بقولك صح مش هتروحي تجيبي حاجاتك من البيت؟
=هروح مع يونس
_امم،هي ندي عامله ايه
=رفعت حواجبي ،وانت عايز ايه من ندي يا حبيبي
_هاا لا اصل انتِ عارفه انها ثانويه عامه وكانت بتحب تاخد نصايحي بس مبقتش تتكلم
_تاخد نصايح مين انت؟
_اسكتي شويه
_والله ؟قامت نطت عليه
"فضلوا يضربه بعض وانا واقفه مبتسمه عليهم وروحت نطيت عليهم
=طب وسعولي بقي دوري
فضلنا نضرب في بعض
"يونس جه ونزلت معاه وصلنا الشقه ودخلت وانا مخنوقه و قرفانه
_لو مش مرتاحه احنا ممكن نمشي ونيجي وقت تاني
=لا لا انا عايزه اخلص
"دخلت لميت حاجاتي ومشينا اخيرا
_احم ماما كانت عايزه تسلم عليكي وقالتلي اجيبك معايا
=فضلت بصاله
_لو مش حابه تيجي انا ممكن اقولها اي حاجه
=لا طبعا دي فوفا وحشتني اوي
_طب وابنها؟
=ايه؟
_ايه؟
=احم يلا يا يونس
_انا بقول كده يلا بينا
"وصلنا البيت دخلت وسلمت علي فوفا وندي
_بقي كل دي غيبه ،نسيتي المكرونه بالبشاميل أوام
=وهو انا اقدر بردوا بس كان عليا هم واخيرا خلصته منه
_مع ان المفروض اعتبك علي الطريقه اللي مشيتي بيها بس بعدين بقي
_خلاص يا ماما بقي المهم انك كويسه
=اه الحمد لله انتو عاملين ايه
_الحمدلله يلا بقي هتتغدي معانا النهارده
=مش هينفع والله يا فوفا انا بس جيت اشوفك واطمن عليكي
_لا والله ازعل منك بجد
"في اللحظه دي خرجت سعاد
_ازيك يامريم عامله ايه
=الحمد لله أنتِ عامله ايه يا سعاد
_الحمدلله انتِ لازم تتغدي معانا زي ما ماما قالت ولا نزعل بجد بقي
=خليها مره تانيه
_لا اقعدي انتِ مش ضيفه
"وفعلا كلمت ماما وقولتلها اني هقعد شويه ،كنا بنجهز الأكل انا وندي وفوفا
_تعالي يا مريم عايزاكي
=حاضر ثانيه وجايه
"فاتن وندي بصوا لبعض
_ودي هتبقي عايزها في ايه يا ماما
_مش عارفه اختك شكلها مش هتهدي الا لما تعمل مشكله
_تفتكري عايزه تعتذرلها عن الكلام اللي قالته اخر مره
_يا ختي يارب واهو نخلص بقي
"في البلكونه "
=كنت قاعده انا وسعاد
_انا عايزه اعتذرلك عن الكلام بتاع اخر مره انا فعلا مكنش قصدي انا بس كنت قلقانه علي يونس
=انا فاهمه ده ومش زعلانه منك حقيقي
_بجد مش زعلانه ؟
=اه والله مش زعلانه انتِ كان عندك حق
_طيب بصي عايزه اقولك كلمتين من غير زعل طالما انتِ متفهمه كده
"القلق بدأ يدخل قلبي بس هديت وقررت اسمعها
_انتِ عارفه الفرق بيني وبين يونس قد ايه؟
=عشر سنين تقريبا
_الله ينور عليكِ اهو انا اللي يعتبر مربيه يونس وندي دول عشان كده بعتبر اني عندي اربع عيال مش اتنين
=هزيت راسي وانا بسمع بقيت كلامها اللي مكنتش عامله
حسابه
_انا نفسي افرح بيهم واشوفهم مع اللي قلبهم يختاره ،بس انتِ عارفه ساعات القلب بيختار غلط وزي ما بيقولو الحب أعمي
"كان قصدها عليا واني اختارت غلط
=بصيتلها وكلامها كان عامل زي السيف في قلبي
_عشان كده انا نفسي اشوف يونس متجوز ومخلف بس مع واحده متجوزتش قبل كده وكمان نفسي اشوفه عنده عيال وانتِ عارفه يعني
"بصيتلها وانا بحاول اكتم الدموع اللي في عيني
=متقلقيش يا سعاد انا مش هوافق علي يونس عشان مش عايزه اظلمه معايا وهو فعلا يستحق حد احسن مني
_لا يحبيبتي انا مقصدش كده ابدا انتِ جميله بس انتِ فاهماني صح؟؟
=ابتسمت بحزن ،فاهمكي اكيد
"كنت معدي من عند البلكونه وسمعت كلام سعاد ومريم ،دلوقتي عرفت رفضتني ليه حاولت اكتم عصبيتي وابين ان مفيش حاجه
"اليوم خلص ويونس نزل عشان يوصلني
_مريم
=اممم
بصيتله بفضول
_ممكن اعرف ايه سبب رفض ليا؟
= بلعت ريقي وقولت بهدوء ،انا قولتلك انك زي اخويا ومش هقدر اشوفك غير كده
_يعني مش عشان كلام سعاد ؟
=بصيتله بصدمه
"وقف بالعربيه وبصلي
_ازاي متقوليليش سبب رفضك وتكدبي عليا وانتِ عارفه اني بحبك
=....
_فكرك يعني هبقي مبسوط لو اتجوزت واحده تانيه ؟
=.....
_فكرك هبقي مرتاح لما اخلف عيال وانا مش بحب امهم
=....
_ تفتكري ينفع أظلم قلبي واظلم واحده تانيه معايا
=...
_مريم انا بحبك انتِ ،من واحنا عيال،اول مره اعرف يعني ايه حب كانت معاكِ ،اول مره احس اني خايف علي حد وبالي مشغول بيه علي طول كانت انتِ اول مره اعيط علي حد زي العيال كانت انتِ،يوم ماشوفتك بالفستان الأبيض وانتِ فرحانه وبتضحكي حاولت اتبسط لانك مبسوطه بس مكنتش قادر ،انتِ كمان بتحبيني يبقي ايه المانع تبقي مراتيِ؟؟
"قال كلامه مره واحده وانا الدموع كانت في عيني
=انا مش عايزه اظلمك معايا
_ومين قال انك بتظلميني
=انا فرصه الخلفه عندي مش كبيره
_عشان محصلش نصيب مرتين طب ما يمكن ربنا عمل كده عشان يبقي اول طفل ليكي مني
=بس...
_مفيش بس ،هسألك اخر مره لو موافقتيش هتلاقيني جايب المأذون وجاي بقي يلا
=بصيتله وضحكت
_تتجوزيني؟
=هزيت راسي ب اه وضحكت
_اخيرا يا شيخه
~~~~~~~~~~~~~~~~~~~~~~~~~~~~
"يونس طبعا اتخانق مع سعاد بس بلغهم قراره بدأنا
تجيهز الشقه والعفش واللي كان يونس مستعجل جدا واخيرا النهارده كتب الكتاب
كنت لابسه فستان ابيض وطرحه وده لاني اتحجبت بعد ما يونس اتكلم معايا اني لازم اتحجب عشان ندخل الجنه سوا وناخد ب أيد بعض ونقرب لربنا .
_المأذون جه وبدأ الكتاب وانتهي ب الجمله اللي بتدخل القلب علي طول
قوله ورايا كلكم
كانت كلمه المأذون
_بارك الله لكم
=بارك الله لكم
_وبارك عليكما
=وبارك عليكما
_وجمع بينهما ما في خير
=وجمع بينهما في خير
بدأت الزغاريط والفرحه
يونس قرب مني
ثانيه
اتنين
وحضني جامد اوي مخرجش منه الا بعد حضن طويل،جامد،مريح
كان اسعد يوم في عمري
عدي الوقت وعملنا فرح هادي وكان في كل أهلنا وصحابنا
_شكلك حلو اوي
=بجد يا يونس
_بجد يا قلب يونس
=انا مبسوطه اوي
_مش اسعد مني انا مش مصدق نفسي اخيرا ده انا اتبهدلت عشان اللحظه دي
= لا بس البدله شكلها تحفه اوي عليك
_طبعا يا بنتي انا العريس بقولك
=ضحكت عليه
_هو احنا هنروح البيت امتي ؟
=لسه شويه
_شويه ايه تيجي نقوم نمشي ونروح البيت احنا
=طب والبوفيه انا لسه مكلتش
_بصلي
=ايه جعانه
_متجوز ديناصور انا
=والله؟ طب روحني
_انا بقول كده من الصبح يلا بينا
=لم نفسك بقي
_لا الموضوع ده نشوفه في بيتنا مش هنا
~~~~~~~~~~~~~~~~~~~~~~~~~
عدي ٦شهور وكانت احلي ايام حياتي والنهارده؟اكتشفت اني حامل
جهزت علبه صغيره حطيت فيها صور السونار بتاعت البيبي واللي بالمناسبة تؤام ،احنا عيله بنخلف تؤام بس تقريبا
=يونس عندي ليك مفاجأه
_ ان شاء الله خير ومتكونيش ولعتي في المطبخ
=لا لا متطلعش منك ده انا طبخي تحفه
قرب وشه مني
_مش طبخك بس علي فكره
=طب اتلم بقي ووسع كده ،وامسك
_ايدا هديه ؟
=هزيت راسي
_ وايه الحب ده و .....
فضل ساكت
=يونس ايه المفاجأه ايه أخبارها طيب ....يونس اتكلم
ساكت ليه ؟
_مريم انتِ حامل ؟بجد ؟
=لا وتؤام كمان
شالني لف بيا
_انتِ مش متخيله انا فرحان ازاي بجد، انا هبقي اب؟وانتِ امهم، بصلي
بصلي وكان فرحان مش هنكر اني مبسوطه اوي وخصوصا بعد ما شوفت الفرحه دي في عينه
=يعم وسع دوخت
_اه صح طب اقعدي اقعدي ارتاحي ،ها بقي نفسك تاكلي ايه اقصد يعني بتتوحمي علي ايه
= لا لسه شويه
_انا مبسوط اوي حقيقي الواحد ميعرفش الخير فين
= وانا الخير؟
_انتِ الخير والحلاوة وايدا ايدا جمال وحلاوه ودلال
=ضحكت عليه بس فاجأه افتكرت حاجه
=يونس طب والمذاكره
اه يونس قدملي في الجامعه عشان اكمل
_متقلقيش انا معاكي وموجود علشانك
=يونس انت علي طول موجود عشاني بس تفتكر هعرف اوفق بينهم ؟
_انا متأكد من ده وواثق فيكي وبعدين ما ام ابراهيم موجوده وبتساعدك في البيت وانا جمبك ومش هسيبك
=انا بحبك اوي يا يونس
_حضني جامد ،مش اكتر مني يا عيون يونس
~~~~~~~~~~~~~~~~~~~~~~~~
عدت فتره الحمل واللي يونس مسبنيش لحظه كان بيذاكرلي وبيتهم بيا وب اكلي وهدوم البيبي وأوضه البيبي كان بيتهم ب أصغر حاجه لأكبر حاجه
"وحاليا وبعد سبع سنين معانا تميم وكارما
=يونسسسس تعالي شوف عيالك
_ايه في ايه اهدي بس
=عيالك خلاص جنوني
_غمز للأولاد
_بنت ولد عيب ازاي تزعلوا ماما يلا اعتذروا
=بتاخدني علي قد عقلي يا يونس
_وهو انا اقدر برضوا
=طب وسع كده
_لا أوسع ايه حد يبقي قدامه كيلو بسبوسه ويقول لا
=يونس وسع بس الأكل علي النار
_الاكل يستني عادي ولكن انا مش هستني
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
