رواية قيود العوف الفصل السابع 7 بقلم ريتا

. 

ترجَع مغيّم حِزن وتمد حَسرتك 

يطِيح ليل الله ضوَه وتبيّن دَمعتك 

تبچي وتگلب الرسَايل لا هَلك يدروُن بِيك

و لا حَبيب الينكسر گلبه عَليك

ترجَع تگلب سنِينك تبچي حَد ما تغفىٰ عِينك. 

شبابات صوتوا دوسوا علىٰ النجمَة 🤏🏻

<_______________________>

''

- چنة گاعدين انه وياه وهَو يدخن وصافن مو يمَي ابد

نزلت راسي أدري بيه هسة كل تفكيره بيها وجاي يصفنلها ويمخمخها منين كل الجهات لحد ماتصير مثل العجينة بأيدة يركبها شلون مايريد...

أخذت نفس ونكثت ملابسي تقربت عليه دغيتة بعكسي ألتفت علي وطبگ حواجبة ..

- شبيَك مطي 

- سيَدي وعلي إله اعزمك اليَوم علىٰ حسابي 

- لازم فلوسَك هواي

- يـابه تروحلك فدوه الفلوس 

قلص عيونَه وگال..

- خير ما مرتاحلك قاسم شوراك

- لا سيَدي وعلي شفتَك تصفن هواي گلت مبيَن جوعان 

ضحك وگال

- والله هي مال جوعان جوعان بس الصفنَة مو يم الجوعة 

- چا بيَمن صافن يا بعد گلبي 

- قاسم شتريد مو گتلك ما مرتاحلك 

- مو جاي اللطف الجو الك حتى نروح ناكل مندي وراه بطل لبن ايبااااه علىٰ الدنيا السلام..

- شگد صارن چم مليون؟ 

-ماحاسبهن

-تستاهل الرانج تستاهل

-اخخ انطيييها ماااي عيوني 

-لا تاكل مندي ماتشتريها هيج كثر نواشف تجيبها أسرع 

-ما أگدر بعد علست نعولة هواي علمودها أريد اريع هلمرة

ذب نفس عمييييييق ورفع راسة يفر بعيونة... 

- سيدي بعدك تفكر بيَهم وعلي ماايسووون 

                                            

              

                    

- ولك قاسسسسمم تجار مخدرات وعصابات ويتاجرون بالبنات 

ومااا يسووووون ولككك 

- لا افتهمتني غلططط 

-فهمني بلة 

-بعد روحي اقصد مايسوون تصفن علمود خطة انتَ بنص المهمة تغير الخطة كلها وتلوفها علينا وعليهم هاي سوالفك 

- هلمرة تختلف جاي ارسمها من أصغر رأس لأكبرهم ..

-  كل شلة بمحافظة ليگلك دودة متطشرين وين ماكو مكان تلگالهم حصة بيه

- اي هو هو هذا المطلوب الروس الصغار اللگفهم انا أريد أبتر أيد الراس الجبير الجاي تنمد لهلطليان ... 

- سهلة وعلي يا بعد گلبي تعال ناكل منَدي ونشرب لبن وراها نصفن الها 

*******

تركها يمي علىٰ شمرتها وهَي تصرخ وتباوع بخوف سد الباب علينا وراح .. باوعَت الها بنيَة تخبل وشعرها اسود وناعَمة كُلش 

- بس أنتبهت عليَها لابسة ملابس مدرسة !

بقت عيوني مثبتة عليها رفعت أيديها مسحتهن وبچت متألمة أذاها الحيوان شمرها حيل ودحچت أيديها بالأرض حيل ردت اكسر حاجز الصَمت الي بيناتنا ..

-جمُان: شنو اسمج أنتِ 

-روان 

باوعَت الها صغيرة ياربي الله ينتقم منكم انعصر گـلبي عليها.. 

-جُمان: شلون صرتي بين ايديَهم شلون اخذوج !

-روان: جاوبت وهي تبچي من مدرستي من مدرستي 

شهگت وگالت بتقطع..

-منو هذووول وشيردووون مني 

انهضمت ولويت شفتي شجاوبها شحچي شگول اخخ بسس أحتار بنفسي الي كل يوم شامريني بمُكان لو أحتار بالداشوفة والظلم والطغيان وين واصلين بيه طفلة أخذوها من مدرستهااا اخخ ياقهررري..

ابتسمت بحزن وحچيت وياها...

-شگد عمرج أنتِ روان 

-روان: 16 

عضيت شفتي بحرگة احترگ گـلبي زيادة صارت تتلفت بخوف وتباوع للمُكان.. 

-روان: عفية شنو يردون مني والله ممسوية شي وعاقلة وماا أذي احد

- محد بينَا مسَوية شيء ، ومحد الها ذنب بالديصير 

            

              

                    

-روان: لعد منو هذول 

بعدني أريد اسولف وفاتوا علينا درت وجهي وسكتت أردف وگال..

-مديوي: اي كملي سالفتج ليش گطعتيها

-زعران: شعندها هي هاي 

-حنتوش: لا يجوز جاي تسولفلها شلون لعبنا وياها 

حچاها وغمز الي مقرف مقرف حقييير ...كُل مَا اشوف وجهة النذل أحس الألم يزيد عليَه وينعاد الموقف وصَوت الحزام والرنَة تدگ بأذني وجعة لهسة بيه ..

گالت الهم بدموع وهي تشهگ وتناشغ..

-روان: عفية رجعوني لأهلي يدورون عليه هسَة 

-مديوي: والله نرجعج بس بشَرط وكون توافقين عليَه

-روان: شنو ؟ 

تقدم بحبابة ولبابة گعد گبالها وصار يسولف وياها بنفس الموضوع وبهدوء هزيت راسي مصدومة صاروا يتبعون طرق غير الضرب والتهديد هسة صاروا يتعاملون بالأسلوب ونبرة الصوت...

غمضت عيوني واتنهدت الله اكبر عليكم من بشر هاي البنات بأيديكم لعبة عجَيب بعدهي لسه مابالغة السن القانوني حتىٰ وحايرين شلون يستخدمونها كوسيَلة لمطلبهم..

-مديوي: ها رونة وهسة شگلتي؟

-روان: لاااا ماا اروح وي رجال ماا اعرفة لاااا

-حنتوش: ولچ يخبل وشكله حلو وكل شيء يجيبلج وهي ليلة وحده وترجعين لأهلج 

-زعران: اي لو تردين تبقين هنا وي هايَ باوعيلها شلون زرگة من الضرب

باوعتلي وهي تشهگ وتبچي هزت راسها وهو يگلها...

-مديوي: باعي الج مهلة منا لليل تفكرين بيَها وضحك وحچة بصوت ناعم وياها

-مديوي: وترجعين لأهلج ولأمج وخواتج هَي شغلة يَوم واحد بس وتخلص

-روان: بس اني اخاف 

-زعران: حباب ويخبل وينطيج فلوووووس هوووواي بس گعدي يمَه 

-مديوي: خو ما تردين تموتين وانتِ صغيرة واهلج عايشين وخواتج عايشات 

-اخااففف

-مديوي: تردين تموتين ؟ 

گال الكلمة وباوعلها رجع گال مرة ثانية...

-گولي تردين تموتين 

            

              

                    

-لااااا مااا أريد أموت 

غطت وجهة بأيديها تشهگ وتغص .. شگد انهضمت وانقهرت فوگ قهري حسبي الله عليهم..

-زين لعد هسة عندنا شغل بالليل راجعين مو تغيرين رأيج ياحلوة مو لصالحج أبد..

هزت راسها بصمت طلعوا وجرت نفس عميق بمكانهَا باوعتلي بدموع ..

-جُمان: راح تقبلين ترحين !

-روان: اي اي اقبل اروح لأن اني اني أريد أهلي اريد ارجع

-جُمان: حرامات تخسرين شبابج وتطيعينهم لتروحين 

انتفضت وأردفت بصوت عاالي بوجهي..

-روان: اني موو أنتِ باعي شنو مسوين بيَج باعي حالج 

-جُمان: حالي هذا أشرف واحسن من حَالي بعد ماا اروح وياهم واسوي اليردونة

-روان: بس اني ماا اتحمل ماا اتحمل اخاف اخاف يضربوني ويموتوني

-تتوقعين أهلج راح يقبلون ويفتخرون بيج لو عرفوا بالي سويتي؟

- اروح وياهم اروح لتحچين ويايَة 

غطت وجهة وصَارت تبچي 

باوعت إلها ما أگدر الومها صغيرة ويشوهون بعقلها .. طبعاً توافق منو اليوم تهون عليَها روحها وتعيش بنص العذاب وبنص تهديدهم وسلاحهم فوگ راسَها شلون متقبل تروح 

شنو فهمت من حياتها وشنو الي استوعبتَة بعدهي صغيرة حتىٰ السن القانوني مابالغتة وهلگد ماروحها طفولية سايروها خوفوها وقنعوها بأسلوبهم والأكثر ارتعبت وخافت ومن شافت السلاح لو احچي وياها للصبح متقتنع بعد ..

-غمضَت عيوني وانتچيت علىٰ الحايط ، والله الشرف عزيز ومايهون علىٰ العاش عمره يحافظ عليَه

فززتنَي من سَولفت وگالت 

-روان: چنة اني وماما وبابا واخواتي كُل يوم عصرية نسَوي چاي وكيك

ونگعد يَم الصَوبة وبابا يسَولف النة علىٰ ايام قبل 

رسمَت ابتسَامة علىٰ وجهة بحزن وكملت..

- نموت علىٰ سوالف بابا وبالخصوص ايام قبل وشَلون چان يحب ماما

وبالگوا اخذَوا بعض بالدفرات 

ابتسَمت وگلتلها ..

-جُمان: شَلون بله؟

-روان: چان بابا محد يحبَة من اهل ماما وكم مرة تقدم لخطَبة ماما بس محد ينطي وابوها ميريدة وماما چانت تموت عليَه وتحبه .. ههههههههههه مو عرفوا بماما تلتقي بيَه بالختلة خلوها متطلع بعد وبابا اتخبل شلون يعرف اخبارها گام يكتب رسَالة ويشمَرها الها من الحايط ..

            

              

                    

-جُمان: شلون يعرف راح توگع بأيدها

-روان: يدزلها طفل قبل ميذب الرسالة علمود توگف يم الحايط وتاخذها

-جُمان: ضحكت وگلتلها حُب قبل طاهر ونقَي وحقيقي قلة منَه بهلوكت

-روان: بابا يحب امي بشَكل مرة اتمرضَت ووگعت بالفراش 

عاف شغلة وكُل شيء وگعد يَمها وكُل شويَة يسألها شنو حالج ؟ شنو بيج

اذا تسأليني شنو اكثر شيء ورثتي من اهلج او تأثرتي بيه 

راح اگلج الحنيَة اهلي حنينين كُلش احنة بالعائلة واحد گلبة ع گلب الثاني

علمود هيچ اني افكر بحالهم هسَة شصار بيهم اريد ارجع اني اريد ارجع

غطَت وجهة بأيديها ورجعت صارت تشهگ وترجف..

-روان: ماا اريد اروح وياهم اخاف بس اريد ارجع وماكو غير هلحل

غمضت عيوني متألمة علىٰ وضعها .. شحچي شگول أعرف كل شيء راح احچي ماراح يفيد ولا راح تاخذ بحچيي تريد أهلها تريد تعيش..

انداريت والتهيت بجروحي صار ياكل بيَه أكل هذا الوجع راح يقضي عليَه من كثر التعب الي بجسَمي والي بروحي حتىٰ واني شبعانة نوم عيوني تغمَض وحدها وجسَمي هش طول اليَوم والجروح الي بجسمي تستغيث..

تريد احد يداويَها بس ويَن ؟ حتىٰ اني ماا اگدر اداوي جروحي 

اباوع الهن زين الأثر بمرور الأيام يخف اني اثاري جاي تزيد وجاي توضح أكثر اباوع لرجلي شلون  بعد يَوم تورم وجاي يزيد وضعة للاسوء صار يطلع منه مي 

بقَت تدگ براسَي حچايتة من گال خليَه يلتهب ويگصونها نغزني گـلبي خفت جرح عميق ملتهب وجاي يتلوث أكثر لا جاي يتعقم ولا يتنظف ..

سيطر الخوف علىٰ كُل جسمي أخذت حجابي باوعت اله متشگك وكل وجهة بيه مشگكة بس ماخليت أحد يسحبة مني شگيت قطعة منَه وشديتها علىٰ رجَلي حيل وضغطَت اريد معقم..

اريد صيدلية بس صيدلية اداوي رجَلي بيها راح اموت اريد اعقم جرحي

وانظفة علمود مايزيد اللتهابة راح اموت ياربي ، بقيَت اللوب وهي گاعدة تباوعلي 

- شبيَج جسمج يوجعج مو؟ شوفي ايديج مورمة 

هزيت إلها براسي صرت أنهض واگعد من الوجع وراح اتسودن اريد اتحرك اريد اطلع مليَت بعد ما اگدر أريد صرفة أريد حل .. بعد ما أتحمل وين تصير خل تصير ..

حلين وماكو غيرهن .. لو أشرد لو أموت .. توعدت وگعدت أصفن وأفكر شلون وبيا طريقة زين .. نهضت تقربت للباب صرت اباوع اله ينقفل بكل مرة شفت زرف تقربت عليه كومة أشياء حديد بالأرض مشمورة وهوسة صارت عيني علىٰ حديدة تفيدني اكدر أكسر القفل بيها بس شلون احصلهااا شلون..

            

              

                    

ومن يجون يفوتون مسلحين من كل الجهات واحدهم اسلحتة بخصرة من الجهتين ويفوت شلون ياربي والله صعبة ساعدني دخيلك والله راح اموت..

بقَيت اللوب علىٰ السالفة وحطيَتها براسي لو مدري شيصير اشرد اشرد حَتىٰ لو مَا اتحمل واموت هم ميخالف بس المهم اطلع منا.. 

 صَار الليل وانفتح البَاب دخلولهَا وهَي بين فرحانة وبين الخايفة 

شيء منها فرحان راح ترجع للحضن الي تريدة وشيء منها خايف من المجهول الي ينتظرها هناك وفعلاً مثل ما گالولها لو أسوأ وأتعس بعد.. 

نهضت وقبل ماتطلع وگفت باوعت الي بعيون مدمعة أجت سريع حضنتني غمضت عيوني وگالت..

-روان: أنتِ هم رجعي مثلي والله راح تموتين 

ابتسَمت بوجهة ، وضحكت الي وراحَت صارت عيني علىٰ الباب قفلة الله ياخذهمم شلووون شلوون..

مَن توصل لمرحَلة من التعب والارهاق وتريد بس تستقر وترتاح 

مرحلة ينتهي بيَها كلامك وي الي حواليَك لأن ماتلگىٰ عندك القدرة 

والطاقة حتى ترد علىٰ المقابل وتناقش ، مرحلة طاقتك تصفر بيَها

كُل الي تريَدة وتطَمح أله الهدوء الراحَة النَوم العميييييق الصلاة 

اشَياء بسيَطة بس صَارت صعبَة عليَه أشياء ماجاي احصَلها

لا احصل الهدوء ولا الراحة والووجع يدگ بيَه دگ ياكلني اكل 

بَقت عيني علىٰ الباب كُل ما ينفتح اگول هايَة فرصتي بس يخيب املي

من اشوف الي يدخل بأيدة سَلاح ويسَد الباب بسَرعة 

قررت أتبع غير خطة وأتبعها بهاي الأيام يجون بس صرت اتجنبهم وما ارد عليَهم ولا اجادلهم لأن تعبت وجسمي هلك من الضرب .. بس رغم هذا ماتركوني ولا عتقوني بقوا يجوني يحچون ويَاية ويسَبون بيَه ويدفرون واني منطَيتهم اذن الطرشة ..

استغربوا من تصرفاتي ومن برودي وماخذَة ركن وعايفتَهم

 يسوون الي يسوونة بس جسَد يمَهم روح مابيَه شافوني هيج بردت وبهتت حيل صاروا اغلب الأحيان كُلهم يدخلون فد مرة ويسَولفون بس أشياء سطحية..

صرت اركز بكُل حچاية يحچونَها واخزنها بمخَي اريد انتقم منهم 

اريد اجمَع عنهم معلومات واخذ منَهم حچي ، قررت استمر علىٰ نفس البرود وماا احاچيهم ولا أسوي اي شيء عكس هذا ..

صرت  كُل مايدخلون ابقىٰ علىٰ نفَس ركني وعزلتي وانزل راسَي بين رجلية وابقي ذاني يَمهم وهم يسولفون بقيت أنتبه وأركز أكثر علىٰ مواضيعهم الي يفتحونها..

- چانوا يتحفظون علىٰ الكلام يحچون يَمي وينتبهون علىٰ حچيهم ويطَلعون يكملَون حچيهم برة ، حاولت اجمع معلومات عنَهم حاولت اعرف أسماء 

واماكن وخزنتها بعقلي ، 

            

              

                    

اتذكرت شخصيتي الي اني بيها ومجازفتي بصَحتي وبَراحتي مقابل قرار صح وأخذته وجاي اتحمل نتيَجتة المهُلكة لكن قرار مقتنعة اني واخذت  بكلام امي من چانت تگول الي ..

-امل: جُمان ماما دائمًا خلي القرار ألج بالاختيار 

-جُمان: ماما احيانًا نتخذ قرارتنا بنفسنا بس من دون رغبة وقبول حقيقي بالقرار 

-امل: جُمان ماما اذا ما اتعودتي تتخذين قراراتج بنفسَج ماراح تنضجين ولا تستقرين ولا ترتاحين بالمكان الي أنتِ بيه 

فكري بقرارج من جهتين من جهة سلبيَاتة للقرار ومن جهة ايجابياتة 

اياً كان قرارج بس إذا اتخذتيه بقبول وقناعة راح تگدرين تتحملين مسؤليتة مهما كانت 

فرضي قرارج علىٰ اي شيء وخلي إصرارج علىٰ الشيء الي تردينة مستمر 

اذا قرار صح وأن عارضج العالم كُله بيه مادامَه صح امشَي بيه 

ولا يهمج احد بالأخير ما يصح ألا الصحيح 

ابتسمت ببهتان واتنهددت واخذت نفس عميييييييق وجسَمي يهتز..

انفتح الباب ودخل زعران باوعَت إله كُل شيء ماشايل لا سلاح 

وايده فارغة فَتح الباب ودخل ما سَده  شحَيت نظري عنه حتى لا ينتبه الي اتقرب وگال ..

-زعران: شنو لازم مطولتَها يمنة سَت جُمان ؟ 

-جُمان: والله ياريَت يصير عندكم احسَاس وتعوفوني شتردون تسوين بيَه بعد اكثر ؟ شوهتوني بالضرب والتعذيب ورجلي احسَها دتنشَل شتردوووون بعد!!!

ضحك وگال 

-زعران: وانتِ هذا حاسَبتة عقاب ؟ ترىٰ هاي مقبلات محد حاط عقلة وياچ ومحد فارغ الچ كُلنا ملتهين وعندَنا سالفة براسنا صدگيني بس نخلصها

ساعتها تحمدين ربچ علىٰ هذن 

-جُمان:هههههه ماا انصدم المجرم مو انسان طبيعي مريض مريض 

لذلك كل شيء اتوقع منَه وانتوا مرضىٰ ماعليَكم عتب بس نصيَحة مني اتعالجوا ضروري تتعالجون 

- حسَيت طبلة اذني انزرفت من قوة الراشَدي الي اجاني فر وجهي فر 

وخدي اشَتعل نار شدد ايديَه علىٰ رقبتي خنگني موووتني ظليت ارافس بيَه بس اريد يوخر ايده بقىٰ مشدد علىٰ قبضَتة وگال :

-زعران: هسَة اراويج المريض شنو يسَوي ، لوىٰ ايدي ورجعها ليورا وشمرني بالگاع صار مخبل واتقدم عليَه لزم ملابسَي واني ادفر وارفس بيَه واريده يعووووفني بس ماكو فقد وبغير عالم صَار ! 

"من البارت القادم" 

ابتسمت براحة وهزيت راسي اتشكرت من الشباب وطلعت من الغرفة متوجه للمكتب دگيت الباب ودخلت اندار ألي منتظر مني حچاية ..

ضحكت وگلتلة سيدي تم تحديد موقعهم