رواية علي الهامش الفصل التاسع بقلم جمانه السعيدي
اسامه...بلكوه كدرت انام صوت التلفزيون عالي جان طردتهم ثنيينهم من بيتي بس امي تزعل عليه
واني كلشي ولا زعل امي امي امانه بكربتي واخاف
تزعل عليه واخسر توفيق رب العالمين
الصراحه اني حيل ماشيه اموري ورب العالمين ميسر كلشي بطريقي وباب الرزق مفتوح بوجهي
كل هذا لان امي راضيه عليه
اما احسان وعبير مال واحد يشمرهم بلشارع حتى يعرفون الله حق
وين لاكين سكن واكل وعيشه مريحه ولا حسيب ولا رقيب
بس هيج بشر ما تغزر وياهم النعمه ابد
ثاني يوم داومت بلمدرسه وسجلت اجازه الوجدان
للساعه عشره اجاني مازن
مازن...هااا اليوم وجدان ماكووو
اسامه....انت ليش مركز وياها عوفها بحالها البنيه محترمه وماتريد تدخل وياك بعلاقه
مازن...هسه صارت محترمه براسي لو تعرف ليش انفصلت
اسامه...تحجي صدك انت عايف حياتك ورايح تسئل عن اسباب انفصالها يمعود خلي الله بين عيونك
شوف حياتك شوف نفسك
مازن...اكلتني اكل غير تعرف الي اني عرفته
طلعت اكبر ممثله تمثل كدامنا دور العفه والشرف
وهيه مطلكه بسبب خيانتها الزوجها
اسامه... مااصدك معقوله هاي الملاك خاينه يمعود الي عدها هاي السوالف يبين عليها
انت اكيد سمعت غلط
مازن....شنو سمعت غلط عدها علاقه ويا صديق زوجها
وكل يوم يروحلها للمدرسه وتطلع ويااا
الحد ما واحد شايفها ومصورها ودار الصور الزوجها
زوجها ما تحمل طلكها
ماتشوف عافت المدرسه الي اداوم بيها واجت هنا
حتى تنهزم من فضيحتها
وجايه هنا تمثل دور الملاك الي مايغلط
بس عليمن عليه اني ماكو شي يصعب عليه
بقيت وراها لمن عرفت كل المعلومات الي تخص حياتها
اسامه...ولو مالك حق تروح ادور بحياتها هذا شي يخصها
تقبل واحد يدور وراك ويعرف أسرار حياتك وينشرها
انت مو ملاك انت واحد لا تصلي ولا تخاف الله وحياتك عباره عن معاصي تدخل بعلاقه وتطلع من علاقه
وتضحك على بنات الناس
اتقي الله شويه
مازن...وشدعوه انت صاير واعظ هيج ووحده رخيصه
وبشهادة الكل ليش ادافع عنها
اسامه...لا ادافع عنها ولا ادافع عني عوف البنيه لحالها
هيه موزينه على نفسها مراح تأثر على سمعتك
انت الزين انت نبي والناس كلها شياطين
مازن...اهووو اتي صوجي ليش اجي احجي وياك
اشوفلي واحد يطابقني وأكعد احجي ويااا
جمانه السعيدي
اسامه....لا تحجي هذا الكلام بلمدرسه وتشوه سمعت البنيه
حرام عليك تطلع عليك بسمعتك وعرضك
مازن....اني شكووو هيه عدها سوابق الناس كلها تعرفها
اني شعليه
اسامه...استغفر الله روح عندك حصه
مازن...اي رايح صاير محامي الهاي الساقطه
اسامه...مااخفي عليكم بسبب كلام مازن تغيرت نضرتي
الوجدان اكيد الكلام اله دور
وخاصه مازن يحجي بتاكيد بس اني مالي علاقه بيها
البنيه ما تخصني ليش اهتم
اني صح غيرت نضرتي عنها بس بعدني اشوفها محترمه
واذا مااسمع منها مااكدر تحكم عليها
اليوم الي بعده داومت شفت من الذوق اسئلها عن امها
اسامه...صباح الخير
وجدان...صباح الخير جانت تحجي وياي وهيه مدنكه
اسامه...شلون صارت امج
اتحسرت بعدين كالت
وجدان.... الحمد لله
اسامه...يستاهل الحمد اذا تحتاجين مساعده اني حاضر
من سمعت كلامي رفعت راسها وبلصدفه اجن عيونها بعيوني جانت الشمس جايه على وجها
وعاكسه لون عيونها عسلي على جوزي ويلمعن
ماكدرت انزل عيوني عنها بس هيه خجلت ونزلت عيونها عني
وجدان...شكرا من رخصتك
عافتني وراحت بس عيونها ماراحن من بالي عبالك انطبعن بمخيلتي طبع
بقيت كل النهار هاي اللقطه تنعاد كدامي
من بعدها احسان وعبير ماقربو عليه ولا الهم شغل
لان من بعيد ولا من قربب وخاصه من شافو مواقفي الاخيره منهم
جمانه السعيدي
مرن شهور الحمل بسلام واجا يوم الولاده اول يومين بلتاسع تطلك
اني سامع البنيه من تطلك تروح بيت اهلها
بس هاي لا بقت بيتنا خاف امها تتكفل بلولاده
بليل الساعه ثنتين ونص امي كعدتني من النوم
امي...يمه اسامه اكعد عبير تطلك
اسامه....تطلك بيش الساعه هسه
امي...بلثنتين ونص
اسامه...واني شنو علاقتي زوجها وين
امي...طلع من العشه ولسه مارجع
اسامه....اي اتصلي علي يجي ياخذها اريد انام الصبح عندي دوام
امي.. اتصل ومايرد عليه فدوه يمه كوم الله يرضا عليك
حاله انسانيه الك بيها اجر
اسامه.. اخذت التليفون واتصلت على احسان
ماكو خارج التغطيه
كمت غيرت ملابسي وطلعت ادور سياره تأخذنا للمستشفى
نص ساعه واكف بلشارع يله حصلت سياره
اني طبعا مااعرف بشغلات الولاده عبالي المره بس تحس بوجع اجيب
وصلنا والدكتور سئلت امي من يمتى عدها وجع
امي...العصر لزمها الوجع جان خفيف بس هسه زاد عليها
اسامه...من العصر يعني احسان يعرف زوجته تطلك
امي...اي يعرف
اسامه...وليش مابقى يمها مايخاف عليها وعلى ابنه
شلون يطلع ويقفل التليفون
امي.. يمه احسان ماعلي عتب
اسامه...ليش ماعلي عتب رجال شكبره شكده من يحجي محد يلحكه يعوف زوجته تطلك ويطلع لا وفوكها يقفل التليفون
لان يعرف راح اجيب انهزم من المصاريف وقفل التليفون حتى اسامه يتورط
مراح يصير براسه خير ابد راح يبقى حيوان طول عمره
مو كتل نفسه عليها احبها واحبها
اكو واحد.يحب حده يعوفها بهيج ضرف
امي.. ماعده فلوس منيين يجيب فلوس الولاده
اسامه...وليش ماينزل يشتغل حاله حال الشباب
ويجمع فلوس الولاده
بس ليش يتعب نفسه البنك المركزي موجود يسد بمكانه
امي...كول يالله خلي البنيه تكوم بلسلامه
قابل احسان جديد عليك هو هذا من يوم صار ودار
اسامه...دخلت عبير صالة الولاده واني وامي بقينا ننتظر برا
اتصل على احسان مايرد تليفونه خارج التغطيه
طلعت الممرضه محتاجه ابره وشغلات تخص الولاده
نزلت جبتهن من الصيدليه
الساعه بلاربعه ونص جابت طلعولنه الطفل جابت ولد
اول ماشفت الطفل نسيت القهر والعصبيه
يخبل حلو
امي...هاك شيله انت عمه
اسامه...مااعرف اشيله
امي...شوف شلون حلو باجر يخبصك خبص عمو عمو
اسامه....الله يحفظه
امي...سمي انت
اسامه.. اني شكووو اسمي امه وابو يسمونه
امي...ولله انت اتسمي محد غيرك يسمي
اسامه...نسمي علي
امي...هو علي ماكو احلى من اسم علي
اجت الممرضه تريد تكمل الاجراءات رحت وياها ادفع هنا وتعال هنا والممرضات كل وحده تريد اكراميه
بعدين جيب علاج العبير هذا العلاج مهم
الحالتها رحت اشتريت العلاج
امي....روح جيبلها ريوك كلبها خلصان من الولاده
رحت جبت معلاك وكباب وصمون وعصير وحلويات
صرفت ٢٠٠ الف بهاي اليله احسان انهزم من المصاريف
وكلشي طاح براسي
رجعنا للبيت بلسته الصبح
لكينا احسان جاي وصاعد نايم بغرفته
ولا كلف نفسه يسئل عن زوجته ولا حتى يطمن عليها
فرشت امي فراش بغرفتها وخلت عبير والطفل
واني دخلت سبحت وطلعت للدوام
وصلت للدوام اجتني وجدان بعد الحصه الاولى
وجها ينطي اللوان ومقهوره حيل
وجدان...ممكن احجي وياك بموضوع مهم
اسامه...اي تفضلي
وجدان....اني وحده بحالي مادخلت باي احد حتى مااكعد ولا ويا المدرسين ولا المدرسات
بس استاذ مازن جاي يزعجني اني وحده مااريد اختلط باي احد
اكثر من مره طلب مني علاقه ورفضت
هذا الشي من حقي اعتقد
بس هو حيل زودها جاي يطلع عليه اشاعات بلمدرسه
اني اكدر اشتكي على بلتربيه
بس موحلوه بحق كادر المدرسه مدرستكم محترمه
اسامه.. المطلوب مني شنووو ممكن افهم
وجدان...تحجي وياا يبتعد عني ولا يجيبني باي كلام
والا اشتكي علي واخليهم يبهذولنه
اني حجيت وياك لان انت محترم
اريد توصله هذا الكلام لايشوفني ساكته وعباله ضعيفه لو اخاف منه
لا اني حقي مااسكت عنه ابد وكلشي اله سمعتي
مااقبل ابد اي احد يقرب عليها
جمانه السعيدي
اسامه...صار مايكون خاطرج اله طيب
طلعت وجدان عصبيه ومنهاره تمشي وتمسح بدموعها
دزيت على مازن
مازن...هااا شكو خير
اسامه. هذا إنذار الك اذا ما تعوف وجدان بحالها
اقدم عليك شكوى بلتربيه
مازن...شنو هلحجي منو مقرب عليها لو الي بعبه صخل يمعمع تعرف نفسه سمعتها زفت وجاي تشمر اللوم عليه
اسامه...هذا اخر تحذير الك اذا اشتكت منك مره ثانيه
اني الي اقدم عليك شكوى للتربيه
يااخي عوفها بحالها انت شنو مرض لزكت بيها
خوما مرض
مازن...مع الأسف تبيع عشره سنيين علمود وحده ساقطه مثل هاي
اسامه...ساقطه على نفسها انت شكو ابوها اخوها
لو لان رفضت تدخل وياك بعلاقه
قررت تمشي وتحجي عليها
مازن...اني طلبت منها علاقه ختولي جذابه
اني ماانزل الهيج مستوى
اسامه...اني حذرتك ابتعد عنها يااخي موزينه وانت زين
ابتعد عنها
طلع من عندي مازن ضايج
المدير...شبي مازن
اسامه....يتحرش بوجدام واجت تشتكي منه
المدير...صدك يكول مطلكه لان خاينه زوجها ويا صديقه
اسامه...واحنا شعلينا قابل راح اناسبها
اذا زينه او موزينه هاي حياتها مادام هيه ما مقصره
بعملها خلاص احنا النا العمل
حياتها الخاصه مالنا دخل بيها
المدير....هو هذا مازن مو راحه حتى ويا عاملة النظافه
يريد يدخل علاقه بي مرض اسمه النسوان
اسامه...استغفر الله ربي واتوب اليك
اسامه....اجتني مسؤليه جديده علي ابن احسان
امي...جيبله وياك حفاضات
جيبله خافظ حراره جيبلي وياك فلان شي
تمرض تعال ناخذه للدكتور ابو مو هنا
من اعترض امي تكوم تبجي تكول راح يروح الطفل من عدنا
وابو ماعلي اعتماد حتلو يموت ماله شغل بي
شلون نعوفه يضيع من عدنا
والصراحه اني كلش احبه وتعلقت بي بيتنا صار حلو من اجا علاوي بس ابو الجلب ماله شغل بي
ولا حتى يشيله ويلعب ويا
اني من ادخل للبيت ابقى ادور علي احبه حلو ولعباته حلوات
من اطلع يبقى يبجي وراي
عمره ست اشهر بس ادخل للبيت يفرح عليه
يجبرني اشيله واللعب علي
واحسان مطيها الطرشه ماله شغل بي ولا عبالك ابنه
تكول جاي فرضيه علي
