رواية في ذمة الغريب الفصل التاسع 9 بقلم كنوز

ما اعوفك هاي أمن منها حيل

ووعد هذا اعتبره صدك مو شقه

وين دافنلي السحر دليني بيه

دفنه زايد خاف ماعندك ثقة

━━━━━━━━━ ⚖ ━━━━━━━━━

صوت طگطگة من المطبخ درت راسي شفته طلع بيده كوب جاي واني بساع ركضت لباب الحوش باوعلي مستغرب تصرفي دنك ع موبايله 

ورفع راسه الي اني شفته اجه بتجاهي قبل لا يحجي فتحت الباب و ركضت لشارع حافية بطرك الدشداشة و الشال گلبي يدك مثل طبول الحرب واني اسمع خطواته تركض وراي 

جفصت بالطين والمي احس شي ضرب رجلي شاغت روحي بس بقيت اركض ... و البستان أظلم ما اندل الطريق منين اوصل لشارع العام 

صوته وراي اسمعه يصيح بصوت حاد اوكفي واني ازيد بعد... خطواته تتقرب مني أكثر الهوى بارد كام يدخل لريتي يخنگني ما احس الا جرني من ايدي 

گمت اتحرك و لمخته بيدي الثانية جرها طبگها ويا أيدي الثانية بيد وحدة صحت بصوت عالي خله ايده ع حلگي كتم صوتي وقرب وجه مني 

:: اشش ما اسمعلج حس 

فاتوا مجموعة شباب گمت اهمش و اصيح بلكي الله صوتي مكتوم زمجر من بين أسنانه مغتاظ 

:: اركدي 

استفسر منه واحد من الشاب وهو واگف بعيد عنا شوية يسئلة اذا محتاج مساعدة 

:: ها سيد خيرك خو ما محتاج شي 

جر طرف شالي نزله ع فتحة رگبتي و صدري انطاني ظهره عاصر اديَّه بكف ايده حيل حتى لا اشرد ،،وهو واگف كدامي مغطيني بجسمه يججب الرؤيه عنهم 

:: لا رحم الله والديكم شباب ماتقصرون 

عافونه و مشوا لهدرجة واثقي بي ما يسوي الخطيئة 

ردت اصيح وراهم توي فتحت حلگي سده بيده دفعني ويا الحايط مد ايده بجيبه كلت حيخدرني عضيت ايده نبتت اسناني اباطنها وهو ما تحرك ابد طلع موبايله فتحه و رفعه كدام وجهي

انتقلت عيوني من وجه لشاشة الموبايل عيوني تغوش كوه قريت تكملت المحادثة

ورا سلمها وماعليك...مكتوب... واني ارجعها الك اخت الجديدة ،،

وجه ممتعض وبنفاذ صبر گال 

:: ع سيارة نحجي موش عليج 

شهكت بالنفس ابتعد عني يستغفر لان لمس أيدي ويعتذر واني گمبصت اتنفس بقوة نزلت دموعي بقهر رعب ،،خوف،،،، غدر.. خذلان... كل هذا عشته بهذة الدقايق القليلة حسيت كلشي انتهى ونهايتي انكتبت ع ايده رجفت حروفي واني احجي 

:: عبالي حتوديني لنزار 

ضرب ايد بالثانية يتيمتم لا اله الا الله دار وجه عني شوية و رجع دار راسه الي 

:: ولج حرمة أمانة يمي و بذمتي يعني شعرة من شاربي صرتي شلون اغدر بيج شنهي شايفتني يهودي ماكو براسي غيرة 

يحجي ويعد ع اصابعة وبيده الثانية يضغط ع سبحة هو يسولف واني عيني عليها هذا ماله أمان ع ساعة يضربني بيها ع اقل اخذ حذري ارفع اديَّه كدامه... من شافني ساكتة وخانسة كال بحدة 

:: كومي الوادم تعاين النا 

:: ماعليك بيّه روح ما ارجع لبيتكم بعد من اجيتكم لسه عايشة برعب من وراك الليل بطولة ما تغفالي عين كل شوية افز مفزوعة لا اتـ... 

قطعت كلامي من شفت عيونه جاحظة لان اشكك بأمنته زميت شفايفي ابلع باقي كلماتي هسه اني مو اخاف منه شكو احجي 

:: كملي لويش سكتي.. لا اسلمج للخرا نزار مو ؟ 

اسمع يتمتم استغفر الله بقى واكف كدامي واني ابجي بحرگة و صوت عالي،،، شباب تفوت الي راجع من شغله الي راجع من الكوفي يسلمون عليه وهمه يمشون وهو واكف مغطيني بجسمه 

ندار عليَّه صاك ع أسنانه 

:: ما ناوية گومي الوادم ظلت تعاين شيكولون عليَّه خاطفج 

:: ما اكوم و لا تكزكز علي بسنونك تره ما اخاف 

:: جا من هيج نجرة شكو خايفة مني وعايشة برعب 

خزرته تنهد بصوت عالي فرد ملامح وجه الجانت مغيمة بغضب وحجه بهدوء 

;: ممكن تتفضلين عليّه و تكومين صرنه فرجه لامة لا اله الا الله 

:: لع 

مسحت خشمي وهو يكتم بغيظة كمت الم قوي برجلي امشي و اتجي ع حايط اعرج بمشيتي وهو ع ممشاي يمشي نزع نعاله خلا كدامي لبسته وهو مشه حافي 

بعدنه ما واصلين طلعوا قسيم و علي اجوا بتجاهنه و براءة و البنات واكفات بالباب سئله قسيم 

قسيم :: شني شمالكم تركضون بالشارع بنص الليل تسودنتوا 

غفار :: ماكو شي 

تلگتني براءة من جهة و سجدة من جهة خطية تسئل بقلق وهي تشوفني طالعة بطرك دشداشتي و رجليَّه كلهن طين 

براءة :: يا يا شمالج ياهو سوه هيج بحالج 

واني زدت بالبواجي عبالك طفل مستهظم گالوله شبيك مسح وجه واشر الها 

قسيم :: براءة رجلها... شوفيها شمالها 

دنكت براءة ع رجلي 

براءة :: كلها طين ششوفن انا هسه عنبر جيبي ماي بساعج 

غسلت رجلي خطية واني ابجي واناشغ الألم برجلي قوي حتى نسيت الصار بس سويت روحي ابجي ع صار فشلة يكولون تبجي من جرح بس والله يوجع بحرگة 

براءة :: جرح شكبره هذا ينفض دم 

طلعت إصالة جانت يم ابوها بالاستقبال الخارجي جابت كلينس و كطن خلته عليها وهي گالت 

إصالة :: يااا غميج هذا يرادله خياط 

فزيت بساع جريت رجلي من بين اديها و انفي بثنين اديَّه 

:: لا لا شنو خياط هسه الفه و يطيب 

إصالة :: خايبة يذب دم ما يوكف شني تردين يكضي دمج و تموتين

غفار :: انطيها شي خل تلبس ناخذها للمستشفى 

براءة :: صاح قسيم ضايج خلگة يتحكرص يريد يعرف الصار وشني السبب خلاها تشرد بهل الليل من بيتنا 

قسيم :: هسه شني نبقى هيج مثل الأطرش بالزفة 

عيانله غفار بطرف عينه مغتاظ منه من اهد ما طگ سجدة 

غفار :: شتريد قسيم ترى مالي خلك 

قسيم ::اريدن افتهم ع شني طلعتوا تركضون جنكم خيل الحمزة 

غفار :: تعال تحاسبني بعد 

ما انطاه نشد خلى يضوج أكثر و قسيم يموت ولا غفار يضم عنه شي

ضحكت ع علي من گعد دجة الباب كاض گلبة بالجذب عود مهبوط يحجي ويأشر ع عنبر يخزر بيها جي هي صاحت و فززت كل البيت خلتنه كعدنه من النوم واحد يردم الاخر 

علي :: بويه وعلي الهبطة لسه بگلبي من ورا هاي موش صوت تكول صافرة إنذار مال حرب

سجدة جابت عباية حطتها ع راس رحمة و تعدل بيها وانا اسولف وياها الهيها حتى تنسى الوجع 

براءة :: هاي عنبر شايفتج من طلعتي تكول ما شفت غير رحمة طلعت تركض من البيت و غفار وراها 

سجدة :: غير دكت بوقي بالبيت اريدن اندل دربي بعد ما أكدر 

علي :: والله عبالي نولينه وبيت جبران هدوا علينا گلت هاي هي تگتلنه  

خطية تتحامل ع نفسها جسمها كله يرجف سندتها و اجت ويانه عمتي إصالة و عنبر نبصت بالنص طبعًا 

وصلنه المستشفى نزلت گبلها سندتها و جاب علي كرسي بساع دخلناها لطوارئ ه شافت الدكتورة الجرح تمسح الدم عنه و تعاينه كتبت ع وراقة

الدكتورة :: جيبوا هذا العلاج من بره اول شي و اخذوها للعمليات الصغرى يحتاج خياط 

اخذ غفار الورقة و طلع وعلي فرحان يدفع بالكرسي و يسئل الممرضات وين العمليات الصغرى،،،و من يشوف ممرض يصد وجه عنه النوب المستسفى الممرات تتشابه ضلينه نص ساعة و نرجع لنفس المكان نفتر لحد ما اتصل غفار ينشد 

علي :: ها عمي وين انت 

غفار :: انتم وين انا جدام العمليات الصغرى 

علي :: وين لكيتها النه ساعة نفتر و نرجع لنفس المجان 

اخذت عمة إصالة النقال منه حتى تعرف وين العمليات وصدك مشينه حسب كلامه وصلنا اغتاظ علي من الممرضات 

علي :: يمكن ذني دلنه غلط حكهن خطية يتعبن جثير الله يساعدهن 

وصلنه صدك واكفه بيده علاكة علاج 

النوب العمليات هوسة كلش هذا اللي يخيطونه ويصرخ وهذا اللي يون من الوجع... النوب وياه كل مريض عشرة كاضينه رجع الدكتور كتب ع ورقة 

الدكتور :: بعد هذا مضاد للالتهابات 

تنهد غفار واخذها يروح يجيبه ساعدت رحمة تكعد ع سدية وجهة صار اصفر كركم اجت بنية تريد تخيط الجرح زمطت بيها رحمة 

:: اني ممرضة اني اخيطها 

اخذتها منها و صفنت ع الإبرة وهي ترعش همس علي من شافها طولت الصفنة 

علي :: جا ما تخيطينها شني تاخذين خيرة 

اجه ممرض يمنا راد ياخذ الإبرة يخيطه هو وكف علي بوجه معترض

:: وين خويه ترى احنه وادم نستحرم انت استريح خل البت تخيطه 

هز راسه الولد بيأس منه وعمتي حجت من بين اسنانها عليه 

إصالة :: فضحتنه علي امشي اطلع بره 

علي :: شني فضحتجن جا اخلي زلمه غريب يكضكض بعرض عمي شني شادهن دبل 

رفعت راسها الممرضة من نطق اخر كلمة باوعت عليه ورجعت تخيط مجعدة جبينها بغضب 

كملوا و ضمدوا الجرح رجعنه لردهة و شكلوا الها مغذي انطوها مضاد الجابه غفار وجاب النه لفات و عصاير و بطالة ماي هم و طلعوا بره ينتطرونه 

اعاين ع رحمة غفت وهي عاگدة مابين حواجبها مدري من وجع رجلها مدري تصارع كوابيسها حتى بنومها ما مرتاحة 

خلص المغذي گمت سديته ادور ع عمتي أصالة مالها أثر شوكت اختفت قبل شوية جانت بصفي و عنبر غافية ع كرسي دغيتها ع كيف 

عنبر :: ها ها شكو ياهو مات 

براءة خلص علاجها ابقي گاعدة بين ما اشوف غفار و عمتي وين واجي 

عاينت يمنة يسرة تستوعب هي وين استقرت انظارها ع رحمة رجعت تسرسحت ع كرسي وكالت وهي تتثاوب 

عنبر :: عليش ما نبات هنا موش احسن هو راح يصير الصبح مالها داعي روحتنه بعد 

براءة :: هو شنهي ومالها داعي بعد عنبر صحصحي مالي خلكج تره 

برطمت شفايفها عفتها طلعت من الردهة لمحت عمتي إصالة بنهاية الممر تحجي وياه زلمة غريب بس چنها تعرفه 

اعاين الهم من بعيد من حركة أدين عمتي مبين متعصبة كلش وهو مبين جاي يهدأ بيها لو يشرح الها شي رافضة تصدكة 

راح الزلمه مشه يريد يطلع من المستشفى وعمتي اجت صار وجهه بوجهي انخطف لونها و غفار اجه صادف الزلمه هم بقى واكف صافن بأثره عبالك يعرفه بس ما يذكر 

غفار :: هاا شلون صارت 

:: زينة و خلص المغذي الدكتورة كتبت الها خروج 

خله نقاله بجيبه طلع مفاتيح السيارة شمرهن لـ علي لگفهن 

غفار :: روح جيب السيارة يم الباب 

دخلنه انا وياه لردهة رحمة كاعدة تعدل بحجابها شلت الطبلة اريد اسلمها گبل لا نطلع استوقفني الاسم سجدة حاكم هاشم 

ما حسيت اله نجر من بين اديّه أخذه مني غفار طبگه و سلمه لدكتورة اللي سجلت الها علاج ناخذه من بره و وصت نعقم الجرح كل يوم 

امشي و عقلي يضرب اخماس بسداس ليش غفار ما كاتب اسمها بالطبلة 

انتبهت من تفكيري ع غفار من شغل قصيدة...

_ تلگيني انا يمج... ابوس ايدج واكلمج 

_ اوفي وياج الوعود... اوفي وياج الوعود 

_ ما مات اليكفلج... وما عاش اليزعلج 

عبالك جاي يحجي وياها بهاي القصيدة وحتى هي دارت عيونها صوبه و تنهدت 

النوبة عمتي الآخرة ماعرف شمالها الطريق كله صافنة وايدها ع خدها وكل شوية تتنهد بصوت ولمحت بعيونها دموع قهر 

وصلنه البيت قسيم گاعد ع بلوكات جدام الباب بيده نقاله يعاين لصور بنته گبل لا ادخل گال 

قسيم :: براءة جاي 

:: شني ما تنام اليوم ترى ما ظل شي و يطر الفجر وباجر وراك محكمة ناملك شوية 

:: شلون انامن وبنتي بين أدين ناس....

بتر كلامه ما يتلفظ بكلمات موش زينة جدامنه ابد طلع باكيت الجكاير يدخن و رجع لنفس كعدته بره ما يرضه يطب البيت روحه لايبه 

وانا بساع خدرت الجاي اله و انطيته

رحمة بقت تون لـ غبشة ياله هود وجعها و نامت غطيتها عدل و طلعت قسيم يشرب جاي و جكاير يروح و يرد بالبيت مثل الحرمة التطلك 

وعلي گاعد ما خله شي بالثلاجة يعتب عليه ما اكله من كشف الوگت وصار الصبح 

علي :: اي همزين من صار الصبح عمي چتلنه الجوع يله عماتي يله تحركن خفن اديجن ريوك من هذا الزين اضب گلبي بي اليوم عدنه مواجهة وياه بني قريضة 

يقصد بكلامة نسابة قسيم جي كل موعد محكمة كلهم يروحون وياه ومن تتاجل يتعاركون وياهم صاحت بيه عنبر معتاظة 

عنبر :: يا جوع هذا للگتلك لو الثلاجة عدها لسان جا صاحت الداد ع كد ما فتحت و سديت الليل كله حلكك ما وكف يشتر تگول بعير 

علي :: وانا اكولن شبيها بطني تلوي بيه طلعت عينج وراي 

غمته وهو گام يريد يتعارك وياها صاح بيهن جان قسيم يخابر يحجي وياه المحامي من كمل كاله علي 

علي :: والله عمي عجيب امرك هاي عمتي سجدة تجيب الحگ من حلگ السبع ورايح مخلي محامي فگاگة لا يهش ولا ينش بس لابس قبوطة و يفتر عبالك أول طيحته 

عاين الها قسيم بطرف عينه وهي گاعدة تشرب جاي و غفار گاعد يمها مدري شيبسبسون سوه گال حتى يغيظها 

قسيم :: ليش انا معترف بشهادتها حتى اعترف بيها محامية واخليها تكض القضية 

هزت ايدها بسخرية ما مهتمة صح ثنيهم واحد يدوس ابطن الثاني بس وكت الصدك واحد يفدي الاخر بروحه 

سجدة :: لو تبقى اخر قضية بالدنيا قضيتك ما اكضنها 

قسيم :: سجدة مالي خلگج جفيني شرج 

گامت تصعد لحجرتها وكالت 

سجدة :: مبين ياهو شر بينه من ساعة ما رديت و ثگبت البيت موش زلمة عود شخاص و يفتر 

راسي دوه من طلايبهم سجدة و قسيم رويسيه ابد ما يتراهمون سوه سويت الهم ريوك و اخذت لجدي و حبوبة كاعدين بالديوانية بيدها المسبحة تسبح و تندعي ترد بت قسيم لحضنة 

غفار هم بدل و محضر نفسه طلع اول واحد بدون مايحجي اي شي رغم متعاركين هو و قسيم بس ما يعوفه وحده ابد 

طلعوا كلهم و عمي كزار طلع هو و عمار هم بقى بس آمين جان يلعب وياه الجهال خطية طگه حيدر دخله بينهم وغفل عليه باب الحوش و طلع الشغله 

صار البستان هدوء وانا استغليت الفرصة ماكو احد طبيت حجرتي بساع 

طلعت ورقة وكتبت بيها رسالة.. كتبت امنيتي الوحيدة بهل الدنيا صارت ترجع بينة لو نعرف خبر عنها كملت و الورقة تبللت بدموعي 

خليت تربة بوسط الورقة و لفيتها عليها لبست عباتي و طلعت لنهر شمرت وياه الماي الجاري وبقيت واكفة ع جرف 

وانا كلي ايمان صاحب الزمان بعد رب العالمين راح يحقق امنيتي 

بقيت شوية هذا المجان الوحيد بعد حديقتي ارتاح بيه رديت للباب لكيت عمي ابو طالب يمنا و مخبوصين 

براءة : :: شكو صاير شي 

ابو طالب :: متعاركين و ذابينهم بالتوقيف كلهم 

سجدة راحت وياه رغم رفض عمي ابو طالب بس هي قنعته ان هي محامية ولازم تسوي الهم كفالة وأوراق و شغل هو ما يعرف بيه 

النوب عگب باجر عندي امتحان مهم اليوم ما رحت للكلية گعدت ادرس بس كلشي ما گدرت بالي و فكري كله يم قسيم ادعي ترجع بنته لحضنة خطية 

اجت عنبر من المدرسة گبل علينا جي عمي و جراح راحوا وياه قسيم م وكفت تصلي كملت 

براءة :: اصبن الج غدا اخافن يتأخرون بالمحكمة 

عنبر :: رحمة وين اذا تاكل اكل وياها 

براءة :: تهديلي خل اشوفنها اذا گعدت لان امس لصبح ياله نامت 

لگيتها گاعدة تفتح بالشاش عن رجلها و الألم مرسوم ع ملامحها 

براءة :: هاا شمالها توجعج 

رحمة :: لا بس اريد اغير هذا الشاش نترس دم 

:: اوكفي خل اعاونج 

دكيت صدري اعرف ربعت جدامها ويا ما شلت الشاش و شفت الخياط افترت الدنيا بيه استحيت اكولن الها خليت تعقيم ع الكطن اريدن اعقم الجرح وايدي ترجف مدت ايدها أخذته 

:: وجهج صار كركم عوفي اني اسوي 

:: يمه احسن الجرح بگلبي والله 

:: جيف ما متعودة لو رأيحة تمريض ،،طب.. تتعودين وهذا الجرح يصير عندج زلاطة 

:: لا ويني وين الطب انا گلبي رجيج ما اتحمل 

صبيت الهن غدا كعدن سوه هي و عنبر يتغدن رجعوا الولد صياح و عركات و قسيم مغتاظ جي سجدة داخله للمركز صاح بعصبية 

قسيم :: تهديلي هاي هويتج اللي تتهوبزين بيها اذا ما حرگتها جدام عيونج انا موش ابن ابوي

أشر الها غفار ما ترد و تدخل حجرتها ومبين حتى هو ما راضي ع تصرفها و مغتاظ و دخل وراها اسمعه يحجي وياها بصوت حاد و هي تتعذر منه 

وعلي ما اهتم لشي اخذ خبز و كعد يثرد وياكل ندار ع عمي ابو طالب خطية جان كاض راسه بوجع 

علي :: وانت عمي شمالك جاينه أفندي لو لابس عماتك جا ما ذبوك بالتوقيف ويانه 

ابو طالب :: عمي انتم خليتوا عندي رأي طلايبكم معرة اركض و ألم وراكم 

ما قبل يتغدا راد جاي بس سويت اله و صبيت و جراح طرده غفار وگاله انا اتفاهم وياه سجدة 

رحمة :: اسمع بس أصواتهم حتى النقاش عرگة و صوت عالي اول شي يبدأ النقاش عادي و بعدين الصوت يعلى و تضارب اراء وهذا اللي اسمه قسيم يريد ع كلشي يكولون اله نعم لو كال العين فوك الحاجب مكانها لازم كلها تكول صح 

اجتني عنبر مدت راسها مبتسمة 

:: عبالي نايمة 

:: لا كاعدة هواي نمت اليوم تعاي 

:: اكومج نطلع بره بالحديقة نكعد 

:: اي والله ياريت اختنگت من الغرفة 

اجت يمي سندتني امشي ع كيف احاول ما اضغط ع رجلي من شافني قسيم خزرني عباله اخاف منه  

تشتت انتباه عني من نزلت سجدة وكفت ع درج تسئل بهدوء 

سجدة :: هويتي وين ؟؟

كعد رجل ع رجل و بيده استكان الجاي يتكمع و يبتسم يحجي بنبرة مستفزة مثل شكلة الهمجي امووووت منه صرت 

قسيم :: و شدراني بيها شگالولج عليه ولي أمرج وجامع اوراقج وراج 

براءة :: يا هوية بس لا ضيعتي هويتج ولج هسه يسوون جريمة و يذبونها بالمجان و تتبتلين 

سجدة :: الهوية مال محكمة....قسيم 

رفع راسه الها تبادلوا النظرات هزت راسها بتوعد و صعدت بلا كلام ما فهمت شبيهم الا من ابو المحابس عاتبه 

غفار :: موش گتلك سجدة مالك غرض بيها 

قسيم :: يعني عاجبك تفوت للمركز هيج 

:: انا محذرها ما تدخل مركز شغلها بالمحكمة وبس و ع جيتها مال يوم حاسبتها عليها و انطيتها تحذير اخير 

:: موش الها هذا الشغل خل تعوفه 

:: اذا انت مالك ثقة بيها انا اعرف شمربي ابوك و بموافقته اشتغلت و لو اهدنها بمعكسر ما اخافن عليها و شغلها تبقى بيه و من باجر الصبح تمشي وياها تطلع هوية جديدة لا حظك اطيحه سمعت 

گبت العيطة بينهم صياح و عركات جرتني عنبر نطلع للحديقة و همست 

عنبر :: موش كتلج سحر ما طوله لافي بالبيت لا نهيد ولا ينصى صوتنا ماعنده شي اسمه تفاهم  

كعدت ع كرويته وهي خلت الكوشة ورا ظهري 

عنبر :: هسه اجي تهديلي 

طبت تركض شوية و اجت بيدها كتاب كعدت گبالي و رفعت رجليها ربعت خلت كتابها بيدي 

:: سمعيلي حبوبة احسن روحي ما حافظة 

لزمت الكتاب اسمع الها وكلما توكف ما تقبل اكول الها الا هي تتذكر حتى عشه اكلنا لفات و بقينه ع نفس كعدتنه كلمت اخر ورقة من الامتحان النوب محضرة اسئلة بورقة كاتبتهن سئلتها بيهن سئلتني بقلق 

:: يعني حافظة 

:: اي والله كلش زين ان شاء الله مية 

:: يعني ما اراجع بعد 

:: لا تأخر الوقت روحي نامي حتى تركزين باجر 

كامت و كل شوية تفتح الكتاب تقرا شي تظن هي ناسيته صار هدوء هدات المعارك بعد ما ناموا سمعت طكطة عدلت حجابي اجت سجدة باوعت ع بيت و ردت انظارها اللي 

سجدة :: تگدرين توكفين ع حيلج ؟

رحمة :: اي عادي أكدر اوكف و امشي هم 

:: خوش تعاي اوكفي هنا 

استغربت طلبها كمت ع كيف وكفتني اباب المطبخ منين يطلعون ع طرمة راحت ع سيارة قسيم و رجعت اللي جرت شالي خلته ع اكتافي استغربت تصرفها 

: هااي ليش خاف احد يطلع من اخوانج عيب 

:: خلي هيج وما عليج اذا شفتي قسيم سوي نفسج تعدلين بشالج حتى لا يطلع لهنا 

خلتني فاتحة حلگي للهوى و راحت فتحت البنيد بيدها بطل مي رجته حيل و دارته للسيارة واني عيني عليها و عين ع غرف لا يطلع احد 

كملت واجت تتمشى عادي جنت اكول ع عنبر غريبة لا هاي أغرب لا البيت كله غريب عجيب

طبت للغرفة واني بقيت لوحدي لان نمت الصبح هواي عيوني ما ترضه تنام بعد 

غسلت وجهي سمعت صوت شخص يقرا قرأن بنص سكون الليل يرتل بصوت حلو 

الصوت جاي من جهة الورشة اللي يشتغل عرفته هو طلعت من البيت اتمشى تقربت الباب مفتوح ع نص 

صارت عيني ع سيف ذو الفقار من شاله خلى ع لوح خشب و مد ايده ع القلم ورا اذنه أخذه و يحدد الحجم حتى يسوي كراب اله 

دك موبايله طلع من الورشة كلها واني ختلت من شفته راح دخلت اشوف شنو بيها أول ما صارت عيني ع صورة الامام علي عليه السلام و كوم الواح حديد و أدوات انتبهت ع حايط معلگة سيوف و قامات بمختلف الاحجام 

و اكو سجل مسجل بيه بيه طلبات مبين هذا شغلة و ركن بالجهة الثانية بيه رف كتب و فراش اله رجعت اباوع ع شنو جان يشتغل 

هزيت أيدي صارله ساعة يخطط وما مكمل قابل هي شيراد الها 

اخذت القلم و صرت ام العريف جبته منا رديته منا و مركزة عود تحركت أيدي و الخط الفوك نزل ع جوه ردت امسحه ماكو بللته بمي وحاولت ماكو شلت الخشبة و ركضت ضميته و طلعت اركض 

صار وجهي بوجه صفن وصد عني تمتم بصوت هامس 

:: استغفر الله 

فار دمي من كلمته كل الهدوء الحسيت بيه قبل شوية من القرآن تبخر صحت محروگ گلبي

:: شنو سالفتك انت كلما تشوفني وگلت استغفر الله بله تغض النظر اگول يستحرم بس مال تستغفر محسسني وحدة كافرة گبالك 

حك لحيته دار وجه عني بدون ما يرد خله دمي يغلي أكثر 

:: مو احجي وياك باوعلي لاتصد وجهك عمي واني احجي 

ويا كلامي صد بساع الي و لاحت ابتسامة ع وجه واني كملت محروگ دمي منه 

:: اي باوعلي اريد افتهم شنو بيَّه يخليك تستغفر ،شعري طالع ، لابسه مشلتح..ما اصلي.. زنديقة.. تره خليتني أشك بنفسي انت تستغفر واني ادور بروحي خاف طالع شي وما ادري

عيونه مركزة ع عيوني جعد جبينه مقلص عيونه يركز أكثر 

:: غُلب غفار 

:: شنو... شبيك منو غلبك 

سئلته وهو تجاهل سؤالي وحجه ياشر ع جمرية نساني سالفتي 

:: اصبنلج چاي 

:: چاي!! 

:: اي ع جمر سويته طيب 

هزيت راسي اي شفت الإستكان يمه ردت اكول الا اريد بالكوب لان احب الجاي و بطلت دخل للورشة شوية واجه بيده كوب جبير غضه من مي الحب و صبلي 

انتبهت ع حب مكتوب عليه ماء بثواب الامام الحسين عليه.... و جواه مشكولة ذمتك كزار اذا تشرب.. انتبهت عليه من انطاني الكوب و أشر ع بيتهم 

:: فوتي جوه لا يشوفج احد و تجيلج حجاية موش حلوة 

واني تذكرت الخشب الخربته ما عولت اشرد   

كعدت الصبح البنات كلهن كاعدات ولامات فراشاتهن طلعت البيت هدوء توي اريد احمد الله ع نعمة السكون هذا فززني صوت يرعد 

:: سجددددة !

أدور على شالي، بس من كثر الفزع تاه دربي. لمحت يمي كومة ملابس جريت منهن اللي اجه بيدي و خليته ع راسي دخل قسيم يعيط و يرجع ليورا 

قسيم :: سجددددة، وحگ هو علي اليوم اليوم يطلعونج من جوه أيدي جنازة 

بساع اجه أبالي اللي سوته البارحة لسيارته نزلت هي من فوك واگفة عادي ولا ذرة للخوف بيها قبل يوصل الها وكفت إصالة بينهم بساع 

إصالة :: گول يالله شمالك جاينه شايط ؟

قسيم :: نشديها گليلها شمسوبة لو ما الله ستر جا هسه انا والسيارة غادين تراب 

براءة خطية لابسة ملابسها تريد تمشي للكلية وكفت تجر بيها تريد ادخلها الغرفة وتحجي بخوف وياها 

براءة ::شمسويه ولج امشي فوتي للحجرة 

بس سجدة جرت إيدها منها 

سجدة :: وليييش اختل؟ قابل خايفة منه

كلامها خلا نار عود جانت إصالة تهدأ بيه وتحاول تطلعه بره... وياه ما سمعها دفع إصالة على صفحة، و لزم سجدة من شعرها و يحجي من بين اسنانة 

قسيم :: الظاهر غفار انطاج هواي مجال و گوى عينج إذا ما خليتچ تخافين من طاري إسمي، آني موش قسيم 

سجدة :: لا إنت ولا غيرك يخوفني، لو تصلخ جلدي عن عظمي هم ما يهتز الي رمش 

ضرب راسها بالحايط، صوت الضربة قوي وسال خيط دم ع جبينها ولطخ خدها سكنت و غمضت عيونها مرتجية ع حايط بيدها دايخة 

إصالة حطت ايدها بصدره ودفعته عنها و زمخت بيه ، 

إصالة :: والله ان مديت ايدك عليها بعد انا اطكك وخل يگولون هذا الطكته حرمة وهانته 

جبت كلينس خليته ع راسها وهو يتلوى وياه إصالة يريد يرجع يضربها مرة ثانية صحت بيه محروك گلبي 

رحمة :: شنو شايف نفسك انت عود شوفوني رجال وتگعد تتسبّع على أُختك هاي رجولتك من همداها 

قسيم ;: وخّروها عني هاي الثانية گبل لا أبتلي بيها!

رحمة :: يللا، شو بله راويني شتريد تسوي.. ولو اليرفع إيده عَ أُخته ما انتظر منه ، يحترم الغريبة همجي حقير 

عض إصبعه السبابة حيل يحجي بحرگة 

قسيم :: ااااخ... تمنّيتچ زلمه، بعلي أعلّگچ بالسگف!

رحمة :: وهذا كلامك أكبر دليل على همجيتك روح تعالج احسن الك لان الانسان السوي ما يتصرف مثلك 

بقى ينافخ و يكزز بـ اسنانة هزيت أيدي ما مهتمة صاح يستغفر ربه مثل اخوه 

قسيم :: استغفر الله العظيم وأتوب إليه..

رحمة :: لو تستغفر من السبت للاحد مالك غفارة يم الله تطلع مراجلك ع اختك وعود شوفني مؤمن و استغفر 

قسيم :: نگلبت عليّه الوائلي النوب ؟!

رحمة :: عفنا الدين الك يالسيد يا الصايم والمصلي لا تصلي أحسنلك صلاتك لباب البيت ما توصل

:: مو حاطينچ سايق لصلاتي خاتون 

براءة :: يتعاركون و عمتي تدفع بيه انتبهت ع سجدة اخذت عبايتها وطلعت من البيت كله ركضت صحت وراها ما ردت عليَّه لبست عباتي و وطلعت وراها 

تمشي وتميل تتوجى ع جذوع النخل چن الدنيا تفتر بيها والگاع حدر رجلينها ما ثابتة 

طلعت من البستان كله وصلت الشارع وانا لابسة كعب والگاع طين گوه امشي عاينت الها وكفت مكسورة تعاين ع شارع چن ماتعرف وين تروح 

گبل لا اوصل الها رادت تعبر الشارع بدون ما تعاين و تنتبه اظن من وجع راسها بعد ما تشوف انخمش گلبي 

صرخت بصوت طلع من وسط روحي بـ اسمها و ضباب صار جدام عيوني بعد ما اشوفن عبرت، ،انسحكت بس اسمع هورنات السيارات 

ثواني انخشع الضباب من عيوني ياله عاينت غفار كاضها من إيدها ينشدها والقلق ماكل ملامحه 

غفار ::موش احجي وياه سجدة حاجيني شمالج وهذا الدم شني بوجهج 

نزع شماغة بساع لفه ع راسها وانا ركضت الهم 

غفار :: شمالها براءة شني طاحت لو احد طاكها 

براءة :: قسيم رجع مدري شبيه مغتاظ منها كلش وطگاها

صعدنه السيارة أخذها للمستشفى ورا ما خيطوا الجرح و أخذوا مفراس خاف الضربة مسببة ضرر أكبر 

اجت الدكتورة خزرت غفار وتحجي بحدة وياه 

الدكتورة شتصير منها؟ زوجها؟

غفار :: أخوها.

عاينت علينا بس من تعاين اله تخزره شالت الأشعة ع ضوه تعاين الها و كتبت ع ورقة 

- العلاج لازم من بره...روح جيبة حتى نمشي الها 

طلع غفار وهي كعدت ع كرسي جدام سجدة 

الدكتورة :: سجدة... متزوجة؟

تقصلت المسافة بين حواجبها مستغربة سؤالها بس جاوبت 

سجدة :: لا.

:: أكو أحد ضاربج مو ؟ الضربة قوية مو مال وكعة ابد 

صفنت سجدة بوجه الدكتورة وعرفت تفكير اختي جاي تفكر تگلها اي و تسجن قسيم سجدة گوية و تسويها و الدكتورة خطية عبالها خايفة و مترددة گالت تشجعها 

الدكتورة :: ماما، لا تخافين إذا أحد يعنفج حتى لو من الأهل نبلغ الشرطة نكتب تقرير و ينسجن و حتى اذا طلع يتعهد بعد ما يتعرض الج ياله يفرحون عنه 

قبل ما ترد، اجه غفار وهي كامت ، عيونه تقرا الموقف من راحت ضحك وگال لسجدة 

غفار :: عرفتها تريد تزحلگني؟ شحچت وياچ بله 

سجدة :: نشدتني اذا أحد طاگني ، چانت تريد تبلغ الشرطة...

غفار :: وشكّلتي الها؟

سجدة :: چنت ناوية اگلها اي بس... فشلة، الوادم شتكول عليه دخلت أخوها السجن؟ 

غفار :: وشنهي الشرطة تاخذ حكج وانا موجود انتِ ارتاحي والج الصافي قسيم دوا عندي 

دك نقاله ابتسم بخبث من شافة قسيم اشر النا بمعنى اش و رد 

قسيم :: هاا بشر ما لگيتهن 

غفار :: لا نخلت بغداد وماكو الهن أثر  

قسيم :: شني إنشگت الكاع بلعتهن ؟ 

:: شفت تالي عصبيتك وين وصلتنه جم مرة حذرتك يا قسيم تفاهم گبل لا اطك بس انت زمال امدد براسك تسمع منا و تطلع منا 

سده بوجه و عاينلي مبتسم طلعنه من المستسفى سجدة خاوية مثل وردة و گطعوا الماي عنها هيج اختي ذبلانة و غفار كل شوية يلتفت الها براسه ووتنهد 

غفار :: اخذج تزورين هلبت الله و ترتاحين 

شالت راسها من جامة وياه كلامه و سالت دمعتها مسحتها بساع هزت راسها اي 

سجدة :: اخافن عندك شغل موش مواعد الزلمة تسلمه الشغل اليوم 

:: جا شنهي الشغل اهم منج اخذج أول و بعدين اردن اكمل 

صدك رحنه للكاظم ع وصلنه طبك السياره و نزلنه گبل لا ندخل اشر لسجدة تكربت يمه 

:: لا تستعجلين زوري براحة كلبج شوكت ما تحسين روحج ارتاحيتي طلعي انا انتظرجن هنا 

هزت راسها اي بلا كلام أول مرة هي تسكت خاصة غفار دوم تحب تسولف وياه تاخذ رأيه بكلشي 

طبينه لضريح اعاين الها ما تگربت أكثر ما وصلت الشباج لا وگفت جدامه و عيونها تهمل 

چن عدها عتاب بگلبها و تحجي وياه بدموع عينها 

توضت مرة ثانية و وكفت تصلي بس دموعها بلا إرادة منها ينزل چن غيمة مثگلة بحمل الماي و فاضت مطرها 

انا هم وكفت اصلي من كملت لگيتها كاعدة و مرجية راسها ع رخام الناس تمر من كدامها أطفال تلعب أصحاب حوائج تبچي مهموم يصلي يرفع راسه براحه كأن وياه كل سجدة ينزاح من همه 

بس هي كلشي ما تشوف عيونها ع شباج شابحة بس 

من انتبهت عليَّه گامت 

سجدة :: يله امشينه خطية غفار عنده شغل 

طلعنه لگينه غفار واكف ينتظره و بيده كتاب مشتري جديد يحب الكتب الدينية من صعدنه كالت سجدة اله 

سجدة :: المحامي بايع قضية قسيم تره 

غفار :: شلون !! 

:: اليوم من اجيت وياه عمي ابو طالب كملت أوراق الكفالة.... 

سكتت هو منتظرها تكمل ندارت عليه 

:: صدك تره ما طبيت للمركز وعمي ابو طالب قبل ادخل بس استنسخت الأوراق وعمي اخذهن كمل الشغل جوه 

:: جا ليش ما حجيتي 

:: هو ما ينطي مجال لواحد يحجي ويفهنه وانا مالي خلگ وگاله عمي ابو طالب بس هو عباله عمي يدافعلي حتى لا يطگني 

:: حتى جيتج للمركز غلط سجدة هاي أخر مرة النوبة اذا تنعاد هذا الشغل كله تعوفينه 

هزت راسها اله اي 

:: اي ما گلتي شلون عرفتي بايع القضية 

:: بقيت بره انتظركم اجه هو يتسرسح و ما دخل الكم بقى يسولف وياه سليم و بعدين شفت سليم بيده شي خلاه بجيبه 

سليم يصير اخوها لمرت قسيم الله يرحمها...زواجمهم جان بطلب من جدي بسبب خلاف بين العائلتين 

غفار :: من ذيج المرافعة حسيت بيه بايعها يحجي شي و يسوي شي ثاني بس اريدن اتأكد گبل لا اتصرف 

:: ما توقعت قسيم هيج غشيم ولسه ماشي ورا ع عمه عيونه 

:: موش غشيم بس القضية بنته عاطفته غلبت عقله 

:: و إذا ضل ورا گلبه راح يخسر القضية و يخسر بنته 

:: ما يخسر وانا ورا تهديلي اذا ما خليتهم همه بنفسهم يجيبونها اله انا موش ابن ابوي 

ابتسمت سجدة وهو حرك راسه بمعنى شكو 

:: سليم عرض علي اكض قضيتهم 

ضحك غفار وحتى ما نشدها شني جان جوابها جي متأكد منها... احنه آل هاشم لو نغدي دماية يبقى بينه جدام الغريب واحد ساند الاخر..... 

نقاله ما سكت ابد من يشوفه قسيم يرفضه بس اتصل علي رد عليه بستع

علي :: عمي انشدك بدم المظلوم عمتي وياك مو والله ما اگول و قسيم موش بس كلي اي 

أشرت اله سجدة گله ما تتحمل قهر علي ابد 

:: اي هاي وياي 

صوت تنهيدة قوية و رجف صوته

:: هديت حيلي عمي والله تدري وين انا هسه 

:: وين 

;; ماعرف والله تيهت حتى دربي ما خليت شارع ما خليت مجان وهسه كاعد ع رصيف تگول مجدي 

:: وين انت هسه جايك 

وصلنه كاعد صدك ع رصيف امدد رجلي لكدام نزلت سجدة اله وهو نهض شبگها بلهفة و بجى بساع ندار مسح دموعه گبل لا نشوفها و غفار دك ع ظهره 

غفار :: شبيك ولك موش هاي جدامك ما بيها شي 

علي :: عبالي صدك راحت 

ضحكت سجدة اله تحاول تغير وضعه جي علي متعلق كلش بيها و بغفار همه ربوه وهمه اعتنوا بيه 

سجدة :: وين اروحن و اعوفنك حتى لو فد يوم ردت امشي اخذنك وياي 

خزرهم غفار صعدوا السيارة واحد يردم الثاني و علي ضحك يسولف شنو صار ورانا 

علي :: ما شفتي شصار وراج 

سجدة :: شصار 

علي :: غير هاي البت غسلت عمي قسيم غسل بالحجي خلته هج من البيت 

و النوب سمع بيج مختفية ظل يفتر بالشوارع مثل المسودن يصيح بس خل ترد والتريدة يجرالها

ضحك غفار 

:: والله مال اوديج يم بيت خالتي فد يومين تلاثة و خلي يركع شواط لوحدة 

علي :: خو انا فد افرح عندي شماته هلكدها عليه ها شكلتوا نروح 

قبل لا يحجي محراب دك موبايله 

غفار :: ابن الحلال بذچره 

قبل لا يرد رفع اصبعه بعمنى اش اول ما رد اجه صوت قسيم الخوف واضح ع نبرة صوته 

قسيم :: ها بشر ما لگيتهن 

غفار : : لا 

:: وين راحن يعني بنات لوحدهن و بتالي الليل يلگاها ابن حلال ابن حرام يصير وياهن نت يصير 

:: گول لروحك جم مرة گتلك كض أعصابك وياها البت صارت جبيرة موش مال ترفع ايدك عليها وانت تروح اطگها جدام الصغير و الجبير هي هاي وصيبة ابوي بيهن قسيم ؟

:: مشتعل سلفه سلفاي انا ماشي للمحامي اريدن افتهم منه والسيارة وكفت ألكاها ذابه ماي و شكر للمحرك غفااار 

:; و شني سيارة فدوة الها وغير انت حركت هويتها ولكل فعل رد فعل 

:: سد غفار سد انت هم فد واحد والله 

علي :: ها وين نروح 

غفار :: للبيت 

:: صدك

:: اي والله هم بنته كافي عليه 

رجعنه للبيت تلكن البنات سجدة و عنبر تبجي عليها جراح ماشي هو و قسيم يدورون عليها 

طبت تغسل وانا طلعت الملابس من الغسالة اشرهن سمعت صوت سيارة عرفته قسيم أول ما دخل نشد عنها 

قسيم :: وينها 

براءة :: شتريد منها قسيم تره والله تعبانة كلش خطية 

قسيم :: اليوم اكسر راسها وعلي اتوبها من طلعت البيت كلما احاجيها 

:: جا وينه ذاك حجيك بس خل ترد و التريده يجرالها 

طلعت من الحمام عاين الها بلهفة تنهد براحة وطلع 

عنبر :: رجعت للبيت ابوي طلع عنده مجلس و جراح گاعد يصفگ جكاير افكر هسه لو اجيبن جكاير و ابيع عليهم باليوم احصلي بالمية الف 

گمت اريدن انام صاح 

:: تعاي 

تگربت بحذر و اراجع شني سويت اليوم اخافن مسويتلي سالفة وناسية و راح يستغل ابوي موش هنا و يتويني توي وگفت بعيد عنه 

:: هاا شتريد 

ذب الجكارة و سحك الجمرة عاينلي مستغرب 

:: شبيج شاردة تعاي ليجاي اريدن احجي وياه 

:: احجي من مجانك اسمعنك 

:: عنبر مو اگوم 

تگربت كعدت يمه عبالك مجرم گاعد جدام الضابط هسه لو ينشدي ع شي حتى لو ما مسويته گبل اعترف 

:: وين نقالج 

:: ليش 

:: گومي جيبي و راسلي سجدة گلها تخربطت وماكو احد بالبيت خل تجيج 

:: كلشي مابيّه بيش طالبني بالمرض بكزار و حرمة ولا بيه 

:: عنبر تگومين تسوين مثل ما گتلج لو اخليج بنفس المدرسة وياه التكرهينها 

كمت ادبج برجليّه عود مغتاظة جبت نقالي و اشرلي اكعد يمه كعدت اراسلها وهو حاط راسه بالنقال وهي جاوبت ما مصدكة كالت حلفي 

:: حلفي وانا ادفع كفارة 

:: لا شنهي كفارة انا استحرم اخافن الله يسطرني 

:: كتابة هاي موش حجي ماعليج ذنب كتبي الها والله 

:: منين جبت هل فتوى

اخذ النقال مني كتب الها والله مريضة ردت هي " بله دزي بصمة" 

:: احجي بساع 

اجيت اشرد كضاني من ايدي كعدني يمه غصب 

:: سوي صوتج مريضة وتحجي بدون حلفان 

صدك حطيت الشال ع حلكي حتى يصير خشن و سجلت بصمة احجي وابجي 

مرت دقايق ندك الباب وهو حفز بساع و الابتسامة ع وجه فتح الباب صارت بوجه براءة تعاين مستغربة 

براءة :: شبيج ولج مريضة موش هاي جنج وردة

غمزلي جراح من وراها وانا طحت عود مريضة 

عنبر :: يا وردة ولج براءة راح اموتن احسن گلبي مدري شبي يدگ و نفسي ضاگ وووو ما ادري ما احسن بروحي تريد تفر صيحيلي سجدة 

:: شتسويلج سجدة خل اصيحن الج رحمة هي تعرف 

جراح يأشر لاااا وانا جلبت بيها واصيح 

:: لاااا استحى منها جيبيلي سجدة اريدن سجددددة براءة ولج رااح اموتن وماكو ع گدي تابوب 

غماني جراح من وراها وهي راحت تركض تصيح لسجدة عاين من الباب و دخل بساااع

جراح :: تاخذين براءة و تفوتين للحجرة و ممنوع تطلعين بعد 

طبيت الحجرة و براءة وراااي موتتني گتل 

:: كاافي شبيج تدمغين بيّه 

:: ام الجذب مو گبل شوية مواته صرتي تهديلي اذا ما اكولن لجدي عليج 

درت وجهي اعاين لسجدة و جراح فاتحة الباب شوية و اعاين رادت تمشي مغتاظة من عرفت السالفة جذب وجراح كضاها من ايدها صحت

:: عززا ولج براءة لحگي كضاها كضاها 

دمغتني ع راسي حيل احس فص من دماغي تحرك من مجانه 

:: صوتج راح تفضحينه و يجي غفار وتصير طلابة الها مالها تالي 

سكتت و رجعت اعاين الهم و براءة تجر بيه عيب... هو روحه ملتاعة عليها و عيونه متلفهة تحفظ ملامحها وهي نافرته واكفة بعيد عنه تگرب أكثر وكف جدامها 

:: شبيج سجدة شنهي الغيرج عليَّه شو چني ما اعرفنج بعد 

:: ما جان اكو شي حتى يتغير انا من البداية ما اريدنك بس ما گدرت اكسر حجاية ابوي من انطاني الك 

:: يعني 

:: يعني اريدن اتطلك 

:: موش كتلج هل سالفة لاتحجين بيها بعد 

:: تقبلها ع نفسك تاخذ وحدة ماتريدك و موش هاويتك 

نكسرت لمعة عيونه بلعت ريگي و احس عيوني كامت تنمل اريدن ابجي من اشوفن اخوي مقهور و قهر الزلم يگتل 

:: شنهي ناقصني و لهسه ما راهم عليج 

:: ما ناقص شي زلمه كامل مكمل والف بت تتمناك 

:: وانتِ 

:: انا لا الك ولا لغيرك ارهم 

تگرب الها حاوط وجه بجفوف اديه وهي بس تگرب الها تخربط وضعها كله 

:: عيونج تسولف غير شي هاي العيون انا مربيها حتى لو تجذبين عليَّه هنه يسولف الي 

جمدت بمجانها اعاين اديها كامت ترجف و صوت نفسها صار شهگات كوة تجر النفس بساع ابتعد عنها وهي بعد ما شالتها رجليها طاحت ع كاع 

بساع طلع البخاخ حتى تتنفس و براءة طلعت تركض الها هم گامت تتوجه ع حايط و گبل لا تطلع گالت 

:: اذا تريد تزوج اتزوج حتى لو بدون ما تطلگني انا قابلة شوف دربك 

ابتسم بسخرية تگرب وكف جدامها

:: ما الي درب وامشي بدونج.. انا بلا وجودج بحياتي اضيع 

عيونها بعيونه رجفت شفتها تكتم غصتها دارت وجهه و طلعت وهو بقى يعاين اثرها 

رحمة :: وكفة بالباب انتظر و الضحكة شاگة حلكي بعد ما كال ازاد اليوم حيجي احس گلبي يريد يطلع من صدري من الفرحة 

حضرت الغدا حتى نتغدا اني وياه صارت عيني ع شجرة النارنج و أزاد يحبه لبست صايتي و طلعت بالخشبة اضرب واللي يطيح شلته 

يبست بمكاني من شفت سيارات الشرطة.....