رواية ليلة كمرية الفصل التاسع بقلم ليلي الهاشمي
_نور مريض ومتشوهه داخليًا يا زهرة ..
ابتسمت واخذت الچاي من گدامي
شربت منه شويه .. وشتريد ؟
_ لا تأخذين دور شخصية البطل وماريدج تصيرين باتمان
_ لا
_شنو لا ؟
_ماعوفه وما راح اخذ دور شخصية البطل ولا اصير باتمان
زوجي بحاجتي وانا هنا ما راح اعوفه ، شكرًا لا حجيتلي هيج
حتى تخليني استمر ويا واساعده بالي اگدر عليه
صفن عليه وعيونه راحت على خالتي رادها تحچي ، ماحچت
كمل استكان الچاي ونهض نفسه .. الله يقدم الي بي الخير ولاول مرة نور يعرف يختار، يلا اني اروح
خالتي گامت وره وانا ضلت عيوني تراقب .. سدت الباب ورجعت تحچي وتكرر كلامه وتحلل وتنفي ، ما چنت اسمعها صوت عقلي چان اعلى عفتها تحچي وگمت دورت على التلفون ولگيته فتحته وچانت الاتصالات هواية منه
بـ100 مكالمة
دگيت مارد … رجعت دگيت هم مارد ، حاولت لآخر مرة وهم ماكو رد عفت التلفون ورحت للغرفة
صفنت على وضعها فراش متخربط بوفيه بيبانها مفصولة
والملابس كل قطعة بجهة
دخلت ودخلتي عليها ماخليت شي يعتب عليه
دگيت بوب البوفيه رتبت الفراش .. سفطت الملابس
دگيت بردة جديدة نظفتها وطلعت للصالة
فاطمة جانت نايمة نظفت الأكدر عليه وتوجهت للمطبخ
صارت گبالي خالتي تغسل مواعين .. وخري أنا اغسلهن واريد انظف المطبخ هم
_ زهرة ..
_ماريد اسمع .. اريد اشتغل
عافتني ومشت والتنظيف للمطبخ ما خلص للمغرب
وهوسه طلعتها للحديقة ورتبتها .. الحديقة مو وصخه بس نظفتها مابقى شي انظفة ما بقى شي التهي بي ماكو شي يخليني ابطل تفكير
حطيت فرشة وگعدت بالباب ودزيت الجهال يجيبولي حب من المحل
وكعدت اباوع على الناس واكرز.. عقلي ماهدء وصفنتني طالت .. عيوني على الناس وعقلي مو يم احد غير التفكير بالموضوع وصعوبته وتقبله الي احسه لو تقبلته گلبي ينشگ احساس وثقل بصدري چان رهيب وغريب
خفت مني عليه خفت حيل على نفسي
چان كلشي صعب بس ماعندي ولا بأيدي شي اسوي
ضليت گاعدة وخالتي وفاطمة اجوي يمي
وبأيدهم قوري الچاي والگلاصات .. التمن النسوان يمنه
والسوالف أخذتنا وانا اكرز وصافنة ما ارد ولا اگدر احچي
حتى الكلمات صارت صعبة بالساني بس عيوني تتفحص
وأذني تسمع .. وعقلي مو يمهم
مرت ساعتين .. والأربع ساعات وكل وحدة راحت لبيتها
وفاطمة دخلت ووراها خالتي وبقيت أنا مثل ما گعدت اول مرة وحدي
صديت وجهي وباوعت على بابهم چانت مقفولة اخذت نفس طويل .. تقبلين لو لا ؟ تگدرين
_ لا ماريد أفكر ماگدر ، لازم لازم تفكرين وتنهين هالموضوع
_ماگدر خايفة گلبي يوجعني ، زين إلى متى
_إلى متى ؟؟ ماعرف إلى متى بس مو هسه خليني مافكر بس اليوم .. باچر تحلين الموضوع وتخصمي؟
_ وعد وعد اي
حچيت ويا نفسي اسأل وارد عليها وأوعدها وخفت اخلف بالوعد .. حتى نفسي تعبت مني ومن تفكيري
ماعرف مو الي يسأل ومنو الي يجاوب .. وصلت مرحلة الجنون
ذبيت الحب من ايدي وشلت الفرشة الچنت گاعدة عليها
ونهضت نفسي وگمت ، خطواتي ثقيلة وجسدي تعبان
الحب ملوحته بحلگي وگلبي يركض گدامي من الخفقان
ضغطي هبط مدري صعد ووضعيتي تخربطت كلها
ذبيت الي بأيدي ودخلت جوه
_ التلفون دگ هواية ، تعالي جاوبي
اول صوت سمعته من دخلت للبيت صوت خالتي
باوعتلها ومشيت مارديت فرشت وتمددت .. غطيت راسي وعيوني مفتحة
عضلة صدري تأذيني ، لزمتها بقوة ووخرت الغطى عن وجهي بلش الألم ينزل وينزل لايدي وفكي ورگبتي
تعرق فضيع ولساني ثگيل
گوه گوه نهضت روحي كوه .. گمت وصلت يم خالتي باوعتلها واشرت على گلبي
نزلت على ركبي وعيني عليها.. هي نهضت وانا وگعت
يوم السبت الساعة 8:20
.. عيني صارت على الساعة وأفتح واغمض
درت وجهي يمين يسار .. وحسيت بأني اريد اتقيئ
نهضت نفسي والدوخة رجعتني لمكاني وراسي مرفوع
والدوخة ويا الغثيان چانت مثل الموت البطيئ
خليت جسدي يرتاح ونزلت راسي شويه شويه وغمضت
خوفًا من الدوخة والغثيان .. رجعت افتح عيني شويه شويه ببطئ ومحاولات حتى الرؤية صارت واضحة رجعت عيني على الساعة ومرت عشر دقايق
باوعت بتركيز على حايط المستشفى وچان نظيف وحلو
_ مستشفى خاصة ؟ ليش
حچيتها بنفسي وصوت الباب صار واضح دخلت وحدة لابسه ازرگ وشعرها فوك راسها اسود
عينها عليه وبأبتسامة واضحة گالت .. الحمدلله على السلامة ست زهراء
_ وين فاطمة ؟
_ منو فاطمة ست
_فاطمة اختي صغيرة مسوية ضفاير اثنين
_هااا اي موجودين كلهم برة ، چنتي تحت مراقبة مشددة ست بسبب الجلطة الي صابتچ ولله الحمد گدرنا نسيطر على وضعچ ..الحمدلله على سلامتج مرة لخ
واتمنى منچ تبقين بهدوء وبدون انفعال حتى وضعج يستقر اكثر وما تتأذين
_اريد فاطمة
_صار هسه اگول الهم يدخلون
_بس فاطمة بس
_صار
عافتني ومشت وشوية ودخلت فاطمة تمسح بدموعها
ماگدرت ارفع نفسي چنت خايفة من الدوخة بس عيني تباوع وايدي رفعتها حتى احضنها
_حبييبتي بنيتي ليش تبچين
_لا تعوفينييي زهرة
_چا أنا وين رايحة هي جلطة قابل شصاير
_هم حتى لو ماريدچ تعوفيني .. والجلطة مو سهلة
_لا حالها حال الفلاونزا بس أنا شوية عيارة ووگعت هيچ
لا تخافين أنا يمچ هسه وبعدين والسنين كلها بأذن الله
_زين انت جوعانة ؟
_اي والله حيل
_اجيبلج لفة فلافل اكو واحد يبيع جوه بخمسمية الوحدة ويحط بيها شسمها .. هذا الأسود
_بيت انجان
_ لا ، اسمه بيذنجان .. واجيبلج هم قوطية بيبسي عندي الف
ضحكت وانا استمع الها .. روحي اكلي انت يمكن جوعانة
أنا بعدين اكل .. خالتي وين ومنو بره غيرها
_هسه انزل اجيبلج .. وهنا كلهم عمو نور وبيبي وعمو امجد هم
_ شوكت تلتمون بفرحي شو ما شفتكم بس بالحزن
راحت فاطمة الباب انسدت وانفتحت بعدها بثواني
دخلت خالتي وأمجد ونور ماكو
خالتي اجت يمي تبچي وتمسح على شعري
وأمجد واكف بعيد ينتظر يگلي .. الحمدلله على السلامة
والتعب مبين بوجوهم همه الاثنين
بست خالتي وابتسمت الها .. لا تخافين بعد عندي اشواط لازم أكملها ما راح اموت بهل طريقة
بچت وابتعدت عني .. امجد واكف ويباوع
تقدم شويه .. شعري طالع حاول لا تركز
_ انتِ بيا حال ؟
_ چا تريدني اشوفك شعري .. شگول لله من أشوفه
_ الله ما راح يحاسبچ راح يغفرلچ لانج صبورة
_ حتى لو .. شعري طالع گدامك حرام
خاله غطيني حبابه
اجتي مسحت عيونها وشالت واخذت شال موجود بكنتور يمي خلته على راسي
_ هسه تگدر تتحمدلي بالسلامة
_ بسببي ؟
_ لا
_ بسببي لو ما حاچي چان مو هذا وضعچ
_ لا اكلت حب هواية ويمكن صعد ضغطي
_ زهراء؟
_ها امجد ها ، لو ما صايرة هسه چان صارت بعدين
اجتي بهاي ولا بغيرها .. دفعوا صدقة عني وكلشي ينحل
_اني اسف زهراء ما چنت ببالي راح يصير هيج
_قبلت اعتذارك من شفت المستشفى الجايبني بيها
قبلت بسرعة .. ولك صار دهر ما نايمه على هيج فراش
ضحك ونزل رأسه .. ابتسمت بتعب
خالتي من بعيد وهي تمسح دموعها للمرة الألف .. الچ خلگ تحچين هيچ طالعة من حلگ الموت
_ چا شسوي الله عليچ مو طلعت من حلگ الموت وما بلعني يعني لازم اعيش … چا تريدين ابچي لو اسوي دراما
انكتب عمر جديد وهايهيه
رفع رأسه امجد ومسح وجهه وباوعلي
_سامحيني..
_مسامحتك .. أنا شخص واحد ما ممكن أسامحه بهل دنيا والي هو ابوي ما عدا هالرجال الكل وبدون استثناء أنا مسامحتهم
_ زهرة ..
_ها
_تتذكرين من امي كالت الج .. امشي وأمجد وراج ما يعوفج؟
_ لا ؟ شوكت
_ من اجيتي اول مرة علينا يمكن ما سمعتي لان ركضتي
المهم اكولها هسه وبعدين .. اني يمچ
باوعت عليه وعيني صارت على خالتي
_ أشكرك بس اني عندي رجل هو راح يضل يمي .. نور وين
باوعلي وننهض نفسه
_ إذا هو قصر اني موجود وتذكري وجودي مو استعطاف الچ .. لان الصراحة بعد الي شفته المفروض استعطف وانقهر على روحي مو عليچ ، المهم راح ابقى موجود من تحتاجيني
واني رايح ..ثيمالا
راح وخالتي لحگته وضليت وحدي
شويه ورجعت
_ نور بره يريد يدخل
_ اكيد أريده خل يجي
راحت وبسرعة دخل .. قميصه اسود مليان تراب
وشعره مخربط ووجهه مخطوف لونه .. زهراء
ماخليته يحچي قاطعته بـ ساعدني انهض نفسي على المخاد حاولت بس دخت بلكي راحت الدوخة
اجا بخطوة سريعة صار قريب مني
لزمني من خصري ورفعني
غمضت عيوني بخوف لا ارجع أدوخ
ارتچيت وخلى المخدة وراية .. فتحت عيوني ببطئ
الدوخة خفيفه ومحتملة
صفن بوجهي وعيونه حمر والخوف واضح
_ تگدر تحضني.. احس مشتاقتلك
نصدم من طلبي لكن نفذ وبحرارة واشتياق
مابچه بس دگات گلبه حسيت بيها ورچفه جسمه
مسحت على ظهرة .. أنا يمك طول الوقت ما راح أخليك
ماچان مستوعب أنا ليش هيچ احچي ويا
بس تقبل وماحچه وضلّ بحضني
_خفت عليچ اجيت ركض .. ركض والله زهرة ركض مثل المخبل اركض بالشوارع ووگعت وركبتي نشگت
ويوم كامل اني ما نايم .. بس ردتچ تگعدين بس ردتچ ما تروحين مني
رفع نفسه من حضني وصار مقابيلي گاعد
_ شلون أعوفك .. صعبة احس
_ لا تحسين تأكدي بس شلون وليش وشلون هيج صار بيچ
جلطة !!! جلطة يازهرة ليششش
_ هاي إرادة ربك وهاي حكمته نعترض؟ لا طبعاً
وهي تصير عادي مو خطرة وانا تعبت وانقهرت وتوترت الفترة الي راحت وگلبي ما حمل وقرر ما يضخ دم
ضحكت وهو صافن
_ لا تضحكين وتستهزئين بوضعچ رحمة لله والكائنات
_ ما مستهينة حبيبي بس مدام عايشه يعني انكتب عمر جديد وهسه كلت الهم لخالتي وأمجد ماسوي دراما
سكت ونزل رأسه .. الي هضمني ان امجد هو الي الموجود دائمًا مو اني يعني هو الي يطلعج بكل مرة من كل سالفة مو اني .. هذا الي يحرگ گلبي ويخليني اكرهه
لزمت ايده وخليتها على گلبي .. تسمع دگات گلبي هاي وجودها مو عبث .. يمكن رجعت علمودك مو علمود احد ثاني امجد سبب الله خلاه بحياتي اشكره ممكن احترمه اي
ناخذ اله هدية أنا وياك حتى نشكره بطريقتنا… هذا حدي ويا امجد ، انت هنا بگلبي
_ شسويتلچ وهيج تحبيني ؟
_ افا ، احبك بدون ماتسوي
_ انتِ هسه اطمنيني ولازم اني اطمنچ
_ ماكو فرق
ابتسم ورجع حضني
حسيت الگعدة تعبتني رجعت نفسي شوي شوي وهو گام ولازم ايدي .. بيچ شي ؟
_ اي تعبت اريد انام
_ لا بيچ شي يمكن خلي اصيح احد
_ ممشيه عليك العباس ابو فاضل يا نور لا تصيح ابد
ماتحمل اي صوت ، ومابيه شي بس تعبت واريد انام
_ زهراء؟
_ ها حبيبي ها .. والله مابيه شي وداعت فاطمة
تذكرت هي راحت وما رجعت بسرعة گمت وعيوني فاتحتها
_فاطمة .. فاطمة راحت تجيب لفة وما رجعت
نور فاطمة
_ لا تنفعلييين ابقي بمكانچ هسه أشوفها
ماسمعته وگمت ما حملتني رجلي
وهو سندني.. نور .. فاطمة دخيلك
_ ولچ شبيج خايفة المكان أمان والله هسه أشوفها بس ابقي
_ يلا روح روح
مشى وانا اصيح بأسمها بصوت ناصي وضليت واكفه
تخيلت ميت سيناريو بوگفتي هاي .. اجا وگال موجودة برا
ارتخى جسمي .. مديت ايدي
لزمني وحاوطتني ايده .. وجهي صار بحضنه
والضوه اختفى .. اخر شي سمعته …زهرة خرب بروح اهلللججججج .
_مر على وجودي بالمستشفى أسبوع
حالتي چانت تحتاج لمراقبة ووجودهم يمي ما خلاني احس
بخنگه المستشفى .. نور وأمجد ما يلتقون بس موجودين كل واحد يجي ويروح بفترة مختلفة عن وجود واحد منهم
وخالتي وفاطمة ما تركوني ابدًا
بيوم الجمعة الأسبوع الثاني .. ليلاً مطر خفيف وهوى عالي
_ تگدرين تمشين مو حبيبي
_ چا شمالني مكسرة
_ دبطلي هل نتره عاد
_عوفها اني امشيها
باوعت لخالتي الي تقدمت حتى تلزمني
على الرغم أنا اگدر امشي بس المبالغة عدهم تذبح
_انا انااااا امشي بس عوفوني
حاوطتني ايده ومشينا بدون مايحچي
_خالة متأكدة فاطمة يم بيت امجد يعني اطمئنيتي واجيتي
_ هو من البارحة گال اخذها من المدرسة واخذها يم امي
حتى ترتاح .. والصبح رحتلها جانت نايمة
وعلساس يجي قاطعها نور
_ بس صارت عنده شغلة ويا عمامه
وراح ويمكن راح يطلگ مرته
استغربت من كلامه ..
_ليش؟
_والله يا حبيبة روحي مادري بس مشاكل عالگة صار شهر
والبارحه گالوا راح تصير گعدة يعني على اليوم
وراح وفاطمة بأمان يم امه لاتخافين
سكتت ماحجيت
وصلنا السيارة .. گعدي ست حفظية بالسدر
أنا يم مرتي راح اگعد
ضحكت وباوعتله .. شو أنا
_اريد اصيرن مثلج
ابتسمت وباوعت للطريق وانا بحضنه ومحاوطتني ايده
وايدي على ايده
_ راح اخذج لبيتچ اليوم .. همسلي باوعتله بسرعة
_بيت ؟ اي بيت
_بيتنا اني وياچ حبيبي
_شلون وشوكت ؟!!!
_للامانة هو ايجار بس مقدم مال سنة ها
وجهزته بهل أسبوع .. بقى بس اجيب خط للمولد
وما لحگت واجيتج
باوعت لخالتي ابتسمت وگالت .. عفنه ذاك البيت
وشلنا كل الغراض ونقلنا للجديد
يخبل وبي حديقة ونخل وكله سيراميك .. وغرفتچ فوك
البيت راح يعجبج
_ وين وشلون لا تخبلوني
لزم ايدي بقوة
_ اني ماريد اي ذكرى سيئة تمر على بالج
وبذاك البيت شفتي الويل لهذا اريدچ او اريد نبني سوى ذكريات حلوة بعتبة جديدة
ابتسمت بقلق باوعت لخالتي هزتلي راسها بطمئنان
رجعت نفسي على صدره وصفنت
وصلنا بعد نص ساعة على الطريق ..
المنطقة مختلفة البيوت حلوة ومختلفة
وكلشي مختلف هنا .. يعني راح الشارع الي يلعب بي حيدوري حچيتها ويا نفسي وانا عيني تتفحص المكان
نفس المنطقة لكنّ بالناحية مال زناگين
هيج اسميها بسبب البناء والحدايق الچبيرة
_ تذكرت نهى
ضحكت خالتي … صرتي هسه انت نهى
رد عليها نور وهو يفتح الباب
_ لا نهى ولا عشره مثلها مثل المدام زهراء والأميرة زهراء
لزمت ايده وابتسمت
فتح الباب … ادخلي برجلج اليمين
دخلت وعيني ضلت تباوع للنخل
فرحت حيل بسبب وجودة لاني جنت اتمنى
الحديقة جبيرة حيل وبيها زرع والخضار ماليها .. والبيت من الخارج الإضاءة مالته حلوة بس مجان ملبوخ بس جديد
وبابين گدامي رحت فتحت الباب الاول وچان الاستقبال
التلفزيون جبير يتوسطه والتخم ملكي يخبل .. دمعت عيوني من الفرحة
عفته وتوجهت للباب الثاني وچان المطبخ
كاونتر جوزي والطباخ بصف الباب
والفراش مفروش لونه جوزي هم .. خليت رجلي بالبيت وباوعت عليهم همه هم مبتسمين وياي .. أنا بحلم انت بحلم لو علم يا زهرة
دخلت وعيني تشوف الجمال والسيراميك الي بكل البيت
جنت طايرة من الفرحة
من الطابوك للسيراميك .. شلون وشلون اترتبت
الصالة الداخلية هم بيها تلفزيون وتخم .. من شوكت يازهرة متخيلة يصير عندج تلفزيون
مسحت دمعتي ودخلت للغرفة الي بنص الصالة
چربايات..ضحكت ، خالة چرباية
_ اي هاي غرفتي وغرفة فطوم
انت مالتچ فوك انت ونور
عفت الغرفة وباوعت للحمامات والدرج صار گبالي
باوعت لنور واجا عليه
_ من رخصتج حجية يمكن راح انام
_ مرخوص بس جهازك وقته علمود علاجها
هز براسه وشالني وصعد وانا ايدي تمسح على السيراميك
الطابق الفوك نفس تصميم الي جوه
نزلني وعافني اروح للغرفة .. فتحتها وتذكرت غرفة نهى وجمالها .. غرفتي احلى منها
الچرباية ام نفرين امنيتي چانت … ميز التواليه والمكياج ماچنت أتخيلهن اصلاً
كنتور خاص وزاوية اخلي بيها ملابسي
مشيت للشباك وخرت البردة وصارت گبالي النخلة
رجعت عيني عليه وهو واكف ومبتسم
_ تعرف جنت انظف غرفتها لنهى واتمنى يصير عندي مثلها
تقرب مني رفع ايدي وبأسها
_ وهذا كله الچ ومالتچ والناس تتمنى تكون بمكانج مو العكس هذا شي قليل .. بس اريدج ترتاحين كل قوتج
عن كل الأيام الي عشتيها قبلي
رفعت نفسي وحضنته وبچيت بفرحة
_ هوووب هوب الدكتور كال …
_ اعرف اعرف شگال .. هاي دموع الفرحة والله
_ خو انت بالحزن ما تبچين بس بالفرح
شكد غريبة
رجعت حضنته وبادلني الحضن وهو يضحك
_اريدچ .. بصوت هادئ
تذكرت كلام امجد وخرت نفسي عنه وسألته .. شلون ؟
_اريدچ شنو شلون اريدچ تصيرين مرتي بعد هايهيه
ماريد بس عالورق.. اريد طفل واسمي حيدر هم
صفنت بوجهه وكلام امجد يرن براسي
بتوتر … خليها .. خليها بعدين هسه تعبانه احس
_حبيبتي هو طبعًا بعدين ، ما اضغط عليج ابد براحتج
يلا اروح اجيب اكل واسوي المولد لان هاي وطنية ويمكن تنطفي .. ملابسچ جديدة هنا والباقيات شمرتهن
وخالتج اختارت مو اني يعني مو ذوقي
يلا رايح
طلع وعيني عليه .. مريض نفسي ، عنده ضعف ، نور مشوهه داخلياً
_اششش اشششش كافي افكار وتذكير كافي
أششش هايهيه اش مابي شي نور
حاوطت نفسي وسديت اذاني مرت دقايق ربع ساعة او اقل
الايد الي لمستني فززتني
رفعت عيني وچان نور مبتسم ابتسامة غريبة .. شبيچ؟
—شبيه ؟ ليش رجعت
عيونه تفحصت المكان ورجع باوعلي
_انام .. اريد انام
