رواية الندم مابعد الخطيئة كاملة جميع الفصول بقلم رونق
البطله : اسمي روان عمري 17سنه خامس اعدادي اعيش وي عائلتي الي همه بابا معاون طبيب وماما ربة بيت
وعندي اخ وحيد اسمه عمار طالب جامعه كلية تربيه وعنده محل ملابس رجاليه يشتغل بي احنه الوحيدين لاهلي
البطل : اسمي مرتضى عمري 27 سنه خريج كلية تربيه وممتعين عندي محل موبايلات واكسسوارات اعيش وي عائلتي الي هيه امي ربة بيت وابويه موظف حكومي واخ اكبر مني اسمه مهند خريج اداب وعنده سوبر ماركت يشتغل بي متزوج وطالع ابيت وحده عنده اطفال 2 ولد وبنيه واخوات 2 وحده متزوجه اكبر مني اسمها ايات وحده اصغر مني اسمها شهد
روان : راح ابدي وياكم قصتي من جان عمري 16 سنه جنت صف رابع اعدادي
اعز واغلى صديقه عندي هي شهد جانت صديقة الطفوله من الابتدائيه للمتوسطه للاعداديه سويه
الكل جان حاسدنه ع صداقتنه الحلوه
اني وياها قررنه حتى الجامعه سويه انداوم ومنتفارك ابد
اني جنت محافظه بشكل ع سمعتي وسمعة اهلي
رغم مامنطيني كل الحريه بس ابد مخنت ثقتهم بيه
جان اخويه ياخذني ويجيبني ومرات نوصل شهد
انعجب بشهد وطلب مني اصارحه وجانت البنيه هادئه وحيل حلوه
رفضت وبعد متصعد ويانه ابد
بعدين يمكن اخذ رقمها من جهازي بدون علمي
صارت علاقه بينهم بس علاقه شريفه مجرد تعارف وسوالف عاديه
جانت تنطيني الاحداث اول باول
طلبنه منها نخطبها بس كالت من سابع المستحيلات ينطوني اهلي هسه
انتظروا ع الاقل لمن نخلص السادس
قوت علاقتهم وجان حبهم صادق وطاهر
لليوم مطلعوا سويه ولا التقوا باي مكان
نجحنه للخامس وهم نفس العلاقه
اخويه جانت نيته صافيه ويخاف عليها وع سمعته
طلب مني نطلع سويه واني وياهم لان يخاف ع سمعته
فعلا طلعنه وجنه بالسياره يعني لاكعدنه بمكان عام ولا رحنه لاهلي
بده هذا الشي يتكرر بس ولا مره طلعوا لوحدهم
مره طلب منها تجي لبيتنه وفعلا اجتي وكنالها احنه نوصلج
كعدنه سويه ولا طلبوا مني اتركهم وجان حديثهم عادي
ردت اعوفهم مقبلوا ابد
بقوا ع هذا الحال ولا مره التقوا وحدهم
جان يوم عن يوم واحد يتعلق بالثاني
مره سامعها اخوها تحجي بالموبايل وهو متخبل
اجه اخويه وطلب مني احجي حتى يتاكد من الصوت
لج روان تعالي الحكيني
خير شبيك
لج كاعد احجي وي شهد وجان اسمع اخوها يحجي وياها ويسالها منو هذا الي تحجين ويا
اني طبكته للخط لان معرفت شاتصرف وهسه تعاي احجي وياها وكليلها اتلبكت من سمعت اخوج يحجي وياج
سهله انطيني الجهاز اتصلت بيها
كلت الووو
جان تطلعلي بنفسها حيل افرحت
وعرفتها فاتحه سبيكر
حجينه بامور المدرسه واعتذرت كتلها انطبك بالغلط
سويت نفسي احجي وياها بلهجة الولد
جان تكول لاعفيه خل نبطل هذا شقانه اخاف احد يسمعنه ويسويلنه سالفه
جان واضح من كلامها اكو احد يمها
شنو هاي شهد قابل هاي جديده علينا مو دائما هذا حجينه
احنه كبرنه خلي نعوف هذا الحجي لااحد يسمعنه ويفهمنه غلط
ع راحتج شهد مثل متحبين
بعدها اترخصت وطبكته
كلي عمار لازم اخلي الجهاز يمج ابد مااخذه
لان اكيد راح يبقى يلح لحتى يتاكد
فعلا بين فتره وفتره يدك رقم غريب واني اجاوب
اخويه جان حيل حذر مخلي اتصالاتهم برقم خاص وجهاز خاص بس الها
يكول منتخابر الى بالليل ومااريدها تتصل بيه ع خطي المعروف
فعلا انسد الموضوع تقريبا
كام يجي اخوها بنفسه يوصلها وبيده يرجعها ابد ممركزه ع شكله
وجان يباوع علينه اني وعمار بنظرة حقد
جانت تحجيلي عن وضعها بالبيت
تكول كام يشك بكلشي حتى الجهاز يخلي يمه
عمار تركها نهائي هاي الفتره
مره جنت كاعده اقره لان ثاني يوم عندي امتحان
فجأه دكت عليه شهد
هلو حبيبتي رونه شلونج
هلو شهوده شخبارج
تمام اكولج راح اجيكم هسه لان اخويه راح يروح لكربلاء هو واصدقاءه
حيل فرحت كتلها هله بيج والله مشتاقه كومه
كالت كلت لماما نروح نقره اني وصديقتي بابا راح يجيبني
وانتو رجعوني
يله حبي راح انتظرج لتتاخرين
ان شاء الله
رحت خابرت عمار وحيل فرح
رجع ع السريع
وره شويه اجت
كعدنه سويه وحتى ماما
تعرف بعلاقتكم بالبدايه اعترضت
بس من شافتنه شلون نكعد سويه وماكو حجي منا منا وشافتني بنصهم سكتت
نبقى نسولف سويه وهو يكلها اريد اخطبج وتجاوبه خل اخلص السادس
بقت تقريبا قبل الاذان
طلعنه حتى نوديها لاهلها
جانت الضحكه واضحه علينه كلنه
صعدنه بالسياره شهد وره
تحركنه شويه وجان تعترض طريقنه سياره
جان شهد تلطم ع وجها تكول هذا اخويه مرتضى
كللها عمار بس اهدي وديري بالج ترتبكين وسوي المساله طبيعيه
وقفنه سيارتنه
وهو كذلك
نزل وجان معصب حيل
اول شي سواه فتح السياره ونزل شهد
ضربها راجدي فر راسها فر
انت منو سمحلج اطلعين
بابا جابني بيده
عمار اتخبل بس كدر يتمالك اعصابه
التفت ع عمار
انت بصفتك شنو عايف المحل مالتك وجاي توصل اختي
بصفتي اخو صديقتها اوصلها لان صعبه عليه اخليها تروح بوحدها
محجه شي اخذ شهد وراح
احنه رجعنه وجنه قلقين حيل عليها
ادك عليها جهازها مغلق
عمار هم يدك نفس الشي
ثاني يوم مداومت
بقت تقريبا 3 ايام ابد مداوم
رابع يوم عمار كام حجه وي ماما كللها روحي اخطبيها الي
وتاكدي اخاف هذا ماذيها اخوها خطيه
كالت ماما خل نروح سويه اني وياج
خلي نسوي نفسنه زياره عاديه وخل نتاكد من البنيه اخاف ماذيها اهلها
اخذنه بابا ووصلنه
استقبلتنه امها وجان وجها ثكيل
دخلتنه بس مبين ع اعصابها
كتلها خاله اريد اشوفها لشهد
جان تكول مو بالبيت مموجوده
سكتنه
ماما كلتلها احنه جاين نطلب القرب منكم وحابين نخطب شهد لابني
واي شي اطلبونه احنه حاضرين
جان تكول اكل لابوها عود وادزلكم خبر
حسينه بوجها ثكيل علينه
بسرعه خابرنه بابا ورجعنه
بقينه وره يومين اي خبر ماكو عنها
بالليل وجان يجيني عمار يركض
كال ولج اخوها نصبلي كمين بالموبايل
شلون
راسلني ع اساس شهد واني فرحت جرني بالحجي واني حجيت الي بكلبي وباللحضه اتصلت بيها
وجانت المفاجئه يطلعلي اخوها
لعب لعب بيه ويكول اله اندمك ع السويته باختي
اني اعلمك اذا مااخليك تعظ اصابيعك ندم مااتسمى باسمي
كتله يابه والله مفتهمني غلط
اني حابه اتقدم الها ع سنة الله ورسوله واكبر دليل دزيت امي الكم
تحلم والله اخر شي تفكير يصير هذا الشي
متستحي انت واختك تضحكون عليها وادخلوها لبيتكم
حاولت اشرحله بس مقبل
وهسه شلون
مااعرف
باجر ادز ابويه هو وعمو بلكي يوافقون
ثاني يوم ماما طلبت من بابا يرحون بلكي الله يوافقون
راحوا بابا وعمو وياهم رجال سيد
وجنه منتظرين ع نار
رجعوا وجان يكولون البنيه مخطوبه لابن عمها
وعاقدين محكمه وسيد
الاسبوع اليجي زواجها
اتخبل عمار
فدوه يابه والله جذابين
مستحيل اخليها تتزوج غيري
بابا منكدر نروح بعد نهوا السالفه
تكعد وتسكت والخلقها خلق غيرها
اني اعرف شاصرف
عافنه وطلع كام يصيح بابا عليه عافنه وطلع مهتم
خطيه شهد انكطعت اخبارها نهائي
ثاني يوم كال عمار اخر مره خلي نحجي وي ابوها
ماقبل بابا كال عيب منهم
اصر عمار بس بابا رفض
ثاني يوم جان يجي اتصال لبابا كله تعال للمركز ابنك محجوز
بابا اتخبل راح للمركز
لليل رجع بوحده
كال متعاركين الولد اخو البنيه يقصد شهد وعمار
عمار ماخذ شكم ولد ويا ومكسرين المحل كله وماذين الولد
ماما كامت ادك وتلطم
كال مشتكي الولد وعنده شهود
وهسه شراح نسوي
وكلت محامي بس كلي مايطلع اله يتنازل الولد لان الولد متاذي وبالمستشفى هسه
ورحنه الهم ومقبلوا يستقبلونه ابد
وهسه شراح تسوي
والله يامره الولد متخبل علني يعني شني قحط بنات وهيج ذبح نفسه عليها
كلتله ماما الولد حبها واني شاهده البنيه شريفه وحلوه
حتى لو اهلها ناس ميستحون حتى ميقدرون المقابل ابد
طبعا عندي عم واحد وعندي 3 عمات
بابا اكبر واحد بيهم
يعني اولادهم ازغر من عدنه
بابا اتصل بعمو وخبروا اقربائهم
ثاني يوم صادف خميس
العصر راحوا لبيتهم وطلبوا منهم بس يتنازلون
اي شي يردوا احنه حاضرين
كالو منريد شي نريد المحكمه تاخذ مجراها
هواي اتوسلوا ورادوا بس مفاد
بقه عمار بالوقف تقريبا اسبوع
حالتنه متنوصف ابد ماما بس تبجي عليه
اهلي ملوا من اهل شهد بس مقبلو غير ينسجن حتى ياخذ عبره
مرتضى : اني جنت احب بنت عمي من الطفوله واعشقها اسمها مريم
طلبت من ابويه يخطبها الي
خطبها وانطونياها بس شرطوا لمن تكمل جامعه
عقدنه سيد ومحكمه ومنتظرها تكمل السنه اخيره الها
جهزت كلشي غرفتي والنيشان مبقى شي منتظر بس تخلص السنه
احنه عائله محافظه منحب اللف والدوران
ماعدنه بنيه تطلع بوحدها
اختي شهد جنه مخليلها خط للمدرسه
بس مرات تكول اجي وي صديقتي اهلها يوصلوني
جنت عندي ثقه باختي واني واثق من تربيتها
بس انصدمت مره من سمعتها تحجي وي ولد
دخلت عليها وجانت مصدومه كالت مرتضى يمكن انطت ايعاز
اخذت الجهاز منها هي ارتبكت
ويامن جنتي تحجين
وي صديقتي
وصديقتج تكليلها والله اني هم مثلك
اي عادي اني وياها نحشش
زين ليش قطعتي الخط
لان اتفاجات بيك
ابد مقتنعت وطلبت منها تتصل لحتى اتاكد
بيدي اتصلت وجانت كاتبه علي روان 2
فتحت الحاكيه
كالت الووو
طلع صوت ابنيه وفعلا طلعت روان صديقتها
لان دار حديث ابينهن
كالتها اسفه قطعته الخط بالغلط
بقن يسولفن
بس اني حسيت الوضع مو مريح ويشكك
بقيت اراقبها من بعيد لبعيد
الجهاز كمت اخذه منها
الصراحه مشفت شي عليها ابد
كمت بيدي اخذها واجيبها
حاولت اتصل هواي بهذا الرقم بس تطلع نفس البنيه
كلت يجوز اني متوهم
كمت اشوفهم البنيه ويمكن اخوها
اكيد هو الي يلعب عليها ومقشمرها
مرت الايام واني حيل حذر
كتلها بعد ممنوع يوصلج اخوها لصديقتج لو شيصير
وممنوع تروحيلهم للبيت
كالت اوك
رحت جمعت معلومات عنه
عرفت عنده محل ملابس رجاليه
كدرت اجمع شكم معلومه عنه
بعد فتره قررنه نروح لكربلاء اني واصدقائي
بدلت وطلعت بس اتفركشت الروحه لان ولد صديقنا سمع خبر استشهاد اخو
خطيه تخبلنه علينه وجان قبل شهرين متزوج
كلنه عيب نروح
رجعت للبيت حتى اغير ملابسي لان اني بالزياره البس دشداشه
دخلت سالت امي ع شهد جان تكول يم صديقتها روان
اني اتخبلت كمت اصيح
اني مو منعتها تروح شلون تروح بدون علمي
انت تعرفين بنتج شعدها تروح لهناك
تروح ع مود اخوها لصديقتها
طبه وطلعه من زمان هي وياهم
امي تخبلت
لك يوم اكيد متوهم اختك متسويها ابد
وبعدهي طفله مو مالت هاي السوالف
يوم لخاطر الله اسكتي انتي نايمه وماتدرين شديصير من وره ظهرج
بس وربج اليوم نهايتها ع ايدي
اني قبل فتره اخذت معلومه كامله عن اخوها لصديقتها
واندليت بيتهم
رحت للمحل مالته حتى اتاكد لكيته مموجود
يعني توقعي بمحله
رحت عليهم للبيت وفجأه طلعوا والضحكه تارسه وجهم
اشتعلت شعل يعني يضحكون ع اختي هو واخته
اني مااكدر اتصرف وياهم لان ماعندي دليل ضدهم
بس رجعت ع شهد ضربتها واخذتها للبيت
اجرمت بيها والله
لج كلبه حقيره اني مو محذرج مترحين الهم
والله ماعندي شي وردت اشوفها لصديقتي مشتاقتلها
لج شنو مشتاقتلها مو اليوم جنتن سويه بالمدرسه
ها لا مو ممداومه لان مريضه وحبيت اطمأن عليها
شفت حجيها مو متناسق ابد وحيل مرتبكه واضح عليها تجذب
بيومها بختها بامي تخربطت يله هديتها
لليل اجه ابويه ومهند وخبرتهم وهمه اتخبلو
كالو شلون تدخل لبيتهم واحنه مامنين عليها
هجموا ع شهد ونهوها كوه امي هدتها منهم
وراها اجوي بكل عين صلفه وخطبوها
طردناهم وكنالهم مخطوبه لابن عمها
وفعلا ابويه دز ع عمي الجبير وعنده ولد واحد ع اربع بنات
هو نفسه الي احب بنته
اساسا صاير حجي من زمان شهد لرسول الي هو ابن عمي
كال يابه يوم عيد الي تصير شهد ابيتنه
طلبنه منهم يستعجلون
وهم بقوا صافنين
كللهم ابويه طلعت مو زينه بالدراسه وراسبه بيهن كلهن المواد
الولد بعصائب اهل الحق
نبع الحنان جانت رافضته تكول ماانطي لواحد ملك الشعب
اخاف يصير عليه شي لا سامح الله
طبعا حالتهم الماديه موشي بيت عمي
وعمي متصوب بحرب ايران وعنده شلل نصفي ويمشي ع عكاز
مايكدر يشتغل ابد عنده محل بسيط من بيتهم
بس العيشه صعبه وهو من النوع يرفض مساعده من اي احد
خطيه رسول التحق وي عصائب اهل الحق بسوريا يداوم يدافع عن مرقد السيده زينب ع
رغم معارضت الكل بس هو جان مقتنع بلي يسوي
جانت بالنسبه اله شهد حلم بعيد
هذا الشي عرفته من اخته مريم الي هي حبيبتي
لان حلوه بشكل وبعدهي زغيره
بس اخلاقه عاليه الولد مايوم اجانه بوحده اله وي اهله
بس شهد جانت ترفض من نجيب طاريه للولد
مجنت اتوقع تحب ومن وره ظهرنه
بيت عمي حيل فرحوا
وطلبت من ابويه يستعجلون
وفعلا نخطبت شهد وجانت رافضه بس شبعناها كتل
نصبت ع الرقم الي كاتبه عليه روان حجيت بصفت شهد وذكرت عمار حتى اتاكد اشو هذا باللحظه جاوبني واتاكدت عدهم علاقه سويه واني اتخبلت دك نفسه الرقم ومن جاوبت اتفاجئ وكام يجيب منا ويرد منا يعني ابد مظلمناهم بشكنه
يعني صحيح علاقه
يمكن لو ممدخلها للبيتهم جان اهون
بس مخلي اخته الساقطه بالنص
واكيد ضاحكين عليها
طلبت من امي تسالها اخاف معتدي عليها
حتى منتفشل كدام العالم نكتلها ونطم عارها بدون منخلي احد يحس
كالت امي والله تحلف يمين ملامسها ابد
وشلون نتاكد
يوم اني واثقه من بنتي وتربيتها
كمت اكفر واصيح اني ومهند
هاي نتيجة التربيه مالتج تدخل لبيت صاحبها
اخر شي كتلها خلي توافق ع رسول لا نهايتها ع ايدي
كالت والله انتحر ولا اقبل برسول
والله تسوين جميل حتى نخلص منج
اني صحيح احب بنت عمي بس بالمعقول والله
نضرات ومخابرات ابيناتنه
بس لليوم متعديت حدودي وياها
وخاصه لان هي تبقى عرضي
نتخبل من هاي السوالف طلعه وطبه
صدفه نلتقي لوحدنه يمكن ثواني
اجوي بيت عمي بالليل ع مود العقد
راحت امي تصيحها وجانت المفاجئه
لكيناها بالعه كومة حبوب وفاقده الوعي
رحنه بسرعه اخذناها للمستشفى وسولها غسل معده
لحكناها وجانت ترفض تفتح عيونها
اخذناها للبيت واعتذرنه من بيت عمي كنالهم لان بطلناها من المدرسه هيج سوت
كنالهم انطونه مده 3 ايام
كالت مريم رسول متخبل يكول خاف مجبوره
يكول لو اموت مااقبل تنجبر من ورايه
كتلها لج وين تلكه احسن من رسول
بس هي ضايجه ع الدراسه
هاي الفتره رفضت تاكل وقطعت الاكل نهائي
مهتمينه الها
بس امي خطيه ادك وتلطم تكول بنتي راح تروح مني
وتتوسل بيها لحتى تاكل
مرتين اجوي الجماعه بس طردناهم لان خصمناها السالفه
اليوم جنت كاعد بالمحل مثل الشركه
المحل جبير وبي عمال مخلي
واحد للايبادات وواحد للحاسبات واحد ع اللابتوبات وواحد ع الاكسسوارات واني ع الموبايلات
يعني احنه 5
جنه كاعدين تقريبا ب3 الظهر احنه هسه نهاية شهر الرابع
يعني الجو حار ناس قله
اني محلي بمنطقه تجاريه وراقي
شغلنه اكثر شي بالليل
رحت لاهلي اتغديت ورجعت
كاعدين وجنه ماعدنه احد تقريبا المحل فارغ بس اني والعمال
مااحس اله اجه هذا السكط
كام يحجي وكدام العمال
شهد الي ومتصير لغيري
اتخبلت راح يفضحني
كمت وطلعت من وره الميز
جريته بره المحل
تطلع لاومحمد اسحلك سحل
اذا انت رجال سويها
ضربته بوكسي وكعته للكاع
هو كعد رجعلي الضربه
بقينه واحد يضرب بالثاني
ادخلو الولد وفكونه بالكوه
كمت امسح الدم واني اتحلف بي
هو طلع
يمكن اقل ربع ساعه وجان يجي هو وجماعته
فقدوا
كاموا يكسرون بالاجهزه حاولنه نوقفهم بس همه عددهم جبير
يمكن اكثر من 8 اشخاص
اباوع ع المحل اتخبلت
رحت علي وبدينه نتضارب اني ويا
مااحس اله يضربني بالايباد وجان ثكيل
اجه ع راسي
تغركت بدمي
فقدت الوعي بلحضتها
كعدت لكيت نفسي بالمستشفى
اتذكرت الصار
مهند وابويه فوك راسي
سالتهم ع الولد السكط
كالوا بالمركز هو والولد الي ويا
كتلهم والمحل
كال مهند مو مهم المحل لان والله راح نخسره اضعاف المحل
كتله اني اهم شي مايطلع من السجن ابد
مااريد لا مشيه ولا فصل ولا خساره اهم شي يخيس بالسجن
كلولي سولفنه الصار
سولفتلهم كلشي
راسي مخيطينه يمكن 7 خياطات
بقيت يومين بالمستشفى
اجوي الشرطه واخذوا اقوالي
وراحوا للمحل واتاكدوا والمحلات الي بصفي شهدوا ضده
والله اله اندمك ندم متتوقعه ابد
حيل حاقد عليه هو واخته
كال ابويه هواي اجوي ورفضنه المشيه ورفضنه الصلح ابد
كال ابويه هذا مو من صالحنه يطلع من السجن لان مستعد كلشي يسوي
لحتى يخرب العرس
لازم نضغط ع شهد حتى توافق
كتله اني اعرف شلون راح اخليها توافق
طلعنه من المستشفى
والكل يسال ع الاسباب
كتلهم راد يرجع جهاز اشتراه مني واني رفضت
كلفنه محامي وطلبنه منه غير الحكم منقبل
نريد ينحكم ونريد تعويض المحل
بس منتنازل
هواي جابو شيوخ وساده
احنه نطردهم ونرفض
رحت لشهد وجانت بس تبجي
كتله اسمعيني شهد زين
وربج اكتله بيدي وميرفلي جفن
اذا تردين يبقى عايش وافقي ع رسول
كالت اوافق بس اتنازل عنه
لو اموت مااتنازل عنه ابد
كذبت عليها حتى توافق
كتلها تدرين وين هسه
بالمكافحه تعرفين شنو المكافحه لو اسولفج
يعذبون بي بالكهرباء وبالضرب وانواع العذاب بعد
اذا وافقتي اخليهم يرجعونه للتوقيف
كالت الله عليك لتخليهم يعذبونه
الله عليك اتنازل عنه
مااتنازل ابد اله اربي من جديد وربج
بس اذا وافقتي واتزوجتي رسول
راح اخليهم ميعذبونه
كالت احلفلي
والله العظيم مااخلي احد يضربه
جان تكول موافقه اني
كلنه خل نستغل دخوله للسجن
عقدت محكمه وسيد
ارتاحينه نوعا ما
مقبلت تطلع تجهز لزواجها ابد
خلتها كلها وره امي وايات
امي جانت حيل ضايجه عليها واتعاركت هي وابويه
بس منطيناها مجال
اني هسه عندي هدف واحد بحياتي
اريد ادمره لهذا العار اله اخلي يتندم ع الساعه الي عرف شهد بيها
صارله 21يوم بالحجز
وبعد اسبوع لزواج شهد
هواي ملوا اهله
حتى امه جايه لامي تتوسل بيها
امي تعاركت ويانه كالت خطيه امه هالواحد الها
اجتي تتوسل وتكول شنو التردوا احنه حاضرين
ابويه ومهند كال كافي اتنازل بس نطلب فصل
وتعويض ونكسر خشومهم
اني رفضت
روان : اتخبلنه ع عمار اول مره يفاركنه
فوكاها بالسجن ماما شبه مجنونه
وبابا متهستر ومتخبل
يوميه يروح للسجن ويكول عمار بس اطلع من
السجن احرك الدنيه ع روسهم كلهم
ماما ذبت الصوج بيه تكلي لويش عرفتيها عليه
والله ماما مو اني هو الي ياخذني ويجيبني وشافها
وشكم مره مااجه السايق وناخذها ويانه
وعمار اخذ رقمها من جهازي بدون علمي
ذوله خبثاء يوميه ندزلهم ناس وشيوخ وساده ويطردوهم
احتارينه شلون نخليهم يتنازلون
شهد انقطعت اخبارها عني نهائيا
مااعرف هسه شمسوين بيها شتكول ع عمار
وهي دومها تكول اذا خيروني بين الموت وبين اترك عمار
اختار الموت بدون تردد
اني اداوم تبهذلت بالسياره
كمت اضطر اروح مشي وارجع مشي
لان عمار بالتوقيف واني جنت معتمده عليه
بدت الامتحانات مالت اخر السنه
وجان بالي مشوش كلش
اني جان مستواي وسط
يعني مو شاطره حيل ولا كسلانه
يعني درجاتي تتراوح بين ال 70 وال 80 قله احصل بال 90
بقه للامتحان بس يوم واحد
البيت متوتر حيل والكل قلقان
المحامي كال القضيه كلها من صالح الولد
حتى الكفاله رفضوها
القضيه حاليا متحوله لقاضي جنح
كال اذا نحكم احتمال 3 سنوات
وتبقى القضيه حتى اذا نحكم باي وقت يتنازلون راح يطلع
خطيه ماما وكعت من سمعت الخبر والليل كله هي بالمستشفى
بس ندعيله يوميه مابدينه شي
جنت كاعده وابجي
ماما اخذها خالو هو وبيبي
وبابا بقه ويايه بالبيت
دك عليه رقم غريب ابد مجاوبت
مااجاوب اي رقم غريب لو شيصير
لو انطي لبابا لو عمار يجاوبون هم
بقه يلح وهذا الحجي ب2 بالليل
اني منايمه لان جنت قلقانه ع ماما وهم اقره
هواي لح عليه بس مهتمين
بالاخير اجاني مسج مكتوب بي
هلو روان اني شهد افتحي خط
حيل فرحت مدري شصار بيه
ردت اخابر بس هي سبقتني ودكت
كمت ابجي وهي تبجي
هلو شهوده شلونج
لج اني مو زينه والله
ليش حبيبتي اذوج
ولج الموت بعيني اتراوالي
صدك ابن عمج خاطبج
اي خطبني ووافقت
ولج والله عمار يموت اذا يدري بيج
من وره هذا اخوج الظالم اكيد
روان طريقنا مسدود اني وعمار
اني لخاطره وافقت مااريده يتاذه
عوفج من هذا الحجي
زواجي الخميس هذا
شنو ليش بهالسرعه
لاتكليلي خابرتني تردين تعزميني
لا يمعوده شاعزمج حتى كتلج وكتلي ع فلس يصير
اريد اشوفج اخر مره
والله ياريت اتمنى والله
اريدج تجيني باجر للبيت
واهلج شلون
باجر اهلي بالزياره من الصبح يرحون ويرجعون العصر
واخوج الغثه
هم يروح وياهم
اريدج تجيني لان عندي حجي وياج هواي
هذا رقم منو
هذا رقم اخويه
اخاف يحس بي
لا طالع ونساه هنا
زين لعد باجر من الامتحان واجيج
اوووف ولج حرامات نحرمت حتى من الدراسه
والله لو مااهلي هم تركت المدرسه
تدرين جني يتيمه بدونج والله
شخبار عمار
بنص الظيم خطيه بالسجن
وذوله اهلج ظلام ميقبلون يتنازلون ابد
الله كريم ان شاء الله يطلع
طبكته منها بين الفرحانه وبين الحزنانه
فرحانه راح اشوفها لان اول مره هيج نتفارك
وحزنانه لان راح تتزوج وبالغصب
نمت واني موقته المنبه
كعدت وسويت ريوك لبابا واني مااشتهيت ابد
كلي خل اوصلج قبل لااروح
كتله بابا اليوم راح اتاخر شويه لان اخر يوم النه ومتجمعين
كلي ماشي بابا بس اخذي المفتاح وياج اخاف متلكين احد
اني راح اروح اقدم ع اجازه واروح لامج
اوك
وصلني ورحت امتحنت ومعرف بالضبط جاوبت لو لا
بعدين رحت مشي لبيت شهد لان مااكدر اروح بتكسي لوحدي
وصلت ودكيت الباب
طلعتلي بس حيل متغيره
حضنتها وكمنه نبجي سويه
دخلتني للبيت
تبجي وكوه تحجي
بس حسيتها مرتبكه
رادت تقدملي شي رفضت
كتلها تعالي سولفيلي
شسولفلج
اهلي راووني انواع العذاب
انجبرت اوافق لخاطر عمار حتى ميتاذه اكثر
امانه عليج كليله تكول سامحني والله وافقت لاجله
تعالي خل نصعد فوك بغرفتي
يمعوده خلينه هنا هسه اروح
لان ماما خطيه بالمستشفى
ليش خيرها
سمعت بعمار راح ينحكم 3 سنوات
خطيه لطمت ع وجها
كالت لا ان شاء الله يتنازلون اهلي
صعدنه لفوك
حسيتها مرتبكه
تعالي خل نسولف
ا راح اجيب مي واجي
معطشانه تعالي اكعدي خل نسولف لان مااكدر اتاخر اكثر
اني لحد الان مصاعده لغرفة شهد نهائيا وحتى جياتي الها قليله مو مثلها
طلعت اني نزعت حجابي لان حيل حاره الدنيه
لحضات وجان ينفتح الباب
ها شهوده تعاي اكعدي سولفيلي بالتفصيل
مااريد اي شي
جان اسمع صوت ........... طفرت من مكاني
