رواية حرم الاسود كاملة جميع الفصول بقلم بتول ابو الليل
في عالمٍ تُنسج فيه الخيوط بأصابع خفية، لا تُقاس العدالة بالحق، بل تُوزن بميزان النفوذ. تُخمد الأصوات قبل أن تنطق، ويُساق الأبرياء إلى الزنازين بلا محاكمة، فقط لأنهم لا ينتمون إلى الطبقة المحصنة خلف الأسوار العالية.
ترفٌ مطلق يُمنح لقلةٍ اختارت أن تعيش على حساب الألم، وسلطةٌ مطلقة لا تخضع لقانون، تصوغ مصائر الناس كما تشاء. إنها حياةٌ يُحكم فيها على البراءة كجريمة، وتُباع فيها الحرية لمن يملك الثمن.
في هذا الواقع المشوَّه... تبدأ الحقيقة بالتمرد.
وجوهٌ تشبه الأسود…
صامتة، حادة، ومليئة بالغموض.
أسرار مخفية خلف كل نظرة،
وخطرٌ يتربّص في الظلال.
خطواتٌ خاطئة… كفيلة بإشعال العاصفة
وقلوبٌ تُختبر في عالم لا يعرف الرحمة.
بين صراعٍ صامت
وحبٍ قد يكون أخطر من كل شيء…
البقاء ليس مضمونًا
والنجاة… لعبةٌ للقوي فقط.
.
.
.
.
.
دمُتم سالمين أحبتـــــي❤️ .."
#حرم _ الأسود -
#part _1_
رواية : حـــرم _الأسود 🔞
#بقلمي : الكاتبه توته
مهم ⚠️" تصووويت + تعليق بين الفقرات متابعه لحساباتي مشاركه الاصدقائكم .."
الـزلـم مـثـل الـخـيـل ڪدش واصـيـلـه مبين الـبـي خـيـࢪ وڪت الـثـچـيـله
____________♠___________
اجواء شتائيه غيوم مطر خفيف ريحت التراب غمضت عيوني براحه واني اشم ريحت بلدي
واخيراً خلصت ورجعت للعراق شڪد جنت اشتاق لهاي الاجواء
سحبت جنطتي وبقيت اتمشه علئ الرصيف اباوع للساعه الي بايدي بـ 10 الصبح
اتصل جهازي ابتسمت من شفت اسمه اكيد عرف بيه وصلت
_الوو Hello daddy
جاسر : هاا بابا وصلتي بعدج
The plane did not take off_
جاسر : احجي عربي بابا تدرين بيه ماحب هاي السوالف.
_هههه داحجي وياك باالانجليزي حته تعرف بنتك تعلمت الغه ودرست كلش زين.
جاسر : ادري بيج معدله هسه ڪولي صدك ماطلعت طيارتج. ؟
_لا حبيبي طلعت واني حالياً بمطار بغداد.
جاسر : احنه شنوو متفقين موو ڪلتي من اطلع ادزلك فويز واكلك دزلي سايق
_تعرفني زين ماحب هل امور سايق وحمايه ودوخه اني اريد اتمشه واشوف اجواء بغداد صارلي 5 سنوات مفارقتهَا.
جاسر : بدون كلام زايد اني هسه راح اجيج.
_واو استاذ جاسر بجلالت قدره يجيني للمطار؟
جاسر : بنتي الوحيده شلون ماجيها.
_تمام انتظرك.
جاسر : يلا حبيبتي باباتي جايج.
سد الاتصال ضحكت رجعت الجهاز للجنطه بقيت اتمشه علئ الرصيف شعري يلعب بيه الهوئ.
وڪفت سياره كدامي ستغربت منوو نزل جامت سيارته
:: محتاجه توصيله
_لأ شكراً
::ماخذ منج كروه لاتخافين بلاش اصعدي.
_شكراً ماريد
::مو أمان عليج تتمشين بالشارع وانتِ بنيه تشكين شك
باوعتله بخزره ضحك ونزل من سياراته رجعت ڪم خطوه ليورا.
:; شبيج ليش ضجتي اريد مصلحتج
_اخي توڪل ماريد شيء منك رجاءٍ روح
::هسه شبيج خايفه موزين اريد اوصلج.
_شكد لزڪه گتلك ماريد اوي.
سحبت جنطتي ومشيت عنه شهل ناس صدڪ مايستحي واحد يكلك مره مرتين لا خلي عندك كرامه وروح رجع صعد سيارته وصل يمي دك هورن نزل جامت السياره غمضت عيوني وستغفرت ربي .."
::راح تمطر وتدمر ملابس مبينات ماركه اصعدي
ماجاوبته مشيت علئ حديقه عامه ورحت لكفتريا قريبه دخلت بيها بس اريد اتخلص منه ماريد اعيط وصيح بنص الشارع من اول يوم مغثه.
جنت بـ المانيا ادرس 5 سنوات ولا شخص تحارش بيه او قلل قيمه وياي كلهم حبابين واني هم ماتخالط ويه عالم هواي بس 3 بنات صديقاتي ادرس وياهن واطلع واكل البقيه بس زملاء وعلئ ڪد الدراسه.
طلبت ڪهوه طلعت كتاب عن علم النفس احب هيج اشياء فكريه لبست نظارات طبيه وبقيت اشرب بالكهوه واقرا.
اتصل جهازي جان ابويه سألني علئ مڪاني ڪتله ڪاعده بكوفي
شربت الكهوه وطلعت للشارع شويه وصل ابويه نزل السايق فتحله باب السيارة رحت اركض عليه حضنته واني اضحك وعيوني مدمعه من الفرحه.
جاسر : باباتي حبيبتي واخيراً رجعتي منتظر هل يوم ساعه ساعه
_مشتاقتلك كووووومه
جاسر : موو بڪد اشتياقي الج يلا اصعدي الكل منتظرج.
هزيت راسي بأي سحبت الجنطه وصعدت وياه بالسياره متوجهين للبيت.
تعريف عني وعن عائلتي الكريمه اسمي اليان وحيدة الابوي يتيمة الام متزوج ابوي مره ثانيه عندي 3 اخوان منهاا.
تيمور ، قصي ، ساهر ، وهيه جنان وابوي جاسر .."
اني لأن الوحيده مدللهه بين اخواني درست بارقى الجامعات وطلعت للخارج حته اطور من نفسي ودراستي.
وطبعاً الفضل يرجع الابويه لأن جان مساندني طول السنين الفاتت ماخلاني يوم احس بنقص الام صارلي ڪلشي.
ابوي عنده شريكات بغداد وخير من الله منصبه بس عمره مجان متڪبر ويحب الخيرر للناس.
جاسر : ايي احجيلي شلون جانت رحلتج
Perfect_
جاسر : الحمدالله هسه تاخذين ريست
_وبعدين ادور شغل
جاسر : احنه حاجين بهل موضوع بابا
_أي واني انطيتك جوابي " ڪتلك ماشتغل وياكم بالشركه اريد أسس شغلي الخاص بيه
جاسر : تردين افتحلج مشروع خاص بيج شركه بأسمج؟
_لأ بابا لأ موو هيج قصدي يعني اريد اشتغل واتعب وأسس مشروعي الخاص بتعبي اني ماريد انتَ توفرلي ڪلشي ماريد الكل يشوفني مدللهه اريد اعتمد علئ نفسي.
جاسر : عوفي هل حجي بعدين نتناقش بيه
سحبت نفس وسكتت عنه يريد مني اشتغل ويه اخواني بالشركه وهمه اذا ادخل للمكتب يطلعون الف سالفه يخلوني اكرهه عيشتي خصوصاً تيمور.
متسلط الئ ابعد حد والفلوس عاميه عيونه ومخليته مغرور ومتڪبر الئ درجه متنوصف.
وصلنه للبيت فتحو الحرس باب البيت دخل ابوي السياره للكراج نزلنه سويه دخلنه للبيت جانت مرت ابويه جنان لابسه فستان قصير حد الركبه وشعرها الاصفر والتاتو والفلر ولاعبه بشكلها لعب.
جنان : ياهلا نور البيت عيني
رحت سلمت عليها تحجي هيج بس بداخلها متريد وجودي ابد.
_بنورج شلونج
جنان : الحمدالله بخير
جاسر : الولد وين ؟
جنان : بعدهم ماراجعين من الشركه.
جاسر : ماشي اني طالع خلي اسينا تسوي اكل لـ أليان.
هزت. راسها بأي دار وجهه ابوي عليه ابتسملي عافنه وطلع من البيت رحت ڪعدت علئ القنفه وهيه كذالك ڪعدت خلت رجل علئ رجل طك بعلجها صاحت بصوت عالي
جمان : اسيييينا تعاليي
_مجوعانه صاعده ارتاح واغسل
جنان : ياا اليان تعوفيني وتصعدين واني منتظرتج من الصبح خلي نسوالف شبيج مستعجله.
_اي نسوالف ليش لأ بس من ارتاح هسه تعبانه اعذريني ..
عفتها وصعدت لغرفتي صارلي سنين مفارقتها بس ڪلي بابا غيرت ديكورها و اثاثها. فتحت الباب ودخلت.
مغيرين ڪلشي بيها الاثاث والصبغ والديكور ڪلشي متغير شغله وحده باقيه هيه صور امي الموجوده علئ صفحه ڪامله من الحايط.
تقدمت نحو الحايط واني عيوني مركزه علئ صور امي دمعت عيوني وحسيت بخنڪه ابتسمت بحزن وحاجيتها
_ليوم رجعت بعد جهد ودراسه وتعب راح احقق حلمج واتخرج واشتغل واكون مسؤله عن قرارتي ڪبرت اليان كبرت اميرتج الصغيره.
غمضت عيوني براحه احسها تسمع كلامي وفخوره بيه اخذت ملابس ودخلت اسبح.
.....
جاسر : اختڪم راجعه من السفر غير المفروض تجون للبيت
تيمور : بدت رحمة الله يابه شنوو السالفه ترا ماجايه من بيت الله ڪلها سفره وشنوو يعني وين جانت واذا ماأجينه شيصير انتَ بهذا دلالك راح تضيعنه ترا عدنه شغل ومسؤليات مافلضين لهل سوالف التعبانه.
جاسر : انتَ تعرف نفسك ويه منوو تحجي هسه؟
تيمور : اعرف نفسي ڪلش زين ويه منوو احجي واذا ناسي يابه ترا اني تيمور ابنك الجبير وكلامي واواموري ماتقل عنك بشي.
جاسر : اني الوصلتك لهل مرحله وبيدي انزلك للصفر لاتتباهاا بنفسك هواي
قصي : ها يابه طلبتني.
جاسر : حضريلي اوراق الشراكه الي راح نوقعها اليوم وجيبهن الي للمڪتب
قصي : حاضر
عافهم وطلع من المڪتب سحب نفس قوي تيمور ورجع راسه علئ الكرسي سحب جڪارة ڪوبي ودخن
قصي : شبيك احسك مو علئ بعضك؟
تيمور : رجعت ست الحسن والدلال وراح يتغير ابوي وتتغير تصرفاته ويصير يهدد بينه بالاملاك والفلوس
قصي : غلطان ابونه عمره مافڪر بالفلوس والملاك هذا تفكيرك انتَ
تيمور : بعدك كلشي ماتعرف أسالني اني
قصي : وشتريد نسوي ترا تبقه اختنه والها حق باملاك ابوي حالها من حالنه
تيمور : انجب لك شنو حالها حالنه احنه ولد وهيه بنيه باجر تزوج وين تروح الفلوس لزوجها شبيك غبي وماتفتهم الحلال من حقنه احنه وبس
قصي : ابونه بعده عايش ترا وانتَ تفڪر بتقسيم الاملاك
تيمور : اني ڪل شخص يوڪف بطريقي وينافسني امحي من الوجود ..
...
طلعت من الحمام انشف بشعري اندك باب غرفتي گلت تفضل دخلت المساعده مالتنه جايبتلي صينيه اڪل
_حبيبتي والله مجوعانه
اسينا : ست جنان گلتلي اسويلج
_شكراً
خلت الصينيه علئ الميز وطلعت شسورت شعري ومشطته ربطته خليت سيروم لوجهي رطبته وشويه تنت وعطر ورحت اڪلت
كملت رحت تمددت علئ فراشي ميته تعب نمت بدون ماحس
ڪعدت العصر تقريباً علئ صوت جهازي يتصل جانت بنت خالتي اريانا بڪدي ومن سافرت بقت تبجي وراي وطول السنين الرحت بيهن نتواصل سويه.
اريانا : الوو
_هلوو
اريانا : هلا حبي شلونج بشري اجيتي بعدج
_اي وحالياً بالبيت
اريانا : صدددك والله
_اي والله
اريانا : ياااااي شڪددد فرحتيني بهل خبر تجيني لو اجيج يلا ختاري بسررعه
_لا اني راح اجيج لأن ماحب ڪعدت البيت هسه بس شويه اريد ارتاح هستوني ڪعدت من النوم واخابر بابا اخذ سيارة واجيج
اريانا : تمام نطلع نتونس برا اخليج تشوفين اجواء بغداد فاتح مول جديد يمنه يجنن وكل ملابسه ماركه وداخله كوزمتك بيه مكياج فد شيء اشتريت من عنده ماسڪات للوجهه وروج و..
بقت تجر خرايط كلام واني استمع الهاا بيها شيء كلش حلوو وهوه الي مخليني احبها واتعلق بيها
ماعدها نفاق ولاتجذب بشي وفطيره تحجي كلشي بكلبها مخليه جهاز علئ اذني واني اغفي نعسانه ودايخه
اريانا : يلا اني راح ارتب نفسي بين ماتجين ماشي
_تمام
سديت من عدها ڪمت غسلت وجهي ورحت للجنطه مالتي طلعت ملابسي منها ورتبتهم بالڪنتور سطرت عطوراتي ومكياجي علئ الميز وغيرت فراش جربايتي لان ماعجبني
فتحت شبابيك البيت دخل هوئ بارد للغرفه بقيت واكفه علئ البلكونه واباوع اجت علينه سيارة دخلوها الحرس توقعت ابويه هوه الي اجه
طلعت ملابس بدلت وخليت مكياج رتبت نفسي ونزلت ساعه بـ 6 تقريباً جان جاي علينه ابن اخو مرت ابوي اسمه هشام
هشام : سلام عليكم
_وعليكم السلام
هشام : والله صدفه حلوه شوڪت اجيتي من السفر اجيتكم هيج اني اشوف الولد
_ليوم رجعت
جنان : سوده علينه بعدهم بالشغل تدري ميكدرون يعوفون ابوهم وحده
هشام : بعد شركاتهم وفلوسهم شلون يعوفونها
_اني اترخص منكم طالعه
هشام : وين هسه شفناج
_اعذرني صديقتي عازمتني وكتلها جايه غير يوم اشوفك
جنان : كلتي الابوج طالعه؟
_ليش اني طفله
جنان : خابري واخذي أذن منه لأن تعرفينه زين مايقبل طلعين وهوه ميدري
هشام : لاتخافون عليها سبعه مايصيرلها شيء وين رايحه اوصلج بطريقي اذا تحبين
_لأ اشكرك اني اعرف اسوق اخذ سيارة واطلع
هشام : ترجعين عزيمتي يعني
_عزيمتك توصيله؟
هشام : تقريباً هههه
_يسلموو كلك ذوق بس كتلك اريد اطلع بسيارتي اغير جو
هشام : علئ راحتج
عفتهم وطلعت شڪد لزكه لخاطر الله رحت للحرس اخذ منهم سويج سيارة.
هشام : اؤف شوڪت تصير الي
جنان : هههه لاتحلم زايد هاي مدللت ابوها ماينطيها لياهو الجان
هشام : خاله انتِ رتبيلي الوضع من يمج اريدها بداعت امج
جنان : ياا انتَ من ڪل عقلك ابوها مايقبل احجي بشي يخصها ولا ادخل بحياتها متشوفها تحاجيني من ورا خشمها.
هشام : زين شسوي فهميني هيه ماتنطي مجال ولاتخلي شخص يتقرب منهاا
جنان : اهتم بيها حسسها انو انتَ تحبها واڪيد هيه راح تحبك اصلاً وين تلكه مثل جمالك
هشام : صدك خاله حلوو اني؟
جنان : غير تخبل هنيال الي تاخذك
هشام : اليان اؤف اليان ماتطلع من راسي
..
رحت للحارس اريد اخذ منه مفاتيح سيارة ماقبل ينطيني أله موافقه من ابوي
_داكلك انطيني شنوو هل تصرفات
الحارس : هاي اوامر ابوج مانڪدر نعترض انتِ اتصلي بيه وخلي يوافق وهاي السياره كدامج مالزمها عليج اني.
_استغفرالله ربي
طلعت جهاز من جنطتي ورجت للحديقه ڪعدت علئ الكرسي يرن عند ابوي بس ميجاوب
رجعت اتصلت مره ومرتين بـ 3 مره فتح خط
_ألوو بابا وينك ليش متجاوب.
جاسر : جنت باجتماع بابا ليش تتصلين صاير شيء
_اريد اطلع وميقبلون ينطوني سويج سيارة
جاسر : وين رايحه
_رايحه اشوف اريانا
جاسر : انتِ موو ليوم رجعتي من السفر رتاحي وين طالعه
_رتاحيت واني اريد اغير جو مختنكه
جاسر : ماشي بس لاطولين اريدج تكونين موجوده علئ العشه نتعشه سويه
_تمام
جاسر : ديري بالج علئ نفسج باباتي.
_انشالله
سد الاتصال رحت للحارس اخذت منه السويج وصعدت سيارة وطلعت اتصلت باريانا كلتلي جاهزه ومنتظره جيتي.
رحت الهاا للبيت سلمت علئ خالتي وطلعنه سويه اني واريانا نفس الجو نحب كلشي مثل بعض
اريانا : تدرين لحد الأن ممصدكه اشوفج كدامي.
_ولا اني تخيلي صعدت الطيارة واني ارجف ممصدكه شوكت اوصل ورجع لبغداد واشوفج واشوف بابا حيييل اشتاقيت الكم هناك.
اريانا : احنه هم اشتاقينالج بس شوفي ترا لأن سافرتي وبقيتي هوايه هناك حسيتي بوحشه هسه اني ماله هنا واريد بس اسافر واعوف الكل ورتاح هنا ضغوطات عليج تصير من الاهل والمجتمع.
_ماعرف والله بس اني احب بلدي
اريانا : منوو ميحب بلده بس مرات من نضوج نتمنئ بس نسافر اني هنا من اضوج اروح للمول او اطلع لمطعم وتتغير نفسيتي.
_ههههه هو هذا الصح
اريانا : هسه وين تردين نروح للمول او المطعم.
_لأ للمول نشتري كم غرض ورجع للبيت بابا گلي انو اڪون موجوده علئ العشه
اريانا : اي حلوو تعشي شوفي خوانج
_تعالي وياي
اريانا : هاا مادري خاف متقبل امي
_ لأ خالتي حبابه وتعرف بيه مشتاقتلج وهسه راجعه من السفر تخيلج يمي
اريانا : تمام
رحنه للمول جان فاتح جديد وهواي عالم جايه عليه وكلها عوائل تشتري دخلنه تسوكنه وطلعنه من عنده
اشتريت النه عصير ورجعنه للسياره اسوق واسوالف وياها واضحك مشينه مسافه عن المول هستوني اريد اطلع الفرع ماحس غير انفجار هز الارض هز
وكفت السياره ودرت وجهي مصدومه اريانا صرخت وخلت ايدها علئ حلكها. رجعت السيارة
نزلنه بسررعه ورحنه نركض لمكان الحادث ناس تعيط وتبجي وتحاول طفي النار.
وماتكدر النار وصلت لعلئ مكان بالمول احس جسمي صار كله .، يرجف ودموعي لا ارادياً صارت تنزل علئ وضع الناس الي جاي تموت كدام عيني.
شخص شك قميصه وصار يلطم علئ راسه يصيح جهالي مراتي ولكم ساعدوني ياناس يريد يدخل ميخلو
اجتي اريانا حضنتني وهيه تبجي وترجف اني احس ڪلبي انمرد علئ حالتهم.
جهازي يتصل بس ماسمعه بقينه هووواي واكفين مڪان الحادث وصلت اطفائيات وحته طيارات تطفي بالنار.
بس شل فائده راحت ضحايه هوواي جرحه واموات لاتعد يطلعون الجهال المحتركه والعالم منظر يكزبر الجسم عليه. .."
ساعدت ناس هواي بالاسعافاات عندي خبره مجال الطب بس دراستي قانون.
شلت اطفال وساعدت بتضميد الجرحهم بسيطه.
اريانا بس تباوع وتبجي خايفه ومرعوبه
حره : دكتوره فدوة انقذيلي بنتي لاتخلينها تموت فدوة
_انشالله ماتموت بس اهدي يحتاج الهاا مستشفى ضروري بيها حرك غميج اذا يبقه هيج يلتهب ويتلوث لازم تنضيف وعنايه هناك وهذيج الاسعافات اخذيها وروحي بسرعه.
حرة : ماڪدر اشيلها خاف عليها تتأذه اكثرر
شلتها عنهاا ورحت اركض لسيارة الاسعاف رغم مامار عليه هيج موقف حسيت عندي گلب قوي وشجاعه انو اساعد الناس ماحسيت بضعف صح انكسر كلبي وبجيت علئ وضع الناس بس ماخليت عواطفي تأثر عليه.
اخذوها من ايدي بسرعه صعدت وياها امها وراحت الاسعاف.
نزلت محطات تلفزيونيه تذيع الاخبار ناس مشتعله بنار وهمه ملتهين يصورون.
رجعت لاريانا وكفت يمها هاي مستمره تبجي وترجف
_كافي يلا خلينه نرجع
اريانا : شوفي ءء شوفي ناس شلون تموت لوو ماطالعين من وكت جان هسه احنه مثلهم.
_الحمدالله علئ كل حال ربنه يحبنه ونجانه من هل فاجعه الصارت.
بعدني محاجيه ماحس غير انسحبت من ايدي بقوه جان اخوي تيمور وجهه احمر ومعصب صاح بوجهي
تيمور : ليشششش ماتشيلين الجهااااز عبالنه متي صارلج شيييي شهل اهمال العندج ابوج راح يموت ماخله مكان مادور بيه عليج وانتِ واكفه هناااا مافكرتي ماكلتي يصيرشي ليووم رجعتي ماتصبرين لباجر وطلعييين.
يصيح عليه كدام العالم الموجوده انهضمت حيل ودمعت عيوني ماحجيت شيء واريانا بقت صافنه ماعرفت شنوو الموضوع اجاني ابوي يركض وجهه اصفر وشفته يابسه سحبني علئ حضنه وهوه يبوس براسي وجبيني.
جاسر : اوووووف الف حمد وشكر الك ربي وڪف كلبي عبالي صارلج شيء موو كتلج لاطعلين بابا شفتي لوو ما الله ستر جان متي ليوم
تيمور : لا والله هوه هذا كلامك هسه وياها بدال ماترزلها وتخليها تعرف غلطها ماخذها بالاحضان شبييييكم انتم
جاسر : تيموووور الزم حدك من تحجي ليش ارزلها وعلئ شنوو بدال ماتخاف علئ اختك وتتطمأن عليها جاي تحاسبها
قصي : ها يابه لكيتوها.
ساهر : خوفتينه وين جايه لخاطر محمد
جاسر : تعاي باباتي شنوو هذا الدم بيج شيء تأذيتي اخذج لدكتور
هزيت راسي بـ لأ مافتحت حلكي بحرف رفع راسي يباوعلي ابوي بخوف
جاسر : احجي بابا ليش ساكته بيج شيء
_مابيه شيء لاتخافون
جاسر : الحمدالله وانتِ بابا اريانا زينه
اريانا : اي عمو زينه
تيمور هز ايده ومشه ڪدامنه بقو ساهر وقصي ويانه رجعنه سويه صعدنه اني واريانا ويه بابا واخواني اجو بسياراتهم.
خطيه اريانا طول الطريق ترجف وتعصر ايد بايد اتصلت خالتي اني جاوبتها وطمنتها انو هيه بخير.
رجعنه للبيت سويه نزلت من السياره ودخلت تلاكت وياي جنان
جنان : ياا رجعتي الحمدالله عبالنه متي.
_اي رجعت مامتت بعد بيه روح
جنان : اي داشوف
اريانا : هلو خاله شلونج
جنان : خاله؟ ماتشوفيني بڪدڪم شنو خاله
_شبيج اريانا هيه بڪدنه اصلاً ماعدها 3 شباب واحدهم مصارع.
ابتسمت اريانا رفعت عيونها بملل مراضيه علئ كلامي دخل ابوي هوه ولولد تيمور راح بڪل هدوء كعد علئ القنفه خله رجل علئ رجل طلع جكاره ودخن.
_تعالي نصعد فوك نغير ملابسنه ونغسل
هزت راسها بأي صعدنه سويه لغرفتي بدلنه ملابسنه وغسلنه ونزلنه جوه جانو مجهزين العشه كعدنه سويه علئ الطاوله.
جاسر : شلون صرتي بابا
_الحمدالله زينه لايضل بالك
قصي : شلون صار الانفجار
ساهر : سمعت سيارة مفخخه
جنان: حسبي الله ونعم الوكيل راحت هوايه عالم بيها شنوو ذنب هل ناس الله لايوفقهم.
تيمور : علمود الفلوس ناس تبيع روحهاا.
قصي : هذا الي يسوي هيج بلده اغسل ايدك منه مايربح لادنيا ولا اخره شيسوي بالفلوس وهوه مفجر روحه بنص هل عالم.
تيمور : يربح يخلي فلوسه لعائلته
_ياعائله التحجي عنهاا اصلاً شلوون عائلته تتقبل هيج أب بلا ضمير يقتل الناس بدون رحمة هذا شيطان موو بشر اصلاً حرام نعده من البشر ودولتنه ضعيفه وماضل بيها امان ولا رئيس صار علينه بيه خيرر كل واحد يصعد قفاص وياڪل بفلوس الشعب.
تيمور : اليان لاتحجين شيء اڪبرر منج مفهوم.
_ماحجيت شيء غلط اني ليش احسك دافع الهم انتَ راضي بالفاجعه الصارت هسه مئاات الناس ماتت شنوو ذنبهم.
تيمور : شنووو قصدج اني داعشي؟
جاسر : ڪاافي شبيڪم شنوو هل خرط هذا موو جاي نتعشه.
تيمور : شو تحجي وتباوعلي علم بنتك شلوون تحجي ويه اخوها الاڪبر منهاا واذا مايهون عليك تزعلها بس ڪولي واني اعرف شلوون ارتبيها من جديد.
حجه هيج وضرب ايده علئ الطاوله وكام وطلع من البيت بلعت ريڪي بتوتر احس طلعت روحي من كلامه شهل تفڪير العنده
جاسر : استغفرلله اكلي بابا لاتهتمين لكلامه.
ساهر : هوه من يوم يومه هيج ماتعرفونه
جنان : شبيه ترا ماكال شيء غلط وانتم بڪل موضوع تضوجونه نسيتو هوه اكبرر منكم.
ساهر : اڪبر اي بس احنه افهم.
قصي : يمعود كفينه شره مالنه خلكه.
اريانا بس صافنه علينه وتباوع احنه عبالك معركه كل واحد يحجي شكل.
كملنه اڪل صعدنه اني وياها لغرفتي بقينه نتابع كل الاخبار الي نزلت عن الانفجار وشكدد عالم ماتت وشكد جرحئ،
اريانا : اكلج شبيه تيمور بس يخوزر بينه ويصيح عليج
_هوه هيج من زمان
اريانا : ترا انتِ مو طفله شنووو يحساب بيج هيج
_عوفي خيولي مالي خلكه واصلاً من يحجي مارد عليه حته يعرف نفسه هوه الغلطان مو اني اذا افتح حلكي وارادده يركب كل الحك براسي.
اريانا : صراحه اني حيل انغثيت من عنده احسه ماينبلع.
_معليج بيه لاتضوجين نفسج
اريانا : شنوو رأيج تجين يمنه ڪم يوم نطلع ونغير جو واخلي بابا ياخذنه الاربيل يڪول نازل ثلوج هناك نشوف الاجواء.
_لا ماريد هستوني رجعت اريد اقدم اوراقي وابدي بالدوام.
اريانا : دخلين مجال المحاماه لوو تشتغلين بالشرڪه ويه ابوج.
_شوفي بابا يڪول اشتغلي ويانه احنه محتاجين محاميه دقق بالاوراق الحكوميه والعقود ويريدني اني بس اني ماريد اشتغل بشركة بابا لأن اعرف خواني ميريدوني اڪون وياهم وشغله ثانيه اني اريد اڪون شغلي الخاص اريد اڪون مسؤله عن نفسي واتعب واشتغل يلا اوصل للي اريده بابا اذا شتغلت وياه مراح ينطيني راتب حالي حال العمال.
اريانا ; والله ماعرف بعد بكيفج انتِ حره بقراراتج بس اني اشوف كلام ابوج الصح لأن بهذا الوڪت والوضع قليل تحصلين وضيفه وراتب زين وناس تتحسر علئ الشغل عاد انتِ احمدي ربج ابوج يشغلج بدون أي شيء وتحصلين علئ كلشي تردينه بسهوله.
_ماعرف حايره ودايخه
اريانا : انتِ فڪري زين وقرري وين تشتغليـن.
_اي انشالله.
اريانا : اني لازم ارجع للبيت
_لأ تباتين وين رايحه اني گلت لخالتي تبقين يمي اليوم وهيه وافقت
اريانا : صدك كلش زين لعد.
_أي.
بقت يمي اريانا باتت بقينه هواي نسولف نمنه بوقت متأخر.
كعدت تقريباً الفجر ساعه بـ 4 عطشااانه ڪلش وقت صلاة نزلت جوه حته اشرب ماي سمعت طكطكه بغرفة الضيوف عدنه 2 غرف للضيوف جوه وفوك 2 من غير غرفنه احنه
استغربت منوو جاي علينه اروح اشوف او لأ تجاهلت الموضوع رحت للمطبخ شربت ماي وخذت بطل ودرت وجهي اريد اصعد لغرفتي انصدمت بالي اشوفه كدام عيني ....
