رواية أحببت من لايبالي الفصل الحادي عشر بقلم مجهول
براء : راح زين يرتاح واني اخذت غسولاتي واشيائي ورحت اسبح .. دخلت للحمام .. واو كولش حلو و واسع واحلى شي بي بانيو شكبرره وزين مخلي مثل الدولاب لاشيائه مبين عليه نظامي لان مرتب اشيائه الشامبو وغسول الجسم وادوات الحلاقه عازلها على جهه ... ترست البانيو ماي دافي ودخلت بي .... الله احس عضامي تفرقعت من الراحه ضليت فتره داخل البانيو وطلعت بالبرنص زين نايم ماراح يشوفني ... طلعت ركض لبست قفطان مغربي اوف وايت وكعدت اجفف شعري خليت مكياج خفيف بس طوخت الحمره شويه وطلعت شال اوف وايت خليته على صفحه حتى من يصيحولنه البسه ... وكعدت اكلب بالتلفزيون على ما يكعد زين ....وره ساعه تقريبا اجت نجمه
نجمه : براء تكول امي تعالو نزلو الناس كلها اجت
براء : اي هسه اكعد زين وننزل .... طلعت واني كمت دخلت للغرفه ... زين _زين
زين : بنعاس شتردين
براء : اكعد خاله تكول اجوي الناس خلي ننزل
زين : اي كايم ... حضريلي ملابس لبين ما اسبح
براء : ليش
زين : شنوه الليش
براء : ليش اني احضر ملابسك خو انت طلعهن
زين : بخزره ... ماسمعت شنو كلتي
براء : هاا كلت .. شتريد اطلعك ملابس
زين : بنطرون وقميص .. ومن اليوم تنفيذ طلباتي صارت مسؤليتج ...وباستهزاء باعتبارج مرتي يعني ... وعافها ودخل للحمام
براء : رحت اطلعله ملابس ... فتحت الباب الاول من الكنتور هاي القوط سديته ... وفتحت الباب الثاني شفت القمصان مرتبهن حسب تدرج الالوان من الاسود ونازل طبعا ملابسه كلها غوامق اي الوان شبابيه ماعنده .. طلعتله قميص نيلي ورجعت فتحت خانه البناطير طلعتله بنطرون بيجي .. خليتهن على الجربايه ورحت لميز التوايت البس شالي انتبهت الميز مليان عطور هاي شيسوي بكل هالعطور ...
زين : شنو هالسؤال الغبي هذا شسوي بيهن مثلا
براء : فزيت على صوته ... اباوعله هم طالع بالمنشفه .. ميخاف توكع وهو يمشي هذا شبي ميفكر .. شلت راسي لكيته كبالي خترعت ورجعت لوره
زين : بنبره حاده مسحي الحمره
براء : والله خفيفه ومابينه هواي
زين : ببرود تمسحيها انتي لو اني امسحها
براء : بخوف لا لا راح امسحها
زين : رحت اخذت ملابسي وبدلت...انتظرها تكمل حتى نطلع ... شو تعالي
براء : اجيت
زين : دوري جسمج
براء : ليش،؟
زين : بعصبيه .. هو شنوه الليش منو اكول شي تنفذي بدون نقاش .. يله دوري
براء : استهضمت لان صيح عليها...اي درت جسمي
زين : امشي لكدام
براء : اجيت اكوله ليش بس سكتت ومشيت
زين : يله امشي خلي نطلع ... كتلها دور جسمها حتى اتاكد لبسها ما مبين جسمها مااريد احد يباوع عليها مو محبتا بيها بس هي عرضي واني مااقبل
براء : نزلنه هو سلم وراح يم الزلم واني صاحتلي خاله مريم اكعد يمها
وحده : اكلج عيني مريم جنتج شكد عمرها
مريم : 17
وحده : والدكتور شكد عمره
مريم : 29
براء : عززه زين عمره 29 يعني اني ماخذه شايب
وحده : ياا شو اكبر منها بهواي توقعته ياخذ دكتوره
مريم : شعليه يعني اذا دكتور لازم ياخذ دكتوره
وحده : والله يااختي عندي بنت اختي دكتوره اسنان شلون جمال وشلون اخلاق لو كايلتلي قبل لتخطبيله
براء : هاي تحجي كبالي ولا كأن الي دتحجي عليه زوجي... واني بودي اكوم اكطعها ننننننن عندي بنت اختي دكتوره اسنان عابتلج انتي وبنت اختج .... ضليت كاعده استقبل النسوان الي يجن لحد ما صار الغده اجيت اكوم اساعدهن ...
جميله : هاا وين كايمه
براء : اساعدكم غير
نجمه : لا عيني كعدي انتي بعدج عروس عود وره السبعه نبدي نكربج
براء : بس اني اريد اساعدجن
جميله : جرتها من ايدها ... تعالي كعدي ولتكومين اكيد بعدج تعبانه من البارحه وغمزتلها
براء : كعدت وهزيت راسي على هالبلوه جميله ... جابن الغده واني كاعده يم خاله مريم بس استحي اكل .. وهي تجيب وتخلي كدامي
مريم : اكلي يمه لتضلين تلعبين بالاكل من كعده لسه انتي ما اكلتي
براء : لا خاله داكل
جميله : عيني يجوز تريد زين يجي يوكلها
براء : خزرتها .. واشرتلها اني اعلمج
جميله : هههه باع شلون تخزر بيه
مريم : جميله لتتحارشين بيها عوفيها
براء: كملنا غده وراحن البنات يصبن جاي ... و شفت زين اجه حتى ياخذ الجاي اول ما اجت عينه عليه خزرني ... اني تخربطت شبي ليش يخزر شسويت ... مدري شحاجه نجمه وراح
نجمه : بهميس براء يكول زين لبسي حجابج ليدخل احد فجأءه
براء : بس ماكو احد بس نسوان
نجمه : حتى اذا لبسي
براء : اااوف ماشي ... لفيت الشال وكعدت ... وره فتره راحو الناس بقو بس بيت خوالي وخالاتي ... طلعو الشباب من الاستقبال واجوي كعدو يمنه
غسان : هااا براء شلونج
براء : بهدوء الحمدلله
غسان : شعجب تزوجتي مو علساس تردين تكملين دراستج
براء : باوعت لزين .. الي معاجبه الوضع بس ميكدر يحجي ..
نور : بمياعه تتوقع وحده يتقدملها واحد مثل زيوني وترفض
غسان : حبيبتي تره بس الغبي يلكه وحده مثل براء ويرفضها اشو ادب وجمال كامله من كلها
براء : انتبهت لزين شلون يباوع لغسان ولو جانت النظرات تكتل جان كلت لغسان الله يرحمك
زين : من رخصتكم يله براء .. مديلتها ايدي
براء : مدلي ايده ... كمت وخليت ايدي بايده .. حسيت برعشه صارت بكل جسمي .. ايده دافيه وجبيره احسها غلفت ايدي كلها
::: صعدو جاهلين ذاك الشخص الي يباوعلهم بنظرات مليانه حقد وحسد
براء : وصلنه للغرفه فتح الباب دخلنا ... جرني ودفعني على الباب .. لزمني من فكي
زين : سمعي لج بعد اذا اجه غسان الحيوان متنزلين واذا لمحت خيالج وهو موجود اذبج والله .... مفهوم
براء : عفت الحجي كله وركزت عليه من كال غسان الحيوان ماكدرت الزم نفسي ضحكت ..... ههههههههههه
زين : بحده عليمن تضحكين
براء : هههه عليك
زين : ضغطت على فكها ... عليمن ؟
براء : اريد احجي ما اكدر اشرتله يوخر ايده ... وخرها ... اووي اذيتني ... مو قصدي عليك اضحك بس ... هههه من كلت غسان الحيوان ضحكتني
زين : لتكولين اووي بعد
براء : بغباء ليش ؟
زين : إلهي الغباء ... عيب البنيه تكول اوي يعني متعرفين
براء : لا والله ما اعرف
زين : جريتها من زيك الثوب الابسته ...شوفي ولج شغلي عقلج المجيم شويه صارلج يوم واحد وتلفتي اعصابي ... دير بالج حجابج يطيح من راسج وهذا غسان اذا اشوفج تحجين وياا عقابج عسير والله ومن باجر اي غلط يصدر منج ولو صغير اطيح حظج
براء : مو اني حجيت وياا والله هو
زين : بنبره حاده لو ما انتي منطيته وجهه ميتماده وياج
براء : باستهزاء ... يعني انت منطي مجال لنور حتى تحجي وياك وتتماده
زين : اني ما مطيها مجال بس هي مثلج تحب الزلم وتركض وين ماكو رجال بالموضوع
براء : ماتحملت كلامه لهدرجه شايفني ساقطه ... دموعي نزلت ... فلتت ايده من ملابسي اشكرك على كلامك ... متحملت بجيت ... و رحت ركض للحمام
زين : من حاجيتها بجت وراحت ركض للحمام ... عفتها مالي خلها ... كعدت اكمل شغلي اشتريت العياده بقه بس اجهزها وافتحها ... ضليت فتره طويله اشتغل .. كمت دخلت للغرفه براء ماهي معقوله بعدهه بالحمام ... دكيت الباب متفتح .... براء فتحي الباب ... ماكو جواب هاي خاف سوت بروحها شي ... براء فتحي الباب راح احسب للثلاثه اذا متفتحيها اكسرها والله ... سمعت طكت المفتاح زفرت الهوى ... طلعت باوعتلي العيون حمر والخشم احمر ....وجها كله على بعضه صاير احمر .. الواضح عليها باجيه هواي
براء : شتريد ؟
زين : بخزره .. احجي عدل لا افرك حلكج
براء : العفو رايد مني شي
زين : ببرود لا بس لتبقين بالحمام فتره طويله
براء : صار
زين : رجعت لمكاني اكمل شغلي وهي اجت كعدت كبالي تكلب بالتلفزيون خلته على سبونج بوب وكعدت اتابع ابتسمت ورجعت اشتغل
__________________
براء : مرن على زواجي بزين 8 تيام البارحه جانت السبعه
مالتي سويت حفله بسيطه وخلصت على خير الحمدلله ... تقريبا كدرت اتاقلم على بيت خالو لان حبابين ويخلوك تتعود عليهم بسرعه ... اماا زين ااااااه يازين علاقتي بي اقل من سطحيه منحجي نهائيا بس من يريد احضرله شغله نحجي حتى من نكعد بغرفتنه هو لو يشتغل لو يروح يرسم واني كاضيه وقتي على التلفزيون لو انزل يم البنات ... وهسه هو فتح عيادته كام الصبح يطلع للمستشفى ويرجع الظهر يتغده وينام والعصر يطلع للعياده ويرجع بالليل يعني بالمختصر ما اشوفه .... نزلت اساعد البنات بالغده زحمه صار اسبوع ميخلني اشيل عوده من الكاع .... هلوو بنات
شمس : هلوو حبي
نجمه : بشقه هاا يالمسعده هستوج كعدتي شفتي بيش الساعه هسه
جميله : معليج بيها نجمه تلكين البارحه جانت سهرتها صباحي
براء : هههه انتي شكد جريئه
جميله : والله يا حبيبتي التاخذ ولد جهاد طبعا تصير جريئه
مريم : بعصبيه مصطنعه... وشبيهم ولد جهاد ماعاجبيج
جميله : ههه لا خاله على راسي
مريم : عبالي ... حتى نبطل مادام بعدنه باولها
نجمه : هههه يااا اولها يمه راح يصيرلهم اربع سنوات مزوجين
مريم : هههه.... هاا بروئه حبيبتي صباح الخير ..
براء : رحت بستها ... صباح النور خاله
نجمه : يمه جنتج هستوها كاعده من النوم يرادلها جره اذن
براء : لا والله خاله كاعده من زمان بس جنت اعزل الغرفه واغسل الملابس
مريم : براحتج يمه بالوقت الي يعجبج كعدي بعدج عروس
براء : ابتسمتلها .... شراح تسون غده حتى اساعدجن
شمس : اني ردت اسوي فاصوليه بس نجمه تريد برياني
نجمه : اي مشتهيته حبابه ما اريد فاصوليه
شمس : هاا خاله اسوي
مريم : بكيفج بنتي
شمس : خوش
جميله : شمس يمكن سمعت صوت ايفان يبجي روحي شوفي
شمس : نجمه فدوه روحي انتي شوفي اريد اطبخ
براء : اذا تحبين اني اطبخ وانتي روحي للطفل خطيه ديبجي
شمس : مااريد اتعبج
براء : لا حبيبتي تدللين .... راحت شمس واني رحت طلعت مواد البرياني (بتيته ، بصل ، عدس، تمن ، بزاليه ، شعريه ) وطلعت البهارات ... انطيت التمن لنجمه تلكطه ورحت طلعت دجاج موعته بماي وسلكته حتى اسوي تشريب ... رجعت اطبخ البرياني لبين مينسلك الدجاح ... جميله دتسوي زلاطه ... بقه بس يتهدر التمن ويه المواد ويكمل الطبخ .... رحت طلعت الدجاج وتبلته بصلصه ودخلته بالفرن ... كملت واخيرا .. طبعا خايفه خاف الاكل ميعجبهم واتفشل
نجمه : الله الريحه تخبل .. حبابه خلي اضوكه
براء : ههه ضوكي .. اني صاعده اصلي ... صعد توضيت وصليت... نزلت لكيت خالو والشباب جايين ....الله يساعدكم
جهاد : هله بيج بنيتي
الشباب : هلوو براء
سجاد : اكلج شمسوين غده تره ميت من الجوع
براء : برياني
سجاد : اويلي يله صبو لبين منبدل
مريم : خل يجي اخوكم حتى نتغده سوه
سجاد : الساعه بالوحده وربع هسه ... وحده ونص اذا مااجه تصبون ما عليه بي رجال جوعان وتعبان اني
براء : راحت خاله خابرت زين تشوف شوكت يجي ..كلها بالطريق جاي ... بدينه نحضر السفره حتى من يجي نصب .. رحت طلعت الدجاج من الفرن والبنات ديحضرن الزلاطه والمواعين حتى نصب ... سمعت صوته ...
زين : السلام عليكم
الكل : وعليكم السلام
سجاد : صدك تحجي وين صرت مو روحي طلعت من الجوع
زين : ما تغديت منو لازمك
سجاد: مو عيني الست الوالده متقبل اله ننجمع ياله تصب
زين : صبو اني بس اسبح وابدل ملابسي واجي مااتاخر
مريم : براء ليش ما سلمتي على زين
تستمر القصة أدناه
براء : هاا نسيت
مريم : دروحي صعدي ورى
براء : صعدت ورى فتحت الباب شفته دينزع الستره... الله يساعدك
زين : ببرود وهو ينزع قميصه ويساعدج
براء : محتاج شي
زين : اي ... تعالي طلعيلي ملابس علمى اسبح
براء : صار ... رحت طلعتله تراك اسود ورصاصي ... سمعته يصيحلي .... هاا
زين : وين الخاوليات
براء : اني غسلتهن ورجعتهن بالكنتور
زين : جيبيلي واحد
براء : رحت جبتله واحد ... مد ايده منكعه اخذه وسد الباب ... طلع اخذ الملابس وراح يبدل طول ميمشي اني اباوع لظهره .. كمل تبديل ... باوعلي من فوك لجوه
زين : شو بله دوري
براء : درت ... ضربني على ظهري
زين : بحده روحي نزعيها ضيكه
براء : جنت لابسه دشداشه ورديه كلي نزعيها رحت بدون نقاش طلعت وحده ثانيه سوده وبيها ورد ابيض ناعم رحت لبستها ورجعت درت ... بهدوء وهسه هاي زينه لو انزعها
زين : لا زينه ما بيها شي
براء : سمعنه الباب انفتحت ورجعت انسدت ... راح زين فتحها دخلت مريومه تضحك .. يمه فدوه .. لابسه تراك برموده احمر وهي بيضه وسمينه طالعه تخبل ... شالها زين
زين : بستها ....هاا حبيبتي شعندج هنا
مريومه : اديدت يمك.
زين : يااهلا وسهلا ... تعالي هسه نتغده وبعدين كعدي يمي شكد متردين بس اول شي بوسيني
براء : طبعا زين يختلف جذريا بمعاملته ويه جهال اخوانه مريم وايفان يموت عليهم وهمه هم يحبو ... نزلنه هو راح كعد هو ومريم على ميز الطعام واني رحت اساعد البنات بالصب
جميله : هاا ست براء شو مبدله وغمزتلها
براء : واذا يعني
جميله : ادري لهدرجه مستعجلين متكدرون تتحملون لحد ما نخلص غده
براء : ياا هاي شبيج دشداشتي جانت ضيكه وزين كلي نزعيها
جميله : بله دشداشتج ضيكه صدكتج و زين ليش سابح
براء : غير هستوه اجه من المستشفى
جميله : ها ها ها صدكتح
شمس : ههه ولج عوفيها هاي تحلل وحدها
براء : كملنه نقل الاكل وكعدنه اني مكاني يم زين ... بدينه ناكل
سجاد : الله عاشت ايدج يمه الاكل يجنن
مريم : ابتسمت مو اني طابخه اليوم براء الي طبخت
سجاد : ما غلطت من خليتج صديقتي عاشت ايدج الاكل يخبل
لؤي : صدك الاكل كلش طيب عاشت ايدج خويه
براء : بابتسامه بالعافيه ... الكل عجبه الاكل الحمدلله ...رجعنه نكمل اكل ومريم مدري شتسولف ويه زين
... وقصي يباوعلنه ويتبسبس هو وحسن
قصي : زين
زين : نعم
قصي : ليش سابح
زين : غير ستوني جاي من الشغل
براء : قصي دنك على زين مدري شكله ...وزين ضربه على كتفه حيلل
قصي: اااااخ خرب يومك كسرت متني
جهاد : ليش ضربته
زين : يستاهل لان لسانه فالت وميعرف يحجي
جهاد: شكلت ولك
قصي : ما كلت شي سالته ليش سابح كام ضربني
جهاد : ابتسم ... جا تستاهل
براء : بس قصي حجه تذكرت كلام جميله ... شلت راسي لكيت الكل يباوعلي ... عزززه بس لا عبالهم غير شي .. يا ربي شكد فشله ... بعدها خلصنه غده ... وراحت نجمه وجميله يغسلن المواعين وشمس وخاله مريم يلمن الاكل ويعزلن السفره واني رحت اصب جاي .... صبيت ورحت و وزعت للكل وانطيت لزين وكعدت يمه
قصي : جان ستحيت يا حسن ادري ماشايف
حسن : شبيج لك شسويت
قصي : هاي ليش شعرك منكع
زين : قصي تادب
قصي : هسه اني يمك جاي احاجي حسن
براء : طبعا قصي وجميله نفس الطبع بالضبط جريئين هواي بالكلام ويبسمرون ... اجت مريومه رفعت ايدها لزين ... شالها كعدها بحضنه ... طبعا من تجي مريومه كلها تسكت لان يحبون سوالفها
مريومه : امووو
زين : هاا عمو
مريومه : خاله بلاء ليش تنام بغلفتك
زين : عموو خاله براء مرتي فتنام بغرفتي
مريومه : يعني متل بابا وماما
زين : اي حبيبتي
مريومه : وهي تلعب بلحيه زين ... دين اموو انت هم تبوس خاله بلاء منا متل بابا .....وهي تخلي ايدها على شفايفه
براء : خرب صوفر وجهي ... هاي البنيه مثل امها ماعدها سيطره على لسانها
زين : يحاول يغير الموضوع .... شعرج حلو اليوم منو امشطلج
مريومه : ماما
زين : اي حلو
مريومه: تدوك
زين : اي ... يله تجين ويانه تنامين
مريومه : ما اليد انام
براء : تعالي نكعد نلعب وياج
مريومه : اي نديب لاابتي ونللاب بيها ( نجيب لعابتي ونلعب بيها)
براء : اي طبعا ... يله تعالي ... اخذناها وصعدنه فوك ... دخلنه للغرفه.. . واني رحت طلعت دشداشه فانيله قصيره ... مريومه كعدي هنا بس ابدل واجي حتى نلعب... بدلت بسرعه واجيت يمها
زين : طلعت لابسه دشداشه قصيره نص ردن وطالعات رجليها يلالن .... ببرود براء اني راح انام كعديني بتلاثه
براء : صار ... رحت كعدت اني ومريومه بالكاع حتى نلعب ... بعد ما جبنه العابها.... اكول مريومه انتي تحبيبني
مريومه : لا ما حبج
براء : ليش متحبيني وسوت نفسها تبجي ..... هههه راحت مريومه تركض لغرفتنه
مريومه : اموو دين امووو دين اددعد ( عمو زين اكعد)
زين : جنت ستوني غافي واجتني مريم .... هااا حبيبتي
مريومه : امووو بلاء تبجي
زين : كعدت ... شبيها ليش تبجي
مريومه : مو دتلها اني ما حبج ف بجت
زين : هاي شبيها براء تخبلت... تعاي حبيبتي شلتها ... طلعت للصاله شفت براء كاعده بالصاله وحاطه اديها على عيونها .... شبيج براء ليش تبجين
براء :اهئ سويت روحي ابجي اهئ مريومه تكولي اني مااحبج
زين : ليش متحبين بلاء مريومه
مريومه : برطمت ما احبها لان تنام يمك وانت تحبها اكتر مني
زين : ضحك ههه لا حبيبتي شلون مااحبج اني ... بستها اكو واحد ميحب هالوجهه ... هاا وكطفتها لفوك
مريومه : هههه يعني تحبي اكتر من بلاء
زين : طبعا ... وهسه تعالي بوسي بلاء خطيه تبجي... نزلتها .... راحت تركض لبلاء على كولتها
مريومه : لتبجين بلاء حبج اني
براء : مبرطمه صدوك
مريومه : اي
براء : لعد بوسيني بوسه جبيره حتى اصدكج .... اجتي باستني حييل ... بعد كلبي مال اكلل ... شلتها وبستها يمه اروح فدوه لهل خدود
مريومه : اموو دين بوس بلاء بوسه تبيره حتى متبجي بعد
زين : هي بجت من وراج اني شعليه
مريومه : عاتي تعال بوسها
زين : اجيت بستها بخدها
مريومه : لا اموو تبيره ام الصوت
زين : استغفر الله لعلعلا ابيج مريم .. دنكت على براء بستها حيل... ها ارتاحيتي عمو
مريومه : تضحك اي ...
براء : عززه هاي مريم كارثه خلت زين يبوسني مرتين ... حسيت بشفايفه على خدي .... شفايفه ناعمهههه ولا كان شفايف رجال .... وحسيت رجفه انتشرت بكل جسمي ... والطامه الكبرى حبيت هالاحساس ... اااا حبيبتي تعالي نباوع كارتون عوفي عمو يرجع ينام .. راح زين .. واخذت مريومه تمددت بالصاله وخليت مريومه بحضني وكعدنه نتابع كارتون ... وره فتره محسيت على روحي
_________________
زين : كعدت باوعت الساعه بالاربعه .. هاي شبيها مو كتلها كعديني بتلاثه ... كمت طلعت للصاله وجان اشوف هالمنظر
************
