رواية حرم الاسود الفصل الحادي عشر بقلم بتول ابو الليل
سمير صبيح يگول :
امس.زرت السوالف والمواعيد
بعدهن عالجسر كلشي ابمكانه
خطواتك لهفتك عرگت الايد.؟
خوفك لا عيونك اطب سمانه
____________♠___________
آرون : رهف
دخل عليه للغرفه فجأه لادك الباب ولاشي احس جمدت كل اطرافي كبل خليت البدي علئ صدري استر نفسي هوه وجهه صارر ينطي الوان دار وجهه بسرعه وكال
آرون ;ءءءأ اسف اسف عبالي اختي بالغرفه مادري والله
عافني وطلع بسرعه من الغرفه وسد الباب حيل بقيت واكفه مكاني وجهي احسه صاار نار من الفشله رحت بسرعه قفلت الباب عليه
لبست ملابسي وكملت يلا فتحت الباب حته ماكدر اباوع بوجهه بعد متردده حته اطلع
واكفه بالباب وصافنه فزيت علئ صوت أليڤ تحاجيني
أليڤ : تعالي تغذي.
هزيت راسي بأي رحت وياها جان آرون بالحديقه يخابر
كاعدين علئ الطاوله مال الطعام المره الجبيره واخت آرون رحت كعدت قرب رهف
شويه ودخل آرون ودخلو وياه 2 زلم رجال جبير وياه لد شاب يصير بڪد آرون
ميران : سلام عليكم
الكل : وعليكم السلام
سلمان : عدنه ضيوف
آرون : أي جايه وياي عدها هنا شغل.
ميران : هاا اتشرفنه اني ميران
_الي الشرف .. اليان
مدلي ايده صافحته تعرفت عليهم ميران اخو أليڤ وسلمان ابوها.
كعدنه كلنه سويه علئ الطاوله الطعام حيل حيل متوتره ولعبانه نفسي ماكدر حته اكل
ميران : ايي اليان عرفينه عليج منين شنوو شغلج
_من بغداد محاميه هل سنه تخرجت من جامعة بايروت بالمانيا وعندي شهادت ماجستير ودارسه عن القانون الدولي
ميران : حلووو والله مبين عليج بنت ناس معروفين الله يوفقج
اجيت احجي خزرني آرون عرفته ميريدني اعرف عن نفسي اكثرر.
_أي انتَ شنوو تشتغل؟
ميران : اني اشتغل معرض سيارات هنا باربيل ومخلص جامعه محاسب.
_ها حلو الله يوفقك
ميران : للجميع يارب
أليڤ : اممم أيسر ليش متاكل
آرون : شبعت
سلمان : هم رايح علئ ابوك ؟
تغيرت ملامح الكل من حجه هيج رجل عمته اباوع علئ رهف اخته نزلت عيونها علئ الارض
آرون : أي قبل شهر تقريباً رحت عليه وشفته.
سلمان : اييي احسلهه خلي يكعد ويسكت
آرون : انشالله اطلعه ماخلي يكعد هناك ويسكت
سلمان : ايي طلعه بفلوسه الي اخذهن وماندري وين خفاهن عنكم
آرون : احنه حاجين بهل موضوع واكثرر من مره گلت الكم ابوي موو مثل ما انتم ضانين بيه
ميران : اني اكول موو وكته هل حجي هسه واحنه عدنه خطار كاعد ويانه خلونه نكمل غدانه
سلمان : ليش الخطار مايدري بأبوه أيسر واحد حرامي وداخل سجن؟
ضرب آرون ايده علئ الطاوله حيل اهتزت المواعين بلعت ريكي بخوف كام من مكانه وكال.
آرون : هاي موو اول مره تسويها كل مره تحاول تستفزني بس ثق بالله مستحيل اعبرهن راح اثبتلك ابوي موو حرامي راح تعرف نفسك غلطان كلش بحقه وراح تتندم
لزمت ايده أليڤ وهيه رافعه راسها تباوعله بحزن.
أليڤ : لخاطري اكعد
آرون : سفره دايمه
سحب ايده منهاا وطلع من البيت وهوه ضايج دنكت راسها بزعل.
ميران : استغفرالله يالله شبيك يابه صددك جذب ليش هل حجي
سلمان : ليش حاجي شيء غلط اني
جيهان : انتَ بكل مره تخلي يزعل ويتوب بعد حته مايجي علينه ليش هيج
سلمان : جايين تحاسبوني لوو شنوو بالضبط انتم ناسين ابن منوو هذا وابوه شسووه.
أليڤ : بابا ترا زوجي أيسر ماحب تعامله هل معامله تحسسه هوه مذنب حته لوو جان خالي مسجون هوه شنوو ذنبه تحجي عليه
بقو يسوالفون ويتناقشون رهف مافتحت حلكها بحرف واني كذالك ضاهر ابو أليڤ ميحب آرون وابوه لأن مسجون بتهمة سرقه.
لهذا آرون ميبقه يمهم باقي بغداد يُشَتغلً ويحاول يطلع ابوه بكل طريقه.
عفتهم وكمت حيل انغثيت من ابو أليڤ عائلتهم مبينه مثقفه وراقيه بس هوه مدري شبيه مجلوب.
طلعت للحديقه جان آرون كاعد علئ القنفه ويدخن رحت عليه كعدت يمه باوعلي بطرف عين سحب نفس قوي من الجكاره وزفرها.
آرون : سمعتي الحجي الكاله رجل عمتي ههه رغم ابوي مسجون ويتعذب ماسالم من حجيهم هذا عود رجل عمتي بعيد ولا بينه تواصل هواي وهيج يحجي عليه تخيلي اعمامي واخوالي شطلعو عليه من حجي تنصدمين وتصيرين تشكين حته بنفسج ماخلو سالفه طايح حضها ماركبوها براسه.
_والله ماعرف شكول ضاهر ميحب ابوك الرجال او لأن دخل سجن بتهمة سرقه.
آرون : موو قصة مايحبه جانو حيل مقربين من بعض بس بسبب الصار والكلام السمعه عنه صاار يكرهه ومايطيقني اني لأن ادافع عنه وماقبل شخص يحجي شيء عليه هسه اختي يحبها لأن شما يحجي عن ابوي كدامها ماتفتح حلكها بحرف واحد
_أي لاحظت هل شيء اختك ابد محجت
آرون : هيه هيج من زمان ماتدخل بهيج امور ولاتفتح حلكها بحرف فقيره وتخاف من كلشي.
_خطيه
أليڤ : أيسر
درت وجهي جانت واكفه ورانه أليڤ ضايجه وتباوعلنه صفح كمت من مكاني اجت هيه كبل كعدت بمكاني لزمت ايد آرون وكالت
أليڤ : شبيك حبيبي انتَ متعرف بابا شنوو هوه هيج دائماً كوم اكل شيء بداعتي عليك
آرون : ماشتهي والله
أليڤ : لخاطررري فدووة
عفتهم ورجعت دخلت للبيت احس وكفتي مالها معنئ وعيب اصلاً رجال ومرته جانو مخلصين اكل وكاعدين بالصاله رحت لغرفة رهف استحي اكعد وياهم
دخلت بدون مادك الباب لگيت رهف كاعده وتبجي ..
من شافتني مسحت عيونها وتوترت كلش اني هم فشلت لأن دخلت بدون مادك الباب.
رهف : تعالي حبيبتي ادخلي ليش واكفه
دخلت للغرفه واني متوتره رحت كعدت علئ طرف السرير هيه كاعده بالكرسي مالتها.
_حقج تضوجين وتبجين اني لوو مكانج انهار لأن الاهل حيل عزاز ومنكدر نسمع حجي موزين عنهم.
رهف : ياريت مسوي غلط ويستاهل يحجون عليه صدكيني بعمره ماغلطان وجان زين ويه كل العالم بس ناس استغلت طيبة گلبه وفطرته واستغلو وخلو ينحبس بشي هوه ممسوي ادعي ليل مع نهار انو ميوفقهم ربي ولايشوفون يوم حلوو بحياتهم لأن دمرونه دمرو حياتنه خلو اليسوه والي ميسوه يتشمت بينه.
بلعت ركي بخوف من هيج كالت متدري الناس الي خلو ابوها ينسجن همه اهلي.
_اممم لاتدعين عليهم يمكن همه فاهمين الموضوع غلط او اكوو شخص ماخذهن منهم وعبالهم ابوج
رهف : مالهم حق يسجنون انسان بريء بدون أي اثبات عليه تخيلي حته ماقبلو بالكفاله ماخلو حته المحامي يحجي ويه المسؤل عن الشركه سدو كل الطرق بوجهنه لأن عرفونه فقره ومنكدر نسوي شيء.
_انشالله يطلع ويرجع الكم وتخلصون من كلام العالم
رهف : صدكيني مراح نرتاح من هل سيره لأن اعمامي واخوالي حيل يكرهون ابوي بيت عمتي هذول الوحيدين الي عود زينين النه
_وين الزين اشو رجل عمتج ماخله شيء ماحجاه
رهف : هذا شيء بسيط
_والله ماعرف.
رهف : اعذرينه انتِ جايه هنا حته تغيرين جو وتشتغلين واحنه نتعارك كدامج وندخلج بمشاكلنه
_لأ عادي حبيبتي كل بيت تصير بيه مشاكل
رهف : ي صح
سكتت عنها لازم احجي ويه آرون واكوله يخابر بابا ويهدده ويخلي يطلع ابوه باسرع وقت احس كلبي انعصر علئ رهف خطيه رغم عجزها ممرتاحه من كلام الناس.
والمصيبه تسمع وتسكت متحجي تكتم بداخلها وهذا العذاب اليكتل الانسان من يكتم بداخله وميكدر يحجي شيء كدام العالم.
....
فتحت عيوني مصدومه وكع الجهاز من ايدي
اريد استوعب الي اشوفه كدامي مافاهمه شيء
فيديو لبنيه تنزع ملابسها ومخلي عليها تغويش
وصوره اجتني ثانيه دنكت شلت الجهاز بسرعه جانت لبنيه موو اني والله بس مخلي وجهي عليها لابسه بس ملابس داخليه ومتمدده علئ السريرر .
بقيت جامده حته مارمش بعيوني ماعرفت شنوو احجي وشكول ليش هيج تيمور يسوي شنوو راح يستفاد بشنوو مأذيته اني حته هيج يسوي بيه .
شويه واجتني بصمة صوت بلعت ريكي واني ايدي ترجف حته اخاف افتحها سحبت نفس بقوه وفتحتها.
تيمور : ها حب شلونه وضعج حالياً اكيد مصدومه شوفي والله العلي العظيم اني مو شرير ولا آحـب اشوفج زعلانه بس شسوي بعد خليتج براسي ومن عاندتيني زاد اصراري عليج هذا شيء بسيط راويته الج
عندي مقاطع سك/سيه اڪدر ارڪب صورتج عليهم ودزهن الاخوج فأ الاحسن تنفذين كلامي وتسمعينه زين اوك يحلوه
تجيني باجر لـ *** وعد ماخلي أي بشر يعرف بيج جايتني دبريلج حجه ڪولي رايحه اشوف صديقتي مريضه أي شيء المهم تجيني ترا اني ماحب الانتظار وهذني ڪدامج انشرهن او ادزهن لخوج وحده منهم اختاري.
صارت دموعـي تنزل وحده ورا الثانيه ياربي دخيلك شديصير ليش هيج يسوووي بيه اني شسويتله مسحت عيوني واني احاول اجر نفس ماكدر احس نفسي اختنكت
ڪمت بسرعه قفلت باب الغرفه ورجعت اتصلت عليه من اول رنه رد.
تيمور ; ياهلا ومرحبا
_حقيييييير نذل كلببب ليششش تسووووي هيج اني بشنو أذيتك حرررام عليك عندك اخت خاف علئ عرضك يانكس
تيمور ; اهووو ترا فتحت عليج موو حته اسمع هل حجي منج شبيج ياعيني هيه ليله وحده تتعالي نخلص ع سريع وترجعين كانما مصاير شيء وعد يبقه سر بيناتنه محد راح يعرف بالي راح يصير
_تخسئ يانذل ياعار انزل نفسي الك اذا ماخليت الناس كلها تعرف حقيقتك ماطلع اريانا صدكني راح افضحك فضيحه كدام الكل راح اخلي ابوك يتبره منك
تيمور : ههههههه ريونه يابعد روحي ليش هل انفعال كله تهددين منوو هسه انتَ ليش تدرين بيه شلازم عليج وشنوو اڪدر اسوي بيج اخليج تتخبلين تصيرين تمشين وتحجين ويه نفسج والله اهلج همه الي اخليهم يتبرون منج عاد جري عدل وياي وصيري خوش بنيه وتعاي عليه حاولت وياج بهدوء وڪلت اغشج بڪم كلمه حلوات واڪولج اتزوجج واخطبج بس طلعتي ذڪيه ومانخدعتي بكلامي ورفضتي واشوف بس هذا الحل الي يفيد وياج.
_لك انتَ شنوو من بشر فهمني شبييييك شمسويتلك اني حرام عليك ليششش هيج تسووووي ليششش شتريد منييييي
تيمور : اريدج انتِ تجين لوو باجر تلكين صورج وفيديوهاتج علئ كل برامج المواقع التواصل ؟
_الله يخليك لاتسوي هيج خاف الله ولك اني شمسويتلك والله اذا يعرفون اهلي يموتوني حرام عليك روح علئ بنت عمتك هيه مو تحبك روح عليها ليش اني ليش جايني شنوو مسويتلك والله ماحجي شيء عن الشفته ولا امسك بحجايه بس عوفني بحالي
تيمور : اسمعيني زين اريانا اني من اخلي شيء براسي اسوي واني ماحب شذر ولا ارتبط بأي بنيه كل وحده تعجبني واشتهيها اخذ منهاا الاريده واشمرها وانتِ حالج من حالهن
_انتَ واحد عارر مع الاسف انتَ اخوو اليان ممصدكه الي اسمعه ابدد مجنت ماخيلتك نذل وفاسد لهل درجه.
تيمور : شوفي دوختي راسي وضوجتيني تجين لو لا؟
_ماكدر اجي فدوة تيمور اسوي الي تريده بس لاتطلب هل شيء ماكدر اسلمك نفسي اني موو هيج اني موو من هذني الي تلعب وياهن
تيمور : امممم زين اخذج زوجه الي شتگولين؟
بجيت بصوت مسموع خليت ايدي علئ وجهي واني اشهك يالله دخيلك.
تيمور : ليش هل بجي كله شبيج يابه لهل درجه اني بشع وماترضين بيه ترا مابزز حالي حال الي تاخذينه ثنينه عدنه نفس الشي.
_اذا تحب امك لاتسوي هيج
تيمور ; صراحه اني ماحب أي بشر حته امي فلا تعبين نفسج وتلعبين بعواطفي شبيج هيه ليله وحده تبيعين ثكل براسي عود ع اساس محد طاخج.
_اشرف منك ومن عشيرتك اني سمعتتتت لاعبالك كل الناس مثل وصاختك
تيمور : خلص ماشي اني اعرف شلوون اطلع هل حجي من خشمج يلا كود باي
_تيمور الله يخليك لاتسوي هيج فدووة شتريد اسويلك بس لاتطلب هيج موضوع منيي. الوو تيموررر الووو
تيمور : اووف المشكله اني بسرعه تتحرك عواطفي وماكدر اكون قاسي وياج خلص راح انطيج فرصه باجر تكعدين الصبح تكولين الامج انتِ رافضه الي اجوج خطابه وتحبيني واني اجيكم ثاني يوم واخطبج من ابوج واخصم الحجي كله شنوو رأيج
_انتَ شتدحجيييي شلووون اكووول الامي احبك تريد اخوووي يعرف ويذبحني بالحالتين اني مدمره ماكدر اتزوج منك مستحيل
تيمور : جؤ جؤ مستحيل اكو ام تنطي بتها انتِ اكعدي وياها واحجيلها وخلي الباقي عليه اني احلها واخلي ابوج واخوج يوافقون غصباً عليهم واذا ماسويتي هل شيء اقسملج بالله الشفتيهن هسه شيء بسيط انشر شغلات ماتخطر علئ بالج.
_الله ياخذك انشالله تجيك سكته قلبيه وتموت يلكوك بفراشك ميت عسه هاي حركت كلبي ودموعي ماتخطاك وتعيش مثل لحظاتي هاذي.
تيمور : شنو رأيج اغير رأيي ؟
_لا لاااا خلص خلص ماحجي شيء بعد
تيمور : هههه عفيه هيج اريدج تكونين مؤدبه وتسمعين الكلمه.
سديت الخط من عنده واني ابجي شمرت الجهاز واني منهاره.
ياربي دخيلك شسوي هسه شلون راح احجي الامي وشلون ارفض هيثم واني الگلت الامه موافقه
شراح يڪون موقفي ڪدامهم عمري ماشفت احقر وانذل من تيمور شلوون ڪدر يسوي هيج بيه
دفنت راسي بالمخده واني اكتم صوت صراخي احس گلبي راح يطلع ماكدر يالله دخيلك ماكدر اتخيل نفسي ويه هيج انسان مريض وصخ وقذر النتحار ارحم الي من هل زواج.
اندك باب غرفتي مسحت عيوني حيل رحت بسرعه غسلت وجهي وفتحت الباب جانت امي ..
جميله : شبيج ماما ليش قافله الباب عليج
_ءءء أ هوه اني جنت شسمه
جميله : شڪو شبيج عيونج مورمه من البجي تعاي احجيلي صاير شيء وياج من لصبح اني منتبهه عليج تصرفاتج مو طبيعيه احجيلي صاير شيء اني ماعرفه.
_لأ ماڪو شيء بس هيج كتلج راسي يوجعني او ..
جميله : اشش يمكن هذا الحجي يقنع ابوج واخوج بس مايقنعني ادري بيج راسج ميوجعج وهاي حجه تحجينها حته مننتبه عليج
_يمه شبيج وياي كتلج ماكو شيء ليش تسوين الحبه كبه
جميله : اني مسويه الحبه كبه لوو انتِ الي منعرف بيج بشنوو صافنه وشتفكرين.
_هوه أڪو موضوع اريد احجيلج عنه
جميله : أي ڪولي شنوو الموضوع
_اني ماريد هيثم ابن جيرانه ڪوليلهم اريانا رفضت الموضوع
جميله : شنوو انتِ بكيفج تقررين تريدين تفشليني ڪدامهم ليش رضيتي من الاول جا مارفضتي هسه تشمرين السالفة براسي مضحكه ڪدامج
_لأ ماما والله بس
جميله : بسسس شنووو ارايانا بس شنوو انتِ موو اقتنعتي شغيررر رأيج هسه فهميني.
_بس نصي صوتج فدوة وخلي نحجي بهدوء لايسمعنه مسلم.
جميله ; راحو ابوج واخوج يلا فهميني ليش رفضتي منوو لعب براسج.
_ماما اني آحـب
صفنت بوجهي وبقت تباوعلي بستغراب لزمت ايدي وسحبتني عليها وكالت
جميله ; منو؟
_تيمور ...
.......
بقيت كاعده ويه أخت آرون خطيه حيل مقهوره وعيونها مليانه دموع.
عفتها وطلعت اريد احجي ويه آرون بخصوص بابا جان كاعد بالحديقه هوه وأليڤ جنت اريد اطلع عليهم صاار كدامي ميران
ميران : ها اليان وين
_هوه اريد احجي ويه آرون
ميران : آرون ؟؟؟
_أحمم لعفو قصدي أيسر آرون اخويه ودائماً علئ لساني
ميران : هاا
_أي
ميران ; كويلي اذا محتاجه شيء اني اساعدج
_لأ تسلم
ميران : ولو عيني
توترت منه احسه يريد يسحب حجي مني نظراته ابدد موراحه رفع حاجب وكال.
ميران : مرتبطه اليان
_اممم لأ
ميران ; شعجب كل هل جمال ومامرتبطه
_مالكيت الانسان المناسب واني موو من نوع افكر بالعلاقات وكذا اهم شيء عندي دراستي وطموحي.
ميران : حلوو تفكيرج
هزيت راسي بأي وسكتت اريد احجي ويه آرون وهذا لازكلي.
ميران : شنوو رأيج نطلع نغير جو اخليج تشوفين اربيل
_لا شكراً ماريد تعبانه من السياره ودايخه غير مره
ميران : اكو هنا مطعم قريب علينه يسوي كهوه كلش راقيه نشرب فنجانين ونرجع
_ماشتهي والله
ميران : اممم أي براحتج اني بغرفتي بالطابق الثاني علئ اليسار اذا تحتاجين شيء تعالي وكوليلي اكون حاضر.
_تسلم متقصر
ابتسم ابتسامه خبيثه عافني وصعد لغرفته مادري ليش من شخص يحاول يتقربلي حيل اتوتر منه واخاف وحته كلام ماعرف احجي.
طلعت بالباب اريد احجي ويه آرون فجأه آرون خله ايده بشعر أليڤ وباسها من شفايفها بلعت ريكي بتوتر احس گلبي صار نااار
شفتي صارت ترجف من الحركه ليش ضايجه وليش محترك گلبي مابينه شيء وهاي مرته وحلال شمايسوي وياها
هيه لفت اديها علئ ركبته وبادلته البوسه رجعت دخلت للبيت عيوني مدمعه والغصه خانكتني خنك
مادري شسوي بروحي اول مره بحياتي احس بهل شعور والاحساس عمري ماخليت عيني علئ ممتلكات غيري شلون افكر بانسان خاطب.
رحت كعدت بالصاله احس الدنيا ضاكت بيه لازم ارجع لبيتي ماكدر اتحمل هل وضع.
...
أليڤ : اممم هسه احجيلي شنوو بينك وبين هل بنيه
آرون : ماكوو أي شيء بنيه زميلتي بالشغل ومثل رهف.
أليڤ : تريد تقنعني بهل كلام وعبالك اصدك شايفني طفله بعدين تعال من شوكت انتَ تشتغل ويه بنات ولا مره حجيتلي عن الموضوع؟
آرون ; أليڤ شنوو هل كلام من الاول تدرين بيه اشتغل بشركه وشي أكيد الشركه متكونه من رجال ونساء وانتِ اكثرر وحده تعرفيني ماتقرب لأي بنيه ولا اتحرش ولا اشمر كلام وانتِ بحياتي تتخيلين اباوع لغيرج او تعجبني بنيه ثانيه.
أليڤ : شحدك تباوع غير اموتك ناسي اني مرتك واسمي واسمك مربوطين سويه
آرون : واني عيوني مَآتشُوٌفْ غيرج
ضحكت سحبها علئ حضنه يبوس بيها خلت راسها علئ صدره.
أليڤ : شوكت نتزوج؟
آرون : من يطلع ابوي من السجن
أليڤ : ترا ابوك محكوم 3 سنوات نبقه هيج احنه شلون حته اهلي ميرضون ودائماً يسمعوني كلام وانتَ تعرف بابا زين ميقبل بهيج امور وغير هذا علاقتك انتَ وياه حيل متوتره.
آرون : انطيني صبر قريباً راح اطلع ابوي من السجن
أليڤ : شلون؟
آرون : وكلت محامي شاطر وانطيت واسطه قويه وانشالله خير
أليڤ : انشالله
...
صار اليل وهمه كاعدين بالحديقه اني بقيت كاعده بالصاله وحدي اصفن كل واحد كاعد بغرفته ماعدهم اسلوب غير عدكم خطار تكعدون وياه شويه.
دخلت أليڤ للبيت شافتني ابتسمت تك خد احسها حيل مستحقرتني شتت نظري عنهاا مالي خلك مشاكل ابد.
كمت من مكاني اريد احجي ويه آرون صار حته الكلام وياه حسره عليه شفته واكف ويخابر رحت عليه وصلت يمه اسمعه يگول
آرون : هاا كلش زين لعد شوفلي الوضع اني باجر اخابره واشوف شنوو رده علئ الموضوع.
سد الخط استغرب من وجودي باوعلي بمعنئ شكوو
آرون ; هاا
_ماكدر اكعد هنا رجعني لصبيحه
آرون : هههههه ليش شبيه المكان
_مابي شيء بس ماريد ابقه يا ترجعني لبيتي يا اما ترجعني لبيت صبيحه
آرون : ارفعي راسج باوعيلي احد مضوجج سمعوج كلام لوو شنوو احجي
رفعت راسي اباوعله عيوني مدمعه ماكدر افضح نفسي احس روحي حيل ضايجه منه
_محد مضوجني اني ماكدر ابقه هنا
آرون : هسه خابرني جون كال ابوج مكمل كل الاوراق ومقدمهن للمحكمه وباجر انشالله اذا ماصار بيها عائق راح يطلع ابوي وترجعين لبيتج ولحيااتج الجنتي عايشه بيها.
_يعني خلص راح ارجع لبيتي؟
آرون : أي راح ترجعين خلصت رحلتج وياي ههه
دنكت راسي واني احس روحي اختنكت اكثر بس شخص يلزمني انفجر وابجي.
آرون : مادري شلون اجازيج علئ هاي وكفتج وياي ومساعدتج ألي يمكن تكون هاي اليله اخر ليله اشوفج بيها او يمكن بعد منلتقي ابداً
حاب اكلج بشي انتِ انسانه حيل نظيفه لاتخلين وصخ اخوانج وتفكيرهم الشرير يغيرج خليج مثل ما انتِ حققي طموحاتج واحلامج ولا تاخذين قوتج من أي بشر لأن بأي لحظه ممكن هل انسان يعوفج او يغذر بيج.
رفعت راسي اباوعله ركز بعيوني وابتسم بهدوء.
_ليش منلتقي حته لو رجعت اريد اشوفك بعد لاتكطع وياي.
آرون : صعبه بعد عليه بس اكدر اخطفج بعد شتكولين ههههه
ابتسمت بحزن مجاوبته ميعرف الي بداخلي هواي مشاعر شايله اتجاهك رغم مصارلنه هواي سويه بس من اول نظره عجبني احسه حيل مناسب الي ثقافته واسلوبه وطريقت كلامه كلشي حلو بيه.
آرون : يلا تعاي ندخل الجو حيل بارد صار
_لحظه آرون اكو موضوع اريد احجي بيه وياك.
آرون : شنوو
_أني ...
آرون : أي احجي اليان شنوو الموضوع شوو سكتي.
_اني ..هوه شسمه
آرون : تعاي نكعد ونسوالف
هزيت راسي بأي شدسوين اليان منبهه علئ تصرفاتج لاتذلين نفسج ولج الف شخص يتمناج لاتفضحين نفسج ومشاعرج كدامه
رحنه كعدنه علئ الكراسي الموجوده بالحديقه باوعلي بتأمل احس عيونه توترني حيل نزلت راسي وبقيت اباوع الاظافري.
آرون : أيي شنو الموضوع ماناويه تحجين
_اني اسفه
آرون : ع شنوو
_اسفه لأن اهلي ظلموكم وخلوكم تعيشون ايام صعبه اسفه لأن بسببنه بجيتو وتحملتو كل هل حجي اسفه علئ كلامي وتصرفاتي وياك
ابتسم بهدوء لزم ايدي بلعت ريكي بتوتر وباوعتله جان مركز بوجهي بأبتسامه اديه حيل دافيات.
آرون : تدرين بهذا كلامج حييل كبرتي بعيني عمري مافكرت يجي يوم واتعاطف ويه أي شخص من عائلتج لأن بسببهم شفت ضيم وقهر ودموع اختي الي تحرگ كلبي بس ليووم عرفت نفسي غلطان من اول ماتعرفت عليج بالشركه حسيتج حييل مختلفه عن اهلج ماريدج تعتذرين ولاتحسين بالندم لأن الصار كله انتِ مالج ذنب بيه ابدد
والايام الي عشتهن وياج جانو احلا أيام اتمنالج حياة حلووة مثل ضحكتج انشالله تلكين الانسان الي يناسبج ويفرحج لأن تستاهلين كل الخيرر.
عيوني انملت دموع احسه جاي يودعني وبعد ماشوفه تقربت يمه وحضنته تصرفي جان غلط بس موبيدي والله مشاعري وكلامه وياي خلتني ماعرف شسوي.
حضنته وبجيت ماريد اعوفه اريده يبقه وياي بعد تعودت عليه يالله.
هوه ماسوه أي ردت فعل تمسكت بيه واني دموعي تنزل بصمت.
لزمني من كتافي وبعدني عنه يباوع داخل عيوني ابتسم بهدوء ومسح دمعتي بطرف اصبعه
آرون : خبله ع شنوو تبچين؟
_تعودت عليك احسك جاي تودعني
آرون : ههههه موو انتِ الكتلتيني كتل تردين ابوج هاي راح ارجعج اله
دنكت راسي واني امسح بدموعي هزيته بأي
آرون : يلا كافي كومي خلينه ندخل نتعشه ميت من الجوع الظهر ماكلت هواي
_ادخل انتَ اني مجوعانه
أليڤ : ايي عيني شبعتي احضان منه اكيد متاكلين شيء
درت وجهي مصدومه جانت أليڤ ورايه مباشراً غمض عيونه آرون بحسره سحب نفس قوي وكام.
آرون : أليڤ شنوو هل كلام
أليڤ : انيي شنوو هل كلااام شاااايف نفسك شدسووووي أيسرر بيييتنه وتخووون بيه وياها ليششش فهمنييييي بشنوو قصرت وياك فهمنييييي
آرون : اششش صوتج خليني افهمج الموضوع
أليڤ : شتفهمني بعييييني شفتكم حاضنين بعض بعيني شفتك شلوون قريب منهاا شراح تكول شنوو الجذبه الي تريد تسكتني بيها.
آرون : ماكوو شيء من الي بالج البنيه مثل اختي الله شاهد عمري مافكرت بغيرج ولا راح افكر بيوم جانت تبجي وحضنتها اواسيها لاكثر واذا انتَ ماعندج ثقه بيه فأ هذا كلام ثاني.
بقيت اني بس اصفن وعيوني مدمعه بلعت ريكي بخوف لازم اساعده ماريد تخرب علاقتهم بسببي
_أليڤ اسمعي الغلط مني اني والله مجان لازم اسوي هيج بس لأن معندي شخص مقرب عليه واني وياه مثل الاخوه والله عبالي عادي مجنت اعرف راح تضوجين.
أليڤ : شتردين لعد افرح اشوف زوجي حاضن بنيه ثانيه ومتقرب منهاا وبيتي وافرح لوو اجي اصفكله.
_اني اسفه الغلط منيي
آرون : اليان ممكن تعوفينه وحدنه
هزيت راسي بأي عفتهم ودخلت للبيت بقه هوه وياها يريد يقنعها ماكوو شيء بينه دخلت للصاله جانو محضرين العشه والكل كاعد علئ طاولة الطعام.
جيهان : تعالي حبيبتي تفضلي
رحت كعدت وياهم ميران مخلي رجل علئ رجل ويباوعلي ورهف تباوعله بتركيز احس رهف تحبه او معجبه بيه لأن نظراتها توحي لهذا الشي.
ميران : وين عصافير الحب
جيهان : عوفهم صارلها 4 اشهر مشايفته خليهم كاعدين سويه
ميران : واني مانعها من شوفته هسه غير يجون ياكلون ويانه.
رهف : اليان انتِ جنتي وياهم
_ء أ اي بالحديقه هسه يجون
هزت راسها بأي سكتت متوتره وحته ماكدر اكل شيء شويه ودخلو آرون وأليڤ لازمين ادين بعض بس هيه بعدها ضايجه وجهه معكر.
ميران : واخيراً شرفتو ترا متنه جوع
آرون : اعذرونه يلا حبيبي اكعدي اكلي
أليڤ : ماريد
آرون : أليڤ لاتضوجيني احنه شحجينه
جيهان : شبيها؟
آرون : مابيها شيء شويه ضايجه منيي موو أليڤ.
رفعت عيونهاا بملل مجاوبته كعدت علئ الكرسي هوه هم كعد تعشينه سويه اني ماشلت عيني وباوعتلهم بعد حيل فشلانه من تصرفي والمشكله الصارت بسببي
ماكدرت حته اكل شربت عصير شويه وكمت من الطاوله طلعت برا كعدت حييل مختنكه شوكت يجي باجر ورجع لبيتي ابتعادي عنهم احسن الي بهواي.
شويه وطلع ميران سحب الكرسي وكعد مقابيلي
ميران : شو مااكلتي.
_مجوعانه
ميران : انتِ شنوو الشغل الي تردين تسوينه هنا
_ليش تسأل؟
ميران : هيج فضول يمكن اكدر اساعدج بشي.
_شغل خاص
ميران : خاص ..!
_أي يخص الشغل ماكدر انطي معلومات عنه
ميران : هاا هيج يعني
_أي
ميران : ماشي اني طالع محتاجه شيء
_لا سلامتك
هز راسه بأي عافني وراح بقيت كاعده وحدي دايخه وخايفه من هل مشاعر الي راح دمرني.
بقيت هواي كاعده وحدي شويه وطلعت رهف صاحتلي بالباب
رهف : اليان تعالي
درت وجهي عليها جانت بالباب اشرلتلي بايدها انو ادخل كمت ورحت عليها
رهف : الجو حيل بارد برا تعالي نامي بغرفتي.
هزيت راسي بأي دخلت وياها رحت لغرفتها دخلت هيه وصلت يم الجربايه لزمت الكرسي حيل وجانت تريد تكوم
رحت عليها لزمت ايدها وساعدتها انو تتمدد علئ السرير
رهف : طفي الاضويه فدوة
هزيت راسي بأي رحت طفيت الاضويه وتمددت يمها علئ السرير
رهف : احجيلي شويه عن حياتج احسج حيل مقهوره وضايجه شنوو الشاغل تفكيرج
_حياتي الف بنيه تتمناها بس تصدكين رغم هل شيء اني ممرتاحه ولا فرحانه ماعرف لـيش
رهف : شوفي حته لوو جان كلشي متوفر بحياتج اتمسكي بالشخص الي يخليها حلوه الي يرسم الابتسامه علئ وجهج الحياة تصير حلوه ويه الناس الصح
_واذا جانو هل ناس منكدر نحصل عليهم شلون
رهف : الدنيا متوكف علئ شخص واحد اكوو هواي غيرهم يملون حياتنه ويخلونها ورديه
_انشالله
سكتت واني هم سكتت كلامها حلوو ويخلي الواحد يرتاح احسها فاهمه الحياة صح
غمضت عيوني ونمت رغم هواي نمت الصبح بالسياره بس تعبانه حيل من السفر ودايخه من البجي.
كعدت ثاني يوم علئ صوت رهف تكعد بيه فتحت عيوني بتعب
رهف : صباح الخير
_صباح النور
رهف : اعذريني كعدتج من وكت بس اخوي دك الباب عليه وگلي اكعدج يكول اريد اخذها لشغلها لازم نطلع مادري وين
_هاا هسه
رهف : أي هسه
باوعت للساعه بـ 7 الصبح هزيت راسي بأي،كمت غسلت وجهي وبدلت ملابسي لبست الي اشتراهن الي آرون
مشطت شعري وربطته رهف كاعده بالكرسي مالتها وتباوعلي
_يلا مع السلامه ديري بالج علئ نفسج وشكراً علئ ضايفتكم الي تشرفت معرفتكم
رهف : حبيبتي النه الشرف الله وياج
عفتها وطلعت من البيت جان آرون واكف برا ويدخن دار وجهه من طلعت اشرلي اجي رحت يمه
آرون : يلا ورانه طريق طويل
_وين راح تاخذني
آرون : نرجع لبغداد
_لوو باقين هناك مو احسن شستفادينه بهل يوم الي اجينه بيه
آرون : مجنت متوقع ابوج راح يخلص السالفه بسرعه يلا امشي
هزيت راسي بأي رحت صعدت بالسياره هوه هم صعد وساق طول الطريق ساكت مافتح حلكه بحرف.
_أليڤ بعدها ضايجه
آرون : لا تصالحنه
_اي زين اعذرني بسببي تعاركتو
آرون : عادي تصير
سكتت عنه ضاهر ميحب يحجي بهل موضوع خليت راسي علئ الجام وبقيت صافنه ليوم اخر يوم اشوف بيه آرون من اليوم راح نفترق وماشوفه بعد
ساق هووواي بعد ساعات من السايقه وصلنه لبغداد.
اتصل آرون بصديقه جون وبقو يتناقشون موضوع استلام ابوه شلون ياخذونه منهم.
آرون : يلا ماشي انتَ اول ماتاخذ ابوي تنطيني خبر واني اسلم اليان الهم تمام يلا
سد الخط ومشه سرييع بالسياره اني ساكته مافتحت حلكي بحرف باوعلي بالمرايه وكال
آرون : ابوج راح يسلم ابوي بـ ** وهناك احنه راح نكون وراح اخليج ترجعين اله اول ماشوف ابوي تحرر.
_تمام
آرون : اكيد مشتاقه تشوفين ابوج
_أي كلش
هز راسه بأي رحنه للمكان الي متفقين عليه وكف آرون السياره واتصل علئ بابا
آرون : ها وينكم
جاسر : واكفين بالمكان الي متفقين عليه انتَ گلت تسلم اليان هناك وينها
آرون : هاي عندي موجوده بس خلي اذكرج بشي اذا سويت أي حركه غلط راح توصلك اليان جثه موو عايشه افتهمت فأ لاتحاول تلعب وياي.
جاسر : قسم بالله اذا لمست شعره من راسها اكطع ابوك وصل اخليك تشوفه مكطع افصل كل جزء من جسمه واخليهن الك بعلاكه.
آرون : انتَ امشي علئ الاتفاق وتوصلك بنتك سالمه.
جاسر : راح نخلي ابوك ينزل طلع بتنه
آرون : اول مايوصل للسياره اني انزلها الكم
جاسر : ماشي
سد الخط آرون وبقه منتظر خبر منهم اني بس اصفن شويه ودزوله رساله اعتقد من جون ابتسم وضحك دار وجهه عليه وكال
آرون : واخييييراً طلع الياااان رجع والدي.
ابتسمت بوجهه ماعرف شحجي وشلون اشاركه الفرحه واني الطعم بيها.
آرون : يلا انزلي تحررتي بعد اشكرج كلش هووواي علئ كلشي مراح انسالج هل معروف طول عمري.
دمعت عيوني ابتسمت بحزن مديت ايدي علئ الباب اريد انزل من السياره
مانحس غير طوقنه شرطه من كل مكان آرون بقه فاتح عيونه بصدمه
واني مثله باوعتله بخوف ياربي دخيلك
نزلت الجنود ورفعت سلاح علئ آرون بقه هو بس صافن كل الاسلحه موجهه عليه وهوه داخل السياره.
الضابط : أي حركه غلط منك اطشر راسك بطلقه انزل
نزل من السياره وهوه رافع اديه ليفوك اني هم نزلت بسرعه خايفه عليه لا ياربي هسه فرح بأبوه شلوون راح اخلصه
حاصرو من ورا ومن كدام والكل رافع سلاح عليه رفع اديه ليفوك بابا اجاني يركض سحبني عليه
اول ماسحبني هجمو عليه الشرطه وصارو يضربون بيه بكل ماعدهم من قوه بالسلاح علئ راسه تخبلت من شفتهم يضربونه كدامي
_لاااااا عوووووفوو بابااا الله يخليك خليهم يعوووفونه ممسوووي شييي عووووفووو
يسحب بيه بابا من ايدي واني مارضه اتحرك اصرخ واريد بس اروحله ابعدهم عنه هوه ابد ماشال ايده مستسلم للضرب
_بابا اسمعني فدووه بابا خليهم يعوفونه اني رحت وياه ماخطفني خليهم يعووووفونه لاتضربوووو عووووفووو
جاسر : لج بابا شبييييج تخبلتي امشي
_ماااروح ماااعوفه آرووووون كووووم لاتخليهم ياخذوك عووووفه لاتضرررربوو.
سحبني بابا شمرني بالسياره وقفلها عليه بقيت ادك علئ الجام واصرخ بصوت عالي احس احبالي الصوتيه تجرحت راح بابا علئ الجنود وهم صار يضرب بيه
_لاااااا لااا بابا لاتسووووي هيييج عوووفه لاا
دفره برجله تقيئ دم صار وجهه عباره عن دم احس روحي فرفحت عليه
_آروووون كووووووم باااباااا طلعنييي عوووفو يامجرمين عوووفو
رفعت قفل الباب بايدي وفتحت باب السياره نزلت اركض رحت عليه ادفع بيهم وابجي
_لاتضررربووو وخررووو عنه وخرووو
اجاني بابا لزمني من اديي يبعدني صرت ابجي واحاول افك ايده عني
_بابا خليهم يعوووفونه الله يخليك
جاسر : انتِ شبيييج امشييي للسياره
_ماااروح ماخليكم تسجنونه مامسوي شيء عوووفووو.
ولاكانو يسمعوني بابا يجر بيه من ايدي يريد يرجعني للسياره حرت شلون اخلصه شفت مسدس بخصر الشرطي سحبته وخلته براسي...
