رواية هو لا يشبههم الفصل الثالث عشر بقلم تبارك الوائلي
لا شئ يُقارن بلحظة سلام مع نفسك،
برفقة أشيائك المُفضلة.. 🤎
جمانه : إلى أن اجانه خبر حسن اخو سندس الي خطبني قبل ... توفه الله يرحمه .. كل احنه نقهرنه عليه جان مريض ومات بمرضه راحت سندس يم اهلها بقت وره السابع ورجعت سمعت راجعه يم اهلي ورحت اني وعمتي وطيبه وبسام وسلمنه عليها وعزيناها بوفاه اخوها الله يرحمه بعده عريس 4اشهر من زوجه بس هذا حد يومه بالدنيا
ومرت الاشهر ___
واحنه حياتنه زينه الحمدلله خاليه من المشاكل
صح بسام عصبي وماعنده نضام بحياته بس الحمدلله كاعدين وساكتين بسام كال .
_ اكلج يمه تذكرت انتِ أيهم من تزوج هم عزمتي .
_ لا والله يا ابني .
_ ليش يمه هيه امه الله يرحمها مو عزمتنه .
_ يمعود هيه مال عزايم .
طيبه : بسام كل عقلك امك تخسر افلوس وتعزم
مو زين بالكوه اني وجمانه طلعنه منها افلوس ساعه ودينه هديه الهم بالسبعه مالته .
جمانه : طكيتها بضحكه وكلت .
_ والله عليج سوالف طيبه .
طيبه : اي ممجذبه اني امي مينطيها كلبه تخسر فلس .
ام بسام: ولج تره اكوم اسحلج طيبه سدي حلكج ادبسز .
بسام : بضحك ، والله قويه ام بسام هاي تعرف سوالفج يمه هههههه.
ام بسام : ياااا، انوب انت ولك .
رد بسام وهو مستمر يضحك وكال بجديه.
بسام : لا ، والله يمه عوفي الضحك راح اعزمه هو وزوجته يمنه عيب وهم اني والله احبه واتمنى اخويه قريب مني .
_ اي بكيفك يمه اني معليه .
بسام : ها جمانه شتكولين انتِ
جمانه : اي مابيها شي ادلل اني اطبخلك واحضر للعزيمه .
بسام : اي سوي تبسي وتمن واني راح اجيب دجاج شوي على الفحم .
جمانه : بكيفك انت بعد .
بسام : راح اروح عليه وهم اريده يروح ويايه لسوك اشتري ملابس هو ذواق بالملابس اني مااعرف عاجبني اجيب قاط .
_ أي روح الله وياك .
راح بسام واني كمت غسلت ملابس ونضفت
ورضعت طارق ونيمته وصارت العزيمه واجه ايهم
هو وبسام علينه وزوجته ماجايه لان رايحه لاهلها
من البارحه ... وطبيت سلمت عليه وطلعت وصبينا الاكل وكعدو تعشه هو وبسام وأجيت جبت الجاي الهم اباوع بسام لابس مرتب وطالع انيق كام أيهم راد يطلع كال .
ايهم : اني ان شاء الله من تجي ام دينا اجيبها واجيكم .
جمانه : ابتسمت وكتله ، هلا بيكم ياريت تشرفونه حتى نتعرف عليكم اكثر .
أيهم : تسلمين ام نور .
جمانه : راح أيهم وثاني يوم سمعنه سندس ماخذها صالح اخويه لاهله ومتخربطه بالطريق ومدخليها
مستشفى ومسويلها عمليه مستعجله ورحنه على اهلي كلنه من سمعنه وكالو يم اهلها اله تتحسن
ياله ترجع ورجعنه ودكيت عليها وتحمدت الها بالسلامه وسديته ومرت الايام واجتي سندس ورحنه شفناها وتحمدنه لها بالسلامه بس جانت حيل متغيره وضعفانه حيل مسكينه وعده شهر سمعنه هم متخربطه وماخذها صالح يم اهلها ومدخلها مستشفى ونايمه وياها امها اشكد اتوسلت بسام اروح اشوفها ماقبل اروح عليها للمستشفى ابد
راحت فرح شافتها وهدى بت عمي شافتها واني ماقبل بسام ابد ،
كاعدين وندك الباب فتحه بسام طب اسامه ابن
عمي علينه وكعد ويسولف ويا بسام وكله بسام .
بسام : اسامه ليش متزوج وتفضها .
اسامه : والله يا بسام ماكو نسوان ولا اكو وحده تعجبني .
بسام : شنو ماكو يمعود .
اجيت قدمتله الجاي اخذه مني و كتله .
جمانه: اسامه شنو ماكو عندك بنات عمتي حسين ليش متخطب منهن .
باوع عليه وكال
اسامه : اي منو كولي ، عمي الي تختاريها انتِ اقبل بيها بدون نقاش .
جمانه: لا عيني اني شنو اني بس اكلك وانت شوف وقررر .
اسامه: اي كولي منو جمانه .
جمانه : هاجر بت عمتي ؟؟
اسامه: اي ليش لا والله اليوم احجي ويا ابويه وشوف شيكول عليها .
جمانه : بعدها راح اسامه وكال راح افاتح ابويه بالموضوع.
"""""""""""""
بيت ابو حسان "
أبو حسان : ها وليدي كول سمعت تريد تحاجيني.
اسامه: أي صح يابه اريد اخطب هاجر بت عمتي ام حسين اني ماشايفها من صغيره بس كالو عليها خوش بنية .
أبو حسان : ها اي ليش لا اني احجيلك ويه عمتك وشوف شتكول.
اجت هدى من بعيد تضحك وكالت .
هدى: ها اسامه واخيراً راح يصير عرس ابيتنه
فدوه تزوج نريد نركص .
اسامه : اعرفج هدى همج الركص دكومي صبي الغده كتلنه الجوع .
هدى: اي بس خلي حسان يجي راح هسه يجيب طرشي اليه .
اسامه: والله عمي خوش بهل ضهريه دازه الرجال على طرشي .
هدى: ضحكت وكتله ، مو اني هاي ابنه شتها طرشي .
سمعت صوت حسان .
حسان : السلام عليكم سمعتكم ذكرتوني .
اسامه : اي والله لو ذاكرين مليون جان ما شفنا .
حسان : الصم لك اسامه المليون احسن مني
سمعت يابه ابنك .
أبو حسان : هو هذا اسامه ميجوز من سوالفه .
اسامه : من هسه ابنك يشتهي طرشي هو وامه ويخلوك تركض بعز الضهريه علمودهم.
حسان : هسه خلي يجي بلاول ويدلل على ابو
ويدلل على عمه . .
اسامه: واني شنو يدلل على أبو احسن .
_ كافي والك دخت والله .
أبو حسان: تعالي هدى عمو جيبي ماي .
_ اي عمو اجيت .
أبو حسان : كومو ساعدو البنيه حامل خطيه واحدكم بعرض الباب وما منكم نفع.
هدى: كملت عمو ميحتاج .
كملت صب الغده والتمينه كل احنه وحسان كال .
_ يله سمو وتغدو هسه و باجر اروح على عمتي ونشوف هاجر واذا عجبتك اسامه بس اطلع بره بحجه للمغاسل وكلي واني انطي اشاره الابويه علمود يحجي ويا عمتي
اسامه : اي هذا هو اتفقنه .
هدى : اي ياله نريد نفرح بعد اسامه.
أبو حسان: ان شاء لله بنتي نفرح ونزوج اسامه
بس يعقل ويتوب .
حسان : خلي ادك على سوسن وابشرها ردت سوسن وحجيت الها وهيه طكتنه بهلهوله .
_ كللالللشششسس ياريت والله ونفرح بي .
حسان : ضحكت عليها وكلتلها
_ اي عفيه بعد اخوج كثري بالهلاهل انزرفت اذاني .
سوسن : هههه خلي ادك وابشر شرين باي .
حسان : روحي خويه هاي هم مخبله والله اريد واحد بخلفتك ابو حسان عاقل ماكو هههههه .
"""""""
بيت ابو هدى ""
أبو هدى: وينج يا مره تعالي .
ام هدى : ها عيني اجيت اكعد اصبلك الغده بس اروح اكعد البنات ، طبيت عليهن نايمات صحت
يله يمه اكعدن وتعالن تغدن ، رجعت للهول كتله .
_ اكلك ابو هدى خابرتني اختك ام حسين علمود عرس حسين وعايده بنتك كالت هل اسبوع موعد العرس .
رد بحزن .
_ اي هذا هو بيها الخير حضري انتِ وياهم .
_ أي أن شاء الله هيه تريد تسوي بس الحنه يمنه وتكول الزفه هناك اقرب علمود الطريق .
_ بكيفها هيه بعد ، كليله اي ان شاء لله .
ام هدى: ان شاءلله اني باجر اعزم الكل واحضر البنيه اشبيك ضجت تره بعد بقن 4 يمك .
أبو هدى: لا ماضايج الله يسعدها بس الواحد يربي ويتعب وبلاخير ينطي على الجاهز .
_ هاي سنه الحياه انت مو هم اخذتني من اهلي يارجال .
_ ههه والله عليج سوالف ام هدى .
_ ضحكت الضحكته وصحت ، تعالن يمه نتغده ويا ابوجن وين اخوتجن .
_ يمه يلعبون بالباب .
_ صيحيهم ولج .
_ اي يمه راح اصيحهم .
ام هدى: اريد اروح على بيت ابو صالح اسال على زوجه صالح خطيه اشوفها اشلون صارت .
أبو هدى: أي روحي وسلمليلي عليهم .
"""""""""
بيت ابو حسان ""
شيرين : بضحك ، اي هدى احجي اشلون باوع اسامه الهاجر .
هدى : اسكتي شحجيلج من جوه لي جوه يباوع .
شيرين : اي وخيرا وكع ومحد سمه عليه هههه .
اسامه: حجه بجديه ، وين ولج سويتيني وكعت .
شيرين طكتها بضحكه بصوت وهو صاح .
اسامه : شيرين اسكتي لا اكوملج ومحمد .
شيرين : هههه على كيفك عمي شكلنه .
حسان : كافي نكره شيرين انتِ ويا دوختونا .
محمد : هسه اشوكت العرس اريد نفرح .
هدى : حمودي تلحك تفرح حبيبي .
محمد : اي كالت عمتي زواج حسين هذا الخميس .
_ ورها تعالو نعقد ونجهز .
حسان : اي الف مبروك الك ربي يسعدك لتصيحن ابويه خطيه نايم .
هدى : اي بس تعال حسان اريد انقرر شنسوي للعرس.
حسان : هداوي جاي جاي اصبري شويه ،
التفتت الاسامه وكتله .
_ اي عيني اسامه شلون فكرت بهاجر .
محمد : أي والله صدك مدام هدى كامت حجي اشبيك .
اسامه: حمودي كتلت روحك اكثر مني .
محمد : ههه دحجي عاد فضنه .
أسامه : شوف ذني خواتك راح يموتن روحهن .
شيرين : اهووووو اسامه يله راح احجي اشكد اداهر.
حسان : احجي راح اضربك دفره اطلعك الباب يله حجيلنه .
رد عليهم وهو مبتسم
اسامه : ذاك الشهر مريت على بسام شفته لان لاكاني بالسوك وعاتبني لان ما اروح الهم .
_ اي كمل.
اسامه: أي ورحت عليهم وعمتي كالت اشوكت نفرح بيك وتزوج كتله والله عمه ماكو نسوان ضحكت جمانه وكالت ليش وين راحن كتله الله ويدج شوفيلي كالت شوف هاجر بت عمتي كتله اي هذه هوه الي تختاريها اني اقبل بيها و الله العظيم كالت خوش روح وشوفها اذا عجبتك .
صفنت سوسن وهمست الشيرين .
_ هاااا خيه اثاري اختيار جمانه .
ردت شيرين بهمس .
_ اسكتي ليسمعج ماعولنه يقبل ويتزوج والله اني كلت بعد قفل ميتزوج من حركه كلبه على جمانه .
عاط عليهن وكال
اسامه : كافي تتبسبسن تره سمعنه .
شيرين : يااا اشكلنه اشبيك اسامه زعلت .
اسامه : لا عليمن ازعل خلي اطلع صديقي منتضرني .
سوسن : وين اكعد اشويه وروح .
اسامه: لا اريد اروح الولد منتضرني .
شيرين : اشبيك اسامه .
_ لا مابيه شي طالع اني .
طلع بره وكلت .
_ استغفر الله هيج احسن سوسن احنه نعرف بيه وبسوالفه انتِ اشبيج اكو واحد يحجي هيج .
سوسن : ياا كلبتو عليه اني شنو .
حسان : هاي الصلفه متسكت .
شيرين : كلتلها والله اسكتي اسامه مفتح بالبن .
حسان : بس ثوله كافي اسكتن ماعولنه انشوف ضحكته .
سوسن : ضحكت وكلت ، كومي خيه خلي اروح احسن ليجي هذه المخبل مابيه حيل عصبيته ههه .
حسان خزرني كتله .
_ والله ماقصدت حسان اشبيك .
""""""
جمانه : ها عمه جيت .
ام بسام : يله عمه فضينه انطيني نور خلي نوكف بالباب اني وياها وكملن بسرعه .
جمانه : اي كملت عمه بس البس الشال .
كملت تبديل ورحنه اني وعمتي وطيبه وحضرنه
حنه عايده بت عمي ابو هدى وفرحنه وتونسنه وركصنه واجتي فرح وشهد بس لا امي ولا سندس
اجوي لان سندس متكدر خطيه حالتها كلش انتكست وضعها مأيوس منه ، رجعنه للبيت وبوجهي ورحت اسوي عشه واجه بسام كال .
بسام : يله جمانه جوعان حيل .
جمانه : أي هسه ما اتاخر ، التفت جاي يطلع من المطبخ ورجع باوعلي وكال باعجاب .
_ هاي شنو شطالعه شنو قصتج ست جمانه .
_ باوعتله خايفه كتله ، شكو خير .
بسام : ماكو شي والله بس كلما تكبرين سنه تحلين اكثر ام طارق .
جمانه: بعدت شعري وحجيت بغرور ،
_ يااا اني اصلاً حلوه من كاعي واحله منك هم .
ضحك بصوت وكال .
بسام : اي والله صدك احله مني شلون قبلتي بيه باله ههههه .
جمانه : ضحكت وكتله ، وبعدين اني ام نور ليش
ام طارق عود لو لان ولد مو استاذ بسام اتميل للولد اكثر من البنات .
بسام : اي اني عندي ولد ليش نور عيب نور انتِ ام طارق .
جمانه : هاي العادات بطلوها مالتكم ماكو فرق بين ولد وبنيه.
بسام : يله عيني متت جوع ام الفرق .
_ اي اشبيك صبيت .
_ اكعدي بابا بصف بيبيتج واكلي عدل .
طيبه : ها بسام بدت رحمه الله ، خلي ناكل براحه عوف نور هم تمن وطشر خلي الطفله تاكل براحتها يمه تعالي حبيبت عمتج اكعدي بحضني .
بسام : اي لعد طيبه بعد انتِ الي مطلعه عينها .
طيبه : اني شعليه هيه بنتك عرمه .
بسام : اي عرمه عليج غير انتِ عرمه ماينكدرلج .
طيبه : سمعي يمه ابنج .
جمانه : ههههه شنو القصه طيبه شو ذاك اليوم أيهم هم يكول طيبه عرمه.
طيبه : اي مثل اخو لو تلكي سامعها من بسام .
بسام : صدك البارحه شفته بسوك جاي من دوامه وكال امر عليكم باجر العصر هوا وزوجته .
ام بسام : هلا بي يمه اكلك هو أيهم مو تخرج .
بسام : أي من جانت امه عايشه تخرج .
ام بسام : اي وهسه شنو شغله بالشرطه .
بسام : تدرين مادري ولا سالته .
طيبه : عيني بله ما تساله هو يخاف احد يحسده
اني اكلك يمكن سمعت بي صاير ضابط بس ميحجي متعلم من امه يخافون احد يحسدهم .
بسام : بعصبية ، حتى الميت ميخلص منج طيبه اسكتي احسلج .
طيبه : وشكلنه عيني انزعجت على اخوك .
بسام : اهووو اشبيج بابا انتِ مو راح اكوملج .
جمانه : يمعودين اذكرو الله واكلو ،
كملنه العشه ورحنه نمنه وثاني يوم صادف عرس عايده وبالكوه عمتي قنعت اروح للعرس ورحت اني وطيبه ونور ورحنه ويا عمتي وبتنه ابيت عمتي وزفو عايده وفرحت الها لان جانت عايده اقرب وحده اليه من بنات عمتي صديقه الطفوله من يجي عمي علينه نبقه نسولف ونلعب اني وياها ونباوع سوه على كارتون ولمسلسلات ، خلص العرس و رجعنه امي وطيبه وعمتي ام هدى وصلتنه براس الفرع وراحت خطيه مقهوره على عايده وصلنه للبيت وتلكانه
بسام من الباب ضايج وكال .
بسام : ها ست جمانه وست طيبه حلت الجن الطلعه بعد ممنوع احد يطلع افتهمتن مو اطلعن سوه وعايفات امي وحدها .
جمانه : نقهرت من كلامه بس سكتت وكتله .
_ اي عمي منطلع بعد شبيك .
_ اي خلي اشوف كومي جهزي الغده .
_ اي هسه بس ارتاح من الطريق .
بدلت وغسلت ورحت سويت غده ومرت الايام بين طبخت ونضفت ونيمت الجهال وهنا صار عرس اسامه واجتي سوسن عزمتنه وراحت وبسام اعترض وماقبل اروح للعرس راح بس هو ضجت من تصرفاته لان احنه اربعه وعشرين ساعه بالبيت منطلع ابد لو
اروح لاهلي كل شهر لو ماكو طلعه ابد بسام لا عنده زياره لا تسياره مرات يعجبني نطلع بس هو ميقبل هم مثل طبع اهلي بس عاد جانو اهلي ارحم جنت اروح اني وامي البيت خالتي بسام ماكو حتى الباب اذا اندك ميخليني اطلع افتحه يكلي خلي يدك يملون ويرحون ومتطلعين ابد ومره رحت اخيط يم صديقه طيبه وكالت .
_ شنو هاي طيبه شعجب شفنه زوجه بسام بس عمي حقه ميقبل تطلع ويخاف عليج .
جمانه : هذا مو خوف ولا غيره هاي قله ثقه بنفسه
بقينه نحجي شويه ورجعنه اني وطيبه والطريق
كله افكر بسام هو زين نوعن ما صح يعيط ومايحترم ومرات يجاوز ويغلط بس شسوي مرجعي اله لان اهلي ماعدهم غير اتحملي يكبر ويعقل ، مرت الايام تركض ركض وبيوم اندك الباب وطب حمودي عزمنه على عرسه راح يسوي بقاعه ومكيف خطيه حب بت خاله ونطوها اله اشكد فرحتله بس الي قهرني تدهور حاله سندس تمرضت مرض مو زين وطلع عدها مرض خطير خطيه اشكد انقهرت عليها وبجيت عليه من كل كلبي المسكينه افكر بجالها اشلون بيهم
اذا لا سامح الله صار بيها شي من الهم .
مرت الايام..
نايمين بالسطح يدك مبايل بسام بل 6 الصبح رد .
_ الو هلا صالح .
سكت بعدها ملامحه تغيرت وكال .
_ لا اله الا الله.
جمانه : حجيت بخوف خير بسام احجي شكو .
_ جمانه بس لتصيحن ، صالح اخوج يكول سندس توفت .
_ عفت ايدي على كلبي كام يدك سريع حيل نقهرت عليها شويه ودموعي صبت وصرت اشهك نقهرت على شبابها واطفالها خطيه هيه هم تعلعلت صار فتره تعاني من مرضها بعدها كمت على السريع لميت البيت وخذت جهالي و رحت الاهلي ولكيت العالم مخبوصه يمهم وجابوها للبيت طببو الجنازه ، طارق عمره 7 اشهر انطيته العمتي ورحت ويه البنات الكل يبجي والعالم مكلوبه وراحو دفنوها وجهالها موتو نفسهم اويلي عليكم عمه نكسرتو
وتيتمتو بصغركم بعدهم صغار
التوم عمرهم 6سنوات والصغير 5 سنوات
تاخرو للضهر ياله رجعو من الدفنه صبو الغده وكعدن امها واخواتها جاني بسام يدور اكل خاص اله كال .
_ امشي صبيلي اكل زين حتى اولي.
_ بسام منين اجيبلك ، مادري هم صبو اني ما اعرف وين الاكل .
ضاج وكال .
_ لج قندره معرفتي تفكرين بيه لو اهم شي نفسج وجهالج .
_ استحيت احجي عادل وكواكب واكفين وشهدو الموقف وشلون يغلط صاح .
_ والله من دنعل ابو....ج ...لابو هيج منج ومن عشيرتج .
_ انجبرت اسكت منا الناس وعادل وكواكب سمعو سبني علمود الاكل عادل تخبل صار عصبي وكاله.
عادل : اشبيك بسام مو عيب تجاوز على زوجتك .
بسام : رجأءً لحد يدخل بيني و بينها .
جمانه : من فشلتي طبيت جوه بجيت بدون محد ينتبه عليه ،
خلصت الفاتحه وكلماً راح البيته وصفو اهلي وحدهم
بس صالح وجهاله وامي وابويه وامي متكدر الجهال اخويه ومحتارين بيهم كل النهار يبجون على امهم ابويه كال .
أبو صالح: بنات سمعن بعد كل يوم وحده تجي علينه تطبخ وتنضف لان امجن متلحك .
شهد : أي يابه تدلل
جمانه : ميخالف يابه اجي ليش لا .
فرح : لتشيلون بال احنه غصب عنه نجي .
خطيه صالح كعد بالبيت وكابل جهاله لان ميكدر يعوفهم مرت فتره و سمعنه عمي ابو حسان يريد يتزوج وقرر وراح خطب وماكو أيام و تزوج وحده مطلقه بس فقيره وبت ناس وبعد فتره ،
هدى وحسان اجرو بيت بصف اهلي وطلعو وحدهم وبقه عمي زوجته واسامه وهاجر عايشين سوه
كلنه فرحنه بنزلت هدى وحسان بصف اهلي لان هدى خطيه صارت تهتم باهلي تخبز وتطبخ الهم وتهتم بالجهال حتى هلكد ما تهتم بيهم تعلم عليها
ابن صالح الصغير وصارت تنيمه بحضنها ومن يروح حسان لدوام يلتحق يبقه سبوع يمها ، هيه صارت من يروح حسان تقفل بيتها وتبات يم اهلي ومن يجي ترجع البيتها بس هم تروح تطبخ الهم ماعافتهم ابد
وحتى خواتي مقبلت يجون كل يوم على اهلي واني
هم بس بلاول قبل بسام وعمتي بعدين بزعو لان اروح بين يوم ويوم بس الحمدلله الله ماكطع بيهم
ومرت الايام ___
واني رجعت مثل قبل كل شهر اروح يوم ابات واجي بيت خالتي بايعين بيتهم ومشترين أرض جبيره منطقه الغزاليه يردون ينجمعون بيها ، بسام حيل ضاج لان متعلم عليهم يوميه العصر يروح يمهم وبليل يبقه يتعلل يمهم ويجي كل يوم لان هو من طلع من السجن صار 3 سنوات عايف كل اصدقائه ومقاطعهم اجه ضايج وكال .
_ اذا شالو اني شلون جمانه .
_ بسام شنسوي اذا يردون يستقرون قابل يبقون ايجار .
_ اي بس اني شلون بيه اشلون اسد فراغهم تعلمت عليهم .
ام بسام: الله كريم يمه .
بسام : يمه اني راح اروح وياهم اشيلهم بالغراض وابقه يمهم كم يوم اساعدهم .
ام بسام: براحتك يمه .
ام بسام : خلي نروح وياك انسلم عليهم .
جمانه : فرحت لان راح نروح نودع بيت خالتي صاح بسام .
بسام : يله فضوها منتضركم بالباب .
كمانه وبدلت الجهال اجه كال .
بسام : انطيني طارق اشيله يله بابا نور امشي .
_ طلع قبلنه واني لبست عباتي ورحنه سلمنه عليهم واجتي سياره تحمل بالباب وجمعو كل غراضهم وراح وياهم بسام ورجعنه اني وعمتي وطيبه لبيتنه وبقه 4 ايام بسام يمهم ودك علينه بالموبايل وكال .
_ وين امي .
طيبه : خير بسام .
_ ماكو شي طيبه انطيني امي احجي وياها.
_ هاج يمه بسام يريدج .
_ ها وليدي جن حلتلك الكعده بيت عمتك وعفتنه
_ اي والله يمه تدرين بيه اشكد احبهم .
_ ادري يمه كول .
_ اكلج يمه راح اطلب منج ولترديني .
_ خير يمه .
_ يمه اكو بيت هنا بصف بيت عمتي وحلو ومرتب وايجاره زين خلي نجي انشيل بي واناجر بيتنه علمود اصير بصفهم ومابعد عنهم .
_ يااااا ، بسام تحجي صدك يمه وتريدني اعيف منطقتي ومتعلمه عليها اشلون بيك انت .
بسام : يمه الخاطر ربج اني اذا رجعت صدكي راح ارجع الاصدقائي وارجع الدربي القديم .
ردت بعصبية .
_ بسام شنو هل حجي جوز من سوالفك و شنو تشيل هناك اني ماقبل وانت مو صغير وترجع الاصحابك اسمع زين اعقل واكعد بس كافي عاد مافكرت باخواتك اذا شلنه هناك ، نصير بعاد عليهن ومحد يجيبهن علينه وتعرف بالوضع موزين .
بسام : رد بتوسل ، اني اجيبهن يمه اشبيج .
_ كلت لا خطيه خواتك ابني .
_ زين اسمعيني يمه ، خلي من يردن يرحن البيت خالي ابو صالح واني اروح اخذهن والله هنا احسن وراح اتأمنين عليه وياهم .
_ حيرتني يا ابني .
_ يمه فكري والله ماكدر متعلم عليهم و ماكدر افاركهم .
_ خوش يمه انت ارجع ويصير خير .
جمانه : رجع بسام بس عمتي مامقتنعه ولا قابله
على فكره الايجار وراحت الجارتنه خياطه اقاربها
يردون بيت لليجار وعمتي وكفت وياها على السعر.
بسام : يمه ليش هيج تسوين مو كلتي ميخالف شو هسه قلبتي.
ام بسام: ابني انت شتحجي اني ما اريد ااجر البيت ولا اشيل .
_ ليش يمه فهميني .
_ لك ابني هاي ادور ايجار رخيص ومايسد الايجار هناك وين يكفينه انت ما تفكر.
_ يمه الخاطر ربج لصعبيها هيه تريد اتاجره بسعر
مناسب واني هم اشتغل هناك وراتب ابويه والله كافي علينه ليش تردين اكثر بعد .
_ لا قليل بيتنه يسوه اكثر جبير ونضيف وقاطين
لا وتريد الصدك ماشيل من منطقتي وولايتي عليمن والله انت راكض وره ولد عمتك اصغير انت يمه شجاك تالي عمرك .
_ اشبيج اني ماعندي اصدقاء وراح ابقه وحدي هنا لان كل اصدقائي القدماء يشربون وسرسريه وعفتهم والله هاديني انتِ هيج راح ترجعيني مثل قبل اشرب واذكرج بهذا اليوم .
ام بسام: شنو انت طفل متستحي عمرك 21 سنه
منو علمك هل حجي كافي متعبني وراك انوب تريدني اعوف بيتي .
جمانه : اصواتهم علت وصار كلامهم بصياح صحت .
_ عمه بسام اذكرو الله وتعوذو من الشيطان .
اجت طيبه طبت جانت يم الجوارين كالت .
طيبه : شكو لا .
بسام : ماكو شي بس يمه انتِ اول الناس لتلوميني اذا رجعت لدربي القديم سمعتوني سمعي وياهم جمانه ولحد يلومني بعد .
ام بسام: ياااا ، صدك تحجي تعال وين رايح مو احجي وياك .
طيبه : عوفي يمه عوفي هذه بطران ابنج يريد يكعدنه يم بيت عمته ام حميد واشلون احبهم اني
ناس معقدين ماعدهم مره تطلع واطب و اني هنا متعلمه على جاراتي اندار يمهم واكعد اسولف هناك انحبس بالبيت ماطلع .
ام بسام: أي والله واني هم على حجي بسام لازم اعزل محلي واكعد بالبيت واني تعودت على الشغل مااعرف اكعد بالبيت ، اوففف ياربي شلون بي هذا الولد .
جمانه : عمه طيبه ليش اتفكرن بس بروحكم فكرو بسام شويه ، يا عمه فكري اخاف ابنج يرجع مثل قبل لشرب وسوالفه التعبانه شفتي من طلع من السجن لسه ماشرب وتعلم على ولد خالتي يصلي وملتزم وياهم ويحبهم خلي يشيل يمهم فدوه اني علموده والله ماريده يرجع الدربه الاعوج .
ام بسام: صعبه جمانه شلون نعوف حياتنه .
جمانه : لعد اني مو راح اعوف اهلي علموده
اذا يرتاح ويبقه هيج خلي نروح ليش نخسره .
_ لا عمه والله ماكدر ، صوت الباب يمكن اجه اسكتتن .
اجه طب كعد بالصاله وخلص النهار كله هو ضايج لليل طب للغرفة واني كاعدة انيم الجهال استغربت طبته صراحة بسام من يوم تزوجنه لليوم ما اشوفه بالغرفه نادر ما يعني بالشهر مره يجي ينام يمنه بالغرفه ومعاملته اليه كأنما صالح اخويه حيل جاف ويايه لدرجه حسيت عندي نقص بنفسي بسببه وبسبب اهماله اليه حتى الكلام الحلو يمكن كلمات معدوده سمعتهن منه ،
كعد شويه وطلع اني هم طلعت سويت عشه تعشينه وعمتي شافته بعده ضايج كالت .
_ تعال يمه عيني اذا هيج حاب هناك روح اجر واخذ جمانه وجهالك واكعد هناك انت وعائلتك .
بسام : اي وتردين اعوفج وحدج انتِ وطيبه مو
اريد افتهم ليش هيج تسوين بيه يمه ليش بس والله لتعضين اصبعج ندم واذكرج عود .
طيبه : والله يا بسام اله اذا انت تريد وعاجبك الدرب القديم .
متحمل بسام وضربها راشدي سد حلكها كامت تبجي وهو صاح وراها .
_ حلكج اشكه اذا ادخلتي بعد .
ام بسام: يااا بسام خطيه ليش هيج ضربتها ليش هيج يمه صدك جذب .
بسام : كافي يمه تره روحي طالعه كلولي وين اكضي وقتي ، اضوج والله ليش متحسون بيه كل هل فتره
جنت حابس نفسي بالبيت علمود مارجع الجماعتي لان اعرفهم شنو .
_ استهدي بالرحمن ابني .
_ كومي جمانه انطيني حبه راس وسويلي جاى بسرعه .
_ اي اي كايمه ... رحت سويتله جاي شرب ومر
اليوم علينه بالكوه خلص وراحو كلماً بفراشه كل واحد يفكر بمصلحته عمتي وطيبه وبسام واني كل همي جهالي وراحتهم وما بايدي شي اسوي غير اسكت لان ماعندي حكم على احد بيهم مر يوم والثاني وحسيت نفسي مو طبيعية وشكيت بنفسي حامل رحت العمتي كلتلها .
_ عمه عادي من ترجعين للبيت تجيبيلي اختبار حمل يمكن لان شاكه بنفسي حامل .
عمتي فرحت عبالك اول طفل الي وكالت .
_ يااا صدك ياريت عمه وتملين البيت عليه جهال
ويلعبون كبالي يوم الفرح هذا عليه .
جمانه : ماعرف شبيه خايف جاوبتها ، الله كريم
ان شاء لله وراحت عمتي فرحانه وكعدنه تريكنه اني وطيبه واجه بسام كعد وحجيتله اني شاكه بنفسي كال بلهفه .
بسام : يالله وتطلعيت صدك حامل ياريت والله .
جمانه : رديت متعجبه على رده فعلهم .
_ شنو محروم لو أول مره مو عندك نور وطارق .
_ أي واني اريد بعد وبعد اريد اتخلفين عشره شعندي شو اني وحدي اريد اخوان اليه سند ونيس بالبيت صح عندي ايهم بس مو قريب .
_ اي صح حقك الله كريم .
اجتي عمتي وسويت الاختبار وطلعت فعلا حامل والكل فرحان بس اني حسيت نفسي ستعجلت لان طارق عمره سنه وبعده يرضع على صدري بس بعد صار مابيدي شي
ومرت الايام __
بسام يطب ويطلع ضايج وزهكان وميتحاجه إلى أن فديوم اجه وكال .
بسام : اليوم اجاني واحد تعرفت عليه اصغر مني بسنه بكدج جمانه .
_ اي اشبي ؟
_ مابي شي بس خطيه متزوج وعنده طفل وماعنده
شغل ومشكلته يشرب واني كتله تعال اكعد ويايه بيع بانزين على الشارع اني اجيب بانزين وانت اكعد بمكاني وانطيك وهو كيف وهم كلت اريد انصحه بالكي يعوف الشرب ويتوب .
جمانه : يااا بسام انت تنصحه مروتك عوفه وكطع علاقتك بي اخاف يصير العكس وهو الي يرجعك تشرب .
بسام : لا شنو طفل كدامج ويرجعني اسكتي وسدي سالفه الشرب احسلج .
_ بسام عفيه بداعت جهالك عوفه والله اخاف يرجعك واني ماعولت تبطل ونعيش مثل الناس
فدوه احنه جهناله راح يزيدون ويردونك سند الهم .
_ اي ان شاء لله لتفكرين والله مارجع ابد .
_ أن شاء الله صدك مترجع .
رديت بخوف وقلق ابد ممرتاحه البسام هل مره
ذبيتها على الله ومر على حملي 3 اشهر واكفه اخبز اني وعمتي بالسطح واجه بسام عصبي يصيح وكال العمتي .
بسام : يمه البارحه جااااي عليه ووولد ليش طاردته
مو عيب تفشليني كدام الناس اصغير كدامج تره البيت احركه عليكم يمه لحد يدخل الف مره كلت .
ام بسام : كافي لتاخذنه بصوتك تعرف الولد منو وليش طردته ذاك نفسه صاحبك القديم الي جان يدور خمدات يمك .
جمانه : اني خفت من اصياحه وعصبيته لان صوته
حيل على فشار وغلط وعمتي شنو قصدت من كلامها هذا و ما كالت طارده احد خلوني بحيرة بقيت ساكته وعلت اصواتهم وبسام صوته يجيب التايه حتى أمه ميحترمها ماشوف غير يسحب بسام افراش الخبز ويشمره كله طشره وطار كل الخبز بالكاع وطارن اثنين على الحايط نعمه الله صارت بكل مكان بالبيت حطيت ايدي على كلبي وهو
نزل يرعد ويصيح بكل صوته .
بسام : اليوم البيت ااااااكسره وااااااااهجمه على روسكم شنو اني موووووو رجاااااال ماعندي كلمه هنا شو اااانتو بكيفككككم تتصرفون .
جمانه : متحملت منضر الخبز همست بخوف عزااا عمه هذا اشلون هيج يشمر النعمه هسه يصير بينه مصيبه دخيلك ربي .
_ اسكتي وعوفي لتحجين .
كامت عمتي لمت الخبز وبقت كرصه وحده ما لاحتها بعيد معلكه على واير الكهرباء عفناها ونزلنه نركض على صوت تكسر الجام الجوه باوعت عليه ممببقي حاجه بالبيت صاحيه مفلش الجام مال البيت كله وكف صاح بصوت عالي وطلع
_ ياااااا يمه هذا شبي .
نجنيت من الي سواه معقوله يسوي كل هذه علمود صديقه ، رحت ضميت الخبز ونضفت الكزاز وذبيته وبقه الشبابيك مفتحه بفضل بسام كملت وكعدت اني من الهبطه والخوف اخذت نور وطارق بحضني وطلعت بالباب كعدت كلبي معصور وضايجه من كلشي بحياتي صار شكول وشحجي ، صار المغرب
طبيت اصلي شويه و طب صاح .
_ وين السم سويتي لو لا .
جمانه : اي هسه اسوي .
_ استعجلي شويه .
_ بعد وكت لو متأخر بعد .
_ كافي حجي زايد ولي سوي عشه بلا لغوه لا اكوملج اشك حلكج .
_ ذبيت حسره ، و رحت سويت عشه وجبته اله تعشه وراح نام بوجها عمتي مقهوره على الجام
وصارت تحجي حقها تحجي لان محد يخسره غيرها
هيه نيمت الجهال ونمت ، كعدت على وجع ابطني قوي وطارق يضرب بيه برجله على بطني فزيت
من الوجع دفعته عني وكمت بس وجع قوي مينحمل رحت اخذت علاج مالت تقلصات مفاد
الوجع زاد وحسيت شي نزل عليه طبيت للحمام
لكيت نازل دم جسمي صار يرجف وزاد الوجع رحت
البسام خايفه وارجف كتله .
_ بسام وضعي تعبان وصار عندي نزف اخذني للمستشفى ماتحمل الوجع بعد .
من شافني صدك موجوعه نخبص وكال .
_ شكو شبيج ؟
_ مادري وجع عندي قوي كلش .
_ لبسي شي وامشي اخذج .
جمانه : رحت لبست وطلعنا صار بوجهنه صالح اخويه علمود سيارته لان هو يعوفها ابابنا اجه ويانه للمستشفى وطبيت الدكتوره كالت .
_ ماما انتِ مضروبه على بطنج وعندج اسقاط
و لازم كرداش هسه .
جمانه : كمت ابجي من الوجع صار عندي فضيع
كالت .
_ نامي .
_ وأول مفحصتني طلعت الطفل بايدها وكالت .
_ ليش هيج طالع الطفل من الرحم هذا هو شوفي ولد .
جمانه : المنضر يكزبر الجلد حيل نقهرت وكتله .
_ مادري والله معقولة لان ابني دفرني جان بحضني نايم .
_ احتمال بس لازم نسويلج كرداش حتى ميصير عندج مضاعفات .
جمانه : اخذوني وسوولي كرداش ومتت من الوجع
احس روحي تطلع يشتغلون بيه بلا رحمه كملو بدون بنج بس خلولي ابره مسكن لان مستشفى عام كملوني و طلعت كال .
_ ها جمانه بشري .
_ بجيت وكتله ، صار عندي اسقاط .
هو تخبل من سمع اسقاط .
بسام : جمانه شلون وكع وحده فهميني .
صالح : شنو شلون بسام مامقسوم الكم كول الحمدلله والله يعوضكم .
جمانه : رجعنه للبيت والطريق كله هو يحجي ومقهور ويلوم بيه طبيت للبيت فرشتلي طيبه وعمتي باالمحل متعرف بيه اجتي وسمعت بالخبر وكعدت تبجي وكالت .
ام بسام : ها ارتاحيت هسه بسام شفت ربك اشلون عاباك من شمرت الخبز بالكاع وكرصت الخبز بقت يومين معلكه بواير الكهرباء هيج احسن راح الطفل بسببك وبسبب طغيانك النعمه ربك .
بسام : و اني شنو شعليه اني يمه ليش تخليني اتخبل عليكم .
جمانه : رجعو يتعاركون هو وامه واني اتلوه من
الالم صاح عليه .
بسام : تعالي جمانه منو يكول مو انتِ نزلتي .
جمانه : حجيت بخوف هزيت راسي وكتله .
_ لا والله اشلون انزله اني .
حجه بعصبيه واصرار .
بسام : احلفي بالقران ممنتزلته انتِ .
جمانه : صبت دموعي هذا من كل عقله يحجي كتله .
_ اشبيك بسام انت تحجي صدك .
وكف كبالي وصاح من كل عقله مصدك اني الذبيته .
بسام : احجي ياله احلفي ماصدك بيج اني .
جمانه : والله العظيم والقران مامسويه شي اني وليش اكتل طفلي .
ام بسام : اسكت بسام وعوف البنيه لا تفر السالفه .
جمانه : والله عمه ممسويه شي .
ام بسام: مصدكتج عمه هاي ربج عابا انتِ معليج .
جمانه : بجيت بحركه وكلتلها.
_ عمه اني ما اكدر اسكت على اتهام بسام الي .
_ سكتي بنتي هو من حركت كلبه هيج حجه .
_ ليش اسكت عمه والله مادري شكلج فوك غلطه ابنج .
بقيت 4ايام بالفراش وتحسنت وكمت على حيلي
لان طارق صغير ويفتر بالبيت ومحد ورا وهم بقيته يرضع مافطمته .
ومرت الايام والاشهر __
وصار موعد عرس حمودي وراح بسام وكل معتاد بس هو يروح صدك كعدت وبجيت مقهوره هذا اخويه شلون ماحضر عرسه ومرت الايام وحياتنه ماشيه بروده مثل الثلج اكلنه طبخنه نضفنه نمنه وخلص النهار وبسام حيل تغير بعد ما شالو بيت خالتي حيل وصار يتأخر لنص الليل ياله يجي ومن اساله يكلي ضوجه وين اروح يم جماعتي بس منو ماعرفت القدماء جددد مادري بس كلبي خايف وما مرتاحه من عمتي تعاركت ويا وطردت صديقه شكيت هذا صديقه مو راحه بس مابيدي شي اسوي لان بسام لا يتناقش ولا يتحاجه ابد كل نهار معصب
إلى أن ......
هلو متابعيني شلونكم اخباركم تعالو نتناقش وكلولي شنو وينكم شو مختفين ليش يمعودات اذا انتو رحتو منو يحمسني للكتابه بعد هههههه
