رواية بنت الشيخ الفصل الرابع عشر بقلم ندي
طبيت لبيت عمي وانه سرحانه.. احس رجيله وحدهن يمشن .. فقدت امشي مادري بروحي.. طبيت للمطبخ شفت مجيده رزلتني وظلت تحجي عليه مااهتميت.. انه البيه كافيني.. كعدت بوحده من الغرف مال بيت عمي.. حته مااذكر ياوحده.. غرفه وبيهه نسوان كاعده وكبل...
ظل بالي يمه.. هو نفسه الشفته بحديقه اهلي.. اي هو نفسه... احس نفسي گام يضيك.. اتذكر هو خطب كبل مده واحس دمعتي راح تنزل.. كوه كضيت روحي.. تمنيت ارجع لاهلي حته اطب غريفتي وابجي براحتي..
افكر بضحكته اليه؟ زين ليش ظل يعاين عليه؟ زين ليش من شافني ظل يرمي صلي؟ يربي تعبت ماريد صدمه اخره.. هيج كلت وي روحي.. كافي الصار بيه من ياسر وضيمه... بس هذا مو مثل ياسر.. من اشوفه احس جسمي يرعش ويكزبر..
صبو العشه للنسوان وطاحن بالصواني اله شويه.. انه مااكلت وحته الماي مااكدر اشربنه.. وبلعومي يابس....تلعب روحي ومخنوگه...
خلص العشه وبيهن نسوان مشن.. احنه ظلينه.. نسوان اخوتي يردن يظلن يعاونن چناينهن.. بس همزين امي كالت انه بعد مابيه اريد اردن.. وصدك ودينه واحد من الفروخ واجانه مجيد..
من طلعنه عاينت ردت اشوفنه بعد ماشفته.. يمكن بلمضيف كاعد ويمكن راح..
طول الدرب امي ومجيد يسولفون وانه فاصله منهم كلش:.. حته مااذكر بشني چنت افكر.. صافنه وبس..
وصلنه لبيت اهلي والبيت وحشه وفارغ وانه جايه منا مخنوكه... صعدت لغرفتي بدلت ثوبي مال العرس وحطيت راسي ع المخده اعاين بالسكف وابچي.. حسيت عيوني ورمت وكامت تحركني ع كثر البچي..
تالي لفيت راسي ونمت.. بچي وبچيت بعد ماعدي شي..
كعدت ثاني يوم كلش متأخره.. لكيت ابوي يتغده... ويسولف وي امي.. انه كلت خل اكعد يمهم بلكت اسمع شي ع هذا الشفته بلحديقه واعرفنه هذا الشيخ وهو عناد لو غيره؟
ابوي:لا شني .. شعليهه تهمين! انه اليوم امرن عليهم واوصيهم بيهه.
امي:اي خويه.. خوفهم حته يحترمونهه..
ابوي نتر بامي:ولج جا هي وين يم غربه! غير بيت يدهه وعمامهه!
امي:شسوي گلبي يخفج(يخفق) عليهه..
-ع غاده يمه؟
امي:اي.. اخافن عليهه..
ابوي:امج تحجي وحدهي! بويه صبيلي چاي!
-صار بويه..
ظلت بكلبي ياهسه يسولف ياهسه ماكو... بعدين اجه مجيد.. هم رادچاي صبيتله...
مجيد:بويه عذاب يسلم عليك...
ابوي:الله يسلمه.. چا هو ليش مااجه للعرس! انه موعزمته..
محيد اخذله رشفه چاي وجرهه جر بعدين كال:بويه يكول صار عده شغل.
ابوي:خله يولي! مو ذاك هل عناد! عاف شغله واجاني!
مجيد:بس مااكصر ابو فاطمه البارحه.. حرك الجو حرك!
ابوي:چا لو ما هو مااخلي احد يرمي الله وكيلك!
انه هنا گلبي گام يدك بسرعه... احس روحي صخنت.. خفت لا يبين ع وجهي ههه...
مجيد:بويه اظنك تحب عناد حته اكثر من عدنه!
ابوي:خايب شلك بهل حجي! بس هو الصدك عدي مثلكم.. ابو الله يرحمه صويحبي كلش..
امي:خويه چا هي كلهه الناس سوه! مو هل تكول عاف شغله واجاك! وذاك عذاب كاعد بديوانيته تلكاه ومااجاك..
ابوي:عذاب مسموم! حته فرج وجابر كلهم اجو ومحد تعذر مني!
امي:خله يولي! انه حته اكرهنه ومااريده يطب لديوانيتك..
مجيد:لا خطيه يجوز عده شغل..
ظلو يحجون بعذاب وانه اتمناهم يجيبون طاري عناااد.. اي طلع نفسه هو عناد.. محد چان يرمي غيره.. وهو نفسه الشفته.. ومجيد كال علي حرك الجو حرك يعني هو... ويلي ياگلبي شلون بيك..
هسه هو زلمه ماخذ انه شبيه! بس گلبي سرسري.. تغديت وهو ريوك وهو غده.. للعصر امي راحت وي ابوي ع غاده واخذتلهه صوغه...
ونوب اخوتي اجو كالو معزومين يم بيت عمي.. رادوني اروح وياهم مارضيت..
راحو وظليت بالبيت وحدي.. افتريت لحد مامليت... نظفت شويه مليت وعفته.. غسلت ملابس شويه ومليت.. شكو شي اعوفه ع النص.. مااشتهيت عشه.. صعدت غرفتي وردت انام شو خفت وحدي.. بعدين مدري شلون نمت ...
گعدت الصبح.. اباوع ع كل شي يمي بتعب.. مابيه اشيلن روحي واكومن..
سمعت هوسه الفروخ عرفت بنسوان اخوتي جايات...
ظليت اتگلب بفراشي ..شويه وكمت.. اكلتلي لفه جبن وجاي.. وظليت كاعده بالهول رجل ع رجل واعاين ع الرايح والراد...
خلص اليوم ملل كلش وطاكه روحي.. حته النفس كوه يصعد بيه..
مرت ايام وبيت عمي هم سوو عزيمه چبيره وودو علينه.. رحت بس مامرتاحه.. مامستقره.. حته ماكو احد اكعد واسولف ويا...
كلش تمنيت اروحن يم امي صبريه.. طگ گلبي عليهه.. اريد احچيلهه شصار وياي.. اريد احط راسي ع رجلهه وابچي .. اريد اسمع حچاياتهه التطيب جروحي..
بس ياهو الياخذني.. كلهه ملتهيه عزايم..وطلعات..وشغل وانه وحيدي..
راح اصيرن 27 سنه.. ولهسه بلا زواج.. اريدن فرخ من لحمي ودمي.. حته لو اعرس ع گد الخلفه ويعوفني هم ميخالف.. عاد من اموتن ابني بزر بطني يشيل نعشي ويبچي عليه.. ادري اخوتي مايقصرون .. بس هم يوم يومين ينسوني..
وهم مرت ايام وكل شي ماكو.. حته ضحكتي انمحت من وجهي.. من يوم الشفت بي عناد.. مدري شصارلي.. تكسفت احوالي.. نسيت حته جرحي من خطبتي الفاشله ونسيت حته شوگي لايام الخطبه السوده..
كعدت بيوم من الايام.. مثل كل مره.. اكعد للضحى.. نزلت لكيت امي مخبوصه وتروح منا وترد منا.. نسوان اخوتي هم مخبوصات ويبسبسن بينهن.. مااهتميت ..حته مابيه حيل انشد شعدهم...
كعدت بالمطبخ وحاطه صينتي واتريك.. شو امي تروح وترد تعاين عليه
تالي حطت ايدهه حدر (جوه) حنچهه ونوب تخوصرت كبالي..
خفت عبالي شو شبيهه لو عدهه وجع..
-هاي يمه شبيچ؟
امي:مابيه..
-چا ليش هيچ وجهج مخطوف وتفترين يمي؟
امي:اجوج خطابه..
انه فتحت عيني ع وسعهن.. عبالي جذب.. عبالي ماسمعت وانه من كد ماافكر بخطبه هيج خيلي.. ظليت صافنه.. انه كلت بداخلي لازم لو مخبل جايني لو شايب..
امي:شبيچ؟ شو صفنتي؟
-لا يمه ..هيچ وحدي..
امي:تدرين ياهو اليمنه؟
-شدراني يمه؟ شني ضيف مهم هذا الخاطب؟ كلتهه باستهزاء وخليت استكان الچاب بحلگي اشرب..
امي:شيخ البو... من سمعت الاسم جمدت..اريد ابلع البحلكي ماكو.. نوب ردت امي كملتهه گالت عناد!!!
انه هنا بغير ماادري شرگت بالچاي واحس راح لريتي(رئة) ظليت اكحن.. مليحة ادك ع ظهري وامي صبتلي ماي وجابته..
اوكفو اوكفو! انه بحلم لو علم؟ خاف متوهمين؟ خاف مو لعناد لواحد من اخوته؟؟؟ كل هااي الاسئله براسي ومااكدر انشد.. احس حلكي تخيط ومنا نفسي انكطع من الگحه..
امي:شبيچ يمن بلابوش! (غلطه بس مااعرف شنو معناهه المهم هي تضحك 😂😂) ردت كملت:يمن دهر! چا هاي من تاخذ عناد يبطل من الشيخه! هو شماله اجه ع هاي المخبله!
مليحة:هههه عمه شلچ عدهه..
امي:انه خايفه تفشلنه وي الزلمه!
فليحة بنتر وچنهه ماراضيه:هسه من يكول تصير.. يجوز مثل ياسر والگبله!
امي بيدهه كلاص ماي كامت ورشتهه ماي.. يكولون الماي يبطل الفال المزين .. امي رايده هذا الزواج يعني هههه...
ظليت جامده بمكاني.. مامصدكه.. لحد ماطب ابوي علينه للمطبخ.. وجهه يضحك واول مره اشوفنه هيچ مكيف .. يريد يضحك ويسولف ومستحي... يعاين علي بخطف وطرف عينه خاف اشوفنه..
امي:ها خويه مشه؟
ابوي تنحنح وكال:اي ..مشو..
امي:وشني حمامه غراب؟
ابوي:حمامه وبيضه هم..
يمه انه وجهي صار دم! بيه ضحكه وفرحه هاكبرها.. مال سنين.. مال لوعه ايام.. مال صدمات وجروح.. هاي الضحكه الاقصده.. من يجي خبر ينسي الواحد كل هذني!
زين شجابه علي؟ وهو مو خطب واظنه عرس؟ چا شني يريدني ع شرچ
ظليت مستحيه انشد.. صعدت غرفتي وبودي اشيل البيت باثنين اديه من الفرحه!
وصدك ماچذبتني عيوني..چنه حچالي اياهه كبل بعيونه .. يكلي اريدنچ ..زين هيچ حظي يسويهه واتم هلمره من صدك؟
طول اليوم مانزلت.. استحي.. وخايفه.. وهم متانيه بلكت امي تجي تسولفلي علي.. بلكت اعرف ليش يريد ياخذ ع مرته؟ وهي مرته راضيه لا؟
والله صدك وتصعدلي امي.. ونوب چفتتنه مجيده... مدري شوكت اجت؟ نوب هي ماتجي يمنه چي بطنهه جبير بس هل مره شو اجت.. لازم سالفه چايده..
عدلت كعدتي من طبت امي.. اجت هي كعدت ع چربايتي..
امي:ع كيفج راح اطيرين من الفرحه؟! مانزلتي تغديتي اكلتي؟
-ها.. لايمه مااشتهي..
امي:اي طاري العرس هذ..
وطبت علينه مجيده...
حاببتنه وكعدت..
مجيده:يمه صدك هذا الكلتي بتلفون؟ شوكت ووين شافهه؟! وشمدري عدنه بت حگ الزواج؟
انه بگلبي اگلها اسكتي ياعدوة الاسلام والمسلمين هههه..
امي:اندري؟! گايل لابوچ نشدت ودلوني..
مجيده:وابوي رضه؟
امي:اي يمه.. وهاي اختچ يمچ .. انه خابرتج تحاچينهه وتعلمينهه والماخذته مو ياسر وگومه! شيخ هذا شيخ!
مجيده:يمه وتطونه؟؟
امي:اي چا ليش؟ وين تلگه احسن من هيچ بعد.. وهو رابي جدام عين ابوچ
مجيده:هاا.. اي خوش .. احسن ماتظل هيچ..
امي:يله انه اروحن.. وانتي علميهه.. مو تظل تجفص وين ماچان!
مجيده:اي يمه روحي..
طلعت امي وخلتنه انه ومجيده.. مستحيه كلششش.. هي صح اختي بس بينه هواي حدود.. هي چبيره ومثل امي نحترمهه.. هو صح مابينه ذاك الفرق بس الزواج والخلفه الهه حگهه كبرتهه..
مجيده:ولج صدك وتصير؟ نذر لوجه الله اذبح طلي ابيتي!
انه مدنگه وسكته..
مجيده:اكلج.. شوفي.. صيري مثل امي.. شفتي امي حملت ابوي سنين ومنين..صبوره.. حچايتهه رزنه! ماتجادل! شيكلهه تگل تدلل وامر.. هاي المره الزينه.. بيچ وما تسعدينه.. اذا شفتي ضايج واسي.. اذا بطه عليج خابري.. حسسي انتي وياه بكل خطوه.. كلبج ع كلبه.. اليصير ابيتهم لا تسولفينه هنا ولا يم اي احد.. هذا شيخ ..وتشوفين كلشي يمر علي واشكال اصير ابيته! سره سرج.. وحجايته حجايتج! مالج شغل بناس كلها عليج هو وبس...
ظلت تنصحني وانه اسجلهن بمخي بس بگلبي اكولن شلون اسوي هذن كلهن؟!
-اكلج مجيده؟
مجيده:كولي لا تستحين؟ شعدج كولي انشدي اطلبي! انتي حگج شما سويتي وكلتي محد يلومج!
-هو مو ماخذ مره؟ ليش اجاني؟ ومرته راضيه يو لا؟؟
مجيده:شنهي؟ منين ماخذ وياهي وشوكت؟!
-اندري.. بس هو غير مره اخذ ابوي حته يخطب بت عمه؟!
مجيده:هههههه وي دهر الفرج طيحتي گلبي.. كلت تظلين بايره ولا تاخذين ع شرچ..
ظليت اعاين عليهه وساكته اريدهه تجاوب.. وهي اطلع الكلب من صفحته يله تجاوب..
-هسه شني مافهمت..؟
مجيده:خايبه غير راح ويا ابوي وعود خطبه وهله يالله!
-اييي؟؟!!
مجيده:طبو لبيت عمهم وكاعدين مثل كل ناس خطابه.. وعمه مضيفهم بس
يكول ابوي مو هلكد يحچي وي عناد..
-اي ؟؟؟
مجيده:محاچي ابوي وهاي.. عمهم متسودن.. يكول شني اطي بتي؟ انه من شوكت طبت ويا واطي بتي..
اييي؟؟
مجيده:خايبه وحمسي.. مااطه بته.. وابوي زعل ع عمهم فرد نوب.. كال انه سويته راس ورحتله ..وانه قدرته وماقدرني.. ابوي بيومهه كام يشيل روحه ويدكه بالكاع.. حته اجه يمنه غاد شايط.. بس انتي وين تدرين بكل هذا غير چان ذاك المايع ماخذ وكتج..
صدك فرحت بداخلي.. حته الحچي طار مني .. مرات واحد من كد مايسمع خبر يفرحه ينسه شلون يحرك لسانه ويحچي..
ظلت مجيده اسولفلي ع روحة ابوي لعم عناد وشلون ماقدرهم وهو واحد مو خوش وعناد خطيه انكسر خاطره وتفشل كدام ابوي .. شرحتلي القصه من اولها.. افتهمت عم عناد انه رجال كلش طاكات عده.. من يوم العناد اخذ الشيخه هو طبگن عده وما عاد يميز.. حرگ الاخضر واليابس.. وگطع كل علاقته بعناد واهله.. وحچتلي انه عناد هو چبير اخوته وعده 3 خوان واخيات خمسه.. وخمستهن ماخذات وهنه الكبار..امهم عايشه..
وعناد عده ثلث فروخ من مرته الله يرحمهه.. فاطمه وقباءواحمد..
چبيرتهم فاطمه.. هي بسادس ابتدائي.. والاصغر منهه قباء صف رابع والاصغر احمد اول ابتدائي...
من تحچيلي مجيده عليهم انه بداخلي اكولن احطهم بعيوني.. معزتهم من معزة ابوهم ... هههههه عشگ من اول دبه غاز هههه..
ظليت ايام مفرفحه .. مادري شوكت تجيني امه.. لو خواته.. ظليت اذكر كل شي بي.. كل حركه منه شفتهه عيونه شمرة حواجبه سكسوكته والساعه والمحبس من شفته بيهن بحديقتنه.. سبحان الخالقه والمعدله هيچ تعدل.. لو اعد الوكت الشفته بي يجوز يطلع اقل من خمس دقايق.. من يوم حديقتنه لعرس غاده...
نوب مجيده كالتلي انه يجي لابوي هواي وكلش يعزه.. يعني هواي مرات هو ابيتنه وانه ماادري.. ول حظ من حظي لو ادري چا سويتلي حجه وطلعت ههههه..
ماانكر واكولن ماخفت من طولو ماجوني اهله ولا جاب طاري يم ابوي بعد.. من يوم الگاله عليه ... خفت لاهم حظي يطلعلي صفح.. و خفت كرايبي يخربونهه .. خفت خاف يبطل مني هو.. خفت لا يوصله خبر عن ياسر والخطبه الطولت والطبه والطلعه....ظليت من صفحه اهمن خاف ماتصير ومن صفحه اذكر شكله كل شي بيه يذوب.. احس روحي تنسحن سحن.. حته اكوم مااكدر اشيل الشي البيدي من اذكره.. دهر دهرني مدري شلون طاوعتني اديه بذاك اليوم وشلت دبه الغاز ومشيت ما صار بيه شي ههههه..
بس لا انه بوكتهه صدگ عجبني بس مامثل هسه حبيته..
ظليت انه يوميه ع امل يجون.. يوميه اسبح واعدل روحي والبس احسن ثيابي واتعطر واتكشخ... بس مايجون.. لحد ما بيوم ماسبحت ولا مشطت كفشتي وعطوبي طالعه منا ومنا وثوبي مال شغل لابسته طبت مره وراهه اثنين نسوان.. انه وحدي بلمطبخ.. ظليت اعاين بوجوهن.. يربي شسوي اشرد؟ اسلم عليهن واطببهن؟
تالي هي المره الجبيره سلمت علي.. باوعتلي بنظره راضيه وتضحك.. كالت انتي حليمه؟ كتلها اي.. رجعت حبتني مره اخره.. نوب الوراهه سلمن عليه وطببتهن للهول وانه ميته من المستحه .. حته من حاببتهن احس وجوهن ثلج وانه وجهي نار ... رجعت للمطبخ استحي اصعد لغرفتي چي يشوفني اذا ردت اصعد.. ظليت اروحن منا واردن منا...
نوب اجتني مليحة..
مليحة وهي مخبوصه اكثر مني:دهر لفاج.. خايبه روحي عدلي كفشتج وحطي ريحه ونزلي..
-وج استحي!!
مليحة:تعاي نمشي انه وياج.. امج ودتني عليج..
-هاا؟
مليحة:اي بسدي ماخليج تبينين...
مشت مليحه وانه مجلبه بيهه.. سوتلهه سالفه وياهن وطگت ع ايدي خفيف عود روحي معليج.. صعدت للغرفه.. اعاين ع روحي؟ يربي شسوي حته ارضيهن ويحبني؟ شخلي وشحط؟ بللت راسي شويه بماي ومشطت وخليت عطر وذبيت ثوبي لبست غيره وخليت شال ع راسي وكعدت.. ظليت اهز برجلي واطرافي ثلج غدت (صارت) وگلبي يدگ بسرعه...ردت نوب اجتني مليحه..
مليحه:يله وج انزلي المره متانيتج؟!
-وج خاف ماتحبني؟!
مليحه:وليييييه؟! وتالي وياج! نزلي المره حته الحلقه جايبتهه وياهه...
يمه گلبي فز من مكانه من جابت طاري الحلقه.. نزلت مليحه وانه وراهه..
ام عناد طبطبت ع التخم ع كيف عود تعاي اكعدي يمي...
رحت كعدت يمهه ودنكت راسي.. اتمنه بسرعه اخلص من هاي السالفه ..
ام عناد:ياام مجيد.. الزلم گضو شغلتهم.. واحنه علينه نصفك ونفرح مو؟
امي:اي خيه ماحچيتي اله الصحيح..
ام عناد:ابو احمد الله يسلمه ويطول بعمره مارايد السالفه اتعطل.. احنه انشاء الله هل سبوعين چنتنه يمنه..
امي:خيه گبعي واخذي.. اتشرف بيكم وبابنكم..
ام عناد:والله يخيه احنه نتشرف بيكم.. وكفات ابو مجيد ماتنسي وي عناد! لو ما هو ماوكف ع حيله بعد موتت ابو من عمت عيني علي..
امي:افه.. چا هو ابو مجيد عده عناد مثل اولاده.. والله هم اعز يمكن..
ام عناد:بس اريدن چنينتي تعذرني.. احنه مانسوي عرس.. لا هوسه ولا طكطكه.. احترام للمرحومه ام احمد..
امي:زينه العگل! ونعم ماتسوون!
ام عناد:الله يسلمچ .. يله يمه ابتهال! شو طلعي الذهبات خل البسهه؟!
ابتهال اخت عناد:اي يمه .. جابت جنطتهه وكعدت بصف امهه.. فتحت الجنطه وكامت تحيب وتاونش امهه.. وامهه ترد تلبسني.. حطت بيدي الحلقه وهلهلن .. مامصدكه روحي؟! هاي الهلاهل الي؟ ولخطبتي من عناد؟ ظليت ادعي يربي كون اتم وماتخرب مثل كل مره..
حطت بيدي ست بتوت ومعاضد وكلادتين وتراجي لبستني ونزلت ابتهال بالكاع ورفعت دشداشتي شويه انه كبل كزيت وغطيت روحي..
ابتهال:لا حبيبتي لا تخافين.. هذن حجولج تلبسيهن.. هاي تقاليدنه. ذن مالات امي ومرت الشيخ لازم تلبسهن من بعدهه..
ام عناد تعاين لامي:خيه شفتي ذهبنه كبل؟ چا مثل هسه كله تنكات! هذني حجيلاتي ابو عناد الله يرحمه جابهن الي من الكويت گبل.. وانه حالفه مااحطهن بس برجل مريه عناد..
امي:يووو خيه .. يشترن وانه اعيب علي.. خيه وين ذاك الاولي.. هو حته الاكل اختلف علينه.. لا طعم ولاريحه ولالون..
امي وام عناد يسولفن.. وانه تحملت ذهب تحمل.. حته الحجل بالرجلي احسن بي كيلو.. ظليت كاعده يمهن ومدنكه وهنه يسولفن... عرفت المره الاخره وياهن مرت جهاد اخو عناد الاصغر منه.. ماخذ وعده اثنين فريخات بس ماعايشين وياهم... كملن سوالف ونسن الخطبه يمكن وظلن وحده تخبن ع الاخره هههه بسوالف كبل وجان عدي وزمان كبل غير وهسه كله مابي طغم ويوووو.. انه بكلبي اكلهن دسولفن ع عناد ..
اخذلهن مشوار نوب راحن.. ام عناد حببتني كبل لا تروح ورفعت راسي..
ام عناد واحسهه تعاين علي حيل:رفعي راسج! مرت عناد انتي ..
انه شلت راسي وابتسمت.. هي فرحه وهي بسمه خجلانه..
طلعن من يمنه وانه كبل طرت لغرفتي.. ظليت اخرشخش بديه واعاين ع الحلقه واضحك.. وكل شوي ينخمش كلبي وارجع ادعي ربي كون ماتخرب شكد دعيت؟ ايام وليالي وساعات ودقايق.. كل مااتفطن ادعي .. ياربي لا تفشلني كافي الصار بيه كدام اخوتي .. كافي جرح وهضيمه.. صدگ چنت ادعي بحرگه ومن كل گلبي.. اريدن يجمعني بي بالخلال بأگرب وكت ولا يخليني اتعذب اكثر..
وصدگ لو گالو وعد الحر دين برگبته.. عناد من اطه حچايه انتهت بعد.. اجتني امه وره مده وجايبه وياهه فلوس وكالت ماردنه نجيب نيشان انتي بذوقجً اشتري.. عاد انه الثوله يمته ادبرهه.. دكيت من تلفون امي ع سميره وسولفتلهه كل شي وترجيتهه تجيني بس مارضت كالت اله اخوتي يرضون اجي يله خاف اجي ونتعارك.. خليت فليحة ومليحة يحاچن اخوتي حته تجينه سميره... وصدك كالو علمود حلومه خل تجي ماعدنه شي وياهه..
واجتنه سميره وطرنه بيهه من الفرح.. هي خطيه كلبتهه مناحه علينه وليش ما تنشدون عليه وانه اشتاكلكم وانتم ماتسحون بيه وانه شعدي غيركم كطعتو بيه.. خطيه ماسكتت اله لمن حباهه ابوي من راسهه واطاهه ضبه مال فليسات يله ههههه...
تولمنه ورحنه العصر للسوك.. اتسوك لروحي ومامصدكه.. چن مو الي ماخليت شي يعتب عليه.. شتكلي سميره اشتري اشتريه... جابتلي غسولات ومعطرات وحمر وكحل ومكياجات تخبل.. نوب اختارتلي الملابس.. كله خليجي اشترتلي وچم قطعه خياط وچم ثوب عاديات.. واخذتلي سيتات نوم انه استحيت من ابو المحل من هي اشترتهن خليت وتكترت ع صفحه ههه
ردينه انه وامي وسميره محملين تحمل..
وكل هذا وبعدنه مامخلصين مسواكنه.. بعدلي هواي شغلات...
ثاني يوم هم رحنه للسوك وراحت ويانه مجيده.. اول مره احس الناس كلهه راضيه وفرحانه بخطبتي .. چي الزلمه عجبهم مو حي الله واحد.. حته اخوتي فرحانين.. ودولي فلوس بيد نسوانهم خاف احتاجن شي...
والله ماكو ثاني اسبوع كالو هذا الخميس ناخذ حلومه... انه گلبي يرجف والمده كلهه اكلي مدري شني ماشني نومتي هم مامرتاحه بيهه وخايفه حته تغيرت وخواتي حچن عليه.. نوب كالو بيت عناد مايردون حفله.. بس اذا تريد خل تسوي حنه عادي... عاد سميره وماقصرت... ونوب غاده... ههههه ردت المعروف لخالتهه... سولي حنه تخبل... بس شني بيناتنه.. انه ونسوان اخوتي وامهن وخواتي وامي... مامصدكه .. بس ليله وحده.. واروحن لبيته.. يصير اسمي ع اسمه... الصبح اتصبح بوجهه... بليل اشوفنه هو اخر واحد... اغسل هدومه واعطرهن... اشيل بيتهم شيل بالشغل.. امه احطهه ع راسي...يبووو شكد امنيات مخليتهه من اروحلهم اسويهه... ظليت بليلتهه احفن وانظف بجسمي هلسته هلس هههههه
كعدت يوم العرس... خايفه مخطوف لوني.. اخاف بهاي الساعات يصير شي وتخرب قسمتي مثل ماخربت كبل... امي حچت عليه وسوتلي صينيه اكل وحطتهه كدامي كالت كلهه خلصيهه... هل حجي شني احنه يومين هوسه بيتنه... خواتي وفروخهن.. ونسوان اخوتي وفروخهن... ونوب هم اجن خوات فلحة وملحة شويه وراحن....
للظهر ظلن وحده تعاين ع الاخره ياهي التاخذني للصالون... انه كتلهم اريدن غاده وسميره... وصدك اخذتهن وياي وهنه يوصفن لم الصالون وهي تشتغل... عدلت حاجبي ونظفت وجهي.. بعدين بلشت صبغ وتبياض وسميره وغاده ع راسهه .... ماردت اشوفن روحي اله لمن البس البدله... جابنهه غاده وسميره ...ماردت اروحن وياهن... حبيت اشوفهه عليه كبل بس من راحن وصيتهن مايجيبنهه حيل منفوش ومدلعه.. وصدك جابنهه فيت عليه مامنفوشه حيل وتشبه لفساتين مال ذن اليرحن وي العروس.. انه سامعه بيهن بس ماشايفتهن الصدك ههه...من لبستهه وكملت وطلعت شفت روحي.. اله شويه بچيت... خنگتي عبره احسهه سدت بلعومي سدت... وماريد ابچي اخافن ع مكياجي.. ايام وسنين انه متانيه هاي اللحظه...دكت علينه مجيده من البيت.. كالت نجيجن لو بعد... كالتلهه سميره اي كملنه.. انه احس رجليه بادت...كعدت ع كرسي بالصالون متانيه رجل مجيده هو جاينه
اجه رجل مجيده ..غطن راسي وطلعني.. كاضاتني من زندي يدلني ع الدرب انه مااشوفن شي... وصلت للبيت.. امي هي تلگتني... عاينت بوجهي وطگتهه ضحكه نوب هلهلت بحس ناصي.. انه من الخجل گلبي ورث هههه
ظليت كاعده بغرفه امي.. كل شوي اشيلن راسي اعاين ع الساعه... احسهه كامت ماتمشي .. كل ماارفع راسي الكاهه نفس الوكت..
بده الخوف يزيد عدي.. بداخلي اكولن كلش بطو عليه.. يجوز بطل؟ يجوز صار عدهم شي؟ ظليت فكره تجيبني وفكره توديني...
نسوان اخوتي وخواتي هلهلن وصفكن كدامي شويه.. هو احنه ماعدنه مره تعرس نصفكلهه ..بس انه چي كلش بطيت وظليت بلايه عرس..
من القلق الاكل گلبي گمت مااسمع الاصوات اليمي.. يحچن ويسولفن وانه كاعده ع نار... اخر لحظات بچيت اله شويه.. احساسي يگلي بعد ماكو عرس وخرب كل شي عليچ يحليمه...
شويه ومااشوف بس الفروخ طبت علينه اتراكض... اجو اجو ... يمه انه احس رجع الدم يمشي بيه.. صخنت وگلبي كام يدك بسرعه...
تمنيت هو يجي يزفني.. بس ماصارت.. طبن امه واخته ومرت اخو ووياهن بعد نسوان.. هلهلن شويه وصفكن.. نوب كادتني الحجيه من ايدي للحوش.. هي الصعدتني بيدهه ..ومشت السياره مسافه.. موطويله.. ويمكن انه ماحسيت بيهه من الخوف والرهبه...
وكفت السياره ونزلتني الحجيه.. انه بس اشوفن الكاع الجواي.. مااشوفن الگبالي.. شفت رجلين زلم.. ونسوان... طليان هواي تذبحت حدر رجلي والدم ترس الحوش ترس... طبيت جوه واسمع اصوات نسوان وصلوات ع محمد ونورتي بيت الشيخ ومن هل حجي.. بس شني لا صفكه ولا هلهوله
طببني بغرفه... كعدت ع جربايه.. شالن البركع من وجهي وعاينت داير مدايري.. غرفة بگد ديوانيه ابوي يمكن.. اثاث يخبل شايفه منه ببيوت المسلسلات الخليجية.. كل شي بلون ابيض ومذهب.. جربايه وسيعه والتاج مالهه يخبل.. كنتور ملوكي.. فرشه ع طول المساحه الفارغه بنص الغرفه حته بيهه نص تخم هم.... عاينت ادور ع السگف شفت ثريه بنص السگف ضخمه وچبيره وضواهه يشع ويخبل....
سميره هي الاجت وياي.. محد غيرهه اجت.. ظلت كاعده يمي وانه مثل الطير المذبوح لانه بسمه ولانه بگاع... سفطت غراضي الجبتهن بلكنتور وحطت العطورات والبوطرات ومكياج ع ميز المرايه... اخر لحظات علمتني... كالت لا تصدينه! وخلي براحته... من تكملين اغسلي والبسي الثوب الابيض الخليجي... وصتني هواي ونصهن مثل وصايه مجيده اليه
شوي وطبت علينه ام الشيخ الحجيه... لابسه هاشمي وذابه العباة...
الحجيه:يمه غطيهه راح يجي المومن (شيخ الدين )يعقدلهم..
كبل سميره حطت البركع ع راسي وتناوشت عباتي من الكنتور وغطتني بيهه.. وي حطتهه للعباه ع جسمي انه رجفت .. چن مثل واحد توه كاعد من النوم وطاح مي بارد علي.. هيچ حسيت...
نزلت كعدت بالكاع ع فراش مخلينه... سميره هم لبست عباتهه وكعدت وام الشيخ ردت علينه لابسه عباة ... شويه واسمع فتحه الباب ووياهه صوت زلم ياالله يالله... الللهم صل ع محمد... ياالله
الحجية:يا هله ومرحب.. تفضلو تفضلو..
صوت زلمتين ...واحد سلم والاخر ظل يصلي ع محمد ويكول يالله...
رديت السلام بس شني الحس مالي ماينسمع... حته انه الحچيت ماسمعت روحي... حسيت بس شفايفي تحركت...ماكو صوت...
احس بيهم كعدو يمنه... الشيخ بده يقره ايات واحاديث النبي وسولف وي الحجيه شويه.. انه گلبي صار طبل ... كلت يمكن راح يوكف كلبي وذول كاعدين مرتاحين وانه راح انجلط... شويه والشيخ ردد العقد ع عناد... من سمعته نطق الموافقه (احس روحي تهشمت... شلون واحد چان ملموم وتطشر... حسهه ياخذ الروح...چنت كبل اشوفنه بس ماسامعه حسه ومن طب علينه صوت من سلم ماهلكد واضح.. بس من حچه بالعقد چان گريب مني وكلش واضح ...
رد المومن عليه النوب ونشدني .. انه لو ما موصياتني مااكولن من اول مره اي چا طفرت عليه وكتله ارضه والله ارضه ههههه... ثاني مره ردده وانه رضيت... يافرحتي الماتنوصف بذيچ الساعه...
بارك النه المومن ووصاني ع الشيخ وع ام الشيخ والعشره الطيبه والمعامله الحسنه.. وحچي الشيوخ مال دين بعد..
وهم وصه عناد بيه ونوب طلع... راح ويا عناد.. الحجية كبل ذبت العباه والبركع مني وهلهلت بوجهي ع كيف.. دعت دعاء شطوله.. حته نسيت شني دعاءهه.. بس هو تريد الله يوفقنه ههههه...
سميره طلعت وخلتني.. ظليت وحيدي.. شوي وانفتح الباب ... خفت مادرت وجهي.. استحي اشوفنه واحط عيني بعينه...
ظليت كاعده بمكاني بلكاع .. باوعت ع يميني اشوفن الدشداشه بيضه وفوكهه عباه سوده.. ردت ارفع راسي اكثر واشوفن بس مااكدر...
شفته ثنه ركبه وكعد ع طروف اصابعه... مد ايده دار وجهي علي.. شفته وانه مادري شصار بيه.. رجفه سرت بجسمي كله..
عناد وهو يبتسم والاحلى مابي عيونه من يضحكن وحدهن:الله بلخير؟!
-الله بلخير..
مدالي ايده .. ترددت اطي ايدي.. مدري شصار بيه.. عاينت بعيونه بيهن نظره مال يله اطيني ايدج.. اطيته ايدي.. كومني وصار طول بطول وياي
باوع عليه من فوك ليجوه...
انه شويه اعاين وشويه استحي وارد ادنك..
عناد:نورتي بيتچ يابنت الاجاويد...
كضاني من ذرعاني اثنينهن وگربني اله شويه.. حب ع راسي.. وصارت چنهه مو لحظه سنه... نوب ابتعد مني خطوتين.. نزع عباته ورد حطهه ع چتافي...
عناد:متوضيه؟
هزيت راسي وبحس ناصي كلت:اي
هو راح طلع مصلايه من الكنتور وفرشهه وكال يله صلي وراي.. انه هم رديت البركع ع راسي ولفيت روحي حيل بعباته .. احسه حضنه موعباته. بيهه عطرهه واحسن بيهه دفو..
صليت وراه ..كملنه صلاه هو خله وطلع من الغرفه.. انه متت من الخوف يربي ليش طلع..
شوي ورد وراه وحده يمكن من اخياته بيدهه صينيه اكل..نزلتهه كبالي وراحت.. كعد هو كبالي وكال يله سمي..
انه ظليت ع نفس كعدتي.. كتله لا ماريد.. انه ماماكله شي بس الوضع الانه بي نساني حته الجوع والعطش..
عناد:اكلي ولا تحرميني من العشا وياج!
ظليت ع نفس حطتي. مامديت ايدي.. عاد هو مد ايده انه عبالي راح ياكل شو شويه وحط ايده كدامي وبيهه لفه..
عناد:اكليها من ايدي..
اخذتهه منه وكوه اكل.. ظليت الوچن باللكمه واريدهه تنبلع ماكو.. هو ياكل ع كيف وشوي شوي ينقش.. انه كوه خلصت چم لگمه من لفتي وذبيت الباقي بالصينيه.. من شافني كملت هو هم شرب ماي وطلع من الغرفه.. يربي شهل هبطات.. كل ساع طالع.. اجت اخته اخذت الصينيه وكالت ذبي هذا وتعاي وراي.. شتقصد يعني عناد ماراح يبات يمي؟ زين وين تريد بيه سويت مثل مارادت كوه خلصت روحي من البدله.. من نزعتهه عاينت عليهه وكلت واخيرا لبستج! خليتهه بالكنتور ولبستلي ثوب.. شوي واندك الباب طلعت اخته.. كالت تعاي للحمام ذبي هذا الصبغ منچ..
طبيت للحمام كريب من الغرفه الانه بيهه كلش حلو ونظيف وبي اشكال شامبوات وصوابين وكل شي..
كملت وظليت محتاره شلون اطلع خاف احد يلاكيني.. مديت راسي شفت محد اكو ومسافه قليله لباب الغرفه.. طلعت كبل..
عبالي الكه عناد موجود.. انكسر خاطري من مالكيته.. مشطت شعري وهو الصدك مو مشطته كطعته اله شوي.. من الغيض البيه..
يا هسه يجي عناد ياهسه ماكووو.. نوب حته الحجيه هم اختفت ولا احد دك الباب.. الساعه صارت ب11 وهو ماكو.. انه لبست ثوب مال نوم عادي مو سيت يعني.. هيج كشمير وكصير شويه وردانه ربع وواسعه..
تمددت ع چربايه.. بيه حسره هاكبرها.. ليش انه حظي هيج! چاذا ماريدني ليش اخذني؟ شيدور بيهه.. زين وين راح اله ساعتين!
حسره تجر حسره وهم يجيب هم اكبر منه... بعد انه ماتحملت ودموعي كامت تصب صب... گرفصت روحي حيل وضميت اديه لصدري واحس وجع بيه بس مااعرف وينه... بعدين نمت.. اي دخت من كثر البچي ونمت
مدري شچم ساعه نمت.. مااحس اله ايد وصارت جوه راسي.. واحس بدفو صار ع ظهري... عبالي روحي اتحلم وانه بعدني يم اهلي.. اي هيچ انه من انام واكعد انسه روحي وبعدين شوي شوي اتفطن..
ضماني اله حيل.. حسيت براحه.. شلون واحد عظامه توجعه ويفرچوله ويرتاح... لحد هل لحظه انه عبالي حلم..
عناد:اسف تأخرت عليج..
الصوت وعاني.. كلت هذا مو حلم.. هذا عناد وانه اخر شي بچيت چي عافني وراح.. الغرفه چانت مضويه ..انه من غفيت ظلت الاضويه مشتغله..
درت وجهي علي.. اجت عيني بعينه... يباوعلي ومبستم.. يربي شني هل مخلوق... صدگ وصارت وهسه هو يمي.. نسيت حته دموعي گبل شوي علي.. عاينت ع الساعه لكيتهه 12..
عناد:ها؟ بعدج تنعسين؟
انه بخجل كلت:لا..
عناد:صار عدي شغل خابروني والتهيت وياهم شوي..
-ماصار شي..
ظل عناد يمسح ع شعري ويعاين ع راسي ووجهي وانه بين ادي.. نوب حباني من خدي وعاين بعيوني.. انه كوه كمت افتح عيوني واعاين .. ذبلت كلش..
بكل هدوء وع كيفه يحبب بيه.. من خدودي من رگبتي من راسي.. انه صخنت كلششش حته احس وجهي كام يصب عرگ..
عنادهمس:حليمة؟ حبيبتي؟ تسمعيني؟
-اي
عناد:تعاي يمي..
گربت روحي اله حيل.. تلمست صدره بيدي ونزلت لحد السره.. الدشداشه ناعمه حيل وهو صدره ثابت مثل الجبل... رديت رفعت اديه وحضنته من رگبته وشميته حيل...
شوي شوي ومن لحظه لحظه اذوبن اكثر ويا.. وهو هم حسيته بعد مابي صبر... ووووو صرت مرته اخيرا.. من حق وحقيقه.. صرت متزوجة من صدگ هلمره..كام مني وكال رفعتي راس ابوچ يامره.. مثل ماهو دوم مرفوع..
كلماته خلت جلدي يكزبر.. هاي انه ربات الشيوخ.. مو حي الله ههههه
طلع ملابس اله وكال انه رايح اسبح.. انتي هم تحضري حته تغسلين.. مايصير تظلين هيج.. نوب حته هو يعلمني هههههه يربي والله اعرف وخمسين وحده كاللتي... كمل ورجع لابس كلبيه نص ردن وينشف براسه.. كال يله روحي غسلي.. طبيت غسلت واحس بروحي صدك مره.. احس صدك انه هسه عايشه.. كل المريت بي وكل جروحي انمحت.. اسبح براحه وطايره من الفرح.. كل مااذكر عيونه وضحكته الخفيفه احس حيلي يروح مني... شكد تانيت وشكد صبرت والحمد لله الله عوضني بعد صبر وتعب وبچي واحلام واماني...عوضني بزينه اللزلم.. هيبته تخلي حته الناس تسكت من يمر وفوك هذا محنته ماكو مثلهه.. طوله ومشيته تاخذ العگل.. ماتطلع منه حچايه زايده ولا ناقصه.. اخوته يعدونه مثل ابوهم... من يحچي كلهه تاخذ شوره وماتخالفه... فوك هذا كله شكله ووجهه الحلو .. كل شي بي حلو... ردت شغله وحده بي ماتنحب مالكيت...عشت وياهم شهرين.. حطني ع چفوف الراحه.. مامقصر علي بشي.. بس دوم يوصيني بامه وفروخه.. وانه هم انفذ شيريد مني ... امه حبابه ومالهه شغل بيه ابد.. لا تدخل ولا تعاق مثل بقيه العمات...فروخه.. فاطمه متنحسه مني ماترديني بس قباء واحمد يموتون عليه..العب وياهم واضحكهم.. من يطب ويشوفني وياهم تصير الضحكه ترس وجهه... وويانه بلبيت اخو الاصغر ومرته عدهه اثنين فروخ.. هم حبابه ويمكن انه مطفيه مالي شغل بشي ومااندحچ بيهه.. كل همي عمتي والفروخ وعناد اولا... تقاسمنه الشغل بينه.. وخطار عناد مايقل عن خطاطير ابوي.. هم يرادله وكفه .. بيتهم كلش جبير اكبر من بيت اهلي وحلو مرتب واثاثه كله يخبل.. وطبعا كله ذوق خمائل مرت اخو .. هي مدنيه ومثقفه ودارسه.. تصير گرايبهم من جهه الام..حته عمتي تعزهه وتاخذ شورهه بهواي شغلات بالبيت.. بس انه بصوره عامه مالي شغل اهم شي ابو احمد فديت طوله انه...
وبيوم عزمنه ابوي.. رحتلهم چني غريبه .. احسن صدك عناد واهله هم اهلي..تغدينه ورجعنه.. بيهه انه كلش صخنت وارتفعت حرارتي بالسياره تمنيت كون سطل ماي بارد وثلج واكعد بي.. حته عناد انتبهلي..
عناد:شبيچ؟ حليمه؟
-دايخه ومصخنه.. راح اطك من الحروره..
عناد:حبيبتي مشغل التبريد اعله شي؟ اخذج للطبيب؟
-لا بس اريدن انام.. خل نرد بسرعه..
عناد:صار
شخط السياره بسرعه وصلنه.. كبل وحت سبحت بماي بارد وطلعت وكفت كبال التبريد..
مااحس بس ادي حوطت خصري وحضني حيل ودارني ع جهه الثانيه .. يعني ظهره منه للتبريد وانه كباله..
عناد:ليش هيچ؟ غير تتمرضين؟
-حرانه..
عناد حباني من بلعومي وكال:خاف حامل؟!
-هاا؟ ياا منين؟
عناد طبك حاجبه وكال:ولج شنهو منين؟ صارلج يمي شهرين!
انه دنكت وابتسمت..
عناد رفع راسي وضحك:اريد منچ صگر.. ام صگر..
-من يكول حامل؟!
عناد:بعد شوي اوديچ انتي وامي وروحي تأكدي..
-واذا حامل؟
عناد:عيوني الچ..
حضنته حيل وخليت راسي ع صدره احس حته الصخونه والدوخه راحت مني.. صدك هو علاجي..كتله:عيوني گبل عيونك...
ظلينه متحاضنين وصارت سوالف موزينه عيب تدخلون ههههه...
نمت شويه .. كعدني ببوسه.. باوعتله بتعب.. كال يله.. تحضري حته اوديجن.. كمت بيه مابيه غسلت ولبست .. وصلنه ع ابو المختبر.. سحب دم مني وكال شوي وتطلع النتيجة.. انه كاعده ع نار.. اريد صگر.. اي تخيلي فرخ وكاروك وارضع بي.. تخيلي الولاده رايحه اجيبن..كل شي تخيلت وانه بعدني مامستلمه نتيجه التحليل..
شويه وصاح ابو التحليل:حليمه منصور!
طبينه يمه ناخذ الورقه مال تحليل.. گلبي ينشد گبل لساني... كال مبروك حامل.. انه من الفرحه بچيت.. ماتحملت.. شگد چنت متانيه اسمع هذا الخبر.. سنين وانه اشوفن النسوان كلمن فرخهه بيدهه اله انه.. لا رجل ولافرخ والحمد لله حصلت عليهن اثنينهن... خابرت ع عناد واجه ياخذنه.. ماحبيت اكولهه بتلفون اله بوجهه... صعدنه بالسياره وانه وامه مكدرات اليشوفنه يكول ماكو حمل.. خطيه هو هم ما نشد عود مراعي مشاعري وكام يلمح الي هاي نصيب واله ماالله يطي لعبده بعدين والله ماناسي لكن يمهل ولا يهمل وووو من هل حچي انه اسمعنه وبداخلي اضحك... وصلنه للبيت وطبينه للغرفه انه ويا.. بعدني ابدل اجه حضني.. وهمس يم اذني.. الله كريم كافي علي شوفتچ يمي.. يربي انه هواي عليه هذا الحچي.. طكيتهه بوجهه كتله انه حامل هههه... عيونه كامت تلمع من الفرحه.. چن هذا اول فرخ اله طلع من الغرفه وانه ظليت اعاين علي.. لاكه امه تريد تروح للحمام.. حبهه ع راسهه وظل يكله ونعم ماجبتلي من مره .. عساج سالمه يمه ويبوس براسهه.. نوب منظرهم هو امه يجنن.. هو اطول منهه بهواي وحاضنهه صايره ها كبرهه بحضنه خطيه هي شوي ناعمه ومحدبه... لوما العيب چا رحت حضنتهم اثنينهم هههه... اجت مرت حماي وبشرناهه.. مابينت ذيچ الفرحه عليهه.. نوب فاطمه درت كالت انه هذا ماريده هذا مو اخوي اخوي احمد وبس.. ابوهه شكد يعزه ومايرد الهه طلب بس بذاك اليوم عصب عليهه وكالها اذا سمعت منچ هل حچي لسانچ اكصه.. ماردته هيج يعاملهه هم حگهه مالومهه وبعدهي صغيره ماشبعت من امهه.. بس هاي قسمتنه وارادة رب العالمين...
تسع اشهر انه سليت من الحباله.. متت.. حته اخذتلي خمسطعش يوم يم امي. تالي گلبي ورم ع عناد واخذني ابوي بحجة التسيوره.. هو صدك هم چان يمرلي يم اهلي بس مااكدر المس ايده استحي.. ولا اكدر احبنه.. يعني ماماخذه راحتي..من رجعت احس الروح ردت بيه.. فاطمه ظلت ماتريدني طول هاي الشهر وماچنهه گلب بنيه صغيره.. لا تحسهه شايله هموم الدنيه كلهه.. انه هم كلش هملتهم هي واخوتهه.. كوه اشيلن روحي.. عمتي ومرت حماي زينات وياي ومامقصرات... مارضيت اسوي سونار خاف مايطلع بيه ولد.. كلش چنت خايفه.. وصدك صارت الولاده مالتي بليل.. راح عناد لامه كعدهه واجتني للغرفه كومتني واخذنه عناد خطيه ظل كاتله الخوف عليه.. دخلت الصاله ميته من الوجع.. ماكو نص ساعه جبت وكملت.. بس ياحسرة مافرحت گلب عناد وجبتله صگر.. جبت امنه.. حته كلش ناعمه طلعت.. من طلعت وشفت عناد كلش فشلت منه مارفعت راسه وجبت اليريده هو... متت بدمي ماكدرت اشيلن راسي واشوفنه.. هو دره من الممرضات الطلعن الهم بس بعد عيني ماحسسني بشي.. كيف بامنه واذن باذنهه وكبر..
ردت اروحن يم اهلي بس عمتي الحجية مارضت.. كالت انه ماعدي چنه تروح لاهلهه بالمجيب.. ظليت يمهم وداروني الله يشهد.. حته فاطمه خطيه كامت تشوف اخيتهه من بعيد واحسهه تريد تكربهه يمهه... كمت انه اصيحنهه واخليهه بحضنهه وهي فاطمه تظل ساكته ماتحجي بس اتبسم بوجهه ع كيف.. ابوهه هم كيف من شافهه كامت تقربلي .. وتريد اختهه..
مرت الايام وشوي شوي تعافيت.. امي هم اجتني بالايام الصعبه تظل سويعات يمي وتروح.. ها صدك نسيت اكلكم مجيده جابت وره عرسي بچم يوم.. جابت وليد وغاده هم حبلت...
رديت وكفت ع حيلي وطلعت الاربعين وكل شي تمام.. عناد وامونه روحي من الدنيا بودي اشلع عيوني اطيهه الهم.. هو هم كلش يحترمني ويقدرني.. ماچنت ادري هاي سنه سلام وراحة بال والوراهه ضيم وقهر...
