رواية عشقتة حتي اذلني الفصل الرابع عشر بقلم نوران
سارة
مر اسبوعين لخروجي من المستشفى والناس هوايه اجوي يشوفوني اقارب وغربه ما اعرفهم ضجت من كعدة البيت واحتصرت ترخصت من اهلي اطلع اتمشى بالبساتين اني وريم واحمد وقبلوا طلعنا وصلت للمكان اللي ذبيت نفسي بي اباوع معقولة اني هيج سويت شلون اجا ببالي وشلون تجرأت وليش ما حطيت بباليمخافة رب العالمين وعاقبة الانتحار دمعت عيني اسف وندم ومسحتها ومشيت ويه النهر ريم واحمد صح ويايه بس يتختلون كل شويه واصلا ماكو شي والبستان فارغه ومسيجه يعني ما علينا شي واحنابداخلها ضليت امشي ويه ماي النهر واتفرج عليه واتذكر هنا كلبني الماي وهنا طلعت وهنا ردت الزم الحافه وما كدرت وصلت مكان بعد ما اتذكر شي كعدت ابجي بالمكان سمعت صوت ورايه جفلت ووكفت مسحت دموعي هذا عزرائيل اوو قصدي منقذ
-ها بنيتي بيج شي شجابج هنا
-لا ما بيه هاي كاع جدي ودا اتمشى بيها يصير لو لا
ضحك بصوت عالي جفلتني ضحكته عصبني لان يكلي بنيتي شنو زعطوطه كدامه اني وحجابي وطولي ويكلي بنيتي
-كاع جدج هههه بنيتي ارجعي لكاع جدج ولا تتمشين وحدج هنا
خوفني كلامه
-اني مو وحدي هنا اخويه وزوجته وياي
اندار الي وبنضرة استهزاء
-وهذا اخوج الشفيه وينه عايفج توصلين لهنا ما تعرفون كاع جدكم تنتهي لهذاك الحد وانت هسه بكاعي
انداريت هو اني شمعرفني لوين كاع جدي كلها نفس الشكل ونفس الاشجار بس انتبهت اكو سور بينهم عليه هذا اللي اسمه تكي علكه (توت العليق ) يغطي سياجات البساتين دائما اموت عليه وهسه هو وقت الثمر مالته وكان السور مفتوح من جهة النهر ومخلين طريق بينهم فشلت من نفسي واني بجسارة ووكاحة عين اكوله كاع جدي
-العفو ما انتبهت للسور هسه راح ارجع اعتذر لان ضايقتك
-لا عادي اخذي راحتج
اندار يمشي اني كفخت نفسي شلون هيج حجيت وياه وهو قبل ايام خلصني من الموت
-منقذ
اندار الي ويتلفت
-منو هذا منقذ
-انت مو اسمك منقذ شكرا لان طلعتني من النهر
-ههههه منو كالج هذا اسمي
-اختي
-ههههه هاي من جنتي بالمستشفى وسألتيها مو
-اي
-اولا اني اسمي علي وثانيا لا تشكريني اشكري ربنا اللي جابني بهذيج الفجريه انت مخبله وهيج تسوين بروحج ما اجا ببالج الموت ولو هو انت جان محتاجلج هيج حادث حتى توعين لنفسج لان اول ما شفتج عرفت شكد انت ما تهتمين والحياة عندج بس ملابس وصبغ وشعر منثور شايفج هسه يمكن شويه عقلتي ورجع مخج يشتغل
-وانت منو حتى هيج تحجي وياي الحق عليه اللي واكفه واسولف وياكواحد عديم احاسيس ما تعرف البشر اللي مقابيلك شنو شاف وشنو اللي مر عليه المهم عندك تجرح
-قصدج لان لكفوج ويه العشق بالبيت وحدكم هاي اللي خلتج تنتحرين اذا انت بريئه ليش ما تثبتيلهم هالشي شلون استهانيتي بروحج
خجلني كلامه وانخرست هذا لسان لو سيف كل ضربه تكون اقوى من اللي قبلها انداريت ورجعت للمكان اللي اجيت منه رحت للجهة الثانيه من السياج وكعدت بالكاع دمعت عيني مسحتها استاهل هذا الحق بس ميصير هيج يحجي وياي ومو من حقه رفعت راسي شفت التكي متدلي عالسياج اسود ناضج كلش وكفت ونسيت كلام هذا الغثه مو بيدي ام بطن هههه
رفعت نفسي اريد اوصل للتكي ما كدرت تقربت اكثر وشايفين النباتات اللي تطلع بالغابه المسحورة المخيفه من تلزم فريستها هيج علقت بالعلكه منا هي ومنا السلك الشائك مال السور كل حركه تملخني اشواكها صحت على احمد بس ما سمعني ضليت واكفه دنكت وشكو قهر اجا براسي منا اني حالتي النفسيه زفت ومنا هالمواقف واحد وره الثاني شويه ولكيت هذا مقابيلي اخر شخص اريده هسه هو واكف وبنضرة شماته
-ها ولج اشو هم انت ومسويه مصيبه بنفسج ما عندي شغل بس اخلص بيج
-غير انت المنقذ كلتها بأستهزاء اعوج بحلكي
-لا وين منو كال اني رايح وانت ضلي صيحي باحمد اذا سمعج عود يجي ينقذج اني شكو
اندار ومشى واني معلكه بالسور وجسمي تملخ وهذا احمد مدري وين راح
-لا عفيه حباب لا تعوفني نزلني
-هاي شنو سارة خاتون بجلالة قدرها تتوسل انزلها
-انت راح تذلني
-لا العفو بس كولي عمو عفيه نزلني واني انزلج
عصبت كلش وانداريت لغير جهة هو تقرب وبدا يخلص ملابسي من اللي عالق بي ويتقرب لجسمي اني هنا يمكن لو مو اشواك لو لوحه مسامير ما اتحرك كثر ما اتجمدت وخصوصا وهو قريب مني قص الاغصان وجر ملابسي شويه تشككت بالسلك الشائك وبينت اجزاء من جسمي جرني عليه وخلصت بس خلصني دفعته قوي عني مو لان كارهته لا بالعكس كانت لمساته تحسسني باحاسيس غريبه فلذلك بعدته وهو ما يعرف يسكت
-ها سالمين خيرج الا شويه تدفعيني بالساقيه ليش ما تاخذيلج كفخه مو احسن
-انت ليش هيج تحجي
-شبي حجينا لو بنت بغداد ما يعجبها حجينا
-مو قصدي والله مو هيج
-جا شنهي قصدج
-انت ليش عصبي
-مو عصبي
-لا انت عصبي وبس تحجي عليه وترزل
-اعتذر بنيتي والله مو اني اللي اجيت لكاعكم انت اللي اجيتي
-عالعموم اشكرك ما قصرت وياي وبارك الله بيك واني ممنونه منك ساعدتني هواي
تغيرت ملامحه بابتسامه حلوه
-ما صار شي وانت ديري بالج على نفسج مو كل مره اكو احد يخلصج
-اي
-يلا اوصلج ونشوف هذا اخوج وين شلون يعوفج بوحدج
مشى ويايه وكلبي مدري شبي يدك سريع اكيد لان تعبت ومنا الدكتور نصحني بالراحه ووصلنا لكينا احمد وريم بغير عالم كاعدين وكله ضحك وسوالف هو اخويه بحالي جفلوا اثنينهم من شافوا اللي ويايه وريم تقدمت اله بوسته وضلت تسأل عن اشخاص ما اعرفهم واحمد هم سلم عليه باحترام واتشكر منه واخذه على صفحة وضل يحجي وياه ما اعرف عن شنو بس احمد خجل ودنك وهذا مبين يرزل بي انعل يومه ما يعرف يجامل ولا يحجي كلمه حلوة بهاي الاثناء اجاني عكس من ريم بصفحتي لزمتها ردت اعضها
-شبيج
-لج عينج من خالي
-خالج!!!!
-اي خالوا المنقذ على قولكم وتضحك
-ليش ما كلتي خالج طلعني
-ليش انت ما تعرفيه
-اول مره شفته كانت بالمستشفى
-انت ثوله شسويلج هو مو استقبلكم من اجيتوا اول مره
-قصدج الاقوام اللي استقبلتنا هو اني افتهمت شي بس خوالج كبار بالعمر هذا صغير
-ههههه اي مو هذا بزر الكعده لا هذا اخو امي من زوجة ابوها وها تره عمره ٣٥ سنه مو صغير
سكتنا من رجعوا وودعنا علي ورجعت وياهم للبيت والطريق كله احمد يحجي شلون رحت هالبعد وشراح يخلصنا من بابا اذا سمع
مرت شكم يوم كنت بغرفتي واكفه امشط بشعري واتذكره شكد جان يتعبني بالتسريح بس جنت احبه دمعت عيني الله يكسر ايديك مصعب كون صلع وراثي بيك ووبناتك مو ولدك المرايه مقابيلي هي ايام بس احس روحي كبرت سنين دكت الباب وصحت للي بره يتفضل اجتني ريم
-سرسور عمي يكول خلي تلبس حجابها وتجي تسلم عالخطار
-اولا الف مره كتلج اني مو صرصور وثانيا منو الخطار
-بيبي نورية وخالتي فضيله وبناتها وبيت خالو سمير كلهم وبيبي ام علي جايين يشافون الج
-اوكفي اوكفي عرفتيني عليهم شايفتني اعرف المنطقه كلها
-لج غبيه هذوله اهل امي
-ها المنقذ
-هههه والله لو تعرفيه للمنقذ ويسمعج هيج تسميه يجوز يخنكج
-سمعني
-لا الله عليج
-اي
-عزه وما حجى شي
-هو عاللي حجاه هوايه
-ههه تستاهلين بيمن اندكيتي-ديلا عيني هسه عرفنا الاعصاب والخبالات منين اجتكم هسه افتهمنا ثلثين الولد عالخال بس مال البنيه تطلع عالخال هاي واكفه
-شبينا عيني تره اخواتج واكعات بالحب واخوج حاطته بجيبي
-اي مو مثلكم صابتهم عدوة الله يبعدنا
ضربتني وكفختها ونزلنا واني اضحك وصلت باب الاستقبال ثكلت لان ما اعرفهم كلش ودخلت سلمت عليهم كلش لطيفين وبناتهم بعمري واكبر تعرفت عليهن واتفقنا اداوم وياهن بعد ما احول نقل من بغداد لجامعتهم كل الكعده الكل يسولفون ومندمجين الا بيبي ام علي سكوتها دائم وبس ابتسامه على وجهها شكلها عجوز وحلوة مبينه لطيفه وفقيره هذا العفريت منين اجا وامه هيج حلوة
تالي تقربت الي وحجت وياي بصوت ناصي
-شلونج يمه
-الحمد لله بيبي تسلمين ربي يطول بعمرج
-يمه هم حلوة وهم لسان ما جذب عليوي من كال
-شنو كالج
-لا هيج يمه الله يحفظج ويبعد عنج الشر لو بنتي البسج خرزة زركه وما اخليج تطلعين هاي عين
التفتت لامي وحجت وياها وامي تكلها عليش تنحسد وهي ضلت تحجي عليها لان ما تؤمن بهاي السوالف اي هسه عرفت ليش ابنها بس يرزل هاي عرفتها منين اجتي
نطوني هداياهم وكاموا يطلعون سلمت عليهم ووصلناهم للباب كلهم صعدوا ويه خالو سمير وبقت بيبي ام علي واكفه تنتظر ابنها يجي الها لان هي بغير بيت كعدوا بالحديقه ينتظرون اجيت ادخل ابويه وامي كالوا ابقي بقييت وياها وهي كل شويه تباوع بوجهي وتصلي عالنبي بصراحه اول مره اصدك بروحي حلوة
شويه ووصلت سياره عاليه ونزل منها هو واجا سلم على اهلي وعليه بدون ما يباوعلي طبعا والتفت لامه وكومها عجبني تصرفه ويه امه لان هو يهتم بيها هوايه وهي نزلتله بالرزاله الزينه شكد فرحت واتشمت بيه وضحكتي لاذاني واخيرا اكو اللي يكدر اله اجوي يطلعون دخلوا مودة وغدير وازواجهم وتسالموا ويه خالهم ويضحكون وياه وما قبلوا يطلع وابويه هم كمش بي عالعشا وبقوا يسهرون ويانا وبحكم احنا عائله وحده واقارب وهمه اصلا اقارب بابا من بعيد عشانا وكعدتنا صارت مختلطه وطالت سهرتنا وهاي السهرة غيرت حياتي كلها لما نبض قلبي وتحركت مشاعري اول مره لعلي كنت اظن نفسي اعجبت بمصعب وادركت الاعجاب بهاي اللحظه شلون يصير
------------------
