رواية سيرة القدر الفصل الرابع عشر بقلم فجر المساري
احداث حزينه ومفاجئات غير متوقعه
بارادتنه او لا… .
كلت لخالتي اني موافقة… على الزواج كالتلي يمه
انتظري،ان شاء الله يجيج نصيب زيـن كتلها لا خالة
اني مطلقة ومنووو يقبل بوحده مطلقة وحتى اذا
هو قبل اهله راح يرفضون … منو يقبل ياخذني
هما بنات مدا يزوجون انوب اني المطلقة واني يتيمة
واعرف هما هسه شلون عايشين خطية ابنهم النونو
التهي بي وبلكت يصير عندي طفل يمكن الله يعوضني خير… حته انسى ياسر ..
كالتلي مادام انتي موافقة ومقرره مااكدر احجي شي
براحتج هاي حياتج والله. يسعدج بنتي وباستني
من راسي وكالت لعد اني شريد غير راحتج وسعادتج
جنت بالمطبخ اسوي عشا فاتت خالتي وكالت
سراب خابروا بيت عمج ابو ياسر… خير
يكولون باجر الخميس مالت عمج ويسوون اكل
ويريدونه نروح عليهم… اييي خاله بعد مكملت عشا
وتعشينه اني وخالتي كعدنه شويه سولفنه وخالتي
راحت تنام بعد وكت… رحت للطبخ وسويت حلويات ومعجنات وجدر برياني ودجاج تعبت
كملت ونظفت وصعدت انام للصبح انزلت فتت
للمطبخ شفت خالتي كاعده كالت هاي شنووو شوكت
لحكتي تسوين كل هذا خاله بعد مرحتي نمتي بديت
اشتغل عفيه بنتي الشاطره…
كملنه ريوك وصعدت بدلت ونزلت اندكت الباب
خالتي صاحت سراب… نعم خاله فتحي الباب هذا
يمكن ياسر اجه ياخذنا… اني كلت هذا شعنده جاي
رحت فتحت الباب سلم وفات واخذنا الاكل
وطلعنا وصلنا للبيت عمي جان مبين عليهم اكو شي
الجووو متوتر… سلمت وفتت للمطبخ اساعد
البنات ومشفت زوجه ياسر ندى سالتهم وين زوجه
ياسر كالوا فوك بالغرفه ومبين كانما ميحجون وياهه
الغرفه الي جانت غرفتي قبل كملنا وكعدنا نصب
بالاكل سوينه كبة ودولمه وتشريب لحم ابيض
وزعنا ع الجيران الى ان كملنا ونظفنه تعبت كلش
طلعت حتى اكول لخالتي كملت ونرجع للبيت صارت
دنيا لليل الساعه 9 وسمعت خالتي تحجي ويه
ام ياسر ونسوان عمامي على موضوع خطوبتي
واني فتتت للهول وجانت طالعة ام ياسر شافتني
دنكت وهزت راسها وكالت رووحي بنتي الله يسعدج
احنه خسرناج وشفت ياسر واكف يم الباب يباوع
عليهم وساكت…
كتلها يله خالة خلي نرجع للبيت… اييي جاية
طلعنا وياسر كال اني اوصلكم الدنيا لليل صعدت
خالتي ليكدام واني صعدت ليورا وطول الطريق شفته يباوعلي بالمرايه واني خفت ودنكت وبعد مباوعت ابد …
الى ان وصلنا للبيت نزلت خالتي واني مديت ايدي
دافتح الباب مقفولة اندار عليه ياسر وكلي
سراب… سسسامحيني…
اتطلب مني السماح وانت من كسر قلبي
اتطلب مني المغفره وانت من افنيت عمري
بحق من اسامحك واغفر لك خطيئتك
قـل لـي… بحق مـن… بقلمي…
كتله ياسر افتح الباب انفتح عفتة ونزلت ركض
للبيت ودموعي نزلت شافتني خالتي كالت شبيج
سراب… حجه وياج شي ياسر…
مبيه شي خالة وصعدت لغرفتي شبعت بجي ع حظي وع نفسي وحياتي…
اسامحك على شنووو ولا شنووو ياسر انت دمرتني
ودمرت حياتي وهسه جايني بكل بساطه وبرود
وتكلي سسامحيني ولا كانما مسوي شي ..
شنووو انت من بشررر.…
بقيت احجي وابجي الى ان نمت وللصبح وجان
يوم جمعه عطله مكعدت 10 بقيت نايمه ونزلت
ومر اليوم عادي…
وثاني يوم كعدت ورحت لدووامي بالروضة شفت
وداد محجت شي ولا اني حجيت ورا يومين
اتصلت ام حامد بخالتي حتى تعرف الجواب
وجنت كاعده يم خالتي وكالت موافقه فرحوا
وحددوا اول خميس بعد الاربعين مالت عمي
ابو ياسر مباشرتا تصيير الخطوبة بنفس الاسبوع
وحيكون الخطوبة والزواج بيوم واحد لان جانوا
مستعجلين كلشش…
ومرت الايام وانطوني فلوس حته اجهز نفسي
واشتريت ذهب وملابس وجهزت تجهيز عروس كامل
وطبعا العريس مشايفته لهسه بس بصوره شوفتها
الي اخته وداد…
ومشت الايام… وصارت اربعينية عمي وعزمونه
ورحنه اني وخالتي .اخذوا سيارة جبيره للنجف
الكرايب والاهل بس ورحت زرت الامام علي
عليه السلام حسيت روحي ارتاحت…
بوكتها اجوي علينه الفجر وطلعنا…
مناك للنجف…
وبعد يومين يصادف خطوبتي وزواجي…
وتحدد موعد الخطوبة واجوي للخطوبه نسوان
عمامي كلهم بس مرت عمي ابو ياسر مكدرت تجي
لا هي ولا البنات اتصلت بيه اتعذرت وباركتلي
ودزتلي هدية ويه نسوان عمامي ايه قرانيه جبيره
كلش حلووه وبيها مكتوب ايه الكرسي،…
بس من شفت ياسر اجه اتفاجات… 😲
هذا شعنده جاي 😒
قبلها رحت اني وخالتي وحجزت بالصالون واشتريت
فستان لون ابيض بي تول وكلش حلووو مخصر
من فووك وعريض من جوه وبي فصوص لؤلوه
مطشره كلش حلووو…
وسويت تسريحه وشلت شعري فوك ومكياج
سموك طلعت اخبل… 😊
وخالتي لبستني كلاده ذهب بيها فص ازرك وكالت من العين وهاي هدية الج…
وطلعنا من الصالون اخذنا تكسي…
وفتت للبيت بدون هلاهل او هوسه لان عمي مصارله
هوووايه من اتوفى…
جابوا السيد عقدنه وصارت خطوبه واجه حامد
ابو لمياء وامه واخته وداد وبناته وفهودي… فدوه
وفات حامد ابو لمياء اسمي وصارت الخطوبة
وبعد الخطوبة بقوا اهل ابو لمياء،ويه ابوهم طول
الوقت وهو جان مدنك ويسمح بدموعه انقهرت عليه
وبناته حضنوا وكعدوا يمه ويبجون واني انقهرت
عيلهم يمكن اتذكر زوجته الله يرحمها ..
وياسر محجه شي طول الكعده…
خلصت الخطوبة على خير… ثاني يوم الصبح
رحنه عقدنه بالمحكمه ورجعت البيت للعصر اجوي
اخواته ياخذوني، بدون لازفه ولا عرس ولا صوت
هلاهل وهو جان لابس زي عربي دشداشه بيضه وعباية سوده وعكال…
موجودين خالتي ونسوان عمامي واخواته وبناته
وامه بهالاثناء واحنه طالعين فات ياسر وزوجته
ندى وبناته…
سلمووواا… واجه يمي ومد ايده بجيب الستره
مالته وطلع علبة لون احمر وفتحها وجان بيها
زنجيل ذهب ومكتوب عليه ماشاء الله
كلش،حلووو وانطانياه اني اتفاجات مشتريلي هدية
كلي الف مبروك…
سراب الله يبارك بيك ..واشكرك ..وبعدها سلمت عليهم وطلعنا وقبل لا نطلع حضنت خالتي واني
ابجي وهي تبجي واسمع ياسر يوصي حامد عليه
معقولة هذا شبي… ههههه
المهم هو بيتهم جان بالانبار فرحت عروس من
بغداد الانبار وطريق طويل وتعب وصلنا ونزلنا
جنت بسياره هو وامه ليكدام يمه واني واخواته
اثنين ورا والبنات بسياره ثانيه …
البيت جان جبير وحلووو وطابقين ودخلت جوه
اثاثه جان بسيط واخذني وفوتني بغرفه وطلع جان بيها
اخشاب جديده باوعت عليها صابغيها صبغ ابيض
جديد والاخشاب لون جوزي،صاج حلوه ومرتبة
اجوي البنات سلمووا عليه واخوهم وياهم فهودي
فدوووه…
وكالوا راح يرحون للبيت جدهم يبقون يومين
ويرجعون اني متت خوف وخجل…
اووووف ياربي… شلون راح اعيش وياه عافوني
وطلعوا البنات واني كعدت ع طارف الجربايه
كعدت افكر شلون راح تكون حياتي وياه
بهالاثناء انفتحت الباب الغرفه ودخل حامد وكلي
تعالي ناكل… هزيت راسي اي وطلعت كعدنه
بالهول اكلنا مبين ماكو احد…
جان جايب اكل جاهز وياه كباب ومقبلات جنت
كلش جوعانه بس استحيت ماكلت شويه ..
بعدهه شلت الاكل خليته بالمطبخ وغسلت ورحنه
للغرفه وجنت ميته خوف مع العلم هذا مو اول
زواج اليه ولا اله بس تبقى رهبه اول ليله…
وصار الي صار وصرنه مثل كل اثنين متزوجين
وعدت الليله على خير وبعدهه بقينه واحد يحجي
لثاني عن حياته وشفته من كلامه مبين عليه مثقف
وعرفت هو جان استاذ جامعي متقاعد،..
وفاتح حاليا معـمل الامنـيوم يعني عنده خير
من الله اني تركت شغلي بالروضه وللصبح اجوي
بناته وخواته وامه وكرايبهم يباركونه وجايببن
وياهم الريوك الكيمر و الصمون الحار
ابو لمياء…
كعد غسل وبدل واجوي اني انزلت افتح الباب وهو
بقه كال ابدل وانزل وراج…
فتحت الباب باركولي وبوسوني وخلوا الريوك
بالمطبخ ونزل ابو لمياء سلموا عليه وراحوا…
واني فتت للمطبخ سويت جاي وكعدنه نتريك
وهو طلع لشغل كال اروح للمعمل اشوف الشغل
عنده بضاعه يشوفها جايه لو لا…
وكتبلي رقمه على ورقه وانطاها الي وكلي اي شي
تحتاجين خابريني… كتله اييي باس راسي وطلع
بقيت وحدي بالبيت رحت خابرت على خالتي
وهي باركتلي وتدعيلي… كملت وسديته وياهه
ورحت اشوف شغله حتى اشغل نفسي…
اخذت ملابسي وملابسه اغسلتهم دخلت للمطبخ
فتحت الثلاجه شفتها متروسه مسواك ولحم ودجاج احتاريت شنووو اسوي غدا ..
ماعرف شيحب… واستحيت اتصل عليه واساله
اخر شي،طلعت دجاجه شويتها بالفرن وسويت برياني وزلاطه …
كملت صعدت غسلت وبدلت صارت ساعه 12
شفته متصل عليه…
اني حفظته بجهازي كلت لا تضيع الورقه هو شعرفه
برقمي رديت الووو .الووو هلا ابو لمياء
كلي اجيب اكل ويايه كتله لا سويت اكل بس خبز
كلي صار…
ورجع كلي رقمج اخذته من وداد كتلها نسيت اخذه
منها… اهااا… خوش…
كلي جاي بالطريق وسده… ربع ساعه واجه
شافني ابتسم،… نطاني علاكه الخبز،…
وكال راح يصعد يغسل ويبدل ملابسه وينزل واني
فتت للمطبخ وبديت احضر الغده ..
صبيته وجبته اله وكعدنه بالهول اتغدينه وكملنه
كلي جاي كتله صار… 😊
صبيت اليه واله وكعدنه نشرب جاي…
وبعدهه كال تعبان وصعد نام وصاحني اجي بحضنه
وحضني ونمنه مكعدنه للعصر…
ورجع طلع كال عنده شغل ميتاخر…
وبقيت وحدي اووووف هسه لو يمي البنات جان
مضجت ساعه واجه وجايب وياه عشا…
وتعشينه .. ومرت هاليومين وبعدهه جوي البنات
وفهودي… 😘
جانت تجي امه علينه عايشه ويه ابنها الضابط
اسمه حسن ممتزوج ..
تحجي كل يوم الصبح ولليل يجي ياخذها…
