رواية عشقتة حتي اذلني الفصل السادس عشر بقلم نوران
امبيه يا يمه يمكن حبيت ☝️
----------------------
سارة:
وصلنا للجامعه والطريق كله اني غركانه بعطر تغلغل لمخي وقفل عليه كانت كعدتي بالكرسي اللي وراه بنص الطريق وهو مستمر يرزل بدعاء انزعجت نص كلامه ويه دعاء ويباوعلي من المرايا عرفت المقصودة اني بالله هذا شعنده وياي كاتلتله احد دنكت واني منزعجه وهو يمكن حس لان سكت فات فترة ورجع يحجي وهالمره وياي
-سارة بنيتي انت ما تندلين اليوم ابقي ويه دعاء توصلج وتعرفج الاماكن
تضايقت من سالفة بنيتي اللي لزك بيها من اول يوم شافني مسوي روحه حجي ودا يحجي ويه زعطوطه هو كل الفرق بيناتنا ١٦ سنه اووف شكد يضوج
-اي راح ابقى وياها
-وشويه هنا مو مثل عدكم البنيه مطلوب منها الهدوء والرزانه والتصرف بلباقه اني اخاف عليج ولمصلحتج احجي هيج وشفتي ابوج يكلي انت مسؤول عنها
كلامه ضايقني وحسسني انه اني ما افتهم لو ما اعرف اتصرف والمشكلة اني ما اعرف اسكت
-اي عمو صار راح ابقى لازمه ايد دعاء قوي مو رايحين للحضانه واني صغيرة اخاف اضيع وماكو احد ينقذني هالمره
البنات اثنينهم انداروا الي لان كلت كلامي باسلوب استفزازي كلش يباوعون الي واله مثل واحد ينتظر التالي شراح يصير وما صار شي سكت علي بس ضل يتأفأف ضايج واني حسيت بشعور النصر واخيرا ضوجته ولو ادريه ما راح يعديها الي بس المهم رديت
وصلنا الكليه ونزلت ركض لان خفت من علي اللي الطريق كله يسوق سريع مثل واحد يريد بس يخلص من شي اول ما نزلنا ودعاء كمشتني تلوم بيه
-لج سارة ليش هيج تحجين ويه عمو علي ولج هو محد يكدر يعلي حسه يمه انت تحجين وياه بهالطريقه مو زين ما نزلنا بنص الطريق او ليش والله يبسطج لا عبالج ساكت وتكولين فقير
-لهاي ساكت وهيج لو يحجي شلون عد تقبليها يحجي بهالاسلوب ويايه
-هو طبعه هيج اصلا هو سوى فضل هالمره علينا وقبل نصعد وياه لج صدكيني يجوز باجر يبطل ما يجيبنا خلي ندور البنات حتى نسوي خط اصلا زين اذا بالرجعه ياخذنا وياه
-ما يهمني هسه نشوف البنات واذا ما رجع بعد احسن نرجع وحدنا
-لج انت صدك هبله منو يقبل نرجع وحدنا تريدين ابونا يبطلنا اذا ابوج يقبل ابويه ما يقبل مو زين خلونا نوصل كليه
-اووي دعاء شكد متشددين اهلكم
-لا والله انتوا المتحررين زايد
-ديلا عيني وصليني للقسم مالتي
-يلا وبعد ما تخلصين محاضرات انتظرج بالنادي
-اوك
وصلوني البنات وراحوا وضليت اني بالقسم ما طلعت لان اول يوم وصدك حسيت بغربه لا صديقات ولا احد اعرفه تعرفت على بنات وسوالف وتعارف ما حسيت بالوقت باوعت صار وقت نهاية الدوام طلعت للنادي واني كاعده وحدي اكلب بموبايلي كعد شخص مقابيلي جفلت رفعت راسي مصعب احس لساني انعقد لسه عندي خوفه وردة فعل تجاهه
-مصعب؟؟؟
-اي حبيبتي اجيت اشوفج وارجعج وياي
-دير بالك تكول هالكلمه مره ثانيه اني ما اعرفك احسبنا اغراب وكوم هسه من كدامي واطلع منا لا اسويلك مشكله والله وما يهمني شي وفوكاها تريدني ارجع وياك الا اذا تخبلت كوم مصعب روح لا هسه اعيط والله والم الطلاب عليك
-شنو هالكلام سارة اعقلي لا تفضحين نفسج وتفضحينا انت ليش ما تفهمين لج والله عايش بالعذاب انطيني فرصه اصحح اللي سويته شسوي وتقبلين اعتذاري
-مصعب تكدر ترجع شعري مثل ما كان لو تكدر تمسح ضربك الي واتهامك لشرفي لك اني ما اتأذيت من احد ولا همني شي بكد حجايتك وتريدني اسامحك وانطيك عذرك والله مصعب بكل يوم اوكف كدام المرايا ادعي عليك ومنا لحد ما انسى ابقى اسويها لا تطلب اسامحك اطلب مني بس ابطل من دعائي على ايدك بالكسر
-سارة؟؟؟؟
-اششش ولا كلمه اكره حتى اسمي من تنطقه
كام مصعب من مكانه وكمل كلامه بنبرة تهديد
-سارة كلمة وتسمعيها منتظرج بالسيارة بالباب تجين زين ولا تخليني اتصرف غير تصرف-وتهدد ما اصعد وياك اصلا بصفتك منو اجي اصعد وياك
-خطيبج بعد شكم يوم
عيوني رادت تطلع من مكانها للكلمه اريد ارده واعرف اعقدها على نفسي اكثر مصعب ابن عمي واخاف اتبع اخواتي وانجبر عليه والموت ارحم الي منه
طلع مصعب واني وكفت امشي منا هذا المخبل اكيد ما يجي علينا ومصعب مكابلني ارجع وياه
طلعت للباب وشفت علي واكف مثل وحدة جانت ضايعه ولكت ابوها ركضت وكفت يمه وهو سولف ويه مصعب شعنده بالكليه ومصعب يكله اجيت اشوف صديقي وشفت سارة وكلت ارجعها وياي وعلي رفض لان هو جابني هو يرجعني وهو المسؤول عني لحد ما الكي خط هنا مصعب ما كدر يحجي لان كال اله ويه البنات نور ودعاء بينما وياه ارجع وحدي صعدت وسديت الباب بدون ما اسمع رده وهو الظاهر ما كدر يلكي عذر سلم على خاله ومشى وضل كل شويه يلتفت وعيونه تتوعدني
صعد علي واول مره اشوف رجال يطبك باب سيارته قوي هههه هذا ما يحبها واخيرا رجال وما يحب سيارته بين افكاري السخيفه التفت الي وكام يحجي
-عقل ماكو براسج تبقين بهاي السوالف
هنا البنات لساهم ما اجوا وهو استغلها فرصة شلون يفوتلي الرزالة مال الصبح وهسه طلعهن
-ليش شكو شسويت اني وهيج تحجي ويايه ومنو سمح الك
-لا سلامتج بابا هنا ماكو هذا ابن عمي وماكو رجال اصعد وياه سيارة وحدنا واللي سمح الي اهلج اللي مأمنيني عليج
-وانت مو هسه اني صاعده وياك وانت رجال غريب
-لج لا تموتيني بنات اخويه ويانا وانت مثلهم هم بنت اخويه
-لا اني مو بنت اخوك وكافي تعاملني بهاي الطريقه عبالك تحجي ويه زعطوطه
سكت وصفن بوجهي يمه هذا شبيه صرت اسوي بيني وبين نفسي (ولك عينك راح اموت دير خلقتك اللي جنها ماعون حلويات مشكل لا لا يشبه ماعون كرزات لا يمكن يشبه ماعون كيمر وفوكاه عسل خرب اشتهيت بوسه )
صحانا صوت دعاء وهي تصعد وتدردم هي ونور
-لج هاي وين صرتي صارلنا ساعه منتظرين بالنادي وانت هنا ويه عمو كاعدين دك سوالف
عزه بعينج خجلتنا وعلي ضل يدور اعذار اله عبالك كامشيه ويه وحدة بوضع مخل بالاداب
-كومه انتظرت وانتوا ماكو تالي طلعت
اندار علينا ويكلي المره الجايه تنتظريهم ما تطلعين الا وياهم صح قبل شويه مسح الكاع بيه وترزلت بس يلا اهم شي اكو مره جايه يعني راح اشوفه مره ثانيه
مرت الايام واحنا نفس حالنا كل يوم العركه الزينه والرزاله الزينه مره لان شافني اسولف ويه صديقتي واخوها بباب الكليه ومره لان واكفه وحدي بعيد عنه عود اتجنب رزالته حظي جابلي واحد ذبلي رقم وهو تخبل وكام يصيح واني فشلت لان الطلاب انتبهوا علينا واحنا ما صاعدين بالسيارة لان صرت اخاف اصعد وياه ويضل يرزل عفته ومشيت بعيد وما احسه غير يجرني ويحطني بسيارته ويقفل عليه الباب ويكلي مكانج هنا ما تنزلين وما تمشين الا بامر مني صح الموضوع مزعج وتحكمه مزعج بس اقبلها منه وكل شي منه مقبول
مرات احس دوافعه بسبب حب وهاي غيرة بس هو بكل مره يبرر سلوكه بخوف وشعور بالمسؤوليه لان اني مثل بنات اخوه
صار عدنا خط وسجلنا بي واني القهر موتني يعني ما اشوفه بعد اروح للبستان ما اشوفه وماكو اي طريقة نلتقي بيها ضجت من نفسي ومليت ليش احطه ببالي واني ما اخطر على باله ردت انساه وفشلت
التهيت بدوامي ودراستي وشغلت نفسي تقدموا اكثر من واحد لخطبتي ورفضت ومصعب بكل مره يجي ويحاول واصده لحد ما مل ما انطيته مجال وجاب خضير يقنع اهلي ورفضت يكلي انهي عليج كتله هاي اذا تزوجت عود انهي ما اهتميت لاحد ولا لشي صرت اقوى واحس نفسي كبرت بس اللي متأكده منه قلبي حب واحد وهالواحد راح يبقى يدك بالقلب وحتى لو من طرف واحد هم راضيه اني احبه حتى لو من بعيد
علي
مرت اشهر وهاي ما راحت من بالي وامي بس تلح عليه اتزوج واني اتهرب
-ولك يمه شمنتظر ما تكلي لو متزوج ابنك بطولك هسه انت ما ناوي ترحمني تعبت وكبرت اريد اشوف مريتك ووليداتك اريد حس ويايه بالبيت تطلع الصبح وابقى وحدي البيت ياكلني
-يمه مو سولفنا وهذا الموضوع انتهى
-لا ما انتهى واذا انت ما ترضى تتزوج اني ازوجك غصب والله
-هههه بنيه وتغصبيني شلون يعني
-تشوف شلون عليوي والله لا اجبرك
-يمه منج يمه ما تبطلين الا اروح اخطبه للشويب يلا تبطلين مني
-لك اسكت لا اكوم اطبع جلدك بالعصا والله لا عبالك كبرت وصرت قاضي تكبر على امك لو تصير بكد عمرك هذا بعد مره ابقى ارزلك اذا تسولف خرابيطك هذني باجر اخيتك تجي واخذها نروح نخطبلك اني لكيت مره
-هههه
-وجعه تتمضحك يالخايب ما تصيرلك جاره تضل دهري
كمت وبست ايدها وقنعتها تصبر شكم يوم واني اكلها تخطبلي اريد بس اخلص نفسي واصفى للي شاغله البال واصفيها الي
وماكو شكم يوم رجعت من دوامي دخلت من باب البيت طكتني هلهوله وجكليت بوجهي تكلي بالمبارك يمه خطبتلك زينة البنات بيومها روحي رادت تطلع اني ومخططاتي وتدبيري ومراقبتي لساره اشهر حتى احصلها وتكون الي راحت بساعتين من تدبير امي والله الحجيه ناويه تجيب اجلي قبل زواجي
