رواية حرم الاسود الفصل السابع عشر بقلم بتول ابو الليل
حسيت المطر بي نقص هالمرة
مو نفس الشعور قبل فترة
اول مرة اعبر من ضباب لجام
لا اسمك اكتبه ولا عفت ذكرئ
.➛ ✿✿ ✿✿ ✿✿ ✿✿ ➛.
بعدني مداخله صاحلي شخص درت وجهي جان رجال ملثم واكف شكله يخوف رجعت خطوات ليورا واني خايفه
آرون ; لاتخافين مني ممكن احجي وياج شويه
_مـنـ منو انتَ
آرون : موضروري تعرفين أني منوو اجيت حته اسالج عن اليان شلونها؟
_منين تعرف اليان منوو انتَ
آرون : تعاي نصير علئ صفحه ماكدر احجي وياج هنا
_روح منا لاتخليني اصرخ والم عليك الناس كلهاا منوو انتَ ومنين تعرف اليان
آرون : ع كيفج خويه ماريد اضرج بشي الله شاهد بس اريد اسالج عن اليان.
السايق : يلا خويه ورانه شغل الفلوس
_اي عموو هسه
آرون : شكد الكروه
السايق : 3 الف
طلع محفظته وانطاه الفلوس مشه ابو التكسي باوعتله مستغربه منوو هذا وشيريد من اليان
_منوو انتَ
آرون : بس تعالي شويه
مشيت وياه خطوات صرنه علئ صفحه نزع الثام من وجهه باوعلي وكال
آرون : البقيه بحيااتكم
_حياتك الباقيه بس معرفت انتَ منوو شتريد
آرون : اسمي آرون الشخص الي خطف اليان بس رجاء انطيني مجال اكمل كلامي ولاتعيطين وتلمين العالم علينه
فتحت حلكي مصدومه يعني هذا الشخص الي خطفها وحجتلي عنه وهيه تحبه بلعت ريكي بتوتر وگلت
_احجي
آرون : ثقي بالله من عرفت بالخبر كلش زعلت علئ ابو اليان ونكسر خاطري عليها اريد بس احجي وياها شويه اعازيها بس ماعندي فرصه ادخل الهم للبيت ولا اكدر اخليها تطلع واشوفها.
_اليان بحالة صدمة حالياً لاتاكل ولاتشرب ومخلصه يومها كله بجي ماتوقع تكدر تطلع ولاتكدر تحجي وياك حرف.
آرون : زين وصلي سلامي الها گولي الها البقيه بحياتها والله يصبرها ويقويها.
_انشالله
آرون : تسلمين.
_انتَ منين عرفتني وليش لاحكني لهنا؟
آرون : قبل لايتوفه ابو اليان شفت اليان بقت يمكم واعرفت انتِ تكونين وحده من اقاربها.
هزيت راسي بأي وسكتت مالي خلك استفسر منه روحي طالعه مني
آرون : ممكن طلب صغير
_تفضل
آرون : تنطيني رقم اليان
_حته لو انطيتك رقمها مراح تجاوبك الجهاز مغلق ومشمور بالكنتور ومتجاوب أي بشر.
آرون : رقمج انتِ
_انتَ شتريد منهاا مكفاك السويته بيها بسببك هيه هسه خسرت ابوها
آرون : ليش بسببي شمسوي اني
_بسببك هيه تزاعلت ويه ابوها ومات وهوه ماراضي عنهاا وهل شيء مدمر نفسيتها كلش لوو ما انتَ خاطفها جانت كاعده ويه ابوها وشابعه شوف منه حته مالحكت تشوفه وتكعد وياه انتَ سبب بحزنها هسه كل الصوج بيك
دنك راسه وتافف بضوجه سحب نفس قوي وكال
آرون : مجنت اريدها تتزاعل هيه وابوها بس هيه عرفت انو احنه انظلمنه ابوي دخل للسجن بدون ذنب وحاولت تساعدني الاكثر واني ماناسي معروفها ابد طول عمري راح ابقه مدين الهاا وشتريد اني حاضر وهسه اريد رقمج بس حته اطمأن عليها لاكثر لأن ماكدر اوصل الها ولا اكدر اكعد وانتظر.
_ماكدر انطيك رقمي اعتذر
آرون : ترا رجال متزوج اني لاتخافين مني صارلي يومين من تزوجت.
انصدمت من كال تزوجت اذا عرفت اليان راح تنقهر اكثر.
آرون : لو سمحتي بس هل كم يوم وباقي الايام اذا فتحت جهازها اخذ رقمها اني هذاك اليوم نسيت جان المفروض اخذه منهاا.
_تمام
رديتله رقمي سجله عنده ابتسم بهدوء وكالي.
آرون : اشكرج
هزيت راسي بأي عافني وراح بقيت واكفه مكاني واباوع وراه حقها اليان تحبه مبين رجال هادئ وموو من هذول المطلطين مثل تيمور امداني وامدا حضي.
رجعت لبيتنه لفيت الشال عليه زين ودكيت الجرس فتحه اخوي مسلم عقد حواجبه مستغرب
مسلم : اريانا؟
_صباح الخير
مسلم : صباح النور شعجب اجيتي هسه.
_هوه خلصت الفاتحه واليان شويه زينه گلت ارجع شعندي كاعده هناك
مسلم : زين سويتي يلا ادخلي حبيبتي
دخلت للبيت واني كوه امشي احس جسمي كله مكسر وراسي يفتر اريد بس اتقيئ.
_چا ماما وين
مسلم : بعدها نايمه اني وعفاف كاعدين اريد اطلع للشغل
_هاا تمام صاعده لغرفتي محتاج شيء
مسلم : سلامتج
عفته وصعدت لغرفتي دخلت للغرفه وقفلتها عليه نزعت الشال ورحت علئ المرايه اباوع علئ نفسي وابجي
شمسوي بيه ليش هيج شسوه كلشي جان باله اخذه كلشي يريده هوه يرضي شهوته.
هذا حيوان موو بشر حرام ينحسب حاله حال البشر.
تمددت علئ فراشي واني احس بطني تتكطع موتتني ولعبانه نفسي ودايخه
كارهه روحي كلش اريد اموت ورتاح لعبت نفسي كلش كمت اركض دخلت للحمام وبقيت اتقيئ.
راسي احسه انقسم نصين متت منه غسلت ورجعت لفيت نفسي بالحاف.
ارجف صافنه بنطقه حايره شسوي شلون اتصرف مافاهمه أي شيء من حياتي صارر تيمور يمشيني علئ مزاجه شوكت ميريد يفرني باصبع ايده.
اندك باب غرفتي بلعت ريكي بخوف كمت بسرعه لبست شال علئ راسي وفتحت الباب جانت امي.
جميله : هاا ماما رجعتي شلونها اليان
_الحمدالله
جميله : شبيج وشنوو هذا حلكج مجروح شكوو صاير شيء احد ضاربج؟
_اممم لأ
جميله : لعد شبيج احجي ماما منوو وياج
_هوه شسمه صخنت وطلعت هل طكه بحلكي.
جميله : سوده عليه وجهج اصفر وتعبانه كلش.
_ماما
جميله : ها يمه
حضنتها واني ابچي حسيت نفسي حيل ضعيفه اريد شخص يحميني يخلصني من هل عذاب الي اني بيه ضمتني امي عليها مستغربه من حالتي
جميله ; شبيج ماما منوو وياج تيمور مضوجج بشي
_تعبانه كلش اريد اموت
جميله : اسم الله شبيج ولج لاتخوفيني شبيج ماماتي احجيلي
_تيمور ..تيمور
جميله : شبيه؟
بعدني محاجيه دخلت علينه عفاف ابتعدت عن امي واني امسح بعيوني
عفاف : هاا شبيكم
جميله : مدري شبيها بس تبجي
عفاف : اكيد زعلانه علئ اليان خطيه
جميله : والله مادري
عفاف : شلونها اليان شگالت من اجيتي
_متدري بيه من رجعت الكل نايم
جميله : يااا غير تحجين تكولين رايحه شنوو منهزمه منهم شبيج
_لا تيمور يعرف اجيتكم
عفاف : ههههه هوه المهم تيمور
دنكت راسي واني مقهوره وروحي رايحه مني باوعتلي عفاف بستغراب وكالت
عفاف : اريانا ليش لابسه شال؟
_هاا هيج بردانه وخليته علئ راسي
عفاف : اممم بلا انزعي
_لـيش شكوو
جميله : عوفيها مصخنه ولافه روحها لف
عفاف : هههه أي هم صدك
احس عفاف كشفت اكو شيء لأن اني مالبس حجاب سافره واطلع مفرعه.
عفاف : يلا عمه تعالو الريوك جاهز
هزت راسها بأي عافتنه وطلعت من الغرفه لزمت ايدي امي وكالت
جميله : شبيه تيمور دخلت عفاف وماكملتي كلامج
_مابيه شيء بس تزاعلنه
جميله : شسوه
_يحجي ويه بنات عمه
جميله : ههه عادي يمه يصيرن مثل خواته لاتغارين هواي هوه يريدج ويحبج لوو يفكر بوحده منهم ماختارج
هزيت راسي وسكتت ماريد احجي كلشي واصلاً حته لوو حجيت وفضحته مراح استفاد أي شيء كلشي دمر بحياتي.
نزلت ويه امي جان بابا موجود بس مسلم رايح للشغل
_صباح الخير
حازم : هلا بويه صباح النور شوكت رجعتي
_ليوم
حازم ; شلونها اليان
_ع الله مخلصتها بجي ليل نهار وحته متاكل
جميله : بليل نروح عليها اريد اشوفها صارلي يومين مارايحه واحس مسؤليتي اكون وياها
حازم : ليش ماتجيبونها هنا يمنه هم تبقه ويه البنات وهم شويه تطلع من البيت وتنسه الحادثه.
_متقبل تطلع لأي مكان ولاتريد تحجي ويه بشر اني متحجي وياي هواي
حازم : الله يصبرها الصار وياها موو شويه
_آمين
بقينه نتريك سويه كمل بابا ريوك وطلع لشغله اول ماخلصت ريوك غسلت وصعدت لغرفتي احس شيء دافي نزل مني
صعدت اركض للحمام دخلت لگيت ملابسي كلهن دم؟
خليت ايدي علئ حلكي خايفه شديصير موو وقت الدوره ليش ينزل دم مني
شغلت الدوش وبقيت اغسل بنفسي وحاول اوكف الدم بطني صارت تلويني متت من الوجع احس شيء صاار يتكطع بطني كعدت علئ الارض واني ابجي بصوت مسموع
روحي طلعت مني وجع موو طبيعي عبالك مره تولد.
بقيت شيء ساعه كامله بالحمام اغسل بنفسي لفيت نفسي وطلعت اخذت احتياجاتي لبستهن ولبست تراك
رجعت لفراشي واني ارجف كل ذره بجسمي ترجف لميت رجليه علئ صدري واني متمدده اتلوه من وجع بطني.
بقيت اتلوه وابجي خايفه احجي خايفه يعرفون بالصار بينه
خصوصاً اخوي مسلم يتخبل اذا عرف بالصار
اخذت ساعه كامله اني مفرفحه روحي مثل الطير المذبوح اتلوه وابجي دخت من الوجع ونمت.
كعدت علئ لمسات علئ خدي وبوسات خفيفه فتحت عيوني بتعب عيوني مرومه من البچي شفت تيمور كاعد يمي فزيت خاايفه رجعت ليورا واني فاتحه عيووني علئ وسعهن.
تيمور : اسم الله بويه شجاج
_شـ شءء شـتسوي بغرفتي اطلع برااا اطلع
تيمور : شسوي ضل بالي يمج حته شغل ماكدرت اشتغل والله لاكدر اخابرج حاضرتني من كل الارقام خابرت علئ امج گلتلي تعبانه وزعلانه مني واجيت احول عندج واطلب السماح.
_اطلع برا ماريد شيء منك عمري ماشفت انسان اوصخ وانذل منك ولك عين وتحجي شتحس انتَ شلوون تفكر ماكوو مشاعر ماكوو احساس انتَ متحس بالوجع الي اني بيه ولك ميته اليووم انيي احس شيء تكطع بطني اتلوه وابجي واصرخ وماكدر احجي شيء ليششش هيييج ليششش انييي بشنووو أذيتك فهمنييي شسووويتلك.
حضني علئ صدره وهوه يحاول يهديني دفعته عني واني ابجي واشهك
_وخررر عنييي وخر الله ينتقم منك الله لايوفقك بكل حياتك انشالله متشوف يووم حلوو بحياتك لأن دمرت حياتي خليتني اكرهه نفسي ماخليت شيء بحياتي مادمرته واني ممأذيتك بشي.
تيمور : بس اهدي شويه شبيج تخبلتي هسه يسمعون اهلج
_خلي يسمعون ليش تخاف انتَ متخاف من بشر اذا رب العالمين انتَ ماخفت منه تخاف من بشر مستحيل تيمور بعد انتَ
تيمور : استغفرالله ياربي
_اششش لاتذكر اسم الله ع لسانك الوصخ انتَ حرام تذكر اسم الله واحد مثلك ينحسب من الكفار والشياطين.
مسح وجهه وضحك خلاني اتخبل ممستوعبه من شنوو مصنوع.
تيمور : ههههه خلف الله عليج سويتيني كافر
_ع شنوو تضحك مسويتلك نكته انيي ماحجيت شيء جذب انتَ كافر شيطان رب العالمين راح يعاقبك علئ كل تصرف تسوي بحياتك
تيمور : مامسوي شيء حرام حته يعاقبني مرتي وحلالي اكدر اسوي الي يعجبني وياج ليش مكبره الموضوع
_مرتك؟ من شوكت اني مرتك انتَ اخذتني علمود مصالحك علمود ترضي نفسك وغرورك
تيمور : صح اخذتج علئ مصلحه اخذتج عناد وصار كلشي اريده شتكدرين تسوين هسه شتغيرين متكدرين تسوين أي شيء لأن حياتج كلها بين اديه اكدر اتصرف بيها بالي يعجبني
بقيت اباوعله واني كارهه روحي هذا وجهه الحقيقي عمره ماحبني اخذني عناد وعلئ مصلحته.
تيمور : جري عدل احسلج تمام وصيري خوش بنيه ترا من تجيني خبالاتي اسوي اشياء متخطر علئ بال ابليس
_اريد اعرف شيء واحد ليش اني؟ ليش
تيمور : مصالحي مرتبطه بيج واخذتهن كلهن وخلصن حساباتي اخوج الوصلج لهل حاله اني محد يتعاند وياي ولا حته يهددني بشي اخذ كلشي بالقوه.
_شمسوي مسلم؟
تيمور : اذا عندج جرأة اسألي هل سؤال وخلي هوه يجاوبج
_انتَ جاوبني هوه ميحجي كول شمسوي اخوي وليش اخذتني حته تنتقم منه ليش ماصفيت حسابك وياه لـيش دمر حياتي واني مالي ذنب بشي
تيمور : بعد انتِ انسب خيار الي صرتي وخلي شيء بالج انيي ماكرهج احبج وماحب أذيج بس انتِ بيدج جاي دمرين روحج تجرين عدل اكون زين وياج ماتجرين عدل تكرهين عيشتج
_مجاي استوعب والله عمري كله ماتخيلت اشوف وجهك هذا جنت اشوف بيك انسان مثقف وراقي ههه طلع العكس طلعت ابشع بشر بالعالم ميهمك شيء غير نفسك والفلوس راح يجي يوم الي تبجي بيه وتتندم علئ كل تصرف سويته بيه لاتفرح ربنه يمهل ولايهمل راح ادعي عليك ليل نهار لأن اني بنيه بريئه وبسببك دمرت وماعندي سلاح غير ربي راح تندم صدكني راح تذوگ من نفس العذاب الذگته اني.
تيمور : ههههههه شذوگ مثلاً تغتصبيني لوو تهدديني بصوري؟
_عندك هل شيء مضحك مهامك أي شيء وتضحك بس يجي يوم وتبجي وتعرف كلامي كله صح.
تيمور : انتظر هل يوم بفارغ الصبر وشرط تكونين حاضره وتشمتين بيه اوك ههههه
_اول وحده هيه اني
تيمور : عفيه عليج يلا تاخرت علئ شغلي شسوي هم استحي من امج لازم اكون خوش نسيب كدامها.
بقيت ساكته عافني وكام باوعلي ابتسم بحقاره وكال
تيمور : يجي يوم واكسر هذني نظراتج واخليج كل ماتشوفيني دنكين راسج
ابتسمت بهدوء وبقيت اباوعله بثقه هز راسه اليه عافني وطلع من الغرفه.
....
ساهر : لازم يعرف تيمور بهذا الموضوع
قصي : صدكني راح يتخبل اذا عرف بيه
ساهر : منا هوه زين يلطش فد مره خلي يعرف اصلاً هسه هوه الي ترئس علئ الشركه والمسؤل عن كل العقود والشراكات
قصي : خابرني المحامي الصبح وگال لازم ندير الاسهم والعقود كلها بأسم تيمور بس اني كتله ينطي مجال ولايتسرع لأن اذا خلينه كلشي بيد تيمور راح نطلع كلشي ماكوو هذا طماع ياخذ كلشي اله مايبقي شيء
لازم نقسم الحصص بالتساوي وماننطي اكثر من حقه
ساهر : زين واليان شلون؟
قصي : شفت العقد الي مخلي ابوي مسجل نص املاكه باسم اليان والنص الثاني مقسمه علينه احنه الـ 3 يعني 50% باسمها و 50% النه
ساهر : صدك تحجي لوو تشاقه
قصي : تتوقع اتشاقه بهيج موضوع جدي
ساهر : بس هيج ظلم احنه ميطلع النه نص الحصه الي تاخذها اليان واحنه صارلنه سنين نشتغل وتعبانين ودايرين كل امور الشركه وتالي نطلع بربع من المبلغ
هيه شسوت للشركه وتاخذ كل هل حصه والله مادري شكوول عليك يابه.
قصي : بعده تيمور مايدري بالسالفه من يعرف راح يتخبل
تيمور : علئ شنوو اتخبل
دارو وجهم جان واكف بالباب دخل وسد الباب راح كعد علئ مكتب ابوه طلع جكاره ودخن
تيمور : أي كملو كلامكم ليش سكتو من شنو اتخبل احجولي شمسوين وين العقود الي وصيت المحامي عليهن
ساهر : اسمع تيمور مايحقلك دير بالشركه باسمك وحدك احنه حالنه حالك اشتغلنه وتعبنه وهذا حلال ابونه
تيمور : واني هسه شنوو ماكل حصصكم لٱ يابه كل واحد ياخذ حصته بس لاتنسون اني الجبير هنا واني الي راح يتحمل كل المسؤليه يعني حصتي تكون زياده عنكم.
قصي : يازياده يمعود هوه احنه الـ 3 كل حصتنه تطلع 50% لأن ابونه مسجل نص الاملاك باسم بنته اليان
تيمور : نعم ؟؟؟
قصي : مثل ماسمعت ليوم وصلني الاوراق وتاكدت منهم بنفسي شفت ابوي مقسم الحصص مخلي نص الاملاك باسم اليان.
تيمور : مستحيل شنوو نص الاملاك الهاا شمسووويه هيه احنه شتغلنه وتعبنه هيج تجي علئ بارد تاخذ نص الاملاك
ساهر : لاتنسون هيه اختنه خلونه نحجي وياها ونداريها واكيد راح دير كلشي باسمائنه.
تيمور : غلطان انتم ماتعرفونها اول ماتعرف بالفلوس باسمها راح تاخذهن وماتنطي منهم شيء جنت خايف من هل شيء عرفت ابونه ميحبنه ويفرق هواي بنيه وبين بنته بس لاا غلطان موو تيمور الي ينوكل حگه اخذ حصتي وفوكها ربح
قصي : شراح تسوي؟
ساهر : تيمور دير بالك تفكر تفكير واحد تأذي اليان انيي خصمك سمعت البيها مكفيها مصدومه وحالتها حاله.
تيمور : شبيك انتَ شايفني مجرم أذيها تبقه اختي واخاف عليها انتم تاخذون حصصكم واني تعوفولي اليان اقنعها واخليها تسجل كلشي باسمي
قصي : موو ع اساس تكول ماتقبل شلوون راح تقنعها
تيمور : خلو الموضوع وراي ومعليكم اني اعرف شلوون اتصرف،
ساهر : مع هذا الهاا حصه تبقه متاخذ كلشي منهاا لاتنسه هسه هيه مالها غيرنه احنه تبقه اختنه.
تيمور : افتهمنهه ولكعبه افتهمت والحمزه ادري اختنه شبيك لطشت
ساهر : اذكرك خاف ناسي اخليك تستوعب انو الشخص الي تريد تاخذ منه فلوسه هوه موو عدو الك هوه اخوك
تيمور : خوش حبيبي نشكرك علئ النصيحه والمعلومات المفيده هسه خلصتو هذاك الباب اطلعو كل واحد يرجع الشغله وخلوني اركز بشغلي.
باوعوله مراضين عنه عافو وطلعو من المكتب رجع راسه علئ الكرسي وهوه صافن شلوون ياخذ كل حصة اليان ويسجلها بأسمه؟
....
كلام تيمور خلاني اوعه علئ هواي امور افتهمت انو اخذني حته ينتقم من اخوي بس اني موو بنت ابوي اذا ماخليتك تتندم
راح اخليك تحبني وتتعلق بيه واعوفك واخليك تبجي ويحترك گلبك اخليك تذوق العذاب
خلص الحنيه والبرائه ماتفيد ابد انتَ تريد شخص يكون ملعب مثلك شخص يلعب وياك ويرجعلك نفس التصرفات.
كمت علئ حيلي اباوع علئ نفسي بالمرايه عيوني رايحه من البجي
ياترئ شصايرر بين تيمور واخوي وشنوو السر الي خلاه يدمرني عليه.
ماعندي جرأة اسال اخوي بيها عن الموضوع ياريت لوو يحجيلي ويريحلي گلبي يخليني افهم ليش هيج تصرف تيمور وياي.
دخلت للحمام غسلت وجهي واخذت جهازي اتصلت علئ اسينا مساعدتهم اريد أسالها عن اليان
_الوو
اسينا : اهلا وسهلا
_شلونها اليان
اسينا : تعبانه كلش وحته ماتغدت ولاتريكت خلصتها بغرفتها ليوم كله
_اووف هم سألت عني
اسينا : أي سألتني كتلها راحت وسكتت
_تكدرين تنطينها الجهاز اريد احجي وياها
اسينا : قافله الغرفه عليها ماتريد أي شخص يدخل عليها
_ياربي دخيلك خاف بيها شيء فدوة روحي دكي الباب عليها تاكدي منهاا خايفه تسوي شيء بنفسها.
اسينا : تمام هسه اشوفها.
سدت الخط خليت ايدي علئ راسي دايخه شسوي من جهه صديقتي واختي ومن جهه ثانيه تيمور النذل
صرت اكرهه الروحه لهناك بسببه جان المفروض اكون واكفه وياها بهل لحظه بس بسببه اني رجعت.
واكفه ولازمه الجهاز بيدي منتظره ترجع تتصل عليه اسينا اتصل جهازي رقم غريب رفضته توقعته. يكون تيمور
رجع اتصل هم انطيته رفض دزلي رساله كاتب بيها.
آرون : يمعوده ردي شبيج بس اسالج عن اليان وسدي
عرفته آرون اتصلت عليه من اول رنه فتح خط عليه
آرون : الوو
_الوو
آرون : سلام عليكم شلونج خويه
_الحمدالله
آرون : اليان شلونها هم رحتي عليها شفتيها
_لأ مرايحه بس امي فد شويه وتروح عليها وخابرت المساعده الي تشتغل بيتهم تكول ليوم حالتها كلش موزينه لاماكله ولاشاربه وحابسه نفسها بالغرفه وقافلتها عليها متحجي ويه شخص.
آرون : لاحول ولاقوه ألا بالله انتِ ليش ماتروحين يمها خطيه خليج وياها اكيد حاسه بالوحشه وحدها حقها متاكل ولاتشرب مالها واهس ولاكو شخص يهتم بيها ويداريها.
_صارلي اسبوع كاعده وياها هناك ماكدر ابقه اكثرر هم اهلي ميقبلون
آرون : اااخ لوو بس اكدر اوصللـٍهآ جا اخذتها يمي واني بنفسي اهتم بيها
_ليش هل كد مهتم لموضوعها موو متزوج انتَ متخاف مرتك تسمع كلامك
آرون : اليان اخت بالنسبه الي حالها حال رهف متفرق شيء عنهاا وهيه ساعدتني واحس صارت منه وبينه احسها من عائلتي صارت والي تمر بيه حالياً صعب ولازم شخص يوكف وياها واتمنئ لوو تصحلي فرصه واساعدها واداريها قسم بالله احطها بعيوني
_لاتخاف عليها قويه واكيد راح تكدر تتخطى اني وياها ماعوفها اهتم بحياتك وابتعد عنهاا لأن وجودك بحياتها راح يخليها تتأذى اكثر
آرون : ماشي بس رجاء من تصير زينه خليها تحاجيني كلش ضروري احجي وياها.
_الله كريم
آرون : يلا مع السلامه وعذرينه ازعجناج بهيج وقت
_عادي
سد الخط سحبت نفس قوي هل انسان مبين محترم بس ماريده يكون قريب من اليان لأن اذا تقرب منهاا راح تتدمر اكثر هوه متزوج
....
تيمور : ها يوم شلونج
جنان : الحمدالله زينه
تيمور : وين اليان؟
جنان : بغرفتها من الصبح مانزلت
تيمور : ليش
جنان : شمدريني بيها مالها خلك تكعد وياي اعتقد
تيمور ; اني شوصيتج موو كتلج اهتمي بيها هل فترا
جنان : ترا البيه مكفيني مالي خلك تنعوصها تريد تهتم بيها روح عليها لاتجي دوخ راسي
تيمور : استغفرالله مابيكم واحد يريح الگلب
عافها وصعد لغرفة اليان لزم مقبض الباب مانفتح وياه قافله الغرفه عليها دك الباب بهدوء
تيمور : اليان افتحي الباب بويه اريد احجي وياج شويه
ماترد عليه بقه يدك بالباب شويه وفتحت الباب عيونها منفخه وكلهن دموع.
تيمور : وبعدين وياج تموتين روحج هاي دموعج ماترجع ابونه كلنه مكسورين عليه بس ماندمر رواحتنه هيج
اليان : كلكم عدكم سند لأ اني ماعندي غيره هوه كلشي بالنسبه الي.
تيمور : ليش احنه وين رحنه اخوانج مانعوفج ولا نتخله عنج تعاي حبيبتي ننزل جوه تاكلين شيء وترتاحين
هزت راسها برفض عافته وراحت كعدت علئ السرير سحب نفس بقوه وراح علئ كاسه المي طلع من جيبه حبوب شمر حبايه بالمي وانتظرها تموع شال الكلاص واخذه الها
تيمور : هاج اشربي مي ورتاحي شويه
اخذت من ايده الكلاص وشربت المي ابتسم بكل حقاره كعد يمها وكال.
تيمور : شنو رأيج نطلع اني وياج تغيرين جو
دنكت راسها وهزته برفض مسح وجهه بتوتر وكال
تيمور : اليان باوعيلي اذا تبقين هيج تتمرضين.
اليان : اني ميته اصلاً
تيمور : ع راحتج ابقي هنا سوي الي يعجبج.
عافها وطلع من الغرفه ابتسم وهوه يفكر بحصتها شلون راح تكون اله.
....
أليڤ : شبيك احسك مو علئ بعضك صاير شيء؟
آرون : لأ ماكو شيء شويه تعبان
أليڤ : اكيد
آرون : اي
أليڤ : صارلنه يومين من تزوجنه احسك مفرحان ابد مدري ليش
آرون : لاتفكرين هيج يروحي جنت منتظر هل يوم لحظه لحظه وتحقق وصرتي وياي اعرف هملتج هل يومين بس وعيونج الاحبهن حيل مضغوط وشغل ماعندي جاي ادور وماكوو
أليڤ : ليش خليتنه نتزوج اذا ماعندك فلوس تصرف علينه ناسي اختك تريد علاج واني اريد مصروف يومي منين راح دبرلنه هل مصاريف كلها .
آرون : جاي ادور وانشالله الگه كفلت جون بهل موضوع وراح يحجيلي ويه مدير شركتهم بلكي الله يوافق واشتغل وياه
أليڤ : وشكد الراتب
آرون : 250 هيج
أليڤ : نعم ؟ شنوو 250 وين يكفن روحه للسوك ميكفلي شنسوي بيهن انتَ مو ع اساس كملت دراستك واخذت شهاده متقدم علئ وضيفه زينه.
آرون : الوظائف تريد واسطات محد صار يشغل بدون وساطه وفلوس واني لو عندي مجان انتظرت لحد هسه.
أليڤ : لو ادري ممتزوجه باقيه عند اهلي احسلي
آرون : لـيش متزوجه ع طمع انتِ لوو شنوو بالضبط مجاي افهم تصرفاتج كلشي بالج فلوس فلوس اني موو مهم بحياتج متفكرين بيه؟
اليڤ : ليش شبيك حته افكر بيك اني الي وكعت بيها انحرمت من هواي امور ابسط شيء مجاي توفره الي.
آرون : يومين صارلنه من اتزوجنه شبسرعه حكمتي وگلتي ماموفر شيء الج شناقصج هسه انتِ اشو احسن عرس سويتلج وفلوس انطيتج واشتريتي كلشي بالج شتردين اكثرر ماعاجبج وضعي هذاك الباب روحي ارجعي الابوج.
أليڤ : يعني تطردني لو شنوو
آرون ; شوفي أليڤ روحي طالعه لاتزودينها عليه قسم بالله اطلع حركت گلبي بيج اطلعي برا مالي خلك سوالفج تردين تروحين الاهلج مامنعج خليهم يصرفون عليج اذا ماعاجبج وضعي هذا اني تحبيني تتحمليني شون ماني متبقين كل شويه مذكرتني بالفلوس
أليڤ : هوه رايحه الاهلي مستحيل ابقه وياك انتَ اصلاً متحبني لوو تحبني متحجي هيج وياي
عافته وطلعت من الغرفه وهيه تبجي خله ايده علئ راسه وهوه ضايج كعد علئ السرير شويه ودخل ابوه للغرفه.
رحيم : شبيكم بويه ليش مرتك تبجي
آرون : ماكو شيء هيه تتحسس من كلشي تعرفها.
رحيم : كوم راضيها خطيه بعدها عروس تحملها ممتعوده علئ الوضع شويه شويه تتعود عليك وعلئ تصرفاتك كبر عقلك بابا تبقه بنت عمتك
آرون : انشالله
رحيم : سمعت جاسر ميت صدك؟
آرون : اي صارله 8 ايام
رحيم : شلون مات
آرون : مادري يكولون حادث
رحيم : اني اكول مدبريله هل حادث لان هوه عنده هواي اعداء ومنافسين
آرون : والله ماعرف حيل ضايج علئ اليان ماتروح من بالي
رحيم : اليان منوو
آرون : بنته هيه الي ساعدتنه وخلتك تطلع
رحيم : خطيه
آرون ; هيه يتيمة الام وهسه ابوها مات
رحيم : لاحول ولاقوه الا بالله خطيه بويه ماتكدر تخليها تطلع اشكرها علئ السوته الي
آرون : حالتها تعبانه ماتكدر تطلع ولاتحجي ويه بشر
رحيم : بعدها بحاله صدمه لاتضغطون عليها خلوها براحتها.
...
جميله : ها ماما تروحين ويانه
_لأ شسوي رايحه ليوم رجعت روحو انتم واني راسي يوجعني
جميله : تمام
راحت امي هيه وبابا علئ اليان يشوفونها بالي يم اليان وخايفه عليها بس ماكدر اروح مليت من تيمور ومن تصرفاته ويايه
دخلت للحمام غسلت اعتقد صار عندي نزيف لأن الدم الي ينزل مني مو طبيعي ابد
صعدت لغرفتي بدلت ملابسي لبست جبه وشال ونزلت جوه مجان اكو شخص بالبيت غير عفاف مرت اخويه ومسلم هماتين طالع ويه جماعته ساعه 8 بليل
عفاف ; ها وين
_راح اروح للعياده هاي اليمنه احس نفسي مصخنه وراسي موتني من الصبح ولحد هسه مجاي ارتاح
عفاف : ها تمام اخذي وياج ريان يريد يشتري واتصل علئ مسلم ميجاوب عود گلت اوصي يجيبله شيء وياه
_تمام تعال حبيبي
لزمت ايد ريان وطلعنه من البيت العياده قريبه علينه نروح الها مشي بين الاسواق اشتريت لريان ورحنه
دخلت للعياده اخذت باص وبقيت منتظره يجي دوري مكعده ريان بحضني ياكل
شويه وگلتلي الممرضه انو ادخل لزمت ايده ودخلنه سويه.
_سلام عليكم دكتوره
دكتوره : وعليكم السلام حبيبتي تعالي تفضلي شوف منوو جاي علينه ريان الحلوو تعال حبيبي تعال ابوسك
طبعاً الدكتوره تعرفنه لأن صارلنه سنين نراجعها شالت ريان وبوسته وكعدته ع كرسي واجت يمي
دكتورة : أي اريانا كولي شبيج
_عندي نزيف
دكتورة : شنوو ليش ضاربه ابر شيء ماخذه علاج مأثر علئ الدورة مالتج
_هوه شسمه دكتورة اني تزوجت او لبارحه
دكتورة : هاا افتهمتج كومي اصعدي فوك خليني افحصج.
هزيت راسي بأي تمددت علئ السرير رجعت البرده علينه لأن ريان كاعد بالغرفه فحصتني باوعتلي وهيه مصدومه
دكتورة : هذا زوجج صاحي مخبل شمسوي بيج
_بطني موتني والدم مينكطع ابد
دكتورة : ماما لازمج خياط هذا مدمرج دمار شمسوي بيج صدك جذب
بلعت الغصه وسكتت ماكدر اوصف شعوري بهل لحضه كرهت الساعه الي عرفت بيها تيمور ياريتني ميته ولا هل شي صاير وياي ياريت ماوافقت ع هل زواج وخليته يسوي اليوم يريده حته لوو يفضحني اموت واخلص.
دكتورة : راح اخيطج تمام
_لا لا دكتورة اخاف والله ماكدر
دكتوره : لاتخافين اخليلج تخدير لازم تتخيطين اذا تبقين ع هل حاله راح يصير عندج التهاب بالمهبل و تتأذين هواي ومينكطع النزيف.
_ماكو علاجات تفيديني
دكتورة : اني لو اعرف يفيدونج العلاجات ماكلج اخيطج لاتخافين جم اخياط اخدرج وماخليج تحسين بشي.
وافقت لأن مجبورة وماعندي غير هل حل ضربتني ابر غمضت عيوني واني ابجي ليش هيج يصير وياي ليش تيمور دمر حياتي اني وشصاير بينه وبين اخوي.
خيطتني وخلصت تأذيت لأن مامشه التخدير بجسمي هواي بسرعه حسيت بألم.
صرت كوه اتحرك ميته من الوجع كعدت علئ الكرسي واني ابجي.
دكتورة : صدك جذب تبجين من هيج شيء بسيط تصير ماما هسه راح اكتبلج علاج تنزلين تشترينه من الصيدليه وتستمرين عليه وانشالله ترجعلج صحتج ومتحسين بأي ألم.
_اشكرج دكتورة
ريان : عمه اليد ماما
_يلا حبيبي هسه نروح
كتبتلي الدكتوره علاج اخذت الوصفه وطلعت من العياده مريت بالصيدليه اشتريت العلاج فجأه واني امشي بطريقي للبيت تلاكه وياي هيثم الي جان يريد يخطبني باوعلي بنظرات عتب نزلت راسي واني فشلانه.
هيثم : مبروك سمعت انخطبتي
_الله يبارك بيك
هيثم : اتمنالج حياة حلوة
_اشكرك
هيثم : ريان شلونك يحلو
ابتسم ريان شاله بوسه بخدوده بقيت مدنكه راسي جسمي كله يرجف مابيه حته اوكف علئ رجليه نزله وكال
هيثم : الوقت تأخر ارجعي لبيتكم موزين طلعين بهيج ساعه لوحدج.
هزيت راسي بأي لزمت ايد ريان ورجعت لبيتنه ياريت لوو متزوجه هيثم ماكوو منه شخص حباب ويحبني من صدك ويخاف عليه موو مثل هذاك العار تيمور.
دخلت للبيت جان راجع اخوي مسلم راح ريان يركض علئ ابوه شاله وخلاه بحضنه
مسلم : وين جنتي
ريان : عمه بيها اووا
مسلم : شبيج
_رحت للعياده شويه تعبانه
مسلم : اي مبين وجهج اصفر اصعدي رتاحي شويه
هزيت راسي بأي عفتهم وصعدت لغرفتي اخذت من العلاج وتمددت علئ فراشي احس كل جزء بجسمي مكسر ويون عليه
نمت بسرعه لأن تعبانه حيل والعلاج خلاني انعس.
كعدت ثاني يوم بطني توجعني ودم نازل عليه كمت بسرعه للحمام غسلت وبدلت ملابسي.
كرهت روحي من هل سالفه انشالله حوبتي تبهذلك ياتيمور انشالله متشوف يوم حلو بحياتك
فتحت شبابيك غرفتي دخلت الشمس اباوع للساعه بـ 10 الصبح.
نزلت جوه جان ابويه ومسلم طالعين بس ماما وعفاف كاعدات صبحت عليهم ورحت للمطبخ اكلت وشربت جاي كعدت وياهم ماريد يحسون علئ شيء.
_شفتي اليان شلونهاا.
جميله : موزينه ولاحته حجت وياي صايره بس تصفن ومبهذله روحها كلش.
عفاف : والله خطيه انصدمت بموت ابوها
_اي كلش
جميله : سألني عليج تيمور كتله مريضه
_اي خطيه ضال باله
عفاف : موو لبارحه اجانه للبيت شوف شكد يحبها كل تفكيره وياها.
جميله : لعد شون غير خطيبته
_امداني وامدا حضي
عفاف : شنو
_هيج
بقينه نسوالف كلام عادي امي وعفاف ميتات علئ تيمور لأن هوه يغش العالم باسلوبه يسوي نفسه ماكو من اخلاقه.
سوينه غده اتصلت علئ اسينا اسالها عن اليان هم جهازها مغلق.
بقه بالي يمها حيل مقهوره عليها راح تبقه تحت رحمة هل مريض تيمور الله اعلم شلون يعاملها هوه من زمان مايطيقها ويكرها بس جان ابوها مساندها ومسكت الكل هسه منوو يدافع الهاا.
تغدينه وكملنه اتصل جهاز امي جانت ماما بالغرفه مالتها تصلي رحت عليه جان تيمور يتصل سحبت نفس وفتحت خط عليه
تيمور : سلام عليكم
_هلا
تيمور : حلوو هاي مرتي الحلوه شعجب جاوبتيني عاد انتِ متحبين تسوالفين وياي.
_شتريد متصل علئ امي
تيمور : ليش حرام اتصل علئ عمتي؟
_انتَ وين تريد توصل شتريد مني مجاي افهم اخذت كلشي شتريد بعد
تيمور : راح اجيج نطلع سويه عندي موضوع وياج كلش ضروري تعرفينه.
_ماطلع ولاتجي احسن
تيمور : اني ماخذ رأيج اني انطيتج علم حته تجهزين نفسج يلا نص ساعه واكون يمج باي يحلو.
سد الخط احس دمي صار يفور ياربي دخيلك صبرني علئ هل انسان راح ارتكب بيه جريمه.
بقيت كاعده بالصاله والله ماروح عناد بيه شراح يسوي مثلاً
جميله : منو اتصل علئ جهازي
_تيمور
جميله : شيريد
_يكول راح اجيج نطلع
جميله : چا ليش ميخابرج علئ جهازج
_حاضرته
جميله : يااا ليش ولج
_متزاعلين كتلج
جميله : ولكم شصارلكم من انخطبتو وبديتو بالزعل كومي حضري روحج وطلعي وياه غيري جو وانتِ هم مريضه
_ماريد اكعد هنا احسلي
جميله : كومي ولج موو احجي وياج تريد تخرب علئ روحهاا الولد ميت عليج وانتِ تدللين عليه.
_استغفرالله ياربي ماريد اطلع مريضه جبر شنوو
جميله : طلعين غصباً عليج تلعبين علئ العالم انتِ يوميه رافضتلج واحد.
_اروح لغرفتي احسلي
عفت امي وصعدت لغرفتي ضايجه وطالعه روحي بقيت كاعده بالغرفه مقهوره شويه ودخلت عفاف
عفاف : حبيب الگلب جوه وامج كالت خلي تجهز نفسها وتنزل.
_استغفرالله ياربي.
عافتني وطلعت اخذت ملابس بدلت ونزلت جوه جان كاعد الحقير مخلي رجل علئ رجل ويدخن ويسوالف ويه امي من نزلت ع درج ركز بوجهي.
رحت وكفت يم امي واني اتمنئ اخنكه بيدي واموته ورتاح
تيمور : ماكو سلام ؟
_شلونك
تيمور : زين يلا جاهزه نطلع
_ماريد اطلع
تيمور : امج متقبل بهل اسلوب مو صح خاله
جميله : تطلع هسه وياك بس هيه ضايجه موو ماما
سحبت نفس بقوه ياربي صبرني راح امووت ابتسم بحقاره وكام لبس نظاراته مدلي ايده وكال
تيمور : يلا
مالزمت ايده عفته وطلعت من البيت صعدت بالسياره ورا دخل هوه دار وجهه عليه وكال
تيمور : ترا مو سايق عند الخلفوج اني كومي اصعدي يمي
_طالعه وياك علئ اعصابي ماخذني جبر ماميته علئ الطلعه وياك متريد هسه انزل
تيمور : هههه راح اريحج من هل اسلوب
ماعرفت شنوو يقصد شغل السياره وساق بقيت كاتفه اديه بضوجه واباوع من الشباك اخذنه لمطعم
نزل اني هم نزلت دخلنه سويه كعدنه طلب النه عصير.
تيمور : شوفي اني قررت قرار
_شنو ؟
تيمور : بما انو انتِ متحبيني وكارهه وجودي بحياتج وكلشي اسوي وياج بالقوه اني قررت انو
_هسه عرفت اني اكرهك واو معلومه خطيره اييي شنوو قررت بلا.
