رواية الجميلة والوحش ادم واحلام الجزء الثاني الفصل السابع عشر
عند سيف و رولا
سيف وصل عند المول
ونزل من العربيه و فتح الباب ل رولا و رولا نزلت
رولا/استناني هنا وانا هخلص شوبنج وارجع لك
سيف/لا والله مفيش الكلام دا ..انا هدخل معاكي
رولا بصت له/نعم؟ تدخل معايا ليه ان شاءالله
سيف سند ع العربيه/علشان دا شغلي..شكلك بتنسي
رولا وقفت قصاده/اه طبعا شغلك انك توصلني وتاخد بالك مني بس مش للدرجه تبقي فوق دماغي ف المول كمان
سيف /لاء والله ع حد علمي من ادم بيه شغلي اني ابقي معاكي ف كل حته..بس لو مش عاجبك اني داخل معاكي المول هتفهم دا طبعا وهرجعك البيت
وفتح لها باب العربيه
رولا اتنفست بغضب وبتحاول تهدي
رولا بغيظ/خلاص تقدر تدخل معايا
سيف قبل الباب و رولا دخلت المول وسيف راح وراها
وكان المول زحمه جدا زي ما سيف قال ..وطول ما هما ماشين سيف كان بيحمي رولا ب دراعه علشان محدش يخبط فيها او يلمسها ف الزحمه
رولا دخلت محل بيبع دريسات
وسيف دخل معاها
بنت من ال شغالين ف المكان راحت ل رولا بابتسامه
البنت/اقدر اساعد حضرتك ازاي
رولا/عايزه دريس يكون ....
وبدأت تتكلم معاها والبنت بتوريها اجدد كولكشن موجود وسيف واقف ف المحل ف جمب مراقبها ومراقب المكان ف هدوء
رولا اختارت كام دريس ودخلت تقيسهم ف البروفا وقفلت البروفا ب الستاره الموجوده
في شاب كان واقف مع بنت بيشترو لبس و بيبص ع رولا ب اعجاب من وقت ما دخلت
سيف بص ع الشاب دا ولقاه وبيبص ع بروفا رولا ال فيها حته صغيره مفتوحه
سيف راح وقف قدام بروفا يغطيها ب جسمه وبص للشاب بغضب والشاب اتوتر من نظراته وبعد نظره ع البروفا
رولا ف البروفه بتغير و بتكلم نفسها
رولا بغضب/قال شُغله انه يبقي فوق دماغي 24 ساعه قال ..مش فاهمه ايه الدُب ال ظهر ف حياتي فجأه دا بس ياربي
سيف من برا/انا سامعك ع فكره
رولا بصدمه برقت
وبعدت الستاره شويه وبصت لقت سيف مديلها ضهرها
رولا/انت بتعمل ايه هنا
سيف/ها خلصتي ولا لسه
رولا بغيظ/لاء لسه
وقفلت الستاره تاني
رولا وهي بتعدل الفستان ال لبسته
رولا/ممكن تروح تنقي فستان او حاجه ل حبيبتك بدل ما انت واقف كدا ..بالمره تحسسها ان عندك مشاعر ي حضره البودي جارد
سيف من برا/طبعا انتي مفكره ان كل الناس زيك تقدر تشتري فساتين زي دي وب السعر دا
رولا بلا مبالاه/ايه المشكله
سيف ابتسم وهز راسه بمعني مفيش فايده
سيف/حق فستان من ال انتو بتشتروه احنا نقدر ندفع بيه إيجار البيت لمده 5 شهور
رولا/متبالغش اكتر لو حابب يعني
سيف ابتسم
سيف/ع فكره انا ماشي من هنا خلال يومين بالكتير
رولا/تمشي فين
سيف/احمد صاحبي هيسفرني برا البلد ..صحيح مش هعرف اسافر ب طياره عادي علشان ادم بيه واخد الباسبور والبطاقة حتي الفلوس بيديني مصروف زي العيال ..وهسافر ب مركب..بس مش مشكله المهم اني همشي من هنا
رولا/تصدق دا اكتر خبر بيفرح سمعته ف حياتي. اخيرا يارب هخلص منك
سيف ابتسم/طب انجزي يلا
ورولا فتحت الستاره بعد ما لبست الدريس
رولا/خلصت
سيف لف لها وبص لها من تحت ل فوق ب اعجاب واضح مقدرش يخبيه
رولا كان شكلها حلو اوي
لابسه دريس نبيتي ضيق وطويل و كات
رولا /انا كدا كدا عارفه اني حلوه انت مش اول ولا اخر واحده يبص لي بالطريقه دي ..بس ياريت لو تبعد شويه علشان اشوف نفسي قدام المرايه الكبيره
سيف انتبه وبعد عنها ومرر ايده ف شعره بتوتر
و رولا راحت تبص ف المرايه الكبيره الموجوده ف المحل وبتعدل شعرها
ونفس الشاب لسه بيبص لها وسيف بيحاول يتحكم ف اعصابه علشان ميعملش مشكله و رولا معاه
سيف بص ع الشاب بغضب ومسح وشه ب ايده وراح ل رولا قبل ما يرتكب جريمه
سيف/يلا لو خلصتي وعجبك ياريت ناخده ونمشي
رولا وهي بتبص ع نفسها ف المرايه/اه ما طبعا انت مستعجل ع حبيبتك ..متقلقش انا كمان عايزه اخلص ف اسرع وقت علشان اتخلص منك
سيف/معنديش حبيبه
رولا وقفت قصاده وبتعاتب نفسها/غريبه ي رولا ..ازاي توقعتي ان عنده حبيبه ..ما طبيعي مفيش واحده هتستحمل الُدب دا اصلا
وبصت له ف عينه و ابتسمت غيظا فيه و سيف سرح ف جمال عيونها وجمالها ورولا مشيت من قدامه وراحت البروفا
سيف ابتسم وبيقول ف نفسه لو حد تاني غيرها استجرأ يقوله كلام من دا كان عمل منه اتنين حتي لو ف إطار الشغل ومش فاهم ازاي متقبل الكلام من رولا عادي كدا
سيف بيكلم نفسه/ماشي..عيونك الحلوه دي تغفر لك اي حاجه عامة
في الكومباوند
ميرا قاعده ف الصالون بتشرب حاجه دافيه وبتتفرج ع التلفزيون
ياسين نزل من فوق بعد ما غير هدومه
ياسين/امال بابا واحلام فين
ميرا من غير ما تبصله/ف اوضتهم
ياسين بصلها وابتسم/طب هاتي بوسه قبل ما اخرج
وراح لها
ميرا بزعل/لاء اوعي انت زعقت لي الصبح مش هديلك حاجه
ياسين ابتسم وقرب منها/يبت هاتي بوسه والله هصالحك
ميرا/لاء بقولك اوعي
ياسين باس خدها وراسها وحضنها
ياسين/انا اسف مش هزعقلك تاني والله..وبعدين انتي ال بتستفزيني
ميرا طلعت من حضنه/والله؟
ياسين ابتسم وخدها ف حضنه تاني/خلاص بقي انا اسف
وباس راسها
ميرا ابتسمت/ ماشي خلاص سامحتك
وباست خده
ياسين/ينهار ابيض..احلي بوسه باخدها ف حياتي
وباس خدها وراسها وميرا ابتسمت
ادم واحلام نزلو من فوق بعد ما غيرو هدومهم
ميرا ابتسمت/ايه دا رايحين فين وانتو حلوين اوي كدا
احلام ابتسمت/هنروح السينما ونتعشي برا
ياسين صفر ب اعجاب /لالا مقدرش ع الحلاوه دي ي احلام والله ...ايه الحلاوه دي
ومسك ايد احلام ولففها
ياسين/قمر وحياه ربنا قمر
وخدها ف حضنه وباس خدها
احلام ابتسمت وباست خده/روح قلبي
ياسين/والمصحف ي ادم يبختك
ادم شد احلام من حضن ياسين بغيره و خدها ف حضنه
ادم/يبختي طبعا ..خليك ف حالك انت وملكش دعوه بمراتي
ياسين /ماشي يعم حقك والله
ادم/انت رايح ع فين كدا
ياسين/خارج مع صحابي
ادم/لا مفيش خروج..انت هتقعد مع اخواتك هنا لحد ما ارجع علشان ميفضلوش لوحدهم
ياسين/يعني ايه بقي الكلام دا...انا اتفقت مع صحابي خلاص ..وبعدين هما هيحصل لهم ايه يعني وكل الأمن دول برا
ادم/ياسين...انا قولت ال عندي خلاص ..الغي مع صحابك واقعد مع اخواتك هنا..و فريده ورولا كلمتهم وشويه ويبقو ع وصول
ياسين /حاضر ي ادم بيه..انت تؤمر بس
ادم باس راس ميرا/خلو بالكم من نفسكم
ميرا ابتسمت/حاضر وانتو انبسطوا
احلام ابتسمت /يلا مع السلامة
وادم مسك ايد احلام وطلعو من البيت
ياسين ل ميرا/عاجبك كدا
ميرا ابتسمت/احسن..انا عارفه انك خارج مع واحده مش صحابك ولا حاجه ف عادي يعني مش لازم تقابلها النهارده
ياسين/طب اخرسي بقي
وموبايله رن
ياسين طلع موبايله من جيبه
ميرا ابتسمت/هي صح؟سيبك منها واطلب لي تشيز كيك بما اننا قاعدين مع بعض
ياسين حط الموبايل ع ودنه يرد وشاور ل ميرا ب معني هخلص وهوريكي
ميرا ضحكت
وياسين راح يرد ف البلكونه
موبايل ميرا رن وكان مراد
ميرا ردت
ميرا/عايز ايه ي مراد
مراد ابتسم/وحشتني ي روح قلب مراد
ميرا/وانت موحشتنيش ع فكره
مراد ابتسم/هتفضلي تعامليني ب القسوه دي طيب ..والله العظيم الشغل كتير وغصب عني
ميرا بزعل/ايوا ..علشان تقريبا كدا الشغل اهم مني..بقالنا كتير متقابلناش
مراد/..شغل ايه دا ال اهم منك؟مفيش اي حاجه ف الكون اهم منك ي ميرا
ميرا ابتسمت
مراد/حقك عليا والله الشغل كتير اوي ف الشركه اليومين دول وانا مش زي الموظفين يعني مليش معاد محدد امشي فيه ولازم اتأكد ان كل الشغل مظبوط قبل ما امشي
ميرا /انت وحشتني...مكنتش اعرف ان لو عدي كام يوم مشوفتكش فيهم هتضايق اوي كدا
مراد ابتسم بحب ومش مصدق انه بيسمع الكلام دا من حب عمره
مراد ابتسم/حقك عليا...مش هسمح اني انشغل عنك تاني ..انا جايب لك سوشي وجايلك ف الطريق ع فكره
ميرا ابتسمت/قول والله
مراد ابتسم/والله..مقدرش مشوفكيش كل دا اصلا
ميرا ابتسمت/ماشي هستناك..جيب لي تشيز كيك وانت جاي
مراد وهو سايق /من عنيا.. اجيب لك ايه تاني
ميرا ابتسمت /لا خلاص كدا كفايه
في المول
رولا ماشيه ف المول وسيف وراها وشايل لها كل الشنط ال فيها الحاجات ال اشترتها ورولا شايله شنطه واحده ال فيها الفستان مش عارفه تهرب منه متوقعتش انه يكون معاها خطوه ب خطوه للدرجه دي
سيف بص ف الساعه/مش كفايه النهارده..الساعه داخله ع 9
رولا وقفت وبصت له/ so ؟(وإذا)
سيف/لازم تبقي ف البيت 10
رولا/لازم ابقي ف البيت 10 والساعه 9..ف لسه معانا وقت..آه ولو انت تعبت ممكن تستناني ف العربيه
سيف/لا انا متعبتش.. بس لازم نمشي حالا علشان أوامر ادم بيه انك تبقي ف البيت قبل 10
رولا بصت له بغيظ
رولا بتفكير/ي تري انا ظلمت مين علشان ربنا يبتليني بيك...انا اكيد عملت ف حد ذنب كبير ودا تكفير عن ذنوبي
سيف ضحك بسخريه /انا واثق
رولا بصتله بغضب/قصدك ايه..قصدك اني بمشي اغلط ف الناس يعني؟
سيف/لا ل سمح الله انا مقولتش كدا ..ويلا اتفضلي قدامي من غير عيند ..كفايه كدا هنرجع البيت
رولا ربعت ايدها وابتسمت /ولو ممشتش دلوقتي هتعمل ايه يعني؟استني خليني اجاوب..مش هتعرف تعمل اي حاجه دا غير اني اسمي رولا هانم والمفروض تقولي حضرتك انا مبلعبش معاك ف الشارع ع فكره
سيف طلع الموبايل /صح ي رولا هانم مش من حقي طبعا اعمل حاجه بس نقدر نتصل ب ادم بيه نقوله ان حضرتك عايزه تتأخري شويه
وكان هيتصل ب ادم
رولا بغيظ/خلاص استني..هنمشي
سيف ابتسم وشاور لها ناحيه باب الخروج علشان تمشي قدامه
رولا بغضب شيلته الشنطه ال معاها
سيف/ايوا هاتيها ل تكون تقيله عليكي
رولا بغيظ مشيت بتجاه باب الخروج وسيف ابتسم وراح وراها
عند العربيه سيف فتح الباب ال ورا حط شنط رولا
ورولا كانت هتركب في شاب كان مراقبها من بعيد وعدي بسرعه من جمبها وشد السلسله ال الماظ ال مكتوب عليها اسمها من ع رقبتها وجري
رولا بخضه/السلسله
سيف رمي الشنط ال معاه ف العربيه بسرعه وجري ورا الشاب والشاب كان بيجري بسرعه بخوف و سيف لحقه ومسكه واخد منه السلسله وضربه بوكس وقعه ع الأرض
الحرامي بخوف/سبني..سبني بالله عليك انا اسف والله
سيف بغضب/اسف صح.. وحياه امك ل اندمك ع ال عملته دا
وشده من ع الارض تاني
وضربه ب الروسيه والشاب وقع ع الارض بوجع
والناس كانت بتتفرج والامن ال كان قدام المول راح لهم بسرعه
سيف لف دراع الحرامي ورا ضهره
راجل الامن/خلاص سيبه حضرتك واحنا هنتصرف معاه
سيف افتكر رولا ال سايبها لوحدها وساب الحرامي بغضب و الأمن خدوه و سيف راح ل رولا بسرعه
رولا كانت لسه واقفه مكانها عند العربيه مصدومه و بتحاول تاخد نفسها براحه لانها لما بتخاف مبتقدرش تاخد نفسها
سيف بقلق/رولا انتي كويسه؟ رولا
رولا واقفه مش عارفه تاخد نفسها
سيف فتح باب العربيه بسرعه
و مسك ايدها بقلق و قعدها ع طرف الكرسي
وركع ع ركبته علشان يبقي ف مستواها ومسك ايدها وبصلها ف عينها وبيحاول يهديها ورولا بتحاول تاخد نفسها
سيف بقلق /رولا ..رولا اهدي وبصيلي
رولا بصت له ف عينه وهي بتحاول تاخد نفسها
سيف/اتنفسي براحه...يلا اتنفسي معايا براحه
وبدأ يتنفس وهي بدأت تقلده وتتنفس بهدوء
سيف/اتنفسي براحه.. اتنفسي زيي..ايوا ايوا شاطره
رولا بتعمل زي ما بيقول لها
وبدأت تحس انها احسن
سيف باصص ف عيونها/انا مش هسيبك..متخافيش..انا معاكي..مفيش اي حاجه خلاص
رولا/م مايه
سيف قام بسرعه وجاب لها ازازه مايه من الموجوده جمبها ع تبلوه العربيه وكان هيسيب ايدها بس رولا ماسكه ايده بقوه وبخوف
سيف /متخافيش انا موجود..مش هسيبك
و فتح الازازه ب ايده التانيه وبدأ يساعد رولا تشرب براحه و شربت
سيف وهو قدامها ولسه ماسك ايدها
سيف/انتي كويسه؟
رولا هزت راسها ب اه /ا اه الحمد لله بقيت احسن
وانتبهت
رولا بتوتر/السلسله ..السلسله ال بابي جبهالي
سيف /متخافيش ..السلسله معايا اهي.. اهدي
وطلعها من جيبه و رولا سابت ايده وخدتها واتنهدت براحه
سيف ابتسم/شكلها غاليه عليكي
رولا بصت ل السلسله ال ف ايدها
رولا ابتسمت وبصت ل سيف/اه ..دي اول هديه من بابي ..بحبها اوي..لبسهالي انا و فريده وميرا من واحنا صغيرين ..حتي مامي لابسه واحده زيها ومبنخلعهاش ابدا
سيف ابتسم
رولا /شكرا ي سيف..لو كانت اتسرقت كنت هزعل اوي
سيف/ع ايه بس ..دا واجبي
رولا ابتسمت ولبست السلسله
سيف/يلا علشان نمشي
رولا/اه يلا بينا
وسيف ركبها جمبه ف العربيه وقفل الباب
وراح يركب مكانه الناحيه التانيه
في الكومباوند
ميرا وفريده قاعدين ف الصالون بعد ما زين وصل فريده ل حد هنا
ميرا بصدمه وبفرحه/بتهزري اتغديتو سوا لوحدكم؟اتكلمتو ف ايه ها؟قولتو ايه وعملتو ايه
فريده/ششش وطي صوتك ياسين هيسمع ..انا صحيح قايله ل بابي بس ياسين ممكن يعلق ع الموضوع
ميرا وطت صوتها/حاضر والله خلاص
فريده ابتسمت/انا كنت مبسوطه اوي اوي ي ميرا
ميرا بحماس/طب احكيلي يلا مش قادره استني
فريده/
هحكي لكم كل حاجه..فين رولا
ميرا/رولا لسه بتعمل شوبنج
والجرز رن
ميرا /شكلها هي ..هروح افتح علشان الخدم خلصو وقت شغلهم
وقامت تفتح وكان مراد وشايل ف ايده أكياس السوشي والتشيز كيك
ميرا بابتسامه/مراد
مراد ابتسم/وحشتيني
ميرا بابتسامه /وانت كمان..مش مصدقه انك حتي بعد يوم الشغل الصعب والطويل دا جيت علشان تشوفني
مراد مسك ايدها وباسها/انا اعمل اي حاجه علشان اشوفك
ميرا ابتسمت/تعالي يلا ادخل
مراد دخل وميرا قفلت الباب ودخلت وراه
فريده ابتسمت/مراد ازيك
مراد ابتسم/انا زي الفل انتي عامله ايه
فريده/الحمد لله والله
مراد حط الاكياس ع الطربيزه وقعد جمبهم
ميرا /جبت التشز كيك ولا نسيت
مراد ابتسم /جبته طبعا
فريده ابتسمت/ايه دا الله وجبت سوشي كمان
وبداو يفتحو أكياس السوشي
مراد/الف هنا انا جايب لكم كتير وجايب ل رولا علبه تاكلها لما تيجي
فريده وهي بتاكل ب الشوب ستيك/والله انت اخ مفيش منك
ميرا وهي بتاكل/دي حقيقه
مراد ابتسم/الف هنا
..امال ياسين فين
ميرا/ف اوضته بيغير
ياسين نزل من اوضته بعد ما غير هدومه
ياسين ابتسم/اخويا حبيب قلبي..وحشتني موت والله
مراد/بطل كدب بس ..بقالك اكتر من يومين متصلتش تشوف اخوك عايش ولا ميت اصلا
ياسين /بعد الشر عليك ي حبيب قلبي ..حقك عليا انشغلت مع صحابي شويه
وراح لهم
ياسين باس راس فريده ال بتاكل
ياسين/حمد لله ع السلامه...رجعتي امتي
فريده ابتسمت/لسه جايه حالا
ياسين قعد وبص ع السوشي ال ميرا وفريده بياكلوه
ياسين/استغفر الله ..البتاع دا عمري ما حبيته..مش فاهم بتحبوه ع ايه
مراد/ولا انا والله.. انا جايبه علشان البنات
ياسين/تعالي نطلب اكل بقي بما اني مخرجتش النهارده وانت شكلك مكلتش
مراد/ماشي..خالو لسه برا
ياسين/اه خرج هو واحلام شكلهم مطولين
ياسين بص ل فريده
ياسين/اتأخرتي ليه صحيح ف التدريب كدا..انتي ف العادي مبتتأخريش
فريده/احم..منا ..روحت اكل بعد التدريب يعني كنت بتغدي
ياسين/مع مين؟
فريده بصت ل ميرا
وميرا بصت لها
فريده معرفتش تكدب/اتغديت بعد التدريب مع زين..اقصد استاذ زين ال شوفته ف الشركه
ياسين ومراد بصولها
مراد/يعني ايه..ويطلع مين زين دا ان شاءالله
ياسين بغيره/مش فاهم خارجه معاه ليه لوحدكم
ميرا/احم .مديرها ف الشركه مالكم ي جماعه ايه ال حصل..ع فكره هي استأذنت من بابي ووافق يعني
ياسين/مين دا ال وافق..ادم وافق تروح تتغدي مع حد غريب؟ ال هو ازاي يعني
فريده بتوتر/الله ايه ال حصل يعني للتحقيق دا كله..كنت ف ميتنج معاه برا وبعدين قالي نتغدي استأذنت من بابي وقالي ماشي ..هو تحقيق بقي ولا ايه ..انا هطلع اوضتي
وقامت
مراد/ي حبيبتي ولا تحقيق ولا حاجه احنا بنتطمن بس .. خليكي طيب كملي اكلك
فريده اتنهدت/ماشي هطلع اغير وانزل تاني
ميرا/طب متتأخريش علشان مخلصش السوشي كله
فريده/حاضر
وطلعت
ياسين شاور ع الاكل/هتاكلي كل دا لوحدك؟ي طفسه
ميرا /ايوا ايه المشكله
وكملت اكل
مراد /خليك ف حالك يالا وملكش دعوه بيها
ياسين سند ضهره وهو ماسك الموبايل/ماشي ...انا طلبت لنا اكل عامة
قدام الكومباوند
سيف ركن العربيه و رولا نزلت و سيف نزل من العربيه وجاب لها الشنط ال فيها الحاجات اشترتهم
ورولا اخدتهم
رولا كانت هتمشي وبعدين رجعت ووقفت قصاد سيف
رولا بصت ل سيف/شكرا
سيف ابتسم/ع ايه ..لو علشان السلسله ف قولت لك ان دا واجبي اني احميكي
رولا/لاء..علشان ساعدتني ف ضيق التنفس ال حصلي ..مش عارفه لو مكنتش موجود كان هيحصلي ايه
سيف/الموضوع دا بيحصلك من وانتي صغيره
رولا هزت راسها ب لاء/حاجه حصلت ف حياتي من كام سنه ومن وقتها الموضوع دا بيحصلي كل فتره .بابي بس ال بيعرف يتعامل مع الموضوع دا وبيعرف يهديني ...المهم يعني شكرا
سيف ابتسم
سيف/انا مش متخيل ان رولا هانم بتشكرني لاء وبتتكلم معايا زي البني ادمين كمان
رولا بغضب/تصدق ان انا غلطانه ..وبعدين ايه بتتكلم زي البني ادمين دي هو انا مش بني ادمه
وكانت هتمشي
سيف ابتسم ووقف قصادها يمنعها تمشي/اهدي ..انا بهزر
و فريده ف اوضتها غيرت هدومها و وبصت من الشباك شافتهم واقفين يتكلمو ف هدوء ع غير العاده وابتسمت
عند رولا
سيف بصلها/انا اسف بهزر معاكي مش قصدي اضايقك...وبعدين ي ستي استحمليني دا انا حتي يومين وماشي
رولا/صاحبك دا هياخدك امتي
سيف/بكره هيبدأ يقولي هنتحرك ازاي
رولا/ماشي. متقلقش مش هقول ل بابي اي حاجه..علشان بس اخلص منك وكمان ارجع حره من غير حراسه
سيف ابتسم/عارف انك مش هتقولي
رولا/تصبح ع خير ي حضره البودي جارد
ومشيت ودخلت البيت وسيف ابتسم
