رواية في ذمة الغريب الفصل السابع عشر 17 بقلم كنوز

#في_ذمة_الغريب 

#بقلمي_الكاتبة_كنوز 

#الجزء١٧

تصويت و تعليق بين الفقرات لطفاً ✨

━━━━━━━━━ ⚖ ━━━━━━━━━

لا يهمك حجي العالم

ركز بيه بس وحدي

محد مثلي بيك يموت

لا قبلي ولا بعدي

أواجه كل شي اني وياك

لو كل البشر ضدي

━━━━━━━━━ ⚖ ━━━━━━━━━

اخذ مني الورقة بساع رجعها للفايل وع وجه إبتسامة انتصار

:: عاشت ايدج هسه عجبتيني

لميت أطراف العباية ع جسمي شما احاول بردانة رجعت كعدت بنفس مكاني وهو جاب بطل المي خلى يمي وگال 

:: لا تخافين ما راح اوديج للمركز ولا يحققون وياج ولا يعذبونج الصبح راح اصعدج محكمة و تنتهي شغلتج لا غفار يتجازا بسببج ولا انتِ تطلبين بين الشرطة

طلع يدندن بلحن قديم بنشوة انتصار گمت اسمع طگة اسناني من البرد

بداخلي ثنين واحد يلوم بيّه شلون خليته ينول مراده و وقعت ع شي ما مسويته و الثاني الجانب الضعيف يأدي فعلي حتى اخلص من كل هذا التعب

زفرت انفاسي بتعب جاثم ع صدري و رجيت راسي ع حايط تعبت من كلشي و راسي موتني من الضربة مالته اريد بس اغفى شوية 

فزيت من غفوتي جسمي كله مكسر عبالك داعمتني سيارة رگبتي متشنجة لان نمت اني گاعدة 

شفت بطل المي گدامي 

فتحته شربته كله مرة وحدة من عطشي احس روحي جنت بصحراء امشي 

:: يله گومي گبل لا يجون الولد لهناه 

گمت گوه ادوس ع رجلية مجبنات طلعت لفحني الهوى بارد واني عرگانة اقشعر جسمي.. الصبح توه طالع حتى شمس بعدها ما شارقة 

يشغل بسيارته ما تشتغل ...فتح البنيد يدعكس بيه 

الروح عزيزة حتى اللي يريد ينهي حياته بنفسه بآخر لحظة يتراج اشتغلت السيارة وهو گاعد ورا الستيرن اشرلي 

صارت عيني ع الفايل اللي بيه الإفادة مخلي ع حاوية اللي بالباب بأهمال بعد ما حصل التوقيع و أمن من جهتي الاستسلام 

تقربت شوية شوية وكفت يم الحاوية عيني عليه خاف يلتفت وعين ع فايل لحد ما أخذت جوه عباتي اريد ادخل للبيت صاح فززني 

:: وووووين 

:: بس اعدل حجابي ورا الباب 

هز راسه اي رجع راسه لسيارة واني دخلت اگلب بالاوراق من التوتر اديَّه ترتعش الورقة گدامي وما اشاوفها رجعت مرة ثانية وحدة وحدة ادقق بيهن لحد ما عرفتها 

اسحب بيها كابسها وياه الفايل شگيتهاو عقجتها بيدي سمعت صوته يدردم ضميته بساع جوه عباتي دخل يعارك ذبان وجه يدور 

:: وينه الكائنات متأكد انا طلعته وياي 

سكتت اخاف احجي كلمة واجفص  دخل ليجوه طلعت اريد ارجعه لنفس مكانه 

خفت لا يشك بيه رجعت شمرته ع مولدة و وكفت ع صفحة گلبي يدگ و صخنت الحرارة وصلت لراسي من الارتباك 

طلع يرعد من صارت عينه ع فايل هدا أخذه و سبقني لسيارة 

:: يله ما تصعدين شمنتظرة 

تراجعت خطوة عنه كأن من نمت وصحيت... صحيت شخص ثاني رافض الخنوع لظلم 

:: ما اروح 

:: شني ؟؟

نزل من السيارة راگع بابها بغضب يتقدم خطوة واني أتراجع خطوتين 

:: اني ما جنت اريد أوقع ع إفادة انت جبرتني 

:: شني جاي العب وياج انا يله امشي صعدي 

:: اذا اخذتني للمحكمة غصب اكول للقاضي انت عذبتني و جبرتني أوقع ع أوراق 

:: امشي جدامي لا تخبليني عليج وتخليني صدك اعذبج 

من شاف الرفض جوابي لزمني من ايدي جرها حيل حسيت الكف نفصخ عن العضد بوجع رغم كل ألمي قاومته نتلت أيدي من ايده حيل وصرخت بوجه 

:: كم مرة گتلك لا تلمسني 

عافني وفتح باب السيارة يأشر بمعني صعدي ويحجي من بين أسنانه بصوت حاد و لهجة أمر 

:: تصعدين لو اخليج تصعدين بطريقتي... اختاري 

باوعت اله و رجعت اناظري لشارع استغليت بعده عني و سرعت بخطواتي عاقدة النية اشرد و ركضت گلبي صار مثل طبول الحرب تقرع 

اركض و التفتت ليورا اشوفه بعده واگف بجانب السيارة استغربت ما اجه وراي گلت بداخلي يمكن عافني 

بعد خطوات عن الشارع العام بس سمعت صوت سيارة اجه بتجاهي بقوة وصوته وراي مباشر 

:: ترجعين لو اسحكج وعلي 

ما سمعت اله ركضت و عيوني تدور اريدلي احد يساعدني ماكو منطقة معزولة فارغة  شفت رجال متوسط العمر مستطرق ركضت اله بلهفة استنجد بيه 

:: عمو عليك الله ساعدني هذا الرجال اله ساعة يمشي وراي و يگلي صعدي صعدي 

بدون تردد خلاني ورا ظهره و وكف بوجه قسيم اللي نزل من سيارته عاقج وجه زمخ بيه الرجال رافع ايده بوجه بتهديد 

:: ما تستحي ع شاربك ما تكول تطلع بعرضك من تلحگ بنية 

:: عمي ا.. 

قطع كلامه الرجال بنتر و موبايله بيده يرزل بيه و يدور بالأرقام 

:: عمي انتم هذا الجيل بس الله يستر منكم لا السافرة خلصانه منكم لا الابسة عباية أهلكم انطوكم خبز وونسوا يربوكم 

مسح قسيم ع وجه بضيق مستغل الرجال مدنگ راسه يأشرلي ع رگبة بمعنى الذبح واني ااشر ع رجال بمعنى اخلي يذبحك 

:: عمي بس خل افهمك 

:: لا تفهمني ولا افهمك هسه راح ادگ ع نجدة وتفاهم وياهم عود.. بله ما استحيت ها عرض افادك تخوف بنية بعز النهار لعد بليل شسوون 

الرجال يحجي واني اهز براسي ورا أأيد كلامه 

:: اي عمو  والله متت خوف يبست بدمي من ورا

مسح ع لحيته اللي حالقها و سوا إشارة بيده بمعنى بسيطة بقينه بالشارع الرجال رفض رفض قاطع يتفاهم وياه لو يعوفني و يمشي 

وصلت النجدة عيوني عليه لا يگول الهم هي عليها القاء قبض اني وين و وكعت روحي دخيلك ربي 

ترك الرجال و راح يحجي وياه ضابط النجدة يتهامس وياه دار الضابط راسه علينه أشر لشرطة اللي وياه بيده تقدموا أخذوا الرجال صعدوا بالسيارة 

گبل لا انطق بكلمة لزمني من ايدي ضاغط حيل طابگ اصابعه ع عظم 

:: اشش ولا حس ولا نفس وعلي بس حركة وحدة منج اسلمنج الهم 

سكتت لا حول ولا قوة وهو گال لضابط النجدة قبل لا يروح 

قسيم :: مثل ما گتلك من توصل المركز اخلي سبيله

:: صار سيدي 

قانونهم و قوتهم سارية ع ضعفاء و للحظة تخيلت بنية بمكاني ولنفرض ما عدها جريمة لا متهمة لا هاربة هم يخلوها هيج و يمشون بس لان الطرف الثاني بالدولة 

دفعني لسيارة يهمس بصوت حاد 

:: حمدي ربج الف مرة طولت خلگ وياج غير واحد يسلمج ويخلص منج يعذبونج يشيلونج فلقة ما يهتم 

صرخت بوجه انطي طينته بخده يمكن كلها تخاف منه وما تحجي اله عيوبه واليوم اريد اخليهن كلهن كدامه 

:: انت واحد منفصم و تناقض حتى نفسك و تصرفاتك وكلامك شي ما يشبه شي تگول جبتج لهنا حتى لا يعذبوج بالتحقيق وانت من البارحة لليوم كل شوية ضاربني و تريدني أوقع ع كلام ما گايلته 

عبالك دا امدح بيه اني احجي وهو يبتسم متستمع وتالي كلامي گال يرجع نفس الذم اللي 

:: شلون انتِ بليل تعترفين و توقعين والصبح تسحبين كلامج و تصيرين لبوة بوجهي 

:: هذا العندي گتلك ما اروح وياك لو تبقى العمر كله حابسني هنا 

:: اخر كلام 

:: اخر كلام 

رجعني للبيت..

بس هالمرة مو لنفس الغرفة.

غرفة انقبض گلبي من مجرد وكفتي على عتبتها.

مابيها شباك... ولا حتى فتحة تهوية

ريحة الرطوبة تخنگ والعفن ماكل الجدران 

دفعني للداخل، ومن سد الباب...

ظلمة هندس لدرجة إيدي الگدام وجهي ما گدرت أشوفها

بقيت أتلمس  وأمشي بخوف، لحد ما طخيت بالحايط وكعدت يمه،اضم رجليّه لصدري وأحاول أهدّي رجفتي

.

بالبداية ظنيت العقاب سهل... مجرد غرفة مظلمة.

بس الدقايق مرت... وصارت ساعات.

بعدها ضعت.

بعد ما أعرف هذا ليل لو نهار، شكد صارلي هنا ساعات.. يوم... يومين 

عيوني بدت توجعني من الظلام، وأطرافي تنمل من البرد والخوف وقلة الحركة... 

حاولت أسيطر على نفسي اقرا ايات حتى لا تجيني نوبة واني حتى علاج ما عندي 

فتح الباب دخل منه ضوه للغرفة دخل بيده ماعون فافون خلى يمي مغطى بربع گرصة خبز و كلاص مي هم فافون مطعج 

:: بعد ماكو دلال حالج حال اي مجرم يجيبونه لهنا ذل واهانة وتعذيب لحد ما تعترفين 

امتنعت عن الجواب گمبص كدامي يحجي و ع وجه ابتسامة استفزاز 

:: عبالج من تاخذين الإفادة ما أكدر اسوي غيرها بالعكس راح أطول گعدتج هنا وهالنوبة اخليج بـ لسانج 

تعترفين موش توقيع بس 

تذكرت كلام سجدة مرة جانت تحجي بالموبايل وجانت تنصح موكلها بإن الاعتراف سيد الأدلة مهما جانت الأدلة قوية و كلشي موجود مو مثل من تعترف بـ لسانك جليت صوتي وگتله 

:: لو تموت ما تحصل اعتراف من لساني بشي ما مسويته اخاف شفتني البارحة بلحظة ضعف وقعت وعبالك لگمة سهلة لااا لو تعلگ مشنقتي هنا بعد ما انطق 

:: بيمن مستقوية وشادة ظهرج بس لا بغفار... تره يعرف هالمجان، لو يريد جا من زمان إجه طلعج 

رفعت راسي بسرعة اله رغم شكد جنت اخاف من غفار و كم مرة شكيت بيه بس هو بـ أفعاله وياي محى كل شك اله بداخلي.. نفيت براسي 

:; مستحيل... ما يسويها وياي  دگلي صدره يوكف وياي  ما يخذلني

:: جا بشني تفسرين تصرفه من عافج بين إديه وما إجه كل هالوگ

جتوبته بسرعة، كأني دا أدافع عن نفسي مو عنه كأني متأكدة باليقين من هذا الشخص 

:: يمكن صار وياه ظرف... أو إنت دا تجذب عليَّه و هو ما يعرف هذا المكان  أني متأكدة و واثقة مستحيل يعوفني دقيقة بإيدك

سكت ثواني، بعدها گال بنبرة ثگيلة 

:: لا تعلگين هواي آمال عليه تره الضربة ع گلب توجع أكثر من الراس و ذكري لهذا كلامي بعدين 

هزيت راسي بعناد مثل ما يغيضني اغيضه 

:: هو رجال مو مثلك أول ما عرف قصتي حفظ سري وصان الأمانة... وكف بوجه عمه علمودي الشخص ومن نهانيت ابيته جاب جده و عمه يطيبون خاطري و خلالي قدر و احترام بين اهله مستحيل تطلع منه الردية

:: بس من تجي للقانون والسجن الكل يتراجع ياهو مستعد يضيع روحه بقضية ماله بيها لا ناقة ولا جمل 

:: مو كلها مثلك تخاف و تهتز من اقل موقف 

باوعت بنص عيونه عود اني ما اخاف و مثل ما لعب بـ اعصابي وحاول يشككني بكل مكان أمان الي 

:: و ها حتى قدمني ع والده حتى تـ... 

قطع كلامي بساع يردد كلامي ما مستوعب 

:: قدمج ع ابوي! بشنهي قدمج 

:: ما أعرف شنو الاتفاق اللي بينه وبين صديق أبوكم... بس هو غيّر مجرى القضية كلها حتى يساعدني شخص يسوي كل هذا... تخوفه عقوبة ويتراجع مستحيل.

شال گلاص المي ركعه بالحايط اتناثرت قطرات المي عليَّه وهو طلع بغضب

مر الوقت... وأنا ما أعرف شكد دا يمر.. يمكن 

دقيقة؟

ساعة؟

يوم؟

وفجأة...

ارتجف گلبي من صريخ شخص بعيد.

عرفت دا يعذبه مثل البارحة 

حطيت إيدي على أذني بسرعة، أحاول أقطع الصوت بس الصريخ ظل يخترقني ويا كل صرخة انكمش ع نفسي و گلبي ينتفض 

ولمن سكت... تنهدت براحة مرعبة، كأن السكوت نفسه نعمة

أسندت راسي عالحايط، وغمضت عيوني اريد بس شوية اغفى 

دگ... دگ... دگ...

صوت حديد يندگ بانتظام، مثل واحد بيده جاكوج ويضرب على سندان.

ضربات ثابتة... بطيئة... تشتت عقلي وتخليني افقد اعصابي 

سمعت خطوات

قريبة

كل مرة نتقرب أكثر احشر نفسي وياه الحايط اسمع صوت 

همس شخص يحجي وبعدها أحد هز حديد الباب 

تجمدت بمكاني لا عافني و طلع وأكو اشخاص غيره هنا.. ثواني و فتح الباب دخل هو بنفس ابتسامة المستفزة

:: تموتين هنا ومحد يدري بيج عبن موش بمركز و لا الج سجل رسمي وغفار عافج واهلج كل ظنهم انتِ بـ امان  

التزمت الصمت اعرفه دا يستغلني يريد يوهمني غفار تركني بين اديه و اهلي ما يعرفون بوجودي هنا حتى أضعف و ارضخ اله مرة ثانية... ابتسم من شافني ساكتة 

:: بعمري ما حاط راسي براسي حرمة بس وياج راح اسويها.. انطيتج فرصة توقعين وتخلصين بس دفرتي هالنعمة بعد حتى لو تتوسلين بيه ما اساعدنج 

:: تخسى اطلب منك مساعدة لو اتوسلك المساعدة تنطلب من الرجال مو من أشباهم 

حط ايده ع حلگي دافع راسي ع حايط حيل يحجي من بين أسنانه بصوت حاد 

:: اسلوبج هذا عدلي و لسانج بلعي جدامي لا اخليج خرسة و.. 

قطع كلامه صوت هوسة بره بوسط تشتتي و وجعي جسمي... خوفي و الرعب ومن بين الأصوات فرزنت صوته حتى قسيم انتفض ونهض ع حيله 

قسيم :: شجابك لهنا انت وشلون عرفت هل مجان 

سؤاله اكدلي كلامه وياي چان كله جذب بس حتى يتلاعب بعقلي واعصابي... 

دخل غفار أول مرة اشوفه بهذة الهيئة كتلة غضب تمشي ع گاع ما رد ع قسيم بكلام لا... رد بفعل.. ضربة كله راس براس خلى يفقد توازنه وكعد ع صدره دمى وجه ويحجي بصوت عالي 

غفار :: شلون تمد ايدك عليها شلون تجيسها وانت تعرف شني هي بالنسبة الي 

قسيم ساكت لا قاوم ولا حرك ايد ولا حتى نطق وبرر مستسلم اله و غفار يضرب بيه و يعاتبه 

غفار :: ولك اخوي انت حزام ظهري وبيدك كسرت ظهري شبقيت للغريب وانا الغشيم الوم آل جبران لو رادوا يكتلوني وهو اخوي دمي لحمي گتالي 

نهض عن صدر يتنفس بقوة صدر يصعد و ينزل بنهيج مشه خطوتين و رجع اله سحله من ياخة قميصة دافعه ع حايط خانگه

:: ولك أمانة بذمتي شلون تجرأت تجيسها بيا وجه اگابل اخوها شگول اله لو نشدني عنها ااحجججي لا تظل ساكت 

دخلوا ورا جراح و رجال بالخمسين من عمره تقريبًا لابس عسكري و ع كتفه رتبة جبيرة تقدم مني جراح بساع ذب قمصلته عليَّه 

جراح :: لا تخافين خوية هسه راح نطلعج منا 

اخذت القمصلة بلهفة لبستها والم بيها منا منا ع جسمي من البرد 

اما غفار عيونه تدور بالغرفة لحد ما وكعت ع بوري حديد شاله بساع و ضربه لقسيم ع كتفه بيها 

:: لظاهر ابوي فاته ما علمك بالاصول ونسى يفهم دماغك المحجر الحرمة ما تنجاس بس انا اليوم اعلمنك عليهن كلهن

ضربة مرة و ثنين و تلاثة وين توكع الضربة توكع ما يهتم اجت ع جبينه انشك حاحبة وصب دم ع عينه وهو رافض يغمض عينه صار الدم ع بياض منظره يرعب 

غفار :: توقعتها  تجي من الكل الا منك قسيم

توقعتها  من كزار الجبان من جبران النذل الا انت گلت اخوي حتى لو عرف قصتها ما يتجرا يتگرب الها عبن يعرف اسمي وراها

أمانة غفااااار

نسيت نفس الدم النجس يمشي بعروكك و ساس الغدر ساسكم

تقدمت منه الرجال بساع دفعه عن قسيم وصاح بيه 

:: كافي غفار 

ما جان يشوف كدامه بس يريد يرجع اله دفعه الرجال حاصره وياه الحايط وصاح بيه 

:: مو احجي وياه غفااااار كافي اخذ البنية و اطلع قبل لا يجي احد لهنا و تصير عويصة 

الرجال يحجي وياه وهو عيونه ع قسيم بس ولا كأن سمع حرف من الكلام من يأس الرجال منه لزم فكه بيده يدور وجه يخلي مقابل وجه 

::غفااار تسمعني لو لا البنية اذا اجه احد وشافها هنا تروح بالرجلين 

هز راسه اي و بساع اجه اتجاهي ما رفع راسه و حط عينه بعيوني نزل ردان قميصة ع ذراعة و مدها گدامي حتى استند عليها وامشي 

براءة :: هذا ثاني ليل يمر وماكو خبر عن رحمة ولا غفار رد للبيت بعد حلف و قسم يمين ما يدخل البيت الا يلگاها 

جدي رجع من الفاتحة و صار أعصاب من عرف حتى علاجه ما قبل ياخذه گاعد بره ع كرسي و مرتكز ع عوجيته سجدة قنعت جدة تحاول وياه ع علاج 

العلوية :: اخذ من ايد ابو حاكم 

:: ما اريدن شي علوية ريجي علگم غدى من هذا النسل الاعوج 

:: ساعة غضب و سيطر عليه الشيطان هسه ما تشوفه الا ردها و يعتذر منها 

:: موش كلشي يتصلح بالاعتذار علوية العگال لو طاح  يطيح الحظ و البخت وياه و شما عدلته يبقى بعين الوادم اعوج وقسيم بهاي عملته بدى ماي وجهي جدام البت وأهلها 

جدي ما چان يقصد بكلامه العگال من يطيح من الراس للگاع لا.. يقصد الأعمال اللي تنزل الراس

صفنت بكلامه... جنت اشوفن السالفة من زاوية ثانية جنت اشوفنها قسيم من خوفه ع غفار سوه هيج و ع گولت جدة يرجعها غفار و قسيم يعتذر منها وتفض بس كلام جدي عبالك سلط الضوه ع شي ما جنت 

حاسبتله حساب أمانة و دخيلة عد سادة و عرب تنخان  يا سواد وجوهنه جدام العالم... 

گامت جدة ع حيلها وكفت حذاي جدي تمسح ع جتفه وحبت عگاله تحاول تقنع جدي ياخذ علاجه 

العلوية :: هسه اشرب دواك و ظل واكف ع طولك وكلشي ينحل عبن لو طحت كلها تطيح وراك انت شيخنا ومن دونك نضيع 

هاشم :: عوفيني هسه علوية ما يهدالي بال بعد الا ترد هل البت بسلامة وافض سالفتها 

سمعت صوت سيارة ركضت للباب بلهفة و حتى جدي هب من مجانه يعاين و يترقب... تنهدت بيأس من شفته جراح لوحده نزل بخطوات مستعجلة 

:: خل سجدة تحضر روحها بساع 

:: بشرني لگيتوا البت مو 

:: اي أخذها غفار للمستشفى و يريد سجدة تبقى وياها 

جدي من سمع بساع لبست خاجيته و طلع أول واحد مقرر يروح وياهم ركضت للحجرة اريدن انطي خبر لسجدة 

لگيت امي يمها كاضتها من شعرها خصلاتها الگصيرة و تحجي وياها بصوت خافت و سجدة واگفة گبالها سابلة اديها 

صح ما دافعت عن نفسها بس نظراتها لواحدها جيش كامل جانت تعاين لأمي بعيون فارغة و تنظرات باردة تتحداها 

براءة :: يمه انت ما تجوزين منها موش غفار حذرج تشيلين ايدج عنها وعن كلشي يخصها 

ندارت امي عليَّه زامة شفايفها بغل وحقد 

فضيلة :: والله خوش يطلع من بطني يعلمني و يأمرني ما أدخل ابنتي 

براءة :: انتِ لو صدك حاسبتها بنتج جا بيدج ذبحتي التعدى عليها موش تتسترين عليه 

فاتت من يمي دفعتني بجتفها حيل حسيت جتفي نخلع امي ضخمة و گوية كلش گبل لا تتعدى العتبة نطقت سجدة 

سجدة :: يمه

ندهت بلقب الأمومة االي ما تستحقه امي ورغم كل جرح من امي الها ما سقطت عنها هل لقب...التفتت امي الها براسها 

سجدة :: كل إنسان اله حدود لصبره و بعدها ينفجر و يطلع كلشي مضموم بداخله صح 

تبدلت ملامح امي للخوف و الوجل تنشدها عن مقصد كلامها بقلق 

فضيلة :: شنهي گصدج ولج 

تعدت من يمها سجدة و راحت صوب المطبخ جرت سجينة وانا شهكت بخوف كل ظن راح تعيد السوته گبل ردت اركض الها بس هي گالت 

سجدة ::  هسه ماشية لـ غفار وين ما يكون اروحن اله واحجيله كلشي صار وانا موافقة بحكمه  حتى لو راد يذبحني بس اگله اخر طلب اليه يمك تنحر مصطفى جدام عيني وبعدها لو تبقى يحز بمنحري عشرة أيام انا قابلة 

گالت كلامها و لگفت عبايتها كاضة السجينة حدرها و طلعت بساع وامي زلغت خدودها ركضت الها حافية 

كضتها شابگتها تتوسل بيها 

فضيلة :: مالي غرض بيج بعد والله التوبة اذا افتح حلگي وياج بجلمة بس ستري علينه و اكعدي 

سجدة :: ليش موش هذا تهديدج الي گبل شوية وانا جاي انفذه الج بس 

لطمت امي بجف ايدها ع حلگها بندم معرتة بعضد سجدة تمنعها تخطي خطوة وحدة 

فضيلة :: والله و روح أبوج بعد ما اهددج ولا اتگرب الج 

:: شجاي يصير شبيح سجدة شو تأخرتي 

انتفضتنه كلنه من حجه جراح وهو واكف اباب الحوش يعاين الهن مستغرب تكربت بساع ع سجدة اخذ السجينة منها بدون ما يشوفها 

براءة :: ج لگوه رحمة و ماخذينها للمستشفى و غفار يريدج وياها 

هزت راسها اي عدلت حجابها و طلعت وياه... جرت امي نفس مرتاحة و من خوفها بعد ما كدرت تمشي كعدت بعتبة المطبخ مهدود حيلها 

رحمة :: فتحت عيوني اباوع ضوه قوي ريحة تعقيم ووديتول كفختني عرفت اني وين 

بالمستشفى صارت عيني ع سجدة گاعده تبحلگ بالفراغ حتى ما ترمش ردت اعدل نفسي حست 

سجدة :: هاا رحمة صحيتي شلونج خو ما يوجعج شي اصيحن الج الدكتور 

ساعدتني انهض جذعي وعدلت المخاد ورا ظهري خطية مخبوصة شربتني مي 

سجدة :: شتحسين يوجعج شي رجليج زينات عيونج تشوفين مو 

رحمة ::  زينة  بس اريد موبايل 

هزت راسها اي طلعت موبايلها من جنطتها فتحت الرمز وخلته بيدي سجلت رقم عروة ع نص نسيت و تهت رغم جنت حافظته بس الصار شتت تركيزي 

:: هاا شبيج شو صفنتي 

:: رقم أخوية نسيته عفية گولي لغفار يتصل عليه خل يجيني 

:: رحمة عايني والله غفار موته گتل و تبره منه هم ا.. 

لزمت ايدها قاطعة كلامها اتوسل بيها تنفذ طلبي 

:: هل مرة تختلف سجدة والله گلبي يوجعني بس جيبولي أخوية خل ياخذني 

ندگ الباب دخل هو بيده علاكة ملابس همست اله سجدة هز راسه الها اي ندارت عليَّه 

:: اروحن انشد الدكتورة ع وضعج واردن ما اتأخر 

ما انتظرت جوابي طلعت بساع و طبگت الباب وراها جر الكرسي قربه من الجسدية گعد يگلب بالخاتم باصبعه يفره 

ثنين و ثالثنه السكوت حتى صوت انفاسنه مسموع 

غفار :: ما اعرف شگلج... اخوي گبل لا يغدر بيج حط سجينته بظهري غدرني اللي و شما تگولين حكج 

رحمة :: كلشي ما اريد وانت ما قصرت وياي اريد اروح لـ اهلي بس خابر ع عروة خل يجي ياخذني 

قبل لا يرد قطع حديثنه الباب ندگ دگة خفيفة و انفتح دخل جدو هاشم گام اله غفار واني هم عدلت جذعي أكثر 

هاشم :: هاا بويه رحمة شلونج الحمد لله ع سلامتج

:: الله يسلمك جدو 

كعدت يمي سجدة تمسح ع كف أيدي بدعم وهو يحجي وياه جدو 

هاشم :: گومي جدي سجدة روحي وياه اخوج جيبوا علاج البت سجله الطبيب الها 

أخذها غفار مخليها تمشي كدامه كعد ع نفس الكرسي الرجال مبين عليه الحزن 

:: انا من اهد سالفة فضيلة وياج و كلت هاي البت بنتي صارت واللي يمسها يمسني بس انتِ بوية حاسبتني مثل أبوج 

هيبة و وقار هذا الرجل تخلي أكبر شخص يحترمه صارت عيني ع مغدي سحبته من ايدي اسده واني احجي وياه ارد جواب سؤاله 

:: اي والله كلش اعزك و احترمك وكل يوم تكبر بعيني أكثر وابد لا تخجل من قسيم مستحيل اخذكم بذنبه 

:: رحم الله ذيج البطن النگلتج والاب اللي رباج حتى كلامج من ذهب والله بوية 

:: و يرحم اموتك جدو 

تنهد رغم كلامي احسه بعده متفشل يگلب بخرزات السبحة 

::انا و غفار اتفقنه اليوم نخلي حد لكل واحد اله نية يتجاوز عليج و نلطم كل حلگ ينفتح بحرف عليج بس اريدن منج تسمعين كلامي الراح اگولن هسه و توافقين عليه خوش ابوية 

هزيت راسي اي ابتسم الي جمع السبحة بيده ومد ايده الي و أشر براسه بمعنى مدي ايدج 

فتحت كف أيدي خلاها بكفي مبتسم 

براءة :: نص الليل ولسه ما اجو كمت توضيت و وكفت اصلي ادعي الها خطية هل البت تگوم من وحدة تكع بالثانية 

گعدت عنبر دور بالبيت وتصيح سجدة وانا ع صلاة ما أكدر اردن عليها وكفت كدامي 

عنبر :: وين سجدة شني لگوا رحمة ومشت الها 

ما رديت عليها تكريت نصت بوجهي 

عنبر :: لا تحجين بس هزي راسج اي لا.... ولج احجي الشيرازي 

كملت وهي تتحكرص و تفتر عليَّه و تدك برجليها ع كاع مغتاظة كملت لميت السجادة و ريحت فضولها 

:: اجه جراح گال لگوها وهسه بالمستشفى واخذ سجدة الها و جدي مشه وياهم هم 

:: جا ليش ما خذوني وياهم شنهي عبالهم ما اعرف اتصرف 

:: البت تعبانة يراد الها وحدة جبيرة فاهمة وياها تعرف تدبرها موش ياخذون الها وحدة أصغر منها عنبر

عفتها تدردم و شلت الصوبة ترستها نفط و شعلتها خليت القوري عليها 

عزلت البيت جانت أيدي ما تاخذ ع شغل بس هسه اقل اكو خبر عنها حضرت الها فراش و ملابس نظيفة و نكعت عدس اسوي الها شوربة كلشي حضرت 

عنبر راحت تخابر جراح تعتابه شلون ما گعدها و خذاها وياه و ترفة من عرفت لگوها خلت فطرس بليل يجيبها النه وياه ما دخلت گالت 

ترفة :: ما اريدن ادخل جوه مخنوگة خل نفرش هنا بالحوش ونعكد الهوى حلو 

عنبر :: اي والله و نشعل نار 

ركضت للحطت الملموم بصف التنور تجر منه صحت بيها گبل لا تسوي بينه كارثة 

براءة :: برميل النفط منا عنبر كعدي وسكتي لا تحركينه 

عاينتلي مبرطة دخلت جابت بطانية مددت و حطت راسها بحجر ترفة يسولفن ع مدرسة كسرن خاطري لا ام عدهن لا اخت 

براءة :: اخافن جوعانات اسويلجن  شي تاكلن بين ما يطر الصبح و اسوي ريوك 

ترفة :: لا انا من امس ما اشتهي العسل فكري كله يم رحمة ترد و اتطمن عليها اول وناكل سوه كلنه 

عنبر :: انا جوعانة ومن اضوجن اجوع أكثر بس هم مراح اكل اتضامن وياجن 

براءة :: هو شنهي ويانه قابل عدنه اعتصام جوعانة كومي اكليلج لكمة لا تطيحن علينه هسه حتى ماكو احد هنا نبقى حايرين بيج 

ترفة :: اي والله حتى فطرس مشه مدري وين كومي اكلي تره نخليج ترفسين لوحدج 

عنبر :: خلني انا اريدن اجرب الإغماء الله و اكع و يطشون ماي بوجهي و ابوية يصيح بوية عنبر رويحتي حاجيني و جراح يشيلني يركض بيه و شعري يتطاير وياه الهوى 

طگتها ترفة ع گصتها حيل و غمتها تنفض براسها من حجرها تريدها تنهض 

ترفة :: كومي من يمي عنبر صايرة  تابعين تركي هواي ومتاثرة بيه 

كعدت امي ع صوتنه گامت تستغفر جي جدة موجودة تخاف تحجي علينا 

سمعت صوت الهايشة تصيح راحت روحها... وهي علينه ما شايفة خوفها هذا 

فضيلة :: عمت عيني تصيح يا جوعانة يا عطشانة 

لفت شيلتها و لبست جواريب سود ع سريع عبالك گالولها ابنج بالمستشفى وتريد تطلع اله 

اخذت سطل ترسته ماي واخذت علف ودارت الها الصريفة صايرة وراح البيت نسمعها تسولف وياه الهايشة 

ترفة دفعت عنبر و ركضت حطت اذنها ع حايط تتصنت وگالت 

ترفة :: ولج امج  تكول للهايشة شمالج حبيبتي ليش ما تاكلين ولا يوم سمعت هل كلمة منهن الج لو سجدة 

عنبر تشلبهت برميل النفط و صعدت تعاين لأمي من فتحات السگيفة وكالت 

عنبر :: ولج امج شابگة الهايشة وتبجي جي ما تاكل  والزهرة من سجدة سوت حادث دمعة ما ذبت عليها 

ترفة :: حتى براءة من تخربطت ذاك اليوم وصلت الموت الغريبة اجت تنشد عليها و عمة فضيلة جانت يم اخوها بالعرس خابرها قسيم تگله موش الزفة راح تطلع 

عنبر :: يااا جا و غفار من ال جبران راد يكتلونه جانت كاعدة هنا تلضم بانية تريد تيبسها ولا تزهزت من مجانها بس حگها شيشيلها من الگاع يراد الها كرين ياله يحركها 

هنه يسولفن وانا شلت الخيزرانة طكيت عنبر ع رجليها من ورا كمزت من البرميل للكاع تكمز بوجع و رديت ع ترفة طگيتها ع ظهرها

براءة :: شني جايات شماتة  انتن فوگ ضيمي  تهيجن المواجع عليَّه شنهي ماعرف امي و دكاتها حتى تذكرني بيهن وحدة وحدة 

عنبر :: جا غير نسولف نطلع البگلوبنه كبل لا تموت و بعد ما نكدر نحجي عليها 

ترفة :: اي والله عمي ابو طالب ما يرضا من حجيت ع رحاب يگلي حرمة ماتت اذكري محاسنها جا هي غير مامش محاسن عدها 

عنبر :: هذن تلاثة مامش محاسن عدهن بس سيئات رحاب و فضيلة و سليمة 

ركضت وراهن اريدن الوحهن وهنه شردن سمعت صوت سيارة شمرت الخيزرانة وركضت للباب نزل جدي و غفار هم 

نزلت سجدة ومدت ايدها لرحمة تسندها طلعت حافية الها سندتها وياه مستحية منها من عملة قسيم وياها 

دخلتها للحجرة ساعدتها تمدد البت ظالة جسد بلا روح ما تحجي بس تعاين بالفراغ 

جدي دز ع عمتي إصالة جانت بايته يم عمتي انعام جي مريضة من اجت طلبها هي و سجدة لديوانية و غفار وياهم مدري شيحجون همست ترفة بـ اذاني 

ترفة :: اجتماع مغلق لروس الكبار الله يستر 

عنبر :: يمكن  جدي راح يصدر قرار ذبح قسيم و يخليهم ينفذون 

ترفة :: جا عمتي إصالة تنفذ لو سجدة و بعدين جدي ما يذبح اليغلط يعاقبه عاقب يخلي يتمنى الموت 

عنبر :: جا عليمن جمعهم و سد الباب الهم ساعة يتهامسون 

گب هوى بارد كزبر جلدي من برودته مليت سترتي عليَّه وگلت اريحن فضولهن 

براءة :: ما طول دز ع عمتي إصالة و سجدة السالفة تخص رحمة لا گتل ولا ذبح 

مشت عنبر ع أطراف اصابعها حتى لا تطلع صوت ومشت صوب الديوانية توها خلت اذانها ع الباب 

انفتح الباب وطلع غفار 

:: شلونك غفار شلونك خوية شلونك بعد زين انا زينة والله انت شلونك 

:: الحمد لله وانتِ شلونج 

ابتسمت جي غفار الوحيد ما يستهز بيها دوم ياخذ و ينطي وياها بالحجي ز يستمع الها 

عافته و شردت مستحية طلعت عمتي إصالة راحت لحجرة رحمة و طلعت سجدة هم و غفار حاوط جتفها يمشي  ويحجي وياها وهي تهز راسها اله بـ اي 

طلع هو بره للعگد وهي اجت وياي للمطبخ 

سجدة :: خل اسوي ريوك لرحمة خطية البت بلا اكل وما رضت تاكل بالمستشفى 

براءة :: اي سويته بس أصبن جاي اوكفي 

ركضت بلهفة صبيت الجاي الها وحميت الخبز ع صوبة هم اخذت سجدة الصينية وراحت الها رجعت ترفة يمي 

ترفة :: عايني براءة من خلال مراقبتي للوضع اظنن كلامج صح والسالفة تخص رحمة 

:: شلون 

:: جانن بأجتماع وياه جدي طلعن من الديوانية راحن حجرة رحمة ثنينهن وغفلن الباب اجتماع مغلق لاخ يعنى موضوع الاجتماع رحمة 

عنبر ركضت لترك ورا البيت هزيت راسي بيأس منها ما تعرف تكعد الا تعرف شنهي جاي يصير 

سمعت صوت صياح طلعت اعاين قسيم و غفار غادين دماية گوه الولد فاككو بينهم 

قسيم :: ولك فاتحة صالة ولادة بلا اجازة تجار بأرواح الناس تعرف شنهي هل الحجي لو لا 

مسح غفار الدم عن شفته ايده ترجف غضب و جراح كوه كاضه 

غفار :: موش صالة ولادة لو مسوية مستشفى كاملة بلا اجازة لو اتاجر بالأعضاء لو تبيع هروين ومخدرات لو تشتغل التهريب ما طول صارت بذمتي محد يگرب الها واللي يدور ثار منها خله ياخذه مني 

بخطوات سريعة تگرب قسيم من غفار كضاه من جتافه و حباه من راسه و بنبرة توسل كال اله 

:: اخوي تاج راسي انت هل البت اذا بقت عندك و الشرطة كضتها يمك راح تضيعك وياها 

زاح غفار أدين قسيم عنه بقوة و دفعه مغتاظ منه 

غفار :: لونهم يعلگون حبل اعدامي هنا هم ما انطي بيها ولا اتخلى عنها ومن ساعة مديت ايدك عليها وانت تعرف هي راجعة الي لا انت اخوي ولا اعرفنك 

:: تتبرى مني من اخوك لاجل الغريبة 

:: من يوم داست بيتي صارت من اهلي و احمد ربك عفتك عايش بعد السويته بيها 

فطرس گاعد ع جذع النخلة المكصوص ياكل لفة جبن وبيده كلاص جاي ودته اله ترفة و يستمع الهم من نطق غفار كلامه هو صاح 

فطرس :: كفووو اخوي الحيد وبيك ع الناس اشمخر 

خزره قسيم وهو رفع حاجبه اله طلع جدي كلها سكتت أشر لقسيم بمعنى تگرب مسح قسيم الدم من وجه وتكرب من جدي 

هاشم :: بيوم وكفت وگلت هل البت صارت بنتي جنت واكف انت لو لا 

هز راسه قسيم اي و بلمح البصر جدي رفع ايده و بظهر جفه طگه راشدي 

غفار :: فوووتن جوه 

جريت ترفة و دخلنه بساع غفار طبگ الباب اسمع صوت جدي مغتاظ 

هاشم :: تتحداني و تتعدى ع حجايتي قسيم 

:: جدي هذا قانون لا يعرف أمانة ولا يعرف سوالف عرب ا

بتر كلامه غفار بعصبية 

غفار :: ..... ابو القانون اذا يگلك صير بلا مروة و جر حرمة لا حول ولا قوة من البيت هيج 

صار سكوت و جدي نطق بنبرة مابيها تراجع 

هاشم :: اطلع من البيت بعد ما الك كعدة بالسلف كله اليكسر حجايتي لا يلفي يمي 

قسيم :: خوش راح امشي انا والكم مهلة منا لباجر اذا ما رديتها ياغفار لأهلها الصبح تلگه الشرطة بالباب 

مشه قسيم وهو يتوعد طبيت للحجرة صليت الفجر ادعي الله يهدي النفوس اجت عنبر تركض من بره 

عنبر :: ولج براءة ركضي اجو اهل رحمة 

:: شني بس لا راح ياخذونها 

:: شوفي راح احجي بس لا اطكيني ولا تجريني من اذاني 

:: احجي

:: من دخلن عمتي إصالة و سجدة يم رحمة بالحجرة درت من ورا البيت من الشباج و سمعت عمتي إصالة تگلها لرحمة غفار يريدج ووجدي راح يطلبها من ابوها بس 

:: بس شنهي 

:: بس غفار ما قبل يدز ع أهلها الا يشوف رأيها اول من هيج دز سجدة تحجي وياها وصارت هوسة ما سمعت ردها 

:: ياا يوم المنى وتصير اله والله الا اطشن واهلية 

طلعت بساع اسوي جاي لكيت سجدة جدامي تحضر ضيافة فرحانة جريتها من ايدها 

براءة :: تعاي ولج صدك غفار راح يطلب رحمة من ابوها 

سجدة :: اي هسه جدي راح يطلبها اله من ابوها 

:: وهي وافقت 

:: انا موجودة وما توافق 

:: سجدة هذا زواج خو ما دهونتي البت بـ  لسانج الحلو 

جانت ترتب الكليجة و البيتي فور بالصحن رفعت راسها اللي من كملت 

::  لون انتِ لا سامح الله طايحة بورطة مثل ورطتها و يوكف الج زلمة مثل غفار ويكلج هل الوادم كلها بجفة وانتِ لوحدج بجفة و يكف بظهرج حتى ضد اخوه و فوك كله هذا يعشكج توافقين عليه لو لا 

:: طبعا أوافق لونه مثل حيد مثل اخوي بس خافن غيره بگلبها لو ماعدها مشاعر اله 

:: لا تخافين غفار گبل لا يخطي اي خطوة خلاني انشدها ع كلشي و حتى مشاعر اله بگلبها  من كلامها عرفت 

:: صدك عليج الله يعني تحبه 

 وكفت ايدها بلا حركة چن وكف بيها الزمن تتنفس بقوة غورگت عيونها بالدمع 

انتبهت ع ايدها ترتعش لوحدها و طاح الصحن من ايدها دنكت المنه وهي ضمت ايدها بجيب سترتها تخفي وجعها وابتسمت بوجهي 

:: خلها ابالج اي واحد يكف وياج بمحنتج و يدافعلج راح تحبينه حتى لو جان وحش و الناس كلها تنهزم منه انتِ راح تكفين حدر جناحه بـ امان 

قطعت كلامنه  رحمة طلعت تتوجه ع حايط تلكيتها اسندها 

براءة :: ليش كمتي من فراشج حبيبة بعدج تعبانة 

رحمة :: صدك اهلي اجوه 

:: اي صدك گاعدين بالديوانية اخذنج الهم 

:: بس صيحلي غفار أول اريد احجي وياه بموضوع 

ركضت ادور غفار من اريدنه يختفي صحته واجيت الها 

 جرني من ايدي دخلني وياهم الحجرة والباب مفتوح وهي كالت بنبرة هادئة مثل ملامحها 

:: انت تريد هذا الزواج حتى تحميني من اخوك بس تره انت ما مجبور ا

قاطها چن فاهم عليها گبل لا تحجي وتكمل كلامها 

:: موش مجبور.... انا رايدج من كل گلبي الفرض المستحب وقيام الليل بكلهن ناخي  الله تصرين مرتي 

خدودها صارن وردي تجول بعيونها بكل مجان الا هو ما تصد الا تفتح و تسد بجفوف اديها بتوتر وهو گال يشرح الها الوضع 

غفار :: شوفي يا بت الناس اذا ماكو مشاعر بگلبج الي نبقى ع العقد بس حتى من اريدن اتصرف و اوكف بوجه كل واحد رايد الج الشر سواء عرف لو غريب اوكف تحت مسمى هذة حرمتي متفقين 

هزت راسها اي ومن خجلها منه عرفت اكو مشاعر اله كلبها بس ضيم الوكت ما خلى الها مجال تشوف هذا الشي من مشكلة لمشكلة 

غفار :: وهسه ع يا صفحة تردين نعقد انه ما يفرق عندي بس خاف انتِ بعدين تكولين والله ما أخذت رأي ما شرتني 

عبن  انا بكل الديانات والطوايف شاريج واريدنج حرمة الي 

رحمة :: ما تفرق عندي طائفة 

شگت الابتسامة طريقها ع وجه اخوي هز راسه اي وح

گالي 

غفار :: براءة خوية ساعديها تجي تشوف ابوها 

رادت تطلع اعترضت دربها عمتي إصالة 

إصالة :: وين 

رحمة :: اشوف اهلي 

:: دشوفي حالج عبالك وحدة طالعة من الإنعاش توها هسه أبوج خطية يتخربط بس يشوفج هيج 

طلعت الها سجدة ثوب ابيض بيه وردة جوري ناعمة رفعته منا ومنا جدامها تاخذ رأيها اذا عاجبها وهي رفضت 

:: لا ما البس ابيض فشلة 

سجدة :: جا تردينهم يعقدولج بالاسود شني ارملة 

خلتها تلبسه غصب و حطت الها مرطب و عمة إصالة جابت الها عصير برتقال طبيعي 

إصالة : :عصرته بيدي الج والله كعدي شربي خل يرد الدم بوجهج 

كعدت تشرب ع كيف عاينت النه عنبر من الباب وراحت تركض واجت بيدها صم كليجة 

عنبر :: اكلي وياه العصير مبين عليج جوعانة وجهج غادي كركم 

اخذتها منها تاكل ولسه رجفة بيدها من تتحرك كملت اخذتها يم أهلها كعدت يمهم 

واحنه كلنه نصنت الهم من الشباج جدي يحجي وياه ابوها بموضوعهم 

رحمة :: اباوع لأبويه  وهو يحرك إيده بصعوبة ويحچي...

وبگلبي سؤال واحد.. إذا دخول عروة للسجن وصله للموت لولا ستر الله عليه و حفظه النه 

لو أني دخلت السجن شراح يصير بيه

أتحمل كلشي... إلا ذنب أصير السبب بأذية تطول أبويه او لا سامح الله يموت عمري ما اسامح نفسي ولا راح أكدر اعيش 

همه يحچون واني بعالم ثاني أغوص بأفكاري وكأن الأصوات صارت بعيدة

جدو هاشم بالمستشفى تعهد يحميني سواء وافقت عالزواج او لا... بس فهمني إن موافقتي راح تقوي موقفه أكثر حسب كلامه اذا صرت منهم و و اسمي ارتبط بـ اسم حفيده بعقد محد يتجرأ يتقربلي بعد من العائلة 

وغفار من البداية ما قصر وياي.

شفته شلون وكف بظهري وشلون تنازل عن قضية ابوه مقابل قضيتي 

مواقفه وياي ما تنعد و إذا رفضت... راح أخسر المساعدة واحنه ناس بسطاء ما عدنه معارف بالدولة ولا ظهر يسندنه

وأبويه يبقى محتار بيّه... وين يوديني وشلون يحميني

غمضت عيوني وكأني دا أدفن آخر فرصة إلي بالاعتراض...

فتحت عيوني صارت بعيونه تارك الكل و مركز وياي اكو شعور بداخلي اله مو حب شي أعمق من الحب الأمان 

انطيت موافقتي لأبويه وهو تبسم ثغرة هز رأسة ايماءة بسيطة الي بدعم 

دخل عمو ابو طالب بيده سجل سلم ع اهلي عائلي الكل حضر بيه البنات ع جهة كعدن يمي سجدة ايدها ما فاركت أيدي كأنها تبث الاطمئنان داخلي 

سكوت بس صوت عمو ابو طالب يقرا صيغة العقد و سئله وهو جاوب 

::  قبلت بها زوجة و رضيت بها وعلى ميثاق الله عاهدتها

رجع سئلني نفس السؤال العيون كلها عليَّه بترقب وترتني أكثر حتى الكلام گوه نطقته 

:: نعم قبلت وانت وكيلي 

 

ابتسم عمو ابو طالب وگال اله 

ابو طالب :: يله عمي لبسها الحلقة 

عگد جبينه يباوع الهم وهم يباوعون اله بمعنى يله صفگ جراح ايد بالثانية بحسرة 

جراح :: بس لا جاي بطرگ روحك 

عون :: هسه لو عاوجلك قامة و مسويها حلقة ولا هاي الدكة 

فطرس :: شوف يلوموني من آدك دكات وهذا المؤمن ناسي روحه جاي ايد ليورا وايدي جدام للعقد 

خزرهم كلهم سكتوا تقرب يمي خلع خاتم من خنصره حجرة ابيض شفاف كلش حلو اخذ أيدي خلى بـ اصبعي 

و ابتعد بساع 

براءة :: بعد يوم تعب نمت بدون ما أدري بروحي حتى وعيت بنفس الوگت مثل كل يوم عبالك منبه ويكعدني بقيت اتگلب بفراشي دافي ما يهلي اطلع منه عاينت لساعة 

بعد وكت الاذان صارت نهضت لميت شعري و لميت فراشي طلعت خليت ماي بالكتلي وخليته ع نار حتى اعجن

خليت لصوبة نفط و شعلتها هم حتى يدفى البيت انتبهت الملابس باقية ع حبل واكع عليها الندى صايرة رطبة لميتها 

اجيت ارجع سمعت صوت واحد يدندن تگربت اعاين من من بين السعف 

لحجت واحد يمشي صار ضوه بيتنه عليه عرفته فطرس وين رايح بهذا الوكت

ظليت حايره افرگ بـ اديه بتوتر و رجليَّه اخذني ورا امشي ع كيف و خايفة من الظلمة 

راح جهة النهر وانا  امشي ورا راريدن اعرف كلام عمي كزار عنه صح و صدگ ممسوس  

سمعت طگطكة التفتت اشوفن شني  شفتها بزونة درت راسي ماله اي أثر فص ملح و ذاب وين راح ما ادري وصلت النهر نزلت ع كيف لجرف خافن نزل للماي 

ماكو المجان اظلم و منظر الماي بليل يرهب 

::  شعندج جاية وراي علوية 

جفلت من سمعت صوته وراي مباشر وگبل لا التفتت حط اديه بظهري و دفعني ع نهر