رواية عشقتة حتي اذلني الفصل الثامن عشر بقلم نوران
ساره
بعد ما رجعت لبيتنا طايره بكلام علي واعترافه بحبه الي وصار دافعي لحبه اقوى صح هو بقى نفس الشي وبنفس اسلوبه بس اللي اختلف هالمره اكد حبه الي ايام وفعلا تم عقدنا وبحضور اهلي واهله والحفلة جميله كانت بس المشكله علي كدام الناس يتصرف بجمود مميت ومن راحوا الناس وبقينا وحدنا كنت مذعورة منه ومن جموده معقولة ابقى انتظر منه كلمة حلوة لو غزل لو كلمات محبه كانت امه واخته وامي كاعدات يمنا بعدين طلعوا وبقينا وحدنا التفت الي وبنضرة هالمره غير عن كل مره
-شلونها مرتي
ابتسمت وخجلت
-زينه
-شو ليش منزله عيونج شيليهن وشوفيني اريد عيوني تحفظج طالعه قمر اليوم
-شكرا
اخذ ايدي وحطها بايده ويباوع لاصابعي ويلعب بالحلقه حسيت ايديه نار تجوي مثل ما قلبي نار ومشتعل اله طبعا لحد هسه حواجز هوايه بينا والسكوت والهدوء الممل ما يتغير وما عدنا اي مواضيع مشتركه اني كان الكلام عندي مزدحم والكلمات هوايه بس ما اكدر احجي والمقابل بهذا الهدوء وره فتره طويله يلا رجع يحجي
-ساره اني ما كنت متخيل بيوم اتزوج وحده بعمرج
باوعت بوجهه مقهورة من كلامه بس هو كعادته ما يعرف يجامل
-وشنو خلاك تاخذني اذا ما عاجبتك
-اني ما كلت هيج وانت لا تضلين بهذا عقلج شوكت تكبرين تره شلعتي قلبي اني كتلج احبج واخذتج لان احبج
جريت ايدي قوي منه بزعل
-والحب عندك بس حجي لسان
-هههههه لج انت كد حجايتج تريدين افعال اني اشوف مو وكتها هسه تره اهلنا بره
تداركت نفسي عزه بعيني شلون جفصه هاي صدك اني ما اعرف اسولف
-لا مو هيج بس انت كل ما نلتقي تضل ترزل بيه محسسني اني صغيرة تره عمري صار ١٩ سنه
-هههههه زين انت ليش ما تقبلين اكول عليج صغيرة النسوان يحبون هالشي
-انت تعرف غيري نسوان
-ههههه لج اني وين وانت وين تروحين لا ما اعرف غيرج ولا اريد اعرف يكفي انت بحد ذاتج مصيبه
-اني مصيبه
زعلت منه واجيت اكوم جرني لحضنه
-تعالي هنا وين ما يصير تكومين الا اكمل حجي وياج ما اقبل
-عوفني اروح اني مو طفله وتعاملني يهالاسلوب
-هههه لج انت شنو بس تدللين وتريديني اتعامل وياج كأمرأة كامله
-اي اني كامله شوف ما ناقصني شي لا تحاول تحسسني بنقص
-زين اني احب التحقيق واريد اثبات حتى تنفين تهمة الزعططه منج
ابتسمت لحجايته وهو ضل يلح عليه انطيه دليل واثبات اني مو مثل ما يشوفني
تقربت بسته بشفافه سريع وابتعدت وخجلت من تصرفي
-ها هسه كافي هالدليل
ضحك بصوت كلش عالي واني صافنه عليه
-هذه شنو تسميها لا تكولين بوسه هي كل شي ممكن تكون بس ما تنحسب بوسه تعالي تقربي اعلمج
-ها
-تعالي انعل لج لا تشلعين قلبي تعالي اتقربي يمي.
تقربت اله واني امثل دور مو لايق الي وكأنه غشيم مسوي نفسه يفتهم
هو شافني هيج ضل يضحك جرني واخذني لغير عالم ما كلفته هواي مجهود ولا تعب بس بوسه وياها همسه باذني ولمسات بسيطه اني صرت بخبر كان وعيت لنفسي كاعده على رجليه وابوس بوجهه وهو ميت ضحك
-كافي اثباتات يمعوده صدكيني اخذتي براءة من التهمة ههههه
دفعته بصدره خفيف اعاتبه هو جرني وحضني قوي
-لج اموت عليج
-اني هم قلتها بصوت اقرب للهمس
-شنو شكلتي ما سمعت
-اني هم احبك
-ادري اني ماكو احد ما يحبني
-مغرور
-هههه ليش الغرور بس الج يلوك لان حلوة تره اني هم اخبل فديتني شكد احبنيضحكت لكلامه وسكتنا فتره طويله وعيوننا هي اخذت الدور بالكلام بعدين صار يتهرب ويدير بوجهه
-كومي نطلع يمهم مو زين ابقى وياج اكثر
-ليش خلينا شويه بعد
-لج كومي لا تخبليني اكثر من هيج امج كاعده بره عيب كله اسبوعين ونصير سويه وما تخلصين بعدها مني بس ها من هسه اكول الج تره اني اطلبج هواي
-شتطلبني
-ها منو جان اسمه منقذ نسينا
-ههههه لا ما نسينا بس مو تاخذها عليه لزمه وتضل تكلي اطلبج نعقد صفقه واتفاق شلون اسدد حتى بعدين ما يبقالك حجه عليه
-راح تندم يا حلو
ضحكنا وضلينا سويه هوايه لحد ما امي اجتي سحبتني يلا طلعت من يمه وضلت كالبه وجهها عليه لحد ما رجعنا للبيت هسه منو كال الكم تعوفوني وحدي وياه وبعدين يدورن اطلع من كيفي هو اني لو بيدي اعوف امي تروح واني ابقى يمه ههههه
مرت ايام وتزوجنا بيومها كنت مثل سعفه وتهتز بيوم هوا عالي خايفه من شخصيته وما اهرف اتأقلم اني ويه الناس اللي طبعهم مثله وادري قلبي تورط بعد وحب وحبه صعب تقرب الي وحضني اني وباسني براسي كانت حتى البداية حلوة وياه ما احرجني ولا ضايقني بالعكس خلاني اني اطلب منه نقترب واقتربنا واقتربت ارواحنا لحد ما حسيت اني ضعت بس المشكله واني بهذا ضياعي اشوف علي ما مبين عليه زين هو يأكد حبه الي ليش مو مثلي متلهف
نام بهذيج الليله واني عيني ما ترضى تنسد من فرحتي وعشقي اله ضليت صافنه بوجهه للصبح يا ربي حتى لو سحر وساحريلياه ما اتعلق هيج باحد صرت اخاف من هاي الاعراض اللي عندي هذا جنون مو حب اي اني اعشق علي لحد الجنون
وعلي عيشني ايام نساني بيها حتى اسمي بداية زواجنا كانت حلوة وعلي صورلي دنيتي جنه وياه مر شهر عسلنا وقضيناه كله بين البيت والبستان علي يحبها هوايه وبكل مره ياخذني للمكان اللي طلعني بي قرب النهر ويكعدني ويكلي والله طلعتلي حورية من هذا المكان ويبقى يتغزل ويسولف اخذ عقلي وروحي كنا نضل ساعات سويه بدون ما نحس بالوقت بس بقى هو على نفس تعامله كدام الناس شي وبيناتنا شي ثاني مرات اضوج ومرات اكول احسن لا يحسدوني هم حلو وهم مركز وهم يحبني ويداريني
دراستي استمريت بيها وبين زواج ومسؤوليه ودراسه وتعب انقضتايامنا بس كانت سعيده جدا
كنت اتمنى لو احد يصدق انه علي اله غير الوجه اللي يشوفوه ويايه حتى امي من اكعد واكول الها مدللني ويحبني تاخذ حجايتي بضحك مثل واحد ياخذوه على كد عقله والسبب تعامله الجاف كدامهم امه حبتني وصرنا مثل ام وبنتها اي مشاكل ما عندي كملت عنده سنه اولى زواج واني اسعد انسانه وما خلت من اخطاء ومشاكل وكل مره اني اعتذر لان احس الغلط مني يمكن فرق العمر والوعي يفرق بيناتنا هو كان كل شي متمكن منه واني مثل طفل بعده يتعلم مشي اوكع وارجع اكوم ما يهمني اللي يعرفوه عنه الناس المهم اني اعرفه صح حنين وطيب بس هالشغلات كانت بالغرفه بس حتى من نطلع اخاف اتقرب عليه لا يفشلني لو يقهرني وصار اللي خايفه منه
بيوم كنا معزومين كلنا ببيت اهلي وخضير وجعفر موجودين اني وياهم مو هذيج الميانه وحتى همه كلهم نسخ متشابهه واقلهم تعصب وحديه كان جعفر بس اخجل منهم كلش كنت كاعده بعيد عنهم وهو وياهم مندمج واني مندمجه ويه اخواتي ضحكت وضحكوا همه بس اللي سكتنا صوت علي ونترته بيه والخزرة اللي نطانياها لان ضحكتي عاليه كلمه مني ما طلعت بس عفتهم ورحت للمطبخ ضجت وانقهرت خصوصا ازواج اخواتي اثنينهم التفتوا اله مستغربين ردة فعله
اجا ورايه وضل يرزل بيه شلون اكوم واتجاهله مو قصدي اتجاهله ولا ببالي هيج شي حسيت روحي اختنكت من اسلوبه بكل مره اكول اله اذا عندك شي نبهني بيناتنا لا كدام احد كلمه منه وكلمه مني عصب اول مره ارد عليه باسلوب ما يعجبه وهو ما قصر شويه ويذبحني بيومها طلع وعافني ببيت اهلي اول مره يسوي هيج شي هو ما يقبل اطلع من البيت وابات بره ضليت ابجي وامي وخواتي وريم التموا يسكتوني وطبعا الجلسه ما خلت من انتقادات لتعامله الدائم الي وشلون اقبلها هيج يسوي وياي واسكت موتني الضيم والقهر شكد احبه واتمنى رضاه وشكد اني رخيصة عنده ومو مهمه
راح علي ويوم ويومين لا اتصل ولا سأل وبيوم واللي قهرني كان يوصلني اني وصديقاتي للكليه طلعت الصبح بامل يوصلني لكيت سايق وخط خاص الي ما كدرت اسكت للزهر ورجعت من كيفي لبيته ما يمنعني ولا يكدر يطردني قابل شنو راح يسوي رجعت للبيت وتفاجات بمعاملته الي بصورة اذلال واضح وكأنه اني ميته عليه واجيت اله اكفر عن ذنبي
دخل من الباب وركضت اله حضنته وبمكان ما يبادلني هالشي صدمني بكلامه
-ها ساره خلص عرفتي غلطج وجايه تصلحيه بس هالمره مو مثل كل مره انت لازم تحسبين حساب كل تصرف وعليه ثواب او عقاب
سحبت نفسي ووكفت بعيد
-كملت حكمك الي
-ها رجعنا لهاي السوالف تعرفيني ما احب تناقشيني انت غلطتي ولازم تتحملين النتيجه
-ما غلطت ولا ذنب اذا ضحكت مره صار شكد وانت تتحجج مرات بفستاني وتزعل ايام ومره لشعري طالع من حجابي وتزعل ايام واني ابوس واراضي وكل مره اغير للي تريده
-سدي حلكج من اكول غلطانه يعني غلطتي ضحكه عاليه تجذب انضار الكاعدين كلهم اذا انت ما منتبهه نبهتج واذا متعمده اعاقبج افتهمتي
-انت شنو شايف نفسك عايش عبالك الدنيا بس انت بيها شوف اخر مره اسمح الك تحجي عليه كدام احد واخر مره اسمح الك تضايقني......
بعدني دا اكمل اجاني راشدي سد حلكي وضلت بس عيني تدمع اول مره يسويها
-علي اني غلطانه اجيت الك صارلنا سنه كامله متزوجين وانت ما حاولت تتغير ولو قليل واني كلبت شخصيتي كلها حتى اناسبك واصير زوجة قاضي بس تعبت وانت ما راضي عني حتى لو انطيك حياتي كلها اسفه ضايقتك رايحه لاهلي واكولك شي تره اني عشقتك مو بس حبيتك عشقتك وسمحت الك تذلني وهسه راجعه سارة القديمه لان مكاني غلط اني مو هنا موقعي ولا مكاني واترجاك مثل ما تورطنا بهالزواج خلصنا منه طلعت من بيته واني نفسيتي زفت ومعنوياتي صفر اني فاشله بكل مقاييس الفشل هاي كانت مشاعري مقهورة متضايقه من نفسي قبل ما اتضايق منه هو اني ضعيفه ما عرفت اثبت نفسي ولا اخذ الي مكان بقلبه
