رواية حرم الاسود الفصل التاسع عشر بقلم بتول ابو الليل
بس أنته عليك أتصب ألعيون
وماصبت عگب عينك على أحد
.➛ ✿✿ ✿✿ ✿✿ ✿✿ ➛.
جانت متمدده علئ الارض والدم بكل مكان والمرايه مال الميز مالتها مكسوره صرخت بصوت عالي
_اليااااان ياربي دخيلك
رحنه نركض عليها شالها تيمور بحضنه ونزل يركض اني اركض وراه وابجي واصرخ ماعرف شسوي بروحي دخيلك رَبي معقوله تموت واخسرها
_يااالله دخييلك الياااان حاجيني فتحي عيووونج تييييمور راح تمووووت راح تموووت الياااان
تيمور : ماتموت لاتصرخين كاافي
_الياان فدووة فتحي عيوونج اليااان
نزلنه بسرعه طلع كبل تيمور لسيارته شافه الحارس بقه صافن وفاتح عيونه صاح بوجهه
تيمور : افتح السياااره بسرررعه
هز راسه بأي راح يركض فتح باب السياره مددها تيمور داخل السيارع دخلت وياها صعد تيمور وساق بسرعه طول الطريق ابجي وارجف قاطعه وريد ايديها وتنزف ضاهر كاسره المرايه وكاصه اديها.
تيمور ; اريانا وكفي النزيف الزمي ايدها
_شسوووي شلوون مادري شسوي علمني ماعرف والله مااعرف
مسح وجهه بتوتر فتح الجكمجه طلع منهاا لفاف مال ركبه شمره عليه
تيمور : لفي علئ اديها بسررعه
هزيت راسي بأي واني ارجف لفيته علئ اديها سحبت راسها خليته بحضني ابوس بيه واني ابجي واشهك
_لاتعوفيني اليان تحملي فدووة لاتموتين
ضامه راسها لحضني وابجي بصوت مسموع اتصل تيمور بـ دكتور گله يحضر النه سديه نزلها عليها حته ياخذوها للطوارئ
اول ماوصلنه جانو واڪفين باب المستشفئ اجو بسرعه علينه فتحوو الباب وصعدوها علئ السرير واخذها بسرعه
احنه وراهم نرڪض دخلوها بالطوارئ بقينه بالممر خليت ايدي علئ حلكي ابجي بصوت مسموع
_دخيلك ياربي دخيلك احميها اليان لاتعوفيني الله يخليج تحملي.
اجه تيمور يمي سحبني من راسي لحضنه لزمت قميصه واني ابجي
_مراح تموت تيمور سوي أي شيء لاتخليها تموت والله اموت وراها اليان كلشي بالنسبه الي اذا تحبني ساعدها
تيمور : اشش كافي ماراح يصيرلها شيء وداعتج ترجع طبيعيه جرح بسيط لاتخافين
بقه يمسح علئ راسي واني حاضنته وابجي شويه وطلعت الدكتوره ابتعدت عنه ورحت اركض عليها.
_بشري دكتوره زينه اليان مابيها شيء موو
الدكتورة : لاتخافون تعدت مرحله الخطر الحمدالله ملحكين عليها بالوقت المناسب خاسره دم هواي وهسه راح نعلك الهاا دم ولازمها شويه راحه.
_الف الحمدالله الك يااربي.
الدكتوره : البنيه صاير عدها انهيار عصبي و...
تيمور : دكتوره اكدر احجي وياج شويه
الدكتورة : تفضل وياي.
راح تيمور ويه الدكتوره بقيت كاعده شويه رتاح گلبي من سمعت كلامها يالله احس متت وياها.
حقها اليان شما صاار بيها اني ممجربه اخسرر شخص عزيز علئ گلبي ليوم هيه هيج صاار بيها وفرفحت روحي عليها
الهي دخيلك انطيها القوه والصبر وخليها تتخطئ هل ايام الصعبه.
اتصل جهازي جانت امي مسحت عيوني سحبت نفس قوي وفتحت خط
_الو ها يمه
جميله : ها يمه وينج تأخرتي اليان شلونها
_يمه ءء اليان
مكدرت احجي اختنكت بدموعي بقيت ابجي امي تخبلت معرفت شنوو الموضوع
جميله : الووو اريانا ماما حاجيني شبييج ليش تبجين اليان شبيها
_اليان اليوم انتحرت
جميله : شنووو؟
_هسه اني بالمستشفى هسه جبناها قاطعه وريد اديها
جميله : يااا دخيلك ياربي هاي شجاها لبنيه تخبلت
_حيل خايفه عليها.
جميله : هسه راح اخابر ابوج ونجيكم لاتخافين
سدت الخط بقيت امسح بدموعي شويه واجه تيمور لآزٍمٍ بيده جكارته يدخن مستغربه من وضعه حته ماخاف علئ اخته هيج ماتهمه شعنده من گلب
تيمور : ها بويه هم طلعت الممرضه گلتلج شيء
_لأ
تيمور : جنت ويه الدكتوره كالت وضعها زين شويه وتصحه ونكدر ندخل عليها.
هزيت راسي بأي وسڪتت ڪعد يمي لزم ايدي يباوع الاصابعي مجنت لابسه الحلقه سحب نفس قوي من الجكاره باوعلي نفخه بوجهي غمضت عيوني بقهر.
تيمور : وين الحلقه.
_انتَ صاحي ؟ ڪل همك الحلقه اختك بين الحياة والموت وتفڪر بهيج مواضيع تافهه
تيمور : أذا انتِ تشوفين زواجنه تافهه فأ اني اعتبره شيء مميز شوفي اني مانزع حلقتج منا لحد ماموت.
_ميهمني ان لبستها او لأ اني ماريد ي شيء يذكرني بيك
تيمور : راح نتزوج هل يومين راح اخذج اليان تعبانه واريدج دارينها امي تعرفينها ماتهتم الهاا واحنه بالشغل منوو يبقه وياها انتِ الوحيده الي تڪدرين تساعدينها.
_موو ڪلت ورا اربيعين ابوك شتغير هسه صارو يومين الناس مخبوصه وانتَ تفڪر بالزواج فهمني من ياطينه مصنووع انتَ
تيمور : لأخر مره اكلج من تحجين صوتج لاتعلينه ليش تخليني افرك حلڪج بنت ال** انتِ موو ع اساس تحبينها شفتي بعينج حالتها منوو يهتم بيها اذا تبقه وحدها تأذي روحهاا تبقين وياها تنسينها الصدمه تحجين وياها تخلينها ترجع طبيعيه حالياً هيه بحالة صدمه ومحد يڪدر يساعدها غيرج
_مانتزوج اخذها لبيتنه عادي خلوها يمنه شيصير يعني
تيمور : عبالج ماحاولت وياها لج الباب ماترضه طلعه شلوون تـروح الكم انتِ موو حجيتي وياها ليوم وشفتيها بعينج
_ماعرف شوفلك غير حل ماتزوج هسه
تيمور : براحتج لانتزوج بس اذا صاار شيء علئ اليان لاتسوين روحج خايفه وتبجين لأن باصعب وقت ماوڪفتي وياها.
بلعت ريڪي بتوتر ودنڪت راسي واني حايره وخايفه ياربي دخيلك شسوي احس روحي باختبار ڪلش صعب
ماريد تيمور وخايفه علئ اليان صح وجودي وياها يخليها شويه ترتاح بس شلوون نتزوج وابوه مصارله 15 يوم من مات شتگول العالم علينه.
عافني وكام وهوه يدخن بقيت اعصر بصابعي دايخه وحايره شختار صديقتي لو حياتي الخاصه.
شويه واجت ماما هيه وبابا علينه استغرب تيمور باوعلي ورفع حاجب بلعت ريڪي وڪمت.
جميله : هاا يمه بشرو شلونها
حازم : شلوون صارت
تيمور : شويه احسن
حازم : لاحول ولاقوه ألا بالله شصار بحال البنيه ليش انتحرت
تيمور : مدمره نفسيتها فد مره وخايف عليها من تبقه وحدها تأذي روحهاا
جميله : زين امك وين ليش متڪعد وياها تصبر عليها بعدها صغيره وامك اڪبرر منهاا توعيها تخليها تعرف الصح من الغلط تستوعب انو ابوها خلص مات.
تيمور : اليان وامي موو ذيج الصحبه واريانا شافت وضعها بعينها ماتخلي أي بشر يڪعد وياها تبقه تعيط وتبجي وتطرد كل بشر يكعد وياها.
حازم : لازمها راحه ودكتور يعالجها اختك انصدمت وبعدها لحد هسه مواعيه علئ أي تصرف تسوي لاتضغطون عليها اڪـثـر ..
تيمور : عمي اني اريد اطلب منك طلب واتمنئ ماتردني.
حازم : ڪول بويه اني حاضر
تيمور : اريدك سالم .
حازم : احجي ڪول محتاج شيء
تيمور : تنطوني اريانا اريدها تبقه ويه اختي حيل تعبانه وبس هيه تكدر تكعد وياها وتخليها تنسه حالياً ماكدر اسوي عرس ولاكدر اسويلها حفله كدام العالم جنت مقرر نتزوج بعد ماتمر فترا علئ موت ابوي بس شفتو بعينكم حال اختي ماعندي غير حل.
حازم : والله بويه ماعندي مانع هل شيء راجع الكم انتم الاثنين انطيتك بنتي وهيه مرتك هسه شوڪت ماتردون تزوجون تزوجو.
جميله : شتڪولين يمه اريانا.
عيوني غوركت وختنكت كلش بلعت ريكي حايره شسوي وشحجي.
تيمور : اريانا موافقه موو
هزيت راسي بأي محجيت شيء ابتسم تك خد احسه عنده لعبه وجذاب موو علمود اخته اعرفه يريد بس نتزوج مكاتله مرض اخته ابد
حازم : هاهيه اعقدو عقد محكمه واخذها لبيتكم ومن تتحسن الاوضاع سوو حفله واحتفلو سويه
تيمور : شيء اكيد.
الممرضه : صحت المريضه تكدرون دخلون عليها.
فرحت كلش من كالت هيج الدكتوره دخلنه بسرعه عليها جانت صافنه وعيونها محاوطهن السواد
رحت كعدت يمها لزمت ايدها واني عيوني مليانه دموع
_اليان حبيبتي الحمدالله علئ سلامتج حيل خوفتيني عليج ليش هيج سويتي.
مجاوبتني بس ساڪته وصافنه اجت امي باستها براسها وكفت يمها
جميله : ماما اليان حبيبتي بنيتي ليش هيج يمه تأذين بروحج ودمرين نفسج وعيونج مايفيد شما تسوين مايرجع ابوج خلص بعد مات وكلنه نموت ابوج موو اول واخرر بشر يموت حرام الي تسوينه حته ابوج مايقبل بهاي تصرفاتج تردينه يرضه عنج ويرتاح تصيرين زينه وتدعيله وتصلين اله موو هيج تسوين.
غمضت عيونها بقهر سحبت نفس قوي احس بداخلها انهيارات.
مجاوبت علئ أي شخص منه مكتفيه بالصمت بقينه كاعدين يمها نسوالف عليها وهيه عبالك موو ويانه بغير عالم صافنه بنقطه وحده وساكته.
تيمور : يلا سجلت الهاا خروج نڪدر نطلعها.
_تيمور خليها تجي وياي لبيتنه فدوة
تيمور : اليان تروحين وياها
هزت راسها برافض عضيت شفتي بقهر ليش هيج تغيرت وصارت متحب أي شخص منه اريد صديقتي الي تحبني وتفرحلي وتحزن علئ حزني.
حازم : باجر اعقدو واڪعدي وياها بويه واهتمي بيها زين محتاجه شخص يكون وياها هل فترا ويداريها.
سڪتت مجاوبته بابا بسرعه اقتنع لأن شاف حالة اليان ماطمن وتيمور عرف شلوون يلعبها صّح ويمشي كل الامور علئ كيفه.
لزم تيمور ايد اليان وكومها طلعنه كلنه من المستشفئ جانو ملابسي كلهن دم من اليان.
حازم : أي شيء تحتاجونه بس خابروني
تيمور : تسلم عمي ماتقصر.
جميله : اني راح ابقه وياها ليوم ابو خالد اخذ اريانا ورجعو للبيت ماڪدر اعوف اليان وحدها وهيه بهل حالة.
حازم : اي زين تسوين يلا بويه.
هزيت راسي بأي باوعت لتيمور مركز بوجهي ابتسم بهدوء شتت نظري عنه خايفه من هل انسان حيل حيل مادري شنوو يدور براسه
رحت ويه ابوي صعدت بالسياره امي واليان راحو ويه تيمور.
رجعنه لبيتنه طول الطريق مختنكه واريد بس ابجي يعني خلص باجر يصير زواجنه رسمي واصير مرته.
وصلنه للبيت نزلت من السياره بابا مانزل لأن عنده شغل راح لشغله دخلت للبيت اني لكيت عفاف كاعده توكل بريان.
عفاف : هاا اريانا اجيتي بشري شلوونها اليان
_شويه احسن خرجوها واخذوها للبيت هسه
عفاف : عمه بقت وياها شنوو
_ي بقت وياها حالتها تعبانه ولازمها شخص يداريها ويهتم بيها.
عفاف : خطيه والله
_ادعيلها عفاف ادعي ترجع طبيعيه
عفاف : انشالله ترجع والله بعدها شويه تعبانه وممستوعبه موت ابوها هسه بس شويه تنسه ترجع طبيعيه.
_ابوها صارله نص شهر من مات ماشويه نست وتخطت
عفاف : ليش الموضوع سهل لهل درجه وتنسه بهل وقت القصير لاتنسين الي مات موو ياهو الجان ابوها الي مدللها وممخليها بنقص شيء حقها تنصدم عليه وتدمر.
_الله يقويها ويصبرها لوو تشوفين حالتها ليووم احس گلبي وكف من الخوف عليها
عفاف : اصعدي بدلي ملابسج كلهن دم وصلي وادعيلها وانشالله تصير زينه.
_انشالله
عفتها وصعدت لغرفتي اخذت ملابس ودخلت سبحت وبدلت وطلعت شسوت شعري ومشطته وتصلت علئ ماما
سألتها عن اليان كالت نايمه وهيه كاعده ويه جنان وجايات عليهم عماتها
سديت الخط وتمددت علئ فراشي تعبانه واحس روحي مختنكه
اريد ابجي واصرخ بصووت عالي اطلع كلشي بداخلي بس ماكدر.
سوه الي يريده تيمور مشه الكل علئ اصابع ايده محد كدر يوكفه عد حده ابد اخوي الجان رافضه وافق بكل بساطه وماعترض علئ زواجنه.
وماعرف شنوو السر الي بيناتهم وليش تيمور سوه كل هذا بيه من وراه .
...
آرون : ماعرف شلون اشكرك علئ هاي وكفتك وياي
جون : ع شنوو تشكرني احنه اخوه وبفضلك اني حصلت شغل وهسه صاار دوري اردلك الجميل
آرون : هسه يلا رتاحيت من لگيت شغل
جون : بس لاتنسه الشغل حيل متعب يعني يجيبون الكم بضاعات ولازم تنزلونها وراتبكم موو هل كد.
آرون : مايهمني التعب المهم احصل فلوس واعالج ابوي واختي ماخليهم يحسون بنقص.
جون : ومرتك ماحاسبها شو
آرون : ههه شلون ماحسبها بس هيه مابيها شيء هذول مرضه واذا بقو بدون علاج تتأزم حالتكم.
جون : الله يشافيهم بحق محمد والـ محمد
آرون : تسلم حبيبي تفضل وياي ع عشه
جون : لأ والله ماكدر خابرني الوالد هسه ورايح باجر داوم من وكت حته متخسر شغلك
آرون : انشالله
جون : يلا مع السلامه
راح جون لبيته ابتسم آرون رتاح لأن حصل شغل دخل لبيته جان ابوه واخته كاعدين بالحديقه يسولفون.
آرون : سلام عليكم
رحيم : وعليكم السلام
رهف : هلا خويه
آرون : شو كاعدين وحدكم جا أليڤ وينها
رهف : من رحت وهيه بغرفتها ماطلعت
آرون : سوت الكم عشه ؟
رهف : مجوعانين هسه بعد وڪت
آرون : ياوڪت ساعه بـ 10 شبيها هاي صدك تحجي
رحيم : علئ ڪيفك وياها يابويه البنيه بعدها مامتعوده ع وضع وانتَ واعدها طلعها ورحت وضاجت
آرون : استغفرالله ياربي شلوون بليه ابتليت اني غير ادورلي ع شغل منين اصرف عليها اذا ماعندي فلوس.
رهف : الله ڪريم حبيبي لاتضغط علئ روحك شتسوي تطير منين دبر الشغل
آرون : لا حبيبتي لگيت شغل و توظفت وباجر ادوام. انشالله
رحيم : يالله الحمدالله يارب
آرون : رايح اشوف أليڤ واخليها تسويلكم آكل
هزو. روسهم بأي مسح وجهه بتوتر عافهم ودخل للبيت راح لغرفته جانت ڪاعده تصبغ باظافرها وفاتحه كام ويه امهاا تسولف. شافته دخل سحبت نفس قوي.
أليڤ : يلا ماما احاجيج بعدين
سدت الخط وبقت تباوع اله سحب نفس قوي وكال
آرون : شبيج أليڤ؟
أليڤ : كلشي مابيه أسال نفسك هل سؤال
آرون : تدرين جاي اشوف انسانه ثانيه احسج حيل متغيره فهميني مقصر بشي وياج ليش هل اسلوب ابوي واختي ليش لحد هسه ممسويتلهم عشه تدرين بيهم مرضه ولازم يشربون علاجاتهم.
أليڤ : واني شنوو جايبني هنا خدامه الهم ترا بعدني عروس وحته مايصلح عليه ادخل للمطبخ اطلب الهم اكل من المطعم بعدين انتَ تفڪر بس بيهم متفڪر بيه اني هم جوعانه جان كلت مرتي عروس خليني اطلب الهاا اكل افرحها ولو بشي بسيط بس لاا شلوون كل فكرك بابوك واختك هذول المهمين عندك انيي لاشي.
آرون : شنوو خدامه شبيج أليڤ انتبهي لكلامج اذا علئ موضوع الاكل اني هسه اطلب الكم من المطعم بس اڪعدي وياهم ليش حابسه روحج بالغرفه.
أليڤ : ماريد شيء ابقه هنا احسلي اطلب الاهلك
آرون : أليڤ لاتشلعين گلبي ع اقل انتِ تفهمي وضعي زوجج اني لازم تعرفين شنوو يرضيني وشنوو الي يغثني مثل ما اني اهتم بيكم اهتمو بيه ولوو شويه.
أليڤ : شوڪت هتميت بينه انتَ تهتم بابوك واختك اني لاا
آرون : استغفرالله ياربي ليش بكل سالفه دخلينهم ترا هذول عائلتي شتردين لعد اتبره منهم ماداريهم.
أليڤ : مثل ماتهتم بيهم اهتم بيه اني
آرون : اني شعندي غيرج تدرين بيه احبج هواي وماحب ازعلج.
أليڤ : اممم اي واضح تحبني
آرون : وعيونج الاحبهن ماعندي اغلئ منج حب الطفوله انتِ
أليڤ : اني هم احبك هوايه بس اضوج بسرعه من تصرفاتك هاي صاير متتحملني اب. وتعيط عليه ع اتفهه الاسباب
آرون : اذا غلطان اني اسف
أليڤ : اممم عادي
آرون : انتِ موو المفروض هم تعتذرين مني؟
أليڤ : ماغلطانه بشي حته اعتذر
آرون : وكلامج وتصرفاتج هاي موو غلط احنه شنوو متفقين قبل لانتزوج موو گلنه نخلي التفاهم والصدق شيء اساسي بحياتنه
أليڤ : اسفه بس ترا انتَ حيل تضوجني اني ممسويه شيء
آرون : تعالي
فتح ايده الهاا حضنته ضمها لصدره باس راسها وبقه يمسح علئ شعرها الطويل لفت اديها علئ خصره وباسته من صدره همست بهدوء.
أليڤ : تطلب النه اكل لوو اكوم اسوي؟
آرون : لأ نطلع نتعشه برا يلا كومي بدلي
أليڤ : صدووك حلوو هسه راح ابدل
عافته وڪامت تبدل وهيه فرحانه ابتسم بحزن سحب نفس قوي طلع من الغرفه وراح علئ ابوه واخته يكولهم يحضرون نفسهم حته يطلعون.
...
ڪعدت الصبح واني راسي يوجعني ومصخنه لازمتني فلاونزه
ڪمت جسمي احسه متڪسر بدلت ملابسي ونزلت جوه جان اخوي مسلم راجع للبيت ستغربت مو كال يبقه يومين اشو يوم واحد ورجع.
_صباح الخير
مسلم : صباح النور
_مو گلت تبقه يومين؟
مسلم : خلص شغلي واجيت
_ياشغل انتَ مو رحت تبدل سيارتك وتشوف صديقك
مسلم : ايي هوه رحت علمود هل شيء بس ماعجبتني ولا سياره وبقيت علئ مالتي وشفت صديقي
_هاا
مسلم : أي شنوو عندج تحقيق من الصبح
_لأ بس اسال اخوي حرام
مسلم : لأ حلال
_عفاف وين
مسلم : تسوي ريوك
هزيت راسي بأي عفته ورحت للمطبخ شاكه بوضعه شبيه مسلم وشضام علينهه هوه وتيمور افندي.
رحت ساعدت عفاف بالريوك كملنه نقلناه ڪعدنه سويه علئ الطاوله نتريك بابا طالع لشغله بس اني واخوي ومرت اخوي.
مسلم : امي وين؟
عفاف : بيت اليان
مسلم : ليش
_لبارحه اليان انتحرت واخذناها للمستشفئ وماما بقت يمها تهتم بيها
مسلم : صدك تحجون لوو تشاقون ليش تنتحر شبيها هاي
_بحالة صدمه ممستوعبه التصرفات الي تسويها
مسلم : خطيه الله يصبرها
عفاف : تيمور واريانا راح يتزوجون زواج محكمه ليوم
مسلم. نعم؟
_راح نتزوج علمود اليان اريد ابقه وياها حيل مريضه ومحد يبقه وياها
مسلم : لاتخبلوني انتم واعين علئ تصرفاتكم لج ابوه مصارله فترا من مات حته ترابه بعده اخضر احترمو وفاته ع اقل خلي تطلع الاربعين صدك جذب
_احنه مجنه نريد نتزوج بهل سرعه بس علمود اليان حيل تعبانه هل فترا ونخاف عليها تأذي نفسها.
مسلم : والله عمي مادري شكلكم صار رأيي اخر شيء سوو الي يعجبكم طزز بيه
_مو هيج بس لان انتَ مجنت موجود او
مسلم : ايي مو ماعندي جهاز وتخابروني
سڪتت عنه دنڪت راسي عافنه وكام وهوه ضايج.
عفاف : علئ شنوو ضاج هسه شعلي بيكم انتم تزوجون موو هوه
_حقه يضوج الموضوع راح يصير بسرعه
عفاف : جا غير علمود اليان خطيه
هزيت راسي بأي وسڪتت كملنه ريوك شلنه الصحون غلستهن عفاف صعدت اني لغرفتي نظفتها وغسلت الفراش مالها احتمال ليوم مانام بيها.
فتحت كنتوري اباوع لملابسي والغصه خانكتني ماريد اروح لبيتهم ماريد اعيش ويه تيمور.
انطاني تيمور الفلوس مال نيشاني ماشتريت أي شيء بس الذهب عندي.
ملابس ماناقصني أي شيء كلشي مشتريه اني وارقئ الملبوسات والمكياج عندي ممحتاجه أي شيء اشتري.
اتصلت عليه امي فتحت خط عليها
جميله : الو ها يمه اريانا شلونج
_الحمدالله انتِ شلونج اليان شلون صارت
جميله : صعدت عليها قبل شويه نايمه هسه اجيت ويه تيمور حضري روحج تروحون تعقدون محكمه وخابر ابوج راح يجي هم ويانه
_تمام
سدت الخط غمضت عيوني بقهر سحبت نفس قوي وكمت اخذت ملابس بدلت خليت شويه مكياج كلش خفيف لأن احس وجهي حيل تعبان وراح اخذ صورة للعقد ومحكمه وعالم.
خليت عطر اخذت الجنطه ونزلت جوه جان اخوي كاعد بالحديقه مخلي ريان بحضنه يبوس بيه شافني رفع حاجب
مسلم : ها وين؟
_راح يجي تيمور وماما نروح للمحكمه نتزوج
مسلم : اي ع خير انشالله
_شكراً
مسلم : وتروحين وياه ليوم؟
_ماعرف
مسلم : باجر روحي متوازيه
_انشالله
بقيت واڪفه بالحديقه شويه وصل تيمور نزل من سيارته لآزٍمٍ بيده ورده حمره جوريه انطانياها ڪدام اخوي خجلت كلش اخذتها منه واني متوتره لزم ايدي وباسها
ابتسمت مجامله رفع حاجب وباوع لمسلم ابتسم بخبث راح سلم عليه ورجع عليه وكال
تيمور : يلا حبيبي امج منتظرتنه بالسياره
هزيت راسي بأي طلعنه سويه مجانت ماما بالسياره ستغربت ليش هيج كال لعد صعدت بالسياره صعد هوه وساق
_وين مـاما موو ڪلت بالسياره؟
تيمور : اجه ابوج واخذها منتظرينه بالمحكمه
_أڪيد
تيمور : هههه شبيج بابا خايفه اخطفج لوو شنوو زواجنه راح يڪون رسمي وبعلم اهلي واهلج
ساهر اخوي هم راح يڪون موجود وامج وابوج.
هزيت راسي بأي وسڪتت ساق اخذنه للمحكمه صدك جانو اهلي كاعدين منتظرينه نزلنه سويه رحت علئ ماما
_ها ماما شلونها اليان
جميله ; والله يمه مادري بيها هسه بس وصيت عليها جنان وبنت عمها شذر باتت يمها
_شذر؟
جميله : أي لبارحه اجت ويه امها وباتت عدهم
_ايي زين
اختنڪت واحس روحي طلعت اكيد ماجت تشوف اليان اجت تكضي وكت هيه وتيمور النذل.
درت وجهي اباوعله بقهر واكف ويه بابا يسولفون وجكارته بيده من باوعتله رفعلي حاجب معنئ شكو
رجعت درت وجهي علئ امي ضايجه ومقهوره حيل احس نفسي بلا كرامه ولا شخصيه ضعيفه حيل ماكدر اسوي أي تصرف يخص حياتي ومستقبلي.
كلشي يمشي علئ ڪيف تيمور يتحڪم بيه بكيفه مسويني مثل العبه بين اديه.
شويه وصل اخوه ساهر دخلنه سويه للمحكمه.
سوينه العقد وصار زواجنه رسمي وصرت مرته كدام الڪل.
انطانه ورقه العقد اخذناها وطلعنه لزم ايدي تيمور من طلعلنه حييل احسه ڪسر اصابعي باوعتله بغضب
_شبيك اصابعي
تيمور : اشش خليج وياي تمام
معرفت شبيه ليش هيج يتصرف خايف من شيء يتلفت يمين يسار وهوه لازم ايدي حيل
جميله : الف مبروك ماماتي تتهنون انشالله
حازم : مبروك بنيتي
رحت علئ بابا حضنته واني عيوني مدمعه اريد ابجي اريدهم يخلصوني من هل زواج الي خانكني خنك.
حازم : خلصن بناتي الحلوات ياريت مخلفين بعد هههه
_ههه عادي خلي ماما تخلف بعد بنيه
جميله : انجبي ولج ويني وين هل سوالف نباوعلكم بعد انتِ وتيمور.
ابتسم تيمور رفع حاجب يباوعلي بلعت ريڪي بتوتر وابتسمت مجامله
تيمور : احمم مرتي تجي وياي وياكم تروح
حازم : غير لازمها غراض وملابسها كلها بالبيت باجر الصبح تجي وتاخذها.
تيمور : ماشي بس هسه اريد اخذها ونطلع و العصر ارجعها الكم.
حازم : ماشي ع راحتكم
لزم ايدي كلبي صاار يوجعني ماريد امشي وياه راحو بابا وماما واخو تيمور
صعدت ويه تيمور بسيارته دخل بالسياره وساق هوه
تيمور : مبروك علينه مرتي الحلوه
درت وجهي علئ الجام نزلت دموعي بصمت عضيت شفتي بقهر اريد اموت حاسه روحي مختنكه ڪلش.
تيمور : بشش يحلوه علئ شنوو هل بجي اهلج موو بعيدين علينه كل يوم روحي وشوفيهم.
غمضت عيوني بقهر يالله دخيلك شلوون راح اتحمله بحياتي
تيمور : تدرين وين ماخذج هسه
مجاوبته مكتفيه بالصمت يحاول ينسيني ويخليني اهدئ وكف السياره ولزم ايدي دار وجهي عليه ركز بعيوني مسح عيوني من الدموع وباس عيوني بهدوء وهمس.
تيمور : ليش تبچين فهميني شنوو الي مضوجج احجيلي اريانا وعيونج راح تشوفين انسان مختلف عن الراسمته بالج راح تڪونين سعيده وياي
_ماريدك تيمور افهمني اني روحي متريدك انجبرت بهل زواج احس روحي مختنكه ڪلش
بلع ريكه بتوتر مسح شورابه بتوتر دار وجهه عني طلع جكاير دخن رجع باوعلي بتركيز
تيمور : هل حجي مايفيدج بعد صرتي مرتي تفهمي انوو كل ماتقهرين وتبجين راح تضرين بس نفسج تتعودين عليه وتحبيني.
هزيت راسي درت وجهي عنه خليت راسي علئ الجام واني صافنه سحبني من ايدي بقوه بحيث خلاني صرخت من الوجع
_اااي ايدي
تيمور ; اريااانا لاتخبليييني احجي وياي لاتفقديني عقلي اخاف عليج اني افهمي جاي احميج اريدج تڪونين يمي روحي من الدنيا انتِ ميهمني لا اخو ولا اخت ولا ام محد يهمني غيرج انتِ ليش هل تصرفااات ليشش بشنوو مقصر وياج هسه فهميني شبيييج
_منين تحميني تيمور؟ منوو يريد يأذيني غيرك فهمني شڪوو وشنوو الموضوع الضامه عني انتَ واخوي فهمني خليني اطلع غلطانه واحبك وعد احبك واغير من نفسي اذا عرفت نفسي غلطانه بحقك.
تيمور : اني الغلطان موو انتِ وجاي اتحمل خطيئه افعالي انتِ بس ڪوني وياي هذا ڪلشي اريده منج حالياً
_شنوو الغلط الي مسوي احجيلي خليني اتفهم وضعك صرت مرتك هسه الي حق اعرف اشياء عنك وعن حياتك تدري ليش ماريدك ليش خايفه منك لأن كلشي ماعرف عنك كل يوم تخليني انصدم بيك كل يوم اشوف انسان مختلف عن الشخص الجنت اشوفه قبل احسك وحش احسك ماعندك گلب ولامشاعر ولاتحسس ابد.
تيمور : احجيلج كلشي والله بس موو هسه بالوقت المناسب تعرفين تيمور منوو وشنوو ظام عنج وليش هيج تصرفاته غريبه.
_ماكدر اثق بيك احسك تلعب عليه مره وياي مره ويه شذر انتَ مهيمك شيء غير شهوتك ونفسك متفڪر بغيرك ابد.
لزم وجهي بين اديه باس جبيني بهدوء قرب وجهه من وجهي همس
تيمور : مايهمني أي بشر غيرج كلها متوصل مكانتج بحياتي لاتفكرين بيوم احب وحده مثلج انتِ ساكنه روحي اريانا هنا مكانج.
سحب ايدي خلاها علئ صدره ركزت بعيونه اريد اشوف صدق بكلامه ماكدر تصرفاته ماخلتني اثق بيه ابد قرب وجهه يريد يبوسني غمضت عيوني بتوتر
مانحس غير صاار اطلاق نااار قوي علينه تفلش الجام صرخت بصوت عالي وخليت ايدي علئ وجهي
