رواية لبوة الحياة الفصل الأول بقلم ساره العبيدي
مازلنا نتعلم كل يوم من الحياة درسا"جديدا"
رغم أن ثمن بعض الدروس مؤلم جدا" 🍂
هلاو شلونكم شخباركم راح تكونون وياي بقصتي الي اتمنى تنال أعجابكم الاسماء طبعاً مستعاره.....
اني جوري من عائله بسيطه تتكون من ام واب و اخواني 2 واخت وحده ......
هسه نجي على حياتي راح تخوضوها وياي....
أني جوري مواليد 93 اكبر اخواني مواصفاتي طويله بس مو عمود كهرباء 😂 170 طولي وزني 80 مدبدبه عيوني سود وشعري طويل كلشي بيه حلو الا خشمي احسه نشاز بس أحبه لان يشبه خشم بابا...
كنت صغيرة مافهم شي كل لعندي مدرستي ولعابتي وكنت كلش شاطره محد يدرسني اني ادرس من معلمه تقرأ بالصف اظل اردد وياها الي ان احفظ واذا انطت واجب كتابه بالفرصه اكعد اكتب واكمل واجباتي عكس اختي كانت بصف اول ابتدائي كلش كسلانه مهمله ماتدرس ولا بالها بلمدرسه كانت طول ليوم لعب بلمدرسه ومن ترجع تابع افلام كارتون اذكرها كابتن ماجد وسمسم وساندي بيل كانت تابعهم الى ان تخلص وتكمل اليوم كله لعب الى ان تنام ....جنطتها تفتحها ثاني يوم بلمدرسة بس والمعلمه يوميه دازه عليه ليش مادرسوها اني كنت احجي صحيح ههههههه ست ماتقبل وتابع كارتون وتاخذ كتله من المعلمه واني ارجع لصفي من نكمل نرجع سوه للبيت مع بنات المنطقه نلكه ابويه ينتظرنا بلباب حتى نتغده سوه اخواني كانوا صغار بس اني واختي بلمدرسة
هسه خلي اعرفكم على اختي لان حجيت عنها اسمها. ياسمين اصغر مني بسنه كانت بيضه ملامحه طفوليه طوليه هم احنا على بابا طول وجسم هيبه و كلش عاقله وماتحجي بس تلعب وضيع وقتها ماعدها شي مهم
هاي حياتنا كانت هادئه بيوم من الايام لي من هنا راح تبدأ معناتي لي ماكنت فاهمه هالشيء الا من كبرت تمرض ابويه لي كان سندي لي كان محد يكدر يحجي كلمه وحده معي لا امي ولا اي شخص ولي يزعلني يضربه حتى امي يضربها يصيح عليها اذا حجت وياي تمرض ابويه بقوا يوميه ياخذؤ لبغداد استمر مرضه 15 يوم رغم كنت صغيره بس اتذكر امي من تكولي انتي مدلله مالته مايرد الج طلب طبي عليه توسلي بي خلي ياكل كنت اطب للغرفه مالته اتوسل بيه يشرب شوربه كنت بيدي اطعمه رغم حالتنا ماديه كانت على كد الحال لكن عمره ماحرمنا من شيء كان كل عيد هو يشتري لي ملابس يرتبها بالليل يم راسي هو بنفسه يخلي لحنه لايدي لحد الان نار فاراكه عني بقلبي اخ يابه ...😭
بعد 15 يوم فقط من مرضه كعدت صبح على صوت صايح هوسه بالبيت طلعت لصاله امي صاحت بوجهي راح لي كان مدللج راح ابوج طلعت اركض بشارع معرف شسوي وين اروح اخذتني رجلي لبيت عمي جانوا برأس الفرع لكيت بنت عمي كعدت بلكاع ابجي لطم اخذتني رجعنا لبيتنا شفت تابوته بعيني
ماكنت اعرف اخذ سندي ماكنت اعرف راح ابقه مكسوره بسببه
صارت الفاتحه بيتنا وكملت امي تبهذلت لا اكل ولا شرب بعد سبعة ايام بيت كان مو بيتنا بيت عمتي هي خارج العراق عايشه لكن عمرها ماطالبت بالبيت ولا حجت ويانا بقينا بي لكن عماتي لي يمنا رغم يعرفون وضع ابويه المادي ويعرفون ماعدنا احد خلو عينهم على بيت حاولوا يطلعونه منه لكن زوجة عمي وعمامي ماقبلوا
بقينا بي لحد الان عايشين
بعد مرور الايام رجعنا للمدرسه ودوام وكل يوم اكبر بي احتاج ابويه اكثر احس كلمة يابه غصه بقلبي ماشبعت منها كنت احب اكعد وحدي ابقه اردد هلكلمه بيني وبين نفسي حتى أشبع منها....
مرت الأيام عاديه خوالي تكفلوا بعيشتنا لان جان وضعهم مادي كلش زين وعمامي بقوا يساعدون امي ويسالؤن عنا لان هم يلا مدبرين عيشتهم ومرت الأيام
عاديه اني مشيت بدراسه كنت اطلع الاولى من كل صف اما اختي هم كانت تنجح بس بلكتل وسحل يلا تطلع من صفها اخويه الكبير سجل مدرسه لان صار عمره يناسب بس امي كانت ماتعرف تقرا وتكتب مستواه ماكان زين مايعتمد على نفسه مثلي وهم كان طفل يحتاج تدريس ومتابعه وامي كانت حايره بيهم على بنات عمي وعلى جيرانه حتى يدرسوه وهو بطلعان روح يقبل يقرأ ..
ب2003 دخل الاحتلال العراق انا كنت صف خامس ابتدائي واختي رابع واخويه اول...
بهاي الاثناء الوضع صار يخوف وخوالي ماقبلوا نبقه بيتنا اخذونا عدهم بس امي كانت متقبل تبقه تكول مارتاح نسوان خوالي بعد نسوان لازم الغيره والحقاره تشتغل فكانت بنهار نرجع بيتنا وبالليل نروح نبات يم بيت اجدادي لان احتلال ومداهمات بالليل كانت تصير الله لايرد هلايام بيوم من الايام امي ماقبلت تروح تنام عدهم واجت علينا بيبيتي وابن خالي يباتون يمنا
ونايمين بأمان.الله وصار ماكان متوقع........
