رواية عشقتة حتي اذلني الفصل العشرون بقلم نوران
سارة
اول ما صعد علي بسيارته واني انطلقت
-وين موديني علي رجعني لبيت اهلي ما اروح وياك
التفت الي ببرود قاتل ومشت السيارة كملت كلامي وهو ما يباوع لوجهي ابد
-علي دا احجي وياك لا تعاملني بهالاسلوب تره والله افتح الباب واذب نفسي
ركن السيارة واني عبالي خلص راح انزل جفلت من مال بجسمه كله عليه غمضت عيني واستسلمت كلت راح انضرب بس ما صارت وبدل هذا حسيت واخيرا وبعد ليالي باردة طويله بدفو جسمه جر حزام الامان وربطه بعصبيه وخزرة وياها وقفل الباب من يمه ورجع ساق سيارته بسرعه وصلنا للبيت اني مطنكرة ما ارضى انزل واكيد راح يجبرني انزل بس اشو هذا عافني ونزل للبيت عبر جوه يعني شنو هالخبالات تريدني ارجع للبيت وبهالطريقه تعاملني حسيت بنفسي اغلي من الغضب ودمي يفور اريد انزل اعيط عليه اوعي لنفسه شنو شايف نفسه ويذلني بكل مره هيج
رجع شايل جنط اثنين شمرهم بالسيارة وصعد يعني هنت عليه يعني راح يرجعني هالمره اني وهدومي طلعت عمتي واني احبها ما اكدر اكسر بخاطرها نزلت اركض اسلم عليها
-ها سويرة عفتيني ونسيتينا مو هاي المرجيه منج بنيتي انت ليش هيج سويتي بينا
-اسفه عمه والله يعز عليه فراقج بس شنسوي بعد صارت وما تراهمنا
-ماكو هالحجايه ما تكوليها روحي وراه وراضي رجلج المره مالها غير زوجها لو تشوفين حاله بهاي الايام جان عرفتي شكد يحبج روحي وياه ومن ترجعون اريد اسمع بخبر يفرحني حفيدي وين صار
ضليت افر باذاني شنو جنطي بالسياره شبيها الحجيه خطيه لازم متدري راح يرجعني لاهلي رجعت صعدت بالسياره وره ما وادعتها وهو ما يشيل عينه من عليه
-ها نمشي
-اي
-ليش ما بدلتي ملابسج هاي مو مال سفر
-سفر!!!!
-اي سفرة
-وين موديني علي رجعني لاهلي اني ما اسافر لاي مكان ولا اطلع وياك
-تدللين حبيبتي صار ارجعج من نرجع
ضليت مصدومة وهو مشى بالسيارة بعد لا اعرف وين ماخذني ولا شنو بباله
ضلبت كل شويه اسأل وهو ما يجاوب بعدنا ما طلعنا حدود محافظتنا بديت ارد من راسي بالاول ما اهتم وعود هو لساه مسوي روحه ثكيل وزعلان شافني تخربطت اكثر بده يسألني
-سارةشبيج نرجع تعبانه
-ما ادري اني ما اطلع هوايه بالسياره وعندي دوار من السيارة والمسافات البعيدة
-زين شلون احنا وصلنا نص الطريق تتحملين لو لا
-هو انت وين موديني مو كلت الك ما اريد اطلع
-والله سفرة ومخطط الها من زمان واجازتي وشغلاتي رتبتها لهاي الفتره اريد نبتعد عن الديرة وابقى بس اني وياج
-ما اريد رجعني
-هي مو بكيفج اعتبريني خاطفج هههه
باوعت بوجهه والله وعود مسوي روحه يعرف يتشاقى سكتت وغمضت عيوني لان صارت تغوش والحمد لله نمت والنومه ما كعدت منها الا على ايديه توعيني باوعت من الشباك فد بنايه عاليه كلش وتخبل من بره نزلني وعرفت احنا بباب فندق دخلنا واخذوا الجنط وصعدنا لغرفتنا اللي الظاهر حاجزها قبل ما نوصل اني هنا كانت الدنيا لساها تدور بيه وهو انتبه اخذ ايدي وحضنها وسندني اله دخلنا للغرفه كل شي ما انتبهت بس شفت الفراش وبدون كل شي رحت غسلت ايديه ووجهي وذبيت نفسي بالفراش بدون حتى ما اغير ملابسي لان صرت بغير عالم تعب الحفلة والطريق خلوني انهديت
نمت وما ادري بالدنيا شكو وما وعيت ولا حسيت على شي الا لماعلي يوعيني فتحت عيوني الدنيا نهار حيل من المغرب قبل بيوم نمت لحد الساعه تسعه ثاني يوم
-صح النوم يلا كومي ورانا برنامج طويل اليوم
باوعت اله وما رديت عندي هوايه عتب وهو حتى مستكثر ينفه عن خاطري ويسمعني يتجاهل حتى زعلي درت اله ضهري
-ما اريد اطلع تعبانه
-بس اني اريد كومي ويايه يلا نطلع
كمت من فراشي كلش متضايقه اريد اضربه بشي واخلص منه طلعنا وعرفت احنا باربيل والفندق اللي حاجزه كلش راقي
اول محطه النا كانت افطار بمطعم راقي كلش بحيث كل شي بنظام وترتيب معين كل شي ممل احس روحي تريد تطلع كملنا ووراها طلعنا لمكانات كلها نفس النمط واني بكل مكان ندخله احس بخنكتي تزيد ومقياس الملل يدك براسي للحد الاعلى اباوع عليه هو عادي متعود خلصنا غدانا واحنا بره تعبت ومليت وضجت وكل المشاعر المزعجة عندي وصلنا فندقنا اني سبقته وصعدت ركض ورحت اخذت حمام وطلعت للفراش بوجهي
مر شويه وقت هو خلص حمامه واجا للفراش وجرني لحضنه بدون لا مقدمات ولا كلام ردت ابعد نفسي عنه ضاج وقيدني وحوطني اقوى
-سارة كافي عناد
-هذا الكلام كوله لنفسك مو الي
حضني اقوى
-لج اسكتي اريد انام صارلي كومه ما شايف النوم
ابعد ايديه يرجع يلفهن عليه
-علي ما اريد
-شنو ما تريدين
-ما اريد اللي تفكر بي لا الي مزاج ولا اكدر بعد اتقبل الموضوع
-زوجج اني وغصبا عنج
وكفت من مكاني مستنكرة
-هو مو كل شي وكلت غصب عنج لا مو غصب
عصب وجرني قوي بعد ما ابتعدت حصرني بين جسمه والجدار ادفعه كل قوتي ما يتزحزح ويحاول يجذبني اله تالي عصب وصاح عليه بقوة خوفني من صدك اول مره اشوفه بهالحال
-اريد اعرف ليش انت ما تريديني زعلتي اجيت واعتذرت شتريدين اكثر تحسسيني برخص بهاي تصرفاتج سارة
-مو اني الي طردتك انت طردتني من بيتك
-واجيت اعتذرت ما يكفي هيج لو لازم اقدم القرابين وابوس ايدج حتى ترجعيلي
-ليش تتعامل وياي هيج
-وشبي تعاملي وياج احبج واكدتلج هالشي وانت تجرين بنفسج
-اني هاي شوكت واني صرت هيج انت اللي تتعامل وياي ببرود وما تريد طفله تخربط نظامك اللي حاطه لنفسك
-يعني انت تعترفين بنفسج طفله
-علي
-اش ولا كلمه وما ورايح من اكولج باباتي لو بنيتي لا تزعلين ولا تعاتبيني انت طفلتي الي ما اريدها تكبر واخذتها حتى تشخبطلي باقلامها الملونه حياتي كلها
سكتت بالضبط مثل ما امرني وما رديت عليه بس عيوني كانت ما ترضى تنزل ولا ابعدهن عن عيونه رجعني للفراش واني مثل لعبه عنده حضني ونام بس شكله مال واحد صدك صارله هوايه ما نايم اريد اوخر ايديه عني بالضبط مثل طفل وحاضن لعبه وما يرضى يعوفها استسلمت ونمت حسيت بي كعد وبده يبوس بوجهي وبخشمي فرحت فتحت عيوني اريد ابوسه وابادله بوساته الحلوة بس كبريائي منعني
-ها كعدت حبيبتي
-لا لساني نايمه
-دكومي لج يلا روحي غيري ملابسج اريد اخذج لمكان يمكن انت تحبيه
-دخيلك مو مثل طلعة الصبح
-هههههه دريت بيج ضجتي الصبح بس سارة تره ميصير تريديني ارجع عمري ٢٠ سنه شويه شويه وعيونج الحلوات اصيرلج عمري خمس سنين اذا قبلتي تاخذيني وياج
-وين اخذك
-لقلبج ولروحج
-هههه هو اصلا انت هناك-لا مو هناك والدليل اول مشكله وصرنا كل واحد بمكان
-علي انت....
سكتني علي وخلى ايده على حلكي ما يريد اكمل
-ادري بنفسي وادري اني الغلطان واسف والله وندماان وما بيها شي اعترف وانت هم لازم تعترفين بالغلط ما بيها شي سهلي على نفسج والله ترتاحين ساره كافي عتب تعالي نكمل بغير طريق اللي بديناه لان كله اخطاء علميني واعلمج اني متأكد من نفسي شريد هسه اذا مستعده انت وتتقبليني ما راح اضيعج مني مره ثانيه
-علي اني ضجت لان شفتك ما مهتم
-انت ما تدرين بناري حتى تحكمين شوفي نتفق هسه هاي اجازتنا اسبوعين وراح نكضيها هنا سويه خلصن الاسبوعين واحنا نريد نبقى اكثر نستمر سويه شفتي نفسج باي يوم من هاي الايام ضجتي لو متريدين تكملين كولي بساعتها نرجع وتخلصين مني ومن شوفتي
هو يسولف بعده واني انقهرت اتذكر الايام اللي بدونه قضيتها بمرار وادعي القوة كدام الناس ومن اكون وحدي اشتاق واحن لكل شي بي
غبت بافكاري وتخيلت نفسي بدونه وشلون راح تكون حالتي لا اراديا ذبيت نفسي بحضنه وهو ماصدك زاد بحنيته وحبه اضعاف
ضلينا فتره متحاضنين تالي بعدني وطبع بوساته بخدودي جنت اتمنى لو بوسته تكون مو على خدي اريد بوسه تنهي كل الزعل وتمحي كل ذنب بعدني عنه وكال غيري ملابسج نطلع وطلعنا وهالمره الاماكن اللي اخذني الها غير شكل رحنا مدينة العاب وبالاول جنت اصعد وحدي بعدين سحبته وياي بعد ما وكعت ماي وجهي من التواسيل وهو يضحك عليه تونسنا وراها طلعنا نريد نتعشى وما قبلت ادخل للمطاعم اللي يحبها هو اخذته لمكانات شعبيه اكلنا وتونسنا اكثر وبيومها صدك حسيت بعلي يحاول يتغير بس طبعا كلش صعبه عليه لان من صغره وهو هذا طبعه جامد
وره ما خلص يومنا ورجعنا للفندق اني اكتفيت وشفت علي وحبه خلاه يسوي شغلات مستحيل يسويها لغيري او ان احد يطلبها ويسويها اله دخلنا غرفتنا واخذت حمام ورتبت نفسي اله ورحت عليه كان متمدد يباوع بموبايله اجيت حصرت نفسي كوه بين ايديه اللي لازمات الموبايل وبين جسمه تمددت ووجهي بوجهه ضحك وشمر الموبايل واخذ اللحاف وتغطينا بي جان ببالي هوايه شغلات مشتاقه اسويها وياه بس هو ضل مبتسم وساكت ووره كومه يلا نطق
-يلا غمضي عيونج ونامي لا تتأملين شي
-علي شنو هاي شبيك انت ويايه
-هههه مخبله شكو كبيتي بوجهي مابيه شي بس ما اريد تستعجلين فكري زين استاهل اني تحبيني ما راح تتندمين فد يوم على حبج الي
-وليش اتندم اني احبك وادريبروحي كلش زين بس انت تحاول تشكك بحبي دائما
-يا قلبي ويا عيوني انت ليش تاخذين كلامي بغير مقاصد والله قصدي مو هيج
-شنو تقصد علي والله انت تشوف اني صغيره غير تعلمني انت تفهمني
-اي انت صغيرتي بنية قلبي وحبيبتي
-واحبك واموت عليك علي
-لج كافي هالكلام تره ما اكدر الزم نفسي عنج نامي يلا
-ما انام ولا انام اذا ما تبوسني
-هههه يلا ميخالف تطلبيني بوسات هوايه من نتراضى
-لا اريد هسه
-يا بويه ولج لا تخليني اتخبل بلا شي اني كوه مسيطر عوفيني
-هههه هو اني اريد اخبلك ويايه
-شو دتعالي
بوسني ودغدغني وحضني بالبدايه كانت لحظات ضحك وراها الموضوع صار غير شكل وتطور وتعالت انفاسنا وبعد ماكو رجعه من لهفتنا شكد علي يتحكم بنفسه والشغلات اللي يريدها هي اللي تصير عرفته بهذاك اليوم شلون انقلب على نفسه وغلبته مشاعره اني كنت منتهيه وياه وسلمت من اول بوستين وعضه هههه بس هو قاوم وضل هوايه ممتنع ما يرضى وتالي غلبته وهالمره اني حسيت بنصر كدرت اخذ علي وقلب علي وكل شي صار الي
شايفين شعور الجيش الفاتح لمدينة محصنه هذا جان شعوري واخيرا تمكنت منك وفتحت قلبك ودخلت بي وما اطلع للابد احتلال للابد ضيعته بحبي وانتهى امره هههه
خلص يومنا كله واحنا سويه احلى اجازة واحلى ايام قضيناها هاي اللي تعلق بالذاكرة وما تنمسح ابد خلصت الاسبوعين واحنا هناك اهلي يتصلون وخواتي يسألون مودة عدها كل اخبارنا لان خضير وعلي على طول يسولفون ما ادري بشنو وما عرفت الا لما رجعنا
ااااول شي صار مصعب فاجأنا بجيته لبيتنا واعتذر عن اللي صار وبين حسن نيته واعتذر اكثر لخاله وراد ننسى اللي فات والصدمه اللي عرفته منهم علياء زوجة خضير كانت السبب بكل مشاكلي ليش وشكو وشعدها ويايه ما ادري بس اللي اعرفه هي تكرهنا واللي ساعدتها عمتي سهيلة وكرهها القديم لامي واللي ورثناه احنا شكد شايفه بشر عنده شر مثلهم ما شايفه خضير من عرف بالموضوع رايح لبيت عمي ابو نذير ومسوي اللازم وياهم ومصعب اخذ عمتي سهيلة وطلع بغير بيت لان خافوا على اخواتي منها واهلها كلهم قاطعوها وصارت منبوذة من الكل
فاتت سنين وما تكرر شي من القديم ولا اثر على حبنا شي وبالعكس كل سنه وبعشرتنا يزيد حبنا اكثر علي صح يحبني وحنين هوايه بس بقت شخصيته القديمه نفسها بره البيت واني بقيت مدللته وحبيبته وبقى يعاملني بدلال زايد
كل دنيتي صار هو ارتاحيت كلش ومشت حياتي سعيدة جدا بحب حبيبي
خضير ومودة صار عدهم علي وجعفر وغدير صار عدهم صبا وسما واحمد صاروا عنده ٣ اولاد
واني وعلي بقينا فترة يلا صار عندي حمل وكانت اول فرحتي بريهام بنتي الاولى ووراها بفترة اجانا ولي العهد اللي الحجيه ضلت تلح تريده وهي اختارت اسمه فهد بأسم ابوها لان حلمت بي منطيها طفل باللفة صغير واني بهذاك الشهر صرت حامل وصرت ام فهد ومتت بجي بيومها مو عاجبني الاسم وكو عاجبني اصير ام فهد وقنعوني محد يصيحني باسم ابني ويسموني ام ريهام وبس وعلي يضحك عليه ويكلي لو تخلفين بعد عشر اطفال تبقين انت طفله ما يدري بطفلته ما تكبر لان ما لكيت اللي يسمح الي ان اكبر وضل يعاملني مثل اول يوم التقينا بي بس بفرق واحد صار بمكان الرزاله والعركة بوسات واحضان ودلال ماكو اله مثيل
لهنا انتهت قصتي ويه علي وادركت الحياة شكد ما تقسى تجي بعدها ايام لين وماكو ظلام ما يجي بعده نور وعلي صار هالنور بحياتي منقذي وحبيبي واملي بحياتي ❤❤ #
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
