رواية سيرة القدر الفصل الواحد والعشرون بقلم فجر المساري
قـــــصــــة أســـــــيــرة الـــــقــــد ر
#الناقله_وردة_الدليمي👑
#البارت____21 الاخيرررررر
سراب… بقينه بيت مازن يومين جنت كلما ادخل
للغرفه اشوف لمياء تبجي واني انقهر عليها خطيه
جان وجهه متفاركه الابتسامه…
صعبه شخص تحبه وتنصدم بحقيقته مثل منصدمت
اني ابن عمي ياسر… جنت اكلها ياعيني هو الخسران لا تهتمين…
والوقت هو راح ينسيها… وطول ليوم حابسه روحه
بالغرفه صعبه عليها ..
لمياء ...كومي وصيري قويه لاتبينين اله انتي ضعيفه
خلي يشوفج قويه… حضنتني وكالت والله صعبه
كتلها بس انتي اقوه كومي حبيبتي غسلي وبدلي
وطلعي خلي يشوف انتي ممتهمه ..
كومتها وغسلت وجهه واخذتها يم الحجيه تسال
عنها سولفنه وضحكنا رغم همومنا حاولنا نطلعها
من الحزن الي هي بي لان ميستاهل…
كامت شويه شويه تفك وتسولف وتضحك
ولليل خابرني حسن كال تحضروا لصبح تجي
سياره تاخذكم للمطار ومناك لاربيل…
كعدت غسلت وحضرت الملابس اجتي اخت مازن
صاحتنه ع الريوك رحت للحجية كتلها حسن راح
يدزنه سياره ومناك نسافر لاربيل اتريكنه وكملنه
غسلت وبدلت لجهال وكلت للبنات يتحضرون دك
تلفوني شفته حسن جاوبته… الووو
الوو شلونك الحمد لله وانتووو بخير الحمد لله
وكال جهزوا نفسكم بعد 10 دقايق راح تجيكم
سيارة تاخذكم للمطار… كتله اييي كملت سديته
منه عشر دقايق واجتي سيارة…
مازن جنت اشوف لدموع بعيون لمياء حاولت
احجي وياها منطتني مجال دزيت الها رساله
وحجيت الها كلشي وسبب الي خلاني اضم عليها
زواجي وكالت خلاص كلشي انتهه من اليوم
الي عرفت بيك متزوج انت بالنسبه الي متت
كلامها شكد قاسي عليه بس متلام اني ضميت
عليها زواجي جان المفروض اكلها…
وبعدها مكدرت اتواصل وياهه حضرتني من كل
الوسائل… ونهت كلشي…
لمياء جنت خلال هاليومين حابسه روحي بالغرفه
مااريد اشوف مازن لان استهان بمشاعري
وكذب عليه… و جرحني…
شكد الحب ياذي وشكد يخلي الانسان ضعيف
ممتخيلة هيج يسوي بيه
من كالت سراب باجر رايحين فرحت لان راح
ابتعد عن مازن ودعيت ربي انساه…
سراب… بين مكملنا كلشي فاتت ام مازن ومازن
واباوع على لمياء وعيونها كلها دموع
واحس مازن يريد يحجي وياهه بس هي تصد عنه
واني وام حسن تشكرنا منهم…
وسلمنا عليهم واخذنا غراضنا والاطفال وطلعنه
صعدنا بالسياره واني الف فكره براسي ياربي
شراح يصير بينه ليش هيح بيوم وليلة كلشي اتغيير
وخسرنا بيتنا وعفنه منطقتنه ومحافظتنا
وناسنا ليش هيج شنوو ذنب هالناس الابرياء
والي راحوا شهداء بدوون سبب…
شنووو ذنب هالشباب الي جنهم ورود يموتون
مشافوا من الدنيا شي…
وشنووو ذنب العوائل تتهجر وتترك بيوتها وشنووو
ذنب لمياء تخسر دراستها وذنب اطفالنا ينحرمون
من تعليم… ويتهجولون من مكان لمكان…
صعد ويانه مازن مقبل يتركنا… وطلعنا للمطار
كبل وبعد مكملنا الاجراءات واحنه كاعدين ننتظر
شفت مازن واكف على جهه متحملت كلت لازم
اخذ حق لمياء منه واحنه بناتنا مو رخيصات
رحت عليه وهو منطيني ظهره كتله مشكور
اااخ مازن مقصرت كفيت وفيت بسوايتك ويه
لمياء هي هاي الصداقه عندك عيب عليك حسن
امنك على بيته وعرضه وبنات اخو وانت ماشاء الله
عليك طلعت متزوج وعندك طفل وهو مدنك ساكت
يعرف بنفسه غلطان ..كتله خلي الزمن ياخذ حق
لمياء منك ..عفته ومشيت واخذت الحجيه والبنات
والجهال وصعدنه بالطيارة وصلنا لاربيل نزلنا
اتصل حسن كال صديقه ضابط اسمه محسن ينتظرنه
بالسياره هو سوالنا اجراءات الكفاله وراد ننزل عدهم
بيتهم نتغده احنه اعتذرنه منهم وصلونه للبيت
جان عباره عن شقة زغيره بيها اثاث بسيط تشكرنا
منهم وراحوا… فتنا رتبنا وضعنا الجهال جاعوا..
فتت للمطبخ فتحت الثلاجه متروسه مسواك لحم
ودجاج وفواكه واجبان سويت غده وتغدينه
اخذت غرفه الي ولجهال وعمتي والبنات اخذوا
غرفه ضلينا تقريبا شهرين مشايفين حسن بس
بينه اتصال يطمئن علينه وقلبي نار عليه ومستاقتله
ومرات ماكووو تغطيه او شبكه…
ومرت الايام وحسن ماكوو ومره على الغده جنه
كاعدين كلنا ماعده حسن بقه هناك بالانبار ذكرت
كعدتنا سووا ولمتنه عيوني دمعت…
ومرت الايام عاديه…
وحسن كل يوم يتصل علينه لو احنه نتصل بي
وفد يوم كعدت الصبح حضرت الريوك وتريكنه
والبنات طلعوا لسوك جانوا محتاجات غراض
والحجية كاعده بغرفتها خليت بكر وفهد يمها
ونظفت البيت وكملت فتت للمطبخ اسوي غده
جنت منداره على الطباخ داطبخ وسمعت صوت
حسن يكول يمه افيش على ريحه الاكل الله شكد
مشتاق لطبخج ..اني ركضت عليه وحضنته وبسته
من خده من فرحتي ...واني ممصدكه حسن كبالي
ودموعي نزلت كلي ياعيني ليس تبجين كتله
دموع الفرح ..شعور حلووو من يرجع زوجج من
ساحة المعركه وتلتقين بي ..
باسني من راسي وكلي مشتاقتلي… كتله اي هوواي
كلي شكد يعني… وابتسم
كال وين بكر وفهد وامي والبنات كتله البنات راحوا
لسوك وبكر وفهد يم عمتي بالغرفة نايمين
فات عليهم رحت ورا جانت عمتي كاعده كعد
يمها وباسها من راسها وايديها وهي تبوس بي
وتبجي واني ابجي ..شكوللكم على الموقف
الام من يرجع ابنها وتشوفه سالم كبال عينها
ربي لا تفجع ام بابنها… بقه كاعد يمها واني اخذت
جنطته وطلعتله ملابس وحضرتله الحمام وكتله
حسن فوت اغسل بين ميجون البنات ونتغده سووا
وهو يبوس بكر وفهد ومخليهم بحضنه اخذتهم
منه وكتله فوت اغسل انت تعبان…
فات غسل وبدل وطلع بوقتها صلاه الظهر
صله صلاه الظهر واجوي البنات شافوا وكلهم راحوا
ركض عليه ويبوسون بي عبالك مو عمهم اخوهم
وصبينه الغده وتغدينه واشوف كلنا كاعدين على
السفره واكول ربي يديم هاللمه الحلوووه
ورجعت للمتنه وايامنا الحلوووه…
ومشت ايامنا عاديه وصرت حامل وكلت لحسن
كلش فرح بس حسن قليل ينزل يعني اسبوع يمنا
وشهرين او اكثر يغيب بساحه القتال…
وصرت بالشهر الرابع وعرفت حامل بنوته ولمياء
رجعت لجامعتها بالاقسام الداخلية بجامعه الانبار
متجي علينه بس بالعطل… واني فترت الحمل كلش
تعبتني لان وحدي اني وعمتي والبنات رباب وجمانه
والجهال وعمتي مريضه ومرات حتى مصرف ميبقه
عدنه لان حسن يتاخر علينه هوواي ..
فجنت اضطر انزل للصايغ وابيع قطعة ذهب
ونتصرف بيها حتى اكدر ادفع ايجار البيت
ومصاريف علاج عمتي مرت علينه ايام صعبه كلش
ومشت الايام واجتي بنتي ع الدنيا بوكتها جان
حسن موجود نازل باجاره ..
بلليل صار عندي .. وجع كعدت ..جنت اتوقع مقص
بس اشو زاد الوجع … كعدت حسن شبيج سراب
الوجع زاد يمكن عندي ولاده… راح صاح وحده من
البنات ساعدني ابدل ملابسي ولست شال والعبايه
واني جنت محضره جنطه الطفل وملابسه عمتي
مريضه بقت هي وجمانه يم الجهال وراحت ويانه
رباب وصلنه للمستشفى والحمد الله الله سهل
وجبت بنوتي… وسميتها سمية على اسم امي
الله يرحمها…
بوكتها ضليت على تواصل ويه خالتي حميده تعرف
اخباري واني اعرف اخبارها بينه اتصال ..
وبعدها انتقلنا لبغداد اجرنا بيت وبقينه فتره
الي ان اتحررت الانبار ورجعنه لمنطقتنه وكبرت
بنتي سمسم…
بيتنا جان محترك اضطرينا نستاجر مشتملات اثنين
لان صرنه عائله جبيره…
ومن رجعنا عمتي يله عرفت البيت احترك كلش انقهرت عليه بس كالت فدوووه لحسن 10 بيوت
مو بيت واحد…
اما لمياء تنزل بس بالعطل ونجحت ..
والتهت بدراستها… وكليتها .. ونست مازن…
الحمد لله
وهاي قصتي قصة ســراب
وحسن علاقتي زينه وياه ويحبني…
حسن كان موقعني على ورقة أملاكه حتى اكون الوصيه بعده إذا صار شي عليه لاسامح الله لان اني بوقتها مقريت شنو مكتوب
حياتي سعيده ويه حسن الله عوضني بي
بعد العذاب والقهر الي شفته الحمد لله...
ويارب احفظ كل العراق واهله... واحفظ الجيش
وياربي اكون كفيت وفيت وعجبتكم القصة
تحياتي الكم…
بس مثل متعرفون اسمع من سـراب واربط الاحداث
واكتب واشكـر صديقتي سـمر الي ساعدتني
وكانت حلقه وصل بيني وبين سـراب…
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
