رواية قيود العوف الفصل الواحد والعشرون بقلم ريتا
بروحي مَدفونه السواجي
الما تِهَلّي بطيرة شَگرة
ودَربي مشكلته طويل
وبين خِطوة وخِطوة عَثرة
لا تواعدني ، أرد أموت ..
ولا تِجيني وشايل ٰبچفك أحلامَك
آنه مو يوسف ، تضيع ..
گوه شايل ثِگل روحي
أبيّش ما يَردوك أبيع .
لتنسون التصويت + التعليقات بين الفقرات + متابعة حسابي قلبي ❤️🔥
شبابات صوتوا دوسوا علىٰ النجمَة لتنسون مُهم🤏🏻
_______________________________
اجه بسُرعة سَحبنِي العوف راحت روحـي من شفت امي هيج اخذت ركن وگعدت لامة روحـي بيه رفعت راسي اريد اخذ نفس اختنگت بعبرتي اختنگت .
مچنت متوقعة أرجع أشوف امي هيچ ، عافيتها رايَحة عيونَها راحت حركتَها راحت ، اباوع الها ذبلانَة امي ذبلانة من الهضم والقهر ماباقي بيَها شيء صاحِي
كله مني الصار بيها مني راح شبابها راح نظرها راحت عافيتها بسببي .
اباوع الها گاعدة علىٰ الكُرسي متگدر تحرك رجليها ومتشوف وتسمعنِي هيچ اصررخ وابچيي مدت أيديَها تتلمَس مُكاني بيهن وحچت بخنگة وصوتَها مبحوح وتبچي
:- يمة لا تسوين بروحچ هيچ يابعد أمج وگلبهااا والله مافكر بشي ولچ يمه انتِ كل الافكر بيه چنت رجعتج اليه هيچ الله يحبني ويردج لحضنِي يايمه
:- شسوي بعيونِي وانتِ ماكو شسوي برجلية المن جُمانة ولج يمه انتِ أيديه ورجليه وعيونِي روحي انتِ يمه
عصرت عيوني أردفت بهضيمة ودموعي غوشت نظري..
:- شلوون يمه شلون هيچ صاير بيچ وانِي ماكو يمج منو ينطيج علاجج منو يسويلج اكل منو اهتم بيج ولبىٰ احتياجاتج يمه منو .
رحت الها لزمت أيديها وبستهن..
:- تگولين لمنو لو اتوجعتي يمه منو دار باله عليچ يمه شلون شصار بيج شصار .
مدت أيدها وتمسح بيها علىٰ خدي وتحچي مبتسمة وابتسامتها متروسة قهر وحسرة واضحة...
-اخ يبعد أُميمتج اخ .. رجعتج چانت حلم عندي كافي عليه اشم ريحتج لا أريد عيون ولا رجلين بس اسمع نفسج يمي يكفيني اسَمع صوتج كافي عليَه وأهون الِي من كل عافيَة بغيابج يابعد روح امچ
تلمسَت أيديَه وجسَمي بإيديها وگالت بحنيتها الترست روحـي..
:- يمه انتِ سالمة انتِ بخير يبعد امچ .. تروح فدوه عيونِي لعيونج تروح فدوه عافيتي لعافيتج
اخذتنِي لمتنِي بحضنها غمرتني بحنيتها وسوالفها ترست روحـي ريحتها الطيبة بس اخ يـَ هضيمتي .. مادري شكد مر وكت بس سولفنا وضحكنا تعاتبنا هذا كله وبعدني ما مصدگة والله اتلمس بأيديها وعيوني تجري..
درت وجهي للعوف واگف مكتف ايديه ومبتسم ، رفع ايدة يأشر بيها راح يروح هزيت راسِي وگمت ردت اروح فزت خايفة..
:- وين يمه وين رايحة
:- هسة اجي شوية بس
هزت الي راسَها مسحت دموعي وطلعت وراه امشي بخطوات ثگيلة مابيه امشي من التعب روحـي مدري شبيها هلگد بادت وگف وحط أيديه بجيوبَة وصفن عليَه باوعتلة حجيت مترددة والعبرة تارسة صوتي..
:- چنت تدري مو
هز الي راسَة بخفَة وهو يباوعلِي وساكت
:- ليش مگلت الِي ليش خليتني انصدم هيچ
اتنهد وگال :- لو گايل الچ چا موقفج أختلف انه ردت تعرفين من تشوفينها
غمضت عيونِي وعضيت شفتِي بقهر وگال
مو سهلة المرت بيَه الحمدلله بعدهي عايشة وهي مرة وحدانيَة وحَدها .. مو زين بعده النفس بيَها الي عرفتة متعرضة لجلطتين
فتحت عيونِي علىٰ وسعهم رجفت شفتِي ومنظر دموعي يحچي وجع روحي..
:- شلون عرفت ؟
حك حواجبَة وگال
-سألت وعرفت .
اتحمحم ذب نفس وگال..
:- لا تبچين جُمان .. يعنِي لا تبچين من تشوفج تبچين تنقهر وهِي مريضَة مو زين عليها لخاطر أمج لا تبچين
:- مهضومة عَوف احس ... احس گلبييي راح يوووگف العبرة راح تذبحنيي .. امييي هيج صايرة مو سهلة عليه والله مو سهلة عليييه روحِي احس بيها وجع غريب والله مداعرف اوصفة هلگد مديأذيني
-لا تضعفين منو الها غيرج اذا تشوفج هيج تتعب زيادة مو انتِ سباعية .
اخذت نفس وزفرتة حچيت بدموع :- ورجليها وعيَونها شلون !!
-هاي من الصدمة والجلطة والهن علاج بس ياخذ وكت تصير زينة تصير .
-ليش صار هيج .
-گولي الحمدلله أمج عايشة وموجودة وگدرتي تشوفينها الباقي مگدرو عليه.
اتنهد ورجع گال :- مادام موجود النفس كلشي يهَون
:- ماا اريد شي بس ترجع الهة عافيتهة هذا الاريدة
رفع اصبعَة بوجهي وگال مبتسم ابتسامة خفيفة..
-والله ترجع وتصير زينة بس گولي يا الله وهي تسهل .
رديت بهضَم وحزن
:- ترجع توگف امي علىٰ رجليها ؟
:- توگف والله
مسح وجهة متنهد وگال..
:- انه رايح بس .. بالي يمچ
:- لا تخاف راح أتمالك نفسي گدامها واقويها ماراح اخليها تنقهر وتضوج .
:- ديري بالج عليَها صاحب الجلطة مو زين عليَه القهر ولا التوتر ولا الاعصاب حاولي تتلافينَهن ويّاها
:- توصيني علىٰ امِي ؟
باوعلي وگال
:- أوصيچ علىٰ روحچ وعليَها
:- لتوصِي عوف اخليَها بنص عيني امِي هاي
هز راسَة وأبتسم الي برضا وقبول وگال
:- أبقي لبَوة مثل مَا عرفتج
أومأ براسة ملتفت وهمس..
:- انه رايح سدي الباب
همست بأسمة قبل لا يطلع التفتت الي..
-شكرًا عوف
ابتسم ساكت وطلع سديت الباب ورجعت ظهري عليه داخلي مفرفح ..
الحمدلله علىٰ كل حال شوفتها تكفي الحمدلله الجبر بخاطري وجمعني بيها من بعد شتاتي .
ابتسَمت ودخلت وانِي أشوفها مثبتة وجهة علىٰ جهة الباب اول مدخلت وحست بيه ابتسَمت گايلة..
- تعاالي يابعد امچ تعالي ما شبعت من ريحتج ولا منچ .
رحت الها حضنتها وأشم بيَها من كل كتر ..
:- سولفيلِي يمه سولفيلي
اتنهدت ورديت :- كُل شيء احچي الج مامَا بس خلينِي انام وراسِي يم راسَج
باوعت علىٰ البيت نظييف يلمع وريحتة طيبة حييييل ،
:- مَاما منو يجي يمج
ابتسمت وگالت
:- ام علي يمه من يوم الوگعت لهذا اليَوم ... ماعافتنِي هجرت بيتها وگعدت يمِي
سكتت مبتسمة الحمدلله الله مايگطع بعبدة حشىٰ..
:- ام علي ونعم الصديقة ، الي ينشد بيها الظهر وتكون تچاية وعكازة لو انهد الحيل ، طيبة وأصيلة ، الله رحمني بيها يايمه الله مايعوف عبده بهذا حالي ياهو الالِي لو ماهيَة
اتنهدت ورديت عليَها
:- الحمدلله مَاما الله مايقصر
دنسولف واندگ باب بيَتنا بقوة ضحكت امِي وگالت
:- هاي ام علي يمه سادة الباب انتِ
گمت أريد بس أوصل كسرت الباب تكسر تضرب بيه بكل قوتها وتعيط فتحت الباب وفاتت بسُرعة بدون متشوفنِي تهف بعباتَها وگالت
:- ولكم ليش سادييين الباببب منييييرة ولج ماتسمعيني ادگ بيَه
ابتسَمت الها وبقيت ساكتة واباوع الهه وهِي تباوعلِي بأندهاش ومصدومة فاتحَة حلگها وتباوعلي وساكتة
لزمتنِي من كتفي وتهز بيَه وانِي ملامحِي جامدَة من صِدمَتها وهي صرخت بصوتت
:- يااااااع انتِ جُماااااااان !!!
أومأت براسي ضاحكة لزمتني تهز بيه بفرح هزتني هز ضحكت علىٰ شكله وصدمتها..
:- يمه بنتِي صلاوات علىٰ محمد صلاوات
وخرت عنِي وطگتها بهلهولة شطولها محتارة شتسوي تضحك وتعيط
:- صلاوات علىٰ النبي يمه ردت البنيه ردت
اخذتني من ايدي تهلهل لحد مادخلت للصالة امِي تضحك ودموعها علىٰ خدها وخالة ام علي ترفع بعبايَتها وتهَوس بيَها راحت حضنت امِي ضمتها ضم بأيدها وتحجي بفرح..
:- قرة عينج ام جُمان خيه قرة عينج الله ماقصر
-امل: حاشاه
جرتني جعصتني بحضنها جعص ضحكت وگالت...
:- ولج فرحاااانة خااالة فرررحااانة الله مايقصر حشىٰ حشىٰ يمة صلاوات علىٰ النبي
گعدت واخذتنا بالسوالف والمواضيع جرت نفس وگالت..
:- نشف ريجي يبووووي
صفنت بيها عبالك مثل العروس واگفة اريد اجيبَلها مِي ماعرفت منيَن ارتبَكت مَا أعرف من الفرحة ما أعرف من الصدمة شيء اجة ورة شيء
صرت ادور منا ومنَا اخر شيء گلت..
:- خااااالة وين المي نسيت الثلاجة وين .
:- گدامج يحظي گدامج
فريت نظري وصارت گبالي الثلاجة غطيت وجهي بأيدي ضاحكة عزا گبالي شلون ماشفتها رحت جبت الها مي واجيت..
:- يمتىٰ اجيتي خالة اني المغرب يم أمج
ردت عليَها مَاما
:- قبل ساعات لطف الله بحالي .
:- قرة عينج يخية الله يشوف الحال
لزمتنِي من اكتافي وگالت :- ردها سالمة غانمة الحمدلله
اتنهدت وابتسَمت الها وانِي ضامَة ضيمِي بگلبِي
بس سرعان ما اتلاشت ابتسامتِي من گالت
:- وين چنتِي كل هلوكت شصار بيَچ شلون اجيتي خالة !!
عين صارت علىٰ خالتي ام علي وعين علىٰ مَاما
ارتبكت حيييل انِي ما أريد احچِي الي صار غير لأمِي
وماا أريد اگول شَصار بيَه انِي مو مجبورة ادخل بنفس القوقعة من اسَولف غمضَت عيونِي بتَعب كُلش مو وقت سؤالها
ياهضيمتِي انِي الي أريد بس أنسىٰ الي صار
صفنت وانِي عقلي بدة يعيَد كُل شيء واني گلبِي مابيَه
دمعت عيونِي من مَاما حسَت علىٰ سكوتِي وعصرت أيدي باوعت الهة تهز براسَها الِيَه اخذت نفس وحچيت والغصَة بگلبِي تاكل ،
****
من يَوم الِي راحت جُمان لهسَة فراغ چبير كلش اگعد يم الحجية واباوع لمكانها فارغ هَواي
من اللتحق العوف وأخذ جُمان وياه أنتبهت لقاسم چان مو علىٰ بعضة ويخابر طول اليَوم وشكلة متوتر أخذ أله أيام علىٰ هاي الحالة عقدت حاجبِي بأستغراب
:- هو مو لازم يلتحق وي العوف بنفَس اليوم !
چنة گاعدين ثلاثتنا نسَولف غير الموضوع وگال
:- حجية انه باچر رايح أريد انتِ ورغد ترحون للبيت الچبير ماا أريد تبقون هنَا وحدكم
وجهت انظارها عليه وردت عليه
-انا اروحن ماعندي مانع بس رغيدة شلون ؟
باوعلِي ورد عليَها :- اختي تروح حجية تروح
عقچت وجهِي بغضب وباوعت اله وگلت
:- ومن ارد عليَهن تلومونِي ترىٰ ماا أسكت الهن والله واتعارك وي الهوىٰ الي يجي من جهتهن
ضحك وگال :- بوية التتحارش بيَج كضيها وانعليها والديها بس روحِي ومن ارجع اجيبكم هنَا
درت وجهِي بعدم رضا من صدك مالي خلكهن شكد ارتاح راسي هنا يعني اوكِ هي المشاكل حلوة وياهن بس لازم بين فترة وفترة الواحد ياخذ ريست فزيت علىٰ صوت الحجية من گالت..
:- بيتج هذاك وانتِ اولىٰ منهن بيَه وعايفتة الهن يااااع گاعدات بيَه وماخذات راحتَهن علىٰ راحتج عمت عينَهن
-حجية انه مامهتمَة بحصتِي من البيت ولا مهتمة بيَهن انه ادور راحتِي وتعرفيني من اكض الي وحدة ما اتحمل حتىٰ شعرها اهلسة .
رد قاسم وگال :- واحنة شلون وين مانجي نخليكم وحدكم بس هالفترة طاوعيني .
سكتت ماجاوبتة تربع گبالي وگال..
:- رغد من اللح عليچ بهيج موضوع تعرفين ليش وتعرفين شنو أكو لا تطولينَها
اتنَهدت ورديت عليَه :- خوش
باوعِلي وگال :- يله شنو عندكم حضروا .
-جميلة: شعندنا انا بطرگ دشيديشاتي .
ضحك وگال :- عنِدي شغل رايح فد سَاعة وارجع اخذكم
كشيت وجهي ماراضية باوعلِي يضحك هز حواجبة وگال
-رجعي حضري اسلحتج للحرب .
هزيت راسي ضاحكة.. انا وياهن ما أتراهم يعنِي الله يسَتر من خلگي ويَاهن الي دفعة مابيَه مااا ارتاح الهن ومسمومات المكان الي بيَه هنَة حتىٰ النفس بيَه يلعب ستين الف روح ..
*****
اويلِي شلون دانام براحَة يوميَن ما نمَت عدل واني احس الدنيا تفتر بيَه من اوگف عوضت اليَومين بأسبَوع كامل وانِي أحس لازم انام بعد بَس ورايَة دراسة
صفنت وانِي فاتحَة الكتاب ضحكت من اجة علىٰ بالِي
ميَلت راسِي وهمسَت بضحكة :- اوف البَغل
سمعت صَوت امِي تصيح بصووت علىٰ ابوية لتسَويلنة بلوة أستر علينا وابويَة يرادد بيَها عقدت حاجبِي وعفت كتابي وركضت بسُرعة من أشتد العياط بينهم..
:- أستر علينَا گول عنِدي ولد وعائلة ماتخاف ربك انتَ !!
أتقدم ديريد يضربَها ووگف گدامَها علِي من گال
:- امِي مو طفلة يَابة ولد بطولها أيدك ماتنَمد عليها واحنة موجودين
وهو نطت عيونَة وصار يصرخ ويگول
:- الله اكبررر بزرية مابيها رحمَة ولكم بيا زمن الولد يوگف بوجه ابوووه ويرادد الله اكبررررر علىٰ روووووسكم
باوع لأمي ويگول
:- هااااي توز براسسسسكم هااااي غيرتكم عليَه انيييييي ابووووووكم ولكم ابوووكم لووو شماا اسوي ما توگفون بوجهِي
رد عليَه علي بعصبيَة وگال
:- نوگف بوجهك من تمد أيدك علىٰ امِي امي هاي مو طفل عندك يابة انتَ كبرت باع لعمرك مااا تليييق الك هاي التصرفااات والله ملينا
تفل علىٰ علي بعصبيَة وهو يسب بيه مسبات توگف العقل صدمني..
اشر علىٰ امي وگال
-وراكم حيَة شتطلعوووون تفوووو عليكم حرامات بيَكم التربية الله لا يوفقكم ولا ينطيكم الله يحرگ گلبكم
شاغت روحِي من القهر من صَار يدعِي علينا وعلىٰ اخوانِي اباوعلَة والدمعة بعينِي رفع اصبَعة بوجهة وگال
:- تردين بوجهي بنت الزمال انيييي اعلمجج تستقوين بولدج الزبايل وعلىٰ ابوهم تغيرينهم
باوعلنَا وتفل علينا كُلنا وگف بالباب وگال
:- ولا قندررة بيكم گااااال خليييي اروح وي ابوي علىٰ هذولي السرسرية ولكم محد منكم عاررررك وياي عفتوني وحدي
رد عليَه علي بعصبيَة وغضببب وگال بصوووت عااالي
:- شنعارك وياك بس گول النة نعارك كل يوم عوووفك من المشاكل يابة والله اتفشلنا گدام الناس ابونا يدور مشاكل يعارك حتىٰ الطفل !!
فتح عيونة علىٰ علي بس علي ما اهتم وكمل كلامة بحرگة..
:- يابة والله مي وجهنا وگع محد صار يحترمنة بسببك وبسبب مشاكلك وتصرفاتك تحچي صدگ يابة تفوت للمنطقة نص الليل شاررب وتدگ ببيوت الناس بدون وووعيك ومدري شتسولف مليناااا والله مليناااا شلون نوگف وياك بعد ياابه شلون .
وگف بالباب يفشَر ويعيط علينا صوتة ترس البيت ومتأكدة وصل للجيران يافضيحتناا..
-قنادر نعوولة تعيرون بأبوبكم ولكم انييييي أعلمكم بسيطة والله الا اخليكم تعضون اصابعكم ندم .
بقىٰ يهدد ويتوووعد وماا عبااالك الي يهدد بيَهم ويفشر عليهم ولده ابد عبالك ديهدد بغريب نغزنِي گلبي منَة انِي أبوية اعرفة
ميفكر بينة أبد ويحقد هواية حتىٰ علينا ولا نهمة ويطلع من الفجر ويجي بنص الليالي شارب وسكران ويضرب ويعيط ويهدم ويفشر علييينااا ومسوي سُمعتنة بالمنطقة متسوة فلس
رحت لأمِي الي متصنمَة وواگفَة محتارة شتگول
اتنهدت ولفيت أيدي علىٰ اكتافهَا
:- ميخالف الله يعين .
باوعتلي وگالت
:- اني خايفة منه هذا ابوج ميفكر واذا حقد كُل شيء يسوي اني خايفة عليكم لا يسوي بلوة وتوگع براسكم بسبب حقدة عليكم .
اخذت نفس وزفرتَة وهزيت راسِي وگلت الها
:-هَو يطلب منو وطلب شنو هذا الخابصنا بيه فهموني
گعدت متنهدة وگالت بحيرة..
:- ولچ مَاما راح يسووودني يتورط وي الرايح وي الجاي بحچايتين يتقشمر فليسي ويريد بس يحصل فلوس
ضحكوا عليَه وگالوله دنفتح مشروع أشترك ويانَة بيَه ادفع ٢٠ ورقة وتصير مدير هايَة شركة عود تدفع هلگد وتشتغل وتحصل فلوس هَواية أكثر مِن الي دفعتهم
فتحت عيونِي وهزيت راسِي بأستنكار واستغراب
:- وين اكو هيَچ ماما شنو ادفع ٢٠ ورقة تحصل أكثر!!
:- ولچ ماما انِي ما افتهمت غير هذا وسمعتة ديخابر بواحد ويگُله خليتوني ادفع ٢٠ ورقة وگلتولي تحصل أكثر وين فلوسي ؟
ضربت أيد بأيد وباوعت لـ علي الي چان صافن ولازم راسَة وخر أيد وهزها وگال بعصبيَة
:- يا حسافة والله حرامات نصير هيچ مضحكة للعالم اليسوة والي مايسوة يضحك علييييناااا بسبب جهل ابوي شنوو هذا الطمع شنو هالمشاريع الخاااااايسة وين گااااعدين متگلولييي .
-مصيبة يبعد امك مصيبة .
-ابوي مااا عنده عقل ويدخل بهيچ مشروووووع ابوي لشووووكت يبقىٰ يدولب بيَنه يمه ؟ لشوكت
:- موتنِي يايمه موتنِي شيب شعري منه من اتزوجتة لهذا عمري خلصتها وياه قهر بقهر ولك يمة بشر مااا يرررد ماااا يرد
:- شيرد يمه شيرررررررد نسيتي من طگنا ب٢٤ مليون !! خلانَة منعرف طريقنااا منين اتداينا واشتغلنا وانذلينا واحنة مااا موفين الدين وهسة بلوة ثانية منتظرتنا والله العظيم راح يرجع يبلينا ملينا وكرهنا حتى روحنا .
ردت امِي بحسَرة وگالت
:-شبيدي شبيدي ولك بشر ميفكر لا عنده مخافة الله ولا يگول عندي عائلة وكل شيء محسوب عليه ويرجع عليهم الي مايأنبَة ضميرة وماعندة مخافة الله مااايفيد الحچي وياه مايفيد .
دفر الكرسي بعصبية وطلع ..
فركت راسِي بتعب ودخلت باوعت علىٰ الكتاب حتىٰ مالي الٍي خلگ افتحة بَعد اتنهدت ولزمت راسِي دافكر ابوية هلمرة شنو راح تجيَنة من بلوة من وراه ؟
مرت كم ساعة وانِي گاعدة علىٰ الچرباية صافنَة وعينِي علىٰ السگف واتنهد حتىٰ دموع ماكو مقهورة بس مدابچي حتىٰ قهري مو مثل العالم والناس
سمعت علي اجة ويصيح عليَه بصَوت عالي يمه گـلبي طاح شمسوية من بلوة والله ممسوية شيء رجع صاح اعلى..
:- مناااااااااررر
لا هنا اذا تذبحوني قطرة دم متلگون بيه دخيلك ياا ربي كُل شيء هلفترة من يصيحون بأسمي اخاااف لأن مُشكلة ورة مُشكلة دتصير
:- وينج لج منااار
فات عليَه للغرفة سريع باوعت اله مخروعة .. باوعلي والضحكة تارسة وجهة ترس وگال..
******
عصرت أصابعي بتوتر ونظراتي تتنقل بيناتنهن باوعت الها لطمت علىٰ وجهة وحچت بحرگة..
:- سوووووودة عليَه ياا خااالة الله لاااا ينطيييهم ولچ خاله هذ العراق العظيم اوووووف
:- الواحد ما يگول غير الله يحرس بنياتنة ويحميهن
باوعتِلي وحطت أيدها علىٰ متنِي وگالت
:- ولچ انتِ الله يحبج ورزقج بهلوليَد الله يوووفقة ويحرسة ويحميَه الله يحرس جيشنا أبطالناا ويحميهم
وجهت نظري لأمِي الي ساكتة وماا نطقت بحرف بس وجهة ملامحة جاامدة وسااكتة وهاي الملامح الباردة ادري جواها نار مشتعلة .
:- ماما ؟
حركت راسها والسبحة بأيدها ابتسمت ساكتة رمشت بسُرعة وانِي اللعب بأضافيري وسَاعة أعصر بأيدي وترنِي شكلهة ليش ضمت بگلبها وما انطت ردة فعل ادري بيها گـلبها مشتعل نار ومفرفحة بس ليش ساكتة .
باوعت النة خالة ام علي وگالت
:- خليني امشي بعد مالي لزوم اني
لزمت امي وگالت الهة بضحكة
:- رد هواج
ضحكت امِي وگالت الهة
:- وين رايحة
:- ياااع وين بعد اروح لبيتي بعد شلي هنا
ام وبنيتها من بعد فرگة طووويلة واني بنصهن
ردت امي بأستنكار
:- انتِ وحدة منا وبينَة ام علي لو ما منَة وبينة ماتحچي جُمان الچ
اتنهدت ورجعت گالت
:- ام علي السمعتي أريده يبقىٰ بيناتنه اياً كان
ردت ام علِي بضحكة وگالت
:- مو اني الي توصيني اني اخيتج بنيتج بنيتِي الله يشهد لو تفتحون صدري وتشوفون گلبي شلون يدگ من الفرحة
:- هاي بنيتي الي بچينة علينا سَوة يخية والي دعينا الها سوة رداها الما يقصر ولا عبالج احچي للناس لا يخية الناس الدرت والمادرت لا يقدمون ولا يأخرون
:- لا تفكرين وحضني بنيتج ونامِي واني يمكم
ندست امي وگالت بعدم رضا مصطنع..
:- مو رجعت بنتج يعنِي اعوووفج ابددد كل يوم يمج اني مثل الاول ماا اعوووفج
تشكرتها ضاحكة عافتنا وطلعت سديت الباب ورجعت للصالة گالت ماما ..
:- تعالي يمه نزليني علىٰ فراشِي
رحت نزلتها من الكُرسي ومديتها علىٰ الفراش دمعت عيونِي من مدت أيدها علىٰ طولها نومتَها وگالت
:- مثل قبل
بچيت وحطيت راسِي علىٰ ايدها ونمت يمَها اتنهدت وگلت بحسَرة
:- مَاما ليش محچيتي شيء من سولفت لأم علي ؟
ردت بثگل وصَوتها تعبان
:- بعدين يمه بعدين
دمعت عيونِي ورجعت گالت
:- ضميتي هواي
عقدت حاجبيِ ورديت
:- شنو ؟
:- حچيتي مگطع لأم علي والسالفة ماتكملينهة
دمعت عيونِي ورديت وانِي داحاول أسيطر علىٰ نبرتي
:- لا ماما كُل شيء ما ضميت
ضحكت بخفة وضربت علىٰ كتفي ضربات خفيفة متعددة وگالت
:- اني امچ حتىٰ لو ماشفتج اني اعرفج تحچين صدگ لو لا من نبرة صوتچ
رجفت شفتي وگعت دمعتي مني بصمت كاتمة شهگتي متمثلة بالقوة..
:- بس انِي ماضميت مَاما كُل الي صار حچيتة هو هذا صدگي
اتنهدت بحسرة وگالت
:- تخافين يبَعد أُميمَتج
:- ههههه من شنو أخاف
:- مادري من حچي الوادم لو شيء ثاني .
ضحكت ضحكة خفيفة بقهر عضيت شفتي وحچيت..
:- ماا اريد ابرر لأحد اني ومو كُل شخص يسألنِي احچيلة شنو راح يتغير مِن يعرفون ؟
:- يعيشون الي عشتَة ؟ لو يتلوعَون مثلي ؟
كُل شيء ميصير مَاما مجرد يردون يرضون فضولهم وانِي مابيه
:- أتعب روحِي من احچي ومن اسَولف بالِي مريت بيَهن يوجعنِي يمَه .... ينغزن گلبِي من احچيهن كلمَة كلمَة
آخذت أيديه وحچت بحنيَة وخوف والعبرة تارسَتها
:- لا تسولفين يابعد امچ اذا مايريحج لا تسولفين
دنگت وعصرت عيونِي بأيدي
:- راح يحچون عنِي ويطعنون بيَه وبشرفي أدري بعد كُل هاي المدة ورجعتي محد راح يرحمنِي منهم راح يألفون عنِي اشكال وأنواع الحچي
:- يخسون يمه انتِ أطهر من الطاهرة تربيتي تربيَة أيدي واعرفنج مثل روحي يخسي الي يحچي عليج
سكتت وگالت
:- الحچوا والما حچوا اني بابي مسدود ماا اسمع حچي احد ومحد يروح فرحتي برجعتج حچي الناس شنو
:- ولچ يَمه انتِ عيونِي الي انعمت
اتنهدت ولزمت أيدها وگلت الها
:- وعد يمَة اسولفلج كل شيء اسولف الج بس اشبع منج هسة ماا اريد احچي شيء أريد انام وانِي هيچ اريد اررررتاااح
حطت أيدها علىٰ راسِي وباستنِي وغمضت عيونِي وبعدت كُل فكرة عنِي خليت بالِي وتفكيري بس بهاي اللحظة وهذا الأمان وشعور الراحَة الي فارقنِي لأشهر اخذت نفسي براحة وغفيت وماا حسيت علىٰ شيء بعد ..
تحركت وحسيت اكو شيء يمي وعطر قريب يمي تغلل لأنفي فتحت عيوني سريع مستغربة...
وگفت حركتي من شفت منار نايمَة يمِي راسَها يم راسي ومتكرفصة يمي روحـي انتعشت الضحكة ترست وجهي من شفت وجهة شگد مشتاقتلها شگد اريد بس احضنها .
چانت امِي علىٰ الجهة اليمنىٰ ومنَار علىٰ الجهة اليسرى واني صايرة بالنص باوعت الدنيَا صبح بس ماا اعرف الساعة بيش غمضت عيونِي ورجعت كملت نومتِي بنصهن
توني جاي اغفى وطفرنا ثلاثتنا فزينة فزة وحدة علىٰ صوت نقالها من دگ فلك اسود مو صوت سوىٰ طشارنا ماله والي سدتة وباوعتلي صافنة بوجهي لثواني نهضت روحها ودموعها سبقنها
:- جُمان
گالتها واتقدمت بسُرعة حضنتني بقوووة واحس گلبِي يريد يطلع من مكانة ..
-منار: مامصدگة والله مامصدگة الحمدلله ياربي الحمدلله.
ماا اگدر أوصف احساسِي وشعوري بس امِي ومنار هُمَة كُل ناسِي من شفتهم اثنينهم ارتاحيَت حييل وگلبي ارتاح هسة احسنِي مالكة الدنيا والبيها شفت ناسِي من شفتَهم شفت الدنيا بكُبرها ...
گعدنة وسَولفنة وكُل شوي احضنها وتحضنِي وتبوسنِي وتدمع وتگول
:- مشتاقتلج كل شيء بدونج فاهي ماله طعم .
گمت اخذت مَاما صعدتها كُرسيَها واخذتها غسلت الهة بأيدي وابوس بيَها وعيونِي تدمع ابوس براسَها ابوس بأيدها بوجهَة روحِي بيها ...
خلصت ونشفت الها ودخلتها للصالة اندگ بابنا گالت امِي
:- هايَ ام علي يمَه كُل يوم هيچ وكت تجينِي
فتحت الها الباب منَار وفاتت بأيدَها صينيَة ريوگ جايبَتهة وجايَة والضحكة علىٰ وجهة صبحَت علينَا وگالت
:- من صلاة الصبح گاعدة وفرحانة أسوي بالريوگ
خجلت منَها وگلت الهه
:- خالة ليش كلفتِي علىٰ نفسَج
:- يااا بنيتِي ولچ خالة اني كل يوم اتريگ يم اخيتي مو عبالج بس اليوم الفرق اليوم سويَتة بيتي وجبتَة
گعدنة ناُكل كُلنة سوىٰ وبيَن الضحكة وبيَن السالفة كُلنا ارتاحيَنا وچنة دنسولف ونضحك ومنسَمع الا باب بيَتنااا اتكسرررررر من الدفرر وعيااااط بَرة
فتحت عيوني وطفرت بأستغراب للباب اريد بس اللحگ افتحة يندفر بكُل قوووووة وينضرب
انخبص بيَتنا وامِي تعيط بخوف وتگول
:- يمه لتطلعين جُمانة يمه اخاف عليچ
فتحتَة واني عيوني براسِي ناااطة وچااان يطلعلي عموو رائد ابووو منار حالتة حالة يعيط بكل صوتة..
:- ووووووووويننهاااا بنت الكلببببب ويننهههااااااا
طلعت منَار مخترعة باوعتلَها انصدمت من شافت أبوها بقت ترمَش بسُرعة وهو يريد بس يفوووت وانِي واگفة بالباب مانعتة صاح بصوت رعدنا بيه..
:- بنت الكلببب الدااااااايحه تطلعين بدوووون علمييييي وتجين هناااااا اني مووو متووووبج ماا تجين لبيت هذووووووول
فتحت عيونِي بغضب ماگدرت اتحمل نبرتة ببابنا فريت ايدي وگلت
:- عاد أحترم نفسك وصوتك نصي
باوعلي بأستهزاء ضحك بسخرية وگال..
:- شوف منوو تحچي الدايحة الچانت الله يعلم ويَن هاي الاشهر كلها الله يعلم ويه يا عار چنتي دايحة سكتتتييي لج اسكتي
فتحت عيوني علىٰ كلامة وطعنة الي وگف عقلي منَه بعدني ممستوعبة الكلام دفعنِي ودخل بسُرعة جر منَار من ايدها وضربها حيل بقت تصرخ.
اجت خالة ام علي وهي تجر بيَها منَه وهو اخذها سحل لبَرة البيَت وهي تصرررخ وهو يگلهة
:- لچ متفووووتين بيَتهم هذوووول نااااس سرسرية بنتهم چانت شارردة جابت الهم العارررر ولفتتت اكسرررر رجليج اذا اشووووفج بعد دااخلة بيييتتهم
بين صدمتِي بكلامة وطعنة بعرررضي وقلة صبري من سمعت صرررريخ مناااار وبچيهااااا ركضت بسُرعة هضمني وفرفحني
شطت وانِي اشوووف منَار تصرخ وهو يجر بيَهه ويضربها ركضتتت ودفرتة حيييييل بحيث جفوف أيدي اندحچت بالگاع من الووووگعة الوگعهااا
