رواية لست غجرية الفصل الثاني والعشرون بقلم روز الحيدر
التكملة
حسيت نفسي نگطع ختنگت لا اكدر ابعده ولا احجي
ضربته بصدره ثواني وابتعد...بلكوة سحبت النفس
كأنه فز من نفسه
نسر : أني...
سكت أنفاسه متقطعة
نسر : آسف
بقيت صافنة إيدي على شفتي أحسها صارت نار
گلبي يدك بطريقة مرعبة
همست بخوف ودمعتي كعت
وردة : شسويت؟.. فكرتك تختلف.. أمنت بيك
نهضت بسرعة كل جسمي يرجف لزم معصم أيدي
صحت
وردة : أيدك عنيي
رفع عينه بسرعة
نسر : جوري أني ما...
قاطعته بإيدي وهي ترجف
وردة : لا تكمل
صوتي انكسر
وردة : أنتَ... تعرفني بشنو مريت وشلون عشت؟
ليش تصير مثلهم!
بتوتر
نسر : ما أريد أخوفج...
نترت أيدي منه رجع سحبني بقوة كعدني بالگاع
نسر : والله مو قصدي
دمعي ينزل وبصوت مكسور
وردة : غبية شلون هيج ثقيت بيك!
نزل راسه وبينت عليه أول مرة هزيمة مو غضب
ولا سيطرة
نسر : مو كلهم أني
بلع ريگه
نسر : والله مو مثلهم بس ماكدرت أسيطر على
نفسي أعترف تجاوزت حدودي وهزيت ثقتج
وردة : لا هدمت ثقتي.. وأماني
سكت لحظة بعدها رفع عينه إلي بنظرة مختلفة
مو دفاع مو تبرير وأنما قرار
ترك أيدي ببطء وطلع شي من جيبه مد إيده كدامي
حلقة ومحبس متصلين بعض
نسر : بس اسمعيني والله وغلات عيونج اجيت مناك
ومحضرلج هاي المفاجأة
سكت
نسر : إذا الخوف موجود بيناتنا بهالشكل أريد أصلحه
مو أكسره أكثر
قرب شوي بنبرة أهدأ
نسر : جوري...
بلع ريگه
نسر : إذا يوم من الأيام حسيتي أمان وياي تزوجيني؟
رفعت عيني بعينه وبكل برود
وردة : لا
سحبت أيدي ونهضت عنه مشيت لحگني
نسر : جوري لحظة أحجي وياج
وردة : مااريد أسمعك رجعني بسرعة
سحبني من زندي
نسر : لحظة وين؟
وردة : شتريد بعد؟
نسر : نتزوج واللي يطلبه السانج أني حاضر شنو
تردين؟
مسحت دموعي ونظرتله مباشرة
وردة : ليش؟
نسر : شنو ليش؟
وردة : ليش تريد تتزوجني؟ شفقة؟ لان ماعندي
أحد؟
هز راسه
نسر : لا والله لااا...
صحت
وردة : ليــــش!
تقرب وعيونه مابتعدت عن وجهي
نسر : لان أريدج.. أريدج شريگت حياتي وأم بيتي
ضحكت بأستهزاء وبعدت عيني عنه
نسر : شنو تردين بس طلبي حتى اذا تريدن اعيش
وياج هنا موافق
غوصت عيني باوعتله
وردة : قصدك زواج بالسر؟
نسر : لا والله موهيج.. أعرف متكدرين تعيشين بغير
مكان وأني مستعد أعوف كلشي وأجي يمج
لزم أيدي سحبتها
نسر :بس توافقين نتزوج أشتريلج بيت هنا وأسوي
دوامي كل أسبوعين وحتى من اداوم اخذج وياي
بنظرة مباشرة
وردة : ليش؟ مو المثلك ماياخذ كاولية!
نزل عينه وسكت ماعرف يجاوب
وردة : ليش تنزل من مستواك وتاخذ وحدة مامعوف
أبوها منو؟ هااا شجابرك؟
أشر على گلبه
نسر : أريدها تكمل حياتي.. وأكون ألها أهل وسند
قبل مااكون زوجها
وردة : مو لأنك گلت "أتزوجج" يعني كلشي يتصلح
فتح حلكه يريد يحچي بس ما طلع صوت
وردة : الثقة مو كلمة ولا خاتم.. تنبني بصعوبة وتنهدم بسهولة
هز راسه
نسر : أدري...
وردة : لااااا ما تدري
قاطعته بحدة
وردة : لو تدري جان ما كسرتها بهالسهولة
سكت والخاتم بعده بأيده بس منزلها
نسر : أنطيني فرصة أصلح
هزيت راسي بخفة
وردة :جانت بين أيدك فرصه ذهبية أول مرة بحياتي
أثق بشر ولما ثقيت؟... ثقيت بيك وشسويت؟
نسر : جووري
وردة : خربتهاااا.. باهر أللي يعرف بية أحبه وتزوجنا
وبحلال الله ماسوه سوايتك
غمض عيونه وعض شفته بقوة أول مرة أشوفه
بهالشكل مو واثق، مو مسيطر، مكسور
نسر : لا تقارنين
وردة : ليش ما أقارن؟
صوتي ارتفع بدون ما أحس
وردة : هذاك جان حلالي وحُب عمري بس أنتَ شنو؟
سكت نجبر يسكت حس انه ولا شي له بگلبي وهذا
اللي اريده
وردة : حتى وهو وياي ما قرب بهالشكل وانت بكلمة وبحركة.. هديت كلشي
الحلقة وكعت من إيده بالگاع بدون ما ينتبه
نسر : جوري.. كافي
وردة : لا مو كافي!
دموعي نزلت أكثر
وردة : تعرف شنو أصعب شي؟
سكت عيونه بيها خوف حقيقي
وردة : مو البوسة...
هديت صوتي فجأة
وردة : گسرت الأمان الحسيته وياك بخذلان
سكت
وردة : لأنك الوحيد اللي توقعت منه غير هيج بس
طلعت غلطانة من ثقيت بيك
نسر : جوري...
رجعت خطوة لورا
وردة : لا تقرب
وكف مكانه فوراً
وردة : إذا فعلاً مو مثلهم.. أثبتلي بدون ما تلمسني
سكت وهل مرة ما حاول يقاطع
وردة : وإذا يوم حسيت أمان يمكن... يمكن أفكـر
سكتت ولفيت ظهري ومشيت للسيارة فتحت الباب
وصعدت
نحنى اخذ الحلقة ورجع جاب ماتبقى من الغراض
صعدهم السيارة وصعد اول... قبل مايحرك فتـح
الصندوك لي يستند عليه طلع علبة خله بيها الحلقة
وخلاها على دشبول كدامي
لفيت وجهي عنه حسيت وضعي تخربط شفافي
خدرت طلعت كلنكس رطب من جنطتي ومسحت
شفافي بقوة وأبجي
نسر : جوري
بصوت مكسور
وردة : الله ياخذ عمر جوري.. أسكت مااريد اسمعلك
صوت
سكت ورجع عينه على طريق
وردة : أني اعرف امثالك بشنو تفكر
ضرب الستيرن بثنين أديه صاح
نسر : عمي والله مامفكرر بشي غير أشوفج حلالي
وردة : جذاب والله اعرف تريد تأمن بحجة زواج
واشوفج حلالي
لتفت مصدوم
نسر : صدك تحجين!
وردة : هاي نيتك من البداية
نسر : وحق الله ورسوله تفكيرج بيه كله غلط
وردة : اي صح لان فكرتك مومثلهم بس طلعت_
سد حلگي بأيد وأيد لازم الستيرن
نسر : ديربالج...
عين علية وعين على شارع
نسر : جوري ديربالج تنطقيها وبَطل صفين أريدج
حلالي
بعدت أيده بقوة
وردة : حلالك؟ وبالسر
رجع ضرب الستيرن بعصبية
نسر : ولج يمتى گلت بالسر! ليش تفسرين كلامي
على مزاجج
وردة : صف على جهه
لتفت
نسر : شبيج؟
وردة : نفسي لعبت
بسرعة صف السيارة على جهه فتحت الباب ونزلت
انحنيت على نفسي وديت أستفرغ... جسمي كله
يرتجف مو بس غثيان... خوف... ذكرى...ضغط انفجر
مرة وحدة
نزل بسرعة وگف وراي بس ما لمسني
نسر : جوري
صوته متردد
نسر : والله ما راح ألمسج.. بس خليني أطمن
رفعت إيدي أمنعه بدون ما ألتفت
وردة : لا تقرب عوفني
وكف مكانه وماتقرب
ماستفرغت بس صابني دوار قوي وجفوني بصعوبه
افتحه أول مرة أعيش هل شعور غريب يمكن خوف
أكثر
قدم ماي اخذته وأيدي ترجف غسلت وجهي وفركت
شفافي ورفعت عيني له ودموعي نخبطت وي الماي
وردة : هذا اللي سويته مو بس بوسة
نهضمت منه هواي بلكوة نطقتها
وردة : رجعتني لنقطة حاولت سنين أطلع منها هدمت
سور جنت أحمي نفسي بي
سكت ماكو صوت غير أنفاسي المتقطعة
نسر : جوري... أني-
وردة : لا تبرر الذنب ذنبي شنو اتوقع من واحد اطلع
ويا أكيد هيج يسوي
بقهر
نسر : لااا.. لاتفكرين بيه هيج وعيونج
رفعت عينه
وردة : من عساها عمت عيوني الثقت بيك
لفيت وجهي عنه
وردة : إذا فعلاً تريد تثبتلي
عدلت نفسي بصعوبة
وردة : خليني أني اللي أقرب... مو أنت
سكت وهالمرة ما حاول يحچي لفيت عليه عيونه
كلها ندم وعجز بس ما نطيت فرصة رجعت للسيارة وصعدت هو ظل واكف ثواني بمكانه بعدين رجع
وصعد بهدوء.. بدون كلمة
السيارة مشت...
بس المسافة بيناتنا صارت أبعد من قبل صار بدال
السور... سورين
ليش بسرعة أمنت؟ واني بنفسي ماأمن ولا ثق شلون
هيج ثقيت بيك!
بس دموعي تنزل ماحجيت شي لحد ما وصلنا اخذت
جنطتي ونزلت
نزل لتفت عليه
وردة : مااريد أشوف وجهك بعد
نزل راسه بندم بدون ماينطق حرف لفيت وصعدت ودموعي تجري واناشخ فتحت قفل الباب وأيدي
ترجف
اول مادخلت للبيت شمرت الجنطة ورحت غسلت
شفافي بصابون بجيت لحد تعبت رجعت للغرفة
غيرت ملابسي وشمرت الفستان
حسيت نفسي بعدني تعبانه رحت للمطبخ اخذت
جهاز السكر لزمت واني اخاف الأبر احسها بگلبي
غمضت عيوني وجكيتها..
ومثل ماتوقعت هبوط اخذت توست دهنت نوتيلا
عليها أكلت ومددت على قنفه اعرف الكاكاو ينطي
طاقة عالية حسيت براحه وكدت أخذ نفس من دون تعب...
بقيت ألوم نفسي لان ثقيت ونطيته وجهه فزيت
على صوت المبايل اخذته شفته رسالة صوتية
نسر : جوري انتِ زينة؟ اذا حتاجيتي شي اني
بعدني بالسيارة
مارديت خليت المبايل وضع طيران وتركته واول
ما غمضت عيوني نعادت القطة براس شلون سحبني
فتحت عيوني وخليت أيدي على شفافي المشكلة
عطرة بقى بية رغم غسلت وبدلت بس عطرة تارس
راسي..
سؤال واحد يتردد
وردة : ليش ماستفرغت! ليش مانهاريت؟ باهر بس
مجرد يقرب خطوة مني أعصابي تنهار رغم چنت
أحبه..
رتاحيت شوية ونهضت للغرفة بعدت طرف البردة
بعده موجود كاعد بالسيارة
تركت ورجعت مددت السرير صارعت نفسي يله
غفيت
صحيت على صوت الباب بلكوة رفعت راسي شفت
الساعة ب2 باوعت للشباج نهار
وردة :كل هل هذا نوم!
كعدت والباب بعده يندك وكل مااتأخر تصير اقوى
نهضت
بصوت ناعس صحت
وردة : أجيت
فتحت الباب واكف شكلة مرعوب المبايل بأيده
نسر : ليش جهاز مغلق؟
لزمت الباب
وردة : خير يطير؟
نسر : خفت عليج انتِ زينة؟
سكتت ثواني
وردة : روح منا
اجيت اسد الباب دفعني اني والباب ودخل... ماعرف
رغم كلشي گلبي مطمأن وبنفس الوقت عندي خـوف
من الماضي ينعاد
نظرلي
نسر : عيب اللي تسوي
وردة : تعرف العيب! اذا تعرفه سلملي عليه
نسر : كافي گتلج مو بقصدي
وردة : اي فتهمت مو بقصدك بعد شتريد مني؟
عرفة ولفة وياك؟
تقرب بتعدت
نسر : صدك تحجين!
وردة : لا اشاقة وياك.. طبعاً صدك مااريد اشوفك
بعد ولي من حياتي
نسر : بس اني أريدج بحياتي
شفت الورد لي جابة البارحة اخذته شمرته عليه
وردة : اخذ ازبالتك ولي
اخذه شمه
نسر : كدامج يذبل
وردة : اذا ماتطلع هسه اصيح وألم الناس عليك
رفع كتافه برود وكال
نسر : اكلهم مشاكل زوجية
عفطت ضحك بقهقه كال
نسر : بعد الزواج اعلمج شلون تجرين الزيج عدل
أشرت على باب
وردة : اطلع برا
سحب نفس وقرب
نسر : كافي ولج صبري له حدود
اكثر شي يستفزة لعفطة رجعت عفطت ضحك بقوة
نسر : اتخيل تصير عندنا بنية هم عرمة مثلج وتكوم
تعفط انعل ابوها غير
وردة : روح عيش احلامك بعيد عني
نسر : جؤؤ أنتِ تحققيهن..وها كون شعرها مثلج
متجعد واسود فاحم وبيضةة
شو تخيلتها ويا ونوب وعدها غمازة بارزة بخدها
مثله بتسمت بدون ماينتبه بس تراجعت بسرعة
ولفيت وجهي عنه
وردة : ولي ولي انت وقردتك
ضحك وتقرب
نسر : وين اولي وقرودتي يردوج
تراجعت
وردة : لاتخليني اندم أكثر اطلع براااا
نسر : مستحيل أضيعج من أيدي غلطت أي وجان
أحلى غلط
وردة : شوف سُكر نازل... ومابيه حيل اتعارك اطلع
بهدوء وهاي هي ادري تعبت وياي ورحم الله والديك
والله يجزيك خير هسه خلاص كل واحد يروح بدربه
نسر : أنتِ دربي ودروبي
نفخت بملل
وردة : اسمع احنا من البداية تفقنا اساعدك وتساعدني
واني قمت بالمطلوب وانتَ كثر الله خيرك بعد هاي هي
هز راسه
نسر : لا بعد اريدج بحيايتي
وردة : بأحلامك
دخل للصالة
طلع العلبة وخلاها على طاولة
نسر : شوفيها تصير عليج؟ ماعرفت قياسج كلت
بس توافق نطلع وتاخذ على ذوقها
هزيت أيدي
وردة :شبيك! شو تمسلت بالحجي
كعد على قنفة ورد بكل برود
نسر : يله سويلي ريوك حبيبتي
قهرني قربتله
وردة : شو تتصرف چن البيت بيتك؟
رفع عينه برود
نسر : مو هسه بس.. ناوي يصير بيتنا وهم تبقين
أم البيت
سكتت كأنه تذكر
نسر : أبوي علمنا البيت دائماً يبقى للمرأة لان هي
اللي ديرة ودبرة ومن دونها مايسوة شي
وردة : ماعندك كرامة صار ساعة اطرد بيك
نسر : عادي الرجال لازم يتحمل عصبيت زوجته
الله يساعدج حبيبي حقج
صفنت هذا شيمسلت!
نسر : اذا مابيج حيل عادي اطلب وناكل سوه
وردة :كوم اطلع برا
باستغفال
نسر : ناكل برا؟ يله حبي جهزي نفسج
صحت بقهر
وردة : ليش تخليني اسيئ الادب وياك
بتسم وغمز
نسر : أي بس وياي
رجع فتح العلبة
نسر : تعاي شوفيها حتى اذا ماعجبتج تاخذين
على ذوقج
لزمت راسي احس نار من القهر من شاف وضعي
رد بهدوء
نسر : بس تعاي كعدي خلي نتفاهم
مارديت.. نهض قرب مسافة محترمة
نسر : ورد بس اكعدي احجي وياج واذا ماعجبج
كلامي
سكت باوعتله
وردة : اذا ماعجبني كلامك تولي بهدوء
هز راسه كعدت ورجع كعد على قنفة مقابيلي والحلقة
بينا تلمع
نسر : قسم بالله العظيم أني نيتي وياج صافية وحلال
ولا مرة فكرت بيج نزوة او مثل ماتفكرين انتُ
سكت يشوف رد فعل كمل
نسر : شنو تردين؟ تعيشين هنا؟ اني وياج تعيشين
يم أهلي اني هم وياج
رفعت عيني له
وردة : اهلك يعرفون؟
هز راسه
نسر : بس أبوي و عمي ولد عمي
رفعت حواجبي
وردة : تخاف تحجي؟
عقد حاجبه
نسر : من شنو اخاف؟
وردة : تخاف تكلهم اريد غجرية؟
هز راسه
نسر : ليش أخاف؟ أني ختاريت اكمل حياتي وياج
همَ شكو؟
سكتت
نسر : بعدين أنتِ مو غجرية وربات بدوية
نزلت راسي
وردة :بس هم مايكولون هيج
نسر :مايهمني رأيهم
رفعت عيني
وردة : متخاف يكولون مرتك غجرية؟!
سكت رفعت عينه بتسمه مرسومه على وجه
نسر : اويلي شحلاتها بحلگج مرتك"
نزلت عيني بسرعة
نسر : أريدها واحبها غجرية بغرفتي.. وكدام الناس
احترامها من حترامي
سكتت ثواني بس سيطرت على نفسي ورفعت
عيني له
وردة : ليش اني؟
بتسم
نسر : كل هذا وماحسيتي؟
وردة : بشنو؟
نسر : بگلبي ولهفتي عليج؟
وردة : ليش؟
تنهد ومارد
وردة : صعبة؟
رفع عينه
نسر : شنو؟
بنفسي أسمعها بس هزيت راسي وغيرت الموضوع
وردة : أبوك وعمك شكالو؟
نسر : ماكالوا وماألهم حق يعترضون أني اللي اعيش
وياج مو همَ
وردة : وأمك؟
نسر : بعد متعرف
هزيت راسي
نسر : گتلج مألهم حق يعترضون
وردة : واذا عترضوا؟
نسر : مو مهم گلتج اني ردت اعيش واكمل حياتي
وياج رأيهم ماله داعي لايقدم ولا يأخر
سكتت ثواني نظرتله بعدم قناعة
وردة : لا.. يهم
رفع حاجبه
نسر : ليش؟
وردة : لأنك مو عايش وحدك واني مو وحدة تدخل بحياتك وبعدين تصير مشاكل بينك وبين أهلك
سكت أول مرة ماجاوب بسرعة
وردة : اليوم تكول "مايهم" وباجر؟
من يصير ضغط من تصير كلمة وينذكر أصلي؟
شراح تسوي؟
بلع ريگه وصوته نزل
نسر : أوگف وياج
ضحكت
وردة : الى متى تبقى واكف وياي يوم يومين ترا اللي
تواجهم أهلك والمجتمع اللي حولك
نسر : گتلج كلامهم ورأيهم مو مهم
وردة : راح يعيروك بية
إذا انت تتحمل... أني ما أتحمل
أول مرة يتأثر من كلامها
نسر : ليش؟
رفعت عيني مباشرة
وردة : لأن الكل راح يحجي ويطعن بدون مايعرفون
المقابل بشنو عاش
سكتت حجيت بقهر
وردة : اعرف المجتمع الي تعيش بي عدهم هتك
العرض مثل شربت ماي
قبل مايحجي قاكعته
وردة : شكد عندك استعداد دافع عن الغجرية؟
رد بثبات
نسر : العمر كله اعيش بس ألها
وردة : الحچي سهل أمير
نسر : أدري...
بس أني ما أطلب منج تصدگيني هسه
سكت لحظة
نسر : خليني أثبتلج
نظرتله بثبات
وردة : شلون؟
سكت بس تنهد وكأنه قرر
نسر : أبدأ من أهلي
وردة : لا
نسر : ليش؟
وردة : لأن إذا فشلت هناك... راح تجي تكسرني
هنا
سكت ثواني نزلت عيني وطلع صوتي مكسور
وردة : ما بقى عندي شي ينكسر بعد
نسر : اذا رفضوج يعني رفضوني ورفضوا شخصيتي
وصاروا هم يقررون عني..
رفعت عيني
نسر : واني مو طفل حتى امه تمنعه من شي يريده
أني هل مرة أريد..
سكت ثواني ينطي الكلمة حجمها
نسر : أريد حياتي وهي انتِ
نزلت عيني بخجل
نسر : ما أگدر أمسح اللي عشتي بس أگدر أخليج
تعيشين شي أحسن
وردة : بس مااريد تعارك أهلك الخاطري وتعاندهم
مو كل شي ينحل بعناد
سكت
وردة : إذا فعلاً تريدني لا تثبتلي بكلام چبير ومشاكل
اني بغنى عنها
رفعت عيني بثبات
وردة : أثبتلي بصبرك
سكت وهالمرة واضح متأثر
نسر : شكد؟
تنفست بعمق
وردة : لحد ما أحس بالأمان.. بدون ما تخوفني
بدون ما تضغط... بدون ما تكسرني مرة ثانية
نزل عينه للحلقة اللي بينا بعدها رجع نظرلي
نسر : وإذا انتظرت؟
وردة : وقتها.. أني أجاوبك
بتسم براحة
نسر : الحمدلله نصبر شعدنا غير الصبر
وردة : يله هسه الله وياك
نهض واخذ العلبة
نسر : هاي تبقى يمج يمتى مااشوفها بأيدج اعتبرها
علامة رضا
هزيت راسي رجعها على طاولة نهضت قبل مايطلع
نسر : محتاجة شي؟
وردة : بس اريد ارتاح تعبت
نسر : يوجعج شي أخذج لدكتور؟ سكرج شلونه؟
وردة : مابية بس تعب نفسي وسكر زين
وكف بالباب ورجع التفت
نسر : اا.. يعني چنه مخططين شنو نسوي هل يومين
وردة : مألي خلك
نسر : هو لو طلعين تغيرين جو نفسيتج تتحسن
وردة : مادري الله كريم
فهم علية هز راسه وطلع بدون اي كلام سديت الباب
رحت غسلت ورجعت للمطبخ كل أسبوع اسوي ثواب
الجدة الله يرحمها.. جهزت المواد وكعدت ندك الباب
توقعت جيراني اكو مرأة كلش لطيفة مقابيلي تماماً
اني وياها نتبادل الاكلات شنو تسوي دزلي وشنو
اسوي هم ادزلها
كمت فتحت الباب نصدمت بي
بدهشة
وردة : شجابك؟
نسر : الغراض بالسيارة کلت انزلهن
عرف شلون يرجع بحجة فتحت الباب
وردة : دخلهم
دخلهم للمصبخ سديت الباب ورحت ورا بقى واكف
نسر : محتاجة شي؟
وردة : مشكور
سكت حاير يدور على سالفة شاف المواد بالكاع
نسر : شتسوين؟
عرفت سالفته مطوله رجعت كعدت
وردة : ثواب الحبوبتي
نسر : أساعدج؟
ماكدرت اباوع بوجهه بس اشوفه اطكها بضحكة
واخرب الاول والتالي
لبست الجفوف وصرت أشتغل
وردة : تعرف؟
نسر : أتعلم
وردة : اكعد
ماصدك راح غسل ايده ورجع كعد مقابيلي نطيته
جفوف لبسهم
وردة : شوف تاخذ الخبزة وتفرش عليها الحم
نسر : بس؟
وردة : اي
نسر : سهلة
اباوعله اخذ خبزة صاج واخذ لحم مثروم اني متبلته
قبل بوقت وفرشها على الخبزة
وردة : اي شاطر
بتسم
نسر : بكلشي
خزرته نزل عينه
نسر : شنو تشوي؟
وردة : اي
نتبهت له يشتغل بسرعة وتركيز بقيت اتأمل ملامحة
شكلة كلش حباب ولطيف بس السانه
معقولة بعدني مااعرف طبعه نتبهت حتى من يبلل
شفته حفرة خدة تبرز بوضوح..
رفع عينه نصدم لما شافني اباوعله بسرعة نزلت عيني
وردة : عادي تكمل البقية؟
نسر : اي عادي
اخذت كم قطعة وشويتهم وخليت الچاي على نار بين
ماجهزن هو كمل اجه نزع الجفوف
اخذت الاكل
وردة : تعال تريك
بتسم واجه كعد
نسر : تعبتج
وردة : ثواب
نسر : واصل ان شاءلله
خليت البقية بالفرن ورجعت اتريك
نسر : طيبة عاشت ايدج
وردة : بالعافية
نزلت عيني اكل وبس رفعتها شفته يتاملني وبتسامة
خفيفة على وجهه اول ماشافني نزل راسه ودي أطك
من الضحك على حالنا حسيت صار بينا خجل او صار
شي مدري شسمي يمكن زعل خفيف
كملت ورحت جهزت اللي بقى خليتهم بصحون توزيع
اجه
نسر : خلي عنج اني اروح
وردة : هاك وانطي للحارس واني انطي الهاي المراة
نسر : صار
اخذهم وطلع واني هم طلعت دكيت الباب على مراة
سلمت عليها ونطيتها الثواب ورجعت رتبت البيت
بسرعة ودخلت غيرت ملابسي وطلعت اظفر بشعري
اجه
نسر : كملت
وردة : عاشت ايدك
شافني مبدلة سكت بس عيونه علكت بيه
نسر : احم، احم
غلست كملت شعري أخذت الجنطة
نسر : شنو طالعة؟
وردة : اي ختنكت أريد اتمشى شوي
نسر : اذا تحبين ترحين المكان أوصلج؟
وردة : تسلم
سكت كملت ردنا نطلع بس عينه طاحت على علبة
بعدها بمكانها باوعلي بأستغراب
نسر : ماتوقعتج مو مهتمه لهدرجة!
وردة : لا بس ألتهيت أشتغل
هز راسه
نسر : حتى مافتحتيها!
وردة : أمير والله لا
نظرلي بجدية
نسر : يمكن وصلني جوابج بدون صبر
أخذها بأيده راد يرجعها الجيبة لزمت أيده
وردة : أمير
نزل عينه
نسر : مستحيل افرض نفسي على گلب مارايدني
خلاص مااضغط عليج
وردة : أمييرر
نسر : أصلاً حب من طرف واحد مايدوم وانتِ
ماـ
خليت أيدي على حلكة
وردة : هاا صرت تفسر على مزاجك وبعدين تلومني
سكت وعيونه على إيدي اللي سديت بيها حلگه
نسر : وردة..
انتبهت على نفسي وسحبت إيدي بسرعة
نزلت عيني بخجل
وردة : لا تسبق الأحداث...
نسر : متحبيني صح؟
رفعت عيني له
وردة : ليش انت تحبني؟
كلشي بي يصيح أحبج له اللسانه غير الموضوع
اتنهد وكال
نسر : هاي هي فهمت
فتح العلبة شافها فارغة رفع عينه بدهشة
نسر : جووري!
بتسمت بخجل وسحبت الزنجيل من رگبتي بي
الحلقة والمحبس المتصل حسيت روحه ردتله
الضحكة ترست وجهه
نسر : ليش ماگلتي والله احس وكعت من طابق
العاشر وگلبي تحطم
ضحكت
وردة : چبير
بنبرة فرح
نسر : نبدله كتلج ماعرف بس مجرد حتى اتقدملج
وردة : لا خلي
لمست المحبس بخف
وردة : هيج أحسن
باوعلي بتركيز ابتسامته بعدها موجودة
نسر : يعني؟
نزلت عيني بخجل
وردة : يعني بعده وكت على إصبعي
سكت بس عيونه ما ابتعدت
وردة : بس مو على گلبي
انصدم شوي ما عرف شيرد
نسر : جوري..
بتسمت أكسر الجو
وردة : لا تفرح هواي
نسر : هسه ارتاح
باوعتله باستغراب
وردة : من شنو؟
ابتسم
نسر : لأن صرت قريب منج.. حتى لو مو بإيدي
على أقل يم نبضج
نزلت عيني بسرعة ولفيت وجهي
وردة : يله... لا أتأخر نطلع
فتح الباب وهو مبتسم بس هالمرة ابتسامة أنتصار
نسر : وين تردين؟
وردة : أكعد بالحديقة شوية
سكت نزلنا نريد نعبر الشارع لزم أيدي وعبرنا كعدت
بالمرجوحة
وردة : عوفني
نسر : ليش؟
وردة : هيج اريد أبقى وحدي
هز راسه وبتعد عني مسافة بس عينه علية وأني هم
أسرق له النظرات شوي ورجع
نسر :ها كملتي؟
وردة : شنو؟
نسر : مو طلبتي تبقين وحدج كملتي من وحدتج؟
ضحكت وهزيت راسي
نسر : شنو رأيج نكمل خطتنا لان محظر أماكن تفتح
النفس
سكتت
نسر : والله ألج الأمان مأزعلج ولا اتعدى حدي.. هاا؟
هز راسه بتسم مد گف
نسر : يله كومي
لزمت ايده ونهضت صعدنا بالسيارة واول شي اخذني
المدرينة الألعاب من الفرحة احس بنفسي أعيش طفولة متأخرة
أكو العاب خطرة ماقبل أصعد بيها بس لعبة دكيت رجل
له أصعدها مثل القطار عربت الموت
اخر شي صعدت وصعد وياي اول بداية حلوة بس
بعدين أحس گلبي وگع أصيح نزلني ماكو ولايمه ولا
يسمع كل اللي ويانا تصيح
أمير كاعد چن كاعد بسيارة بس لازم أيدي ويهديني
لحد مانزلت أحس الدنيا فترت بية صابني غثيان
سندني
نسر : أويلي عليج صعد براسج
كعدت بالكاع والزمتها
نسر : شتسوين؟
وردة : ألزم الكاع صارت تتگلب بية
نسر :مو لگاع تتگلب راسج وعنادج
بلكوة ارد
وردة : مااكدر اكوم
نحى شالني
نسر : عرمة مااكدرج..
حاوطت رگبته وسندت راسي على گتفه
نسر : وهم تجيني عرمة صغيرة مثلج.. تعاندني
وتدوخني
فتحت عيوني نص فتحة
وردة : شنو؟
ابتسم وهو يباوعلي
نسر : يعني إذا صارت تجي منج نسخة مصغرة
بخجل
وردة : عايش دورك هواي
ضحك
نسر : مو بيدي أتخيلها وأضحك مثل شعرج
وبياضج وحركاتج
سكتت.. بس هالمرة ما اعترضت سحبت نفس قوي
من عطرة أحس روحي ردت وستقريت وصلنا يم
السيارة نزلني
نسر : بعدج دايخة؟
وردة : توبة اذا أصعدها
نسر : ياحبيبي موگتلج دوخج حتى وجهج صار
أصفر بس..
باوعلي
نسر : امشي سرية كاملة بس ماكدر أمشي كلمتي
عليج
وردة : ياافدوة وشمسوية
هز راسه
نسر : ابد اني لي مسوي
فتح الباب صعدت سندت راسي على كشن رجع
صعد
نسر : شلون صرتي؟
وردة :شوية ستقريت
التفت
نسر : نكمل؟
هزيت راسي بأيجابية بتسم وحرك السيارة وشغل
أغاني وصلنا المكان يجنن يكون قريب على حدود
التركية كلش الجبال والخضار غير نفسيتي للافضل
بعدما كملنا مشوارنا رحنا نتغدا
نسر : باجر نروح للمصرف
سكتت رفعت عيني له
وردة : برأيك تكدر توصللهم؟
صفنت ثواني رفعت عيني له
وردة : زين اذا وصلتلهم شنو تكلهم؟
نسر : على اقل أعرفهم وأعرف قصتج
وردة : معقولة عندي أهل!
نسر : محد طلع من فطر الگاع.. أكيد عندج أهل
وردة : زين ليش عافوني؟
نسر : أستبعد همَ عايفيج
سحب نفس قوي
نسر : اما مخطوفة
هزيت راسي
وردة : مستحيل لي شفتها تكون خاطفتني لا شكلها
ولا لهفتها علية
نسر : لذلك اريد أعرف قصتج
سكتت
نسر : خايفة؟
هزيت راسي
وردة : كلش.. يعني اذا عرفتهم بلكي هم رفضوني
وهم خافوا أجيبلهم العار
نسر : ليش هيج تفكرين!
وردة : لازم أفكر بأسوء شي حتى ماانصدم بعدين
تحسرت
وردة : لان الحياة دائماً تفجعني مو تفاجأني
قرب لمس طرف أيدي
نسر : زين خليني اني وياج نواجهه كلشي سوه
بتسمت وكملنا اكل وطلعنا بالسيارة التفت له
وردة : أمير
نسر : يبعد عيونه
نزلت راسي بخجل ونسيت شردت أحجي لتفت
نسر : شبيج حبيبي
احس گلبي تخرفن من يگلي حبيبي چن اول مرة
بحياتي اسمعها بس قاومت شعوري
وردة : لو ختاريت أعيش هنا؟
نسر : كتلج أشتري بيت ونعيش ولما اروح للدوام
اخذج وياي
التفت
نسر : هسه اعوفج مجبور بس وقتها لا ترحين وياي
ماكدر اعوفج مو لان املگج.. بس راحتي بقربج
سكتت كلامه دخل گلبي بدون استئذان
نزلت عيني وابتسمت بخفة
وردة : راحة لو تعود؟
ابتسم وهو يباوع للطريق
نسر : يمكن بالبداية تعود.. هسه صارت حاجة
رفعت عيني له بسرعة
وردة : حاجة؟
التفتلي لحظة بعدها رجع عينه للطريق
نسر : اي.. وجودج فرق وياي
سكتت ماعرفت شرد
وردة : أمير...
نسر : ها حبيبي؟
ترددت.. بعدها نزلت عيني
وردة : اذا اهلك عترضوا؟
نسر : اذا عترضوا واذا وافقوا ميغيرون برأي شعرة
وردة : أمانة لاتعاندهم ولاتسوي شي يغضبهم أعرف
الأهل شكد عزيزين
نزلت عيني
وردة : واذا منعوك من شي فأكيد يردون مصلحتك
نسر : مو طفل ومااعرف مصلحتي وراحتي وين!
سكت لحظة بعدها هدى صوته
نسر : هم مو أعدائي حتى أعاندهم
باوعتله باستغراب
نسر : أحترمهم وأحبهم بس مو كلشي يختاروه
يناسبني
سكتت
نسر : وهاي أول مرة أحس أختار شي يخصني صدك
نزلت عيني
وردة : أخاف تخسرهم بسببي
رد بثقة
نسر : لا تخافين إذا صار موقف.. احاول اتمسك بالاثنين
لا أخسرهم.. ولا أخسرج
سكتت وخايف گلبي من الرفض مااريد اكون طرف
يفرقه عن أهله وأحبابه بمرور الوقت حُبه الية يخف
وشوقه ألهم يزيد وهيج اكون اني الخسرانة..
جان الطريق طويل بس حلو وجودنا سوه صار أحلى
بعد مشوار رجعني للبيت
صف السيارة وسحب موبايله فتحه
بأستغراب
وردة : ليش مغلق؟
نسر : مااريد أي شخص يزعجني من اكون وياج
رفع عينه بعيني
نسر : هذا الوقت ألي والگلبي
بتسمت بخحل نزلت عيني
نسر : جهازج ممنوع تقفلي تدرين البارحه اجيت
أصعد بس كلت هاي عرمة تلم الناس
ضحكت
وردة : هم زين ماصعدت
نزلت نزل وياي
نسر : احمم... بس ممكن اخذ ملابسي؟
التفت
وردة : اي تعال
صعدنا فتحت الباب مادخل هل مرة وكف
نسر : انتِ جيبيهن
وردة : ماتفوت تستحي؟
نسر : أي مرتي طردتني
ضحكت ودخلت اخذت ملابسه ورجعت نطيتها
وردة : وين تروح؟
نسر : هنا اكو فندق قريب انام بس الليلة لان باجر
بالليل ارجع
وردة : تمام
ودعته وسديت الباب ومدري شبية ضحكة مافاركت
وجهي وكفت كدام المراية طلعت الحلقة ولاارادياً
بستها....
بعدها غيرت ملابس وكعدت صارت بية سوله ألعب
بالحلقة اتصل حجينا شوية وتفقنا باجر نروح للمصرف
نمت واني بقلق وخوف بس وجود يخفف عني..كعدت الصبح بدلت ونزلت هو منتظرني
فتحت الباب وصعدت
وردة : صباح الخير
بتسم
نسر : عمي غير انتِ الخير وأهله
وردة : أميير خايفة وگلبي دمام لاتوترني زيادة
ضحك
نسر : ماكو داعي للخوف اني وياج
حرك السيارة وصلنا للمصرف نزلت وذكرت ذاك اليوم
وشكلها.. اجه لزم گف أيدي
نسر : يله
هزيت راسي ودخلنا واول بداية سألت اذا نزل بحسابي
والصدمة أي قبل شهرين نزل رجفت وباوعتله
وردة : شنو يعني!
شد على أيدي بلطف يهديني
نسر :صبري هيج مصرف ماممكن يخلي التحويل
مجهول
وردة :شلون يعني
نسر :لحظة بس
رجع سألهم منين تم التحويل؟ والصدمة الأكبر
نطوا.... الأسم والمحافظة اللي تم منها التحويل
وطلعنا
وردة : ها؟
نسر : الحوالة بأسم رجال مو مرأة
بدهشة
وردة : يعني اكو غيرها يعرف؟
هز راسه
نسر : بالضبط
وردة : يعني؟!
نسر :الموضوع مو بسيط أبد..
سكت نتبهه الخوفي
نسر : بس احسن من الماكو على أقل عرفت شي
يوصلني للحقيقة
وردة : زين منو وشيردون مني؟!
نسر : اللي اجت وشفتيها مرأة! بس... ليش الحوالة
بأسم رجال!
خفت
وردة : شنو يعني والله عقلي من الخوف مايجمع
نسر : أهدي ماكو شي يخوف.. يعني
سكت رديت بتوتر
وردة : يعني شنو؟
نسر : يعني مو بس المرأة تعرف بيج
وردة : عصابة؟
ضحك
نسر : وين اكو عصابة تصرف على خاطف
وردة : دخت
لزمت راسي وكعدت على رصيف
وردة : مااريد اعرف والله تعبت
اجه
نسر : كومي للسيارة قربت ان شاءلله بس ارجع
اكدر احصله بسهولة اذا طلع أسمه الحقيقي
مد كفه لزمته سحبني له بقوة
نسر : هههههه شنهاي شو طرتي ولج
مارديت دفعني بخفه بكتفي
نسر : حتى اذا عرفتي أهلج ماانطيج صرتي أللي
ومالتي
بين بوجهي الزعل رفع راسي
نسر : حبيبي
رفعت عيني له
وردة : اني حبيبتك؟
بتسم
نسر : مو بس حبيبتي...الشي الوحيد اللي ماأريد
اخسرة
وردة : أمير
نسر : يبعد عيونه
وردة : ماتعوفني صح؟
نزل صوته قترب خطوة بدوم مايلمسني
نظر بعيني مباشرة
نسر : للآخر نفس...
سكت لحظة بصوت مكسور
نسر : إلا إذا انتِ بنفسج قررتي تعوفيني
نزلت راسي
وردة : من أحس بيك نسحبت أني هم أنسحب
بتسم
نسر : أمني ماانسحب بسهولة
مارديت
نسر : يله نتريك
هزيت راسي.. ورحنا تريكنا وكل ساع اعيد نفس
الكلام منو ذوله؟ وشريدون مني؟ ويبقى يطمني
رغم خوفه علية..
بعدها بقينا نفتر لحد ما صار وقت لازم يرجعي
هنا گلبي نعصر.. ختنگت بشكل فضيع ودي احضنه
وأبجي..
نزلني باب العمارة بقى يوصيني هواي وصاني لدرجة
حسيت بعد مااشوفه.. أخر شي
حضنته.. بقت إيده مفتوحة ما لحك يستوعب
وردة : أحضني أمير
تردد لحظة.. بعدها ضمني بقوة كأنه هو هم خايف
أختفي من بين إيده
نسر : شبيج يا روح أمير...؟
مارديت بس حس بأنفاسي متلخبطة
دفنت وجهي بصدره بصوت مكسور
وردة : مدري..احس بگلبي ضايج
سكت وشد حضنه أكثر بس بدون ما يضغط
نسر : أبوس گلبج حبيبي
حس بأنفاسي بعدها مو منتظمة رفع إيده على
ظهري بهدوء
نسر : هدي أني وياج
غمضت عيوني بس الضوجة بعدها بصدري
وردة : لا تعوفني
نسر : مستحيل
سكت لحظة بعدها خفف حضنه
نسر : بس لازم أروح هسه
نزلت عيني ما ردت أفلت من حضنه
وردة : دقيقة بس
رجعت حضنته أقوى من قبل بس هالمرة لف إيده
حولي بسرعة فهم إني محتاجة هاللحظة
بهمس
نسر : ديري بالج على نفسج
هزيت راسي
وردة : وأنت هم
ابتسم بخفة
نسر : أول ما أوصل أتصل
بعدت عنه ببطء أفك نفسي غصب عني وعنه
وردة : لا تتأخر
نسر : ما أتأخر
لفيت أدخل.. بس قبل لا أصعد التفت بعده واكف
بمكانه يباوعلي رفع إيده وأشر على شباج غرفتي
ابتسمت غصب.... فهمت قصده
صعدت بسرعة
فتحت الباب ودخلت ركض رحت للغرفة وفتحت
الشباج باوعت.. بعده واكف
ضحكت وگلبي تعلق بي رفع إيده يودعني لوحتله
ظل ثواني.. بعدها رجع صعد للسيارة ومشى أباوع
للمكان خالي منه بس الإحساس بعدها موجود
حطيت إيدي على صدري
وردة : ياربي ماأنخذل
بقيت انتظر وكل مايوصل مكان يتصل لحد ما وصل
للبيت اول يومين اعيش بفراغ غيابه وتعلق بي بس
أني اكدر اسيطر على مشاعري امامه ماابين أني أثر
غيابه علية
مرة أطبخ هو وياي على خط أثبت المبايل ونبدي
هو يحجيلي عن يومه وشنو سوه واني كذلك
وردة : عرفت منو اللي دز حوالة؟
هز راسه
نسر : مع الأسف أسم ماله وجود بسجلات
صفنت
وردة : معقولة!
نسر : گتلج مااعوفها وماارتاح له اعرف اذا مو
اليوم باجر
وردة : تدري صار عندي فضول اعرفهم أكثر من
أهلي
ضحكت وصفن على كامرة أني واكفه بلا وعي
صرت العب بالزنجيل اللي بي الحلقة
نسر : يمتى يصير بأصبعج؟
تركتها بخجل.. تحسر
نسر : والله مشتاقلج
نزلت راسي
نسر : حجيت ويا أهلي ولكل صار يعرف
وردة : شكتلهم؟
نسر : كتلهم قررت اتزوج ومرتي موجودة بي اريدكم
تشاركوني فرحتي وتحضرون
توترت
وردة : و.. وشنو ردو؟
نسر : باركولي
بعدم تصديق
وردة : هاا؟
نسر : أي والله
وردة : وأمك؟
نسر : يعني عترضت شوية بس اخرها ستسلمت
سكتت واضح امه معارضه وبقوة بس مابين هل
شي
نسر : بشششتتت
رفعت عيني له
نسر : شوفي حالياً عمي وضعه مو تمام ومااكدر
اعوفه
وردة : شبي؟
نسر : مو كتلج متعرض التهديد من حزب معين
وردة : اي.. اي والله نسيت
نسر : بس يهدء الوضع أجيب أمي واخواتي وعمتي
يجون يشوفج
بتوتر
وردة : اا.. اي خليها بعدين.. بعدين
سويت نفسي أشتغل حس بيه توتر ضحك
نسر : اويلي العرامة تخجل!! منين طلعت الشمس!
وردة : يله شوية واتصل
ضحك وماراد يحرجني أكثر.. سدينا الاتصال نزلت
المبايل ببطء وبقيت أباوع على الشاشة كأنه بعده
موجود
تنفست بحسرة
رجعت كعدت على القنفة عيني طاحت على الزنجيل
رفعت الحلقة ولمستها بأطراف أصابعي
وردة : يمتى يصير كلشي طبيعي؟ أمه...
نزلت إيدي وگلبی دگ بخوف
وردة : حتى قبل ما تشوفني... ماقبلتني
حاولت أضحك على نفسي
: شتتوقعين؟ يحبونچ؟
أجاوب نفسي
: لا...
كمت أمشي بالغرفة بدون وعي
: لااا وريدة... لازم ما أتعلق هواي
لزمت راسي
: بس تأخرت...
نزلت عيني على الحلقة مرة ثانية
: يارب حباب لاتفجعني وداعتك گلبي مايتحمل
بعد تعبت
مرت الأيام
وفجاة قل التواصل بينا هو دائماً يم بيت عمه ولوضع
يمه متشدد اني هم بديت أنسحب بهدوء وبطء حد
السلام نحجي ويخلص الاتصال.
اتوقع
أما اهله ضغطوا عليه ومايريدني اتعلق بي اما صحه
على نفسه ورجع بكلامه ويمكن فعلاً المثله ماياخـذ
مثلي
خلص اجار شهرين ولما رحت اريد اجدد العقد وانطي
اجار انصدم
:: عمو المرأة تريد تزوج أبنها وتريد الشقة تفرغ خلال
أسبوع
من الصدمة ماعرفت أحجي غير
وردة : وين أروح؟
:: اذا تردين اشوفلج مكان؟
وردة : هنا بنفس المكان اكو شقة؟
:: لا بالله... بس اذا تحبين ادزج لشخص عنده
وردة : ياريت
هز راسه واتصل
بقيت أفرك أيدي بأيدي من حيرتي
وردة : وين ترحين وريدة! رجعتي صفيتي وحيدة
ومستحيل اتصل بي خاصه بعد ما صار بينا بـــرود
واحنه بدايتها.. خلاص اقلع شوگي بأيدي والله كريم
اجه نطاني رقم والعنوان
:: روحي هسه
وردة : تمام
اخذته ورحت للمكتب كلش قريب حجيت وياهم
وطلبت تكسي ورحت وياهم هم بسيارتهم
وصلت اشوف العمارة متهالكة قبل ما ادخل واشوف الشقة تراجعت الرجال أصر بس عفته ورجت بنفس التكسي
مكان تعبان والعمارة شبة مهجورة تخـوف بقيـت
امشي من دون وجهه شفت مكتب دخلت سالتـهم
فرحت من كالو اكو بس مو.... نفس المنـطقة اخذت
رقم وباجر اجي اشوف المكان
رجعت للشقة بايدي كراتين اول شي سويته جمعت
اغراضي وخليتهم على جهه حتى اذا حصلت مكان
اطلع قبل الأسبوع..
كعدت ابحث على نت وشفت كومة عارضين بيوت
بناء حديث واسعارهم جداً مناسبة نغريت واتصلت
بيهم وكالوا عدهم ومتوفر بسعر مناسب بس شوي
بعيد.. اني طلبت منهم اشوف المكان وافقوا..
رجعت تصلت علية رد
نسر : جوريتي الورد شلونها؟
وردة : الحمدلله أنت شلونك؟
نسر : والله صاير نصين من التعب
وردة : ربِ يساعدك... عمك شلونه؟
نسر : صراحة الوضع مو تمام الله وكيلج ناس رايحة وناس راجعة بيتهم مايهدء لامن الشيوخ ولا من
الجيش
وردة : زين ليش؟
نسر : مو كل واحد يگدر يتحمل عمي دائماً يوكف
بوجه ناس كبار...
اخذ نفس
نسر : وهذوله مايسكتون بس يصدر أمر أو ينمس
واحد من جماعتهم يگلبون الدنيا
تنهد
نسر : ناس متعودة تفرض نفسها بالقوة وما تتقبل
أحد يكسرها
وردة :وشلون يبقى هيج؟
نسر :عمي ماعنده خيار اما يكمل بطريقة وينصر
الحق حتى لو على حساب نفسه
وردة : أميري..
بتسم كأنه نزاح عنه تعب
نسر : أويليييي أني أميرج عمي هنيالي
ضحكت الضحكته
نسر : هذا اللقب مسؤولية ترى
وردة :والله خايفة عليك حبيبي
سحب نفس قوي
نسر : واني هنا خايف عليج.. والله روحي وعقلي
يمج ياريت لو يمي على اقل عيني عليج مطمأن
وردة : لا تخاف اني بخير
تحسر
نسر :لو يمي وبس واشوف وجهج كل التعب يزول
سكتت
نسر : شبيها حبيبي أحس تعبانه؟
وردة : هيج مجرد تعب
نسر : شبيج حبيبي؟
ماردت اشغله بية فوك تعب تعبين كافي هو بعيد
مو ناقصه خوفي
وردة : مابية گتلك تعب
نسر : غير اعرف نوع التعب؟
ترددت احجيله ومن ردت احجي سمعت صوت
صاح
:: أميررر فضهاااا يمعود
نسر : أجيت.....
جوريتي شبيج حبيبي!؟
وردة : لايظل بالك تعب عادي يومين واصير زينة
بتسم
نسر : اهاا يمكن فهمت
سكتت
نسر : حلوتي انتبهي لنفسج هل ايام ولا تعبين بس
نامي ورتاحي
ماصححتله
وردة : صار وانت هم طمني عنك
نسر :تأمر أمر سيادة الحُب
ضحكت ودعنا بعض وگلبي طمأن من ناحيته طلع
مشغول بعمه... وأني عبالي بعد ميحبني او تراجع
بس ليش هيج خايفة؟
: معقولة يصيرله شي.. لاالااا يارب أحفظه بحفضك
ياحافض
ثاني يوم طلعت على موعد ورحت للمكتب حسب
الاصول مكتب وكله مهندسين وعمال حجيت وياهم
وعرفت عن نفسي اللي حجيت وياهم البارحة عرفوا
راد ياخذني بسيارته بس ماامنت طلبت تكسي ورحت
ورا..
صح المنطقة بعيدة بس حلوة وهادئة نزلت من تكسي
وطلبت ينتظرني..
دخلت شفت البيت صغير وحلو ورجال كلش محترم
طلعت راضية وقانعة بي
:: اذا عجبج أأشر علية محجوز
وردة : اي ياريت وشكد نهاية؟
:: ان شاءلله مانختلف على السعر
هزيت راسي
وردة : يمتى اكدر اخذه؟
:: يمتى ماتجهز فلوسج ولو ماعدج حسبيها عليه
بنيتي
وردة : ربي يوفقك عمو ان شاءلله باجر ارتب وضعي
واجيب العربون والباقي بعد السند اسلمهم
هز راسه بهدوء
: على راحتج بنيتي
تشكرت منه ورجعت للتكسي حسيت براحة أخيراً
أستقر...
مااكول لأميري مااريد أشغله بية كافي عليه التعب
وفراكِ عنه.... رجعت للشقة كل اغراضي مجهزتهم
ماعندي شي ثكيل شكم كارتون اخليهم بتكسي كافي
عليهم
دخلت للغرفة طلعت جيس حبوبتي الله يرحمها عزلت
فلوس العربون خليتهم بالجنطة ورجعت باقي الفلوس
والذهب
لليل أتصل رديت وهل مرة صوتي مرتاح
وردة : أميري
نسر : فدوة يروح الصوتج حبيبي شلون صرتي؟
وردة : الحمدلله بخير طمني عنك؟
نسر : ماكو شي جديد نفس التوتر..
سكتت
نسر : وبَطل صفين أحس گلبي ميت عليج شنو هاي
الحُب دمرني
ضحكت
وردة : ليش تحبني؟
بمزح
نسر : لا اضحك عليج.. ولج اتمنى يوم واحد افرغ
حتى گبل أني يمج والله ماارجع بدونج
وردة : هااا حتى لو رفضت!؟
نسر : لامترفضين لان تبقين هنا فترة بين ما يهدء
الوضع وأرجع وياج
سكتت
نسر : البارحة ذكرتج
وردة : شلون؟
نسر : اختي وصت أمي على زيت جوز الهند كتلها
شلج بي تكول زين للشعر كتلها أي ولج غير يخبـل
ضحكت
نسر : أسمعي..كالت شمدريك؟ كتلها مرت اخوج
عطره يفوح من شعرها.. عاد هي هنا بدت تسأل
الف سؤال وو
وردة : وو.. شنو؟
نسر : راويتها صورج
وردة : عزاا ليكون لي اعيب بيهن؟
ضحك
نسر : گلهن شافتهن
وردة : يااا أمير... شكد عيب
نسر : أصلاً حبت حركاتج وكالت حلوة عندك ذوق
وبينه حبابة وفقيرة كتلهاا أي عادي هي كلششش
فقيييرررر
ضحكنا بعدين سكتت
وردة : احمم احمم شنو احس فقيييررر بيها عدم
قناعة
ضحك
نسر : لااااا ابد أصلاً وين اكو منج وحدة بالصين
وماتت بالزلزال
ضحكت
وردة : أميــــــــررر
نسر : ياروحه والله مشتاقلج هيج احس النفس
بصدري يضيق خلف الله على صور ترد روحي
بغيابج..
سكتت أني هم مشتاقه أريده يجي اليوم قبل باجر
بس ماحجيت كتمت شوگ بگلبي اخاف يظل بقلق
نسر : نمتي؟
وردة : وياك
نسر : خير بعدج تعبانة؟
وردة : لا أحسن
نسر : أخذتي علاج؟
بخجل
وردة : أميـر
نسر : يبعد روحه.. حبيبي غير أطمئن عليج
وردة : زين لا تخاف
نسر : نتبهي على نفسج وردتي..
وردة : وأنت هم
نسر : أني ونبضي يستقر بحضنه قوية
بتسمت بخجل عرفني ضحك
نسر : أموت على عرمة من تخجل
وردة : لا طول غيابك
طلعت منه تنهيدة خفيفة
نسر : والله لو بأيدي هسه طيارة وأجيج بس
وعيونج موبأيدي عمي مايثق بأحد خاصه بهيج
ضروف
وردة : ان شاءلله تعدي على خير
نسر : ان شاءلله
بعدها حجينا شوية وسديت الخط ثاني يوم الصبح
قبل مااروح أتصلت عليه مارد اكيد مشغـول اخذت
الفلوس ومبايلي بالجنطة بس أبد ما مرتاحة اول
ماطلعت كمامي شكلت بقبضت الباب بس ما هتميت وطلعت رجعت تصلت هم مارد اخر شي
دزيتله صوتية
وردة : أميري...مشتاقتلك هواي والله أني اضيع
من دونك.. أذا متكدر تجي گلي تعاي او دز واحد
ياخذني ألك
وصل التكسي دزيته ورجعت المبايل بالجنطة
صعدت متوجهه وكل ساع اشوف المبايل ماكو
اي رد منه
اتصلت على مكتب هم ماكو رد رجعت اتصلت
على رجال بسرعة رد
وردة : عمو وين انت بالمكتب؟
:: لا تعاي بالبيت اكاتبج واسلمج مفاتيح
وردة : يله اجيت
سديت الخط وطلبت من السايق ياخذني للعنوان
صار يدردم كتله انطيك زيادة سكت لحد ما وصلنا
طلبت منه ينتظرني بس رفض نطيته الكروة وراح
وكفت ماامام البيت محد اكو والباب مقفول
اتلفت الشارع فارغ ولا طير بس اني، خوفي زاد وكل
جسمي صار يرجف اتصل على ابو البيت ماكو رجعت
المبايل بالجنطة وحضنها وصرت امشي بسرعة اريد
اوصل مكان بي ناس او احصل تكسي هنا اكو بيوت
بس اغلبها مامسكونة بعدها بناء جديد...
شفت دراجة أجت من بعيد عليها شخص لابس اسود
بأسود مامبين غير عيونه على مشيته وسرعته قرب
مني وسحل الجنطة من متني وهو على دراجة فرني
فر نضربت بالكاع بقوة
رفعت راسي خفت يرجعلي بلكوة نهضت نفسي ايدي
كلها جروح وركبي واجمع كل قوتي واشرد بنفسي لحد
ما وصلت الشارع العام...أي سيارة أشرلها ماتوكف لحد
ما اجت تكسي
فتحت الباب وصعدت ألهث وريكي حجر بلكوة
كتله
وردة : اخذني الاقرب مركز
ماحجى الرجال شاف حالتي ونزلني يم المركز حتى
ماطلب فلوس دخلت للمركز حجيتلهم كلشي صار
دونوا اقوالي وطلعت وي دورية دليتهم على مكتب
وفجأة يطلع المكتب فارغ
وتطلع هاي مو شركة ولا مكتب عقار انما شركة وهمية
تنصب وتاخذ الفلوس وتروح والمشكلة صايرة بأغلب
محافظات العراق وماكدرو يلزموهم او يشكون بيهم
لان اغلب شغلهم تزوير يشبهه الحقيقية صعب يفرقون
بينهم وكذلك اكو رجال يدك على راسه ماخذين منه
مبلغ كلش جبير وطافرين
رجعنا للبيت دفعوا ودخلو بس البيت طلع الشخص
ماله علاقة بيهم وبيته فقط يرمم بي لايريد يبيع
ولا شي وكال البارحة واحد داخل للبيت والحمدلله
بيته فارغ مابي أي شي..
بعد مااسجلوا افادتي وطمانوا عني رجعت للشقة
لا فلوس ولا مبايل زين بس مفتاح الشقة امير ضم
واحد فوگ الباب گال خاف يضيع لو لما طلعيـن
ينطبگ الباب .... والثاني عنده والثالث هسه ضاع
بالجنطة وي الفلوس
رفعت رجلية سحبت المفتاح فتحت الباب ودخلت
مرعوبة لدرجة كل عظم بجسمي يرجف...
قفلت الباب ومن الصدمة الصارت بية ماعرف الله
بعظمته خلصني بأعجوبة
يومين اني ماطالعة حتى الباب اذا يندك ماافتحة
بس أدعي ربي يجي أمير بأي وقت خلاص مابقى
هنا بعد أروخ ويا
ثالث يوم ندك الباب بقوة فرحت بالكت أمير ركضت
فتحت الباب واشوف ابو العمارة صار يصيح
:: انطيتج مهلة اسبوع وباجر اخر يوم اذا ماطلعين
أشمر اغراضج
رديت بخوف
وردة : صار باجر اطلع
عافني وراح... رجعت بدلت ملابسي وطلعت رجعت
للمكتب اللي رحتله وكالوا باجر تعاي ...
وصلت وطلبت بيت او شقــة أيجـار عدهـم بس
بعيد عن المنطقة اللي اني بيـــها هل مرة خليـت
سايق التكسي هو ينزل شاف البيت وسأل وتأكد
من عقد الأجار ورجع اتفق
وياهم نطيت اجار شهر كتلهم اليوم انتقل وافقوا وسلموني مفتاح
رجعت للشقة نقلت أغراضي بالتكسي وطلعت
سلمت مفتاح الشقة الراعيها ورحت للبيت نزلت
فتحت الباب ونزلت الغراض للبيت
صح البيت شوي تعبان بس احسن من الماكو
خاصة بعد الصار وياي نهاريت وماعرف شلون
الله خلصني بأقل خسارة ممكنه
اكيد فلوسها فلوس حرام لذلك راحن بسهولة مثل
مااجن.. كعدت الليل كلة أشتغل بالبيت لحد ماصار
يلمع
طلع الصبح تاكدت من البيبان ومديت فراشي ذبيت
نفسي من التعب ماكعدت غير المغرب لبست وطلعت
نزلت للسوك اشتريت مبايل وخط ورجعت
كعدت اتصل بس اريد اذكر رقم أمير ماكو كل مااتصل
يطلع اما مغلق او شخص غيرة خلاص أيست وطلعت
اكو بنية طالبة كلبت منها تسجل رقمي وعنواني بورقة كتبتة.... وثاني يوم رجعت للعمارة صعدت للمراة اللي
تسكن مقابيلي
نطيتها رقمي والعنوان وكتلها بس يجي خطيبي
يسأل عني تسلمي هاي الورقة.... كالت دللي سلمت
عليها وطلعت اتمشى
: صار أربع أيام غايبة عنه.. معقولة ماستفقدني!!
توقعته يجي
حسيت بحوع ونست أكل بس من شفت شخص
يبيع كعك تركي اخذت قطعتين ورجعت للبيت
سويت چاي وكعدت اكل
مرت الايام
ومااطلع ابد بالنهار انام وبالليل اسهر خاف واحد
يجفتلي.. من أنام الزم الخجر بأيد تحت الوسادة
وكل ثانية اباوع للمبايل بلكت يـدك حتى لو بالغلط
بس ماكو اي خبر عن أمير.. خفت ليكون صارله شي
مامعقولة هيج اغيب عنه ويعوفني
ألوحدة گتلتني ونسيت شلون أحجي صرت يومية
الصبح اروح للمقبر ومرات بين يوم ويوم..
رحت للدفان وحجزتلي قبر اللي بصف حبوبتي الله
يرحمها ونطيته فلوس دفنة
طلعت امشي ماعرف وين ضايعة هواي فكرت أرجع
للقرية على أقل ناس أعرفهم ويعرفوني بس بعدمــا
شردت هم يحجون علية ويكولون شردتلها وي واحد
هم ضحك عليها وعافها ورجعت مااخلص من كلامهم جنت بوحدة صرت بثنين..
بقيت أمشي بالشوارع اتعب اكعد شوية وأرجع امشي
لو اكعد بالحديقة امرجح بالجهال ويمرجحوني والعب وياهم
مرة من المرات رحت أشتري كعك وشفت بنات وشباب يدخلون للمكتب..
لزمت بنية وسالتها
وردة : شكو هنا؟
:: نقدم على وضايف
وردة : شنو من وضايف؟
:: يردون عمال بمعمل
وردة : يصير اقدم؟
:: أي
خليت الكعك بالجنطة ودخلت اكو بنية كاعدة خلف
مكتب تسجل أسماء... كعدت اشوف كلها ملهوفه
كلت هم أسجل أسمي بلكت الله يقبلوني وهم اخلص
وکت ليش يومي يخلص هباء
وصل السره ألي نطيتها اسمي الكامل والعنوان والرقم
كالت روحي واحنه ندزلج رسالة او نتصل
تشكرت منها وطلعت اخذت چاي وكعدت بالحديقة
اكل كعك ورجعت للبيت
الليل أخلصة برعب وحدي وهدوء والوسواس اعوذ
بالله سيطر علية كل ساع اتخيل واحد يجفتلي لو
اسمع حركة دمي يجمد بعروگِ
بعد يومين أخيراً رن مبايلي رحت أركض ملهوفة گلبي
يدك بقوة... فرحت أكيد أمير اجه وحصلني
رديت
وردة : الوو
اجه صوت بنية
:: سلام عليكم
وردة : وعليكم السلام
:: مبروك تم قبولج بالشركة
بنبرة فرح
وردة : الله يبارك بيج
::اذا تكدرين تجين باجر للمكتب حتى ناخذكم للشركة
وردة : اييي اكدر بيش الساعة؟
:: على الساعة سبعة
وردة : صار مشكورة
سديته وأني بين الفرح والخيبة فرحت لان نقبلت
وخاب ضني لان الاتصال مو من أميري..
جهزت ملابسي حاولت انام على وگت حتى ماتأخر
من اول يوم.. كعدت الصبح قبل ساعة بدلت وطلعت
وصلت للمكتب نجمعنا المقبولين..
وصل باص صعدنا بيها متوجهين للـمعمل جنت خايفة شوية بلكت هذول هم نصابين وراح يبيعونا..
بس طمأنيت من وصلنا المكان وشفت اتريلات تنزل
بضاعة.. نزلنا والمسؤولة قسمتهم كل ومجموعة على
شغل والشباب ينزلون البضاعة بقيت اني وبناات ثنين
بايدها سجل باوعت علينا كالت
:: عليكم التنظيف
اني كيفت بس هل شغلة اعرفلها بس لي وياي نزعجن
دخلنا هو مكان واسع كلش وكله عمـال تحمـل وتنقــل
بعدها اخذتنا على مكان كأن معزول عن المعمل اهدء وارتب كالت
:: هاي الشركة من ضمن المعمل
وردة : بس سؤال؟
:: تفضلي
وردة : يعني نظف الشركة والمعمل؟
بتسمت
:: لا المعمل الشباب هم ينظفوا بعد كل بضاعة
اشرت
:: انتم بس عليكم الشركة وهم مو كلها كل وحدة
تاخذ قسم
هزيت راسي بأيجابية وقسمتنا كل وحدة تلزم شغلة
ودلتنا على غرفة استارحة وامكان ادوات التنضيف
وكالت بلشو شغل لان الساعة بلـ2 اكو جتماع مهم
لميت شعري والبست الصدرية وجفوف واخذ ادوات
التنظيف ورحت أسأل وين غرفة الاجتماع.. دلوني
دخلت بيقت صافنه عليها
وردة : ااااع ولكم شنظف منها غير أنظف من حياتي
الزفت
هزيت أيدي وبديت مسح ورجعت مسحت الاثاث
حتى الكراسي اللي يكعدون عليهن مسحتهن رجعت
على جام كذلك ماخليت شي بيها مامسحته..
شوية ودخل شخص يدفع بعربانة.. طلب مني ارتب
الضيافة نزعت الجفوف وخليت العصير وبطل ماي
على طاولة
بعدها طلعت أكمل باقي الشغل..بس وقت الاستراحة
تغدينا ورجعت كملت قبل مايخلص دوامي
لما خلص رجعنا بنفس الباص وهاي بس اول مرة حتى
نندل وبعدين نروح ونرجع وحدنا..
رجعت للبيت تعبانة ذبيت نفسي على فراش وطلعت
رام خليته بالمبايل واتصفح صورنا أني وأمير..
لزمت الحلقة بأيدي أحجي وياه
وردة :وينك؟مااصدك عفتني
نزلت دمعتي
وردة :عادي عوفني بس كون أعرفك بخير..
لمست صورته وبستها
وردة :أميري والله أحبك
ضميت المبايل لگلبي ونمت والدمعة بعيني
واشوف نفسي بذاك الشارع أظلم والدنيا الليل وماكو
بس ضوء الگمرة وأني اركض واتلفت خاف يجيني
اللي اعرفه واحد يركض وراي واطب من فرع واطلع
من الثاني نوب شارع طويل اركض بي والتفت وراي
رجعت التفت كدامي واشف واكف
جمدت بأرضي ماتحركت واشوف ذاك الشاب طويل
وحلو اول مرة بحياتي اشوفه فتح أيده حضن وكال
:: إني أحبج
اني بدون كلام تقربت وحضنته والخوف تحول الأمان
سندت راسي على صدره وضمني...
فزيت اول مافتحت عيوني حسيت بشعور حلو كلش
وردة : صدك جذب ربي فد وحيد مثله نوب مواصفاتي
ومن اول هيلة نطقها يعني بس بالحلم اشوفه!
باوعت للساعة نهضت بسرعة وادردم على نفسي
: وج وريدة تتحلمين بحلوين ترديلج فحل صخام
بدلت وطلعت أريكض اخذت تكسي وگبل للشركة
وصلت البست الصدرية وبديت تنظيف بعد ماكملت
طلعت بأيدي ادوات التنظيف أريد انزل سمعت
:: يبنية
التفت شفت رجال عمرة بالـ40بس شكلة أصغر بهواي
وردة : وياي؟
:: لا الوراج
رجعت شلت الغراض ومشيت صاح
:: أي وياج
رجعت التفت تقرب مبتسم
:: شنو انت تشتغلين هنا؟
وردة : اي
:: تعينتي بالوجبة الجديد؟
هزيت راسي
وردة : اي
:: مو ماشايفج قبل
صفنت بوجهه شكله هسه شفتني شتغير!
:: اذا كملتي شغلج سويلي چاي
عقد حاجبي
وردة : هااا؟
رفع حاجبه مبتسم
:: ماسمعتي؟ گلت سوي چاي وجيبي وراي للمكتب
اشر على مكتب وكع گلبي بسرعة نزلت عيني
وردة : حاضر أستاذ
تعداني ودخل للمكتب أني بوجهي ركضت رجعت
الادوات ورجعت سويت الچاي بعد ماكمل اخذته
ورحت للمكتب
دكيت الباب
:: ادخُل
فتحت الباب دخلت بابتسامة
وردة : تفضل أستاذ
قدمت الچاي وبتعدت منزلة راسي
:: وين جنتي تشتغلين قبل؟
وردة : أول مرة أشتغل
:: متأكدة؟
بدون مارفع عيني
وردة : أي والله أستاذ
:: اممم.. يمكن مشبة عليج
سكتت رفعت عيني له
وردة : أسمحلي استاذ
:: لحظة ماكملت
وكفت
:: أسمج؟
نزلت عيني
وردة : ورد جوري
:: حلو لاا كلش حلو
وردة : شكراً أستاذ من ذوقك
:: هذا شعرج لو تلزيك؟
رفعت عيني عقدت حاجبي بأستغراب
وردة : شني تلزيك؟ قصدك باروكة؟
بتسم
:: أيي
وردة : لا شعري
سكت لحظة،عينه ثبتت علية بشكل أطول من
اللازم
:: اممم...
حسيت الهوى ضاق بصدري
صار يحرك الچاي وهو بعده يباوعلي بطريقة
ما ارتاحتلها
:: تكدرين تطلعين
تنفست بسرعة ولفيت أطلع و قبل لا أفتح الباب
صاح
:: لحظة
تجمدت بمكاني
:: شفتج قبل... بس مو هنا
انشد جسمي كله لتفت له
وردة : يمكن مشتبه عليك
ابتسم ابتسامة خفيفة بس مو مريحة
:: ممكن
طلعت بسرعة من المكتب وگلبي يدك يدك بخوف
وگفت بالممر ثواني مسحت وجهي
:غزاااا بس لاشايفني بأرض الغجر.. معقولة
خليت أيد على حلگي وبقيت دايخة بكلامه لحد
ما اجت البنية صاحتني رحت كعدنا تغدينا سوه
بعدها نكمل الشغل ونوب صرت اشوفه كل ساع
ويباوعلي ويبتسم
كوني موضفة عنده أكيد أرد الابتسامة بالطف
ومرت الأيام
مثل كل يوم اروح وأرجع للدوام وحياتي بدت تستقر
وتعودت على وحدة ومابطلت عادتي من أنام الخنجر
تحت المخدة أسوي حتياطاتي هاي صارت عادة عندي
بس بيوم استراحتي أروح للمقبرة اسوي ثواب الجدة
اما المدير كان شخص محترم تقريباً
ماتجاوز حده فقط نظرات عادية وصـرت اتجنب من اشوفه يجي بسرعة انزل عينـي عنه والتـهي بشغلـي
بس مرات احس يتعمد من اتهرب منه يدز علية انظف
المكتب وهو يبقى يباوع.....واني الوحيدة اللي يطلب
مني او يوصيني على كهوة، چاي
ومر شهر وكل العمال راحوا للمحاسب اخذو رواتبهم
اني وبنية صارت صديقتي اغلب وقتنـا ناكـل سـوة
ونسولف ومرات تطلب مني أساعدها بالشغل
رحنا أني وياها للمحاسب أخذت راتبها وأني ممنوع
بدون سبب سكتت ورجعت ثاني يوم داومت عادي
أشتغلت وكملت شغلي وبقت بس هاي البنية ويـاي
أساعدها اجه المحاسب
:: ورد جوري الاستاذ طلبج للمكتب
هزيت
وردة : هسه؟
:: عندج شغل؟
وردة : لا كملت من زمان
:: تمام يله
هزيت راسي ونهضت نزعت الجفوف وصدرية الشغل وعلگتها، رتبت شعري المبعثر بسرعة، أخذت الجنطة
بيدي وطلعت ألف سؤال يدور براسي
ليش دز علية؟
معقولة شافني مقصرة بشغلي؟
ليش بس أني؟
كل البنات استلمن رواتبهم... ليش أني لا؟
وگفت متوترة كدام باب المكتب دكيت الباب بخفة وحطيت إيدي على المقبض.
جاني صوته من الداخل:
- ادخلي
فتحت الباب ابتسمت بتوتر
وردة: مرحبا أستاذ
هز راسه بإيجابية، وعيونه بعدهم على الورقة الكدامه
بلعت ريكي.
وردة: طلبتني؟
بصوت ثابت رد:
- دخلي وسدي الباب.
سديت الباب ودخلت. قربت خطوة من طاولة المكتب
أشر بيده على الكرسي.
- اكعدي.
ابتسمت بخفة.
وردة: شكراً... هيج مرتاحة.
سكت.. وأني واكفة أنتظر أعرف ليش صاحني
تنهد ورفع عينه بعيني. مد إيده وضرف بين أصابعه.
- راتبج.
أخذته مبتسمة.
وردة: شكراً جزيلاً.
رفع حاجبه وهو يتأملني.
- شنو؟ طالعة؟
وردة: إي، خلص وقتي قبل نص ساعة... بس بقيت
أكمل اللي بإيدي وهسه طالعة.
هز راسه بإيجابية
رجع ظهره على الكرسي... وعينه ما فاركت وجهي.
ثواني صمت
بعدين كال كلمتين حسيت بيهم السقف وكع على
راسي.
- شكد الليلة؟
غوضت عيوني أحاول أفهم اللي سمعته
وردة: شنوو؟
ابتسم ونهض من الكرسي.
رفع حاجبه مرة ثانية... وردد نفس الكلمات ببطء
وعينه بعيني.
- شكد... الليلة؟
گلبي صار يدك بسرعة مجنونة... رجعت ذاكرتي بكل
الي عشته من إعتداءحطيت إيدي على صدري احاول اطمن نفسي بس شطمن!
حسيت الغرفة دور بية
سندت نفسي على الكرسي... خفت أطيح من طولي
معقولة يقصد اللي فهمته لو غير شي
اقترب خطوة كال بحدية و صوت واثق
- أطلبي اللي ترديه... حتى لو كان مبلغ خيالي بس
حددي السعر.
شديت نفسي ورفعت عيوني بوجهه
وردة: اسأل أختك... أمك هي تحدد السعر.
لفيت حتى أطلع... وأني أسب الساعة اللي دخلت بيها لهالمكتب... بس كلامه ستوقفني.
ـــ اذا طلعتي منا مألج رجعة
لتفت عليه حرام احجي ويا حرف جريته بزيج وطلعت
نصدم بزيج مثل مانصدمت بكلامة
خليت الظرف بالجنطة واني أريد اطلع تلكتني بنية
وياي
:: ها ورد شگلج؟
لزمت أيدها احذرها خايفة عليها
وردة : ديربالج تثقين بي شخص قذر
:: ليش شكال؟
وردة : طلب مني أروح ويا
بتسمت
:: هنيالج
أريد أستوعب احس ضربتين براسي صاروا شنو؟
هنيالي على ياطياح حظ عيوني بقت ترمش لاأراديا
وردة : شـ...ـنووو؟!
:: أصير عشيقته ولا هل عيشته هاي على أقل يدللني
ضربتني بگتفي
:: ولج وافقي
مكادرت احجي بعد كلامها كلام سحبت نفسي وطلعت
بسرعة بس اريد أستوعب اللي يصير معقولة!!
اني جنت أتوقع هل سوالف القذرة بس يم سلطانة بس
لااااا طلعت غلطانة سلطانة جانت بالعلن وهاي شغلتها
اما هذولة ناس محترمة اللي يشوفهم يدخل بسـدهم
ثاري طلعوا بس ديكور أرجع الأرض الغجر ولا أبقى هنا
طلعت وطلبت تكسي صعدت وماعرفت وين اروح نزلت
يم حديقة وكعدت..
مستحيل أرجع للبيت ممكن ياخذ عنواني يجيني بالليل
ويسوي اللي يريدة ويكسر عيني ويرضي غروره خاصه
بعد الزيج وشلون ستهانيت بي ورفضته ونظرته تخوف
اللي
صار الليل واني بعدني كاعدة بالحديقة ماعندي شخص أستند علية او أعيش الخاطرة طلعت مبايلي شفت صور أمير نهضمت حيل والدنيا سودت بعيـني
اجت بعقلي أغنية تمثل حالتي صرت أرددها بصوت مكسور
: أنا ياطـير ضـيعنــي نصيبـي
حرت لاني الهلـي ولاني الحبيبي
حرت مابين أنسى وبين الاكيك
أحن مرة الهلي ومرات أحن ليك
واطير وي الهوى الو يمر طاريك
انا بقلبي الحنين يفيـض نهـــرين
والك اشتاق شوق الضوا للعيــن
ويالحبك دوى وفرحة هلاليـــن
والك اشتاق شوق الطيف للعين
مُر مرت حلـم للـروح يا هـــواي
وانا بلياك وردة مفــارقة المـــاي
مسحت عيوني وأني أشوف صورته
: وينك أميري.. أنا بلياك وردة مفارقة الماي
حضنتها الصدري وأبجي بقوة فجأة مبايلي رن مسحت
عيوني وجمدت اني محد يتصل علية من شتريتة لليوم
ما رن غير مرة وهي من الشركة...
خفت مارديت اكيد أجاني للبيت يعرف العنوان و اخذ رقمي هم يريد يهدد لو سوي شي خلصت الرنة ورجع
اتصل..
سحبت نفس قوي وخليته وضع طيران ماعندي خلك
البية كافيني من خوف ورعب وحدة...
حرت وين انام؟
وين أروح؟
بقيت أتلفت اخر شي بالحديقة اكو مراجيح وزحلكية
العاب اطفال واكو بوري بلاستك يتزحلكون منه نهضت
دخلت بالبوري خاف واحد يشوفني كعورت روحي نمت
بدايته تكون لوفة اكدر انام بس اكور نفسي هيج صعب اتزحلك منها
قاومت النوم واخرها ستسلمت وسلهمت عيوني وفزيت
على صوت قوي الجهال يربدون برجليهم وصوت عالي
نزلت صاير يوم جديد فتحت المبايل واول مافتحته هيج
ثواني ورجع رن نفس الرقم جريته بزيج وهل مرة سديته
بوجهه
عرفت ماكدر أخلص منه ولا اكدر أرجع للبيت ماعندي
غير اروح للكاع الشتريتها هناك أمان يم الله وحبوبتي
هم شتاقيتلها هي مااجت أني اروحلها
رحت الاقرب صيدلية اخذت مجموعة ادوية عادية
صارت تقريباً علاكة واخذت بطل ماي ورحت للمقبرة
نزلت وصلت القبرها
كعدت أبجي
وردة : لاتجين أبقي اني أجيتي
اشرت على مكان بصفها
: هنا راح انام يمج.. وردة صفت وحيدة محد ألها بعد
حتى أمير عافني
احس غصة بزردومي من اذكره
: يمكن أهله.. يمكن صار عندة ضرف وماكدر يوصل
عاذرته والله هم حقه بتله بية بلوة بس هسه هل
اجيتج تلميني..
حضنت القبر
: تعبتني الدنيا حيل ماعندي خلك اكعد اتصارع مثل
قبل الوحدة كتلتني عليش ابقى عايشة ماعندي شي
لا عزيز ولا عزيزة..
رفعت راسي عن القبر ومسحت عيوني بتسمت
واني أفتح علاكت الادوية
: اتمنى الدنيا تسمعني جان جريتها بزيج
طلعت مجموعة خليها بأيدي بقيت صافنة عليهن بعدها
رفعت عيني للسما
: يارب.. ما أعرف شلون أدعي مثل البشر
ولا أعرف أحچي وياك بس أقوى شي أعرفه
أكلك: حباب
وأدري هواي حباب... وترحم بعبدتك الذليلة
اللي انت وحدك تعلم شكد تعبت وشكد مرت
عليها ليالي وهي وحدها
يارب تعبت...
تعب مو مال يوم ولا يومين تعب عمر كامل
وأنت تعرف مايحتاج أذكرك بشنـــو مـريت
وإذا بعد مكتوبلي أعيش.. قويني وإذا خلاص
انتهى حيلي...حضني برحمتك ولاتعوفني
انت هم لأن ماعندي غيرك
نزلت عيني اخذت الحبوب وشـربت ماي ودموعي
تنزل وگلبي مكسور من الدنيا والبيبها ماكو دقايق
والدنيا صارت تلمض بعيني اسود وأبيض
أخر شي ذكرته الكلادة برگبتي سحبتها وبست الحلقة
والمحبس الفيت الزنجيل على أصابعي
: أميري..
نزلت راسي على قبر حضنت اغلى ثنين على گلبــي
الحلقة وقبر جدة بعدها ماحسيت غير روحي طفت
من الدنيا...
