رواية قيود العوف الفصل الثاني والعشرون 22 بقلم ريتا

وداعَة عيونَك

ولا بيهُم بَشر يعرف يوّدَك

وداعَتك بَس انه احبَك .

هَو ووگع وصَار يصرخ مثَل صريخ النسَوان من شَاف الناس اللتمَت علىٰ صريخة صَار يتمسَكن ويگول 

:- الله اكبرررر رجال شَكبرني شگدنِي شيبَتي بشعَري وبزر تدفعني وتضربني 

فتحت عيونِي بصَدمة واستغراب من غير نبَرتة وصار هيچي گلبَها عليَه وحَتىٰ منَار عافَها من شاف العَالم 

بَاوعتَلة بأستهزاء من گال 

:- ما عندَج أحترام للچبيَر ولچ بَوية بگد ابَوچ اني شلون تضربيني هيچ الله يسامحج 

رفعت حاجبَي ولويت شفتي بتعجَب اجة واحَد من الشَباب الواگفين وگومَه وهو يگول 

:- گوم عمَي گوم بَنات مستخفَات ما الهن رداد 

جاوبَتة بَقهر وحرگة بصَوت عالي 

:- منتظرينَك تردَنة واگفَة مردتنة عليَك 

طفر هَو من يمَه وگال 

:- شوف بَويه عوفها عوفها هاي ماتستَحي چانت شاردة من اهلهة ولفت هاي گ*** ولچ البارحة رجعتي من عارج لو اني منج اطم روحي من هلعار

فتحت عيَونِي بَصدمة ماعَرفَتة گدامَي ابو منَار ابو مدري يَاهو الچان عفت كُل شيء ورفعت صَبعي بوجهَة وحچيت بصووت عالي وعيَوني نااطة بَراسي من كلامَة

:- شوف لو مو تصيَر زلمَة چبير لو شَيبك يترس وجهك وراسك اذا مو محترم اردك ونص ألا شرفَي وسمعتَي اذا تطَعن بَيهن ماا أعترف بيَك اذا تصير گدامييييي 

گلتها للكلمة وشددت بيَها بصوت عالي اجت ام علَي سحبَتنِي من أيدي وانَي عروق گُصتي احسَهم نطوو من العصبيَة 

رد وگال بكُل صلافة واستهزاء 

:- ههه ام الشرف انتِ لو عندج شرف ما واگفة هاي الوگفة گدام الاكبر منَج وگدام الناس الواگفة هاي 

:- اذا الگدامي مو محترم اوگف بنص عيَنة وأردة وأعلمَة الاحترام 

نط واحد من الواگفين وگال 

:- والله عمي حقك بنيه ماعندها مستحىٰ شنو هلسان !!

فرفحني خزرتة وحچيت بعصبية..

:- أنتَ لتدخل ما تعرف شيء أسكت گاعد يتمسَكن گدامكم هذا چان يسَحل ويضرب ببنَتة لمجرد چانت بهذا البيَت 

                                            

              

                    

:- براحتَة بنته وبكيفه ميَريد تفوت بيَت ناس مو زينَة يخاف عليَها وعلىٰ سمعتَها تتلوث

حسَيت كلامَة دگ بَراسِي شنو سمعتها تتلوث شكد حقراء هالعالم جاوبتة بحقد وحجيت..

:- أنتَ لو تسَتحي وعنَدك ذرة رجولة ماتحچي هذا الكلام بس ناقص غيرة صدكني . 

حسيتة انلطم على وجهة واتفشل كدام العالم صاروا يتبسبسون سوة نفسهم مامهتم ورد بأستهزاء ..

:- ليش حاچي شيء جذب اني سَت جُمان ؟ 

أشر علىٰ امِي وهَي تبچي وگال 

:- شَوفي هذا وضع أمج بسببَج الله يعلم وين چنتي من عارج حتىٰ صحتها ما سَلمت عليَها لفيتي الها العلة وهسة رجعتي صايرة مرة كفو براسنا قديمات وعابرينهن لمي روحج وسكتي 

فرفحني وصدمني فورني فور ردت اجاوبَه وسبقتنِي امي من گالت بعصبية 

:- لاااااا حدك حدك من تحچي تضب لسانك وتثمن كلامك وتعرف شلون تحچي واذا ماتعرف الحچي تسكت بنتي أشرف من الشرف بنتي مربيتها بأيدي 

:- تربيَة مَرة بألف مَرة تربيَة والنعم منَها بنتي بزر شَرف بزر كرامَة لو تموت ماتَنهان وشَرفها ماينطعن بيَه إياك ثم إياك انتَ والف واحَد غيرك تجيبون طاري بنَتي وشَرفها 

راد يحچي رجعت قاطعتة امَي رافعة اصبعها بوجه الكل وكملت كلامَها وگالت..

:- ماعنَدي عيَون راحت بس عنَدي لسَان سَلاح بوجَه كُل واحد يهضمَها وينزل دمعَة من عينها ويَطعن بشَرفها يصير سَيف حَاد ويگص لسان اي واحد يتجرأ يحچي كلمة غلط علىٰ بنتي

جلت صوتها مكملة كلامها..

:- عندنا رب موكلينا امرنا اذا حاسبك علىٰ طعنك هذا يلوعك ويخليك تحس بحرگة گلبِي هسة حچيكم يجردك من كُل ذرة شرف موجودة عندك لمجرد طعنت بَشرف بنيَة وحَيدة شريفة وغصباً عليكم واحد واحد .

            

              

                    

سكت متنرفز وعيونة صارت براسة حجة ابو منَار وگال والحقارة تارسة نبرة صوتة..

:- طبعاً شلون تطمطميَن عار بنتج بهذا الحچي 

ضحكت امَي وردت بوجهة..

:- والله يا ابو منَار بنيَتي منَار الها مَعزة بگلبَي ماتقل عن معزة جُمان اثنينهن بنَاتِي بس هذا الحچي الراح احچي مايمسَها يمسَك أنتَ والله ماكو عَار غيَر الي يطعن بشرف غيره ليش الزلمة يمد أيده علىٰ مرة الزلَمة يطعن ويحچي الحچي الحچيتوا انتوا ؟ وين غيرتكم 

فتح عيَونة بغضب ابتسمت من بين الموقف من لصمتهم امي لصم علىٰ حلگهم وگالت..

:- الزلمة بشَهامتَة ورجولتَة ينَعرف .... ماا اريد حچي زايَد يا ابو منَار بس اتفضل من گدام بيَتي اني الي ماا اتشرف بيَك توگف گدام بَابِي 

نطط عيَونة وعصَبيتة بيَنت علىٰ ملامَح وجهة اجت عينَي علىٰ منار الجامدة من الموقف وبس دموعها تنشاف خفت عليَها خفت يأذيَها انِي أعرف ابَوها ماعندَه رحمة حقير وميتغير ابد..

عتها من ايدها عت واخذها بس غير احس روحِي نمردت اتمنيَت اسَوي شيء اخذها منَه وامنَعة بس ماا اگدر ابوها هذا ياربي ابوها..

فريت نظري للعالم الملتمة وتبسبس ضحكت متعجبة مستحيل هالعالم شكد بلا غيرة ورحمة وضمير ماكو رفعت أيدي هزيتها اخذت امي ودخلت وام علي صاحت بيهم بصوت يفزز اكبر واحد..

:- شعندكم واگفين بَعد يلا كلَمن لبيَتة تموتون علىٰ المشاكل منشَوف وجوهكم غير بالطلايَب كاتلكم النفاق 

گعدت ضايجة ودمعتِي بطرف عينَي أفكر بحيرة ما أعرف اذا التصرف الي سَويتة صح لو لا بَس نظَرات منَار وشكلهة اذانِي انطَبع بيَه شلون باوعتَلي وهزت راسَها ودموعها تصُب من دفرته وحاچيته 

مهما كان يبقىٰ أبوها متقبل عليَه أكيد ... 

بَس هَو طعن بشَرفي وسُمعتي اذانِي بكلامَة وفوگ هذا مابقت عنَدي أعصاب وانِي اشوفَة يسَحل بيَهة ويضربَها

كُل ماا اغمَض عيونِي وأتذكر شلون ضَربها وسَحلهة انهضَم واضرب رجَلي بأيدي بحرگة وهمست مفرفحة..

-اتمنيته مو ابوها علىٰ هالحجي والموقف والله الا اطلع تعلوم العوف بيه والله .

            

              

                    

باوعتَلي خالة ام علِي وگالت 

:- لتَحرگين گلبَج دادَة واحد ميَسوالة فَلس مخلصَها يشَرب ويسَوي مشاكل وكُل اهل المنطقة يعرفونة كلاوچي وچذب بس ناس متخاف الله ومنافقين يردون بَس الزلة علىٰ البشر 

جاوبتها امي وگالت..

:- والله ياخيَة منافقيَن علىٰ روحهَم بَاب بيَتي خط أحمر سمُعتة اذا تنَجاب بالطاري فَ بَطاري الخيَر اذا بَطاري الشر اخيط حلوگهم 

:- لتقهرين بروحج دادة ام جُمان عيَونِي مو زيَن عليج القهر انتِ 

اتنهدت وبَاوعت لمَاما شادة علىٰ وجهَة بعصبيَة لا الا العصبية والقهر مو زينة عليها ياربي عود جاي احاول اخليها ماتمر بيهن رحت يمَها لزمَت أيدها وگلت 

:- لتهتمَين مَاما أكو رب فوگ مادامَة يعرفنِي اني شنو تتوقعين الناس الهم قيمَة يمِي بعد ؟ 

لزمت أيدي تحسستَها بأيديها وگالت 

:- عجبَونِي من طعنَوا بيَچ ولج يمَة الشرف ما ينحچَي بيَه وما ينَطعن الشرف شيء عَزيز شلون يطعنَون ما يخافون علىٰ أعراضَهم وعلىٰ سُمعتَهم كُل شيء ديَن بَهاي الدنيَا 

رديت عليَهة بتنهيَدة .. 

:- مَاما أبن الحلال عُمرة ميطعن بشرف أحد لأن يَخاف ربَه يَلوع گلبَة بشَرفة حااط الله بيَن عيَونة .. بس ابن الحرام يسَويها لأن ميهَمة 

بوست ايديها مكملة كلامي..

:- يوم انتِ تاخذين علاج أكيد ؟ 

:- اخذ يبَعد أُميَمتج 

:- لعد هسَة المفروض تتريگين وتاخذين لأن وجبة .

اجتي أم علي وجابتَة بأيدها بعلاگة وگالت 

:- خيَة علاجج نسَيناه مِن وراهم الله ينتقم منَهم كون 

ردت اخذه منها بعدتة عني حجيت مستغربة..

:- خالة هسَة شنو تاخذ گُليلي عليَه أني انطيَه الها 

-مو هسة موهسة خلي تتريگ يله . 

هزيت راسي نهضت سويت ريوك حضرتة وريگت امي اشوفها ارتبكت مدري شصار بيها اتغاضيت وگلت الها..

            

              

                    

:- خالة هذا العلاج تقريباً مخلص منو چان يجَيب الها انتِ ؟ 

:- اي خالة اني اجيبَة 

عضيت باطن خدي من گلبت بالعلاجات ردت اقرة اسمائهم بس الشريط كله شخوط مينقرة اسمة مينشاف منه شيء شكو ليش هالخبصة ماعرف. 

:- تمام لعد خالة اني كم يوم واجيَبة بس احتاج الوصفة الي يكتبها الدكتور لان الشرايط مخبوصة شكو هالتأشيرات كلها 

-الدكتور يأشر علىٰ عدد المرات حتى ماننساهن ويكتب شوكت . 

هزيت راسي وحجيت..

-شكد يكلف علاج امي خالة ؟

باوعت الي وصفنت عليَه وهَي ترمَش بجمود تنقلت نظراتي بملامحها مستغربة..

:- لا خالاتي اني اجيبة حبيبتي 

هزيت راسِي رافضة كلامها وحجيت..

:- لا خالة أمي اني الي اتكفل رعايَتها وعلاجها وكُل شيء انتِ كفيتي ووفيتي رحم الله والديج ماقصرتي .

تعصبت وردت عليَه بعدم رضا..

:- يعنِي اني غريبة ؟ 

:- لا خالة ماقصدي هيج اكيد فهمتيني غلط 

:- ولچ خالة هايَة اخيتي احطها بعيوني لعد شلون اني مسويت وياها شيء ولا وكفيت ولا وفيت هذا واجب الاخت علىٰ اختها 

شكد حجيت ولحيت ويَاها بالتالي هي لحت ألا هيَة الي تجيَبة واني عاندَتها ورفضت رفض تام حسَيت اكو شيء ودتخفي عني بسبب ملحتها استغربت حيل لفتني اصرارها..

:- هههه خالة لتحاولين صدگي خلص بعد علاج مَاما وكُل شيء يخصها اني الي أتكفلة خالة هاي امي لعد اذا ماا اهتم بيَها واني الي عيني علىٰ علاجها وحالتها منو لعد ؟ 

            

              

                    

التفت من تحسست أيدي باوعتلها عيونها مغورگة رفعت ايدي لخدها مبتسمة ردت أم علي من گالت بتوتر وتردد..

:- خالة راتب ابوج وحدة ميكفي للعلاج وللبيت علاجها غالي واشرطتة كُلهن ضروري تاخذهن الهن وقت ولازم تاخذهن بيه 

ميَلت راسِي مستغربة حجيت..

:- اي خالة شگد يعنِي ؟ 

فتحت عيوني علىٰ وسَعهن من گالت بسَعر العلاج صدمتني وكفختني علىٰ راسي وين اكو علاج بهالسعر بس حلفانها كسر ظهري خصوصًا امي علاجاتها مختلفة ومتنوعة شيء للضغط شيء للجلطة وشيء لرجليها ومراجعات كل شهر لازم مراجعة ومرات بالشهر مرتين حسب حالتها اتنهدت وحجيت بحيَرة .

:- لعد شلون چنتي تجيبينة خالة شيبقى للبيت لاحتياجات امي ؟ 

:- اني اجيب النواقص من راتبي 

احس مثل الصاعقَة وضربت راسِي الحيرة ذبحتنِي اتنهدت بتعب وهضَم ياريتني گدرت اكمل دراستِي حتى اتخرج ومطارت عليَه هاي السنة چان اشتغلت علىٰ الاقل ما ابقىٰ حايرة شنو اسَوي ومنين اجيب .

*****

اخذني وهو يجر بيَه جر فتح باب البيَت وشمرنِي بكُل قوتَة بالگاع خلاني اشهگ وگف يفتر رايح جاي وهَو يحچي بعصبيَة  

:- بنت الكلببب بنتتتتت الحيوووووان 

سكتت لامة روحـي..

:- لچ انِي هاي الحيوانة تمد أيدها عليه اني انضرب بسببج يااا فگر يابنت الفگر ادبسز وحقيرة علىٰ امج طالعة تفوو علىٰ هيچ نسل ساااافل وكل خير مابيه .

غمضت عيونِي مقهورة من كلامة اجة سحبني وگومنِي يعت بيَه سحلني ليجوة سحل يضغط علىٰ ايدي بكُل قوتة حچيت واني اشهگ متوجعة..

:-يابه والله اني اسفة بس صديقتي ماگدرت ماا اروح اشوفهه اشوف شصاير بيها مشتاقة الهه هاي جُما...

            

              

                    

بعدني ممكملة الكلمة دار عليَه شهگت من ضربني علىٰ شفتي بكُل قوتة بأيدة بحيث حسيت من الضربة دخلت ايدة بأسنانِي 

:- أكسر رجليج يازمالة وانعل ابو لابو صديقتج 

اجت امي تركض من سمعت صَوتة وشكلي وگفت فاكة عيونها علىٰ وسعهن شافها وگال 

:- اجت الحقوووودة الحقيرة امشي من گدامي وخليني اسولف وي بنتي براحتييييييي 

تجاهلت كلامة وكأنُ ماسمعتة فتح عيونة علىٰ وسعهن وباوعلي عبالك راد يعاقبها من خلالي..اتقرب لزمنِي من شعري خلاني اصرخ من الوجع 

:- شوفي لچ تنسينها هاي الي اسمها صديقتج اذا تجيبين طاريها بعد لو اشوفج رايحة الهم الا اكسرج تكسر 

لزمت شعري بأيدي فوگ ايدة اريدة يخفف من لزمتة انتهيت من الوجع.

:-يابه والله جاي دتأذيني 

:- سكتتتتتيييي لچ لتراددييين 

گالها بصوت عالي نزيت من صوتة خايفة فتح باب الغرفة ودفعني من ظهري حيل وسدة سمعت صوت الباب من قفلة 

أسمع مَاما تعيط بصوت عااالي وتدعي عليَه لأن ديأذينا هيچ وهو هَم يرجع يرد عليها ويدعي ويعيط ويفشر فشار مينسمع من كثر ماهَو عيب 

گعدت بالگاع وغطيت وجهي بأيدية فرفحت من القهر شسَوي شلون أدافع عن نفسِي ابوية هذا ابووية مو احد غريب وديأذيني وديضربني غطيت وجهي واني أتذكر شلون انضرب گدامي اتنهدت بحسرة .

مو سهلة اشوف أبوية هيچ ينهان گدامِي بالكلام وبالفعل تحز بگلبي وتاكل بيَه اكل وانِي اگول ليش !! 

بس هَو الي ديخلي نفسَة بهايَة المواقف هَو ديخلي الناس تعاملة هيچي هو ديقلل من احترام الناس اله كبير وصغير شگد اتمنىٰ يحسن من نفسَة أريد احس انِي عندي أب وأفتخر بوجَودة ويَاي ولا مرة حسسنِي بهذا الشيء .

دائماً بسبب تصرفاتة يخلينِي انهضم وأتأذىٰ من الموقف الي يصير گدامِي ومن الاستصغار الي يتعرض اله ..

واسأل نفسِي ليش بابا هيچ ؟ اني من حقي أفتخر بيه وبرجولتة وشجاعتة لأن أب ... ليش ديأذينة بتصرفاتة ليش ديخلي الناس تهينة وتتجاوز عليَه گدامنا 

طعن بيَهه وبعرضها گدامِي حچة كلام عليَها مينحچي يأذي كُلش واللفاظ الوجه يتسود منهن اوف .. تعبت كُلش وراسِي بدة يصدع وعيونِي بدت تأذيني من البچي لفيت راسِي ونمت والغرفة بعدهي مقفولة منه ..

*****

نزلت من السيَارة وقاسم نزل وبيدة جنطتِي باوعت للبيَت واني رافعة حاجبِي بثقَة وشَلون مستعدة الهن اويلي اطلع ضيم گلبِي بيهن بس يتعرضن الي ويتحارشن بيَه 

            

              

                    

ضحكت وهسمت بداخلي ..والله وراح ارجع اگابل وجهج ياا غرور ..

لزمت الحجية وقاسم مشىٰ قبلنا فتح البَاب وباوعلِي وگال 

:- هسة تلگينها مگابلة الكاميرات ومصدومَة 

:- طبها مرض

فتحنا الباب ودخلنا صاحت الحجية بصَوت عالِي 

:- وينجن خايبات 

انفتح الباب الداخلي مال البيت واجتِي وسَن تركُض وترحب ترحيب مُصنطع وضحكتها مبيَنة چذبيَة 

:- ياااا عمتييي هلاا ومية هلا 

عقچت وجهة الحجية وباوعتلها وحچت بثگل 

:- هلا بيج 

باوعتلي وجهة ميگصة السيف والضوجة مبينة عليها هههه..

:- رغد ؟ امم مشتاقين الچ حتىٰ نسيناج

رفعت حاجبِي وقلصت عيوني وحچيت بأستهزاء 

:- بس انه ماا انساكم والله يامرة ابوي ابد ماا انساكم .

باوعتلي وعوجت حلگها بعدم رضا والحقد ينبع منَها ينبع يمه تنگط سم..

دخلنا جوة واگفة بنص الصالة متخوصرة وتخزر خزر وحلگها شعرضة وردي وشوي اله يريد يطگ من الفلر والحواجب سود وضعاف ومرفوعات دار وجهة عنا واجت تسلم علىٰ الحجية من ورة خشمها

دخل قاسم يمشي بخطوات ثگيلة تكتف ووگف يمي شافها وباوعلِي وگال  

:- شوف الحلگ شعرضة ليگلك حلگ ضب 

وخرت عن الحجية وصارت عينِي بعينها خزرتها بكُره لو بيدي اثرمهة ثرم أتقدمت الي حتىٰ تسلم تمشِي عوج وتطگ بعلچها رفعت حاجبِي بمكر من شفتها أتقدمت باوعت لقاسم الي راح گعد علىٰ القنفة فتح رجلية ورجع ظهرة بأريحية وحتىٰ ماسلم عليَهة 

ابتسمت شبَه ابتسَامة وأول ما صارت قريبَة عليَه ومدت نفسها تريد تبَوسنِي درت وجهِي ومشيت بخطوات ماكرة وگعدت يم قاسَم 

 بقَت واگفة وترمش بعدم استعياب متفشلة حطيت رجل علىٰ رجل وانه اباوع لشكلها شلون متفشلة وهِي تموت وما تصير الهة هيچ مواقف اجت عينها عليَه تباوع الي بكرهوانِي اباوع إلهة بأستهزاء ولعبان نفس حرفياً . 

كل ماا اشوف شكلهة أتذكر شنو سَوت بينة شلون عذبتنا والأكثر العوف دمرتنا أكرهة وبس أشوفهة اتذكر الي عشناه وشَلون فرقتنَا وگلبي ينغمت مو مَرة أب أنتقام اسَود حقيرة نذلة اذا تشرب مِي ماا اتخيلة صافِي علىٰ حاله فرت أبوي فر ..

            

              

                    

غمضت عيونِي واتنهدت بصَبر وانِي أهمس لنفسِي 

:- راويها نجَوم الظهر لتنطيها مجال بعد أبد 

باوعت لقاسم وهَو هز الِي راسَة ابتسَمت براحَة 

:- أنه وراي ظهر قوي وسَبَاع وراي اخوان يسكتون أكبر واحد بكلمتهم وقوتهَم 

اتحلفت بيها من كل گـلبي اخبلها والوعها..

:- أنه اليوم رغد الدنيا فرتها فر بس اليوم انه الي افرها وادوس علىٰ كُل واحد يأذينِي لو بكلمة مانسيَت حقِي ولا حق اخوانِي اخذه من عيونهن وحَدة وحدة 

فريت نظراتي عليها گاعدة وعيونها تنط شرار عليَه عقچت وجهِي وابتسَمت بأستهزاء الها ومكر وهمست 

:- شلون وجَه عبَالك عجوز ماكول عشَاها .

ردت اتحايَل عليَهن حكيت خشمِي ولويت شفتِي وحجيت..

:- وسَن جيبي ماي الحجية عطشت من طلعنا من البيت گالت عطشانة 

فتحت عيونَها علىٰ وسَعهن وباوعتَلي بصدمة تمَوت ولا احد يأمرها لا بس هي الي تتأمر بس ويَن انا الچن باوعلهة قاسم بحدة ورفع الها حاجبَة گامت وهي تتأفف وتطگ الچلب بالعِميد 

جابَت بطل واحَد واجت انطتَة للحجيَة وهي گالت 

:- لا مو عطشانة ماا اريد 

وسعت عيونها مستغربة وجهت نظراتها الي وانا حجيت..

:- چا انطيني اياه انه عطشانة 

ضحكت رافعة حاجبي واخذته منها شربت منه كشيت وجهي وحجيت..

:- يووه مايكم حار ماينشرب ماعندكم ثلج شمالكم قحط .

-قاسم: لو ادري انا جايبلهم قالب .

-رغد: لا شكو شعلينا ونجيب 

-قاسم: اجيب الج علمودج ترىٰ .

-رغد: هههه بعد عمري حبيب اختة 

            

              

                    

چانن اثنينهن گاعدات علىٰ اعصابهن وكُل شوي وحدة تزفر بوجه الثانية وجوهن الوانها تتگلب والگعدة تسد النفس وتضيق الصدر كعدنا شوي حبيت اضوجهن قبل ما انهض نهض قاسم سلم علىٰ الحجية وگال 

:- ادعيلنَا حجية هاي المُهمة بيَها أرواح نَاس أدعي النا أتم علىٰ خير بَدون ما يصير عندَنا قدر 

شهگت ورفعت أيديها ودعت بكُل حب وصدق 

:- روح يمة عساكم انتصرتوا علىٰ عدوكم ان شاء الله الزهراء ام الحسن توگف ويَاكم ما تعوفكم لحَظة محصنين بأسم الله يابعد امَك 

باسَها والتفت حضنِي وبَاسنِي وگال 

:- ماا اخاف عليَچ بس ديري بالج منَهن 

ابتسَمت اله وهزيت راسِي بثقَة اله 

:- لا تخاف وأنه اختك . 

باوع لغرور ولوسَن وگال بثقة وهو واگف وعلىٰ وجهة شَبه ابتسَامة 

:- نسَوان ابوي حاولن ما تتقربن يمَها ترىٰ اختي صايرة تلدغ دير بالچن 

حچاها وغمز الهن وهنة واگفات علىٰ أعصابَهن ويرمشَن بسُرعة بعصبية وبغضب واضح هز راسَة وطَلع اتنهدت ودعيت الله يسر الهم كُل ما يلتحقون احط گلبِي بشيشَة وأبقىٰ ارجف من الخوف عليَهم بس أستودعهم ربي .. 

اخذت الحجيَة من أيدها وهَي اعترضت الِي الطريق وگال وهي رافعة حاجبَها 

:- خير ان شاء الله ياغرفة تردين تاخذين ؟

:- أكبر غرفة جَوة الي يَم الحمامات 

فتحت عيونَها بغضب وگالت 

:- علىٰ حاجبج تاخذينها هاي الغرفة أريدها لدلال 

:- چا ترديني أخذ الحجية فوگ ؟ وأبقىٰ صاعدة نازلة بيَها وهي تمشِي علىٰ عكازات هههههه 

فتحت عيونها وردت بعصبيَة 

:- لا متاخذينها فوگ بس متاخذين هاي الغرفة اخذي غرفتنا القديمة 

            

              

                    

رديت عليَها بأستهزاء..

:- اووه وانتِ هسة جاية تگُوليلي شنو أخذ وشنو ماا اخذ وانه ثلث البيت بأسمِي وأسم اخواني ؟ 

قلصت عيونها وردت بشر وحقد وهي تضرب برجلهة بالگاع 

:- وانتِ هسة جايه تتحديني ؟ 

:- حبيبتي لا أتحداج ولا تتحديني الغرفة هاية الية انه والحجية وهم يمكن أخذ غرفة ثانية للحجية من اجيب غراضنا من البيت لأن تعرفين انا اشيائي هواي والحجية هم تريد تاخذ راحتها يعنِي افكر بهلشيء .

عيونها جدحت نار ميلت راسي وحچيت..

:- بس ماا أمن عليَها منَچ لوحَدها تبقىٰ يمِي أحسن 

ردت عليَه الحجية وگالت..

:- امشِي يبعد امچ الحچي هَواي اخذي الي تردينة البيت بيَتج 

باوعت الها مفرفحة وتعض بشفتها بحرگة ماا تگدر ترد علىٰ الحجية لأن تخاف منَها تكسر العكازة عليَها وما يهمها وهم ابوي امه عندَه خط أحمر ههه علىٰ الاقل أكو أحد أله قدر بعين ابوي يوگف 

اخذت الحجية ومشَيت بيَها فتت للغُرفة فارغة وكل شيء علىٰ حطتة الكنتور والغراض كُلها محد يفوت الهه بس هِي خبيثة شكو شيء انه اريدة تحط روحها بيَه بس عنَاد بيَها وغصباً انا الاخذها 

********

مرت اسَبوعين والعوف أبد ماا شفتة بعد حيل افتقدتة وكُل يَوم اباوع للبَاب واگول اليَوم يجِي بس مااكو 

انهضم من أفكر بيَه معقولة چنت هم علىٰ گلبة وما صدگ افتك منِي .... اتنهدت واحس گلبِي مغموت شلون بيَه 

لا من چنت عنَدة مرتاحة ولا من اجيت هنَا ارتاحيَت يوم بَعد يَوم داحس بنقص احس انِي مفتقدة شيء عندي جزء مو كامل 

أتذكر وأبتسم .. حواجبَة الكثيَفة ، رموشَة الي چنت حاسدته علىٰ طولهن ، وعيَونة السود بَسواد الفحَم ، ذقنة الي مرتب ومحدد عبَالك مسَطرة ، عضلاتة ، ظهرة الخشَن ، سَوالفة وحنيَتة صَوتة الي انبَهرت بيَه ...

اتنهد.. وأمسح وجهِي بكُل مرة اصَفن بيَه واسرح بتفَاصيلَة بيَها احس گلبِي يخفق بسُرعة اضرب علىٰ راسي حتى اوعي نفسي وأهمس الها

- شبيج شبيج هاي رجعتِي لبيَتج ولحيَاتج التفتي علىٰ نفسَج شنو ترديَن منه بعد مو شلعتي گلبه تلگينة فرحان خلص منج يبو عيد عندة .

            

              

                    

كل ما اكعد تجرني امي بالحجي بس بالكوة ابقىٰ مسيطرة علىٰ نفسي ما اعرف شلون تسحب مني الكلام وبعدين انتبه ما اريد اقهرها زيادة ومن احجي بالي مريت بيه افقد واعيش بنفس الموقف والشعور انتهي .. 

وماريد اوصل بالحجي وياها لكل شيء ولا اريد احجي الها علىٰ الاثار الي بجسمِي ولا عن الي شفتة وتعرضت اله والله تموت بأيدي من القهر والتفكير يصير بيَهه شيء اني اخاف عليَها ماا اريد أوصل لهلعُمق خليها بالحجيتة وكافي .

واني ماا اگدر احچي بكل شيء أريد اضم جزء من الي عشتة ماريد احد يعرف بيه خليني ضامتة بگـلبي ومحد يعرفه غيري . 

اتنهَدت فاتحة الكنتور وافكر بعد ما اخلي ام علي تدفع ربع من العلاج لازم اللكي حل سديت الكنتور وگعدت اعصر بعيوني براسي لازم اشتغل لازم اعتمد علىٰ نفسي . 

بس شَلون لازم أطلع وافتر .. زفرت وانِي اهمس لنفسِي 

شلون اذا ماما باب البيَت متخليني أطلع اله تخاف عليه تنرعب اذا اجيب فكرة الطلعة گدامها شلون راح تنحل .

نهضت وطلعت من غرفتِي متجهة للصالة چانت گاعدة وتسَمع باسم الكربلائي علىٰ التلفزيون قصيدة .. 

:- العمرة ماا شايل جروح 

لا يلوم الذي ينَوح .. 

:- إنه ودعت الحسَين 

وعفتَة بس عفتَة مذبَوح . 

تسمع بيها ودموعها علىٰ خدها گعدت يمها مسحت دموعها وبسَت أيدها وحاچيتها بخوف..

:- لا تبچين يروحـي مو زين علىٰ عيونج يمه 

أخذت أيديَة تحسستهم بأيدها ابتسمت من بين دموعها عيني علىٰ وجها وملامحها ياحيلي هذا الوجه ياريت الوجع يندار بيه ولا بيج يمه اتنهدت وگالت..

:- من چنت فاگدتَج يبعد أُميمتَج چنت اسمَعها ليلِي ونهاري وعيونِي ما تنشف من البچي اگول انا الفگدتج وهيج تعبت زينب الفگدت اهلها كلهم شنو من تعب مر بيها جبل الصبر زينب شگد حملت وشالت اذية .

-وانتِ گلتيها جبل الصبر الله ينطينا من صبرها ويصبرنا علىٰ بلاء الدنيا 

-ماكو مثل صبرها واذيتها رغم هذا كله چانت حامدة شاكرة وشامخة راسها مرفوع ما نزل يوم اخت البطل عباس مثال للصبر ياريت گدرت اتعلم من قوتها لو شوية بسرعة ضعفت وانهد حيلي . 

-انتِ هم بطلة بعيني فدوه اروح لأسمج يمه مو بيدج الصار . 

هزت راسها متنهدة 

-امل: الحمدلله ربي على كل حال 

صفنت متوترة افكر بيني وبين نفسي ياترىٰ افاتحها بالموضوع واگلها ؟ 

بس اذا گلت مراح تقبل أكيد وراح تنلاص كلش عليه 

بقيت محتارة بيَن ناريَن بس لخاطرعلاجها وصحتها اسوي كل شيء اريد اجمع فلوس حتىٰ اخذها لاحسن الدكاترة علمَود اعالج عيونها ورجليها وارجعلها عافيتها . 

ان شاء الله ماكو شِيء خلص خلصَت فترة وعدت ابقى عايشة بخوف طول عمري خلص الله وياي .. جبت اليوم كله أفكر شَلون أطلع ادور علىٰ شغل واجمع فلوس وراتب وشلون أدبر طلعتِي فكرت هَواية وما لگيت غيَر هذا الحل مشىٰ اليوم خليت راسي علىٰ المخدة غمضت عيونِي بتَعب واتنهدت ماكو غير هذا الحل بعد. 

الِي اني نفسِي ما مقتنعة بيَه بس غصباً عنِي لازم اجمع فلوس واعالج امي وما نبقى جوة منية احد .. ميصير شيء ميصير الله وياي 

بقيت اردد بهالكلام لحد ماغفيت..