رواية قيود العوف الفصل السابع والعشرون بقلم ريتا
طلعت امشي بخطوات ثقيلة مكسورة اجر بروحي جر بالمشية وعيني علىٰ الارض ومدمعة
كُل الي چان يدور براسي هو نهايتة كلمة ليش؟
ليش سوت هيچي شنو غايتها وشنو الي تريدة ليش اذت مَاما بهلشكل
اخذت نفس رفعت صدري بيه من قوتة عصرت أيدي بتوتر ووگفت اباوع للعلاگة الي بأيدي والأشرطة بي بيها الي ضاعفت مناعة امي والي زادت مرضها وتعبها
واگفة بالشارع وعيني متركزة عليها وما منتبهة للي حولي كُل فكر ضاع مني ماحسيت عليه الا لازمني من أكتافي ويهز بيَه حيل ومصدوم من وضعي وخايف عليه
باوعت اله بخيبة وعيون الدموع ماليتها فتح عيونة علىٰ وسعهن أسمعة يحچي وياي بس بالي مو يمة وبعدني مصدومة ومامستوعبة عدل
لزمني من ايدي واخذني يمشي بيَه وخطواتي بطيئة چانت وهو وياي يمشِي علىٰ خطواتي صعدني بالسيارة وسد الباب وصعد يمي طفة السيارة
واني گاعدة وعيني ليگدام بعدني بصدمتِي ومحتارة بأمري فزيت من ذب قطرات مي علىٰ وجهي رجع فتح البطل وترس أيده مي وغسل وجهي بيَه
باوعت بعيونة وانترست عيونِي دموع زم شفتة وگال
-عوف: شنو صار من دخلتي الصيدلية شنو هذا وضعج ؟
اتنهدت ونزلت عيونِي وسكتت
-عوف: مو اسولف وياج ؟!!
-جُمان: شنو احچي وشنو اگول
-عوف: ترىٰ انه ماا اقتنعت بسالفة الشغلات الخاصة وحسيت اكو بربورة بس احتراماً لطلبج ما نزلت وراج
-جُمان: ههههههه تخيل المرأة الي عايفة امي يمها ومأمنتها عليها طلعت تمرض بأمي !!؟
-عوف: منو هاي ؟
-جُمان: ام علي جارتنا صديقة مَاما الي علىٰ أساس طول فترة غيابي هي چانت يم امي وتداري بيها وتنتبه علىٰ صحتها !!
عقد حواجبة وقلص عيونه بخفة وگال
-عوف: اي شنو طلعت مسوية ام علي ؟
حطيت راسي علىٰ الكشن وحچيت بصوت مخنوگ
-جُمان: تنطي مَاما علاجات غلططط علاجات ميصير صاحب الجلطة ياخذهم يأثرون عليه وعلىٰ صحتة واحتمال كبير هذي العلاجات بسببها متفاقمة وضعيتهة
سمعت صوت طرقات اصابعة رفعت راسي باوعت اله وگال
-عوف: سولفيلي علىٰ ام علاوي خل اشوف شنو وضعهة
-جُمان: شنو اسولف من ياناحية ؟
-عوف: تصرفاتها ، كل واحد يلعب يصير عنده تصرفات مو موزونة ، تلگينة متوتر قلق ويتلبك ، تصرفات رعونية أو ما ملاحظها عليه أحد قبل ، زلة لسان منه بالغلط بس وضحت عند المقابل ، مالاحظتي ولا شيء من هذني عندها ؟
هو يسولف واني صفنت ورجعت بذاكرتي أفكر باوعت اله وگلت
-جُمان: هسة بهاي الفترة كُل تصرفاتها مو طبيعية يوم تجي وعشرة متجي صارت متسأل انقطعت عنه بسُرعة بدون سابق إنذار!!
أشرت اله علىٰ العلاج وگلت اله
-جُمان: هذا مو نفسة العلاج الأول هذا غيرة جابتة الي صار فترة ومنها وانقطعت بس من جابتة گالت الي انطي الها بأنتظام ميصير متنطينها منه !!
-عوف: شلون تخلينهة تجيب علاج امج ؟
-جُمان: حاولت !! بكل طريقة وياها ماكو مچان اكو فايدة
-عوف: شلون يعني ماكوو فاااايدة ؟؟؟؟!
-جُمان: چانت كُل يوم تجي من الصبح وتگعد مَاما وگدامي اشوفها دايرة بالها عليها وتگول هايه اخيتي واخيتي مخلصتهة عليه
وماما ولا مرة شكت الي منها ولا مرة گالت علىٰ تصرف منها مو حلو وياها وحتىٰ الي شفتة اني چانت حبابة حيل مستحيل أحد يفكر انوا يطلع منها هيچ شيء
وكل ماا افتح موضوع العلاج تگُلي اني اجيبه لأن اني متعودة وهي اخيتي ومن الح عليها تگُلي بهذا كلامج يعني مترديني وأسكت لأن اخجل احچي كلمة بعد من اشوفها
تخيييل حتىٰ الاكلة هي تسويها وتجيبها لماما ومن الصبح تجي وصينيتها بأيدها وتگول اني ماا اتريگ اله ويَ اخيتي متعودة
شلون اشك بيَها وهي متاركة عليها أثر ولا غبرة بس انييي المخبلنيييي ليش هيج سوت ليش دتنطي ماما علاج غلط وتأذي بيها !!!!
-عوف: زين شلون حسيتي بموضوع العلاج انتِ ؟
اخذت نفس عميق وزفرتة ورديت
مرة مرتين من چنت أحچي وياها علىٰ العلاج ومتقبل چنت اقتنع بس بعدين گلبي ماا أرتاح اله والعلاج كُله مشخط
من الزم الشريط أسألها ليش هيچي شكلة تگُلي اني اخلي يأشر الي كم مرة باليوم عليه حتىٰ ماا انسىٰ هنا بديت أشك ومن اباوع اله شيء صار يصيحني عليه ومن صارت متجي النا
هنا استغليتها فرصة حتىٰ اثبت شكي شنو ؟ لأن اشوف ماما علىٰ طول تعبانة وتون من جسمها وعظامها يومين ماا انطيتها العلاج
وباليوم الثالث چان ماما تگُلي مرتاحة منه من اخذه يأذيني هنا بعد ماگدرت اسكت عيوني صعدت لراسي جبت سفجنة وصرت امسح بالشريط
ماراح القلم بس خف وگدرت أقرة اسم العلاج لزمني گلبي وشلت العلاگة وطلعت بيها
طلع جگارة ورثها سحب نفس منها اشر باصبعة وگال
-عوف: لاعبتها ام علاوي بس شنو چانت تريد ليش تأذي امچ وتطيحها أكثر
-جُمان: هذا الاريد افتهمة ليششش !!!!
-عوف: عندكم فلوس بالبيت ؟ ذهب شايفتة ؟
باوعت اله بأستغراب وميلت راسي بعدم فهم
-جُمان: ماكو عندنا مصدر للفلوس غير ابوية
-عوف: وراتب ابوچ منو چان يستلمة امچ ماتگدر لا تمشي ولا تشوف منو چان يتصرف بيه ؟
حسيت أحد كفخني علىٰ راسني ووعاني علىٰ نفسي بسُرعة استرجعت موقفها وي أبو الإيجار واتذكرت كلامه جحظت عيوني وباوعت لعوف گلت اله بصدمة
-جُمان: أبو الإيجار !!!!
-عوف: شبي
ميل راسة بأستغراب وفر أيده اليه سولفت اله موقفها وياه وشلون چانت مرتبكة وخايفة
-عوف: عظيم
-جُمان: شنووو ؟؟!
صفگ أيده وگال
-عوف: حاميها حراميها ايا ملعونة السلفة
-جُمان: لاااااااا !!!!!
-عوف: ماكو لا بعد وضحت يامحفوظة السلامة البرب** ام علاوي چانت تقط وتبوگ براتب الوالد المرحوم
بقيت فاكة حلگي وارمش بعدم استعياب احس هنا صرت اخلي النقاط علىٰ الحروف وأشوف الصح من الغلط
-جُمان: صحيح !! تخيل چانت تگُلي علاج امج غالي واني ازيد من فلوسي عليه وهسة من اخذت الاشرطة كُل شريط سعرة الفين وثلاثة !!
-عوف: وبعد ؟
-جُمان: وأبو الإيجار متنطي !! مسواگ تخيل چانت تجيب شيء قليل كُلش بحجة الراتب مديكفي واني چنت اسكت لان علاج أمي عندي فوگ كُل شيء بس ليش چانت تعبن ماما وتساعدها وتمرضها بنفس الوقت !!!
اتنفس بقوة وفتح الجامة شمر الجگارة مسح وجهة وگال
-عوف: وصلت وفهمتها من كل ناحية
-جُمان: فهمني وياك مدافتهم شيء راح اتخبببل !!
-عوف: تساعد امج ودايرة بالها عليها مو لسواد عيونها لا حتىٰ تكسب ثقة امج ماخلت عليها لزمة امج چانت مريضة وحيدة بعدج منو الها ؟ لگتها مثل الغرگان ويچلب بگشاية
كل شخص يريد اله شي من المقابل يداريه يهتم اله يقربه اله يحط روحه بيه لحد ما يا يحسة المقابل لو هو لو ماكو اله ومايفكر بمقدار ذرة هذا الشخص ممكن بيوم يأذيه
خلتها امج تتصرف بالراتب لأن هي ماتگدر بعد وهنا ام علي صارت ثقة وبالدرجة الأولىٰ صارت ام علي تخمط وترجع ليورا
وبالنسبة لأبو الإيجار متعمدة ماتنطي هيه لأن محتارة بالبوگ وچانت حجتها ام البيت مريضة وبالأخير اكو من يتعاطف وي هاي الحالات أستغلت تعاطفة وياها مرة ومرتين
ومن رجعتي گالت الك تحتار بيه هي بعد بنتها ورجعت قابل تخليني انه استلم راتب ابوها ؟ بعد راح تفلس
فاتحة حلگي وعيوني بكلامة وشلون فسر تصرفاتها وحللهن بسُرعة والمشكلة صحيح ! هنا اني تأكدت
-جُمان: بس بقىٰ شيء مُبهم عندي!! ليش چانت تنطي ماما علاج غلط ومو زين ؟
-عوف: سهلة حتىٰ تمرضها بالزايد لأن انتِ من طولتي گالت بعد ماكو الها رجعة وكُل مَا امج وضعها يزيد وتطول مدتها هي المستفادة تبوگ براحتها
اما بالنسبة للعلاج انه اگول هي اصلاً ماتعرف ياعلاج تجيب لذلك غيرته بهذا الي گدامج وترستة الها شخوط بحجة اشخط الي الاوقات
حطيت أيدي علىٰ وجهي بصدمة حرفياً مو مستوعبة
-جُمان: دخلت بيتنا أكلت ويانة صارت الأقرب بالنسبة لأمي والأعز الي تگول طلعت بيها من الدنيا تسوي هيچ !
-عوف: لاگية غريب يغدر ؟ الأقرب الي يغدر
-جُمان: أريد انزل اروح لبيتها اگطعهااااا بأيديييييي اليوم اموووتهاااااا
توني دافتح باب السيارة وما حسيت اله انقفل باوعت اله بعصبية
-جُمان: افتح ألباب ليش قفلتة !!!
باوع الي وگال بهدوء
-عوف: اكره الغباء والتصرف برعونية وبأستعجال
-جُمان: لعد شتريييييدنييي اسووووي بعد الي شفتة وسمعتة ابقىٰ مثل البالعة موس وساكتة !!!
-عوف: لا ياهو گلج صيري هيچ ؟ انتِ تردين تاخذين حق امچ وتردينها تتأدب وترجعين حقكم وفلوسكم هم
-جُمان: متهمني الفلوس الفلوس تروح وتجييي الي يهمني ماما وصحتها الي يهمني العلاجات الي فووتتها لجسمها أريد حق تعبهاااا واذيتها !!
-عوف: وداعة عيونچ ازوعها العافية بس مو بهاي علاگة الادوية الي بأيدج هاي ما تفيد وحدها نگعيها وشربي مايها
باوعت اله بنظرة مطولة وافتهمت شنو يريد وگلت
-جُمان: فحوصات اي فحوصات كاملة وتقرير طبي !!
باوع الي وابتسم وگال
-عوف: عفية عليج تصرفي بذكاء وأخذي حقج وحق حقج وعرفي خطواتج شلون الفحوصات تبين تأثير العلاج الغلط علىٰ صحة أمج وشنو مستوىٰ خطورتة عليها
والتقرير الطبي يثبت هذا الشيء هنا التقرير والادوية الي بأيدج والدليل الي هو محد چان وي غير ام علي كلش كافي وكفيل انوا اشيلها من خوانيگها علىٰ هاي عملتها
اتنهدت بقوة وگلت
-جُمان: حسبيييي الله عليچ يا ام علي مو مرة نقمة وانتقام اسود وگعت علىٰ راسييييي !!
-عوف: دودة هاي هواي المثلها
بقيت ساكتة واطرق بأصابعي بعصبية علىٰ الكشن وگال
-عوف: هسَة الاريدة منچ شغلة
وجهت نظري اله ورديت
-جُمان: شنو هي ؟
-عوف: شيلي الاشرطة هاي فرغيها بس مو كلها بكل شريط خلي حباية لو حبايتين وشمري الي طلعتيه منهن
-جُمان: اي ؟
-عوف: تضمينهن بجنطتج هاي وتنزلين من يمي بدربج لبيت ام علي تسلمين عليها طبيعي اخذيها بالاحضان وحتىٰ كثري بوس وگليلها مشتاقين الج وامي تسأل عنج بيتنا فاهي بدونج ومن هلحچي تعرفينة بعد حچي النسوان
باوعت اله بطرف عيني بعدم رضا
-جُمان: ههه هاي العايزة ؟
-عوف: بعد اذا حاجتك يم الچلب صيحلة چلوب
اتنهدت ورديت عليه
-جُمان: وبعدها اخليها تجي للبيت وراح تسأل عن العلاج دانطي لماما مثل مگالت بأنتظام لولا ؟
-عوف: وتطلعين الها الاشرطة ووجهج طبيعي تحطينهن گدامها وهنا بعد شغلتج
باوعت اله ولويت شفتي وهزيت راسي
-جُمان: وصلتني عوف وصلت
-عوف: يعني HD ؟
اول محچاها ضحكت وفهمت الـ HD شنو يعني رفعت ايدي وسويت حركة الـ اوكي وگلت اله
-جُمان: ههههههههه HD صارت
ابتسم بخفة ونزلت من يمة بعد الإتفاق ألي اتفقنا چانت اكو حاوية نفايات رحت يمها لزمت الاشرطة وفرغتهم وبقيت بكُل شريط حبايتين لو وحدة ضميتهن بجنطتي
اتنهدت وكملت طريقي وصلت يم بيتها ووگفت گدام البيت جريت نفس وغمضت عيونِي والله يصعب عليه اباوع بوجهة بعد كُل الي عرفتة بس لازم أمشي بالإتفاق خطوة بخطوة
طرقت الباب عدة طرقات اول مافتحت الباب انصدمت بيه اني بسُرعة ابتسمت بوجهة وحضنتها وگلت الها
-جُمان: خااااالة ام علووووشيي وين هلغيبة غااااطة
وخرت عن حضنها وهي متلبكة وابتسمت بخفة اليه وعيونها كُل شوي تخطف ليجوة بيتها بقت واگفة واني برة وگالت
-ام علي: حبيبتي خالة تعبانه كلش مد اگدر امر عليكم شلونها امج ؟؟؟
-جُمان: الحمدلله زينة مَاما بأفضل حال ان شاء الله
ابتسمت بتصنع وگالت
-ام علي: اها زين نعمة عساها
-جُمان: بس انتِ مقطوعة اخبارج ومنشوفج صرتي لعد هي هيچ تعوفينا فد مرة مشتاقين الج كُلش البييييت بدونج ابببد مينطااااق
ضحكت وگالت
-ام علي: امر خالة ان شاء الله اليوم أمر الكم مشتاقة لاخيتي طاگ گلبي عليييهاا
-جُمان: اي خالة لتنسين تمرين يلا اني مستعجلة
سلمت عليها ودرت وجهي بقى بالي شبيها ارتبكت هيچ وعيونها كُل شوي تخطف يمين يسار گلت أوصل وادز اله رسالة بهذا الشيء هم
*****
مرت فترة بوجودي هنا اتاقلمت لخاطر الحجية ولو انه احس بخنگة من اباوع بزواية هذا البيت يغمت گلبي ماا احبه ذكرياتة توجع
بس الله سلطني علىٰ غرور حتىٰ انه جاي انصدم من نفسي تحچي حچاية ويَاي اردها بعشرة يمكن جاي اطبق عليها مهنة المحاماة
طلعت من الغرفة مشيت دخلت للمطبخ لگيتها گاعدة علىٰ الطاولة هي وبنتها دلال شافتني فتت وهي گالت
-دلولة طلبييي الي يعجبج ولا تفكرين بالسعر ابوچ يدفع الچ انتِ بس اشري شعندي غيرج انيييي
طلعت بنتها وهي بقت گاعدة موجهة نظرها عليه
باوعت الها بنظرة مُقرفة وگلبت عيوني رحت للبراد فارغ فتحت الثلاجة باوعت بيها مابيها ماي رفعت راسي وصارت بوجهي واگفة
-رغد: شبيج واگفة فوگي چنج شمعة فگر ؟!
-غرور: لچ انتِ متستحين شلون تگُليلي هيچ
ضحكت وغمزت الها
-رغد: علينا غرور انتِ الي تحچين بالمستحىٰ لاتحچين بشيء اكبر منج
-غرور: صدگ من جاك تالي عاگبك شعندج بنص الثلاجة
-رغد: أدور ماي
-غرور: ماكو ماي اذا تردين دزي الج علىٰ سيت گلاصات
-رغد: وادز منو هسة ماتشوفين بس انتِ وبنتج بوجهي محد موجود انطيني ماي خل اشرب هسة
-غرور: منيلي هنة كم گلاص عندي اشرب بيهن بعد الدكتورة تگول كثري ماي زين للبشرة وتعرفين اني شگد معتنية ببشرتي وكُله اسويلة نظارة وتفتيح
عقچت وجهي وباوعت الها
-رغد: وهذا گلبج الأسود الدكتورة ماتسويلة نظارة وتفتيح
رفعت حاجبها وگالت
-غرور: ليش اني اكو اطيب من گلبي والدليل مگعدتج ببيتي ومنطيتج أكبر غرفة بيه من بعد غرفتي
طگيتها بضحكة وگلت الها
-رغد: بيتج ؟ ههههههههههههههه اگلج ترىٰ هذا بيتي انه وأخواني مثل ماهو بيتج يعني وحتىٰ حصصنا بيه أكثر ؟ شبيچ ماكلة روحج وتصيحين بيتي !!
رفعت أيدها بعدم رضا وگالت
-غرور: والله خبصتينا بأخوانج انتِ كل حچاية وگلتي أخواني منو همة اخوانج
اتقربت منها ورديت عليها
-رغد: يكفي مخلينج تحسبين للكلمة الف حساب قبل ماتگولينها گدامهم
-غرور: اني غرور ماا أحسب حساب لأحد غير نفسي
-رغد: ول يرحم والديج دنطيني ماي وفكيني
-غرور: اكلج ماعندي بس گلاصين واني بسرعة اعطش
-رغد: هسة انتِ شنو فرقج عن الكافر ؟
جحظت عيونها عليه وزمت شفتها الي صايرة من فوگ ومن جوة چنها تايرات شفل
باوعت الها وانه اعرف غرور تفضل الواحد يذبحها ولا يعيب علىٰ شيء تسوي ضحكت بداخلي وفتحت عيوني بتصنع بوجهة وگلت الها
-رغد: لج غرور شنو هايي شفايفج !!
لزمتهن بأيدها وگالت بخوف
-غرور: شبيهن
-رغد: غرور الفلر متكتل بيهن باعي مورمات وصايرات زرگ موحلوات !!
-غرور: ييييمااا اعوذ بالله فال الله ولا فالج حتىٰ ماا احس بوجع
-رغد: دروحي باوعي الهن بالمراية صايرات شكبرهن موحلوات علىٰ وجهج ابددد
دارت وجهة بخوف علىٰ المراية الي موجودة بالمطبخ وصارت تتلمس بيهن وتباوع الهن
-رغد: ديلة شسويتي بروحج انتِ
-غرور: ولج شبيهن كل شيء مابيهن لا فلر متكتل ولا شيء متعرفين انتِ وين تعرفين لهاي الاشياء مو اختصاصج انتِ مو اختصاصج محاماة !!؟
نزلت عيوني علىٰ الارض ومسحت برجلية بخفة وهمست بيني وبين نفسي
-رغد: لا انه اختصاصي اسودنج
-غرور: شنو گلتييي ؟
رفعت ايدي وگلت الها
-رغد: اگول بكيفج غرور بس مخربات شكلج كلش كلش
بقت تباوع لنفسها ومحتارة ضحكت وطلعت بسُرعة ركضت لغرفتها فتحتها لگيت سيتات الماي شيء فوگ شيء
-رغد: ياحقيرة يا نذلة يا غرور طول عمرج تبقين عار متصير الچ چارة هو ذيل الچلب ماا ينعدل
اخذت الي سيت ومشيت بيه للغرفة فتت لگيت الحجية توهة طالعة من الحمام وتنشف بشعرها الاحمر
-رغد: يمه فدوة للشعرات الحمر
ضحكت وگالت
-جميلة: رغيدة ولچ عجنيلي حنايات خليني احطهن فروة راسي توجعني
-رغد: چا مو تدللين بس شعرج راح يعبر لون الاحمر هسة هو حتىٰ گلب برتقالي من كثر الحنة الي تحطينها شو كل يومين وحطيتي
واگفة واسولف وما احسها اله هفتني بالمشط
-رغد: ااااخ
-جميلة: وعلا چا تضحكين علىٰ شعراتي
-رغد: شنو جاي انطي رأيي ماكو رأي بهلبيت كلها متعارضة وي الاراء
-جميلة: شمريلي المشط يابعد امج خلي امشط شعري
-رغد: چا المن شمرتي عليه
شمرت الها المشط وگالت
-جميلة: ماشفتي اخوتج وين صاروا ماطلع شغل عندهم ببغداد يمة ماتهنوا بإجازتهم نزلوا منا راحوا منا ماشفتهم
-رغد: خابرت قاسم گال بالطريق
-جميلة: الله يوصلهم بالسلامة بعد عيني وليداتي
نكست نظري عنها واتنهدت ورجعت صفنت من الصبح أفكر بهذا الموضوع وساعة اگول اي وساعة اگول لا ومحتارة
رحت گعدت علىٰ الچرباية وزميت شفتي بحيرة وماا أعرف هاي الخطوة إذا متأكدة منها لولا
بس بيه جانب كلش مُصر عليها ولازم اخطيها لازم
انتظرت قاسم يجي وافاتحة بالموضوع ....
******
الصيف اخ يالصيف عدوي عندي أستعداد اخلص عمري كُله بالشتا والكسل كاتلني ولا يوم واحد بالصيف
ونهار الصيف شطولة واني لا شغلة ولا عملة صرت نايمة بغرفة جُمان علىٰ بطني واتگلب من الحر روحي ذايبة احس نص بيه غافي ونص صاحي
دگ موبايلي وصوتة عالي زفرت وشلتة مشفت منو المتصل رديت
-منار: هاا
-ام منار: ها يمه شلونج
فزيت وگعدت من سمعت صوت امي مسحت وجهي ورديت عليها بلهفة
-منار: ماما حبيبتي شلونج
-ام منار: بعد امج وينج انتِ
-منار: ماكو كهرررباء مَاما تجي دقائق وترجع تطفىٰ
حسيتها متلبكة ومترددة بكلامها عقدت حاجبِي بأستغراب وگلت الها
-منار: شكو ماما شو داحس عندچ حچي مدتحچينة ؟
اتنهدت وگالت بخفة
-ام منار: منو يمچ ؟
-منار: محد ماما بس اني جُمان وخالة أمل بالصالة !؟
-ام منار: مَاما اريد اگُلج شيء بس ماا أريد أحد يعرف بيه غيرچ
-منار: ماما احچييي شكووو خوفتينييي !!!!
-ام منار: يمه علاوي خابرنيي
-منار: شنووووووو
-ام منار: نصييي صوتچ ولچ لحد يسمعج ويعرف !
-منار: شلون ماما وينه هووو زين وين بااقي ؟؟!!
اخذت نفس وگالت
-ام منار: بخير ماما هو وحيدوري اثنينهم بخير مو ببغداد مسافرين وحتىٰ اني مااقبل يگول الي وين بس خابرني ديطمني
اخذت نفس برااااحة
-منار: شلونهم شلون عايشين لعد
-ام منار: سودة عليه حال الضيم حالة وديشتغلون عمالة هو وحيدوري حتىٰ يدبرون امورهم
غمضت عيوني وگلت الها بغصة
-منار: وأبوية.. ميعرفون وينة ؟
-ام منار: لا ميعرفون مكانة وين لتخافين علىٰ ابوج الي يقتل ثلث أرواح ويشرد بدون وميأنبة ضميرة عليهم لو علىٰ الي خلاهم بهاي المصيبة يعيش يعيش لتخافين
عصرت عيوني بوجع ودمعت جاوبتها
-منار: ماا أعرف رغم كُل شيء سواه مَاما بس ماا اگدر احچي عليه تحز بخاطري حيل انهضم ..
بقت ساكتة واسمع تنهيداتها العالية توصلني أعرفها متأذية ومهضومة مثلي وأكثر ..
-منار: گلتي اله علىٰ الي صار
-ام منار: گلت اله بكُل شيء ووصيتة ميجي وميوصل لبغداد ويشوفون الهم مكان يعيشون بيه لحد متخلص المصيبة وتبرد السالفة ماا أعرف بعد سنة سنتين ثلاثة بس شددت عليهم ميجون
-منار: ديري بالج لزمي موبايلج دائماً وغيري اسمه ليتصل عليج وتشوفة وحدة وتسوي النة مصيبة حسبي حساب مَاما
بقيت احچي وياها شوي وسديتة احس شيء چان علىٰ گلبي وانزاح ارتاحيت من عرفت أخواني بخير وبالأكثر ارتاحيت لأن حسيت ماما ارتاح گلبها عليهم
طلعت من الغرفة ورحت گعدت يمهم
-جُمان: بس أريد افتهم شلون تنامين بالحر والدبگ هذا
-منار: مانمت تگلبت وما گدرت انام خليت وگمت
-امل: حارة موت بس أريد افتهم شعندهم وي الكهرباء ؟
-منار: ماعندهم شي خالة بس وزارة عافطة
-جُمان: هسة مال ليدي مجررررش الله يسلم علىٰ الگلب
-منار: گومي نشتري من المحلات
-امل: لااا محد تطلع اگعدن
اندگ الباب بقوة وگالت جُمان
-جُمان: طبعاً هذا الباب اذا ماا أخلي جرس يتكسر لأن كل يوم واحد دافرة تحسينهم يتعاركون وياه مو يدگون بيه
دتسولف ورجع اندگ حييل هم جحظت عيوني وباوعت الها بخوف
-منار: هذول بس لا عمامييي !!
عقدت حاجبها وطبگت شفايفها وطفرت بسرعة للباب واني گاعدة بقلق علىٰ اي ثانية انتظر واحد من عمامي يفوت من هلباب
صرت أخاف منهم يجيبون الي مصيبة جديدة لو يطلعولي بشيء جديد أبد ماصرت أمن بيهم
ثبتت عيوني علىٰ بالب الصالة واتنفست براحة من شفتها ام علي جاية تهف بعبايتها
-منار: ادري خالة جاية تعاركين مو وگعتي گلوبنا
ضحكت وراحت سلمت علىٰ خالة أمل وخالة سلامها حااار الها حييل تحب ام علي وتعتز بيها وتفتقدها من تغيب
*******
من دخلت لحد ما گعدت واني عيني منشالت منها عيني تتحرك وي كُل حركة منها وامي سألتها عن سبب غيابهة هلفترة وهي گالت
-ام علي: تعبانة ياخيتي وماا اجيت مريضة وگاعدة ببيتي اليوم يلا صرت أحسن
باوعت للعلاج الي خليتة گدامها بالگاع چنت أعرف راح تجي خليته بهذا المكان اخذت العلاگة فتحتها وگالت
-ام علي: عفية بجمونة جاي تنطينهة علاجها علىٰ الوقت
باوعت الها وجاوبت بجمود
-جُمان: ولا غلط علىٰ الوقت بالضبط
-ام علي: عفية عليج هذا مخلص اني اگول لتنطينها منه بعد خيولي العلاجات مو زينة ترة
باوعت لأمي الي گالت الها
-امل: اي والله من أخذ العلاج أتعب وأحس يصير عندي وجع بجسمي من كثرة الأدوية صار كم يوم مرت..
قاطعت امي من راحت تحچيها وگلت
-جُمان: لاا خالة انطيني العلاگة أني اجيبة لازم مينقطع هذا العلاج بالأخير هي مريضة ولازم تستمر حتىٰ لو علىٰ شريط واحد وهو شريط الدهون ضروري لصاحب الجلطة
تلبكت وارتبكت صارت تمتمت بكلامها ولزمت العلاگة جعصتها بأيدها بقوة وگالت
-ام علي: لااا اذا تردين اني ااا اني اجيبة الها اني اعرف منين اجيبة
باوعت الها وهزيت راسي وهنا لو چان باقي عندي ذرة شك بخصوص الكلام الي گاله عوف فـ اختفت لأن تأكدت مية بالمية بعد ماا اختبرتها
تسولف وتضحك وي امي وضمت العلاج جوة عبايتها واني من أشوف ماما هيج تضحك وتسولف وياها وعلىٰ نيتها وطيبتها
گلبييي يفور يفور أريد امووتها صرت اعصر بفكي وأصبر بروحي حتىٰ ماا أخرب الاتفاقية بأي تصرف غلط يبدر مني هسة وساعتها صُدگ اتندم ...
مرت كم ساعة واني ومنار گمنة نحضر بالاكل ونرتب بالمطبخ وبين التنظيف والترتيب خلصتها ماگدرت اگعد يمها هواي ماا اتحملت لحد ماسمعت صوتها وهي تسلم علىٰ امي
طلعت من المطبخ اول مسمعت صوت ألباب انسد رحت لغرفتي لزمت جهازي ودزيت مسج للعوف كتبت اله بيه ردة فعلها وشلون چان شكلها ورة دقائق أتصل بيه
فتحت خط وبقة ساكت واحس يمة خرخشة اوراق زفرت بقوة وگلت اله
-جُمان: كُل كلامك طلع صحيح !! كُله
سمعت صوت طگة الجداحة وگال
-عوف: الدودة ام علاوي
-جُمان: تريد بعد متاخذ ماما العلاج تگُلي كافي بعد لتنطيها !!!؟
-عوف: لأن بعد مايهمها
-جُمان: بعد مااا رادت تمووووت امييي !!!
-عوف: لا هي ماتموت امج لأن هي اذا موتت أمج تنلاص عليها هي چانت تريد حالة امج تنتكس أكثر وأكثر بس ماتريدها تموت لأن يطير الراتب عليها
مسحت وجهي بقوة بأيدي
-جُمان: قهرررتنييييييي راح اتخبببلنييي والله !!
-عوف: احترگ گلبج أم علي
-جُمان: أكو شيء لازم تعرفة
-عوف: غردي ؟
-جُمان: من گلت الي روحي الها مدخلتني جوة بقتني بالباب وتسولف وياي بس أنتبهت علىٰ شغلة چانت تتلفت يمين يسار وبخوف وقلق !!
-عوف: اها يعنِي عندها احد بالبيت ؟
لويت شفتي بعدم معرفة ورديت
-جُمان: ماا أعرف بس شكلها جان غريب !! ويوحي الىٰ انوا اي عندها احد بالبيت متريد احد يشوووفة ؟
-عوف: وهي وحدانية مثل ماگلتي ؟ مطلقة وصار عندها ولد وتوفىٰ وهو طفل
-جُمان: صح ؟
سكت لثواني ورجعت گلت اله
-جُمان: زين هاي الفلوس الي چانت تاخذها وين توديها وهي وحدها !!
-عوف: هنا الحويسة وهي انوا عندها شخص تبوگ بالفلوس وتنطي اله
بقيت ارمش بصدمة احس دارت الدنيا بيه
-جُمان: دختت وصرت ماا اعرف بشنو أفكر كُلهن اجة سوىٰ عليهااا معقووولة !!
-عوف: دختولي عليمن دايخة بيها تروحلج فدوه هاي دودة وانا الادوس عليها لعيونج .
رجع اجاني صووتة وهو يضحك ويگول
-عوف: قاسم الگ** خلي أيدك تشتغل مو حلگك
عقدت حاجبي بأستغراب
-جُمان: قاسم شعليه مو دسولف وياي ؟
-عوف: يابوية بكل ذان سماعة وياچ وسماعة وي قاسم جاي نشتغل علىٰ شيء
بللت شفتي وگلت اله
-جُمان: تمام لعد كمل شغلك وحاچيني عوف
رد عليه بهدوء وگال
-عوف: انتِ هم شغلي
-جُمان: ههههه ألي ورقة يمك لولا ؟؟
ضحك بخفة وگال
-عوف: الج ملفات يمي مو بس ورقة
مافهمت قصدة شنو التفت من ماما صاحت عليه
-جُمان: عوف اني هسة لازم أروح باچر علىٰ موعدنا ؟
-عوف: علىٰ نفس الوقت
-جُمان: تمام انتظرك ..
قبل ماا اسدة اجاني صوتة وگال
-عوف: جُمان لا تضوجين ولا تفكرين وداعة عيونچ كُل واحد أذاج لو حاول يأذيج انه راح أدخل اصابعي بعيونة وأرد حگچ منه أضعاف
اخذت نفس عمييييق براحة وابتسمت لا ارادياً جعصت أصابعي وگلت اله
-جُمان: بيباي عوف
-عوف: ماي عيني
سديت الخط ورحت لماما اخذتها غسلت الها وبدلت الها وسوينا عشا اني ومنار ومرت الساعات ....
حطيت راسي علىٰ المُخدة واخذني التفكير لباچر داخلي مختلط ، توتر ، وقلق ، علىٰ صحة ماما وخايفة شنو راح تكون نتيجة الفترة الطويلة وهي دتاخذ بهاية العلاجات !!
وشعور ثاني بيَه ، راحة ، لأن رب العالمين خلاني اكتشف هذا الشيء وما أبقىٰ مغفلة بشعور ، الثقة .. !!
غفيت بنص تفكيري وماا فزيت الا علىٰ إتصال العوف الي گعدنا اني ومنار وبقيت صافنة واباوع لمنار وهي مقلصة عيونها وتباوع علىٰ الاسم
خزرتها وضربت أيدها بخفة وسديت الاتصال دزلي مسج
-عوف: موخوش بالمواعيد صار الي ربع ساعة گاعد بالسيارة ببابكم
ضحكت بخفة ودزيت اله
-جُمان: ابقىٰ بعد ١٠ دقايق زيادة علىٰ ماا امهد الموضوع لماما وتفوت
طفيت جهازي وگمت
-جُمان: يلاا امووولة يلااا فلفل كافييي نوم ورانا مشوار طويل اليوم
-امل: وين ان شاء الله
-جُمان: هسة تعالي خلي اغسل الج علمود تصحصحين وبعدها اگُلج شنو
شلناها اني ومنار وگعدتها بالكُرسي واخذتها غسلت الها وبدلت الها ورحت اني بدلت هم اخذت منار وگلت الها اريد اخذها للدكتور اراجع بيها بس ماگلت الها غير شيء لحد ماا أتأكد من التحاليل
اخذت ماما وفتحت الباب چانت سيارتة مسافة عن بابنا
وگفت بالباب اباوع هو يشوفني بس اني مداشوف منه شيء من السيارة ثواني وفتح الباب ونزل ثبتت نظري عليه لابس أسود بأسود فتح باب السيارة وتقدم يمشي بخطوات ثقيلة
وجهة نظره الي وابتسم بخفة واجة سلم علىٰ ماما وهي كـ العادة شوي وتاخذة بالأحضان
صعدناها بالسيارة وصعدت يمها غمضت عيوني هذا اليوم الي يثبت حقها وحقي من هاي الانسانة
بس گلبي يدُگ بسُرعة سرت رجفي بجسمِي نتيجة تفكيري بالي راح أعرفة والي راح اسمعة بعد ساعات ...
