رواية كان اخي الفصل السابع والعشرون بقلم مجهول
كعدت عالصياح مال شروق وهيثم طلعت اني وهبه عالسريع باوعت هيثم ماسك شروق من شعرها ويضربها دفرات وخشمها كلو دم
هيثم:-انعل ابوج لابوج بنت الكلب
كامت تعيط وتكول عوفني اني حامل لاتضربني
ماصدكها وبقه يضرب بيها.. كعدت عمه سميه ورحنه نركض علي نسحبها عنو
سميه:-وخرر عنها راح تموتها
هيثم:-لااااتدخللن خلي اموتها.... حقييررة
يضرب ويغلط عليها وهي تصيح
سحبتها عمه سميه منو بالكوة وفوتتها على غرفتها وقفلت الباب
هيثم:-ورب العزة ماتصيريلي مرة بعد اليوم
سميه:-لاتتهور هيثم..شكو شسالفه احجي
كعد عالدرج وايدو ترجف من العصبيه:- هالكلبه جنت شاك بيها ودايما تخابر خالتها وكت اجي تسدو حسيت الها ايد بالشغله
سميه:-ياشغله
طلع من جيبو شغلات مثل الحجر منقوش وورق مكتوب علي شغلات مخربطه .انطاهن لعمتي وكاللها شوفيهن
سميه:ياستارر ياربي شنو هااي
هبه:-شنو هذول
هيثم:- الكلبه تسوي سحر
ملك:-سحرر المن؟
هيثم:-الج
ملك:-شنوووو
سميه:-ياربي دخيلك والله راح انجلط معقوله
هيثم:-ملك حالتج هاي كله من وره السحر...عرفت الشغله مو مرض
ملك:-كل عقلك تحجي....معقوله تكرهني الهالدرجه وتسوي هيج بيه
تعصبت عمه سميه وفاتت عليها عالغرفه ضلت تغلط عليها وتتفل عليها
هيثم:-دقيقه ماتبقى عندي الي تسوي سحر وماتخاف الله كلشي تسوي باجر.....هس اخابر ابوها يجي ياخذها وادزلهم ورقه الطلاق
من سمعت شروق هيج كبل طلعت من الغرفه تتوسل وتكول اني حامل
اتخبل هيثم بالزايد وكام تايضربها اله جلبت بي عمتي
هيثم:- لو تبجين دم متبقين يمي وسالفه حامل ماتعبر عليه امشي ولي ماريد اشوف وووجهج
خابر ابوها وكالو تعال اخذ بنتك
اني بهاي اللحضات مصدومه من كلشي مومستوعبه
بعدين خابر عالشيخ الي اخذني لي عندو اخر مره وكالو لكيت هيج وهيج الشيخ كالو احركهن.راح هيثم حركهن..ورى شويه اجه ابوها وكال شنو السالفه ليش اخذ بنتي خير شصاير
هيثم:-بنتك المصونه تسوي سحر وبيدي لكيته
ابوها تخبل راح عليها كاللها صحيح هيج سويتي ضلت ساكته وكامت تبجي وضربها راشدي..حيل خجل ابوها من عملتها ومايعرف حتى شيحجي...اخذها وراح
طلع هيثم والبيت اجواءوو مكركبه وموطبيعيه مثل الصدمه ورى شوي رجع شايل بيدو بطل مال مي وصاحني
ملك:-هاا
هيثم:-اخذي هذا المي مرقى علي جبتو من الشيخ وشربي منو ورى اذان المغرب يوميه اشربي لاتنسين
اخذتو منو وخليته بالثلاجه...هيثم كل اليوم بس يفتر يروح ويرجع حتى مااكل شي
صارت الدنيا عصر ... شفت عمتي لبست الجبه مالتها
هبه:- وين تاتروحين يووم
سميه:-ام شروق خابرتني كالت تعالي..بس لاتكولن لهيثم بس اشوف شيريدن واجي
هبه:-لاتروحين خلي يولن
سميه:-مالج دخل ماطول عالسريع ارجع
راحت عمتي وبقيت اني وهبه نتفرفر بالبيت منعرف شنسوي صارت الدنيا مغرب جان تفوت عمه سميه
هبه:-هااا شكالن شيريدن
سميه:-يكوولن حامل
ملك:-وانتي صدكتيهن
سميه:-مدري والله مدري البنت تحلف وتكول اني حامل هبه:-لعد اذا حامل ليش ماكالتلنه....
سميه:-بعدنه مومتأكدين وماريد اكول شي لهيثم اله اتأكد باجر اروح بنفسي وياها للطبيب واتأكد مااصدك بحجيهن
هبه:-اي احسن هيج يجوز يجذبن تابس مايطلكها
سميه:-باجر تبين
اخذتنا السوالف جان يفوت هيثم
هيثم:-ملك شربتي المي
ملك:-هااا لا
زج عليه الى جفلت
هيثم:-اااشششكتلج انيييي هااااا روووحي اشررربي بسسررعه
رحت ركض عالثلاجه وكمت اشرب منه
احسس اليوم احسن بعد جسمي يوجعني ومتأثر بس احسن بهوااي يمكن لان حرك السحر
اجه خالي وهيثم حجالو كلشي.. وكالو اريد اطلكها خالي تخبل وكال اني ماقبل بعد تبقه هنان وتسوي هيج
عدة هذا اليوم بالكوة كلو قهر
اجه ثاني يوم وراحت عمتي الضحى عليهم ضلينه ننتضرها ترجع ونتمنى يطلع جذب موحامل...رجعت عمتي ورحنه نركض عليها
سميه:-جيبلي مي متت عطش
رحت عالسريع جبتلها مي
سميه:-ولجن طلعت حامل من صدك
حسيت بأحباط حيل من كالت حامل
هبه:-يبوووووو على هاي السالفه ماتطلع حامل اله هس
والحل شنو هيثم يريد يطلكها
سميه:-وينو هو
ملك:-موهين طالع
سميه:-بس يجي اكلو وهو ينجاز
صارت الدنيا ضهر جان يفوت هيثم
سميه:-وين جنت
هيثم:-رحت بشغله ليش
سميه:-جنت انتضرك تااكلك
هيثم:-شنوو
سميه:-شروق حامل
طكلو صفنه :-منو كالج حامل اخاف صدكتي جذبتها
سميه:-لاماصدكت رحت بنفسي وياها للطبيب وطلعت حامل من صدك
بقه ساكت شوي ماحجه بس وجهو نكلب حيل كام يتنهدد جان يكول:-لو موبس حامل اطلكها اطلكها
وباجر اروح اقدم للمحكه
بقينه اليوم كلو ضايجين وهيثم بس يدخن ..حيل تعب هالفترة من جيهه جنت اني مريضه وشايل همي ومن جيهه طلعت مرتو هي السبب والسحر مالها بعدين تطلع حامل تخربطت الامور حيل علي.....
اجه ثاني يوم وراح تايقدم للمحكمه..رجع تقريبا الضهر
سميه:-هاا شسويت
هيثم:-قدمت دعوة طلاق...وحددو الجلسه اسبوع انوب
مر اسبوع وراحو اثنينهم للمحكمه وراحت عمتي ويه هيثم
اني وهبه جنه فرحانين انو راح يطلكها ماانكر اني جنت حيل متونسه بهذا الشي
رجعو ..هيثم فات لغرفتو كبل وحنه رحنه على عمتي
هبه:-هاا بشرري يوم طلكها موو
سميه:-لا ماطلكها...شروق جابت وياها الفحص مال الحمل والقاضي كال مايصير يطلكها الى تولد لان حامل
هبه:-اوووو هااي شون مانخلص منها كل مانكول خلصنه تطلع شغله
حسيت للمره الثانيه بنفس الاحباط
هبه:-والحل شنوو
سميه:-لازم ينتضر الى ماتولد بعدين يطلكها
اليوم كلو هيثم ماطلع من غرفته ولاشفناه ...الله يعلم بحالو هس شوون
اجت هديل بقت كم يووم وراحت
مرر كم يوم والبيت وضعو هيج سكته وكلها تخابر خواتي والكرايب ويسألون صحيح شروق حامل وصحيح تايطلكها ومدري شنو...
صادفت بيوم سوينه عشه اني وملك دولمه..بس هيثم قليل ياكل
خليتلو بصفحه ورحت خليته يمه ردت اروح جان يمسكني من ايدي قوي
هيثم:- وانتي بعد ماالج حجه اريد اتزوجج فهمتي لولا مااصبر بعد
ملك:-بس بعد ماطلكت شروق
هيثم:- واذا شنو يعني من تولد اطلكها وله تريدين انتضر 9 اشهر ماليه دخل مشكلتج تتزوجيني وغصبا عنج
ضحكت بكلبي
ملك:-شبيك متعصب على كيفك
هيثم:-اي متعصب ....اريد نتزوح بأقرب وقت
هزيت راسي وطلعت من الغرفه...بس فرحانه حيل وكلبي يدك عالسريع
ورى كم يوم خابرتني فرح رديت عليها
فرح:- شونح شخبارج
ملك:-الحمدلله بخير انتي شونج
فرح:-اكلج هذا هيثم مخابر على سالم وكايله اريد ازوج ملك
ملك:-صددك
فرح:-اي والله ليش ماكالج
ملك:-لا...وشكاله سالم
فرح:- سالم جان مستغرب واجه كاللنه وحنه كنالو وافق ماكو احسن من هيثم
ملك:-اي وبعد...
فرح:-كال لازم اخذ رأيي ملك اشوف شتكول مايدري بيج موافقع من زمان ههههه
ملك:- ولج احس كلبي يدك سريع ...كاعد احجي وياها جان يتصل عليه سالم:-سدي سدي ديخابرني سالم
رديت علي وكالي هيج وهيج شنو رأيك.استحيت اكله اي كتله بكيفك
رحت على هيثم:-هاا شومخابر سالم وماكتلي
هيثم:-وعليش اكلج ميحتاج عود تاطلعيلي ميت حجه...كلت للبيت كافي
ملك:-هاا يعني يدرون
هيثم:-اي كتلهم...باجر اروح على اهلج واحجي ويه سالم
ملك:-خووش
ورى يوم راح هيثم على سالم ....واني ضليت احوس وانتضره
انتضرت هيثم يجي ضليت بالحوش كل شوي اباوع بلكي يجي صارت مغرب جان يفوت رحت اركض علي ..
ملك:-هاا شنو صار..باوعلي وجهو ضايج حيل
هيثم:- اخوج مقبل وتعاركت وياه
حسيت ضربه جتني على راسي
ملك:-شنوو ليش مقبل
هيثم:-يكول انت متزوج ومدري شنو..كام يطلعلي حجج
ملك:-لا يمعود كول غيرها
هيثم:-مابينه نصيب شنسوي امرنا لله
ملك:-يعني معقوله هيج استسلمت وتكول مابينه نصيب حاول وياه انوب بلكي يقبل
هيثم:-شنو احاول مبين معارض حيل وبعدين اني شعندي اروح اتوسل بي
معد اكدر دمعت عيوني
هيثم:-شوو باوعي باوعي شنو هاي دمعت عيونج ههههههههه ولج غير اخلي طلقه براسه مايقبل قابل بكيفه اشاقه وياج وافق وافق...اصلا اني رحت من باب الاصول وله غير اخذج غصبا عنه
حسيت دمي رجع كبل بس كالي هيج وكمت ابجي من صحيح
هيثم:-ول يابا ليش تبجين طلعتي تموتين عليه واني مدري هههههه
ملك:-ليش تسوي هيج شكد اكرهك
هيثم:-ههههههه امووت عليج...اي المهم هس اخوج وافق اني راح اتفق وياه على كلشي
ملك:-بس اني ماريد نتزوج اله تخلص هاي السنه مال دراستي
هيثم:-والله ماليه شغل بس تخلص امور الخطوبه ونمسك عقد كبل نتزوج
ملك:-مابقه بس شهر ونص وتخلص السنه...ماريد بالي بالدراسه ونزوج حتى ماافرح
هيثم:-يعني اله تطلعين شغله ماتكدرين ابد..بسيطه انتضر انتضررر واشوف شنو من حجه تطلعين بعد زاد لاوالله مااصبر اشو اله نزوج
ملك:- اهووو عااد شبيك معد تتحمل داكلك شهر ونص بسرعه يخلصن..ضليت اقنع بي ساعه تاقبل
تمت الخطوبه على خير ومسكنه عقد وعدت هاي الفترة وجانت كلشش حلوووة مااكدر اوصفها ... خلصت مدرسه ونجحت الحمدلله
رحت على هيثم وكتله:-بيا غرفه راح نتزوج
هيثم:-بغرفتي نفسه
ملك:-لا ماريد نفسه
هيثم:-ليش
ملك:-ماريدها الخشاب الي بيها مو الي وبصراحع مالي نفس نتزوج بيها
هيثم:-جنت حاس هيج راح تكولين..لعد ابيع الخشاب واشتري خشاب جديد
ملك:- اذا هيج اوك
هيثم:-مثل ماتريدين
..سالم كال تجين يمنه ومن عدنه ياخذج ماتبقين هنا...هيثم كاله من حقك عادي رحت يم اهلي وحددنه يوم الخميس العرس ...
كل شوي يخابرني هيثم تكول مدري وين رحت معد يصبر..اجه يوم الخميس ورحت اني وفرح ومرح للصالون خلصت شغلي كلو ورجعت للبيت بقينه ننتضرهم تأخرو على مااجو..اجو واخذوني وكل الطريق هيثم يتغزل بيه احس حلم وتحقق...وصلنه للبيت احس مشتاكه حيل للبيت..خلص العرس واخذني للغرفه وسد الباب
هيثم:-مشتاكلج مووت وطالعه تخبلين
ماحجيت كلشي بس ارجف عبالك اول مرة اشوف هيثم
هيثم:- شبيج ساكته ماتحجين
ملك:-اي
هيثم:-وجعي شبيج ترجفين
ملك:- خايفه
هيثم:-من شنو
ملك:-منك
هيثم:-ههههه ماكو شي يخوف
اجه تقرب مني
ملك:-عفيه هيثم لااا
هيثم:-شنو لا
ملك:-ماريد اليوم عفيه
هيثم:-شووفي ترى ماتقنعيني بهاي سوالفج..صارلي مدري شكد انتضر اخذج يعني اخذج واليوم هم
ملك:-لعد طفي الضو
هيثم:-اوووك.راح طفى الضوو وصار الي صار
ماجنت متعودة علي بالبدايه من ناحيه الزواج بعدين حيل تعودت علي هو خلاني احبو اكثر واكثر ...جنه ننتضر شروق تولد حتى يطلكها مرر الوقت والشهور وولدت شرووق...بعد ماولدت بشهرين راح للمحكمه بقيت انتضرو حتى يرجع..وكت رجع رحت علي تلكيته
ملك:-ها طلكته
هيثم:-اي
ملك:-الحمدلله
مرر الوكت وجانت عمتي سميه تضل تروح هيه وهيثم يشوفون الولد...بيوم وجنه كاعدين بالحديقه العصر اني وهبه وعمتي..جان يفوت هيثم .باوعتله شايل ولد وياه صغير
رحنه علي
ملك:-منو هذا الحلو
هيثم:-ابني .....فجر
هبه:-يمااه يخبل فديت عمتي انا انطينياه
الولد كلش حلو ويشبه هيثم كلش حبيتو يمكن لان نفس دم هيثم...بقينه نلاعب بي وهو بس يضحك حيل محبوب...ورى فترة سمعنه شروق تزوجت ..هيثم من سمع تزوجت ماقبل يخلي الولد عدهم ويربي احد غريب راح واخذ منهم وجابو يمنه انطانياه
هيثم:-ملك حياتي هذا ابني وهو ابنج انتي تربينو واني مااوصيج علي لان اعرفج ماتقصرين
دمعت عيوني عالولد واخذته منه وحضنت الولد كل قوتي...الله يشهد خليته بعيني واعتبرته ابني وكلش حبيته من بدة يحجي او ماكال كالي ماما ..بعد فترة اني هم صرت حامل وولدت ولد..ربيتهم اثنينهم نفس الشي مافرقت بينهم ابد...اما هيثم صار كلشي الي امي وابوي واخوي وزوجي وحبيبي ماوصفلكم السعادة العيشني بيها...هيثم رجال من صدك واحمد ربي انو صار من نصيبي.....العبرة من القصه هي(الي مكتوب الك تاخذة لو كل المعاناة وبالوقت الصحيح ...يمكن احيانا نختار وقت احنه ونتمنى يصير الشي الي نريدة بهذا الوقت بس الله عزوجل هو يختار الافضل النه...يمكن لو بساعتها موافقه على هيثم يجوز ماجان تقبلته او حبيته كزوج بس يمكن لان تزوج وابتعدنه عن بعض حسينه بقيمت بعض اكثرر) ورساله لكل مرة مزوجه كزوجه ثانيه او عايشين وياها اطفال لضرتها او غيرهم حاولي تعامليهم مثل اطفالج ولاتقسين عليهم ترى هم ضعفاء ولاتكولين امو او ابو سوى هيج وتخلين حركتج بالطفل لا ابد ماكو احسن من التسامح ...رأيكم بالقصه
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
