رواية الندم مابعد الخطيئة الفصل السابع والعشرون بقلم رونق
جان اتفاجئ بصديق الي هو وعائلته وهذا شلون غثه وعيونه زايغه
سلم عليه ولو يطيح بيدي ابوشها لروان محبيت احد يشوفها بهاي الصوره روان بدون عبايه معولت اخلص منه لان جان لزكه يريد يبقى سين وجيم واني روحي بخشمي اعتذرت منه واترخصت
كمت افور دم مشينه لزمتها بايدي ومشيت سريع اتفاجأت بيه
وصلنه لمحل يبيع عبي كتلها يله اختاري ع ذوقج
حسيتها ضاجت بس شاسويلها قابل اني ماعندي وحده باقربائي سافره بدون عبايه
نقناقيه بشكل كوه اقتنعت بوحده معجبتني بس مضطر من ارجع اخلي امي تشتريلها
رحنه زرنه وكملنه هي ضايجه فول واني معصب فول
كلت لازم نكعد ونحجي عن كلشي بلكي نهدئ اثنينه ونوصل لحل
كتلها تعالي خل نكعد بين الحرمين
كعدنه صرنه واحد مقابيل الثاني بس هي عيونها بالكاع
روان اسمعيني اتمنى تفهميني انت هسه زوجتي كدام الناس ومحد يعرف بلي ديصير بيناتنه لازم تلتزمين بلي اطلبه منج
اني مااحب احد يتفرج ع عرضي
بس انت كاعد تجبرني ع شي مااحبه
اني مااجبرج لاجل غايه مو زينه بالعكس اني لصالحج اريد تلبسين عبايه حتى محد يكدر يمسج بحرف
ممكن اسالج سؤال وتجاوبيني عليه بصراحه
اسال
اذا اخلي جكليتين بالكاع مدة يوم كامل وحده بغلافها ووحده بدون غلاف ثاني يوم منو الي راح تختاريها
اكيد الي مغلفه
والسبب
البلا غلاف تلوثت ويجوز حشره اكلت منها
عفيه عليج وهذا الشي نفسه ينطبق ع ام العبايه والسافره
اكيد العبايه تزيد المراه جمال وستر
تدرين طالعه تخبلين بالعبايه
اي اضحك عليه عبالك تقشمرني اكيد الكل يضحك عليه وانت اولهم
ليش نضحك عليج
لان مااعرف امشي بيها ابد ومبهذلتني
اذا هيج بسيطه اتعلمي عليها يوميه تبقين بالبيت وحدج والبسيها بالغرفه واتعلمي عليها
اني مااجي من الصبح لليل ابقى بالمحل وصدفه ارجع الظهر واخذي راحتج
وصدكي عليج تخبل ابد ممبهذلتج اكيد هاي توهمات
زين اني اذا داومت بالكليه شنو فائدتها اذا لبستها بالسياره وانزعها بالجامعه هم الكل راح يشوفني
شوفي راح اخليج بالجامعه تنزعيها بس غير مكان ممنوع لاي مكان ممنوع غير الجامعه
اوك موافقه
هسه ادبريها نفتر شويه بالمحلات لو لا
والله ماادري ممتعوده عليها بس راح احاول بلكي مااوكع
من هسه اكلج اذا وكعتي لااعرفج ولا تعرفيني 😂😂😂 اختفي من يمج
لعد بطلت مااروح خل نرجع للفندق
كومي يابه ابتليت بعد بيج ميفيد التراجع 😂😂😂
كامت لزمت ايدها كالت مو لهالدرجه مراح اوكع
اس ولا نفس
اخذتها كبل لمحل احذيه كتلها اختاري شوز رياضي لان هذا الكعب العالي هو الي راح يوكعج
شلون اطلعين بي
مو نسيت اجيب ويايه حذاء ثاني
يله مو مهم اختاري الي تعجبج
اخذت وحده ناصيه وطلعنه بقينه نفتر وكتلها اي شي يعجبج كولي حتى اخذه الج بس مقبلت تختار اي شي
اشتريت كرزات وحلويات ورجعنه
بالطريق كتلها خل ندخل للمطعم اني جوعان
يله خل ندخل بس اني مااشتهي
هسه خل ندخل والله كريم
كعدنه سالتها اجيبلج كص لو كباب لو تكه
والله مااشتهي ومااكدر اكل بالليل
واذا اكلج ع حسابي مااعرف اكل وحدي
لعد جيبلي لفة كص
اوك طلبت لفتين كص وببسي
اني اراقبها بدون متحس بيه
كوه اكلت نص لفه وعافتها
اني هم شبعت لان اصلا متعشين
رجعنه للفندق دخلت سبحت وطلعت واني هم وراها لان الجو هم بعده حار
بعدها كعدت ع الفيس بس اتصفح مااكدر اشارك لو اعلق
هي مثلي مبين عليها مجايها نوم لان هواي نمنه
بقينه كل واحد بعالمه الخاص لحد منمنه
ثاني يوم كعدنه واتهيأنه ورجعنه
لكيت البنات ومهند وبيت عمي يمنه
شهد اخذتها وصعدتها للغرفه بعد ماسلموا اهلي عليها وباركولها
مسوين غده وعازمين اقربائنا وجماعتي
بيومها بقينه مخبوصين لليل يله فرغ البيت
صعدت يمها لكيتها مبدله ومخليه مكياج الحمد تتصرف طبيعي كدام اهلي
روان : حياتي انكلبت راس ع عقب بعد الزواج
حيل خجلانه من مرتضى بلبسي وبمكياجي وحركتي امامه مااعرف انام وخاصتا بنفس الفراش حيل متوتره وخايفه
بليلة العرس ابد منمت ولا لحضه وحده وثاني يوم يله نمت واستسلمت
لازم اتعود ع الوضع وملازم ابين شي كدام اهلنا
رجعنه للبيت وجان البيت هوسه ناس هواي سلمت ع عمو ابو لمرتضى وامه وجانن اخواته وزوجة اخو واخو كلهم بالبيت سلموا عليه
صعدت لفوك جنت حيل تعبانه كبل سبحت وبدلت فستان وردي قصير وسويت شعري تسريحه بسيطه وخليت ميك اب طلعت بالصاله الي فوك لكيت ناس هواي سلمن عليه
حسيت بنفسي غريبه بينهم اتمنيت تجي ماما حتى اشوفها حيل مشتاقه الها وحتى لبابا
جابو الغده اني خجلانه واحس العيون مراقبتني مكدرت اكل يادوب لكمتين
بقيت للمغرب ع فرد كعده ناس طابه وناس طالعه
اخر شي كلتلي شهد روحي للغرفه ارتاحي
حيل فرحت دخلت وكبل للحمام سبحت وطلعت عدلت نفسي
وره شويه دخل مرتضى طبعا حيل اخجل منه بس مابيدي شي
سد الباب ودخل للحمام سبح وطلع
اني كاعده ع الجربايه وحيل خجلانه
اندك الباب فتحها جايبين العشه
اني حيل جوعانه بس خجلانه حيل
خلاها بالكاع وكلي يله تعالي اتعشي
مااشتهي اكل معليك بيه
روان اروحلج فدوه اتصرفي طبيعي وعوفي المستحه ع جانب انت صرتي منه وبينه المفروض تنسين المستحه
وخل يكون بعلمج لو شيصير من نخلي الاكل تكعدين تاكلين حتلو صدك متشتهين اتمنى متعاندين
سكتت منطقت ولا حرف نزلت كعدت يمه
بدينه ناكل هو ملتهي ياكل ولا كانو كباله واني هم مهتميت اكلت بس المشكله بسرعه شبعت
كوه خلصت منه اكل كلبي
ردت انزل الصينيه مقبل كال ابقي
اخذها الصينيه ونزل هو
اباوع للغرفه حلوه ونازكه موديل تركي
بس المشكله مابيها لا مخده لا فراش لا بطانيه غير بس الي ع الجربايه
اجه مرتضى بقيت شايله هم شلون راح انام مااعرف انام بنفس المكان اني ويا
قفل الباب مااعرف شيصير بيه من بقفل الباب روحي كلها تروح
كمت للكنتور كلت خل الهي نفسي
الملابس كلهن مرتبات مااعرف منو الي مرتبهن
التفتت لكيته فرش اله بالكاع بقيت صافنه هذا منين جابه الفراش ماادري
ردت اساله بس استحيت
يكلب بجهازه ولا يمي
كتله اصعد انت فوك واني انام جوه
لا انت ابقي ومعليج بيه
صعدت ع الجربايه بس الخوف ممتلكني
مااعرف شنو السبب
بعدين كتله اكدر اتصل باهلي
وين المشكله خابريهم اله تاخذين رايي
اخاف ازعجك
لا ماكو ازعاج
اتصلت باهلي واطمانيت عليهم بعدها نمت
كعدت الصبح لكيته بعده نايم
دخلت للحمام وسبحت طلعت لكيته كاعد
صباح الخير
صباح الورد
اجهزلك ملابسك حتى تسبح
اني احضرهن مااريد اتعبج
لا ماكو تعب
فتحت الكنتور بس محتاره شاجهزله مااعرف
هو حس بيه كلي انطيني اي تراك وملابس داخليه
اوك
طلعتله ع ذوقي
دخل للحمام واني جهزت نفسي وخليت ميك اب
طلع من الحمام
كال راح انزل اجيب الريوك واجي
لا ماكو داعي خلي ننزل سويه ونتريك جوه
اوك يله خل ننزل
نزلنه جوه ماكو احد بس عمو وخاله
سلمنه عليهم
رادت خاله تسوي ريوك مقبلت كتلها خاله اني اسوي النه والكم
كالت متريكين احنه معليكم بينه
سالت مرتضى شتحب تتريك
اي شي مو مهم
سويت بيض عيون واكو جاي حميته
هو طلع كيمر وعسل وجبن
اني مااحب البيض صدفه اكله
اكلت كيمر وعسل وهو اكل البيض
خاله تجهز بالغده
كملنه وغسلنه
اني رتبت المطبخ والمواعين صايره هوسه
كالت خاله عوفي معليج بي واصعدي وي زوجج
لا خاله ماعندي شي
مرتضى راح هو عمو للصاله
بقيت ارتب بالمطبخ لمن اذن الاذان رحت صليت ورجعت كملت خاله صبت غده الها ولعمو اني ومرتضى منشتهي
بقيت ارتب بالمطبخ لمن صارت ب3 كملته
صعدت للغرفه لكيت مرتضى نايم
دخلت للحمام سبحت وطلعت رتبت نفسي هم اتمددت
حيل نعست بس مااكدر انام اخاف يكعد مرتضى
لحضات وكعد
كملتي المطبخ
اي كملت اصب الغده
ياريت لان حيل جوعان
نزلت حميت الاكل وصبيت
نزل مرتضى واتغدينه اني بعدني اخجل منه
كوه اكلت شكم لكمه
بعدها اجوي خطار واجوي اهلي
بعدها خلص اسبوع وخلصت الهوسه وعلاقتي بي مرتضى عاديه
بعدها فتحت موضوع الكليه كلي عادي داومي واني اخذج وارجعج
بديت بتنظيف البيت شي شي رتبته كله وخليته يلمع
مرتضى كام يروح للشغل مرات يرجع الظهر ومرات لا
بالليل يرجع بوقت متاخر
يوميه انتظره ع مود العشه واجهزله ملابسه
بس هو اغلب الاوقات يجي متعشي
مشكلتي كلشي مااعرف اطبخ بس انظف وكاعد استحي من خاله
بده الدوام سجلت خط احسن وافق هو
اكعد الصبح هو نايم اعوفه اسوي ريوك لعمو وخاله وارتب البيت واروح من ارجع الكي خاله متغديه وغاسله المواعين
مرتضى مرات يجي ومرات لا
علاقتنه طبيعيه ماكو شي
هو يجي متاخر وكبل يسبح وينام
اني التهيت بدراستي من اجه الشتاء كمت مااشوفه مرتضى اله صدفه
اكعد الصبح هو نايم والظهر ميرجع وبالليل اغلب المرات يراسلني ويكلي لتنتظرين نامي وفعلا مااقاوم ابقى لان اكعد من وكت
اغلب الايام منلتقي بس الجمعه والسبت
وكل اسبوع تقريبا يدزني لاهلي وره الغده وارجع بالليل
وشهد هم تجي بس مو دائما وابد معاجبتني لان دراستها تركتها واحسها تضحك جذب دائما اسالها وحاولت اعرف البيها بس بدون جدوى دائما تكول مبيه شي
من تزوجنه لليوم لااني بتت يم اهلي ولاشهد باتت يم اهلها
شهد حامل حاليا بشهرالسادس
اجت نصف السنه وبلشت بالامتحانات وابد مرحت لاهلي لان يادوب اكدر اقره وانظف
اليوم صادف جمعه ومرتضى كاعد سويت حمله ع المطبخ رغم عندي امتحانات بس مااكدر اترك البيت لان مترهم هم مااطبخ وهم ماانظف
اجه للمطبخ وطلب اسويله ريوك بيض سلك
خليت البيض ع النار لحضات وانفجرن هو كاعد بالمطبخ
ذبيتهن وخليت غيرهن كال رايح للحديقه من تكملين صيحيني
نسيت نفسي بالتنظيف ونسيت البيض همين 😂😂
لمن احتركن 🤦🏼♀️🤦🏼♀️🤦🏼♀️ اليوم الحظ مكاعد ويايه معاكسني
ذبيتهن وخليت غيرهن بهالاثناء دخل عليه خجلت منه والله عيب شيكول عليه هسه
كال ها الباجه مكملت سكتت مااعرف شاكول هو عرف السالفه
كعد يمي هالمره بقيت حذره وكبالهن شويه ونزلتهن جهزت الريوك اله وحميت صمونه بس تفاجات من ردت اقطع البيض لكيتهن نص ستاوو يبووو عليه وع حضي اليوم
هو ضحك كال بعد مااريد بيض لتسوين غيرهن اخاف يخلص البيض ويصير الظهر والريوك ماكو
جيبيلي جبن قشطه اي شي
والله حيل خجلت واتمنيت اختفي من الوجود
طلعتله وهو عادي ولاكانو اكل وكام
اجتي خاله وطبخت الغده واني استمريت بالتنظيف حيل تعبت وورايه دراسه بس مو مهم
صار وقت الغده جهزت وي خاله كعدوا كلهم اليوم ابد ماطلع مرتضى مااعرف لويش
الكل كعد ع الغده اني مااشتهيت ابد لان تعبت وبعدني ممكمله
الكل كام يحجي عليه بس اني اصريت مااكل
كملوا اني اتكلفت كلشي الكل راح لغرفته بقيت اني بوحدي
شويه واجه مرتضى كلي كافي روحي اتغدي و اصعدي اقري
خلي اكمل شغلي والله كريم
واني اكلج كافي خلي شغلج للعطله
والله مبقالي شي حكمل واصعد
الج مهله نص ساعه مو اكثر افتهمتي لو اعيد
اوك حكمل
كملت ع السريع وصعدت سبحت وجففت شعري لان حيأذن ومرتضى مطالع ابد ردت اساله وكلت اخاف عيب منه وياخذها بغير شي
جففت شعري وكملت اذن وصليت حسيت بجوع
سالت مرتضى شتحب تتعشه
ضحك كال لا دخيلج خلي امي تسوي العشه انت ابقي اقره احسن
عرفت قصده شنو بداخلي حيل ضجت مو منه لا من نفسي لان كلشي مااعرف
نزلت يم خاله لكيت عمو رايح يجيب عشه جاهز
كالت خاله حيجون مهند هو وزوجته
شنو نجهز للعشه غير الجاهز
كلشي ماكو عمج راج يجيب اكل كافي
اجوي ونزل مرتضى وبدينه نجهز بالعشه اتعشوا وبقوا متاخرين يله راحوا نظفت المطبخ وصعدت لحد الان مقاريه شي
حجيت وي مرتضى كتله حروح بغرفة شهد حتى ابقى اقره
لا ابقي هنا عادي ماعندي مشكله
مواريد افتح الضوه ع مود اقره
ميهم هو اني اصلا منعسان
ميخالف مااحب ازعجك خليك ع راحتك
روان تعرفين اكثر شي يضوجني شنو
من احجي والمقابل يعاندني مااحب اعيد الكلام مرتين
الصراحه ضجت منه من حجه هيج يعني شنو اعانده وهو اصلا مااله حق يجبرني ع اي شي مااحب اسوي
هو بقه ع الموبايل يتصفح مااعرف يلعب بلعبه واني اقره
بقيت ل3 تقريبا كملت نمت بس هو بعده كاعد
ثاني يوم رحت للدوام امتحنت وكملت ورجعت اتفاجات بمرتضى هم مرايح للمحل استغربت من هذا الشي
سلمت ودخلت للحمام بدلت وطلعت
لازم احجي ويا وافهم الموضوع
كعدت بصفه وسالته
مرتضى لويش صارلك يومين مرايح للمحل
تعبان وماالي واهس للشغل
بيك شي مريض لو هيج
لامببه شي بس تعبان شويه
زين سيارتك وين اشومموجده صارلها يومين
بالتصليح عاطله
اتغديت لو بعدك
بعدني منتظرج
اروح اجهز الغده لعد انزل ورايه
جيبي هنا بدون زحمه عليج
تمام
عمو وخاله لكيتهم متغدين ونايمين اعتقد
جهزت الصينيه وصعدت كعدنه نتغده هو ذابها ع الصامت واني همين
كملنه اني نزلت غسلت المواعين ورتبت المطبخ وسويتلي شكم شغله وصعدت لكيته نايم اني رغم منعسانه بس كلت خلي اقره هسه حتى بالليل انام من وقت
كعدت اقره وهو نايم بس جهازه مخلي هزاز وكل شويه يدك مااعرف اكعده لو لا بقيت متردده اخر شي كلت خلي اكعده
مرتضى مرتضى
جان نومه شويه ثكيل
بقيت الح عليه كعد
اسفه كعدتك بس جهازك يدك وحيل لح عليك
هو وجها انخطف لونه
ليش ماكعدتيني من البدايه
هو صارلي ساعه اكعد بيك وماكو
اخذ الجهاز وطلع بره يحجي استغربت منه
طول نص ساعه يله رجع للغرفه وجان وضعه مو طبيعي ابد
ها مرتضى خيرك اكو شي
ها لا ماكو شي
منو اتصل بيك ولويش وجهك مخطوف لونه
ماكوًشي
بس وجهك مو طبيعي
لتلحين روان ماكو شي انسي الموضوع
حيل قلقت عليه لان وضعه مو طبيعي ابد
بدل وطلع
سيارته صارلها يمكن يومين ماكو مااعرف وين مااعتقد بالتصليح مثل ماكال
حاولت انسى الموضوع
كملت دراستي ونزلت جوه نظفت شويه واذن
صليت ورجعت للمطبخ
عمو سالني رجلج ليش مكاعد يطلع للمحل وسيارته وين
والله عمو ماادري سالته كال ماالي خلك
وينه هسه روحي صيحي خل احجي وياه
طلع مو بالبيت
وين راح
والله ماادري يجوز للمحل
راح اتصل بي
اتصل عمو بس ميجاوب ابد
وره شويه رجع بس وضعه ابد ميطمن
السلام عليكم
الكل وعليكم السلام
وين جنت وليش متجاوب
صديقي مريض ورحتله للمستشفى
زين شعندك متروح للمحل صارلك يومين
ها ماكو شي بس ماالي خلك والله
اكو شي ابني احجي
ها لا ماكو شي
وسيارتك شنو فلمها
عاطله وبالتصليح
شنو عاطله هيج فجاه عطلت
اي والله يابه
اكلك يابه باجر راح اسافر وي صديقي لاربيل
شنو تسافر وشعندك
مريض خطيه وماعنده احد
اتفاجأنه بالخبر بس محد حجه شي
كلبي حاسني اكو شي بس شنو مااعرفه
جهزت العشه الهم طبعا اني مااشتهيت ابد
مرتضى هم مااكل كال مااشتهي
بعدين كلي اذا تردين جهزي نفسج ادزج لاهلج ابقي شكم يوم ودزوا شهد هنا خلي تبقى يم اهلي
الصراحه انصدمت من قراره هذا صحيح اتمنى اروح يم اهلي واتمنى ابقى بس عيب من خاله وعمو شلون هيج اعوفهم هسه يكولون ع حساب زوجها باقيه يمنه
كتله لا مااروح ابقى هنا
هو مثل الي اتفاجئ
عمو كال بنتي روحي لاهلج معليج بينه وهاي فرصه الج تبقين يم اهلج
وبالنسبه لشهد مو اله تجي ماعدنه شي اني وخالتج
لاعمو ابقى يمكم افضل
مرتضى كال لتعاندين روحي جهزي نفسج وتعالي اخاف اني اطول
عمو كال عمو روحي لان اصلا اني وخالتج نريد ناخذ راحتنه وحدنه نبقى ويضحك
اصروا عليه رحت جهزت نفسي واني دايخه الصراحه
كتله شاخلي بالجنطه مالتك كلي معليج اني اجهزها
رحت لاهلي ماقبل مرتضى يدخل كال ماالحك اريد اجهز جنطتي
دخلت لاهلي والكل اتفاجئ لان جنطتي بيدي
الكل بده يسال كتلهم ماكو شي والله بس مرتضى يريد يسافر وكلي ابقي هنا
التفتت ع شهد كتلها باجر اذا تكدرين روحي يم عمو وخاله ابقى شكم يوم
جان يفاجئنه عمار لا متروح اكسر رجلها اذا فكرت تروح
هي سكتت بس ضاجت اني اتفاجات بتصرف عمار المفروض ميخجلها كدامنه بهاي الطريقه
شفت شهد عايشه بغير عالم ولاكانو ويانه وعمار ولا بحالها وبس يضحك ويسولف وي اسيل وممعبر شهد ابد
كلت اليوم انام وي شهد واحجي وياها وافهم الفلم شنو
بقينه كاعدين ونسولف لوقت متاخر
كتلها شهد اليوم انام يمج احسبي حسابج
كالت ياريت والله مشتاقه لسوالفنه هواي
عمار ولا كانو التفتت عليه ها عمار خو ماعندك مانع
لا وع شنو مانع اصلا تسوين جميل عليه ويضحك
شهد وجها ميتفسر وحيل ضايجه
عافتنه وصعدت
عمار شنو سالفتك وي شهد اشو احسك مو طبيعي
ماكو شي اصلا شنو حاجيه وياج شي
لا والله ابد بس احسك مو طبيعي
جان تكول اسيل خلي تولي هاي ام الرجوله ولا تكعد راحه
شنو هذا الحجي اسيل مو عيب هيج تكولين ساعه وسمعتج
واذا سمعت شنو مجذبه قابل
عمار ولا حجه حرف
ماما كامت تحجي عليهم كالت مو عيب هيج تحجين وانت عمار هاي مو نفسها الي كلبت الدنيا ع مودها وسويت الي مصاير
قابل شنو الي مسوي الها اشو طبكتن عليه اثنينجن
خل اروح انام افضل
صعدوا وبقينه اني وماما
شنو الفلم ماما لويش هيج وي شهد
والله ماما مااعرف اي شي ودائما يصيح عليها ويفشلها كدام بيت جدج واني احجي عليه بس بدون فايده
زين لويش متجي لاهلها خطيه دائما يسالون عنها
والله ماما مااعرف لويش من اسالها تكول مااكدر اروح
مو طبيعين ابد اليوم احجي وياها وافهم الفلم كامل
اي والله ياريت يوم
راح اصعد انام لان باجر ورايه دوام
منو الياخذج ويجيبج
السايق مرتضى خابره واتفق وياه بس ميندلنه لازم اروح وحدي كلي لبابا اروح ويا يوصلني بطريقه وارجع وي السايق حتى يندلنه
اني اكله ان شاء الله روحي نامي والله كريم
صعدت لكيت شهد بغرفتي
بدلت ملابسي وكتلها تعالي سولفيلي كلشي بالتفصيل شنو علاقتج بعمار
عوفج مني بالبدايه انت سولفيلي عنج انت ومرتضى وباجر الدور عليه
والله ياشهد علاقتنه ك اخوه مابيناتنه اي شي
ليش محاولتوا تتقربون لبعض
بالنسبه الي مااكدر. وهو هم اكيد مايكدر
شنو السبب ياعيني
والله مااعرف السبب كل الي اعرفه اني ويا مستحيل نتقرب لبعض
لج والله مرتضى حباب وطيب كلب مو لان اخوي احجي هيج
مو مهم هذا الحجي
اريد اكلج شي كلبي لاعب واحس اكو شي صاير ومرتضى ميريد يحجي
حجيتلها ع وضعه المرتضى
كالت ان شاء الله ماكو شي انت يتهيالج
الله يسمع منج
بقينه نحجي بهواي مواضيع وبعدها نمنه
ثاني يوم رحت للكليه وامتحنت ورجعت
حاولت اتصل بمرتضى بس جهازه مغلق
حبيت اطمان عليه بس حرامات مغلق
اتغديت وصعدت اقره لكيت شهد بغرفتها يمكن نايمه
حاولت اركز واقره بس مكدرت بالي مشوش
عفت كلشي ورحت نمت كعدت لكيت الاذان ماذن ومخلص والدنيا ليل
كبل فتحت جهازي عبالي الگي رساله او مخابره من مرتضى بس للاسف كلشي ماكو
غسلت واتوضيت وصليت ونزلت جوه يم اهلي
لكيت شهد خطيه مخبوصه بالعشه لان بيت جدو كلهم يمنه وذيج الحيه مدري وين مختفيه هاي شهد تعبانه خطيه حامل وكوه تكدر تشتغل اني متعجبه شلون عماريشوفها هيج وساكت
بقيت احجي كلت لماما ميصير هيج العروس مكملت السبعه مالتها حتى تنزل تشتغل
يوم فدوه اروحلج اسكتي مابيه حيل مشاكل كدام بيت خالج عيب منهم خلي يطلعون والله كريم لان كل مايجون لازم تصير طلابه وعركه
وخرت شهد من الطباخ وهاي ثوله متقبل ابد كوه كعدت خليتها تسوي زلاطه
اجتي زوجة كرارتساعدنه طبعا بسيطه وحبابه بشكل
غيرنه جو حتى شهد حسيتها انسانه ثانيه اليوم لازم افهم الفلم منها كلها بس خلي يروحون بيت جدو
جهزنه العشه وكملنه وجان تنزل العروسه الوجه عبالك مصبوغ صبغ
سلمت والكل صافن عليها
اني من صدك فار دمي كتلها جان بقيتي فوك فرد مره لمن نخلص العشه
جان تكول والله الصراحه اني منازله لو ما حبيبي عمار يلح عليه انزلي اتعشي ويايه مااعرف اكل اله انت وياي
عمار وجها كام ينطي اللوان شهد احسها راحت بغيرعالم اما البقيه واحد صافن بوجه الثاني
اتندمت حجيت لو باقيه ساكته هواي افضل الي
الجو اتوترهواي بابا بسرعه غيرالموضوع كال يله يابه كوموا اتفضلو ع العشه
الكل كام للاكل شهد اعتذرت وكالت راح اصعد انام لان احس بتعب شويه ومااشتهي الاكل
الكل مقبل كالولها اكلي ع الواهس حتى لو شي بسيط
كرار كللها مو زين ع طفلج تنامين بدون اكل
مااشتهي هسه لان اكلت قبل شويه طبعا جذب مااكلت اي شي بس خطيه ضايجه اكيد
جان يكلها عمار خدري الجاي وجهزي قبل لتصعدين
اني متحملت كتله تعبانه شهد خطيه متشوفها خلي تصعد واسيل عود تجهز الجاي
سكت عمار وشهد صعدت احس نار ومشتعله بيه
عمار الي جان ميطيق اسيل ابد شنو الي خلاه يباوع لحلكها وهيج يحجي مااعرف
الكل بده ياكل وبدوا يسالوني ع حياتي وي بيت عيالي وشلونهم ويايه وطبعا مدحت بيهم هواي وهمه فعلا كلش زينين ويايه
اكلت شي قليل وكمت اني جهزت الجاي
كملوا وشربو جاي وراحوا
عمار صعد لفوك هو والحيه
صحت اسيل انزلي اغسلي المواعين
جان تكول اكلج روان ياريت انت متدخلين بشغل البيت انت خطار صرتي احنه مقسمين الشغل بيناتنه
امي كامت تحجي اسيل هاي شوكت مقسماتها اني ماادري لتشوفيني ساكته ومتحمله لان مااحب المشاكل والعتب ع ابني الشفيه الي مفرق تفرقه مو طبيعيه ابد بيناتجن
يوم لدخليني بشغل النسوان اني معليه ذني جناينج اثنينهن وانت قسمي الشغل بيناتهن معليه اني
زين لعد مدام هيج الحجي باجر اني اقسم واي قصور من وحده انت تتصرف وياها وها كون حق الله تمشي مو تتنحاز لوحده
الله كريم بس خلي اصعد اريد انام حيل تعبان
صعدوا اثنينهم وبقينه اني وماما وبابا حجيت وياهم
شلون تقبلون عمار يعامل شهد بهاي الطريقه وبالمقابل اهلها لشهد شايليني بالصلوات ويباوعون ع حلكي
حجه بابا والله يابنتي ملينه من عمار هواي حجينه وهواي رزلنه بس هوقافل
متعجبين بي شلون كاعد يعاملها لشهد وهي نفسها الي ذبح نفسه عليها قبل
بابا والله موطبيعي عمار ولا جنه ذاك عمارالي يتخبل من الحيه ويوميه عركه ويوميه ضاربها
حجت ماما لج الله يرحم ذيج الايام هسه فاك حلكه عليها
وشنو السبب
والله ماما علمي علمج حتى ويانه متغير
والله اني ضايجه بس ع بنت العالم خطيه شالع كلبها
اني اريد احجي ويا وافهم السالفه شنو
حجينه قبلج وملينه وحتى بيبيتج هم حجت وماكو فايده
بعدنه كاعد نحجي وجان نسمع صايح عمار وين واصل
كمنه نريد نصعد نشوف شكو وجان نتفاجئ ب ....
توقعاتكم حبايبي شنو الي صاير ؟؟؟
شبي عمار وي شهد ؟؟؟؟
