رواية هو لا يشبههم الفصل الثامن والعشرون بقلم تبارك الوائلي
أخذني
من التعب يمك
أخذني وياك من عندي
أخذني بأي حلم ارتاح
مو شرط بحلم وردي
جمانه : ودعتهم بدموع وخوف لزمني اخذني على صفحة وكال .
أيهم : عمري جنه لتخافين وتخوفيني وياج
روحي راح انتضرج منتضرج انتِ وبنوتي
واريدها تشبهج .
هزيت راسي واني امسح دموعي كال .
:- ها جمانه هسه اجه الوكت نعرف منو يحب الثاني اكثر اذا طلعت البنيه تشبهني انتِ تحبيني اكثر واذاطلعت تشبهج اني احبج اكثرر .
ضحكت على سوالفه اجت فرح كالت
فرح : يله عيني كافي مسامر راح تتاخرين على العمليه اوف يحضي مالكيت منو يسامرني اني هههه يله روحي حبيبتي .
جمانه : ابتسمت وكتلها ، أي جيت
طبيت للعمليات واني مبقت إيه حافضتها مقريتها عافو على وجهي قناع الاوكسجين وضربوني ابره وصارو يسألوني شسمج جاوبتهم
.....جمانه صالح ...
كالت الدكتوره عندج اطفال .
جاوبت...اي 4 ...
كالت شكد عمرج .
مجرد مكلتلها عمري 29 غبت عن الوعي وما حسيت اله على صوت أيهم فتحت عيني وركزت زيت
شفت ايهم يبوس بالطفله وفرحان بيها وابن خالته يصور بيها ويدزها الزوجته و يكلله.
:- شوفي دبدوبه تخبل .
أيهم : ولك صلي على النبي لتحسدها .
باسها وصلى على محمد وال محمد بعدها بقينه
للـ 8 ونص بالليل و طلعنه على مسوليتنه لان
ماكدر اعوف امير اكثر وصلنه للبيت اول مطبيت الجهال تلكوني فرحانين حيل بيه خطيه نور تبجي
باست اختها وشالتها كالت .
نور : شسميتوها .
جمازه : روزه .
نور : بس انتِ ردتي اسميه ليندا .
:- أي بس ماقبل عمج لان جان خاطب وحده اسمه ليندا من اقرباء امه قبل و فصخ الخطوبه وياها كال ماريد هذا الاسم .
:- ها يله روزه هم حلو يخبل .
:- أي كتله براحتك بعد .
اجتي امي باتت يمي وصالح واخواتي وسوسن وهدى والكل اجه باركلي واجتي خالت ايهم وبنتها اجوي باركولنه ايهم حيل فرح بجيتها كالت .
:- اني ماحضرت عرسك بس هسه اجيت من اجتك طفله انت عزيز ابن العزيزه ولازم اشوف بزرتك .
أيهم : تسلمين خاله .
التفتت عليه وكالت .
:- بس ياا خاله لا تزعلين مني امج وخالتج مايوم عترفن بااختي الله يرحمها جانت مهضومه لان مارادنها ورادن بس عمتج ام بسام .
جمانه: شسوي خاله قابل اني كلتلهن سون هيج .
أيهم : خاله انسي الماضي ليش تعاقبون الأولاد على اغلاطكم .
ردت عليه وكالت .
:- لا ما اعاقب بس يا يمه هسه اني هم اميل الام دينا لان بت خالتنه وام طارق ما احبها لان غريبه .
أيهم : خاله ام دينا ماضي و لو متذكريها كبالي احسن احنه نفلصنه ، بعد ماله داعي تقارنيها
بجمانه هسه وبعد ميه سنه تبقى جمانه زوجتي
وام بنتي وما اقبل احد يمسها بحجايه .
:- لا اني مو قصدي ربي يسعدكم بس بنت اختي من حقي انقهر عليها .
أيهم : مشكلتها بنت اختج مو ادميه .
جمانه : ضاجت خالته وسكتت بعد ، خلن افلوس بكماط روزه وجايبات قطعه قماش اليه شويه وراحن طلع أيهم سد الباب واجه كعد يمي وكال .
:- تره خالتي كلبها طيب بس السانها متبري منها
لضوجين حبيبتي مره جبيره .
:- لا ماضوج منها الخاطرك اسكت .
مرت الايام
واجتي دينا واخته علينه وبدن يغارن من روزه حيل
ولينا الصغيره عضت روزه من رجلها وخلتها تغص من البجي بداخلي نقهرت لان هيه تفتهم ليش هيج تسوي باختها بلعتها وسكتت أيهم لزمها يحجي وياها وكال .
:- ليش بابا اختج بابا مو خطيه اختج .
لينا : بابا كزكزت عليها وحبيت اعضها .
:- صدك تحجين بابا ليش يا بنتي ميصير حبيبتي لتعيديها بعد تره ازعل منج .
لينا : أي بابا .
جمانه : عوفها أيهم طفله متعرف .
:- لا جمانه خلي تتعلم .
جمانه : خلص النهار بين مكافش الجهال دينا كلساع تباوع على الجهال وكل شويه كالت .
دينا : بابا يباوعون عليه ويعيبون .
حجه أيهم بنفاذ صبر.
:- منو عيب عليج .
دينا : طارق يعيب .
أيهم : دينا بنتي ليش هيج تتحسسين تره طارق ما مباوع عليج .
دينا : اي طبعاً ادافع الهم انت لان تحبهم ومتحبنه يله ، اريد اروح هسه رجعني الماما .
كامت تحجي وتبجي .
:- بابا اشبيج متكليلي ليش هيج تحجين .
:- اريد اروح يم عمه انهار وديني معليه .
:- دينا كعدي بابا مو ردتي تجين يمي .
صارت تبجي بصوت وتكول
:- لالا اريد اروح يم عمه وديني .
:- يله امشي اوديجن امري الله .
اخذهن وراح على انهار بصفنه شويه واجه كعد دكت انهار عليه رديت شو هاي تحجي بعصبيه وتصيح .
انهار " اكلج جمانه لمي ولدج زين مو كلما تجي دينا هيج يسوون بيها كافي عيب عليج تره بيت ابوها هذا .
جمانه
" انهار اشبيج متكليلي ليش اصدكين بطفله هو منو يمها دينا منو واصل الها .
انهار
" لا عيب جمانه تره حقها الطفله مهضومه بيت امها وجانت عايشه بي عمر وهسه انتو كعدتو بي واخذتو مكانهم .
بعدني مراده سحب المبايل مني ايهم وصاح .
أيهم
" باعي حجي زايد ماريد فاهمه لو لا ولتدخلين بحياتي محد حطج محامي لبناتي دزيه دينا اليه بسرعه اريد افهم منها ليش هيج تحجي وتالف قصص .
انهار
" اي طبعاً عاميتك جمانه وجهالها كاتل روحك عليها .
أيهم
" استغفرالله ربي واتوب اليه روحي شحجي وياج
وانتِ هذا عقلج .
سد المبايل بوجها وعصب وصار يصيح ويحجي اشكال رحت اني اخذت الجهال وطبينه بالغرفه جوه
:- نور اعلكي التلفزيون واكعدي لتخلين امير يطلع خلي هنا يلعب بالغرفه كدامج .
:- اي ماما صار .
جمانه : طلعت ورحت بالصاله كعدت قريب منه تنفست براحه وكتله .
:- ايهم تره اني ....
:- كافي جمانه لخاطر ربج كافي اني اعرف
جهالج زين واعرف بناتي زين لتكعدين لتبررين
اليه كل شي اعرف بناتي يغارن عليه منكم اعرف ميتحملن وميتقبلن وجودكم يمي والضاهر امهن
هم مدرستهن زين كافي عوفيني .
:- اني مضايجه حبيبي عوفهن هن جهال يكبرن ويعرفن منو الصح ومنو الغلط .
:- ان شاءلله .
شويه و اجني البنات دينا كعدت كباله ولينا بصفه وجه الكلام الدينا و كال الها .
:- تعالي بابا اريد احجي وياج ،ليش هيج تسوين ترحين يم عمتج تحجين مو عيب بنتي .
دينا : لا بابا مو اني هيه سالتني عمه انهار تكول سمعت اصياحكم شكو واني حجيتله وبعدين هيه دكت على ماما وحجن اني مالي دخل .
:- هااا حلو. انهار صايره حنينه حيل على امج .
:- اني معليه هيه عمه خابرت .
:- يله كافي حبيبتي صيري حبابه حتى اليوم
اطلعكم للمول انتو وجهال عمكم اي بابا عفيه
اريد العب .
:- ادللي حبيبتي .
:- بابا اريد مبايلك اخابر على ماما .
اخذت مبايله وره اشويه كاعدين اجتي دينا كالت .
:- بابا باوع شنو ذني .
جمانه : كاعده بصف أيهم فاكدر اشوف باوعت واشوف صور خطوبه والعرس الامها وايهم اني
صدك غليت من جوه بس بقيت ساكته شنو من طفله عدها سوالف متخطر على بشر ، هوه راساً مسحهن من مبايله وكال .
:- لا بابا عيب ميصير امج هسه متزوجه ميصير تشوفيني بعد بذمت رجال ميصير طلعين البابا
هاي الصور بعدين امج اشلون تقبل دز الصور على مبايلي كلي الامج بعد لدز هيج صور احنه اطلكنه واني هسه متزوج .
:- اي بايا فهمت .
:- عفيه بنتي .
:- راح العب جوه .
:- روحي حبيبتي .
جمانه : باوعت عليه ضايجه كال .
:- هااا يروحي ليش هيج تباوعين اني مالي ذنب همزين كل شي صار كدامج .
:- هاا وتضحك عجبتك الشغله مو .
:- لا وعيونج انتِ، بعدين يجوز المراءه حنت اليه شنسوي قابل نمنعها .
:- ياااا ايهم لتحجي هيج كافي .
:- والله مبينه الاخت معوزه حنان اضاهر مقصر
وياها الرجل الجديد وحنت الابو دينا .
يحجي يغث بيه ويضحك عصبت حيل وكتله .
:- يووووو ، خلي اكوم احسن .
:- ووووين تعالي يروحي تروحلج فدوه هيه وكل اهلها والله اشاقه وياج .
:- لا ماكو هيج شقه .
:- لا يعمري والله اريد اشوف الغيره العراقيه بعدها عندج .
:- لا لا حبيبي امن موجوده ومره ثانيه اذا دكت عليك والله تسده وممنوع ترد عليها .
:- صار من عيوني عمي عليه سحب هواي من النساء مو بيدهن قاهر قلوب الجميلات ههههههه .
عفته وكمت معصبه لزمني وضحك بصوت وكال .
:- ولج اشبيج تعالي اشاقه .
:- كافي ايهم عوفني اخخخ ايدي انت واحد ......
:- جمانه ديربالج تجاوزين والله لو مو اعشقج اكسره الايدج التدفعني .
:- انت واحد مو عاقل والله .
:- عفيه بالسبعه بس وياج والله مو عاقل اني شو مشايفتني قبل .
:- أي شايفتك وعبالي ثكيل .
ضحك بصوت شفت بناته يباوعون كتله .
:- اجتي بنتك .
:- عادي واذا شمسوي تعالي بابا دينا شوفي عمه جمانه متنطيني بوسه اله بالكوه مسويتها جفاف ويايه .
:- اي خطيه الي يسمعك يصدك كل النهار ساحلني
وراك وتمطك بيه .
:- ههه غصبن عليج غير دافع بيج ماي كلبي .
دينا : والله بابا اني ضجت .
:- شكو بابا اشبيج .
دينا : اريد اروح الماما .
:- باجر حبيبتي اخليهم ياخذوج .
:- اي بابا .
مر ثاني يوم وراحت دينا الامها ومرت ايامنه حلوه وحياتي مثل العسل واني من صدك عايشه احلى ايام عمري ويا بكل سنه وكل شهر وكل يوم وكل دقيقه حلوه مرت بحياتي ويه أيهم
بعد فتره ايهم باع سيارته واشتره وحده احدث
وبعد فتره الكل من خالته والد خالته كالوله ماتوقعنه يطول زواجك بجمانه كلنه هسه كم شهر وينفصلون لان عدها جهال وماراح ترتاح ابد وياهم كان رده الهم .
" بالعكس كلشي نضام مربيتهم امهم وعدهم غرفه ينامون بيها واني تعودت عليهم حيل واحبهم .
صار الكل يكلي هنيالج مسعده انتِ والله يحبج انتِ واطفالج نرزقتو بوحد مثل أيهم مدللكم وكل مكان تطلعون وتتونسون ومرتاحين
عبالك نسو اخواتي وقريباتي جمانه اشلون جانت عايشه قبل حياتها وصل السره اليه بالراحة صارت يحسدني على عيشتي
طيبه اجتها قسمه ونخطبت وعزمتني على عرسها واجتي كم وحده من اقربانه واجتي زينه وساره وضاجو من شافوني حاضرها بالعرس صارو
يسمعوني كلام يسم البدن لان لسه ميحجن ويايه
طيبه اخذت عمتي وياها و عاشت يمها بعد فتره
من زواج طيبه سمعنه حماتي ليلى مجلوطه ورحنه
نشوفها مهما صار تبقى بنت عمتي صدفه اجتي عمتي وطيبه ويانه ورحنه انزورها وهناك تراضينه وياهم وكامت تبجي عمتي هيه وطيبه وبعد فتره صارو يزوروني بيتي و مرات يبقون يباتون يمنه يومين وتلاثه ويرحون هيه وزوجها ساكنيت بابل بالمسيب هيه وعمتي
فـ من يجون لازم يباتون وصارو يبقون يمنه
ورجعت علاقتنه وياهم زينه ، عمتي ضاجت
ممتعلمه هناك متعلمه يمنه بغداد باعت البيت
الورث وخلو افلوس حصه اطفالي بالقاصرين واشترت بيت بصف بيت اهلي وسكنت وحدها وبالليل تروح تبات يم اهلي وبناتها يجوها خطار
كم يوم ويرحن وبعد فتره نجلطت خطيه ورحنه كلنه عليهل وراضينها اني وزينه وساره وصارت عمتي زينه
بعد فتره صارت عدها مراجعه و اخذتها اني وايهم لدكتور الطريق كله تشكر مني اخذنه علاجها ورجعتها للبيت .
صارو حمواتي كل شهرين يجون يتجمعن ويتصلون عليه اني والجهال اروح عليهم ايهم لهسه ميتحاجه وياهن بس مامنعني منهن ابد ولا منع الجهال ومرات طيبه تاخذ الجهال يبقون يمها كم يوم وجيبهم تاخذهم لزياره تزورهم ويرجعون
فرح حامل وحاليا موعد ولادتها ورحت وياها للمستشفى ايهم ضاج لان بقيت وياها كل النهار
اعرفه متعود عليه اكله وملابسه كله اني لازم
احضرهن
خابرني ضايج ويعصبي كتله .
" ايهم اشلون اعوفها بولادته هيه مو بقت ويايه
من الصبح لليل .
" اي يا عيني تعرفين بيه اني ماعرف اطب للبيت وانتِ ماكو .
" ميخالف حبيبي ماتاخر والله .
" يله امري الله .
سديته وبقيت للمغرب يمها واطمأنيت عليها لان شهد اجت يمها رجعت للبيت تلكاني من الباب الابتسامة شاركه الحلك وكال .
:- هسه البيت نور بروحي وام بيتي .
:- حبيبي انت قابل طرت .
:- أي طرتي بعد مترحين وطولين بمكان ممنوع .
حضنته ورضيته لليل كاعدين نتفرج فلم وكتله .
:- حبيبي ايهومي بداعتي اعرف تحب الشعر الاسواد اريد اصبغ شعري والله عاجبني اجرب هل لون على شعري .
:- لا ممنوع اسكتي جمانه متصبغي .
:- ليش ايهم والله عاجبني ليش تخلي بنفسي اله اكصه وريحك منه مدام متقبل .
:- اي علمود اكص راسج سويها اذا انتِ بنت ابوج .
:- يابه على كيفك مارحنه كصينا بس فدوه اريد اصبغ شعري .
:- اخخخ منج جنه اشكد لحوحه .
:- اني ؟
:- اي انتِ واني قابل روحي سوي امري الله .
:- اي اي حبيبي اموت عليك .
:- والله مكلفه نفسج تتنعوصين بابا هاي متفيد .
:- لعد شتريد .
:- تعالي اكلج شريد .
سحبني وكعد يمطك ويصيح .
:- محروم يا ناس محروم
:- ايهم الي يسمعك اني اكدرلك شوكت انت محروم.
ضحك وكال.
:- منو راح يصبغلج .
:- انهار راح اروح عليها لصالون واصبغه .
ثاني يوم رحت على انهار وقصرت شعري يوم على يوم وصبغته والمصيبه حترك شعري كله وكعدت ابجي متت من القهر طب ايهم شافني فاتحه شعري ومعطب انجن وصار يرزل بيه .
أيهم : ولج ليش هيج متخافين الله ولج يا ضالمه شعرج يخبل طوله ليش هيج سويتي وحركتي هاي
لا اني مقابل هيج صار بيج تستاهلين .
جمانه : أيهم شبيك اني بيا حال وانت تحجي عليه راح كل شعري .
:- اني شعليه غير اختك انهار تكول اني ام صالون .
:- استغفرالله ياربي بله شحجي وياج هسه ها كليلي .
:- كافي ايهم اني شعري كله احترك وانت زيدها عليه .
:- تستاهلين كتلج كعدي وسكتي .
:- اني شعليه غير اختك .
عصب عليه ورزلني وطلع مبايله دك على أخته وكال .
:- انهار صدك تحجين ليش هيج محترك شعر جمانه .
انهار
" اني ليش هيه شعرها ماتحمل بسرعه احترك .
أيهم
"اشلون انتِ ام صالون وعلساس تعرفين .
انهار
" أيهم لا تسويها سالفة مصار شي تره .
سد المبايل وهوه معصب واني الي محترك كلبي
على شعري صاح عليه .
أيهم : كافي جمانه تبجين انت غبيه عفتي كل الصالونات رحتي الانهار فهم علم هيه .
جمانه: شمدريني اني وين طابه بصالون اعرف صابون اني .
:- كافي حبيبتي اسكتي هاج هاي ورقتين وروحي الغير صالون يسوو الج من جديد .
:- وين ايهم لازم اكصه كله احترك .
:- كافي يا عيني واذا كصيتي شنو يعني باجر اجيبلج زيوت من صديقي يجيب الزوجته من عمان اوصي يجيب الج وارجعي اهتمي بي روحي كصي ورتبي .
:- ماروح بعد الاي صالون اني اكصه بايدي احسن .
وصدك رحت كصيته الحد جتفي واني دموعي تصب عبالك كاصين روحي اخخخ منج انهار حرامات شكد نقهرت سنين اني معتنيه بي بعد ماجان طوله الجوه ضهري كصيته وبقه لونه عسلي بس باوعت بالمرايه الكصه ويه الون حيل لاكن البشرتي بس بعدني مقهوره عليه طب ايهم ابتسم وكال .
:- هاي شنو هل كيك كله ياربي شطالعه بهلون والكصه تموتين لج جمانه بكل حالاتج كيك انتِ يهنيالي عليج والله عسل جنه انتِ صدك عسل.
:- صدك ايهم حلوه الكصه عليه .
:- تموت عليج هوه انتِ بلا كلشي تموتين .
وصدك بعد فتره راح وجابلي زيوت الي موصي صديقه عليهم من رايح العمان جايبهن اله وصرت كل يوم بالليل اخلي من الزيت وحسيت اكو فرق واني هم رحت العطار يمنه هم انطاني خلطه زيوت وشانبو طبي وكلي استمري على الشانبو والزيت مرتين بالاسبوع وبقيت هيج
مرن سنتين
ياله رجع شعري طول وبقيت على الاسواد رغبه
ايهم ماغيرتها كل مره يذكر ويكلي لان اني ماراضي حترك شعرج .
كاعده اني والجهال وروزه تلعب فدوه حبيبتي صارت تمشي وماليه البيت بسوالفها وحركاتها
طب ايهم جايب ويا كيكه كتله .
:- اليوم كيكه شنو المناسبه باله ؟
صدمني من كلي .
أيهم : اليوم عيد ميلادج يروحي انتِ
كل سنه وانتِ روحي وعمري .
اني صافنه عليه من صدك مصدومه معايشه هل شي قبل كتله .
:- صدك عيد ميلادي وهاي الكيكه صدك اليه ؟
:- اي حبيبتي هاي لجنه أيهم .
جمانه : والله ممصدكه ياربي اول مره احد يجيبلي كيكه ويحتفل بعيد ميلادي من جنت اصغيره جنت اروح بعيد ميلاد صديقتي عبير وجنت اتمنه احد يسويلي مثلها ومن جنت اكول الاهلي يكلولي خلي نشبع خبز ونسوي عيد ميلاد واسكت وجان حلمي وعشت يم بسام 10سنوات مايوم ذكر عيد ميلادي ولا سال عنه فززني صوته .
:- ها صافنه اشبيج حبيبتي .
:- لا لا مابيه شي اني كلش اشكرك ياروحي انت ربي يحفظك اليه طول العمر .
:- يله نور جيبي مواعين وخلي نحتفل ويا ماما ومليكه سوه .
ملك : بفرح صدك عمو .
أيهم : أي حبيبتي اعرف انتِ وماما نفس اليوم والشهر .
جمانه : هاا اي والله صح مناسي انت .
:- اشلون انسه شي يخصج ابد جان يوم ٢١ بشهر ٨ يعني برج الاسد انتي ومليكه .
جمانه : ابتسمت اله وحيل فرحت وحتفلنه وفرحنه وجانت اول مره بحياتي اسوي عيد ميلاد ومتنسي ابد ومرت ايامنه تركض وصار عرس اقارب ايهم بالقاعه وعزمو ايهم من اقرباء امه الله يرحمها وهاي اول مره اروح قاعه قبل رحت وجان عمري ١٥بعرس اخويه صالح وبعد مارحت ابد حيل فرحت من حسيته مشاركني بكل تفاصيل حياتي انطلني افلوس وكلي روحي اشتري ملابس ورحت اشتريت ملابس جانت صدفه هدى بت عمي جايه عليه ورحنه سوه لسوك اني وياها وشتريت وكملت ورحت لاهلي ولكيت شهد اختي زعلانه وهاي اول مره تزعل شهد هيه وزوجها صار اكثر من ١٥سنه متزوجه ومايوم زعلت حجتلي على خلاف هيه وزوجه وكالت .
شهد : باجر اجي يمج ابقه لليل .
جمانه : تعالي هله بيج اني العصر اروح للعرس ويه أيهم بعد احسن علمود تبقين يم الجهال ابيتي .
شهد : أي يجوز اجي .
:- أي فدوه شهوده تعالي علمود روزه ابقيها يمج .
:- صار ادللي اجيج العصر .
وصدك اجتي عليه وره الغده وبقت واني طلعت
بلـ ٤ توجهنه اني وايهم للقاعه وهيه بقت يم الجهال اخذت بس امير ويايه لان متعلم عليه صدك تونست بالعرس اشكد حلوه جانت الاجواء بس الي ضوجني كل الي تجي تسلم على ايهم تبوسه من قرباء امه وبنات خالاته هم عادي يسلمون بالبوس متحملت وكتله .
:- اكلك شنو سالفت بنات خالتك اله تمطك وبوس ليش عود .
ضحك وكال .
:- حبيبتي هنه متعلمات هيج سلامهن ويانه احنه ربينه سوه .
:- اي ادري احنه هم ربينه سوه احنه وبيت عمي
ابد مايوم بوسنه احد .
:- عمري انتو طبيعتكم هيج ملتزمين احنه طبيعت خوالي فري حيل متفتحين وعادي عدهم هيج يسلمون .
:- اي وانت مكيف استاذ أيهم .
:- شلون تردين افشلهن عيب بابا شكلهم زوجتي
تغار لتسلمن عليه .
:- اوف اوف ايهم منك .
:- وعيونج محد مالي هل عيون غيرج انتِ
ومتربعه بكلب .
:- يعني هل عيون الحلوه ميشوفن غيري .
:- لا ميشوفن بس اذا فاتت وحده تنشاف بالعين مادري بعد اني ممسئول .
:- اشلون بيك انت اشوكت اتوب .
:- والله العظيم تبت على ايدج .
اجت بنت خالته دنجت عليه وكالت .
:- ها عيني ايهم اول تالي كاعد انت كل عرس متكعدج وبس تفتر وتركص هسه كاعد برضاتك لو تخاف من زوجتك .
باوع عليه وكال .
أيهم : سمعتي عمري كلها تعرفني ماكعد بس على ايدج كعدت وصرت مؤدب .
ضحكت وهزيت ايدي كلش مؤدب خطيه سحبته بنت خالته وكالت .
:- كوم يله نركص وجرته من ايده وهوه كيف عبالك جان مجبور على الكعده يمي راح يركص وياهم جوبي غصب عني عيوني تفتر عليه واخاف لا وحده تباوعله وهوه مميز بنصهم يركص جوبي باحتراف يفر السبحه ولازم طرف الجوبيه ويهز غربي وينزل للكاع ويرجع يطفر بنصهم سوالهم اجواء والكل اندمج وركص ويا وماكعد ابد اخر شي اجته وحده حلوه حيل وسمره وطويله ولابس فستان اسود وفاله شعرها وكفت تركص ويا وهوه انطلق ونسه نفسه اني بعد ماتحملت صدك اله اشويه ابجي نار احس بكلبي اشتعلت وهيه ماقصرت كل شويه لازمه ايده وتركص اخر شي رجعو شغلو اغنيه ركص جوبي ورجع ركص لمن بزع وهيه عافته من كام يركص جوبي ويا ولد خالته وشباب اخر شي اجه فحطان كعد بصفي راسن حضني من ضهري وهمس يم اذاني لان ماسمع من صوت الاغاني .
أيهم : جنه ايهم ضجتي مو ، والله حرجتني واستحيت ماركص وياها لضوجين .
جمانه : اني بالكوه متحملها وساكته باوعت عليه
صفح هو راساً ضحك درت وجهي عنه وباوعت خلصت الحفله ورجعنه بالطريق كعدت ساكته وضايجه كال .
:- كافي جمانه شنو السالفه متحجين وزعلتي هو شصار .
:- انت شفت نفسك ماكعدت يمي اصلن كاعده وحدي اباوع و عفتني وكضيتها ركص ويا النسوان .
:- بربج جنه هو اني شسويت بس ركصت ويا النسوان لا وهم ركصت ويا شباب شويه .
جريت نفس وذبيته بنفاذ صبر كال .
:- اي شسوي يا عيني كدامج اجتي وجرتني من
ايدي عيب ماركص وياها وافشلها .
:- ومنين سعيدت الحض هاي العوجه شطولها تكول تيل كهرباء .
:- بت خالتي طبعاً تعيبين عليها مو قزمه انتِ
حقج تضوجين من طولها .
:- ايهم كافي عاد طوختها .
:- اشبيج حبيبتي متتحملين شقه عمي سكتت ههههه اموت عليج .
:- درت وجهي عنه على الجامه علك اغنيه هيثم يسوف تموتيني كافي تغارين باوعت عليه ضحك وكال .
:- اموت على غيرتج .
مد راسه وهو يسوق خطفله بوسه.
:- كافي لتبوس كتلت روحك تركص هسه صرت حباب .
:- ولج كافي لضوجين نفسج ماستاهل كل هل ضوجه اني .
:- لا ايهم تستاهل انت متعرف شكد اني احبك
واعشقك انت كلشي بالنسبة الي.
:- يابه لو دري هيج تضوجين من اول ماطبيت للقاعه اشد حيلي و اركص علمود اسمع هل غزل .
وصلنه للبيت وهو يتغزل بيه ويضحكني ومرت الايام وصارت كل روحه اله بعرس وقاعه لازم
نتعارك اني وايهم بسب غيرتي عليه والله مره
رحنه لعرس صديقه هم بقاعه وشفت وحده
متزوجه وحامل وتباوع عليه اكلته اكل بعيونها
لا ورايحه جايه من يمنه اخر شي خزرتها هيه
دارت وجها على صفحه تقربت عليه بحجه اشاوره لان ميسمعني وهوه حاوط ضهري باديه وهيه طكت وماتت بت الذين حامل ومتزوجه وتباوع صدك بنات صلفه ومن طلعنه كتله منو هاي الي لابسه فستان نيلي الحامل كال .
:- ليش هل سوال .
:- هيج .
:- هاي زوجته الاحمد يصير من اقرباء بيبيتي
من بعيد زوجه صديقي هم .
:- هممم تعرف كتلت روحها عليك وبس تباوع شنو شبيها .
:- هااا ، انتِ شفتيها .
:- طبعاً شفتها شنو حوله اني .
:- لا اسم الله على عيونج الحلوه ادري بيج متفوتين شي .
:- ايهم اشلون يعني ابطل بعد مارح وياك .
:- والج اني شنو شفتيني باوعت كمت سويت شو حتى ركص ماكمت لان مو عرس كرايب من بعيد وماكمت بس هاي جانت قبل لا تزوج عندي علاقه بيها .
:- يبوووووو ايهم كلها عدها علاقه بيك شنو انت مهكر بنات العشيره على ايدك ممبقي وحده تعتب عليك يعني .
:- اشلون يعني يابه مو تبت والله على ايدج تبت
و ماعندي شي مو شفتي ابنها كدامها يمشي والثاني حامل بي .
:- ها والله عمي صدك نسوان ميستحن وصلفات .
يعني عدها ثنين وتحوص عليك .
:- شعبالج حبيبتي عبالج كلها مثل اخلاقج .
مرت الايام وصرت كل روحه انبه ايهم ليكدام قبل لاانطب للقاعه انطي تعليمات وممنوعات نصهن يطبقهن ونصهن ينساهن وأول شي ينسا مجرد ميسمع الديجيل على الجوبي يفقد ويروح بغير عالم وحضرت تقريبن اكثر من ١٥ مره ويا اعراس بقاعات مختلفه واكثرهم اصدقاء اله وضباط نحضر اعراسهم
آخر مره رحنه بعرس وانهار وكل بنات خالاته اجني وطبعهن مو حلو وميعجبني سلوبهن راحت وحده جرته وطكو صور وهو عافها واجه كادني واخذني
كومني ويا كدامهم كلهم وكفنه ناخذ صور
رجعنه للبيت خلص الطريق عالك اغاني ولازم ايدي ويبوسها اتعودت على هل وضع لان اضاهر هو هيج اسلوب حياتهم ومثل ماكال رابين سوه وعدهم كلشي عادي وصرت اتونس بالطلعه ويا .
كاعده اطبخ الغده وندك الباب أيهم موجود طلع فتحه سمعت صوت محمد طلعت بلهفه اجه حمودي عليه كدامه وبوسني وحضني الوحيد بس حمودي يبوسني من يجي لان راضعين سوه اني ويا اخوه
لاحضت أيهم ضاج حيل ونكلبت خلقته وميتحاجه ياربي هذا اشبي كعدنه وسالته على زوجته ولده وسلم وراح ومن راح حمودي اجه ايهم عصب عليه
وصاح باعصاب .
أيهم : شكو تخلي يبوسج انتِ غبيه شلون هيج تسوين كدامي .
:- على كيفك ايهم حبيبي حمودي اخويه والله العظيم امي رضعته من احنه صغار يعني يصير اخويه .
:- ميخالف ممنوع بعد تبوسي اكلب الدنيا على راسج جمانه والله احركج انتِ ويا .
:- يااا ايهم على كيفك اذكرك من يجن بنات خالتك يبوسنك تكلي ربينه سوه واني اسكت .
:- لججچچج لتقارنين ااااأااني غير عنج جمانه
غيرررررر سمعتي لتخليني اسمعج كلام ميرضيج .
عافني وطب بالغرفه زعلان ياا عزه هذا سواها صدك و زعله رحت لملمت البيت وطفيت الاضويه ورحت يم الجهال بالغرفه امير ومليكه نايمين بس نور وطارق يباوعون على البلازمه كعدت اشويه يمهم
:- ها ماما راح اروح انام لتسوون هوسه .
نور :- روحي ماما هاي روزه نامت اخذيها وياج .
اخذت روزه خليتها بالسرير مالتها لكيت ايهم
يدخن جكاره وره جكاره ويباوع بلمبايل رحت يمه نمت على ايده نفخ دخان جكارته وبنفاذ صبر وكال بضوجه.
أيهم : وخري ايدي توجعني .
جمانه : سبحان الله بس اليوم توجعك مو .
باوع عليه وضم ضحكته كتله .
:- ها ليش دور وجهك علمود ماشوفك مو ليش زعلت باله .
:- وعليمن ازعل شنو طفل كدامج .
:- لعد ليش ضجت ايهم .
:- متنعاد بعد جمانه ابد .
:- والله العظيم اخويه حرام تحرمني منه ايهم والله حاسبني اخته الجبيره لتزعل حبيبي عود نفسك عليه .
:- ما اقبل جمانه اضوج .
:- ها شفت نفس حركه الكلب اني اكثر منك من يبوسنك بنات خالتك بس هنا الفرق هذا اخويه .
:- وهنه هم. اخواتي والله العظيم جمانه حسابهن اخوتي .
:- هذا هو تعادلنه اني وياك بعد لتحجي ولا تزعل
لا انت ولا اني تعادلنه .
:- بشنو يابه ليش شسوينه وتعادلنه .
يحجي وصارت ايده تشتغل ويتجرء بسوالفه وحركاته صحت .
:- اااااااااااايهم .
:- شكو شمسوي .
:- ايددددك .
:- ثبتي لج .
:- لالا ما ، ما .
:- شيلي ايدج راح اكسرها جمانه وووووو.
ومرت ايامنه
كاعدين ودك ابن خالته عزمن على خطوبت ابنه وكله اجي باجر وراح للخطوبه ورجع للبيت مطول وهم دك المبايل عليه بنت خالته .
" ها ايهم .
" هلو ابو علي .
" اكلك شفت ام دينا .
" اي وشعليه بيها .
" ماشفتها اشلون تباوع عليك وين متروح وتفتر تحومي وراك .
" شعليه بيها شفتها اشلون فاكه شعرها ومطولته وصايره حلوه والله حرامات نفصلتو .
" ام علي لتدخلين احسن اني احجي ويا ابو علي وماله داعي كلامج عندي تاج راسها هيه واهلها
عيب هل حجي هيه متزوجه واني مزوج .
" لا ماكلت شي اني اشبيك اكول حرامات وبت خالتك هيه .
" يله عيني ورايه دوام اني تصبحون على خير
سده وباع عليه وكال .
أيهم :- تره هيه متقصده هيج تحجي علمود اسمعج لان تعرفين حبايب هنه .
جمانه : وشعليه بيها طز اني واثقه من نفسي .
:- حلو اموت على الواثق شو باعي بس العيون تكول غير شي جنه .
:- ايهم لتلف ودور احجيلي شفتها مو وسوت باله شنو تباوع وتفتر .
:- فهمنه اي شفتها هيه واخواتها جايه للخطوبه واجني سلمن عليه وجانن يباوع عليه اني واكف واجتي دينا اخذنه صور اني وياها .
:- شو اشوف الصور وينهن .
:- صارررر.
كالها مكرر الحرف .
طلع مبايله وكال .
:- شوفي وكلبي على اليمنه .
:- هاي شنو ايهم ؟
:- شنو اشبيج حتى الصور مو اني صورت يوسف صور والله العظيم .
:- ليش طالعه بالصوره وياكم .
:- الله يطيح حضك يوسف اشلون مطلعها بعيده واكفه ورانه .
:- اي اكيد متقصد ابن خالتك .
:- اي وليش غاثه نفسج شو جيبي .
اخذه سواله اقتصاص ومسح البقيه وكال .
:- ها نحلت ماعدنه شي بعد .
:- سمعت على اساس تريد تطلك من زوجها صدك .
:- شمدريني عمري انتِ وبعدين صدك مضيعه الوكت عليه واني اسولف بوحده تافهه مثلها الله يقبلها ولج وقتي ثمين وانتِ تعرفين شو تعالي خلي اسكتج بطريقتي تعالييي ووووو
مرت كم يوم من سمعنه امل تريد تطلك تخبلت نجنيت اني متزوجة ومخلصانه من سوالفهن
كاعدين ودكت انهار على أيهم رد وكال .
" كولي انهار .
" اكلك صوت المبايل عالي وسمعت يمك جمانه .
" اي ليش كولي .
" لا بس اريدك بشغله تعال للبيت .
" مااجي تعبان كولي اسمعج .
" لعد لتخلي جمانه تنتبه ايهم دكت عليه امل ام دينا وكالت رفعت دعوه خلع على زوجها تكول ماريده يشرب ويدور ملاهي كل نهاره وهسه متزوج عليها باذر بيجان وهيه متخبله .
أيهم
" واني من كل هاي شنو انهار اكعد اواسيها مثلا .
انهار
" لا بس لتعصب اشبيك اسمع .
" اي كولي شكو .
" أيهم امل كالت اذا اطلكت يرحعني ايهم حتى لو بعقد سيد قابله ويلمني اني وبناته لان متبهذله وماعدها وبايعه اثاث البيت وتدفع ايجار الشقه وحدها .
" واني شنو طز بيها وبي بابا اني عندي حياتي وخلص ليش هيج ماعدها كرامه ومجلبه بيه خلي تفك مني .
" بس اسمع ايهم خطيه اخر شي بايعه الاخشاب ودافعه ايجار .
" لااله الا الله لج بابا انتِ عاقله ؟ تحجين صدك
ولج على الي سوته بيه لو يصبوها ذهب بعد ماريدها تحلم اذكر اسمها مو ارجعها .
" انت اشبيك متتحاجه متكلي هسه جبرتك اني هيه حلفتني اكلك وخلص متقبل هذا هوه مع سلامه .
سد الخط وكال
أيهم : والله عجيب نسوان متكعد راحه اله تنذل استغفر الله .
جمانه : وشدعوه هل كد انهار محترك كلبها على
بنت خالتها وتريد تهجم بيتي .
:- ختولي حبيبتي .
:- لا أيهم ولا عبالك اني بنت عمتها .
:- كافي يروحي انتِ ،
:- اشوكت ارتاح ايهم اني كل يوم احد من اهلك منغص حياتي شلون ما اخلص يعني .
:- جنه حبيبتي اكيد تتحسفني ومتندمه عليه لان شافت واحد اعوج غيري وهسه تندمت طز بيها والله العظيم متندم على كل دقيقه عشتها وياها وتمنيتج
لو انتِ زواجي الاول كافي لضوجين نفسج وبعدين احاسبج على كلامج شنو اشوكت ترتاحين جنه يعني انتِ مامرتاحه ويايه كولي .
:- لا والله مو قصدي ايهم بس دامأ ينغصون فرحتي وصارت ام دينا مثل بسمار جحى بحياتي .
:- والله صدك هيه بسمار لان بضعف البسمار والله تشبيه جمانه .
ضحك بصوت واني كوه تطلع ضحكتي من القهر.
أيهم : اي اضحكي حقج عمي منو كدج تشوفين روحج حلوه ونغريتي علينه .
:- اني انغر تعرفني ماكو مثل بساطتي وعفويتي .
:- أي أي اعرف اني الي اعرف هيه هاي الي سحلتني عليج حبيبتي يله كومي كافي تتنعوصين عليه كومي حضريلي الحمام .
:- ادري اشعندك بس كلي كل نهارك بالحمام .
:- بابه تعويد .
لليل نايمين دك مبايل ايهم بلـ 2 بالليل فزينه على الصوت مخترعين .
جمانه : شكو ايهم ؟
أيهم : ؟؟؟
