رواية الندم مابعد الخطيئة الفصل التاسع والعشرون بقلم رونق
فاجأني عمار براجدي فر راسي فر بقيت صافنه ومصدومه محجيت شي
جان يكول لاعبالج صدك تزوجتج لان بعدني احبج لا متوهمه اتزوجتج حتى اذلج واذل اهلج واخوج لتتصورين نسيت اهانتهم ولا نسيت من ذلوا اهلي ولا نسيتج من وافقتي ع ابن عمج لا كلهن مخزنهن بذاكرتي وضامهن الكم وحده وحده
الصراحه مخفت من عمار ع نفسي كد خوفي اذا مقبل مرتضى يتزوج روان وتروح تضحيتي كلها بالشط
اني منطقت ولا حرف لان الصراحه الصدمه مبنجتني لحد الان
جان يجرني من حجابي يله انزعي هذا ورتبي الجنط بسرعه
نزعت حجابي ورتبت ملابسنه وجان يضربني ع راسي يله بنت القندره فضيها شنو رايج تبقين لباجر اترتبين
هنا دموعي نزلن بدون مسيطر عليهن
اكلج هاي سوالف الزعاطيط اتركيهن مالت تبجين وعود اتاثرين عليه هاي السالفه انسيها
يله تعالي طفي الضوه وتعالي بسرعه
ذبيت البيدي وطفيت الضوه وجسمي كام يرجف مثل السعفه حسيت بخوف موطبيعي حتى بزواجي من ابن عمو الله يرحمه محسيت بهيج خوف ابد
اتقرب الي بوحشيه وعنف الصراحه صار حاجز قوي بيني وبين عمار من هاي اللحضه حقدت علي وضجت منه هواي بس مابيدي شي
خلال يومين كلشي مفتهمت غير العنف من يتقرب عليه وكل شويه وضاربني راجدي كرهني بحياتي كلها
كل شويه يتصل بمرته وكله كلام غزل وحب كدامي
ثالث يوم كعدت من النوم لكيته ماهو اتصل بي ع الفايبر ميجاوب لو ينطي رفض بقيت للعصر بالغرفه بوحدي لا اكل يمي ولا اي شي بالثلاجه
لليل يله رجع وريته مارجع واشوف هذا المنضركبالي
جان يفاجئني جاي هو واسيل زوجته هاي شوكت اجت وشلون وصلت لهنا ماادري
دخلو اثنينهم لا سلام ولا كلام سوالف وضحك جان يصيح عليه هيي ثوله كومي جهزي العشه لو تردين احنه نجهزلج
نحمست حمس واحس دمي كاعد يغلي والله كمت فتحت العلاليك الي جايبيهن وياهم خليت الاكل كدامهم لو يطيح بيدي اختفي من الموجود ولا امر بهيج موقف
كعدوا ياكلون ويضحكون ويحجون وهامليني ولا كانو كبالهم
احس روحي طلعت واتمنيت الموت ولا هذا المنظر
بقيت صافنه بالجذب مكلي تعالي اتعشي ويانه رغم ميدري بيه من الصبح لهسه مماكله اي شي
كملوا وجان يكول اني رايح وي اسيل ابات اقفلي الغرفه زين من تنامين
احس خنجر بنص كلبي غرزوه وطلعوا
يعني شنوغايته عمار من هذا الشي وليش هيج سوه معقوله يريد ينتقم مني اي اكيد هذا واضح ردت انفجر بس مابيدي شي مااكدر احجي وي اي بشر مااكدر رغم ماجنت ميته من الجوع نمت بدون عشه
ثاني يوم اجه اخذ الي يريده مني بوحشيه وعافني وطلع وره شويه اجوي خدمة الغرف جابولي اكل بقيت ع هذا المنوال يجي ياخذ حاجته ويعوفني ويطلع والاكل يوصلني بكل وقت ابد مينام يمي يدزلي صور ويكلي اخذي رايي روان ورجعيلي الخبر حتى محد يشك بشي
اليوم اجه وبده يهددني
اسمعيني شهد قسما بالله اذا احد عرف بلي يدور بيناتنه لو اسيل ويانه راح تكون نهايتج ع ايدي ومو بس هاي لا حتى زواج اخوج وروان مراح يصير
عافني وطلع تقريبا 22 يوم ع هذا الحال مطلعت من الباب ابد وراها اجه واستقر بالغرفه عرفت زوجته رجعت
هاملني ع الاخير لا كلمه ولا حجايه ويايه بس من يريد ينام ويايه
حيل ضايجه بس مااكدر احجي ابد
بين فتره وفتره يدزلي صور ويكلي اسالي روان ع ذني الي يعجبها دزي الي هذا الحجي مراسله بس
هم هيج سويت من تسالني روان كتلها حلوه تركيا وفرحانه وعايشه بحلم اني
رجعنه للعراق والكل استقبلنه ودخلت عالم ثاني مجنت متوقعه اعيش بي ابد سوه نفسه كدام اهله وروان يحبني ومتلهف عليه
ثاني يوم راح رجع اسيل ومحد عرف هي مسافره ويانه ابد بدت معاناتي وي عمار هاملني ع الاخير ولا بحالي وجان هذا واضح والكل حس اكو شي بس اني اكدت العكس للجميع
بدت بيه اعراض حمل وماادري هل افرح لو احزن لان مااعرف شضاملي المستقبل بعد
بدت تحضيرات زواج منتظر وروان ومنعني منعا باتا اروح لاهلي وابات يخاف اخاف احجي شي وحتى اهلي بقوا يحجون عليه لان مابتت يمهم واعتذرت منهم
مخلاني اروح للصالون وي روان وحيل ضجت من كال خلي اسيل تروح بس روان رفضت
اتحولت لانسانه محطمه بكل معنى حاربوني محاربه نفسيه هو وزوجته بعد ما روان اتزوجت
البيت كله عليه من تنظيف طبخ خاله تساعدني ومتقبل بس هو يتعارك وي الكل وعصبي دائما استغربت كلت شلون روان تكول دائما يتعاركون هو واسيل اشو هسه كله دهن ودبس علاقتهم توب يطلعها للسوك وللمولات وللمطاعم لاهله دائما يرحون سويه
حملي هواي متعبني وكاعد اتاذه بس هو ولا كانو
اليوم جايين بيت جدهم وخالهم وابن خالهم الدكتور هو وزوجته
طبعا البنيه رغم دكتوره حيل حبابه وبسيطه ابد ممتكبره كدرنه اني وياها نكون علاقه ولو بسيطه اتبادلنه الارقام اني وياها انطتني نصائح ع الحمل وكالت لازم تراجعين دكتوره حتى اتابع حالتج
كتلها ان شاء الله
اجه عمار وسوالف وضحك بس من تصد عينه بعيني احسه يتحول لشخص ثاني يباوعلي بحقد وكراهيه
سالني ابن خاله كلي شخبار الحمل وياج متعبج لا
بعدني محجيت كلتله مرته والله تعبانه مبين متعبها الحمل اشو عمار بس يخزر بيه
كلي هم راجعتي دكتوره لا
هوطفر كال اي كل شهركاعد ادزها
امه حجت كالت هاي شوكت ماخذها اشواني ماادري
من تروح لاهلها امها تاخذها
كله ابن خاله وليش عود امها تاخذها ليش موانت
ماعندي مجال وامها افضل
ايا جذاب اصلا لحد الان ممراجعه ولا مره
شلونه وضعج
اني هنا لازم احجي
كتله والله تعبانه وحيل مأذيني الحمل ولحد الان اتقيئ ابد مصرت زينه
شاخذتي علاج
ها مااعرف شنو من علاج محافظته
اذا تكدرين جيبيلي الوصفه خلي اشوفها
بقينه نحجي اني ويا شويه وجان يصيح عمار صوت رج البيت بيذ
ماتكومين تجهزين العشه لوتردين خدامه فرد مره تخدمتج سويتي نفسج كلش وتعبانه في سبيل تتهربين من الشغل مو
حيل خجلت من الكل وبقيت لا اخذ ولا انطي
الكل بقه صافن
بيبيته كامت تحجي عليه
لك عمار شنو هذا الحجي هاي مو شهد نفسها الي كتلت روحك عليها وعملت عمايل عليها
اي نفسها بس متندم والله لو بهذا وعيي فلا اسوي شي
الكل صافن حيل خجلني اني سكتت انسحبت بهدوء رحت للمطبخ عيوني يصبن دمع بدون وعي
جهزت العشه اجتي ويايه نوره زوجة ابن خالهم
خطيه حاولت تخفف عني وخلتها المساله طبيعيه
اسمعي شهد الرياجيل كلهم عصبين عادي لتهتمين وره شويه ينسى كلشي
بس اكو شغله مكاعد افهمها
شنو هالشغله
شنو الخله علاقة اسيل وعمار هيج قويه
والله مااعرف اني عبالي هيج من زمان
لا يمعوده يا زمان ذوله جانو 24 ساعه مشاكل وطلايب ووصلت للطلاك شكم مره بس اشو بعد زواجكم صار العكس
والله مااعرف
زين شلونها علاقتج بي
زينه تقريبا
مااتوقع هذا الشي
حبيت اغير الموضوع
اكلج نوره شعجب لهسه ماكو بيبي وانتو صارلكم هواي متزوجين
والله ياشهد امر الله هذا هواي راجعت يم دكتورات واكدلي مبيه شي وهو همين مبي شي من عرفنه اثنينه مبينه شي تركنه الموضوع وخليناها وراه رب العالمين
ونعم بالله ان شاء الله الله يرزقكم باقرب وقت بحق الامام الحسين
شكرا حبيبتي الله يسمع منج
بقينه نجهز بالعشه اني وياها ورتبنه كلشي ع فجأه اجه عمار وجان بس يصيح ماتفضيها ماطلع هذا عشه هسه حتى لو باجه جان استوت من زمان
هاي ثاني مره يفشلني كدام البنيه والله عيب
هي حجت كالت شنو السالفه عمار تره كاعد نجهز مكاعد نلعب
اسف نوره مجان قصدي عليج قصدي ع شهد
وانت كاعد تشوفنه اني وشهد نجهز سويه سكت عافنه وطلع
والله عجيبه عجيبة عمار متغير تغير جذري
والله ماادري بعد
كملنه العشه واجوي بدوا يتعشون اني اعتذرت منهم بقيت اجهز بالجاي والاستكانات والهي بنفسي كوه كوه
ع فجاه اجه عمار للمطبخ وجان يضربني راجدي
اني اعلمج كاعده تشكين للغربه وتكليلهم عمار مو زين ويايه
لا والله وداعت ابني الي ابطني مشتكيت ولا حجيت ولا حرف يخصك ابد
لتحلفين جذب ولدخلين الطفل بالنص خل يطلعون واني اعلمج
عافني وطلع
والله محتاره شاسوي وي عمار لازم اوكفه عند حده بس والله خايفه اخاف تصير مشكله بينه وبين مرتضى من جديد واحنه مصدكنه هدئوا اثنينهم
بقيت بقلق ها اخاف يضربني وياثر ع الطفل
كملوا العشه وصبو جاي اشوفه يضحك ويسولف ويتشاقه وي اسيل واني هاملني ع الاخير قررت بس يضربني لازم احجي ويا واسويلي حل ميصير هيج
راحوا بيت جده اني صعدت للغرفه بعدني هستوني انزع بحجابي وجان يدخل مثل العاصفه تعالي بنت الكلب
عمار مااسمحلك تغلطع ع ابويه ميصير هيج
والله انعل ابوج لا ابو الخلفج بنت النعال شنو تشكين للغربه واطلعين اسرارنه ماتستحين هاي اهلج الساقطين هيج معلمينج
عمار هاي شبيك انت شغيرك هيج
جان يجرني من شعري حيل
اخ فدوه عمار والله يوجعني راسي
ضربني راجدي حقيره كلبه
عمار والله مسويت شي ولا حجيت لاي بشر
شحال لو مااسيل سمعتج باذنها
والله جذابه والاسلام جذابه
ماكو جذابه غيرج انت بنت النعال
عمار ميصير هيج تسوي بيه لازم تحترمني اني زوجتك
انت قندرتي مو زوجتي
قسما بالله نهايتج ع ايدي اذا سمعتج تشكين لاحد
عافني وطلع بقيت ابجي ع حظي الاسود اني لوين وافقت عليه
حيل اتندمت ع زواجي بعمار بس بعد ميفيد الندم
بده حملي يتعبني اكثر وبطني كبرت وبين عليه الحمل
حسيت بالام قويه حيل اتاذيت قررت ادزله رسائل لعمار بلكي اقنعه اروح للدكتوره لو امي تاخذني لو خاله
دزيتله رسائل
عمار الله يخليك خلي اروح للدكتوره والله حيل متاذيه وبطني موتتني تموت
تحلمين اطلعين من الباب
عمار فدوه خلي اروح لو امي تاخذني لو خاله والله مااروح لا منا ولا منا بس للدكتوره
اكلي خره وانجبي انسيها لهاي السالفه
والله خايفه اخاف يصير بالطفل شي والله مااسامحك للموت اذا صار شي
دولي وجه الفكر بس تشائمين
عفته وتركته بس حيل ضجت نمت وسكتت قررت ماانزل اسوي عشه لان من صدك مااكدر
كوه كعدت صليت واني كاعده ورجعت لفراشي احس بنفسي دايخه ونفسي تلعب
رحت للحمام اتقيأت لمن طلعت روحي طلعت من الحمام وجان يجيني وجها ميتفسر ابد
ها يالعروسه اجيبلج الاكل لهنا اجيبلج خدامه تخدمج
عمار الله يخليك عوفني بحال سبيلي والله متاذيه حيل والبيه مكفيني
كل هاي الهوسه ع مود اطلعين
عمار انت تحجي صدك شوف حالي والله تعبانه وكوه واكفه ومحمد حيل متاذيه واصلا مااروح بعد للدكتوره حتى اذا انت كتلي روحي
لا حبابه ابوس ايدج ورجلج بس روحي
عفته يحجي ورحت لفراشي لان احس بنفسي راح ينغمه عليه
جان يجرني حيل ويضربني راجدي
بنت الكلب شلون كاعد احجي وياج وانت ادورين وجهج وتروحين
بهاي الاثناء حسيت عيوني غوشن وكمت احس الدنيه تفتر بيه لحضات وفقدت توازني بعد معرفت شنو الي صار
كعدت لكيت خاله وعمار فوك راسي واني بالمستشفى
شنو الي صار خاله
خاله وكعتي علينه ضغطج هابط حيل لو ماجبناج بسرعه جان صفر ضغطج
اباوع ع عمار وجها مخطوف بس هو كاعد يتهرب مني ابد مخله عينه بعيني
اجه دكتور قاس ضغطي كال استقرت حالتها تكدرون تخرجونها بس ضروري تعرضوها ع دكتورتها
كله عمار ان شاء الله
طلعنه للبيت خاله جابتلي عشه خطبه
ليش خاله اذا مريضه وماالج خلك ماتحجين حتى اخذج للدكتوره ليش ساكته
عمار واكف فوك راسي مااكدر انطق ولا حرف
كتلها خاله فجأه اتقيأت واتخربطت مجان بيه شي
باوعت ع عمار وكلتله باجر لازم تاخذها للدكتوره ميصير هيج ماما هاملها
هاي شنو يوم شنو هاملها شتردين اسويلها مثلا ومالت اخذها للدكتوره من سابع المستحيلات انت اخذيها وروحي لو اوديها لامها تاخذها
عيب شنو امها تاخذها اني غصبا عليه اخذها
روحي خاله نامي وباجر ان شاء الله اني اخذج
ان شاء الله
نمت وثاني يوم رحت للدكتوره عمو اخذنه
فحصتني الدكتوره كالت تقلصات قويه عندج ينرادلج دخول مستشفى يوم كامل ع مود انطيج علاج بالمغذي
حددت نوع الجنس وخبرتني كالت بنيه بيج حيل فرحت احب البنيه بشكل جنوني
كالت باجر الصبح تعالي للمستشفى
طلعنه ورجعنه للبيت خاله كالت اني اروح وياج ادخل لتخبرين اهلج خطيه يقلقون ماكو شي
عمار ابد مكلف نفسه ولا سالني ابد
دزيتله رساله وخبرته ع المستشفى مجاوبني ابد
دخلت بس اني وخاله عمو اجانه جاب غده خطيه وبالليل اجوي خاله ومرته وبيبيته وجده وجابولنه عشه وياهم وهو حتى مفكر يراسلني ويطمأن عليه حيل ضجت وانقهرت والكل لاحظ عليه هذا الشي
ثاني يوم رجعنه للبيت وخاله مخلتني اتحرك ابد حسيت بنفسي هواي ارتاحيت وبطني راح الالم منها
بديت انزل واني وخاله معارك كوه تخليني انظف واطبخ وياها اسيل لاغينها من الوجود من تجينه روان دائما تتعارك وياها بس هي ولا كانو
خاله ملت منها وهم ماكو فائده وهي مرات عود تنظف بس اساسها وسخه ومتنظف زين ابد
صارت علاقتي قويه بنوره زوجة كرار ابن خالهم وكمنه نتراسل سوينه كروب ع الفايبر اني وديما وهي وروان دائما ندردش سويه
مرات ادخل ع الفيس بس اباوع ماانشر لان اضوج لا طلعه ولا طبه مرات اخابر ايات ودائما تحجي عليه ليش متباتين واني اطلع الف عذر وعذر مرات اكلها مااعرف انام بغيرمكان ومرات اكلها ميقبل عمار يفاركني وهكذا
روان هم متبات ابد دائما تجي الصبح وترجع بالليل مرات اضوج ع الجامعه الي تركتها اكول حرامات راحت عليه هاي السنه هسه احنه بشهر الواحد وامتحانات نصف السنه بدت روان ماتجي هاي الفتره لان امتحاناتها
بس اليوم اتفاجأنه كلنه من اجت وبيدها جنطه اتوقعنه زعلانه بس اشو تكول سافر مرتضى وكلتلي روحي ابقي يم اهلج هناك يمهم خطيه بقوا وحدهم حيل فرحت كلت اروح اغير جو بس اشو هذا انكلب طنطل عليه ولعب طوبه بيه كال مترحين وخجلني كدام الكل ضجت وانقهرت بس مابيدي شي
بعدين كلت هم ميخالف روان هي تبقى يمي ونغير جو اني وياها قررنا انام سويه وحاولت اكون طبيعيه كدامها بس دائما هوفاضحني بتصرفاته ويايه
استاذنه من عمار هم روان وهم اني وجان ميهمه امري اصلا بس اخاف يسويلي سالفه
سهرنه اني وروان سولفتلي كلشي يخصها وع اساس ثاني يوم اني اسولف واكيد مااكدر اسولف لان اخاف من عمار ومااريد مشاكل بين العائلتين لان اخواني وبالذات مرتضى يموت ع الطلايب والعركات واني اخاف عليهم بس يعرفون الحقيقه اكيد يتعاركون وراح تتاثر علاقته مرتضى وروان
ثاني يوم مارست يومي مثل كل يوم بس اجه عمار وحذرني احجي شي وي روان لان مو من صالحي وكلي حتى بنتي اخذها منج واخليج تبجين دم والله
قررت مااحجي شي وجان هذا اكبر غلط مني من خضعت اله جان دائما يتعمد يسولف وي اسيل ويضحك ويسمعها غزل اجذب عليكم اذا اكول عادي لا اغار لو يطيح بيدي اشرب من دمهم اثنينهم احس بركان بداخلي يغلي غلي
اتغديت وصعدت بغرفتي انام وارتاح لان كاعد اتعب هواي
للعصر كعدت نظفت شويه واجوي بيت جدهم اني ارتاح من يجون اغير جو وي نوره وبنفس الوقت اضوج من دائما يحاول يفشلني كدامهم
بديت اجهز بالعشه ونوره ويايه روان نايمه بعدهي
اذن صليت ورجعت كملت شغلي
نزلت روان واتخبلت من شافتني وكامت تحجي كوه كعدتني وهي كملت ونوره ساعدتنه واسيل مشفت شكلها ابد
صار وقت العشه والكل اتجمع وجان تنزل اسيل مثل الملكه ع الجاهز من كالت لو ماحبيبي يدز عليه ميعرف ياكل بدوني احس سجينه بنص كلبي وضربتها
حتى عشه مااشتهي ابد كرهت كل شي بالدنيا وكرهت الساعه الحبيت بيها عمار
اني تعودت كل مايجون بيت جده لازم يخجلني كدامهم ويغثني اتعذرت من الكل وردت اصعد مقبلوا بس اني اصريت لان من صدك نسدت نفسيتي
قررت هم انام يم روان رحت لغرفتي سبحت لان تعبانه وكلي ريحة اكل وبعدها رحت لغرفة روان حاولت انام بس مكدرت افور دم دخلت للفيس شويه جنت دائما احب ادخل حفلات بس ابد مااشارك ولا اعلق نهائيا شكد حاولوا واتمنوا احجي بس اني ولا كانو جانو يسموني الخرسه الي بالكروب كلهم
اكو شخص اتخبل خبال كال ادفع نص عمري ثمن بس اشوف تعليق منج دخلي خاص هواي اتوسل وحلفني بس اني ولا كانو كلت اخاف جهازي مراقب من عمار وهو شلون يريد حجه عليه
خليت الهتفون باذني ورحت بغير عالم اريد بس انسى همومي مااعرف شكد بقيت ع فجأه وجان الباب يندفر رغم الهتفون باذني بس سمعت الباب التفتت وجان اشوف عمار صاير اعصاب استغربت بالبدايه بعدين كلت يجوز لان راح انام يم روان
جان يفقد ويايه ضربني بكل مكان بجسمي مفهمت غير وين وديتيهن شنو هنه مااعرف
الله يخليك عمار عوفني خل افهم الموضوع شنو
لج بنت الفكر وصلت وياج تبوكيني احجي وين وديتي الاوراق
يااوراق والله مااعرف عن شنو تحجي
والله اليوم نهايتج ع ايدي اريد اعيد تربيتج من جديد
هواي اذاني اني حاميه بطني اخاف ع بنتي كلشي ولا يصير شي بيها
عمار فدوه اروحلك عوفني والله مو زين ع الطفله
اس بحجة الطفله اعملي عمايل
والله ادوسج بقندرتي انت وياها
يابه والقران مماخذه شي ولا داخله غرفتكم ابد وروحه لرسول
طبعا طلعت مني سهو ممنتبها ع نفسي وجان يتحول هنا لوحش ميرحم ابد فقد كام يسحل بيه بالدرج لو ما روان وخاله يجن يخلصني منه كوه جان متت بين اديه
كمت اصيح اريد اروح لاهلي وخلي شيصير يصير ماابقى لحظه وحده هنا بعد
دخلتني روان للغرفه كوه وصلتني جنت منتهيه من الضرب
جابتلي ملابس وطلبت مني اسبح حتى هم ارتاح وهم اغسل الدم الي مااعرف منين طلع بالضبط
سبحت وفعلا ارتاحيت شويه لكيت روان بالغرفه كمت ابجي فدوه روان خابري اهلي خلي يجون ياخذوني لان من صدك تعبت
لج خطيه اهلج تقلقيهم اذا شافوج بهذا المنظر الله اليعلم شراح تكون ردة فعلهم راح يتحملون الصدمه لو لا
لعد شلون مااريد ابقى هنا ولا لحضه وحده كرهته لعمار والله كرهته
تعالي سولفيلي شنو الصار ليش هيج سوه بيج
والله ماادري كاعده هنا فجأه اجه وكام يغلط ويسب كلشي مفهمت غير وين وديتيهن شنو هنه مااعرف
بعدها سمعته ذكر اوراق وصلت وياه يتهمني اسرق منه فلوس لج روان تصدكين اسويها اني معقوله اسرق منه ليش اني محتاجه احجي وابجي
روان تخبلت عافتني وطلعت مابيه حيل حتى اصيح وراها لهنا وكافي لازم اسويله حد عمار
وجهي ازرك من الضرب لحضات وسمعت الصايح مهتميت لفيت راسي ونمت بس دخلوا عليه عمار وعمو وخاله وروان كعدت
حجه عمو تعالي بابا اكعدي خلي نفهم السالفه كعدت عيوني بالكاع من الخجل والله عيب هيج يخليني بموقف محرج كدام اهله بسيطه الك عمار
احجي عمار خل نسمع منك وبعدين نسمع من شهد
اني حجيت الي عندي عندي 20 ورقه خليتهن ع الميز ونزلنه كلنه جوه بس شهد فوك صعدنه قبل شويه ولكيتهن ماكو منو غيرها الي يمد ايده عليهن
والله العظيم ياعمو لهاي اللحضه ماداخله غرفتهم ولا شايفتها نهائيا شعندي بيها غرفتهم وادخل وثانيه وبعد اني ممحتاجه الحمد لله بنت خير ودلال ومتربايه احسن تربيه يستحيل افكر بيوم اسرق وشنو الدافع الي يخليني اسرق اشو لا اطلع ولا امشي وين اوديهن الفلوس
امير اجه يمنه يلعب صاحته روان اموري حبيبي نلعب اني وياك هو فرج اي نلعب بس شنو كالتله تعال نطلع بره نلعب واني افهمك مهتمينه الهم هاي بطرانه احنه وين وهي وين
عمار كال سدوا الموضوع وخلي تكعد وتنجب
لا مراح اسد الموضوع ومراح اكعد واسكت
انت تهمتني اتهام باطل كدام الكل واني بريئه ممسويه شي شهد سدي الموضوع لا ارتكب بحقكج جريمه
ميهمني بعد شتسوي سوي
شهههههههههههد اكلي خره واسكتي
ادخل عمو عمار اطلع بره لتخلي الشيطان يركبك وبعدين تتندم وانت يابنتي اهدي وراح يجرالج الي تردي
عمو كلشي مااريد غير بس اروح لاهلي
اي هو هذا الحجي تردين حجه حتى ترحين لاهلج بس نجوم الظهر اقرب الج والله رجلج تنكسر اذا طلعتي من الباب
عافنه وطلع عمو استهدي بالرحمن والله يجرالج الي تردي بس خلي يطيب وجهج ميصير هيج ترحين لاهلج واني بيدي ادزج اريد عمار ياخذ عبره وابقي هناك لترجعين لمن يجر عدل يله
تقريبا اقتنعت لان صدك مااكدر اروح وهيج وجهي يتخبلون اهلي اذا شافوني
عافوني وطلعوا يمكن بعدهم منازلين الدرج وجان تصير الهوسه من جديد
كلت شعليه لااطلع ولا ادخل
اشو الكل رجع للغرفه وجانت روان عصبيه نار كلتلي الفلوس طلعن عند اسيل وابنها مخليته هو يبوكهن من ابو خوش تربيه مربيه الطفل
حيل فرحت من طلعت برائتي وبسرعه الحمد لله
كالت استدرجته لامير واعترفلي بكلشي
وشكال عمار
اسكتي لعبنه بي طوبه اني وماما وبابا وهاي الحيه نكرت تكول حذب انت لقنتي لامير حتى تبررين حماتج
بس اهلي مقصروا لعبوا بيها لعب
حيل وياهم
ولج متت حركه وقهر من شفت عمار يدافع الها ولا كانو شي صاير
تعالي يطبهم طوب نارهم تاكل حطبهم ان شاء الله تبوك فلوسه كلهن ولا تضوجين اهم شي اتبرر موقفي
يالفطيره وهذا وجهج الازرك والضرب والاهانه
عادي بس اطيب اروح لاهلي واني اعلمه
ديري بالج راح يذبح نفسه وراج وراح يعمل المستحيل حتى يرجعج
عساه ميرجعني ياريت خلي ارتاح
تعالي هسه تسولفيلي كلشي بينج وبين عمار
اصلا ماكو شي بيناتنه بس هاي مرته هي الحيه وهي الي تفرق بيناتنه
اني متعجبه هاي شلون كام هيج يعاملها عمار ماادري
حظي غير اني ادري بحظي اسود ومصخم وين مااحطها سوده مصخمه
تعالي سولفي لا اموتج والله
لج والله ماكو شي نسولف بي وهسه حيل تعبانه اريد انام
ردت انام بس حسيت شي وكع عليه رحت للحمام وجان الكي دم واكع عليه اتخبلت صحت روان روان تعالي لج الحكيني اجتي تركض
كتلها دم كاعد يوكع عليه وبكثره
عافتني وراحت تركض صاحت خاله
جابتلي ملابس وسانتي بدلت وطلعت لكيت خاله مجهزه نفسها كالت خل ناخذج للمستشفى اخاف مو زين عليج
ابجي لايربي كلشي ولا تفجعني ابنتي خاله واذا شافو وجهي
والله ماادري خاله بس ميخالف لازم ناخذج
روان شوفيلي شي خفيف اخلي بوشيه احسن
جابتلي شال اسود حيل خفيف وسوته بوشيه ولبسته عمار مشفتت شكله ابد
اخذنه عمو ورحنه بس بده الدم يزداد عليه كمت ابجي لايربي كلشي ولا اخسر بنتي اخجل كدام عمو احجي شي بده الم فضيع ابطني
هنا متحملت كتله عمو فدوه استعجل بعد مااتحمل الالم
وصلنه للمستشفى اني بعدنه مداخلين اختل توازني بعد مااشوف بعيوني لحضات ورحت بغير عالم شفت ابني كبالي ورسول كبالي يضحكون بوجهي واني ابجي اريد اوصل يمهم بس همه يبتعدون عني اركض وراهم وهم يبتعدون اكثر حيل مشتاقه لابني ولرسول كتله فدوه رسول بس اوكف تعال اخذني وياك اعيش مشتاقه الك هواي بس ولا كانو اخر شي كدرت الزم ابني بيدي اريد ابوسه وجان .......
