رواية قمر الزمان في قصر الباشا الفصل الثاني 2 بقلم هويدا زغلول

قمر وقعت من طولها واغمى عليها في حضن محمود والكل اتلم حواليها والراجل طلع صورة قديمة من الشنطة وبان فيها سر القديم 

لكن في الوقت ده محمود قعد على الكرسي وقعد قمر جنبه وفضل يفوق فيها لكن ما فاقتش خدها وكلهم طلعوا وراه وطلع على الاوضه ونيمها على السرير 

وكلهم كانوا حواليها على السرير وفريد طلع الصوره ووريها لمحمود وكان صابر واقف جنبه ونهله وفريد قال 

فريد 

اتفضل يا محمود باشا عشان ما تقولش عليا ان انا كداب اهي هي دي الصوره بصي البنت نفس الملامح البنت دي بندور عليها بقى لنا سنين طويله دي مليونيره دي ورشه 500 مليون جنيه من ابوها اسماعيل الباشا الله يرحمه 

في الوقت ده قمر فاقت وقالت لفريد 

قمر 

مين يا اخويا بتقول ايه هم ال 500 مليون جنيه دول ممكن يتعدوا هو ده طلع رقم اصلا ولا ايه ده انا بحسبه بيكون في لعبه بنك الحظ وبس 

محمود قرب منها باستغراب وقال بصوت واطي 

محمود 

انت هتستعبطي يا بنت انت ولا ايه هي مين دي اللي مليونيره بقول لك ايه انت بياعه عيش اوعي تنسي نفسك ولا انت مخبيه سر ولا ما اعرفوش 

قمر بصوت واطي 

وانا مالي يا لمبي قصدي هو انا مالي يا باشا المحامي بتاعكم قال ان انا مليونيره هو انا ينفع اكذب المحامي عايز توديني في كلبوش بدل المحامي قال ان انا مليونيره يبقى انا مليونيره ما فيش كلام 

في الوقت ده صابر قرب منها ومسك ايديها وطبطب عليها وقال بحنيه 

صابر 

حمد لله على السلامه يا غاليه يا بنت الغالي معقوله يا بنتي بدور عليك كنت طول السنين دي وفي الاخر انت تكوني مرات ابني اى الصدفه الجميله والسعيده دي 

قمر 

شفت بقى يا باشا عشان تعرف بس ان ابنك مش متجوز اي حد 

صابر بزعل 

بس انا ما بحبش الكذب يا بنتي انت عرفتيني ان اهلك في باريس وانت اهلك كلهم الله يرحمهم ليه بس الكذب يا حبيبتي 

قمر مثلت ان هي بتعيط وقالت 

قمر 

اعمل ايه بس يا باشا ما انا لازم اعرفكم ان انا ليا اهل وسند امال مثلا تاكلوني واجي لما تطلق تقولي لي ولا في قايمه ولا في مؤخر ويلا اطلعي بره 

صابر بضحك 

ههههه لا يا بنتي احنا ما عندناش الكلام ده اهم حاجه ان انت تكوني طيبه وانت ومحمود تعيشوا اجمل ايام حياتكم انا مش عايز غير كده 

وبعديها نهله كانت غيرانه جدا من قمر وقربت من صابر وقالت 

نهله 

يا بابا سيبك بقى من الكلام ده ولا قمر ولا شمس انا عايزه اعرف انت البوليس بيدور عليك ليه يا حبيبي هو انت عامل ايه 

صابر 

اه والله فكرتيني يا نهله ده انا كنت ناسي خالص ان احنا عاملين مشكله يا ريتني سمعت كلامك يا فريد ودفعت كل الضرايب اللي عليا 

فريد 

ما قلت لك يا باشا لازم ندفع كل الضرايب اللي علينا ما ينفعش حد يهزر في الكلام ده على العموم لازم تنزل بنفسك القاهره دلوقتي وتدفع كل الضرايب علشان المشكله ما تكبرش عن كده 

نهله 

طب الحمد لله ده انا بحسب الموضوع كبير لا يا بابا ادفع الضرائب اللي عليك ويلا بينا بقى نمشي هنا عشان الفيلا بقت دمها تقيل قوي 

قمر بصيت لها بعصبيه وقالت 

قمر 

والله يا حبيبتي الفيلا دمها ما كانش ثقيل غير لما دخلتي علينا انت وشنط التموين بتاعتك 

نهله 

بقول لك ايه يا بنت انت انا ما كلمتكيش ولو مفكره نفسك ان انت هانم عليا تبقي غلطانه واوعي تعملي راسك براسي 

قمر قامت من على السرير وقربت منها وقالت 

قمر 

لا يا عينيا ده انا هعمل راسي براسك وقوي كمان ده دلوقتي بقيت هانم بنت باشا وقمر الزمان لما بتكون هانم الدنيا كلها بتبقى تحت رجليها 

محمود وقف جنب قمر وطبطب على شعرها وقال 

محمود

قمر يا حبيبتي اهدي بقى شويه مش عايزين مشاكل الله يخليك وانت يا نهله ده بيتك وبيت اخوك يا حبيبتي تنوري فيه في اي وقت 

صابر 

بس خلاص خلاص مش عايز كلام كثير الكل يحضر الشنط بتاعته عشان كلنا نازلين القاهره بكره وانت يا محمود قفل كل الشركات اللي هنا بتاعتك دلوقتي عشان لازم تكون موجود معايا ومع مراتك لما تستلم ورثها ويا ريت تحضر قسيمه الجواز عشان لازم تستلم الورث بتاعها بقسيمه الجواز 

محمود وقمر بصوا لبعض بتوتر وقمر قالت 

قمر 

اه طبعا امال ايه ان شاء الله كل حاجه هتبقى تمام 

محمود 

ايوه اكيد وان شاء الله يا بابا احنا هنحضر الشنط وبكره الصبح كلنا نروح على القاهره تصبحوا على خير 

وبعديها نهله وصابر وفريد خرجوا بره الاوضه وصابر خلى رقيه تحضر اوضه لفريد عشان ينام فيها وثاني يوم يمشي معاهم 

اما نهله دخلت اوضتها وكانت متعصبه جدا وقالت في نفسها 

نهله 

لا لا الموضوع ده في حاجه غلط البنت دي مش طبيعيه ومخبيه سر خطير وانا متاكده من كده وهفضل وراكي يا قمر الزمان لحد ما اعرف انت مخبيه ايه 

اما عند قمر ومحمود كانوا قاعدين على الكنبه وقمر متوتره وقالت 

قمر 

مش بقول لك منحوسه من يومي قل لي بقى هنجيب قسيمه الجواز منين دلوقتي يا محمود 

محمود 

كده الكذبه ممكن تتكشف وانا مش عايزها تتكشف خلاص ما فيش غير حل واحد ان انا فعلا اكتب كتابي عليك واكيد بابا مش هياخد باله من التاريخ ان شاء الله 

قمر بصدمه 

نعم يا اخويا لا بقول لك ايه اوعى يكون الكلام ده كله على اتفاق انت وابوك وبتعملوا علي حوار عشان تتجوزني بجد

محمود قرب منها ومسك ايديها بعصبيه وقال

محمود 

انت يا بنت عبيطه ولا هبله انت معقوله مش عاوزه تتجوزيني انا ده انا محمود باشا اللي اي بنت تتمناني 

قمر زقه ايديه وبصيت له بتحدي وقالت 

قمر 

اديك قلت يا محمود اي بنت تتمناك اما انا مش اي بنت انا قمر الزمان مش اي حد يدخل دماغي وانت اصلا مش داخل دماغي ببصله 

محمود 

لا بقول لك ايه انت شكلك كده هتنامي النهارده في البلكونه لان انا مش هنام في البلكونه تاني ولسانك الطويل ده انا هقصه لك مش معنى ان انت طلعتي غنيه وبنت باشا هتشوفي نفسك عليا 

قمر 

لا يا عينيا انا غنيه النفس من يومي والفلوس دي عمرها ما تهز مني شعره انا اهم حاجه عندي ان انا اكون مبسوطه وفرحانه والفلوس عمرها ما بتجيب راحه البال 

محمود قرب منها وبص في عيونها وقال 

محمود 

يعني انت عاوزه تثبتي لي ان انت مش فرحانه ان انت ورثتي 500 مليون جنيه 

قمر 

ان شاء الله اعدمك يا اخويا لو كنت فرحانه عادي جدا ايه يعني الفلوس بتروح وتيجي وانا مش فارق معايا اي حاجه انا اهم حاجه عندي ان انا اكون فرحانه وسعيده 

محمود 

بس برده عايز اعرف ايه الصدفه الغريبه دي انا حاسس ان في حاجه غلط معقوله انت قمر الزمان اللي بابا بيدور عليها من زمان 

قمر 

ما قلنا مره ايوه وانت هتفضل توجع دماغنا كتير ولا ايه المحامي قال انا قمر الزمان يبقى خلص الكلام وبقول لك ايه ما تبقاش غبي زي اختك بقى انا مش عارفه جوزها يا اخويا كان مستحملها ازاي 

في الوقت ده محمود مسك ايد قمر وخرجها للبلكونه وقفل البلكونه وقال لها باي باي بايديه 

اما قمر جوه البلكونه قالت في نفسها 

قمر 

اه يا مجنون وانا اللي كنت فاكراك داخل توريني القمر وتقول لي انت اهو في السما طلعت عبيط وعايز تخليني انام في البلكونه ماشي يا محمود بس انت مش قدي يا عينيا 

وفي الوقت ده قمر خبطت على البلكونه وعملت نفسها بطنها وجعاها وفضلت تصرخ 

محمود جري عليها بسرعه وفتح البلكونه واول ما شافته دخلت بسرعه وخرجته هو وقفت البلكونه وقالت 

قمر 

بلاش تلعب مع قمر الزمان يا باشا تصبح على خير 

وبعديها قفلت قزاز البلكونه وفعلا نامت وكانت عماله تحلم معقوله هتبتدي حياه المليونيره من بكره وهتعيش هانم بنت باشا طول عمرها بعد ايام الفقر اللي هي عاشتها 

وثاني يوم الكل كان صاحي بدري ومحضر الشنط واكون واقفين قدام الفيلا بيركبوا العربيات 

وفريد وصابر ونهله ركبوا عربيه صابر ومشيوا 

اما محمود وقمر ركبوا العربيه ومشي وراهم علشان يسافروا للقاهره عند فيله صابر 

لكن وهم ماشيين لطريق محمود عكس طريقه وراح عند المحامي علشان يكتب كتابه هو وقمر الزمان وفعلا كلم صحابه عشان يجوا يشهدوا وكتبوا الكتاب وفعلا استنوا الماذون لحد ما جاب لهم القسيمه ومشيوا على طول 

وهم ماشيين في العربيه محمود بص في عيونها ومسك ايديها وقال 

محمود

بقيتي مراتي رسمي يا قمر الزمان 

قمر بابتسامه 

سبحان الله مع ان انت ما كنتش فارس احلامي ده انا كنت مستنيه فارس احلامي كده يكون الواد حمو العجلاتي وياخذني وراها على العجله ونجري نجري ما نعرفش نروح على فين بس اهو نجري وخلاص 

محمود بصدمه 

نعم يا اختي حمو العجلاتي بقى معقوله بتشبها حمو العجلاتي بيا انا يا قمر 

قمر 

وماله يا اخويا ما شبهوش بيك ليه ده الصلاه على النبي عليه كسيب وجيبه دايما مليان خمسات وعشرات عشان العيال بتاجر منه عجل انت بقى اجيبك في ايه 

محمود بص لها بابتسامه وقال 

محمود 

جيبي في قسيمه جوازنا يا مراتي يا ام لسان طويل يا اللي عاوزه قص لسانك 

قمر بضحك 

ههههههه خلاص بقى يا حوده بهزر معاك وغلاوه امك انا في حاجه كنت عايزه اعملها من زمان اول ما يتكتب كتابي ما انت عارف ان انا ابويا وامي الله يرحمهم مش موجودين ولازم ازغرط لنفسي لولولولى

محمود 

ربنا يقدرني واسعدك وخدي بالك انا كمان ما كانش ليا الجواز ابدا بس اعمل ايه بقى نصيبي 

قمر 

ايوه انا كنت حاسه ان الموضوع في حاجه غلط ما كانش ليك الجواز ليه يا حوده عندك مره جلدي مش كده طلعت جربان في الاخر اه يا عيني عليا يا حسرتك يا قمر 

محمود 

بس بس حيلك حيلك ايه اللي انت بتقوليه ده مرض ايه اللي بتتكلمي عليه انا بس بحب ستات وبحب كل يوم اعرف واحده جديده لكن اتدبست بقى والحمد لله 

قمر قربت منه ومسكته من الهدوم وقالت 

قمر 

خد بالك يا حوده انت متجوز قمر الزمان بيعت العيش يعني بتفهمها وهي طايره لو فكرت نفسك ان انت هتعرف تلعب بديلك كده ولا كده تبقى غلطان يا عينيا 

محمود 

معقوله ابص في وش القمر ده كل يوم وهبص لحد ثاني هتصدقيني لو قلت لك ان انا فرحان بجد ان انا اتجوزتك 

في الوقت ده قمر قلبها دقه واتكسفت وبصت الناحيه الثانيه وقالت 

قمر 

اه هصدقك يا محمود لان انا فرحانه بالجواز انا كمان

وبعد كم ساعه كانوا كلهم وصلوا فيله صابر وطبعا صابر وفريد ونهله وصلوا الاول وبعديها بساعه دخل عليهم الفيلا محمود وقمر واول ما دخلت بصت على الفيلا شمال ويمين وبصت لنهله وقالت 

قمر 

يا اختي بلا نيله عماله تتكبري علينا في الراحه وفي الجايه ومكبرها على جوزك قوي وانتم العنكبوت معشش عندكم في كل مكان 

نهله 

لا بقول لك ايه احترمي نفسك معايا في الكلام انا ست البيت هنا سامعه ولا لا الكلمه كلمتي 

قمر 

يا لهوي بلاش تجيب التهزيء لنفسك انت ست البيت ده يبقى انت معفنه ومش عارفه تنظفي الفيلا قومي يا اختي بدل انت حاطايه المناكير كل يوم لون شكل نظفي فيلتك 

في الوقت ده محمود اتدخل وقال 

محمود 

الله يخليك وكفايه خناق بقى يلا بينا يا قمر نطلع على الاوضه نرتاح ويا بابا القسيمه معانا انا اتاخرت شويه لاني نسيتها ورحت جبتها من الفيلا وجيت ويا ريت حضرتك تشوف المحامي علشان قمر تخلص كل الورق بتاعها وتستلم الورث 

وبعديها قمر ومحمود طلعوا على الاوضه علشان يرتاحوا 

اما نهله بصه لصابر وقالت 

نهله 

وانا كمان يا بابا هخلي السواق يروحني لحد البيت عشان عايزه اجيب بقيت حاجتي وهاجي على طول 

صابر 

ماشي يا حبيبتي وما لكيش دعوه بمنير خالص وحسابه معايا بعدين 

وفعلا نهله ركبت العربيه عشان تروح شقتها 

اما عند منير كان قاعد ومشغل اغاني وفي واحده قدامه عماله ترقص وهو بيسقف لها وبيقول 

منير 

اللهم صل على النبي بحبك يا مهلبيه لما بتكوني عسليه ايوه كده احبك يا ستاموني مهما الناس لاموني تصدقي يا فوفه ان انا عمري ما فرحت غير النهارده 

فوفه البنت اللي اتعرف عليها جديد بطلت رقص وقعدت جنب وقالت 

فوفه 

ليه بس كده يا عينيا معقوله ده انت راجل وكسيب ومش مخلي بيتك محتاج حاجه يبقى زعلان ليه ده المفروض مراتك تتمنى لك الرضا ترضى 

منير بزعل 

اسكت يا فوفه مش عايز انكد عليك واشيلك همي ده انا في نكد من زمان مراتي نهله في الراحه والجايه تقول لي انا نهله بنت صابر باشا عادي هو انت فاكراني بخاف منها ولا ايه عمري ما خفت منها ابدا 

فوفه 

راجل يا اخويا برافو عليك ايوه ما تخافش منها انت اللي بتاكلها وبتشربها يبقى ما ينفعش ترفع عينيها فيك اصلا 

منير 

ومش بس كده يا فوفه عارفه لو انا شفتها هقول لها ايه هقول لها امشي اطلعي بره انا مش عايز اشوف وشك هنا ثاني وفوفه هي ست البيت وانت الخدامه يا نهله 

في الوقت ده نهله فتحت باب الشقه وهم قاعدين في الاوضه واول ما منير سمع صوتها بص الفوفه وقال بخوف 

منير 

يا نهار ازرق نهله جت قومي يا فوفه بسرعه اعملي نفسك خدامه وبتنفضي وبتكنسي وغلاوه امك 

فوفه 

يا نهارك اسود مش كنت من شويه عامل فيها سوبر مان قلبت عنتر فجله ليه بس قول لها تطلع بره 

منير 

بقول لك قومي انت ممكن تخلي ايامي كلها سوداء وزرقاء ده انت ما تعرفيش اقول لك على حاجه انا جبان يا ستي قومي بقى 

في الوقت ده نهله دخلت الاوضه وفعلا فوفا بدات تنظف ومنير واقف جنبها وعمال يتعصب عليها ويقول 

منير 

ما تخلصي يا بنت انت ونضفي عدل عايز مراتي لما تيجي في اي وقت تلاقي الشقه نظيفه انا مش عايز اتعبها ابدا 

في الوقت ده نهله دخلت ولما لقيته بيزعق وعرفت ان فوفه خدامه ابتسمت وقربت منه وقالت 

نهله 

يا حبيبي يا منير هو انت بجد جايب لي خدامه منيايه ما اتحايلت عليك وانت بخير ما رضيتش تجيب لي اي خدامه 

منير بص لها وعمل نفسه مصدوم وقال 

منير

ايه ده نهله يا حبيبتي يا روح قلبي وحشتيني جدا حمد لله على السلامه جيتي امتى مش خلاص بقى كفايه زعل ولا انت لسه زعلانه 

نهله 

بصراحه كده كنت جايه اخد بقيه هدومي واروح عند فيلا بابا عشان انا لسه زعلانه منك بس بعد المفاجاه الحلوه دي وان انت جبتني خدامه كده خلاص ما فيش اي زعل 

منير قرب من نهله وباس ايديها وقال 

منير 

يا حبيبه قلبي يا نهله ده انت عيوني اللي انا بشوف بيها ده انت قلبي اللي بيدق ربنا يخليكي ليا 

نهله 

ويخليك ليا يا منير بعد اذنك بقى اخذ الخدامه علشان عايزاها تغسل لي السجاد يلا تعالي ورايا يا خدامه 

وبعديها نهله خرجت من الاوضه وفوفا قربت من منير ومسكته من هدومه وقالت 

فوفه 

ده انت نهارك اسود ومش معدي النهارده يا منير انا خدامه انا هغسل السجاد ده انت ليلتك زرقاء معايا 

منير مسك ايديها وبسها وقال 

منير 

حقك علي وغلاوه امي لهديكي الفلوس الضعف بس عشان خاطري بلاش تكشفيني 

فوفا 

يا عم ابعد عني انت لو اتطلقت ربنا بيحبك انت شكلها زي الحيزبونه بالظبط 

وبعديها فوفه راحت عند نهله وفعلا غسلت لها كل السجاد ونهله طلعت عينيها وفوفه كانت نفسها تجيبها من شعرها لكن سكتت عشان خاطر منير

اما في اوضه المكتب كان واقف محمود وقمر قدام صابر وصابر شاور على خزنه جنبه وقال 

صابر 

شايفين الخزنه دي يا ولاد هي اللي فيها كل الاملاك وكل حاجه وحتى الوصيه اللي تخص قمر الزمان بتاعه ابوكي يا قمر اسماعيل باشا هو صاحبي الوحيد وكنا شركاه في كل حاجه لكن الله يرحم راح ومراته راحت قبل هو ما يموت يعني ما فيش اي وريث غيرك انت يا قمر 

قمر 

حلو الكلام يلا بقى يا حمايا بالصلاه على النبي كده افتح الخزنه واديني ورق املاكي في ايديا وخلي الكل يفرح وهعزمك على بسكوت ابو شوكولاته ان شاء الله ما حد حوش 

صابر بضحك 

هههههه ليه هو انت فاكره ان الموضوع سهل قوي كده يا قمر لا طبعا ده لازم المحامي يجي بنفسه وهو اللي يديك الورق الورق ده ما اقدرش اطلعه من الخزنه ابدا مهما حصل 

محمود 

اه طبعا اكيد يا بابا بس الورق ده اكيد في ورق يخص قمر يعني مثلا شهاده ميلادها او اي حاجه 

صابر 

طبعا يا محمود الورق ده فيه كل حاجه تخص قمر شهاده الميلاد وصورها وكل الاملاك بتاعتها عشان كده لازم نفتح الخزنه لما المحامي يجي يلا يا اولاد نروح نتغدى 

وفعلا كلهم راحوا وقعدوا على السفره علشان يتغدوا وفريد قرر ان هو طبعا يمشي عشان يشوف الضرايب ويدفعها وما يحصلش عليهم اي مشاكل 

اما في بيت نهله كانت بتتعصب على فوفه وبتقول 

نهله

هو انت غبيه يا بنت انت ولا ايه قلت لك خلصي وبعد السجاد الستائر تغسليها وتنشريها وتستني لما تنشف وبعدين تكويها انت مش هتمشي دلوقتي مهما حصل 

فوفه 

يا فتاح يا عليم يا رزاق يا كريم يا ست هانم الله يخليك سيبيني امشي انا واحده خلقي ضيق ومش عايزه ازعلك مني بقى 

نهله بعصبيه 

تصدقي ان انت عيله قليله الادب ومش هتمشي من هنا واقول لك على حاجه انا بقى هخليك تصبين الحيطان وتمسكي كل هدومي تغسليها وتكويها كمان صحيح خدامه لسانها طويل 

في الوقت ده فوفه قربت من نهله وجابتها من شعرها وفضلت تضرب فيها وتقول 

فوفه 

هو انت يا بنت يا اللي اسمك نهله انت سالتي عليا انا ابقى مين قبل ما تبهدليني بالطريقه دي انا فوفه يا عينيا احسن رقاصه في كباريه النجوم 

نهله بصريخ 

اوعي يا بنت انت انت بتضربيني ولا ايه انت اتجننتي ويعني ايه رقاصه ايه اللي خلاك تيجي عندي هنا يا رقاصه 

فوفه 

جوزك يا عينيا اللي قاعد جوه في البلكونه ماسك الجرنان وعامل نفسه مثقف لكن هو اصلا مش طايق نفسه ولا طايقك وانا اصلا مش خدامه ويلا غوري من وشي 

طبعا في الوقت ده كان منير خرج من الاوضه وسمع كل كلمه وفوفه مشيت ونهله قربت من منير وصرخت في وشه وقالت 

نهله 

اعااااا اعاااااا طلقني يا منير بقول لك طلقني انا ولا طايقاك ولا طايقه ابص في وشك اعاااااا انا رايحه عند بابا دلوقتي ومش هتشوف وشي هنا تاني ابدا 

منير 

يبقى احسن برده قصدي ليه بس كده يا حبيبتي افهميني ادي البنت فوفه دي كدابه 

نهله 

اعاااااا اعااااا وكمان بتدلعها ده انت عمرك ما دلعتني غور من وشي 

وبعديها نهله فعلا روحت الفيلا عند باباها وكانت زعلانه وكانت طالعه على سلم الفيلا وهي دموعها على خدها وقمر قابلتها وقالت 

قمر 

مالك يا حربوقه ايه اللي رجعك تاني مش كنا خلصنا منك وارتاحنا ومشيتي من عند جوزك 

نهله بدموع 

ابعدي عني يا قمر لو سمحتي انا مخنوقه كفايه ان انا ما ليش ام ولا حتى اخت افضفض معاها 

في الوقت ده قمر زعلت عليها جدا وقربت منها وقالت 

قمر 

وبعدين بقى انت مالك هتصعبي عليا كده ليه طب اطلعي الاوضه بتاعتك واول ما اخوك يتخمد قصدي اول ما اخوك ينام هاجي ونتكلم انا وانت مع بعض ونشوف ايه اللي حصل ما تزعليش 

وبعديها نهله طلعت على اوضتها 

وفي الوقت ده كانت قمر في صاله الفيلا لوحدها علشان كانت بتشرب كوبايه ميه وبعديها قمر حست بحد موجود في اوضه المكتب 

قربت لقيت حرامي جوه المكتب وبيسرق ورق الخزنه لسه هتصرخ قمر وتمنعه ضربها بالعصايه اللي معاه وقمر اترمت على الارض 

والحرامي هرب لكن في الوقت ده البواب مسكه وفضل يصرخ والكل صحي من النوم 

ومحمود نزل من على سلم الفيلا واول ما شاف قمر وقع على الارض جري عليها 

وفي الوقت ده البواب دخل ومعاه الحرامي ولسه هيشيل القناع من على وشه عشان يعرفوا هو مين 

وبعد كده حصل