رواية السكن الفصل الثاني بقلم غدير الحيدري
ماذا يحصل؟
لو مات الاختلافَ بيننا وولد الحب
لو اخذ الكره حقائبه بعيدا
وترك لنا ما نداوي به أنفسنا
لأصبحنا جميعاً طُلاب طب
نحن لا نكره بعضنا أبدا
انما يسيطرُ علينا شيطاننا لنرمي يوسفنا في الجُب
سيحيينا الحب
.......
عطاء
اباوع ع حبيبة
وهي مخلية اللفات كدام ضوية
حبيبة: ورا ما طلعتوا بدلت ورحت ع مطعم قريب منا جبت لفات كلت حتى ناكلها سوة ونتصالح بالنهاية احنا بنات وساكنين بمكان واحد ومو حلو تصير بينا مشاكل
ردت ضوية بعصبية
ضي: بس انا مو جوعانة ولا بحاجتج وماكو داعي تتمننين علينا بفلوسج كلنا بنات خير
عافتها وطلعت للمطبخ
باوعتلي حبيبة بخيبة امل
كالت
حبيبة: عطاء انا والله مااقصد يعني هيج حجيت ع نياتي
كنت متكتفة وواكفة اباوع
كلت
عطاء: شوفي حبيبة انتي مو قصدج بس ضوية تعيش ظروف عائلية خاصة تخليها تكون منفعلة دائما وانا متفهمة هالشي لان احنا جيران
تنهدت حبيبة وكالت
حبيبة: بس انا مااحب اترك احد فاهمني غلط او زعلان مني خصوصا احنا راح نعيش سوة مثل العائلة
عطاء: انا فاهمتج وانتي حاولتي تصححين غلطج بس مثل ما كلت الج
مشيت وكعدت ع سريري
عطاء: ضوية عاشت عمرها كلة اشبه بالمسجونة عائلتها صعبين وتفكيرهم قديم واغلب وقتهم بين البساتين والفلاحة وابوها رافض دراستها بشكل قطعي بس تدخل والدي وعمي لان هي صديقتي وبعد محاولات شديدة اقتنع
تنهدت
عطاء: ولحد الان اكو ضغط عليها وحذروها وهددوها اقل غلط يمنعوها من الدراسة واحتمال يقتلوها لهذا هي من شدة الضغط تحاول تفرغ هالشي بأي احد
هزت راسها بتفهم
وكالت
حبيبة: اذا تحب اساعدها عادي
عطاء: لالا الافضل تعوفيها فترة بين ما تتأقلم ع الوضع
سمعنا صوت طبخ
حبيبة: هاي ليش جاي تسوي اكل مو انا جبتلكم؟
عطاء: عوفيها براحتها هي شوي شوي تتعود
طلعنا بالصالة
فرشنا السفرة
رحت ع ضوية للمطبخ
كلت بهدوء
عطاء: البنية جايبة اكل وتريد تبدي بداية جديدة ليش هيج متحاملة عليها؟
ضي: مااريد احاجيها ما مرتاحة الها
عطاء: استغفر الله ربي زين ع الاقل جيبي اكلج وتعالي نكعد سوة
ضي: مااريد
كلت بعصبية
عطاء: ضوية كافيي هيج راح تصير مشاكل واحنا هنا مثل العائلة
دمعت عيونها
كالت
ضي: اذا ضايجة من وجودي ارجع لبيتنا
اخذتها لحضني
وكلت
عطاء: ششش انتي اختي طفولتي عشتها وياج ثقي بية ولتبقين خايفة ومقهورة كلشي حيكون بخير
جريتها من ايدها حتى نطلع
جرتني وكالت هي ودموعها تنزل
ضي: خايفة ابوية يقتلني لان انحرج من ابوج وعمج بسبب دراستي
مسحت دموعها
عطاء: تطمني مراح يصير شي وانتي بنتة ماكو اب يقتل بنتة بعدين انتي خوش بنية واهلج محظوظين بيج
صفنت والدمعة بعيونها
وكالت بهمس
ضي:س.سعد
عقدت حاجبي
وكلت بغرابة
عطاء:شنو؟ سعد منو؟!
كالتلي بقلق
ضي: ها؟! لالا انا ماكلت سعد
عطاء:مااعرف يمكن انا سمعت غلط، يلا تعالي
اخذتها للصالة
وكعدنا كلنا ع السفرة
كلت
عطاء: حبيبة ليش كلفتي نفسج احنا جايبين اكل هواي
حبيبة: كلنا جبنا اكل بس كلت تعبانبن من الشغل خلي نكافئ نفسنا
زهراء ضيقت عيونها وكالت
زهراء: اليسمعج يكول جلفتي العمارة كلها هو انتي عفتي الشغل علية وطلعتي
عطاء: ههههه ليش
حبيبة: بنات والله انا بية ربو والشغل يتعبني
عطاء: ميخالف نتساعد عود
ابتسمت زهراء وكالت
زهراء: زين ما تعرفنا
كالت حبيبة بحماس
حبيبة: خوش خلي ابلش انا
انا حبيبة من البصرة البنت الوحيدة لأهلي وعندي ٦ اخوان ابوية تاجر وعندة شغل بالبصرة وبالموصل وببغداد وانا طالبة مرحلة اولى اعلام
عطاء: تشرفنا
انا عطاء من بابل يعني من الحلة عندي خوات ٢ متزوجات واخ واحد متزوج وابوية يشتغل بالعقارات وهو اللي ساعد عمي حتى يشتري هاي الشقة لهذا عمو ما قبل اداوم اقسام واجينا لهنا وانا طالبة علوم مرحلة اولى
حبيبة: تدرين عمج صديق ابوية لان ابوية كال عندي صديق هناك بنت اخو طالبة وساكنة بشقة عاد جابنا لهنا
زهراء: انا مااعرف شلون اجيت بس اخوية طالب هنا وهو داوم قبلي ورتبلي المكان يلا اجيت الظاهر سائل وملتقي بعمج
تذكرت اخوها حسين
صفنت وصرت اتذكر ملامحة
كلت
عطاء: صدك زهراء معرفتينا؟
زهراء : انا زهراء من النجف البنت الوحيدة لأهلي وعندي اخوة ٢ والدي سيد يعني دارس حوزة علمية وعدنا محل عبايات رجالية مال شيوخ وهيج شي واقمشة يديرة اخوية الجبير طبعا هو متزوج اما اخوية الوسطاني طالب ويانا وطبعا انا ادرس هندسة وهم مرحلة اولى
دون ما احس كلت
عطاء: واخوج؟
زهراء: مثلج قسم علوم وهم مرحلة اولى
عقدت حاجبي وكلت
عطاء: كلتي وسطاني يعني اكبر منج، زين شلون؟
زهراء: ابوية يخاف علية هواي وميقبل ادرس بوحدي لهذا حسين ما قدم الا اني اكمل وقدمنا سوة
عطاء: هااا حلوو
مااعرف ليش حسيت بالفرحة
من عرفت بي هو بنفس قسمي
معناها راح نلتقي هواي
كالت حبيبة
حبيبة: اوي زهراء يكولون السادة معقدين
ابتسمت زهراء
زهراء: بالعكس بس السادة ملتزمين والناس تشوف الالتزام تعقيد
باوعت زهراء ع ضوية وكالت
زهراء: ما عرفتينا ع نفسج
ضوية باوعتلي
كلت بأرتباك
عطاء: ضي من الحلة يعني جيرانا احنا بنفس المنطقة ومن الطفولة صديقات وبكلشي سوة بس هي طلعلها علوم سياسية بس عادي قريبة علينة وهي اسمها ضوية بس تكدرون تصيحولها ضي للسهولة
زهراء: انا اعتذر منج ضوية ترا اخوية اجة علية حتى يتطمن
كالت ضي ببرود
ضي: اخوج ما يشبهج
زهراء: اي صح ما نتشابه بالشكل ابد يعني هو اسمر طويل اني بيضة وناعم...
قاطعتها وكالت
ضي: لالا ما اقصد الشكل، انا اقصد الاخلاق يعني انتي مبين عليج حبابة وملتزمة بس هو ابد مو مبين علية الالتزام
كامت
وزهراء تباوعلها بأستغراب
كمت انا وراها
وانا احاول ابتسم حتى اخفف من الموقف
ومااعرف شلون تصفى
.......
في نفس الشارع
الشقة التي توجد في العمارة الاخرى
حازم
كلت وانا احاول اخفف من حجم الموقف
حازم: لالا خوية خالد انت ع راسنا
خالد: حسين اخوية شنو مشكلتك وياي؟
كال حسين بعصبية
حسين: وانا ويين اعرفك حتى تصير عندي مشكلة وياك ها؟!
خالد: انا اعتذر اذا ضوجتك لان كتلك نصي النعي انا م.....
قاطعة حسين وصاح
حسين: مووو نعيي اسمها زيارة عاشوراء
خالد: تمام اخوية مصار شي ماكو داعي تصيح
حسين: لا تتعدى ع رموزنا فاهم؟
خالد: وانا شنو الحجيتو ع رموزك؟
حازم: كولوا يا الله احنا اخوة
صاح حسين بية
حسين: انت لا تحجييي ولا كلمة حسابك بعدين
كلت بانزعاج
حازم: حسين عيب تحاجيني بهالاسلوب احنا مو جهال
طلع سراج من الغرفة
وكال
سراج: هااا بلشنا حرب؟ شكتلك حازم؟ بس انت تحب تثير النعرات الطائفية
حازم: يا طائفية يابة منو بقة يفكر بهالطريقة كلنا اخوة وجايين ندرس
حسين: جا انت حولة يمك
كال خالد بعصبية
خالد: انا مووو غرض حتى تحولني عيب هالحجي
حسين: ما جاي احجي وياك فاهم؟
جرة خالد لحسين من ياختة
وكال
خالد: ما والدتو امو اليحاجيني هيج
دفعة حسين وكال
حسين: اخذ اغراضك واطلع منا
صحت
حازم: خالد ما يطلع منا شبر واذا طلع انا اطلع وياه وانتو حيروا بالايجار
سراج رفع ايدة وكال
سراج: فلس واحد زايد ماادفع لا تباوعون علية لان السياسي متبري مني
تقربت لحسين وكلت
حازم:شغل مو لاكي حتى تصرف ع نفسك وانا اجيت هنا من ضيم الاقسام ولان اريد اشتغل ما راح اسمحلك تخرب كلشي
حسين: انا ما اساوم ع عقيدتي وع مذهبي
كال خالد بعصبية
خالد: وانا مو يم عقيدتك ومذهبك احترم مذهبي احترم مذهبك
حازم: الايجار ٢٠٠ كل واحد يدفع ٥٠ بالشهر اللي يريد يطلع من الشقة هسة يذب ٥٠ مال هذا الشهر ويطلع بين ما الاكي غيرة
سراج: فلس واحد ماادفع فوك ال٥٠
كال خالد بأنزعاج
خالد: انا طالع واخذوا راحتكم
حازم: تذب ٥٠ يلا تطلع
صاح خالد
خالد: شنوووو هو استغلال؟ هسة كنتوا تحجون بالعقيدة شو انكلبت الشغلة فلوس؟
حازم: انا ماعندي مشكلة لو اجيب لهنا يهودي يسكن ويانة المهم ادبر الايجار
كال حسين بأنزعاج
حسين: طيح الله حظك
ودخل للغرفة
كلت
حازم: والله متحملك علمود الايجار لو ما الايجار اشمرك من اعلى طابق للكاع
تقربت لخالد وخليت ايدي ع كتفة
وكلت
حازم: اعذرني خوية واسف لان انحطيت بهيج موقف
وخر ايدي عن كتفة وكال
خالد: ماكو مشكلة
حازم: حسين خوش ولد بس خليك بعيد عنة
خالد: معناها انطيني مكانك واخذ مكاني
خليت ايدي ع راسي
وكلت
حازم: لا مو انت بهالحالة مراح تطلع بس من الشقة راح ترجع للانبار
عقد حاجبة وكال
خالد: مفهمت
حازم: حسين مشكلتك ويا عقائدية بس من يجي الليل تكدر تنام اما سراج اذا صرت انت وياه بغرفة وحدة مراح تكدر تنام
خالد: ليش؟!
بهالاثناء مر سراج من يمنا
مخلي الفون ع اذنة ويخابر
سراج: اعتذر حبيبتي والله اجة الموكب السياسي واضطريت اسد الخط تعرفين حياة ابناء السياسيين
باوعت ع خالد
وخالد باوع الي
اشرتلة ع التخم بالصالة وكلت
حازم: انا بسبب الموكب السياسي انام بالصالة
خالد: لالا خلص ماعندي مشكلة اتحمل المشاكل العقائدية ولا المشاكل العاطفية لان اهم شي انام
تركني ودخل للغرفة
ضحكت وكعدت ع الكرسي
ياربي تعدي ع خير
بهالاثناء سمعت صوت صياح
حسين: هذاااا المكان اصلييي بي متخلي بي جنطك
خالد: لا اله الا الله اخوووية لا تدور مشاكل وياية يرحم والديك
حسين: انا مو اخووك
دخلت للغرفة
ووكفت بيناتهم ولزمت خالد وكلت
حازم: اناااا اخوووك بس خلصونا يرحمكم الله
كال خالد
خالد: حصل خير روح ارتاح حازم
حازم: هو انتو تخلون واحد يرتاح؟
طلعت من الغرفة
اجة سراج وهو يصيح
سراج: قبل شوي سمعت صياحكم وكتلها موكب سياسي هسة شكللها؟
خالد: منو هي؟
حازم: حبيبتة تسلسل ١٩
سراج: ٢٠
حازم: اعذرني مرة ثانية احسب عدل
كال حسين
حسين: سراج روح من كدامي لا تخليني ابتلش بيك انت الثاني
خالد: ليش منو الاول؟
صاح حسين
حسين: انت من اجيت لهسة تدور مشاكل وياية
سراج: حيل وابو زايد بيك اول مااجيت سولفتلك سويتلي نفسك مثقف وهسة طلع العرك الهمجي
هجم حسين ع سراج
وسراج ركض للمطبخ
صرت انا بينهم
صحت
حازم: شلووون يعنييييي متسكتون اليوم
خالد: يابة دخلي اطلع انا اشوفلي غير مكان
حازم: والايجار منوووو يدفعة
خالد: وانااا شدخلنييي بالايجاااار
حازم: الصبح كتلي اسكن وياكم ونطيتني كلمة شلون تتنازل عن كلمتك وانت زلمة
صاح حسين
حسين: كاااافي اريد ادرس
سراج: خلي يصالحوني اهلي دشوف منو اليبقى وياكم
حازم: التهي بموكبك السياسي وعوفنا بضيمنا
احس تعبت
فتحت البلكون وطلعت برا
وبلشت ادخن
اجة يمي خالد
وكال
خالد: انت متريد اطلع منا علمود الايجار فعلا لو علمود شي ثاني؟
حازم: شي ثاني مثل شنو؟ خايف منا؟ ما نمتلك بهالبيت غير سكينة الزلاطة
خالد: انا مااخاف غير من اللي خلقني
تنهدت وانا اباوع للشارع
كلت
حازم: تعرف خالد شنو مشكلة هذا البلد؟
خالد: شنو؟
حازم:ابناء العراق يسولفون بالكراهية يوميا، الكراهية تاكل وتشرب وياهم لكن الكراهية سطحية وعمرها ما كانت متجذرة بيهم
ورثت جكارة ثانية
وهو طلع جكارتة ورثتها الة
وكلت
حازم: يرجعون لحقيقتهم وقت الاذى اول ما يتأذى احد افراد هذا الشعب تزال عنة اقنعة السطحية ويتوحد الدم والكل يصير تحت راية العراق
ابتسمت
خالد: ماراح تنتهي الطائفية
حازم: الطائفية من الاساس مالها وجود
خالد: مااعتقد
حازم: راح تتأكد من هالشي بنفسك وتتذكرني
اندكت الباب
ربتت ع كتفة وكلت
حازم: اهلا وسهلا بيك بيناتنا وان شاء الله احنا اخوة
سمعت سراج يكول
سراج: وينكم
التمينا كلنا
كان جاي من يم الباب
كال
سراج: انا يمكن راح اشمر نفسي من اعلى طابق
حسين: شكو
حازم: منو دك الباب
سراج: ابو وديع ويكلي زودت الايجار وراح اسوي ٢٥٠
خليت ايدي ع راسي
وكعدت بالكاع وصحت
حازم: رااااااح انجلطططط
........
