رواية ضلم ابي الفصل الثاني بقلم جمانه السعيدي
ساره..... من كتلكم تعلمت اطبخ ترا مو طبخ عالمي
لا محاشي ولا دولمه ولا كبب
طبخ ااقل من عادي لان اني طفله وما طابخه قبل
كنت اطبخ من خوفي
اذا ما طبخت ابوي يضربني بااي شي كدامه
حتلو اموت مايهتم
مااعرف ليش يتعامل وؤاي هيج
عكس تعامله ويا اخواني
طبخي كلش بسيط لان وقت حصار
يعني اذا مركة بتيته اخليها وعليها دهن ومعجون
احركها واخلي ماي وملح وهاي هيه
واذا فاصوليا لو عدس نفس الشي
مرات ابوي يجيب لحم للبيت
مو دائما ناكل لحم لو دجاج
اذا طبخنا دجاج ياخذ حصته ويخلي الباقي الخواني
واني ما يبقيلي شي
اسكت مااكدر اناقشه لان هو مايعرف النقاش شنو
كبل يضربني ويغلط عليه
كعدت بلبيت إداري اختي واهتم بشغل البيت
كبرت على عمري عشرين سنه
شلت مسؤليه جبيره
تحملت كلشي غصبا ما عليه
جمانه السعيدي
الصبح من اسمع صوت البنات يطلعن للمدرسه
ابقى ابجي ليش اني مااروح للمدرسه
ليش ملزمه اتحمل هيج مسؤليه واني بهذا العمر
ليش لازم اكبر واختصر عمري
من يطلع ابوي افتح الباب شويه واباوع على صديقاتي
وهنا رايحات للمدرسه
مرات ااكول لو ابوي ميت وباقيه امي هواي احسن
امي حنينه وطيبه
مستحيل تقبل اعوف المدرسه
اجا اول عيد بعد وفاة امي
ابوي قبل العيد بيومين جاب قاط المصطفي وثوب النور
واني كلشي ما جابلي
صح هما اخواني واحبهم بس ليش يفرقني عنهم
بقيت اباوع علي وهو ينطي الكل واحد بيهم ملابسه
اريده يكووول انتي باجر اجيبلج
لو انتظري ما ناسيج راح اجيبلج ملابس العيد
بس هو ولا عبالك يشوفني
ساره....واني ماجبتلي ملابس للعيد
ابوي....ذوله جهال انتي جبيره انتي شنو وملابس العيد
ساره...بس ماعندي ملابس
ابوي...وانتي وين رايحه كاعده بلبيت البسي اي شي
لا اضلين تحجين
ساره...سكتت بس اكو غصه بكلبي شكبرها
شمعنا اني ماالبس ملابس جديده بلعيد
دخلت للغرفه ومتت بجي شكد مقهوره على نفسي
اني هم طفله وافرح بملابس العيد
بيوم العيد الصبح كعدني وهو يصيح عليه
ويضربني
ابوي...كومي كومي اريد ريوك والبسي خوانج أخذهم وياي
كمت امشي مغمضه عين وفاتحه عين
حضرت الريوك كعد هو واخواني تريكو واني رتبت البيت
وشلت الفراشات
بعدين غسلت الاخواني ولبستهم
أخذهم وطلع يعايد اقاربنا واني بقبت وحدي بلبيت
لابسه دشداشه عاديه
ماحسيت بلعيد ابد
اصلا اذا يوم عادي احسن من يوم العيد
على الاقل مابقى وحدي بلبيت يبقون اخواني يمي
رجعو فرحانيين محصلين عيديه واخذهم المدينة الالعاب
واني اتفرج عليهم عبالك ماموجوده
اني ما محسوبه نفر من هذا البيت
شكد بجيت بهذا اليوم حسيت بلنقص
مو عيد يوم اسود صار عليه
قسوة ابوي عليه وتجاهله الوجودي
علم اخوي واختي يعاملوني بنفس طريقته
يغلطون عليه وما يحسبون احسابي
ويتأمرون عليه
هاي اختي شكد تعبانه عليها اغسل وابدل
اذا احاجيها حجايه وحده تتفل عليه وتضربني بالنعال
يعني اختي هاي الزغيره تضربني وتتفل عليه
ومصطفى حتلو عطشان مايروح يشرب ماي
يصيح عليه اجيبله ماي
مااكدر اعترض لو اكول لا
لان يوصلون الحجي الابوي ويضربني
كذا مره يحجون عليه كدام ابوي حتى يضربني
جمانه السعيدي
اصلا اذا اعترض على شغله
مصطفى يضم السالفه من يجي ابوي حتى يشوفه يضربني
بمكان مايدافعون عني لان خادمتهم
لا يضحكون عليه من يشوفون ابوي يضربني
مرت عليه ايام سوده بعمري ما متوقعتها
ومااعرف شلون راح تخلص
ااكو اثر حرك على ايدي على جف ايدي
بيوم جنت مريضه وتعبانه حيل اجا مصطفى
مصطفى...كومي اريد ااكل
ساره...مريضه مااكدر اوكف على طولي
مصطفى...شنو مريضه اني اكلج كومي
ساره...الاكل على الطباخ روح ااكل مااكدر تعبانه اليوم
عافني وطلع توقعت راح يخدم نفسه يخلي الاكل ويااكل
اني مدده وخاله ايدي على وجهي
مااحس اله ايدي احتركت صرخت بصوت
اباوع جايب خاشوكه ومخليها على الطباخ من حمت
جابها وخلاها على ايدي
الأثر طبع على ايدي كمت ابجي من الالم
اكمز من شدة الالم روحي فرفحت
ساره.. ...ليش ليش هيج
مصطفى...يطبج مرض فوكه مرض مو اكلج كومي
كمت ابجي بحركه مو بس من حرك ايدي لا
من الظلم الي عايشه بي
منيين الكاها من ابوي من الحرمان من المسؤليه
لو من مصطفى الي صاير عليه رجال
بقيت كاعده بمكاني وابجي
الحد مااجا ابوي
تتوقعون رحت اشكيله لا مصطفى راح يفتخر
كدام ابوي يكول ساره ما تسمع الكلام
اكلها اريد ااكل ما تكوووم
حميت الخاشوكه وحركت ايدها
ابوي....اي عفيه ابني حيل بيها اذا ما تسمع كلامك
كطع النعال عليها كسرها تكسر
هاي حيوانه ما تجي بلعيني واغاتي تجي بلضرب
مثل امها
كمت واني دمعتي على خدي حضرت الاكل
ومحد طيب خاطري بكلمه وحده
عبالك مو بتهم بت الجيران
بقيت ايام مااكدر اشتغل لان ايدي التهبت
من الغسل بلمي
اربطها بعلاكه حتى ااكدر اغسل ملابسهم والمواعين
لازم اشتغل
اذا مااشتغل تجينا الضربات من كل مكان
مااعرف هذا الظلم شكد راح يدوووم وشلون اتحمل ااكثر
مرت السنيين سنه اتعس من سنه
ونور صارت بلمدرسه
اكعد الصبح لازم اكعد قبلهم احضر الريوك يتركون ويطلعون
انظف البيت واغسل ملابسهم واحضر الاكل
وابقى كاعده بلبيت وحدي انتظرهم يرجعون
بهذا البيت طلبات اخواني مجابه
بس اني ممنوع اطلب اي شي لان مو من حقي
اني خادمه بهذا البيت شلون اقارن نفسي بيهم
بلعيد يحيبلهم ملابس حلوه وياخذهم يطلعهم
واني مايذكرني واذا ذكرني يجيبلي دشداشه
عاديه ومن ارخص انواع الملابس بحيث لبستين اتلاثه وتتشكك
اخيطها بايدي وابقى لا بستها انتظر ابوي يحن عليه ويجيبلي غيرها
اني مااستاهل البس مثلهم
اني مجرد شي زايد بحياتهم
مايمر عليه يوم اذا ماابجي لو انام مقهوره بسببهم
عمي شكد حاول يقنع ابوي يزوج
بس هو كان يرفض
رافض فكرة الزواج
اولا لان بخيل ومايريد يصرف على الزواج
وعلى المره
ثانيا بيش محتاج الزوجه اني موجوده خدامه مطيعه
بدون مقابل
اتحمل شغل واهاين وضرب
خلاص هو ما محتاج زوجه يصرف عليها وتكثر علي المسؤليه
كل اقاربنا كطعو علاقتهم بينا
محد يزورنا يطمن علينا ولا واحد اجا شاف وضعنا بدون ام شلون صاير
اما ابوي مايزورهم غير بالمناسبات المهمه
كبرت واني على نفس وضعي حرمان وقسوه
وتعب
بعمر ١٧ سنه اجت وحده من الجوارين دكت الباب
فتحت الباب الصبح وحدي كلهم بلدوام
كتلها تفضلي
كعدت شويه وبعدين كالت اني جايه اطلب ايدج الابني
ساره...... الصراحه تفاجئت
اني ناسيه نفسي وماعندي اي مشاعر مثل البنات
عايشه عمري انفذ ااوامر اهلي وناسيه نفسي
شلون اذكر نفسي واني محد.بحالي وحتى ملابس
ماعندي ولا اعرف سوالف البنات
المهم الصراحه اني فرحت فكرت خلاص راح اطلع من هذا البيت واخلص من تحكم ابوي وظلمه
ساره...خاله اني مااعرف بهاي السوالف تعالو احجو ويا ابوي
....يعني انتي موافقه ماعندج مانع
ساره.. مااعرف بكيف ابوي
لليل اجا زوجها وابنها يفتحون هذا الموضوع وياا ابوي
جان يصير عليهم عصبي
ابوي...ماعدنا بنيه للزواج ساره ما تزوج
اخوانها محتاجينها منو النا منو يتحمل مسؤوليتنا
ابو العريس....احنا مراح نحرمها منكم تجي بين يوم ويوم تنظف وتشوف طلباتكم وترجع
ابوي....لا ساره ماتتزوج
ساره....شكد حاولو وياا بس قفل ماكو زواج يعني ماكو زواج
يومين يدزون علي زلم من الجوارين
قفل فد مره ساره ماتزوج منو يشيل مسؤليتا اذا ازوجت ساره
رغم اني ماعندي اي علاقه بيهم وحتى الولد ماشايفته
بس ضجت
كتت اتمنى يوافق حتى اخلص من هذا البيت
واعيش حالي حال البنات
شكد ظالم ابوي واناني
من بعدها محد دك بابنا ولا واحد اجا تقدملي
الحد ما وصلت للعشرين
بيوم طلعت الزباله تكرمون
فات ولد شاب مبين من ملابسه يشتغل بنجرجي
او مصلح سيارات اني بوقتها عمري عشرين سنه
الولد بقا يباوع عليه يمشي وعينه عليه
تصرفه هذا خلاني انتبه علي
وصل مسافه ورجع من شافني اباوع علي
بعدين اني دخلت وطبكت الباب الي بيه مكفيتي
ما محتاجه مشاكل
ابوي اذا عرف غير يموتني
اليوم الي بعده تقريبا نفس الوقت طلعت انظف الباب وطلعت الزباله
نفس الولد وكانما ينتضرني
بقا واكف يباوع عليه بس اني ما نطيت اي ردت فعل
بس شفته دنكت وكمت اغسل بلباب
بعدين دخلت وطبكت الباب
حبيت نضراته حبيت وجوده
بس بداخلي ااكول لا اذا عرف ابوي راح تصير مشكله جبيره
حتلو نيته زواج ابوي مراح يقبل
تكرر هذا الموقف ااكثر من خمس مرات
من اطلع الكا واكف ويبقى يباوع عليه ويبتسم
المره السادسه
اجا قرب عليه
....صباح الخير
ساره...مارديت علي رغم كلبي يكمز من الفرح
اني اصلا اطلع حتى اشوفه منتظرني
وجوده واهتمامه زرع الأمل بروحي احس نفسي بنيه من صدك اذا شفته يباوع عليه
حسن....اني حسن انتي شسمج
ساره...وليش تريد تعرف اسمي
حسن....لان عجبتيني
ساره...روح منا لا اجيبلي مشاكل
حسن...اني ماللعب قصدي زواج
ساره....الي قصده زواج يدك الباب مو واكف بلشارع يوزع ابتسامات
حسن...اي اني قصدي زواج وراح ادز امي تخطبج
ساره...منا لمن تجي امك يصير خير
دخلت وطبكت الباب فرحانه الدرجه مااكدر اوصف شعوري بهاي اللحظه
كمت اكمز واضحك واخيرا ااكو شخص يحبني
شخص يريدني
شخص راح يخلصني من هاي الحياة المتعبه
ثاني يوم الصبح طلعت مالكيته شكد ضجت
اني من امس متحضره الهاي اللحظه
انتظر اشوفه دقايق حتى يكون يومي حلو
وانسى وضعي التعبان بس اشوف وجها
رغم هو شكله بسيط وعادي وملابسه كلهن دهن
بس عندي ولا احلى ممثل تركي
لان عاف كل البنات وحبني يريدني اني
بقيت واكفه برا انظف بلباب منتظرته يجي
ااكثر من ربع ساعه واني منتظرته وماكوووو
دخلت وبقيت اللوم على نفسي
اني ليش حجيت ويا هيج ليش صديته
خاف عافني يجوز مايردوني
حرامات ضيعته من ايدي
للعصر اندكت الباب فتحته مره جبيره وبنيه شابه
بس شفتهن عرفتهن
لان اخته حيل تشبه نسخه منه
جمانه السعيدي
دخلتهن للبيت
ام حسن....انتي ساره
ساره...اي
ام حسن....اذا اريد اخطبج احجي ويامن
ساره...اني امي ميته ااججي ويا ابوي
ام حسن...ابوج موجود
ساره.. اي موجود نايم هسه اروح اكعده
ام حسن....خاف تعبان نرجع غير وكت
ساره....لا هو يكعد كل يوم هيج وكت
دخلت للغرفه لكيته كاعد بس بعده مدد
ساره....يابه عدنا خطار
ابوي.. منو
ساره...نسوان
ابوي...نسوان واني ليش اطلع عليهن
ساره...جايات عليه
ابوي....خطابه
ساره...اي
ابوي...روحي اطرديهن ماكو زواج
ساره...زين بس اتعرف عليهن
ابوي...روحي اطرديهن لا هسه اسويج فرجه كدامهن
حيوانه
اني مو كلت ماكو عرس
انتي ما تفتهين الكلام
ساره...بس اتعرف عليهم
ابوي...اذا اطلع عليهن هسه اشمرهن بلشارع
عاط عليه بصوت عالي امشي لا اجي اطيح حظج
طلعت من الغرفه وجهي احمر من الخجل
مااعرف شراح ااكول
محرجه الدرجه مااكدر امشي شلون راح ااكللهن
اني اريد ازوج من حقي ازوج
ليش ماازوج هذا الولد عاجبني ومدام دز امه تخطب
يعني فعلا نيته صادقه ما يلعب عليه
بعدين موزين رضا بيه
اني شكلي عادي وملابسي بسيطه
وهو ما ناقصه شي
طلعت بس شافتني ام حسن حست بلرفض
ام حسن...هاا خاله
ساره....مااعرف شكووول
ام حسن....ميخالف خاله خاف زعل لان اجن نسوان يخطبن
ترا احنا جايين نعرف اذا انتم موافقين لو لا
اني اتوقعت اكو مره جبيره احجي وياها
ومن كلتي امي ميته كلت احجي ويا ابوج
وبعدين تجي الزلم
حقه يزعل من باجر يجون حسن و أبو خطابه
ساره...ماكدرت اكول ابوي رافض فكرت زواجي
وبنفس الوقت ماار يدهم يرحون وبعد ما يرجعون
بلكت الزلم يكدرون يقنعنونه
وتصير هاي الزواجه واخلص من ظلم ابوي
