رواية قيود العوف الفصل الثلاثون بقلم ريتا
واتغيرت اني
عبالي ابقى شخص مهموم ويعاني
لمن فقدت الامل جتي محبتك ألي تعويض رباني
يالتستحق العُمر أيامي كُلها الك واحد ورة الثاني .
"
واگفة گدام باب الدخول للأمام اخذت نفس والدمعة بعيني ...
باوعت حوالي الناس تفتر اباوع بالوجوه واني بداخلي اعرف كل شخص عندة هم شكل وجاي حتىٰ يزيحه بهلُكان
فززتني منار من دغتني بكتفي وگالت
-منار: جُمان فصل النت عندج شو طگيتي الج صفنة لعد منفوت ؟
-جُمان: يلا
دفعت كُرسي ماما ودخلنا جوة نمشي الزيارة خفيفة بالأيام العادية مو مثل المُناسبات ماا الك محط رجل أبد
لفحني العطر الطيب الي بهذا المُكان العطر الي واني طفلة أتمنىٰ أعرف شنو سر الفوحان العجيب الي بيه والرائحة المختلفة بيه هنا
هنا عطر البخور يختلف وعطر الريحة مختلف كل شيء هنا ممُيز ماله مثيل
-منار: صلاووووات علىٰ النبي من فتت لهسة أريد بنية موحلوة ماكو أشو قطرة مكياج ماكو وكلهن حلوات
-جُمان: يلمممعنن
وگفت وگالت
-منار: شو بلا باوعيلي
-جُمان: باوعت
-منار: باوعيلي عدل
-جُمان: شلون اباوع الج عدل هو اني جاي اباوع الچ ؟!
ضربت گصتها بخفة وگالت
-منار: لج اقصصصصدد شكليييي
-جُمان: چنج العافية أمشي
مشت واسمعها تدردم بصوت وتگول
-منار: هو بقت عافية من وراهم
أمشي وأدفع بكُرسي ماما وهي ميلة راسها لاحظتها تعصر عيونها حيل وحواجبها تنطبگ ...
-جُمان: ماما بيچ شيء ؟؟
-امل: لا يبعد أُميمتج بس ما أتحمل الهوسة بسرعة راسي يوجعني وينزل وجعة علىٰ عيوني ..
بقينا نمشي لحد ماا وصلت للضريح تلقائياً برطمت شفايفي وسرت بيَهم رجفة ...
قربت ماما يمة ولزمت الشباك ...
أول مرة اشوفها هيچ انهارت وبچت من كُل گلبببهاا وتتوسل بالإمام عند الله ...
باوعت لمنار الي حاطة راسها علىٰ الشباك وبس جسمها يهتز ما ينسمع الها صوت
نزلت دموعي ورفعت أيدي الي ترجف وصرت أشكي وابچيي احچي عن كل موقف صعب مريت بيه عن الدنيا الي لايحتنة روجاتها ..
فصلت عن الي حوالية وبقيت بس اني وجروحي وأمامي اريد احچي كُل شيء بداخلي ماا ابقي شيء اريد انزل كُل دمعة بعيني بقت جامدة ومنزلت
اريد اطلع كُل ضيقة صدر حسيت بيها من ضاقت بيه الدنيا أريد الله ياخذ الي حقي من كل الي اذوني ولوعوني
وماشلت راسي لحد ما حسيت بـ احد يهز بيه باوعت شفتها منار مبحلقة عيونها ووجهة ناشف مثل الخايفة
-منار: شصار الچ وگعتي گلوبنا انتِ
چنت اباوع الها بـ إستغراب وگفن گدامي نسوان وهن يگولن
-الله ينطيج مرادج دادة الله يفك ضيقج
باوعت للي حوالي كُلهن مثلها يحچن وماما هم هزيت راسي بـ اللامبالاة الهن مافاهمة شصاير
-جُمان: شبيهن ليش هيچ يباوعن الي ويدعن ؟
-منار: شنو لعد والسويتي
-جُمان: شسووويتت ؟؟!
-منار: لچ گلبتييي الدنيا بالبچي والصريخ فقدتيي متشووفين صرت اهزز بيج
-جُمان: شوكت هاي ؟
-منار: شنو دتشاقين
-جُمان: لا والله ماا ادري !؟
-منار: گومي صلي ركعتين وارتاحي
ما چنت حاسة لا بالشهگات ولا بالصرخات التطلع مني ولا چنت حاسة بصوت بچيي شگد عالي حتىٰ هيج يگولن ..
مسحت وجهي وگمت اخذت سجادة فرشتها وصليت الي ركعتين لوجه الله ...
بقينا گاعدين شوي چان الضريح مو زحمة قلة كُلش بيه نسوان باوعت لـ ماما حسيتها ارتاحت وحتىٰ وجهة يضحك
واني هم سُبحان الله احس حمل چان علىٰ صدري وهسة انزاح اتنفست براحة وحمدت ربي وشكرتة من باوعت للمُكان
الحمدلله لأن عندنا ملجأ نلتجئ اله وقت الدنيا تعاندنا وتعادينا بالظروف عندنا أهل البيت وسيلتنا الىٰ الله ال محمد أحب الخلق لرب العالمين
مرت فترة ارتاحينا بيها هنا باوعت للمُكان محد يگدر يشبع منه بس لازم نطلع حتىٰ نحصل سيارة ونرجع للبيت گمت لزمت كُرسي ماما باوعت لمنار گامت وطلعنا
صارت عيني علىٰ الساعة خفت تصير الدنيا ليل وبعد منو يرجعنة وبلگوة تنلگي السيارة ...
مشينا مسافة ووصلنا لكراج السيارات وگفت انطيتة العنوان واتفقنا علىٰ السعر وصعدنا
چان شاب صغير وطبيعي اي شخص تصعد وياه يبقىٰ يسولف جنت تعباانة ومابية اسولف فـ صار يحچي وي مَاما
فكيت حلگي بذهول من شفتها تسولف وياه عبالك گرايبها وهو ماخذة الواهس بالسوالف وياها حتىٰ سوالف اهلة سولفهن الها ...
ندستني منار وگالت
-منار: لزمي امج راح توصل لشبابها بالحجي
-جُمان: ليش امي تنلزم
وچان تگُلة وهي ماخذها الواهس بالكلام
-امل: اي يوووم وانتَ شگد عمرك
-عمري ٢٤
-امل: سوده عليه بعدك بريعان شبابك
همست منار وگالت
-منار: خالة سودة عليج ليش قابل شفتي مسودن ويركض بالشارع غير ديگُلج عمرة
-امل: متزوج لولاا
-منار: يلا بلا راح تفوت علىٰ بيتهم هسة
اجت عيني بالمراية شفتة يباوع وگال
-لا خالة بعدني والله بلكت تحصليلي انتِ
-امل: والله خالة اني لا اشوف ولا أتحرك منين احصل الك متگُلي
-يعني منا منا حجية
-امل: عندي وحدة ميتة هي وباقي رجلها تفيدك ؟!
احس وجهي بوخ والضحكة لزمتها بالگوا ومنار حطت الشال بحلكها وضمت راسها جوة وصارت تضحك بصمت ...
ضحك بصوت وگال لأمي
-خالة انتِ هم بيج البلا
-امل: علىٰ انتوا شلونكم يمة
-شبينة خالة متگليلي اشووو حتىٰ انتِ تحچين عليينا
-امل: ليش منو حاچي قبلي ؟
-ياهي التلزمينها تحچي علىٰ الزلم
-امل: غير شايفات منكم الضيم لعد اكو دخان بدون نار
غطيت وجهي بأيدي ومنار تضحك علىٰ امي شلون تداهر بيه لحد ماا وصلنا للبيت قبل لا ننزل شفتة بأيدة ورقة وكتب عليها التفت علينا وگال ...
-خالة هذا رقمي ويمتىٰ ماترديني اجي اخذكم لأي مُكان انتِ مابيج تفرفرين علىٰ سيارات بس خابروني اجيكم
بقيت اباوع بصمت وماا انطيت ردة فعل
-امل: بعد گلبي الله لا يضرك ، اخذي من اخوج
اخذتة وگلت يمكن صُدگ نحتاجة ليش نبقىٰ نفتر علىٰ سيارات ...
نزلنا ونزلت الكُرسي مالتها ودخلنا للبيت اخذت نفس وفتحت جهازي اول ماا اجاني النت دخلت عليه شفت ماكو نفس الشيء
حسيت نفسي تعبت بعد ماا اگدر صرت من أفكر صدري يوجعني سديت جهازي ورحت بدلت وسوينا اكل وانطيتها علاجها
فتحت باب الصالة داطلع اذب علاگة النفايات بالحاوية صفنت بأستغراب من شفت الطارمة عبارة عن كواغد مشگكة ومذبوبة بيها
مشيت لميت منهم قسم چانوا فارغين مابيهم اي شيء استغربت شنو هذن ؟
لميتهن ولفتتني ورقة عليها نقطة سودة بشكل كبير مرسومة ضحكت بعدم مُبالاة ولميتهم شمرتهم بالحاوية گلت هاي سوالف منار ضايجة متعرف شتسوي ودترسم وتشگك .
فتت جوة ومثل كُل الأيام الي فاتت اغط راسي بالمُخدة وكل شوي افتح جهازي حتىٰ أشوف منه رسالة لو خبر يريح گلبي بس أنام والخيبة تارستني ....
******
من شفت الوضع صار مو طبيعي وگلبي بدة يلعب ماا ارتاحيت أعرف اخواني وشغلهم ومرات أيام منحصلهم وهذا الشيء صار طبيعي عندي
بس مو أكثر من اسبوع وانه رسالة ما شايفة منهم باوعت للحجية الي كُل ماا تسألني عليهم اضطر أكذب حتىٰ ماا اقلقها واخوفها
واگلهاا اي خابروني وسألوا عنهم هم بخير بس عندهم شغل مشغولين ماجاي يلحگون ...
اليوم بالذات عندي قضية طلاق ومحددة موعد الحضور حتىٰ تبدأ الجلسة ...
اتنهدت بتعب وطلعت المحكمة تروش عصرت گصتي بأيدي وطلعت تلفوني مالي غير ميس لأن زيد لو بنص الموت هم لازم يحصل اله طريقة يحچي بيها وياها
خابرتها رن مرتين وبالثالثة ردت سلمت عليها وجاوبتني بصوت تعبان...
-رغد: ميس ماجاي أحصل أخواني صار الي فوگ الاسبوع ؟!
جاوبتني بتلبك ...
-ميس: حبي خاف ماكو شبكة بالمكان الي هم بيه
-رغد: ميس ؟ مو أكثر من أسبوع من تصير هلمدة وانه ماا احصلهم يعني أكو شيء
بقت ساكتة وتزفر بخفة ..
-رغد: لتكذبين عليه أنه أعرف حتىٰ لو المكان مابي شبكة زيد يلگالة طريقة ويتواصل وياچ بيهاا
-ميس: رغد ..
-رغد: اخواني شبيهم ؟!
-ميس: قاسم متصوب واليوم يلة گدروا ينقلونة سوو اله عملية شوية حالتة تعبانة بعده ممستقر وضعة
بهت وجهي ولزمت گلبي بخوف ...
-رغد: يمتىٰ صار هلحچي !!
-ميس: اليوم الرابع بس حالتة شوية متدهورة بسبب مكان الاصابة
-رغد: شوية ؟
-ميس: والله رغد ماا أعرف هذا الي وصلني تعرفين ميحچون كُل شيء بالتفصيل حچايتين وتطلع منهم بالويل ..
-رغد: يمتى گال الج نقلوه ؟
-ميس: من الساعة بـ4 الفجر
جاوبتها بصوت يرجف وبتقطع .
-رغد: زين بـ أي مستشفىٰ ؟!
-ميس: بـ مستشفىٰ الـ"""""" .
-رغد: شكرًا ميس
-ميس: انتظريني اروح وي..
بعدهي ممكملة وسديت الخط منها ممنتبها وگلبي يخفق وبالي صار كُله يم أخوي طلعت اركض من المحكمة حتىٰ بدون ماا أبلغ أحد اخذت اول تكسي صار گدامي وصعدت بيَه للمُستشفىٰ ....
بعد نَص ساعة تقريبًا من الوقت وصلت للمستشفىٰ نزلت اركض انطيييت اسم المرررريض واخذت رقم الغرفة وصعدت بالمصعد .....
توجهت لغرفة رقم 121 احس رجلية ثقلت قووية بكل شيء إلا بأمر يخص أخواني روحي تطلع منيي ....
اخذت نفس وطرقت الباب طرقات خفيفة وفتحتة تخززززيييتتت بمُكااانييي والصدمة والفشلة بييينت علىٰ ملامحيي من شفت جماعتة واگفين يم العوف ...
كُل واحد بيهم متكتف ويتهامسون وأول ماا دخلت صارررت الانظار عليييه بهلحظة ياا گاااع انشگي وبلعينيي وجهت نظررري لعوف الي يبَاوع بصدمة ماچان متوقع وجودي .....
ماا أحس اله كلهممم صارو يحمحمون وانه من صلافتي فتت ماا بقيت بالباب لحد ميطلعون وهمة سلموا علىٰ عوف وطلعوا ....
صارت عيني بعينة يباوعلي بأستغراب وحيرة گال
-عوف: هاي شلون عرفتي ؟
تغاضيت عن الرد ونزلت دمعة من عيوني من شفت التراب وأصل لچتافة والجروح بكل مكان من شافني هيچ ابتسم بخفة واتقدم حضني دخلت بحضنة وصرت ابچي لا اراديًا ...
-عوف: ليش تبچين بعد روح اخوج ؟؟
جاوبتة بصوت متشحرج ومتقطع
-رغد: شلون هيچ صار وياكم ؟
-عوف: مقسوم ومكتوب
وخرني عنة مسح دموعي بأيدة وگال
-عوف: دمعتج عزيزة وماا تطيح بسهولة
-رغد: ترخص الكم انتوا نقطة ضعفي منو الي غيركم بهلدنيا منو !!
-عوف: يابعد عيني واحنة بخير باوعي كل شيء مابينه
باوعت لقاسم الي الاجهزة متشكلة عليه ومكشوف عن صدرة غطيت وجهي بأيدية ماا اگدر گدام هذا المنظر أضعف واخاف ...
رجع لمني وگال بضحكة خفيفة
-عوف: ياا طلابة الماا تخلص ولچ بوووييية عليمن تبچين مابي شيء عمليتة نجحت وماعليه خطرر !!
-رغد: والله علىٰ يوم تموتوني من القهرر والتفكيرر
-عوف: هاي بعد متعرضين لكل شي جديدة السالفة عليج
-رغد: مو جديدة عوف بس روحي يمكم ليلي ماا انامه ليش ماحاولتوا تتصلون بيه تطمنوني عنكم ؟!
بلل شفتة بحيرة وگال
-عوف: مابقىٰ عقل وشبكة ماكو وملتهين هناك
مسحت دموعي وجر كرسي اشر الي اگعد عليه
-عوف: شلونكم الحجية شلونها
-رغد: كل يوم تسأل عنكم وتگول بذاتين من راحوا لهسة ماا خابروني وسألوا عليه
زفر بصوووت وعصر عيونة باوعت اله عيونة حمر والتعب مبين عليه والجروح ممعالجها
-رغد: اروحلك فدوه بيك شيء
-عوف: لا ماكو بس تعبان حيل
-رغد: باع الدم يابس علىٰ الجروح عفيه روح خلي ينظفونهن ويعقمونهن
بقىٰ يباوع الي بصمت وگال
-عوف: رغد انتِ روحي انه باقي يم قاسم
-رغد: لا ويين اروووح ؟؟؟
-عوف: رغودة منا ورايح تجي ضباط وناس للمستشفىٰ وتصير هوسة
جاوبتة بحسرة ..
-رغد: ماشفت قاسم ولا سمعت صوتة
-عوف: بس يستقر وضعة ويرتاح اطلعة
-رغد: يعني ماتجي ؟
هز راسة بأستنكار وگال
-عوف: لا ماا اگدر اعوفه وحدة
ربت علىٰ كتفي بخفة وگال
-عوف: وأمر جميلة انتِ دبري بعد
هزيت راسي وبقيت اباوع بحيرة مسح علىٰ راسي بأيدة
-عوف: لا تخافين حبيبتي ..
رحت وگفت يم قاسم غمضت عيوني بست گصتة بدموع
-رغد: حبيبي
-عوف: يلا يمعودة هي طلقة
وجهت نظري اله باوعت بصدمة
-رغد: هي طلقة ؟؟
-عوف: اي چا جبيرة ابوها هاي مثل الزلاطة يومين ويطيب
گلبت وجهي وزفررت
-رغد: هاي نتيجة عدم انتباهكم لنفسكم شوف
-عوف: يلا بعد روحي اتسرسحي هسة بعدين احجيهن
-رغد: رايحة انه
-عوف: عفية
-رغد: راح ابقىٰ امر مو عبالك رايحة وهايهية ؟
-عوف: مري بوية چا امنعج ؟
مشيت ووگفت بسرعة اللتفت عليه وگلت
-رغد: لتبقىٰ هنا خلي يعقمون الجروح ؟
-عوف: صار
حچيت بعبرة ..
-رغد: دير بالك علىٰ نفسك زين
-عوف: صار بنص عيني
ابتسمت بخفة وطلعت من الغرفة امشي عقدت حاجبي بأستغراب من شفت أصدقاءة الي چانوا بالغرفة مارايحين بعدهم ينتظرون يم الغرفة
صارت عيني بعين واحد منهم تعديتهم وعبرت خجلت من فكرت كُل هلوقت چانوا ينتظرون وانه عبالي راحوا ؟
باوعت للساعة بعد وقت قلبل علىٰ الموعد طلعت من المستشفىٰ ركض حتىٰ اوصل ..
******
فزيت من نومي علىٰ صوت علاليگ تنفتح عقچت وجهي بأنزعاج من صوتهن فركت وجهي ونهضت ...
صارت گدامي منار گاعدة وداير مدايرها علاليگ خضروات هواية رفعت نظري الها مدت رجليها وحطت رجل فوگ الثانية واخذت جزرة تگرط بيها ...
-جُمان: شنو هذن ؟
-منار: مسواگ
-جُمان: أعرف داشوف مسواگ
باوعت للساعة ب٨ ونص الصبح ..
-جُمان: شنو طلعتي من الفجرية تسوگين ؟
-منار: والله لا طلعت ولا فتت مو اني
مسحتتت وجهييي بقلة صبررر
-جُمان: ماتحچييين تقطررين تقطرر بالحچي
-منار: اوووووي داگرط جزراية ونبتت بسنوني
بقيت اباوع الها بأستغراب والقيت نظرة مرة ثانية علىٰ العلاليگ هواية وكُلهن خضروات وفواكه گالت منار
-منار: اني نايمة واندگ الباب
-جُمان: اي ؟؟
-منار: فزيت گلت هذا ياعديم ذوووق واحساس ديدُگ الباب هيچي وقتتتت ميگول بنات نايمات تعبانات وجاي يقطع نوومتييي العزيزة الي ماا ابدلها بـ...
مسحت وجهي بملل
-جُمان: والله العظيم محد مهتم لتفاصيلج الزفت سوولفي
-منار: حسبي الله وينك يا قاسم والله العظيم مرة سولفت اله عن شغلة وي نفسي ماا اسولفها هلگد ما تافهة وسمعهة
-جُمان: ومنو طلع بالباب ؟
-منار: فنج منو ؟
-جُمان: ترى اني جاي أسأل لو اعرف اوگف گدامج هاي الوگفة واسمع سوالفج هاي ؟
-منار: لججج طلععععع نوووور الدييين الي امس وصلنا
فتحت عيوني بصدمةة من الي سمعتة
-جُمان: هو جايب هذا كُله ؟؟
-منار: اي والله اني ردت افشلة واگلة شنو عيوني عرف ولف لو ضربت بالخمسة ويانة بالتشريب بس سكتت
-جُمان: شلون تاخذينهن منه !
-منار: والله لو اسولفلج شلون لطش الله اكببببررر خفت لا يجي واحد من المنطقة ويشوفة واگف ببابنا من الصبح وتصير حچاية علينا اخذتهن دخلتهن بسُرعة وسديت الباب
اخذت نفس وزفررتة بقووة رحت للميز فتحت الجرار وطلعت الورقة الي انطاها الي البارحة رقمة عشتووو همزين اخذتة حتىٰ اعلمة هسة ..
فووتت الرقم وأتصلت بسُرعة جاوبني اجاني صوتة بعده ممكمل الـ الو واني عطتتت بييه بصوووت
-جُمان: بااااااع تعال اخذ كُل علاگة جبتها وما مرخوص بعد توووووصل لباب بيييييتنااا
جاوبني بهدوء من گال
-نور الدين: اهدأي هاي ليش كُل هلعياط علمودهن ؟
-جُمان: شنو تغشم نفسك عم خال جايب مسواگ مال شهر ليگدام وجاي شنو شفتني اجدي بالتقاطع ؟؟؟
ضحك واني اتنرررفزززت منه وگال
-نور الدين: لا والله بس اتسوگت وحبيت اذكركم وياي
-جُمان: لا تذكرنة خوية مشكور وتعال اخذهن رحمة لوالديك
گطعت الخط بوجهة وگلبت وجهيييي ...
-منار: من الصباحيات مغثة من الصباحييات
-جُمان: صدمنييي !! ولككك وين عرررفتنا بعدين شنووو شكينا الك الحااال ومتسوگ النة ؟؟؟
-منار: عافط هذا
-جُمان: تعالي نطلع العلاليگ بالطارمة حتىٰ بس يجي ياخذهن وبعد منار لتاخذيييين شيييي من احدد
-منار: عبااالج قبلت بالي سواه واخذتهن ؟؟ ترىٰ گلت الج ليش اخذتهن بعدين شوفيهن گدامج اخذت جزرة اكرط بيها لأن چنت اعرف بس اگُلج راح ياخذ المقسووم بالرزايل
دخلت اسوي ريوگ النة وسويت ريوگ مختلف لماما وعصير طبيعي فترة وسمعت هورن بالباب ..
-منار: وصل
-جُمان: طلعي انطيهم اله منار كُلهم ولا علاگة تبقين وگُليلة هذا الشيء مو مقبووول !!
-منار: ليش اني طلعي انتِ؟
-جُمان: داسوي ريوگ
راحت كم دقيقة ورجعت باوعت الها وگالت
-منار: اخذهن وفشلتة اني هم ولطش يگُلي ليش مطلعت الي هيه
هزيت راسي وسكتت اجاني صوتها من حچت بتعب
-منار: شسوي جُمان ؟
التفت عليها بأستغراب
-جُمان: شنو حبيبتي ؟؟
نزلت راسها عصرت اصابعها وگالت بصوت خافت يرجف
-منار: ليش حظيي اني هيچ اهل مابقىٰ عندي ابوية محكوم امي واخواني سافروا اخواتي ميسألون عني وين مكاني وهسة قاسم
-جُمان: قاسم ؟
-منار: حتىٰ هو مل مني تلگينة گال ليش اورط نفسي بيها اليوم منو يريد وحدة ابوها مجرم واهلها عافوها
هزيت راسي بأستنكار وجاوبتها
-جُمان: عبالج قاسم عافج ؟
-منار: لعد وين ؟ خط واحد ميتحصل علىٰ الشريحة ومختفي ماا أعرف عنه شي
-جُمان: وانتِ گلتيها ؟ مختفي متعرفين عنه شيء !
-منار: ماا أعرف داحس نفسي منبوذة وكُل شيء يصير بالعكس وياية ليش دائماً ابقىٰ افكر واشيل هم ؟ تخيلي حتىٰ قاسم من يوم الي گلتيلي لهسة اني افكر
والتفكير توسع بعقلي وشفتي وين وصلت بيه جُمان والله الدنيا كسرتني كسرتنيي بأهلي كسرت قلبي وروحي بيهم
اتنهدت بتعب وگعدت گدامها ...
-جُمان: منار اني نفسج تقريبًا شوفي اني ماعندي بهلدنيا كُلها غير امي ! وحتىٰ امي حاربوني بيها وبصحتها ومع هذا كُله بعدني صامدة وعايشة واحارب
-منار: اشتاقيت لأمي ..
گالتها وغطت وجهة بأيدها انسحنت روحي عليها جريت أيدها من وجهة وگلت ..
-جُمان: ادعيلهم يستقرون ويرتاحون أكيد راح تتواصل وياچ بعد خو مراح تگطع بيج ؟
-منار: شالفايدة جُمان صرت أخر سطر بدفترهم رتبو كُل شيء بالاولويات وتركوني بالأخير انهضم من اتذكر بصمتها اليه وشلون تحچي ببرود كُله لأن اني بنظرها هسة متزوجة !!
بقيت ساكتة واسمعها رجعت گالت ...
-منار: حتىٰ اخواتي المتزوجات محد يسأل عنهن اول متصير البنية متزوجة اهلي ينسونها بعد يگولون صارت برگبة رجالها
-جُمان: شنووو هاااي !!
-منار: والله يگولون بعد مو مسؤليتنا صارت بمسؤلية زوجهة وهسة نفس هلحچي صار وياي من قاسم عقد عليه صرت بنظر ماما متزوجة وبرگبة رجال خلص ..
-جُمان: مدري شحچيي !!
-منار: الله يعوض ...
-جُمان: ان شاء الله والله اني حاسة اذا تتعرفين علىٰ قاسم أكثر راح تحبيينة
-منار: اااممم
-جُمان: والله وتتعلقين بيه صح اني عشت عندهم فترة قليلة بس والله ناااس يخبلوون وخصوصاً قاسم متشوفين اسلوبة وي اختة رغد كُلش حنيين
-منار: غير اختة ؟ لعد تجيبيني الها
-جُمان: يمكن يحبج شمدرييييج لعد ليش خطبج مجببور !!
-منار: يحبنييي ؟ ششاف مني ويحبني بعدين منو يحب وحدة مثلي خلينييي ساكتة
-جُمان: هم رجعنةة !!
-منار: بصمة هاية صدگيني باچر لو اخذني يمة صُدگ واهلة عرفوا ابوية مجرم ومحكوم إعدام محد يحترمني ساعتهاا
-جُمان: شعلييج بأهلة ؟ عليج بيه هوو !!
-منار: هوووة ؟؟
-جُمان: ايي
-منار: خيووولي واحد شاايف روحة مغروررر متكبررر صارر اكثر من اسبووووع واني ماا اعرف عنه شي
-جُمان: ترىٰ راح تطلعلي شعرة علىٰ لسانييي من ورراج
-منار: شغل شنو لعد ؟ لچ دقيقة ميحصل حتىٰ يدزلي رسالة لو شيء لا حبيبتي هااااييي كلاوووات
-جُمان: كلاوات ؟
-منار: اي تلگينة يفوت ويطلع وممهتم الي طززز قااابل منووو مناااار
-جُمان: اني ماا اگول بس الله يساعدة عليچ وعلىٰ الغباء الي عندچ
-منار: لعد شتفسرينهاا ؟
-جُمان: لا افسرها ولا تفسرني أبقي تخيلي هيچي متقتنعين انتِ
-منار: زين معقولة صاير بيه شيء
-جُمان: يااا محمد العررررربيييي !!!
مسحت وجهيي بنتر وخليت وگمتت من يمهها
-منار: هاي شنوو مو دا اسولف وياچ
-جُمان: بطلت ماا أريد اسمع
-منار: اكو وحدة متسمع صديقتها
-جُمان: اي اني
-منار: لگط زين لا تكرف كرف صحبااان
-جُمان: دگومي سوي شيء والتهي بيه وعوفي هاي الأفكار والتناقضات راح تفوزين بأكثر بنية متناقضة
-منار: لا اني من زمان متناقضة
-جُمان: وهسة صارر ازيد
-منار: كُله صوچ قاسم من وراه صرت هيچي
شمرت عليها الاسفنجة وگلت
-جُمان: جلفيييي لا افلش وجهج عوفي ليل ونهار تسولفين بطاررريه وتصيحين ممهتمة الة
-منار: بس لاا عباااالج مهتمة ؟
-جُمان: اي لا طبعاً
-منار: اي عبالي گلت متوهمة
باوعت الها وعضيت شفتي واخذت نفس عميييق وزفرررتة لوتيةة ولواتتها مخلوطة بتناقض بحيث متعرف شنو تريد وتاخذ كُل شي بالشقة وتهمل تركيزها علىٰ الي تريده ...
*********
مرت ثلاث أيام انفتح جهاز عوف وصرت كل شوي اخابرة حتىٰ أروح اشوف قاسم لأن نوعًا ما وضعة أستقر باليوم الثاني
بس بكل مرة اسمع هوسة ويگُلث المستشفىٰ انترستت ضباط انواع الرتب ومعارفهم ويرفض انُ اروح للمستشفىٰ لأن ماتفرغ من الناس الي يعرفونهم
باوعت للساعة چانت بـ 4 ونص الفجر وقت أذان نهضت من الفراش طلعت حتىٰ اتوضىٰ جاي امشي وسمعت حركة بالمطبخ
مشيت بأستغراب عبالي بزونة فايتة لو شيء باوعت البيبان كُلها مسدودة وهلوقت منو يگعد يصلي
الي بالبيت تحسهم كفار لا يصلون لا يعبدون الله من طركاعة نزلت ع روسهم ....
اول مفتحت باب المطبخ ودخلت انصدمت بغرور گاعدة بهلفجرية بالمطبخ تسوي كوفي وتخابر ؟!
بسرعة التفتت عليه بصدمة بحلقت عيونها عليه وتلبكت بالكلام صارت تحچي
-غرور: اي اي حبيبتي اني هم اتونست بالحجي وياج اي نحجي بعدين بااي
رفعت حاجبي وقلصت عيوني بشك وهي گالت بتوتر
-غرور: شعندج گاعدة ؟؟
-رغد: علىٰ الجايات انطيج خبر ليش اگعد
-غرور: انتِ شبيج صلفة من واحد يحچي وياچ عدل جاوبي عدل ؟؟
-رغد: ليش شبي جوابي عوج ؟
-غرور: مال صلفات
-رغد: مثلج غير
-غرور: هههههه والله وطلع الج لسان وصرتي توگفين وتردين بوجهي
-رغد: ههههههههه اي والله شفتي ؟ وبعد وبعد اوگف بوجهج
-غرور: اندمج اذا تطاولتي
-رغد: تدرين انه قاسم معلمني علىٰ الزيج بس هسة متوضية من أخلص اجرج بواحد
-غرور: حقج تصيرين صلفة وادبسززز لعد
-رغد: غلطانة حبيبتي انه مو صلفة بس اذا الگدامي تفلة مايسوىٰ ماا احترمة ولا ياخذج الواهس بالحچي وياي ياغرور ترىٰ بكل كلمة تطلع مني يرجع وياها الف موقف وكُلهن يدگن بالراس ...
جحظت عيونها واخذت تلفونها وطلعت تكرف كرف بالمشي ماا ادري ليش نغزني گلبي وحسيت عندها شيء ماا ارتاحيَت الها خصوصاً من توترت
نفضت فكري عنها ورحت صليت وگعدت الحجية تصلي هم اليوم قاسم يطلع ميريد المستشفىٰ أريد اروح للبيت الثاني علمودة ...
*****
-مصطفىٰ: يلا يمعود شيل روحك من خ** بروحك هي طلقة فايتة بصدرك
-عوف: اندري هسة طاگة بوجهك عبوة
-زيد: شو مايتحمل صاير ترف بسرعة يتأذة
-قاسم: ولكم ولد ال**** صچمة هي وطاگة صدري غير طلقة والمكان متخيط أثر العملية
-مصطفىٰ: صير اقوىٰ منها
-زيد: سمعت اخذ بحچي صاحبك
نهض روحة وأتألم حاسين بيه ونعرف الطلقة وشگد متعمقة بالمكان وعمليتها طولت بس احنة هيج طبيعتها من واحد بينة يصير اله شيء ما نحسسه بوجعة وناخذها بالضحك حتىٰ ما يبقىٰ مركز عليها
-عوف: يمعود انتَ متأكد ؟ مكان العملية فوگ القلب يحتاج اله عناية وراحة ماخذك للبيت ادري مصطفىٰ يعتني بيك
-مصطفىٰ: خيولي انه روحي مامعتني بيها
-زيد: چا مو متزوج الأغم جيبوها
-عوف: لك زواجيش شنجيبها ماتنلصم
-قاسم: انه هم اگول انلصم أحسن
-مصطفىٰ: قهرتني والله يلا انه ادير بالي عليك
-قاسم: مابيه شي شتديرون بالكم عليه جاهل انه كم يوم ويروح وجع العملية
-زيد: حبيبي يكابر
-عوف: عزة نفسة ماتسمح اله
-مصطفىٰ: لا تستحي مني ماا انزعك ولا اسبحك بس اگابلك
-قاسم: چا مگابلني المن للفگر
-عوف: سهلات هذن يلا تعال
صعدنة بالسيارة وصاح بصوت متوجع ..
-مصطفىٰ: حبيبي قاسم بطل بطل
-زيد: عود ليش تقشمرون علينا من نتصوب بهلحچي
-مصطفىٰ: چا احسن من ماا اگلة عار وما صار بيك شي
-قاسم: انه انفگرت من عرفتكم هاي ثالث مرة اتصوب ومكان الاصابات قريب
-عوف: علىٰ الجايات مصطفىٰ يشيلها عنك
-مصطفىٰ: لخاطر ربك هاي جروح الي بأيدي ولك اگعد بنص الليل اريد اجر ايدي اروح ا*** وامي لازمتها ماتهدها ادري يمة هديهااا
-زيد: اذا تسحبها تكتلك بالنعال
-مصطفىٰ: والحسن لگيتها واگفة بالباب تگلي ليش وخرت أيدي وگمت انوب زعلت ودخلت رحت يمها ردت مليت ماكو قفلت
-عوف: لو مدخلها وياك لل*** ولا مخليها تزعل
-مصطفىٰ: هاي العايزة
-قاسم: حامد الس** شنو وضعة
-عوف: هذا يمي شغلتة اله اطلع حليب امة من خشمة
-زيد: شفت الإيميل الي رسلتة الك ؟
-عوف: هذا مايفيد عندي شيء يثبت هو السبب وهذا الدليل كفيل يبلعة عقوبة يزين شواربة من وراهة
-مصطفىٰ: اويلي أريد ادگة بنعال وانه اشوفة بالع عقوبة ومنزلين رتبتة
-قاسم: من زمان حاس بيه يلعب بس من جوة ليجوة
-عوف: خوينس مستغل مكانتة
-زيد: ياخي الرتبة استحقاق خرب بشرفه
-قاسم: شبسرعة أترفع حصل رتبتين خلال سنة وحدة
-عوف: حرر الطرشي
-عوف: كل سوالفة وفسادة وحدة وحدة احطهن گدامة ولك انه عايفة بس مال يوصل يمي ويعرضني بمهمتي للخطر اشعل ابوه وابو الخلفة
-قاسم: كم مرة طلع منها هو
-عوف: يدبرها بالشهود والسياسين الي عندة ويطلع من فسادة
-زيد: المكالمات سحبتهن بالفلاش
-عوف: محضر اله گعدة مررتبة تليييق بمكالماتة وتخطيطاتة وفسادة المضموم
*****
علىٰ أربع ايام ضبط بكُل ليلة اطلع اشوف الطارمة مشمور بيها ورق مشگك وبكُل مرة نفس الشيء ورقة متفرقة عنهن ومرسوم عليها نقطة
مرة ومرتين گلت هاية منار بس هسة اقتنعت مو هية ؟ ولا فد يوم شفتها لازمة ورقة لو شيء
حكيت گصتي بتوتر شنو وضع هاي الاوراق وشنو موضوعهن منو ديشمرهن علينا
بالأكثر انصب تركيزي علىٰ النقطة شنو هاي النقطة ماا اچذب بس صار عندي خوف تملكني خفت .
ومن شفتهن صارن ينشمرن بأستمرار يوم ورة يوم انبث الرعب بداخلي صرت أتمنىٰ أعرف منو ديشمرهن
لامة نفسي وگاعدة بنص الصالة وأفكر بموضوعهن ماگلت لمنار حتىٰ لا اخوفها وهي بسرعة تخاف وراح تزيد قلقي وتفكيري بيهن
فكرت اليوم بالليل أشغل كاميرا تلفوني واضمة بالطارمة حتىٰ اعرف مصدرهن منين وشنو الغاية منهن مخابيل ديشمرونهن علينا شنو !!
مرات اگول اخاف أطفال يلعبون ويشمرونهن وأرجع أنكر تفكيري الي مو واقعي ابداً طلعت ورقة النقطة لزمتها بأيدي وصفنت بيها
واني أيدي ترجف مثل السعفة احس الي لازمتها هاية شيء ديخوفني ديخربط توازني ويشتت تفكيري
انطرق باب بيتنا بالليل وگفت وحكيت رجلي بالگاع بتوتر صرت أخاف افتح الباب سميت بأسم الله ومشيت وگفت قريب عنة اخذت نفس عمييييق وگلبي يدُگ دمام
رجع انطرق طرقات طرقة ورة الثانية بس بخفة عضيت شفتي وصحت بصوت
-جُمان: منو ؟
رمشت رمشات سريعة من اجاني صووتة ما صدگت نفسي سمعتة فتحت الباب بسُرعة واحس گلبي يريد يطلع من صدري
بللت شفتي ودمعت عيوني من شفتة گباليي بعد هاية المُدة كُلها أحس روحي تريد تطفر مني وتروح اله
ثبتت نظراتي عليه وارمش سريع والابتسامة تلقائياً انرسمت علىٰ وجهي من اول ماعيوني شافت عيونة همست بصوت خاافت
- عووف ؟!!
ابتسم تك خد واجاني صوتة المبحوح من گال
-هـلا يـا روح گلبـة ولـَِذة عيونـة .
