رواية الندم مابعد الخطيئة الفصل الواحد والثلاثون بقلم رونق
جان يكول للاسف مكملت اجراءات المحكمه اليوم خميس وتعرف نص دوام
اني تخبلت لا احمد لتكول مااطلع اليوم ولك روحي طلعت من السجن
حجه مهند اعصابك ياعيني لتنسى يامرتضى هذا كله من وراك انت ممصادق غير بس السكاره والساقطين وثانيه وبعد محد جبرك تنطي سيارتك لازم تدفع الثمن وتتحمل النتيجه
حجه احمد لعد لو اكلك شي بعد شراح تكول
احجي شكو بعد
لازم تتحمل ليوم الاثنين
ليش عود
لان باجر جمعه وراها سبت وحظك الاسود جملها الاحد عطله
خرب بيك محمد والله اذا اشوفك اله اكفر بيك
حيل ضجت وروحي طلعت
اتحمل ياعيني مابدينه شي والله عملنه المستحيل حتى انطلعك بس اجت عكس وياك
هاي هي مشكورين وتعبتكم ويايه
هاي شبيك مرتضى يمعود كول ياالله
بقينه شويه وراحوا ورجعت للسجن شعوري مينوصف ابد عبالي الحك ع العطله وكلت اطلع روان ونروح نزور سويه بس هذا حضي المصخم
لكيت رسائل من روان تسالني تكول خاله شتحب نسويلك غده هواي دازه ومخابرتني تركته للجهاز لان ضايج حيل
الي مضوجني اكثر وحدي لا احد احجي ويا لا اكو شي اتلها بي نمت بدون غده كعدت يمكن ماذن ومخلص
كعدت ميت جوع الشرطي صاحني ع مود العشه طبعا اكلهم مو طيب حيل والمشكله الاكل الي جابو الي مهند واحمد الي اكلته والي انطيته للحرس كلت هو راح اطلع شلي بي بس هسه جوعان كلت للشرطي فدوه خلي انطيك فلوس جيبلي عشه الي والكم اي شي
وهذا الاكل شبي
يااخي والله مينبلع مو طيب
شتريد اجيب
بكيفك جيبلنه نص كيلو كباب الي والكم وجيبلنه قواطي ببسي
انطيني الفلوس وخل اشوف بس يصير عندي مجال بسرعه اجيب
انطيته فلوس والله صدك وره فتره جابلي الكباب وصمون وقواطي
كتله ليش كله انطيتنياه
كال اخذ الي يكفيك وعود الي يزود دزه النه
اوكف اخذت كفايتي وانطيته الهم كعدت اتعشيت وشربت ببسي كملت غسلت ورجعت لفراشي كلبت بالفيس شويه مااكدر اعلق بعدها اتذكرت روان
رحت للفايبر لكيتها هواي مراسلتني وجانت قلقه عليه اني غبي المفروض اجاوبها ملازم هيج اخليهم قلقين عليه
دزيتلها الوووو
اسف مجنت اكدر اجاوب لان مراقب ماكدرت اكلها غير شي ماكو جواب بقيت انتظر بس ماكو جواب
بعدين كلت خل اراسل شهد واطلب منها تحجي وي روان
فعلا راسلت شهد وبقيت احجي وياها بعدها كتلها كلي لروان خل تجاوبني كاعد اراسلها ومتجاوب كالت جوه روان وجهازها هنا ملتهيه بالخطار ناس رايحه وناس جايه
لعد بس تصعد خلي تراسلني راح انتظرها
اوك
بقيت التهي بالفيس لان حتى احمد ومهند مجاوبوني الظاهر يم اهلي
طولت روان وحيل ضجت مااعرف ليش هي الوحيده الي اتمنى احجي وياها واني بالسجن
عيني ع الجهاز منتظر رساله منها ع نار واخيرا جاوبت ورجع الدم بوجهي
هلو مرتضى
هلو روان شلونج
تمام وانت
اني زين اذا انتم زينين
ليش مجاوبتني وخليتني بقلق
اسف مكدرت اجاوب ابد وهسه اكيد سويتيها وحده بوحده هم شلعتي كلبي يله جاوبتي
والله ملتهيه وي الخطار واكفه ع حيلي هسه يله سبحت وكعدت
منو الي اجه
والله ماادري ناس رايحه ناس راجعه اهل الولد صديقك همين
انت شتسوين
اسوي الجاي واحضر مي واكفه بالمطبخ
اسف تعبتي اكيد ومن ورايه
لا متعبت اصلا ماعندي شي
تعرف جهزنه كلشي تحبه خاله طبخت ع مودك وعبالنه تطلع وجنه فرحانين بس من سمعنه الخبر وقلبوا علينه حيل ضجنه
شنو منو الي قلب عليكم
غير اهل صديقك
ليش شلون قلبوا
شنو متعرف بالموضوع
لا مااعرف اي شي احجي خل اسمعج
لعد ماكو شي اني متوهمه اكيد
روان احجي الصدك شكو
ماكو شي لتخاف
احجي لخاطر الله كمت افور شنو الموضوع وشنو السالفه الي محجوها احمد ومهند
عفيه مرتضى خلي اهلك همه الي يحجون ميجوز اني احجي عيب منهم والله عبالي تدري
روان روحي طلعت وصبري نفذ لتكفريني بالدنيا كلها
اخاف تصير مشكله من ورايه
احجي مراح اكول روان كالت شي
اهل صديقك رفضوا يطلعون الرجال للخارج يكولون مانكدر للتكاليف هواي واحنه ماعدنه
واهل الرجال مقبلوا يتنازلون
شنو هالحجي بكيفهم غصبا عليهم يتكلفون علاج الرجال اني شنو ذنبي ابقى بالسجن
صارت عركه شكبرها بينهم وبين عمو ومهند واحمد راحوا هددوهم ومهند واحمد راحوا لاهل الرجال واتفاهموا وياهم كالولهم حرام عليكم تسجنون شخص بريئ والولد المذنب مسافر وهرب لازم تهددون اهله حتى يرجع وتاخذون حقكم وفعلا اقتنعوا بالكلام وبدوا يهددون بيهم يله جروا عدل واجوي كاموا يبوسون رجلين
حيل بيهم انعل ابوهم لا ابو خيرهم خلي الكفه لمحمد والله اله اعرف شغلي وياه بسيطه تهون
هسه شقرروا
اتفقوا يسافرون لاربيل يعالجون الرجال
هو شنو البي بالضبط
والله مااعرف
اكلج الجو شلونه يمكم
والله بارده حيل موجة برد كالوا تستمر اسبوع
عبالي بس يمي
شلون اكو بطانيات يمك تدفئه لا
لا يمعوده ليكون متصوره كاعد بفندق 5 نجوم
بس بطانيات اكو
زين اذا بارده شلون سبحتي هسه
تعبانه والله لو ماسبحت حيبقى التعب بيه
شعرج مبلل بعده لو لا
لا نشفته ومشغلين التدفئه اني وشهد
عبالي
شلونه السجن وياك
يمعوده خليني ناسي شويه لان متتوقعين شلون ضايج وروحي طالعه
انت شلون تنطي سيارتك المفروض تحسب حساب لهيج موقف
والله مااعرف شعماني وكلت عيب منه اول مره يطلب مني شي
يله صار الي صار وان شاء الله تهون وتبقى بس سوالف
ان شاء الله امي شلونها
بس تبجي ليل نهار وماكله كلب عمو خطيه روح كلف محامي روح للناس
والله ماكاسر ظهري غيرها خطيه لو تدرين شكد شايل الها هم
اليوم اجوي بيت عمك وبقوا يحجون عليها يله سكتت خطيه
شلون راح اصبر بعد 3 ايام مااعرف وفوكاها بوحدي بالسجن
الله كريم صلي واذكر الله
اكيد
اريد اطلب منج طلب
اطلب الي تريده
عفيه دائما جاوبيني لان ضايج وماعندي غيرج احجي وياها شويه اخفف عن نفسي
تدلل من عيوني سهله حتى اذا اجوي خطار ميهمني اجهز الجاي واراسلك باي وقت
حيل فرحت من هيج حجت
شوفي احسبي حسابج باجر نسهر سويه للصبح هسه نامي وباجر هم نامي الظهر اني اطلب من شهد تساعدج
لا عفيه عوفها شهد خطيه مريضه مو مالت شغل اني جبتها حتى ترتاح
لعد وانت
اني شعليه قابل شمسويه اشو بس الجاي وميتعبد
اي مبين
انت معليك باي وقت تريدني اني حاظره
اكيد راح اضوجج وراح ازعجج ويايه
لا بالعكس والله ماعندي شي اشو عطله وماعندي اي شي كاعده وساكته
هسه روحي نامي اكيد نعسانه
لا منعسانه ابقى شويه بس اخاف انت نعسان
اني قبل شويه كعدت اصلا نمت الظهر حتى بدون غده لليل يله كعدت
صدك شتاكل وشتشرب
والله اكلهم ابد مينوكل رغم ما دجاج ولحم بس مو طيب من يجون احمد ومهند افرح من يجيبولي اكل والبارحه تدرين الاكل الدزيتوا وزعته كله عبالي اطلع واليوم كتلني الجرع 😂
لو مخلي الكليجه
شمدريني بعد
اخاف يجي احد كلي لامي خلي ادزلي اهم شي كليجه وكيكه يفيدني
صار تدلل باجر الصبح اني وشهد نسويلك
اي والله ياريت
زين شاكلت اليوم
دزيت عشه من بره بيد الشرطي
زين والله شلون جابولك
انطيتهم فلوس وجابولي الي والهم
روان
ها
مشتاقلج
مااعرف شلون كتبتها
مجاوبت
اسف اعتذر منج
ع شنو تعتذر
ع زلت لساني
عادي ولا يهمك
لعلمك حتى احنه مشتاقيلك
منو انتوا
خاله وعمو
وبعد
شهد
وبعد ايات همين
وبعد
مهند همين
مهند شافني اليوم ومااعتقد مشتاقلي 😂
اي وبعد
ماادري بعد
لعد نسيتي اهم شخص
منو 🤔🤔🤔
هيج عوفيها مو مهم عبالي انت تعرفين من ذاتج
طبعا اتمنى تقوه علاقتي بروان واتمنى تتقبلني ك زوج لازم اني اتحرك واحجي وياها ميصير اسكت راح احاول وياها شويه شويه
سكتت مجاوبتني واني هم مراح الح عليها
روحي نامي اخاف تعبانه
تصبح ع خير
وانت من اهله
محبيت الح وياها خليها لباجر احاول احجي وياها
حاولت انام بس مكدرت بقيت بس افكر بروان هم يجي يوم وتتقبلني واني اتقبلها وننسه الماضي لو راح تتمسك برايها وتطلب الطلاك بعد ال 6 اشهر
مااكدر اجبرها تبقى ويايه يمكن راح تكون صدمه للكل اذا اطلكنه لازم ابدي اتقرب منها واحاول اقنعه اي لازم مراح ابقى مبتعد عنها
بقيت كاعد لمن صليت الصبح ونمت كعدت ثاني يوم ب1 الظهر ع هوسه جايبين يمي 2 شباب اخوان سلموا عليه وكعدوا
همه منعزلين بيناتهم يسولفون وره شويه جابولنه غده كعدنه سويه اكلنه بدوا يسالوني ع شنو مسجون كتلهم قصتي وهمه هم سولفوا قصتهم كالوا احنه عدنه محل احذيه اني واخويه واكو بسطيه اباب المحل اخوي بالمحل واني بالبسطيه اجني ثنين نسوان ام وبنتها سالني ع السعر كتلهن بالسعر اشو هاي البنيه دخلت ع اخوي اخو كمل فتحت عبايتها وجانت ملابسها مغريه كلش كالت تعال وين ميعجبك باي مكان اخذني مقابل ورقه اني بقيت مصدوم لحضات وكتلها روحي حبابه شغلتج مو يمي اطلعي بره
هاك شوف زين انت متاكد تطردني
اي متاكد روحي اطلعي عسى الله يهديج الصراحه اني ماانغر بهيج نماذج تعبانه وخاصه اني هستوني متزوج صارلي 3 اسابيع وزوجتي عن حب متزوجها
اشو هاي كامت تصيح امها تعالوا الحكوني هذا اتحارش ابنتي بقيت صافن اني
هاي شدتحجي اصلا اني طردتها لمت الناس عليه الي كام يحجي والي مصدك جماعتنه يدرون بينه هاي البنيه اتصلت بشخص لحضات وجان يجون اربع اشخاص فلشوا البسطيه وطشروا الاحذيه اتضاربنه احنه والولد جماعتهن ضربوني سجينه بظهري بس احنه هم مقصرنه وياهم اذيناهم اجتي المفرزه اخذونه همه قدموا بلاغ واحنه قدمنه بلاغ بس اشو سدوها كالوا دعوه مقابل دعوه ودم مقابل دم بقينه صافنين همه طلعوهم واحنه بقونه بتهمة التحرش
صدك تحجون هاي فوك محلكم وفوك ضربكم هيج يتهمونك
هاي بعد دولتنه تاه بيها الحق والباطل كله سوه
ذني الساقطات حشاك مشتكيات علينه وبدورهن نسوان الحق وياهن
هسه الشرطي يسولف يكول ذني متعودات هيج يسون ع مود ياخذن فصل يله يتنازلن
وهسه شراح تسوون
اخونه كلف محامي كال والله اله اسويهن عبره لغيرهن
الله كريم ان شاء الله براءه
الله يسمع منك حبيبي مشكور بقينه نسولف وغيرت جو وياهم الجهاز مطلعته خفت
للعصر جابولنه شاب شايل جمال مو طبيعي ومبين عليه ابن خير مو مالت سجن ابد
جان يكولون الشرطه بهدوءاحذروا منه هذا مجرم كتل ابوه
ياعلي دخيلك اكو شخص يكتل ابو اتفقنه نكون بعيدين عنه مراح نتقرب عليه
لليل اجوي اهل الاخوه جايبين عشه اشكال واللوان جميع انواع المشاوي ولبن وعصير وببسي وفواكه ناس رايحه ناس راجعه عليهم
صاحونه حتى الولد المجرم اجه كعد ويانه وجان حيل جوعان مبين عليه
مبين عليه حباب بس المفروض منحكم ع الشكل ابد
ذوله الاخوه مدخليلهم اجهزتهم واحد منهم بده يراسل همزين حتى اطلع جهازي مااخاف منهم
حجه هذا الولد المجرم وي واحد من الاخوه ممكن استعمل جهازك بس اطمأن بيها ع شخص ظروري
اي هاك حبيبي اتفضل
اتراسل الولد بس اشو هذا صار اعصاب وكام يغلط ويسب نريد نفهم الموضوع بس ماكو
كال مجبور احجي مخابره الله يخليكم والله الشغله ظروريه حياة وموت
مو اخاف احد يحس بينه والله نتعاقب
اني اواعدكم وعد شرف اني اتحمل اي شي يصير والله مسالت حياة او موت ميفيد رسائل
اتفضل انطيته جهازي لان خطيه مبين عليه محتاجه
الولد مقبل كال هذا جهازي كدامه مو مهم
خابر يحجي ع كيف بس باعصاب
اسمع امير وحق الله اذا صار شي ع زهراء لو حاولتوا تلمسون شعرايه منها راح ارتكب جريمه من صدك انتوا تعرفون ليش كتلته
لك لتكفرني وحق الله انطي العندي والماعندي وااجر قاتل اخلي يكتلكم واحد واحد اذا صار شي بزهراء
لك انت مو تعرفه عمك عار ومنحط لتخليني اكلب الدنيا
اخر كلام عندي والقران زهراء اذا نمست شعرايه منها احركم عدلين واحد واحد وطبكه بوجهم
الله يلعنكم ويلعن ابوي بالاخره
ع كيفك اعصابك يااخويه خشمك طك دم
يمكن ضغطه صعد غسلناله ونيمناه
هسه كون طير واطير للبيت اله احركهم واحد واحد
حسيناه اتخربط صحنه الشرطي كناله هذا اتخربط مقبلوا يسعفونه بس بعدين كمنه نحجي اجوي اخذوا بقينه بقلق عليه يمكن ساعتين ورجع
جابوا كبل نام خطيه
دخنه بي كلنه بلكي باجر نفهم موضوعه شنو
بدينه كل شخص التهى بجهازه
فتحته جهازي لان من اجوي الولد اقفلته خفت منهم وبعدين نسيته
اجني رسائل هواي من روان ومن احمد ومن مهند
احمد يسال عني وعن معنوياتي ومهند يسالني شمحتاج يردون يجون باجر راسلتهم اثنينهم وبعدها التفتت لروان
حيل قلقه عليه طبعا ممصدك بروان هيج قلقه
اول مدزيت هلووووو
دزتلي باللحظه هلووووو مرتضى
هاي وين صرت بربك لويش هيج تعيشنه بقلق
اسف والله مو قصدي بس اجوي مسجونين يمي وخفت افتحه للجهاز لمن هسه امنت يله
شلونج شخبارج امي وابويه شلونهم
زينين الحمد لله وولو عيشتهم بقلق اليوم خطيه لان ماكو اي جواب منك
خطيه والله مو بقصد
راح انزل اطمنهم عليك وارجع
لتتاخرين راح انتظرج
اوك
صدك ثواني ورجعت
كالت خطيه فرحوا وخاله تسلم عليك هي وعمو
الله يسلمج
شكو ماكو
ماكو شي سلامتك
شهوده شلونها شخبارها
تمام الحمدلله
اليوم هم اجوي خطار لا
اي اجوي واليوم خصموها وي الناس راح يرحون باجر مشيه لاهل الرجال وراح ينطون فصل وبعد معليهم لا بطبيب ولا بغيرها
بعد احسن اهم شي خلي يتنازلون لان من صدك مختنك بالسجن
ان شاء الله يتنازلون وتطلع
بس اطلع اخذج للنجف ولكربلاء نبقى يومين اكثر
صدك تحجي
اي والله بس خلي اطلع جنت حاسب اطلعج بالعطله يوميه بس طلعتلي هاي صفح اله وي عطلتج
عادي ماصار شي اهم شي تطلع من السجن والباقي مو مهم
الله يسمع منج
طبعا اني مطفي اليوم حيل نعسان لحضات وراح بالي بعيد لايامي وي مريم بين النايم وبين الكاعد اتخيلت مريم كبالي
دزيت لروان اكلج مريومه طبعا مجنت منتبه ابد وخطأت بالاسم
هي غلست محجت شي بالبدايه واني ممنتبه
تكدرين تتصلين فيديو بس بدون صوت
لويش
لان مشتاقلج هواي فوك متتصورين طك كلبي عليج
مجاوبتني وجان اخطئ نفس الخطئ واعيد الكلام
ها مريم اشو سكتي معقوله ممشتاقتلي ممشتاقه اللمساتي ممشتاقه لبوساتي وجان انتبه ع نفسي باللحضه احذف الرساله ماادري قرتها لو لا
انتبهت ع الرساله الي قبلها مااعرف شلون هيج خطأت بالاسم ومااعرف شلون اجه اسم مريم ابالي وشلون صارت صورتها كبالي مرات الواحد يروح بغير عالم مجرد لحضات ويرجع للواقع اني هذا الي صار ويايه شكد حنت نعسان باللحضه طفرت وطار النوم من عيني
هي مجاوبت شي واني بعد مااعرف شاحجي رحت غسلت وجهي وطبعا الجو اليوم مو طبيعي ثلج السجن عباره عن مجمده وشكد متغطين ولا كانو
رجعت دزيتلها اسف روان
مجاوبت شي لان اصلا ماقرتها
اني شكد غبي اريد اصلح وضعي وي روان رحت لصتها بالزايد
روان فدوه جاوبيني والله اسف مجان قصدي ابد
قرتهن ودزتلي
ع شنو تتاسف مصار شي اصلا لتهتم من حقك تتذكر زوجتك الله يرحمها ولتنسى علاقتنه اني وياك مجرد حبر ع ورق مومهم شنو تحجي كدامي لو شنو تغلط بالاسم عادي مو مهم مشاعري ابد
لاتحجين هيج روان انت زوجتي واكيد مشاعرج تهمني والله ماادري بنفسي وهيج حجيت اسف
لتتاسف مصار شي مثل مكتلك وهسه اذا تسمحلي اروح انام لان حيل نعسانه
ادري بيها ضاجت ومن حقها اني غبي المفروض مااذكر هيج كلام كدامها
روحي نامي اخذي راحتج
النوم طار من عيني وذوله الاخوه المتزوج هستوه مبين سهران هو زوجته بس الثاني نام وهذا الولد هم نايم
كمل الولد مراسله اني ملتهي بس بالفيس اكلب واحس بملل مو طبيعي
حجه ويايه ها اشو منمت
والله مااجاني نوم
متزوج انت لا
اي متزوج
عندك اطفال
لا بعدني صارلي 4 اشهر من متزوج
يعني مثل حالي جديد بعدك لعد شبيك ضايج
الصراحه حبيت احجي الي بكلبي حتى ارتاح
كتله اني متزوج قبلها بنت عمي واتوفت وهسه اتزوجته وقبل شويه اتوهمت باسمها وحجيت وياها ع انها زوجتي بنت عمي الله يرحمه
لا ياالله اكيد لصتها ع البنيه
اي والله حيل ضاجت وعافتني ونامت
لعد انت شلون هيج تسوي
والله ماادري رحت بغير عالم وصارت بنت عمي كبالي واتصورتها وكمت اكتب وماادري بنفسي
الله يساعدك 😂😂😂😂 اكيد البرد والبعد اثر عليك بس انت المفروض تتصور الجديده مو القديمه بس بيناتنه الحجي مبين تحب بنت عمك وهاي الجديده متحبها
بنت عمي الله يرحمها قصت حب قبل الزواج وبعد الزواج حبيتها بعد اكثر بس هاي انجبرت اتزوجها وعود كاعد احاول اتقرب الها رحت لصتها
ههههههههههههههههههههههههاي والله الظاهر انلاصت يخويه تعال طكلك جكاره وراح ترتاح وباجر راح تنسى وتراسلك اكيد
مااشرب جكاير عود صارلي فتره
وكطعتها
زين تسوي والله
اليوم حاب اشرب جكاره
لا يمعود اذا ممتعود عليها خلي تولي لان راح ادمرك اذا تعودت عليها
هم صدك خلي تولي
بقينه فتره كاعدين اتبادلنه الصفحات ودخلني بكروبات حيل حلوه
بعدها تعبنه ونمنه كعدنه اليوم صادف سبت لكينه الولد هذا المجرم وواحد من الاخوه كاعدين ويسولفون سلمت عليهم ورحت اتوضيت وصلينه وكعد هذا الولد الثاني سمعت اخو يصيحله سرمد واخو اسمه سيف كملنه صلاه وجابولنه غده تمن ومرك بيذنجان ردنه نتغده وجان يصيحون سيف وسرمد زياره طلعوا كلنه عيب خلي نتظرهم لمن يجون يله نتغده
وره فتره اجوي وجان جايبين وياهم غده وفواكه وعصائر
همزين بعدكم مماكلين منتظرينه جايبيلنه مندي وروبه
كعدنه اربعتنه اكلنه لمن شبعنه اتشكرنه منهم طبعا حيل طيب الاكل كملنه وجابولنه جاي طبعا بفلوس كملنه شفنه الولد هادئ سالناه ع اسمه كال اسمي ميثم
اتجرأنه وسالناه شنو السبب الي خلاك تكتل اخوك
راح اسولفلك قصتي بس اريد وعد منكم متحجون شي كدام الشرطه ولا كدام اي احد
واعدناه كلنه
كال اني اريد احجيلكم قصتي ولو مستحي شلون احجي هذا الكلام مااعرف بس لازم احجي لان احس كلبي راح يطك واتمنى تساعدوني
كول اامر امر من عيونه تدلل
مايامر عليك ظالم حبيبي
شوفوا احنه 2 ولد و3 بنات 2 متزوجات غربه وحده بعدهي بس هاي شايله جمال الكون كله حيل حلوه نخاف عليها من الهوى الي يمر ابوي للاسف سكير وطايح حضه الى ابعد الحدود دائما يدور بنات ومن بزره يوميه مفشلنه وي العالم ويوميه نتهدد امي خطيه مره سمعت بي متحارش وي خالتي متحملت الصدمه صار بيها جلطه وانشلت قبل سنه اخويه استشهد بسامراء وحيل اثر علينه وابوي ولا هامه الامر ايام الفاتحه كلها هو سكران وميدري بالدنيه شبيها مابيها
يروح للمدارس ويتحارش بالبنات وشكم مره اخذته الشرطه وينسجن وهو ولا كانو عرضته ع طبيب نفسي وبده يعالجه بس هو كام يرفض يروح
قبل شكم يوم شفت اختي مو طبيعيه وجها اصفر وخايفه سالتها شبيج تكول مبيه شي هي معتنيه بامي خطيه قايمه بواجبها ع اخر شي
اشو اختي احسها ورده وتذبل كبال عينه بدت متاكل هواي وضعفت شكد حاولت احجي وياها بس ماكو فايده لحد ما قبل يومين جنت طالع عندي شغل مو بالمحافظه رجعت بالليل وجان اشوف صدمت عمري اختي غركانه بالدم وترجف وابوي كبالها مقتول اني اتخبلت ركضت عليها حاولت اخليها تحجي بس ماكو فايده مصدومه امي بس تبجي ومينفهم شي منها اتصلت ع اخواتي حتى يجن يدخلنها للحمام حتى ترتاح ونفهم منها
اجت وحده من اخواتي كامت تصيح سكتتها كوه سبحت اختي وطلعن وجانت منهاره اعتقد من الي سمعته
اخذتني ع صفحه جان تكول ابوي مستغل غيابك وضعف امي ومحاول يعتدي عليه
لاختي ومدافعه عن نفسه وهي كاتلته لان ممتحمله الصدمه والله
تقبل ترضه حيل بي هذا حرامات هيج مات
بسهوله هذا المفروض ينحرك عدل حتى يصير عبره
لعد شلون انت نسجنت
اني اعترفت كلت اني قتلته مااكدر اخلي اختي تدخل السجن زحمه عليه وثانيه وبعد حالتها النفسيه مدمره دمار
وكلنه محامي وحجيت اله كل الحجي بس ماذكرت اختي الي قتلته كتله اني من شفته هيج مسوي باختي متحملت وقتلته وكال احاول اساعدك ولو اني متاكد محد راح يكدر يساعدني لان عمامي هم موكلين محامي لان اساسا يضوجون من عدنه لان عدهم ابن نسخه من ابوي يشرب ويكبسل ويدور بنات ويردون يزوجنه اختي هاي واني اتعاركت وياهم وعاندتهم كتلهم لو ع كص ركبتي مااقبل انطيها اله وهسه استغلوا الوضع يردون ينتقمون مني ويردون يزوجوها اله هسه ع ابو نستر عليها
طبعا اني جوابي الهم لو يموت لو يبقى بس هو بالعالم لو احس اختي تبقى بدون زواج مدى العمر مراح اوافق عليه
اني هسه الي اطلبه من سيف وسرمد شوفولي ناس ثقه من اقربائكم معارفكم يشوفولي بيت ايجار واتفق وي اختي ورجلها يجيبون امي واختي وبالليل حتى ياخذونهن للبيت بدون علم احد واريد انخاكم نخوه واريدكم متفشلوني تمرولهن بالاسبوع مره وحده تسوكولهن احنه حالتنه الماديه كلش زين واخلي اختي تنطيكم فلوس المسواك وراح اطلب منهن ابد ميطلعن ولا يلتقن باحد حتى اخواتي لان خطيه هاي اذا تزوجت راح يدمروها ع الاخير
غالي والطلب رخيص اني راح اتكلف موضوعهن كله وراح اخليهن بين عيوني والله
سالمه عيونك خطيه حضنه وتشكر منه
اني حجيت وياه راح احجي بس مااريدك تقاطعني ابد
تدري اذا تسلم اختك وتعترف اهون الك واله
اول شي راح تطلع باسرع وقت احتمال بس
حق العام لان دفاع عن النفس والقانون وياها
اكيد وثاني شي راح تكون اامن الها بالسجن
وانت راح ادير بالك ع امك وتكدر تساعد
اختك هسه اذا انت نسجنت هنه ماعدهن
احد وراح يتبهذلن بالايجار امك مريضه لا
سامح الله اخاف تتخربط عليها منو الها
خطيه وهاي اختك ماتكدر وحدها
اشو الاخوه هم شجعوه كالوا صدك والله
احسن وبيت عمك راح توكف بوجهم انت
ولتنسى اامن الها والله حتى لو سجن ارحم
من الوحوش الي بره
كدرنه نقنعه كال راح اخبر المحامي
اكول صدك الي يشوف مصايب العالم تهون عليه مصيبته
كال اريد جهاز خلي افهم اختي حتى تروح لامي ولاختي وتفهمهن
فعلا راسل وطول هالمره من جهازي كمل
واتشكر من عدنه كال حتى اخواتي هيج
تفكيرهن يكولن احسن لان بيت عمي كاعد
يضغطون ع امي واختي راح يروح نسيبي
هسه للمحامي ويفهمه
بعد فتره اجوي صاحوني كالوا زياره الك
رحت وجان اتفاجئ بلي جايين يزوروني ابد
ممتوقعهم نهائيا وجان افتح عيوني من الصدمه
